ئه‌ڤرۆ نیوز ، هلۆرى:
ئه‌ڤرۆ ئه‌نجومه‌نا سه‌ركرداتیا ئێكه‌تیا نیشتمانیا كوردستانێ ل سلێمانیێ كومبو و د كومبوونێ دا دانوستاندن لسه‌ر چه‌ند پرسه‌كێن چاره‌نڤیسا ژ وانان ریفراندۆم و كاراكرنا په‌رله‌مانى كر ، و بریار دا كو په‌رله‌مانێ كوردستانێ بهێته‌كاراكرن لسه‌ر بنه‌مایێن ئابوورى و سیاسى و قانونى ، سیاسه‌تڤان و ماموستایه‌كێ زانكویێ ژى دده‌تن دیاركرن كو گه‌له‌ك ب زه‌حمه‌ته‌ ئێكه‌تى بكاریت بریارا ئێكلاكه‌ر لسه‌ر پرسێن چاره‌نڤیساز بده‌ت.
ل گوره‌ى راگه‌هاندنا داویا كومبوونا ئه‌نجومه‌نا سه‌ركرداتیا ئێكه‌تیا نیشتمانیا كوردستانێ كو ئه‌ڤرۆ ب سه‌رپه‌رشتیا كوسره‌ت ره‌سول جێگرێ ئێكێ یێ سكرتێرێ گشتیێ ئێكه‌تیا نیشتمانیا كوردستانێ ب رێڤه‌چوو تێدا هاتیه‌: (دكومبوونا ئێكه‌تى دا دانوستاندن لسه‌ر چه‌ند پرسه‌كێن چاره‌نڤیساز هاتیه‌كرن ژ وانان پرسا ریفراندۆم و چه‌وانیا كاراكرنا په‌رله‌مانێ كوردستانێ و ئاریشه‌یێن ده‌ڤه‌رێن ئاریشه‌ ل سه‌رى هه‌یى هاته‌كرن و چه‌ند خاله‌ك هاتنه‌ په‌سه‌ندكرن ژ وانان كاراكرنا په‌رله‌مانێ كوردستانێ لسه‌ر هنده‌ك بنه‌مایێن قانونى و ئابوورى و سیاسى كو پێدڤى یه‌ ب زوترین ده‌م بهێته‌ كاراكرن )
زێده‌تر هاتیه‌: (شانده‌كێ ئێكه‌تى بو ڤێ مه‌ره‌مێ دڤان دوور وژێن بهێت دا دێ سه‌ره‌دا ته‌ڤگه‌را گۆڕان و كومه‌لا ئیسلامى یا كوردستانێ كه‌ت ، و شاندنێ ئێكه‌تى دى َدانوستاندنێ ل گه‌ل پارتى لسه‌ر نه‌خشه‌ رێیا ئێكه‌تى بو ریفراندۆمێ كه‌ت و هه‌مان خالێن په‌سه‌ندكرى دێ بو پارتى و لایه‌نێن دن هێنه‌ رونكرن )
ژلایه‌كێ دن ڤه‌ دكتور ئه‌مین فه‌ره‌ج سیاسه‌تڤان و ماموستایێ زانكویێ بو ئه‌ڤرۆ نیوز گۆت: ( ئێكه‌تیا نیشتمانیا كوردستانێ د قه‌یرانه‌كا سیاسیا كویردایه‌ و هه‌موو بریارێن سیاسى كو گرێداى بن ل پرسێن چاره‌نڤیساز دا ژ ده‌ستدایه‌ و نكاره‌ چوو بریاران بده‌ت ل بارا كاراكرنا په‌رله‌مانى و ئه‌نجامدانا ریفراندۆمێ ژ به‌ركو ئێكه‌تى رێكه‌فتنا ستراتیجى ل گه‌ل گۆران هه‌یه‌ و ل گه‌ل پارتیش هه‌یه‌ و هه‌ر بریاره‌كا بده‌ت دێ ئێك ژ وان هه‌ردوو پارتان ژ ده‌ست ده‌ت ژبه‌رڤێ دخوازه‌ كو ئه‌ڤ بارودوخه‌ بڤى ره‌نگى یا به‌رده‌وام بیت )
زێده‌تر گۆت: ( پرانیا ئه‌ندامێن سه‌ركرداتیا ئێكه‌تیا نیشتمانى ل گه‌ل ئه‌نجامدانا پریفراندۆمێ نینه‌ بێى كاراكرنا په‌رله‌مانى ، ب هزرا من ئێكه‌تى یا ده‌مى دكوژیت و دڤێت بكاریت بریارا دوماهیێ بده‌ت به‌لێ ئه‌ز ل وێ باوه‌رێ نیمه‌ كو ئه‌ڤرۆ ئێكه‌تى بكاریت بریارا ئێكلاكه‌ر بده‌ت ل بارا كارا كرنا په‌رله‌مانى و ئه‌نجامدانا ریفراندۆمێ)
شاره‌زایێن سیاسى ره‌خنه‌یێن توند لسه‌ر ئێكه‌تى دده‌ن و ب كوشتنا ده‌مى و نه‌بوونا خودانا بریارا ئێكلاكه‌ر ژى تاوانبار دكه‌ن ، دڤى واریدا دكتور ئه‌مین فه‌ره‌ج گوت : ( ناكوكیێن ئێكه‌تى ب تایبه‌تى پشتى نه‌خوشبوونا مام جه‌لال تاله‌بانى گه‌هشتیه‌ راده‌یه‌كێ وه‌سا كو بریارا خوه‌ ژ ده‌ست بده‌ت و نكارت ژێ ده‌ركه‌ڤیت ، و ئێكه‌تى چوو جاران وه‌كو پارتى و گۆڕانێ نینه‌ كو بریارا ئێكلاكه‌ر بده‌ت)

ئه‌ڤرۆ نیوز ، نه‌وزاد هلۆرى:
ده‌مه‌ك به‌ریا نها ل سه‌نته‌رێ پارێزگه‌ها دهۆك هه‌وا پروپاكندێن ریفراندۆمێ ل هه‌ردوو پارێزگه‌هێن دهۆك و نه‌ینه‌وا ده‌ست پێ كر ، د چارچوڤێ راگه‌هاندنا پروپاكندێن ریفراندۆمێ دا كو پێكهاته‌یێن ئاینى و نه‌ته‌وه‌یى پشكدارببوون سه‌ربه‌ست تروانشى دیاركر كو ریفراندۆم ب هێزترین چه‌كه‌ به‌رامبه‌ر دوژمنان دهێته‌ بكارئینان و تنێ ئه‌و دكاره‌ قه‌ره‌بویا خوونا شه‌هیدان و خه‌باتا چه‌ند ساله‌یا گه‌لێ كورد بو ئازادیێ بكه‌ت.
