ئەڤرۆ

پەیڤدارێ پارتی دیموكراتی كوردستان ددووپاتی ل سەر وێ چەندێ كر كو د ئەڤ سالەدا هەلبژارتنێن پەرلەمانێ كوردستانێ بهێنە ئەنجامدان، دیاركر ژی: هیچ ژڤانەك بۆ كۆمبوونێ د ناڤبەرا پارتی دیموكراتی كوردستان و ئێكەتی نیشتمانی كوردستانێ یێ دیار نینە.
مەحمود محەمەد، پەیڤدارێ پارتی دیموكراتی كوردستان دوهی سێشەمبی 28/2/2023 گوت» د كۆمبوونا ئەڤرۆ دا ل گەل بزاڤا دیموكراتی یا ئاشووری مە باس ل پرۆسەیا هەلبژارتنێن بهێت یێ پەرلەمانێ كوردستان كر».
دیاركر ژی» مە دوپاتی ل وێ چەندێ كر كو د ئەڤ سالەدا هەلبژارتن بهێنە ئەنجامدان».
سەبارەت شێوازێ هەلبژارتنان و پشكا پێكهاتەیان، پەیڤدارێ پارتی دبێژیت» مە بڕیار دایە دەست وان، بڕیار د دەستێ پێكهاتەیان دا بیت كا چ پێ باشە وێ بكەن».
ئاماژە ب وێ چەندێ ژی كر، ل سەر بابەتێ هەلبژارتنان ب گۆرەی دانوستاندنێن كۆمبوونا پێشتر ل گەل مەكتەبا سیاسی یا ئێكەتیێ، بۆچوونێن وان نێزیكێ هەڤدونە و دبێژیت» هەكە گرفتەكا دی نەهێتە پێش د وێ باوەریێ دامە نێزیكین ژ هەڤدو، بۆ وێ چەندێ پرۆژەیەك بهێتە بەرهەڤكرن و ئاراستەكرن بۆ پەرلەمانێ كوردستانێ و بڕیار ل سەر بهێتە دان».
مەحمود محەمەد ڕاگەهاند ژی» هەموو ئەو ئالیێن دانوستاندن ل گەل هاتینە كرن ل گەل وێ چەندێ نە د ئەڤ سالەدا هەلبژارتن بهێنە ئەنجامدان».
ل دۆر كۆمبوونێ ل گەل ئێكەتی نیشتمانی كوردستان، پەیڤدارێ پارتی گوت» هەتا نوكە هیچ ژڤانەك نەهاتیە دیاركرن بۆ كۆومبوونێ، پێشتر مە ژڤانەك دیاركربوو و ئێكەتیێ هەلوەشاند».

ئەڤرۆ

دوهی سێشەمبی 28/2/2023 ل هەولێرێ پشكا هەلبژارتنان یا پارتی دیموكراتی كوردستان و دەزگەهێ هەلبژارتنان یێ ئێكەتی نیشتمانی كۆمبوون و پشتی كۆمبوونێ بەیاننامەیەكا هەڤپشك بەلاڤكر و تێدا هاتیە» ب مەبەستا دانوستاندنێ ل سەر بابەتێن گرێدای ب ڕاستڤەكرنا قانوونا هەلبژارتنێن پەرلەمانێ كوردستانێ و كاراكرنا كۆمسیۆنا بلند یا سەربخوە یا هەلبژارتن و ڕاپرسیان ل هەرێما كوردستانێ، مە بۆچون و هەلویستێن خوە ئالوگۆركرن ل سەر هەموو وان پرسێن كو بووینە خالێن ناكۆكیێ دناڤبەرا هەردو ئالیان دا».
بەیاننامەیا هەڤپشك یا پشكا هەلبژارتنێن پارتی و دەزگەهێ هەلبژارتن یێ ئێكەتیێ ئاماژە كر ژی» ژ ئەنجامێ دانوستاندنێ و ئالوگۆكرنا بۆچوونێن هەردو ئالیان، ل سەر پتریا خالێن گرێدای ب ڕاستڤەكرن و كاراكرنا كۆمسیۆنا بلند یا هەلبژارتن و ڕاپرسیان تێكگەهشتنەكا هەڤپشك پەیدا بوویە».
هەروەسا تێدا هاتیە» بۆ گەهشتنێ ب ڕێككەفتنا دووماهیێ، بڕیار هاتە دان هەردو ئالی ل چەند ڕۆژێن بهێت بۆ هەمان مەبەست كۆمببن» ل دووماهیێ بەیاننامەیا هەڤپشك ئاماژێ دكەت» 1 پێخەمەت ل بەرچاڤ وەرگرتنا بۆچوونا ئالیێن سیاسی یێن دی یێن هەرێما كوردستانێ بۆ هەمان مەبەست بڕیار هاتە دان پێكڤە تێبینیێن وان وەرگرن».

