ئه‌ڤرۆ نيوز:
ب گۆره‌ى ده‌زگه‌هێن راگه‌هاندنێ ل وه‌لاتێ سوريا د بۆردۆمانه‌كا ئه‌سمانى دا 60 وه‌لاتيێن مه‌ده‌نى ل ده‌ڤه‌را كه‌شمه و شوێت و ده‌وێره و عه‌شاره ل باژێرێ دێره‌زۆر ل سوريا هاتنه كوشتن.
ميديايێن سوريا هه‌ڤپه‌يمانێن نێڤده‌وله‌تى ل دژى داعش ب سه‌رۆكاتيا ئه‌مريكا ب ئه‌نجامدانا بۆردۆمانێ تۆمه‌تبار كرن.
ئه‌ڤرۆ نيوز:
سه‌رنڤيسكارێ رۆژناما ئه‌ڤرۆ د ستوونه‌كى دا كو ب هه‌لكه‌فتا بۆرينا 14 سالان ل سه‌ر ده‌ركه‌فتنا رۆژنامێ، ل رۆژناما ناڤبرى به‌لاڤ كريه، ئاماژه ب وێ چه‌ندێ كريه دێ چاپه‌كا رۆژناما ئه‌ڤرۆ ب تيپێن لاتينى ل باكوورێ كوردستانێ ده‌ركه‌ڤيت.
د. رێبه‌ر فه‌تاح سه‌رنڤيسكارێ رۆژناما ئه‌ڤرۆ د ستوونه‌كێ رۆژنامێ دا كو ب هه‌لكه‌فتا بۆرينا 14 سالان ل سه‌ر ده‌ركه‌فتنا رۆژنامێ به‌لاڤكريه سه‌ره‌راى پيرۆزى و ده‌ستخۆشيێ ل كادرێ رۆژنامێ ئاماژه ب وێ چه‌ندێ ژى كريه كو رۆژناما ئه‌ڤرۆ پرۆژەکێ نوو ھەیە کو چاپا دیاربەکر ب تیپێن لاتینی دەربێخیت و ل کوردستانا باکۆر بەلاڤ بکەت و ئەڤ پرۆژە د قووناغێن کار کرنێ دا یە و تنێ ژ ئەگەرێن قەیرانا ئابووری ھاتیە گیروکرن لێ وەکو نمونە چاپەک ھاتیە بەرھەڤکرن، لێ نەھاتیە بەلاڤ کرن.
دايه زانين ژى كو نها ب تنێ ل ھیڤیا رەزامەندیێن قانوونى یە ل ھەرێما کوردستانێ و وەلاتێ تورکیا کو رۆژناما ئەڤرۆ ب ھەمان بابەتان ب دو چاپان دەربکەڤیت چاپا ھەولێرێ ب تیپێن عەرەبی ( ھندی) و چاپا دیاربەکر ب تیپێن لاتینی و ل ھەموو تورکیا بھێتە بەلاڤکرن.
د پشكه‌كا دى يا گۆتارا خوه دا، سه‌رنڤيسكار ئاماژێ دده‌ته وێ چه‌ندێ كو هه‌كه رۆژناما ئەڤرۆ بۆ سەرخوەبوونا کوردستانێ و پرسا ریفراندومێ پشتەڤانا پەیڤا بەلێ بیت و ھاندەرا پشکداریا بەرفرەهـ یا خەلکی بیت ئەو نە پێگریەکا حزبی یە، بەلکو ھەستکرن و باوەری ب بەرژوەندیا پاشەرۆژا خەلکێ کوردستانێ یە، “لێ ئەڤە وێ چەندێ نا گەھینیت کو ھزرێن جودا ناھێنە بەلاڤکرن ودەرگەھێ رۆژنامێ بو ھەموو ھزر بووچونان یێ ڤەکریە”.
