ئەڤرۆ نیوز ، نەوزاد ھلۆری:

ئێڤاریا ئەڤرۆ ل یاریگەھا شەھید فەرەنسو حەریری ل ھەولێر مەزنترین کەرنەڤالا سەربخوەی یا کوردستانێ ب پشکداریا سەرۆکێ ھەرێما کوردستانێ و ب بەرھەڤبوونا زێدەتر ژ ١٠٠ ھزار کەسان ب رێڤەچوو و تێدا سەرۆکێ ھەرێما کوردستانێ گوتارەک پێشکێشکر و دیارکر کو نھا بریارا ئەنجامدانا ریفراندۆمێ ژ دەست حزبان دەرکەفت و کەفتە دەستێ گەلێ کوردستانێ ، و من دڤێت بو خودێ و گەلێ کوردستانێ بێژم ئەز ئەو کەس نیمە کو خوە شەمبزارێ گەلێ کوردستانێ بکەم و ریفراندۆم دێ ھێتە ئەنجامدان.
مەسعود بارزانی سەرۆکێ ھەرێما کوردستانێ دناڤا کەرنەڤالا سەربخوەی یا کوردستانێ ل ھەولێر دیارکر کو ریفراندۆم بو دەستنیشانکرنا سنووران نینە ، بەلکو پێنگاڤا ئێکێ یە کو گەلێ کوردستانێ بێژیت من دڤێت سەربخوە بم و گۆت: ( ئەڤرۆ ئەم ل ڤێرە بەرھەڤبین و ب ئێک دەنگ ب ناڤێ خەلکێ کوردستانێ بێژین بەلێ بو سەربخوەیێ ، و رەنگە زور کەس پرسیار بکەن بوچی نھا ریفراندۆم بھێتەکرن ، بەلێ من دڤێت بێژم کو ئەڤە چەندین سالە ئەم وەکو گەلێ کوردستانێ گەھشتینە وێ باوەریێ کو نکارین ل گەل بەغدا بژین و پێدڤی یە چارەسەریەک بھێتە دیتن و ھەڤپشکی بھێتە قبولکرن و دەستوور نەھێتە بنپێکرن و تەوافق ھەبیت ، بەلێ پشتی سالا ٢٠٠٣ دەرفەتەکا نوو بو خەلکێ عیراقێ ھاتە پێش کو ژیانەک نوو درۆست بکەن و خەلکێ کوردستانێ ژی ھوسا ھزرکر کو پشتی ھژمارەکا زور یا کومکوژی و جینوساید و کیمیابارانکرن و قوربانیان و ئەنفالێن ب سەرێ گەلێ کوردستانێ ھاتین وژدانا جیھانێ ھژاند و دێ بەغدا قەرەبو کەت کو پێکڤە بژین ، بەلێ ب مخابنیڤە بو مە دەرکەفت کو زور ژ وان کەسێن کو دەستھەلاتدارن ل بەغدا بتنێ سەر و چاڤێن وان ھاتینە گوھرین ئەگەر ھەمان ئەقلیەتا کومکوژیان ھەیە ، و ل ٢٠٠٣ بو ٢٠٠٥ پشتی کو دەستوور ھاتیە نڤیسان و گەلێ کوردستانێ ئەو دەستوور رزگارکری و دەنگێ بەلێ بو دایی و ئەم وەکو گەلێ کوردستانێ رازی بوون ، بەلێ عیراقێ دەستوور بنپێکر و توافق نەھێلا و ھەڤپشکی قبول نەکر و میزانی و چەک نەدا پێشمەرگەی و بودجە و موچەیێن فەرمانبەران برین کو ئەڤ یەک ژی جورەکێ ئەنفالێ بو)
زێدەتر گۆت: ( بریار بو کو دەولەتەکا مەدەنی و فیدرالی بھێتەدانان ل عیراقێ پشتی سالا ٢٠٠٣ ، بەلێ دەولەتەکا مەزھەبی ل شوونا وێ ھاتەدانان ، و ھەتا نھا پێشمەرگێن کوردستانێ ب ھەموو نەخوشیان ڤە دژی تیرورستێن داعشان شەرکریە و شیایە داعشان بشکێنیت ، و بەغدا بەرھەڤنەبوویە کو چەک ژی بو پێشمەرگەی بدەت)