سه‌ربه‌ست تروانشى سه‌رپه‌رشتیێ گشتیێ پروپاكندێن ریفراندۆمێ ل پارێزگه‌هێن دهۆك و نه‌ینه‌وا د چارچوڤێ راگه‌هاندنا هه‌وا پروپاكندێن ریفراندۆمێ گۆت: (بریارا ئه‌نجامدانا ریفراندۆمێ بریارا هه‌موو پێكهاته‌یێن كوردستانێ یه‌ و نابیت چوو كه‌س و لایه‌نێن سیاسى ب مولكێ خوه‌ بزانن ، دیاره‌ كو گه‌لێ كورد ب درێژاهیا مێژوویێ خه‌بات بو ب ده‌ستڤه‌ئینانا ئازادیێ و سه‌ربخوه‌ى یا كوردستانێ كریه‌ و چوو ده‌مان ژى گه‌لێ كورد نه‌ڤیایه‌ دپێناڤ ب ده‌ستڤه‌ئینانا ئازادیێ خوه‌ راده‌ستى ب ده‌ستڤه‌ئینانا نانى بكه‌ت و قوربانیێن گه‌لێ كورد بو ب ده‌ستڤه‌ئینانا ئازادیێ و سه‌ربخوه‌یێ هزاران جاران زێده‌تره‌ ژ قوربانیێن ب ده‌ستڤه‌ئینانا نانى ، ژبه‌رڤێ دكارین بێژین رێبازا كوردایه‌تى هه‌رده‌م بو ب ده‌ستڤه‌ئینانا سه‌ربخوه‌ى و ئازادیێ بوویه‌ و دێ به‌رده‌وام ژى بیت ئه‌ڤ رێبازه‌ هه‌تاكو كورد هه‌یه‌ ، و دنهادا ده‌رفه‌ته‌كا زێرێن به‌رامبه‌ر گه‌لێ كورد هه‌یه‌ كو ئه‌و ژى ریفراندۆمه‌ بو سه‌ربخوه‌ى یا كوردستانێ و ئازادیه‌كا هه‌رده‌م)
زێده‌تر گۆت: (كوردستانیان بریار دایه‌ كو رۆژا 25ێ ئیلونێ بكه‌ن رۆژه‌كا مێژوویى د دیروكا بزاڤا رزگاریخوازیا گه‌لێ كورد و هه‌ر لایه‌نه‌كێ سیاسى و وه‌لاتیه‌كێ ب به‌لێ پشكدارببیت ئه‌و دێ پشكداریێ د ئاڤاكرنا مێژوو و ده‌وله‌تا كوردى دا كه‌ت ، پشكدارى د ریفراندۆمێ دا دێ بیته‌ قه‌ره‌بوكرنا خوونا شه‌هیدان و خه‌باتا هزاران سالا گه‌لێ كورد و دێ بیته‌ مه‌زنترین توله‌ ل دوژمنان)
سه‌ربه‌ست تروانشى سه‌رپه‌رشتیێ گشتیێ پروپاكندێن ریفراندۆمێ ل پارێزگه‌هێن دهۆك و نه‌ینه‌وا دیاركر ژى كو ئێزدى گه‌هشتینه‌ وێ باوه‌ریێ كو بتنێ دچارچوڤێ سه‌ركه‌فتنا ریفراندۆم و ده‌وله‌تا كوردى دا دێ داوی ب كومكوژى و فه‌رمانێن ژ ناڤبرنا كوردێن ئێزدى هێته‌ئینان و گۆت ژى: (پێدڤى یه‌ ئه‌م هه‌موو پێكڤه‌ بریارێ ل چاره‌نڤیسێ خوه‌ بده‌ین و بێژین به‌لێ بو ده‌وله‌تا كوردى داكو ئێدى چوو جاران ئه‌م ئازادیێن خوه‌ راده‌ستى دوژمنان نه‌كه‌ین و چه‌وا بڤێت وه‌سا بریارێ ل چاره‌نڤیسێ مه‌ بده‌ن)
ل داویا رێورسێن راگه‌هاندنا پروپاكندێن ریفراندۆمێ هه‌ر ئێك ژ نونه‌رێن موسلمان و مه‌سیحى و ئێزدى و توركمان گوتارێن خوه‌ پێشكێشكرن و پشته‌ڤانیا خوه‌ بو ریفراندمێ دوپات كر و خواست كو پێكهاته‌یێن وان ب به‌لێ ده‌نگ بو ریفراندۆم هات.