ده‌قێ گۆتارا سه‌رنڤيسكارێ رۆژناما ئه‌ڤرۆ د. رێبه‌ر فه‌تاح
سەرسالا ئەڤرۆ
ل بورینا 14 سالان ل سەر دەستبکاربوونا رۆژناما ئەڤرۆ، یا فەرە دڤان کاودانێن قەیرانێ و شەرێ داعشدا کو رۆژناما ئەڤرۆ ژی وەکی پرانیا دەزگەھێن راگەھاندنێ ل ھەرێما کوردستانێ بەھرا خوە ژ کێماسیا وکێم دراڤیێ ودژواریا کاری وەرگرتیە، یا فەرە بیرۆزباھی و دەست خوەشیێ ل ستافێ کاری ژ ھەڤکارێن خوە بکەین کو دڤێ قوناغێ دا شیان ئاستەنگ و کێشان دەرباز بکەن وبەردەوامیێ بدەنە دەرخستنا رۆژنامێ .
ل سەر سالا رۆژناما ئەڤرۆ دا دبێژینە خوێندەڤانێن خوە کو دەرباز بوون ژ قوناغەکا ھوسا یا سەخت پتر ھێزێ ددەتە مە پێن خوە ب رۆکبینین و رژد بین ل سەر کاری کو قوناغا نازک یا بھێت پترێ ژمە دخوازیت کو وەکو دەزگەھەکێ نیشتمانی و زمانحالێ نڤیسی یێ دەڤەرا بەھدینان خوە بەرھەڤ بکەین دگەل کاودان ورەوشا راگەھاندنا کوردستانێ وجیھانێ بگونجینین وپێشڤە ببەین. دیسان بەرھەڤ و پشکدار بین د وێ ئارمانجا پیروزا خەلکێ کوردستانێ چاڤەرێ کو سەرخوەبوونە.
مە ل رۆژناما ئەڤرۆ باوەری ب وێ چەندێ یا ھەیی کو رۆلێ رۆژناما کاغەزی بەرامبەر رۆژناما ئەلکترونی و تلفزیونان یێ دابەزی و ھەڤرکیا تکنولوجیا نوو ب شێوازێ کەڤن یێ ب زەحمەتە ودڤێت گوھۆرین د شێواز و رێکاران دا بھێتە کرن کو گونجایی ھەڤرکیا راگەھاندنا نوو بیت، لەوا رۆژناما ئەڤرۆ پیتەکێ تایبەت دایە وارێ ئەلکترونی کرنا رۆژنامێ وشیایە سایتەکێ ئەلکترونی ب تەکنیکەکا مودێرن بێخیتە کاری کو د گەھاندنا نووچە وبویەراندا ھەڤرکیا سایتێن کوردستانێ و تەلەفزیونان بکەت.
ژ روویێ ئەرکێ نیشتیمانی ڤە، رۆژناما ئەڤرۆ پرۆژەکێ نوو ھەیە کو چاپا دیاربەکر ب تیپێن لاتینی دەربێخیت و ل کوردستانا باکۆر بەلاڤ بکەت و ئەڤ پرۆژە د قوناغێن کار کرنێ دا یە و تنێ ژ ئەگەرێن قەیرانا ئابووری ھاتیە گیروکرن لێ وەکو نمونە چاپەک ھاتیە بەرھەڤکرن، لێ نەھاتیە بەلاڤ کرن وتنێ ل ھیڤیا رەزامەندیێن یاسایی یە ل ھەرێما کوردستانێ و وەلاتێ تورکیا کو رۆژناما ئەڤرۆ ب ھەمان بابەتان ب دو چاپان دەربکەڤیت چاپا ھەولێرێ ب تیپێن عەرەبی ( ھندی) و چاپا دیاربەکر ب تیپێن لاتینی و ل ھەموو تورکیا بھێتە بەلاڤکرن.