سەرۆکێ ھەرێما کوردستانێ د درێژاھیا گوتارا خوە دا گۆت: (بەری نھا ژی چەندین جاران مە ل گەل بەرپرسێن عیراقێ بەحس ل ریفراندۆمێ کریە و مە دانوستاندن ب جدی دکرن کو نکارین ل گەل بەغدا بژین و ل وی دەمی ئەو دنەرم بوون و وان ھزر دکر کو کارتا فشارێ یە ئەم بکاردئینین یان بو دەربازبوونا ژ قەیرانێ یە ، دەما کو بریارا سەرکرداتیا سیاسیا کوردستانآ و گەلێ کوردستانێ بریارا ریفراندۆمێ دایی ، و ھزرکر کو ئەم بخوە ناھێلین ریفراندۆم سەر بگریت و دێ دناڤ خوە دا ئاریشان درۆست کەین و بابەت گرنگ وەرنەگرت و رۆژا کو بریار ھاتیەدان ئەوان دەست ب ھەرەشەیان دژی گەلێ کوردستانێ کر و داخوازا نەھێلانا ریفراندۆمێ دکەن و بەلێ دبێژم وان نھا ریفراندوم ژ دەستێ ھەموو حزبان دەرکەفت و کەفتە دەست خەلکی و گەلێ کوردستانێ)
شەڤ و رۆژ فشار دھێنەکرن کو ریفراندۆم بھێتە پاشئێخستن و دانوستاندنان ل گەل بەغدا بکەین ڤە ، بەلێ ئەم نازڤرین بو ئەزموونەکێ کو شکەستن ئینایە و پشتی ٢٥ ئیلونێ ئەم بەرھەڤین کو دانوستاندنان ل گەل بەغدا بکەین ل سەر گەلەک بابەتان ، بەلێ ب چوو شێوەیان دانوستاندنێن مە لسەر دەستنیشانکرنا سنووران نابیت وەکو ئەو دبێژن دڤێت ب زڤرن بو ھێلا کەسک ، بارزانی ھوسا گۆت.
مەسعود بارزانی دیارکر ژی کو سیستەمێ دەولەتا کوردستانێ دێ سیستەمەکێ فەرھەنگی و پێکڤەژیان و فیدرالی و پەرلەمانی بیت و زێدەتر گۆت: (ئەم بەرھەڤین کو ھەڤکاریێن تمام ل گەل عیراقێ و ھەڤپەیمانان بکەین د شەرێ دژی تیرورستێن داعش دا و گەلێ کوردستانێ ب خوینا خوە و پێشمەرگەی داعش شکاند ، نھا نابیت گلەی و سزایان ل کەس و کارێن شەھیدان و کێمیاباران و جینوسایدان و گەلێ کوردستانێ بھێتەکرن بەلکو بلا بھێن من سزا بدەن ، و ئەگەر بھێلن گەلێ کوردستانێ بوچوونا خوە بێژن پاشان بلا بھێمە مە ئەنفال بکەن ڤە ، و من دڤێت بو خودێ و گەلی َکوردستانێ بێژم ئەز ئەو کەس نیمە کو خوە شەمبزارێ گەلێ کوردستانێ بکەم)
بارزانی بەحس ل روودانەکا سالا ٢٠٠٦ ل گەل سەرۆکێ بەرێ یێ ئەمریکا جورج بوش کر دەما کو ئەوی ل نێزیک سنوورێ سوریا ھەڤدیتن ل گەل کری و بارزانی دیارکر کو جور بوش گوتە وی ئەز خەلکێ تکساسم و توش خەلکێ کوردستانێ و تکساس و کوردان ھەردوو مەردە مرۆڤ تێدانە و خودان ئەقلن بەلێ ئەز دێ زڤرم بو واشنتون و توش بو بەغدا ، سەرۆکێ ھەرێمی َدیارکر کو ئەوی گوتە جورج بوش ئەگەر ئەوا کو بەغدا ب سەرێ گەلێ کوردستانێ ئینایی وەکو وێ وانشتون ب سەرێ تکساس ئینابایە ب حەیات تو بو واشنتون نەدزڤری ، وێجا چەوا ئەم بکارین ل گەل جڤاکەکێ ھوسا بژین.