ئەڤرۆ

هەولێر، قائید میرۆ

بەرپرسەكێ پشكا هەلبژارتنێن پارتی دیموكراتی كوردستان ئاشكراكر، پارتی یا ڕژدە ل سەر ئەنجامدانا پرۆسا هەلبژارتنان د دەمێ خوە یێ قانوونی دا و هەموو بزاڤەكێ ژی دكەین بۆ ئەنجامدانا هەلبژارتنان د ئەڤ سالە دا هەروەسا دبێژیت، ب گۆرەی درێژكرنا ژیێ خۆلا پەرلەمانێ كوردستانێ پێدڤیە دو هەیڤان بەری ب دووماهی هاتنا ئەڤ سالە هەلبژارتن بهێتە ئەنجامدان.
هاوار محەمەد، بەرپرسێ قانوونی ل پشكا هەلبژارتنێن پارتی دیموكراتی كوردستان بۆ ڕۆژنامەیا (ئەڤرۆ) گوت» پارتی هەموو بزاڤەكێ دكەت ژبۆی ئەنجامدانا پرۆسەیا هەلبژارتنێن پەرلەمانێ كوردستانێ د ئەڤ سالە دا، چونكە هەلبژارتن پرۆسەیەكا دیموكراسیە و مافێ وەلاتیانە بۆ هەلبژارتنا نوونەرێن خوە، لەوڕا ژی هەر پێشنیازەك هەبیت بۆ گەهشتن ب ڕێككەفتنێ سەبارەت ئەنجامدانا هەلبژارتنان دگەلداینە».
هاواری گوت ژی» بڕیارە جارەكادی پارتی سەرەدانا ئالیێن سیاسی یێن كوردستانی بكەت ب مەرەما بەردەوامیا دانوستاندنان بۆ چارەسەركرنا ئاریشەیان و پرسا هەلبژارتنان بەری نوكە ژی شاندێ پارتی سەرەدانا هێز و ئالیێن سیاسی كربوو و بۆچوونا خوە ل دۆر ئەنجامدانا هەلبژارتنان دایە ئالیێن كوردستانی، چونكە پارتی یا ڕژدە ل سەر ئەنجامدانا هەلبژارتنان ددەمێ خوە یێ قانوونی دا، ژ بەر كو پارتی دژی پاشئێخستنا هەلبژارتنایە، سالا بۆری ژی پارتی یا بەرهەڤبوو پرۆسەیا هەلبژارتنان بهێتە ئەنجامدان، بەلێ ب نیەتا گەهشتن ب ئێكدەنگیا سیاسی د ناڤبەرا ئالیێن سیاسی دا، ژیێ خۆلا نوكە یا پەرلەمانێ كوردستانێ هاتە درێژكرن، لەوڕا ژی نابیت ئێدی هەلبژارتن بهێنە پاشئێخستن».
بەرپرسێ قانوونی ل پشكا هەلبژارتنێن پارتی دیموكراتی كوردستان گوت ژی» هەموو پرۆسەیەكا هەلبژارتنان پێدڤی ب بەرهەڤیان هەیە ژبلی ڕێككەفتنا ئالیێن سیاسی، چونكە پێدڤیە كۆمسیۆنا بلند یا هەلبژارتن و ڕاپرسیان ل هەرێما كوردستانێ دەلیڤە هەبیت بۆ دەستپێكرنا بەرهەڤیان، شەش هەیڤ پێدڤی نە بۆ كۆمسیۆنێ بەری ئەنجامدانا هەلبژارتنان وئەركێ ئالیێن سیاسیە لەزێ بكەن بۆ دەستپێكرنا بەرهەڤیێن هەلبژارتنان وبگەهنە ڕێككەفتنێ، ژبەر كو دەم یێ دچیت و نابیت دەمێ قانوونی بهێتە دەربازكرن كو ژیێ خۆلا نوكە یا پەرلەمانێ كوردستانێ هەتا ٣١/١٢/ ٢٠٢٣ێ هاتیە درێژكرن، ئانكو بەری ژیێ خۆلا پەرلەمانی ب دوماهی بهێت ب دو هەیڤان پێدڤیە پرۆسەیا هەلبژارتنان بهێتە ئەنجامدان، و گەلەك یا گرنگ و پێدڤیە هەتا هەیڤا گۆلانا 2023 هەرێما كوردستانێ بۆ پرۆسەیا هەلبژارتنان خوە ئێكلا بكەت».