ل دور رەوشا نھا یا کوردستانێ رۆژناما ئەڤرۆ کو پتر خوە ب زمانحالێ خەلکی دزانیت وپتری ھەر دەزگەھەکێ دی یێ ل دەڤەرێ خوە ل بابەتێن رەخنەیی وگلە وگازندێن خەلکی کریە خودان، لێ ئەڤرۆ کو داخوازا خەلکێ کوردستانێ جودابوونە وبەرەف ریفراندۆمێ ودەولەتبوونێ دچیت ھوسا ژی رۆژناما ئەڤرۆ ب ئەرکێ خوە يێ نیشتمانی و راگەھاندنێ د زانیت کو ریفراندوم و سەخوەبوون ل پێشیا ھەموو ئارمانجێن رۆژنامەڤانی بیت، چونکە بەرپرسیا رۆژنامەڤانی ڤێ دخوازیت کو ژ داخوازا خەلکی جودا نەبیت، لەوا ژی ئەگەر رۆژناما ئەڤرۆ بو سەرخوەبوونا کوردستانێ و پرسا ریفراندومێ پشتەڤانا پەیڤا بەلێ بیت و ھاندەرا پشکداریا بەرفرەە یا خەلکی بیت ئەو نە پێگریەکا حزبی یە، بەلکو ھەستکرن وباوەری ب بەرژوەندیا پاشەرۆژا خەلکێ کوردستانێ یە، لێ ئەڤە وێ چەندێ نا گەھینیت کو ھزرێن جودا ناھێنە بەلاڤکرن ودەرگەھێ رۆژنامێ بو ھەموو ھزر بووچونان یێ ڤەکریە.
ئەڤرۆ نیوز، نەوزاد ھلۆری:
دچارچوڤێ ب رێڤەچوونا رێورسمێن ٣٤ سالرۆژا جینوسایدا بارزانیان ل گوندێ بارزان وەزیرێ شەھید و ئەنفالکریان بۆ ئەڤرۆ نیوز دیارکر ژ سەرجەمێ ھەموو کەیسێن ئەنفالێن ھاتینەکرن دژی گەلێ کورد بتنێ چوار ژ وان وەکو جینوساید ھاتینە ناساندن.
مەحمود حاجی سالح وەزیرێ شەھید و ئەنفالکریان زێدەتر گۆت: (دیروکا جینوسایدا بارزانیان دناڤ ئنفال و جینوسایدێن گەلێ کورد دا دیروکەک گرنگە دبزاڤا رزگاریخوازا گەلێ کورد ، ژبەر گرنگی روولێ شورش و بەرخودانێن بارزان بو گەلێ کورد حکومەتێن ئێک لدویڤ ئێکێن عیراقێ ھەردەم ڤیایە کو بارزانیان ب ھەر بھایەکێ بیت نەھێلیت ، بەلێ ئیرادا بارزانیان ژ ستەما وان مەزنتر بوو )
زێدەتر گۆت: (حکومەتا ھەرێما کوردستانێ بەردەوامە بو دابینکرنا ئەرک و مافان وەکو قەرەبو بو کەس و کارێن شەھید و ئەنفالکریان مینا دابینکرنا پارچە زەڤیان و خانو و کورسێن خواندنێ و خزمەتگوزاری و مافێن دن کو بو وان گرنگن ، ژلایەکێ دنڤە کار دکەت بو ناساندنا ھەموو دوسیێن ئەنفالان وەکو جینوساید و ھەتا نھا بتنێ چوار کەیس و دوسە وەکو جینوساید ھاتینە بناڤکرن کو ئەو ژی کەیسا بارزانیان ، کەیسا ھەلەبچە ، کەیسا وێرانکرنا قەلادزێ و سەیدسادق و کەیسا کوردێن فەیلی بوون)
ئه‌ڤرۆ نیوز:
نڤێسینگه‌ها مه‌سعود بارزانى سه‌رۆكێ هه‌رێما كوردستانێ بروسكه‌كا پیرۆزباهیێ ب هه‌لكه‌فتا سالڤه‌گه‌را 14 سالیا ده‌ركه‌فتنا رۆژناما ئه‌ڤرۆ ئاراسته‌ى ستافێ رۆژنامێ كریه ئه‌ڤه ده‌قێ وێ یه:
“به‌رێزان سه‌رنڤیسه‌ر و رۆژنامه‌ڤان و كارمه‌ندێن رۆژناما ئه‌ڤرۆ سلاڤ و رێز.
ب هه‌لكه‌فتا ده‌ربازبوونا 14 سالان ل سه‌ر ده‌ركه‌فتنا رۆژناما ئه‌ڤرۆ پیرۆزباهیێن خوه ئاراسته‌ى سه‌رنڤیسه‌ر و ستاف و خوانده‌ڤانێن رۆژناما هه‌وه دكه‌ین.