بارزانی ل دوماھیێ گۆت: (سلاڤ بو گیانێ شەھیدان و پێشمەگێن قارەمان و ھەموو جەماوەرێ گەلێ کوردستانێ ، و شەرەفمەندم ئەڤرۆ ل ھەولێر و ب راستی ھەولێر ھەر ھەولێرە و باژێرێ ھولاکو بەزینە)

ئەڤرۆ نیوز ، نەوزاد ھلۆری:
دپەیوەندیەکا تێلەفوونی دا کو دناڤبەرا سەرۆکێ ھەرێما کوردستانێ و سەرۆکێ فەرەنسا ھاتەکرن ، سەرۆک بارزانی دیارکر کو ریفراندۆم ناھێتە پاشئێخستن.
ل گورەی نوچەیەکێ کو ل مالپەرا سەرۆکاتیا ھەرێما کوردستانێ ھاتیە بەلاڤکرن ئەڤرۆ ئیمانێل ماکرون سەرۆکێ فەرەنسا پەیوەندیەکا تێلەفونی ب مەسعود بارزانی سەرۆکێ ھەرێما کوردستانێ کریە.
د پەیوەندیا تێلەفوونی دا ماکرونی پەسنا کوردستانێ کریە و رولێ کوردستانێ د شەرێ دژی داعشێ و حەواندنا ھژمارەکا زور یا ئاوار و پەنابەران بلندن نرخاند و پشتەڤانیا خوە ژی بو ئێکپارچەیا عیراقێ و مافێن گەلێ کوردستانێ دچارچوڤێ دەستورێ عیراقێ دا دیارکر و داخوازکر کو ریفراندۆم بھێتە پاشئێخستن.
دبەرامبەر دا بارزانی سوپاسیا سەرۆک و حکومەت و گەلێ فەرەنسا کر بو پشتەڤانیا وان یا بەردەوام بو کوردستانێ و دياركر كو ریفراندۆم ناھێتە پاشئێخستن و دێ ل دەما دیارکری دا ھێتە ئەنجامدان و دەرگەھێ دانوستاندنان ژی ناگرن پشتی ریفراندۆمێ ، و کوردستان دێ ل گەل بەغدا دانوستاندان کەت.

ئەڤرۆ نیوز ، ھلۆری:
سەرۆکێ ھەرێما کوردستانێ د پەیامەکێ دا کو بو خەلکێ ھەر چوار قەزایێن ( سوران ، مێرگەسوور ، چومان و رەواندوز ) ھنارتیە دیارکر کو ھەوە بو ھەموو جیھانێ سەلماند کو ھەوە سەربخوەی دڤێت.