ئەڤرۆ

هەولێر، سولین سلێمان

چەڤدێرەكێ سیاسی دبێژیت، ل وەلات و ناڤەندێن نێڤدەولەتی ب ڕێز مامەلە ل گەل هەرێما كوردستانێ دهێتە كرن.
بەری چەند ڕۆژان ڕۆژنامەیا ئەلسەباح كو دهێتە هەژمارتن ڕۆژنامەیەكا فەرمی یا ئیراقێ دڕاپورتەكا خوە دا ئاماژە ب ڕاپرسیەكێ كربوو كو خەلكێ كوردستانێ دخوازن ڤەگەڕن سەر حوكمەتا بەغدا، ڤێ چەندێ ژی دەنگڤەدانەكا زۆر ل دووڤ خوە ئینا.
سەلام عەبدوللا، چاڤدێرێ سیاسی و سەرنڤیسەرێ ڕۆژنامەیا خەبات زمان حالێ پارتی دیموكراتی كوردستان بۆ ڕۆژنامەیا (ئەڤرۆ) گوت» ئەو ڕاپرسیا كو ڕۆژنامەیا ئەلسەباح یا ئێراقی د ڕاپۆرتێ خوەدائاماژە پێكری، ڕاپرسیەكا ڕاست و دروست نینە و ب تمامی رێزنەگرتنە ل حوكمەتا هەرێما كوردستانێ ، چونكە هەكە وان ڕێز ل هەرێما كوردستانێ گرتبان بەلاڤكرنا بابەتەكێ وەسا ل بەرپەرێ ئێكێ بەلاڤ نەدكر».
سەلام عەبدوللا زێدەتر گوت» ئەو ڕاپرسیا وێ ڕۆژنامەیا ئێراقی پشت بەستن ل سەر كری وتێدا دیاركریە كۆ پتریا خەلكێ هەرێما كوردستانێ دخوازیت بچنە ب سەر بەغدا ڤە و فیدرالیەتێ ڕەت دكەن، هیچ ڕاستیەك ژبۆ نینە دیسا ژی ڤێ ڕۆژنامێ پشت ب سەنتەرەكێ ئەكادیمی گرێنەدایە ژبۆ ڤێ ڕاپرسیێ چونكە دبیت بووچۆنا ئالیەكی یان كەسەكی هاتبیتە وەرگرتن كو بوچونەكا بەرۆڤاژی هەبیت، لێ وێ ڕۆژنامێ وەسا دیاركریە كۆ گەلەك كەس و ئالی دگەل وێ دانە ڤەگەرنەڤە سەر بەغدا پشتی وێ ئەڤ جۆرە بووچۆنە بۆ خوە كریە ڕاپرسی».
ئاماژەكر» هەرێما كوردستانێ یا هاتیە دانپێدان كریە ژ ئالیێ نێڤدەولەتی ڤە و هەر وەلاتەك دزانیت كو ئەم هەرێمەكین مافێ خوە مە هەیە و گەلێ مە گەلەك ژ وێ چەندێ هشیارترە كو باوەریێ ب خەونا نەیار و نەحەزان بكەت و خەلكێ مە یێ پێداگیرە كو پشتەڤانیێ ل هەرێما خوە بكەت هەروەسا پێدڤیە دیار بكەین كو د قۆناغا ئەڤرۆدا ل وەلات و ناڤەندێن نێڤدەولەتی چەند ب ڕێزڤە مامەلە دگەل هەرێما كوردستانێ دهێتە كرن».

ئەڤرۆ

سەرۆكا فراكسپۆنا چاكسازی یا توركمانی ڕاگەهاند، پێكهاتەیێ توركمانی یێ بەرهەڤە پشكداریێ د هەلبژارتنێن پەرلەمانێ كوردستانێ دا بكەت و ل گەل وێ چەندێ دایە هەلبژارتن ب شێوەیێ ئێك بازنەیی بهێنە ئەنجامدان.
مونا قەهوەچی، سكرتێرا پەرلەمانێ كوردستانێ و سەرۆكا فراكسپۆنا چاكسازی یا توركمانی گوت» گرنگە بۆچوونا پێكهاتەیێن هەرێما كوردستانێ ل دۆر ڕاستڤەكرنا قانوونا هەلبژارتنێن پەرلەمانێ كوردستانێ ب گرنگ بهێتە وەرگرتن و سوپاسیا ئالیێن سیاسی دكەین، هەكە ل دەمێ داڕێشتنا ڕاستڤەكرنا قانوونا هەلبژارتنان، پشتەڤانیێ ل داخوازیا مە بكەن».
ئەوژی بەرچاڤكر» ئەنجامدانا هەلبژارتنێن پەرلەمانێ كوردستانێ ب سیستەمێ چار بازنەیی (فرەبازنەیی) د بەرژەوەندیا پێكهاتەیان دا نینە، لەوما ئەم ل گەل وی سیستەمی نینین».

ئەڤرۆ

ئەندامەكێ مەكتەبا سیاسی یا پارتی دیموكراتی كوردستان دووپاتیێ ل سەر زڤرینا پارتی بۆ كەركووكێ دكەت و ڕادگەهینیت، پێدڤیە ڕەوشا كەركووكێ ژ ڕویێ كارگێری و ئەمنی ڤە بهێتە ئاساییكرن.
كەمال كەركووكی، ئەندامێ مەكتەبا سیاسی یا پارتی دیموكراتی كوردستان گوت» پارتی وەكو هندەك ئالیان ناكەت كو نوكە ل كەركووكێ ب ڕەزیلی دژین، بەلكو دێ ب سەربلندی بۆ وی باژێری زڤریت و پێدڤیە بارەگەهێن داگیركری یێن پارتی ل كەركووكی بهێنە چۆلكرن».
سەبارەت ڕێككەفتنا زڤرینا پارتی بۆ كەركووكێ، كەمال كەركووكی ئاماژەكر» د ڕێككەفتنا د ناڤبەرا ئالیێن سیاسی یێن ئیراقی بۆ پێكئینانا كابینەیا محەمەد شیاع سودانی كو ل جڤاتا نوونەرێن ئیراقێ ژی هاتبوو پەسەندكرن، هەموو ئالی و پارتێن سیاسی مافێ ئەنجامدانا چالاكیێن سیاسی هەیە ب شێوەیەكێ ئازاد و ب گۆرەی دەستووری».
هەروەسا ڕۆهنكر» دانوستاندن د بەردەوامن بۆ بجهئینانا ناڤەرۆكا وێ ڕێككەفتنێ مە باوەری ب سەرۆك وەزیرێن ئیراقێ و ئالیێن حوكمەت پێكئینای هەیە بۆ بجهئینانا وێ ڕێككەفتنا دناڤبەرا واندا هەی».
ل دۆر نەرازیبروونا هندەك ئالیێن پێكهتەیان ل بەرامبەر زڤرینا پارتی بۆ كەركووكێ، كەمال كەركووكی دووپاتی ل سەر ڕژدبوونا پارتی بۆ زڤرینێ بۆ كەركووكێ كر و دیاركر» ل كەركووكێ ڕێز ل مافێن هەموو پێكهاتەیان دێ هێتە گرتن و پشتەڤانیێ ل پێكڤەژیانا هەموو پێكهاتەیێن نەتەوەیی و ئایینی یێن ڕەسەن ل باژێرێ كەركووكێ دكەین».
د پشكەكا دی یا ئاخڤتنێن خوە دا، كەمال كەركووكێ ڕاگەهاند» پارتی بزاڤێ دكەت د چارچۆڤەیێ دەستووری دا هەموو وان ڕێككەفتنێن هاتینە كرن وەكو خوە بهێنە بجهئینان و ڕەوشا كارگێری و ئەمنی ل باژێرێ كەركووكێ بهێتە ئاساییكرن».
خویاكر ژی» پارتی ب سەربلندی دێ زڤریتە باژێرێ كەركووكێ و وەكو هندەك ئالیان ناكەت كو نوكە ب ڕەزیلی ل وی باژێری دژین». باس ل وێ چەندێ ژی كر كو» ڕاكرنا ئالایێ كوردستانێ ب گۆرەی مادەیێ 117 ژ دەستوورێ ئیراقێ مافەكێ سروشتیە و پێدڤیە ئەم هەموو ڕێزێ ل ئالایێ كوردستانێ بگرین، ل گەل وێ چەندێ ژی دا لادانا پارێزگەرێ نوكە یێ سەپاندی و ڤەگەراندنا مافێن كوردان كو پشتی 16 ئۆكتۆبەرا 2017 ژێ هاتینە وەرگرتن، پشكەكەن ژ پاكیچەیا ئاساییكرنا ڕەوشا كەركووكێ».