مەسعود بارزانی سەرۆکێ ھەرێما کوردستانێ د پەیاما خوە دا گۆت: (ھەوە د کەرنەڤالا روژا سیشەمبا بووری ب وێ حەماسەت و گەرم و گوریا خوە ریفراندۆم ئەنجام دا و ھەوە بو ھەموو جیھانێ ژی دیارکر و سەلماند کو ھەوە سەربخوەی دڤێت و جیھان ژی ژ ڤێ یەکێ تێگەھشت کو گەلێ کوردستانێ سەربخوەی دڤێت و بن دەستیێ رەت دکەن ، و دیسان ھەوە وەکو جەماوەرێ کوردستانێ ب ھەڤکاریا ھەموو حزب و لایەنێن سیاسی دیارکر کو سەربخوەی چەترەکە تێدا ھەموو رەنگ و بوچونێن سیاسی ل بن کوم ڤە دبن و ئالایێ کوردستانێ ژی ھەر ب بلندی ھێتە راگرتن)
زێدەتر گۆت: (پشتراستم کو رۆژا ٢٥ ئیلونێ دێ ب ھەمان گەرم و گوریێ ڤە مزگینیا سەرکەفتن و سەربخوەیێ دەنە شەھیدان و ب سەر بلندی دێ سەحا شەھیدان کەن و بێژنە وان ئێدی بن دەستی نەما و دەما سەربخوەیێ یە ، و ل ڤێرە ب پێدڤی دزانم کو سوپاسیا ھێزێن پێشمەرگەی و ھەموو دام و دەزگەھێن ئەمنی و پولیسێن ھاتن و چوونێ بکەم بو ھەڤکاریا وان د پاراستنا ئاسایش و سەر و مالێ خەلکی و ب رێڤەچوونا کەرنەڤالا سەربخوەی یا کوردستانێ ل سوران)

ئەڤرۆ نیوز ، نەوزاد ھلۆری:
نیڤرۆیا ئەڤرۆ سەرۆکێ جڤاتا سەرکرداتیا پارتی دیموکراتی کوردستان ل ھەلەبچە و سلێمانێ د کونگرەیەکێ رۆژنامەڤانی دا دیارکر کو کەرنەڤالا دوھی یا سلێمانیێ پەیامەکا گرنگ بوو ، بۆ ھەموو دوژمنێن گەلێ کوردستانێ.
ئەدھەم بارزانی سەرۆکێ جڤاتا سەرکرداتیا پارتی دیموکراتی کوردستان ل ھەلەبچە و سلێمانێ گۆتژی: (سەرۆکێ ھەرێما کوردستانێ د رێیا ڤەگەریانا خوە دا دو جاران پەیوەندی ب من کر کو سوپاسیا خەلکێ سلێمانیێ بکەم بەرامبەر گەرم و گوریا وان د ناڤا کەرنەڤالا سەربخوەی یا کوردستانێ ل سلێمانیێ، ژ بەر کو کەرنەڤالا سەربخوەی یا کوردستانێ ل سلێمانیێ کەرنەڤالەک ئاسایی نەبوویە بەلکو پەیامەکا گرنگ بوو، بۆ ھەموو دوژمنان ب تایبەتی بو وان کەسانێن کو گرەڤا وێ یەکێ دکر کو دەنگێ سلێمانی بەلێ نینە و ب ھزرا من بەری کو خەلک بچیتە سەر سندوقێن دەنگدانێ ئەوان دەنگێ خوە ژ بو سەربخوەی یا کوردستانێ دا).
زێدەتر گۆت: (جەنابێ سەرۆک بارزانی بزاڤێن کومکرنا ھەموو لایەنێن سیاسی دکەت و دوھی دناڤا کەرنەڤالا سلێمانیێ ژی ئەڤ یەک ھاتە دیتن و چەندین لایەنێن سیاسی پشکدارببوون و نونەرێن پرانیا حزبان ژی بەرھەڤ ببوون).
ئەدھەم بارزانی دوپات ژی کر کو ئەگەر بەدیلەکێ ژ ریفراندۆمێ باشتر ھەبیت و گەرنتیێ بکەت، ئەو دێ ل رۆژا ٢٥ ئیلونێ ئاھەنگا بەدیلێ ریفراندۆمێ ئەنجامدەن و گۆت ژی: (مە چەندین جاران سەرەدانا گۆڕان و کومەلێ کریە و ئەو ژی ھاتینە پیرمام و پێکڤە کومبووینە و ئەگەر پێدڤی بکەت دێ زێدەتر ژی ل گەل ھەڤ روونین خوارێ و ئەم ب تەنازول ژی نازانین، ئەز ب خوە د وێ باوەریێ دا نیمە کو گۆڕان و کومەڵ ب نەخێر دەنگی بدەن ژ بەر کو د ناڤ وان ژی دا چەندین خەباتەر و پێشمەرگە ھەنە).