هەلەبجە، عەزیز هەورامی

بەرپرسێ مەكتەبا ڕێكخستنا سلێمانیێ – هەلەبجە و ئیدارەیا ڕانیا یا پارتی دیموكراتی كوردستان، ڕاگەهاند، ل ژێر بڕیارا سەرۆك بارزانی و مەكتەبا سیاسی، هەردو بەرپرسێن لقێن 12 و 21 هاتنە گوهۆڕین، سلێمانیێ و هەلەبجە و ڕانیا ل دەف پارتی د گرنگن و دخوازین ژ ڕویێ حزبی و حوكمەتێ ژی ڤە گرنگیێ پێ بدەین و ڕۆلێ ئۆرگانێن مە یێ كاریگەر بیت د ناڤ خەلكی دا.
عەلی حسێن، بەرپرسێ مەكتەبا ڕێكخستنا سلێمانیێ – هەلەبجە و ئیدارەیا ڕانیا یا پارتی دیموكراتی كوردستان بۆ ڕۆژنامەیا (ئەڤرۆ) گوت» پارتی ل كۆنگرەیێ 14 دەستپێشخەری كریە و دەرگەهێ دانوستاندنێ بۆ هەموو ئالیان ڤەكریە، شاندەكێ بلند یێ پارتی دیموكراتی كوردستان، سەرەدانا هەموو ئالیێن سیاسی یێن كوردستانێ ب ئێكەتی نیشتمانی كوردستان ڤە كریە».
عەلی حسێن ئاماژەكر» ئەم چاڤەڕێی ئێكەتی نیشتمانی كوردستان دكەین سەرەدانا مە بكەت، تاكو دانوستاندنێ ل سەر وان گرفتان بكەین، ب تایبەتی هەلبژارتنان، هیچ دەلیڤە نەمایە بۆ وێ چەندێ هەلبژارتن بهێنە پاشئێخستن و جڤاكێ نێڤدەولەتی و وەلاتیێن كوردستانێ ژی داخوازا ئەنجامدانا هەلبژارتنان ژ مە دكەن، داخوازێ ژ هەموو ئالیێن سیاسی دكەین ب گیانێ بەرپرسیارەتیێ، بەرامبەر ڕەوشا نوكە یا كوردستانێ و ئیراقێ ڕەفتارێ بكەین و هەموو گرفتێن هەین چارەسەر بكەین».
زێدەتر گوت» بەرپرسێ مەكتەبا هەلبژارتن یێ ئێكەتی نیشتمانی كوردستان پەیوەندی ب مەكر تاكو دانوستاندنێ بكەین كا گرفت چنە، تاكو بۆ كۆمبوونێن داهاتی و كۆمبوونێن پەرلەمانێ كوردستانێ ژی، ڕاستڤەكرنا قانوونان و پركرنا وان ڤالاتیێن ل كومسیۆنێ هەین».
گوت ژی» تێبینی هەموو ل سەر فرەبازنەیا هەلبژارتنایە، ژ بەر وێ چەندێ وەكو پارتی دیموكراتی كوردستان ل گەل فرەبازنەیی نەبویون، قانوونا ئێك بازنەیێ هەبوو تاكو هەلبژارتن نەهێنە پاشئێخستن و مە دخواست هەلبژارتن بهێنە ئەنجامدان و بۆ هەلبژارتنێن داهاتی قانوون بهێتە گوهۆڕین بۆ فرەبازنەیی، نوكە ژی مە ل سەر فرەبازنەییێ هیچ گرفت نینە، بابەتێ پێكهاتەیان ژی مە بۆ وان ب خوە هێلایە ئەو بخوە بڕیارێ بدەن».
ل دووماهیێ گوت» پارتی بەرهەڤی هەر دانوستاندنەكێ یە ل سەر تێبینیێن هەین و نابیت هیچ گرفتەك بمینیت بۆ وێ چەندێ هەلبژارتن نەهێنە ئەنجامدان».