رۆژناما ئه‌ڤرۆژ رۆژا ده‌ركه‌فتنێ هه‌تا ئه‌ڤرۆ وه‌ك ئێك ژ میدیایێن پێگیر ب كارێ پیشه‌یێ رۆژنامه‌ڤانیێ خزمه‌تا پرسێن نه‌ته‌وى و نیشتیمانى كریه و ب هه‌سته‌كێ ته‌مام به‌رپرسانه جهێ باوه‌ریا خوانده‌ڤانان بوویه و به‌رده‌وام ل پشت روودانێن سیاسى و ڤه‌گوهاستنا راستیان مینبه‌ره‌كا راستگۆ بوو بۆ خه‌مێن وه‌لاتیان و كێشه و گرفتێن وان و به‌رچاڤكرنا پێنگاڤێن چاره‌سه‌ریێ.
هیڤیخوازین د پێشه‌یێ میدیایى و دلسۆزیێ دا بۆ نه‌ته‌وێ خوه به‌رده‌وام بن، هه‌ر وه‌كو چاوا ل ده‌مێ بۆرى هه‌وه رۆله‌كێ گرنگ گێراى د هشیاركرنا تاك كورد دا د وارێن سیاسى، ره‌وشه‌نبیرى، ئابوورێ، جڤاكى و په‌روه‌رده و ئه‌ده‌ب و هونه‌رێ كوردى دا، ب هه‌مان شێوه د پاشه‌رۆژێ ژى دا هه‌وه هه‌مان رۆلێ به‌رچاڤ هه‌بیت.
ئه‌ڤرۆ نیوز:
شاهنشینا عه‌ره‌بستانا سعودێ داخوازا قه‌ته‌رێ یا بنێڤده‌وله‌تیكرنا جهێن پیرۆز یێن مه‌كه‌هـ و مه‌دینێ ب راگه‌هاندنا شه‌ری بناڤكر.
قه‌ته‌رێ ده‌ستهه‌لاتا سعودێ سووچبار كر كو سیاسه‌تا ئێخستییه ناڤ حه‌جێ دا، پشتی وی وه‌لاتی سنۆرداركرن ئێخستییه سه‌ر حه‌جیێن قه‌ته‌رێ.
قه‌ته‌رێ سكالایه‌ك ل نه‌ته‌وه‌یێن ئێكگرتی دژی سعودیێ تۆمار كر و خواست جهێن پیرۆز ل مه‌كه‌هـ و مه‌دینێ بهێنه بنێڤده‌وله‌تیكرن دا سعودیه بۆ مه‌ره‌مێن سیاسی بكارنه‌ئینیت.
ژ ئالیێ خوه ڤه وه‌زاره‌تا ده‌رڤه یا سعودیێ خویا كر كو ئه‌و داخوازا قه‌ته‌رێ ب رامانا راگه‌هاندنا شه‌ری دژی سعودیێ یه.
ئه‌ڤه د ده‌مه‌كی دایه كو سعودیێ دۆرپێچ ل سه‌ر قه‌ته‌رێ دانایه و ناكۆككیێن وان خورتر بووینه.
فوتوو زانیاری ، نەوزاد هلوری:
ئێڤاریا ئەڤرو سەروکێ هەرێما کوردستانێ مەسعود بارزانی پشکداری د سالروژا جینوسایدا بارزانیان کرد و دگوتارەکێ دا دیارکر کو تاکە دەرمان برینێن گەلێ کورد ل گەل عیراقێ ساخ بکەت سەربخوە بونە و گۆت: ( جینوسایدا بارزانیان ئێکە ژ ئازارێن گەلێ کورد کو تاوانا وان تنێ ئەو بویە کو کوردبوون و بارزانی بوون ، ئەڤ جینوسایدە ژی ئێکەمین جار نەبویە سەر بارزانیان داهاتی بەلکو پیشتر ژی 16 جاران بارزانی توشی ئەنفال و وێرانکاری کوشتنێ بوینە و هیڤیا مە ئەوە دوبارە نەبن ڤە ، ژنێن بارزانیان کو رەمزا شەرەفێ بوینە زاروکێن بارزان بێی باب جارەکا دن پێگەهاندن ڤە ، بارزانی لسەر رێبازەکا پیروز رابویە و چو جاران سەر بو کەسێ نەدانایە و نادانیت ژی)
زێدەتر گۆت: (سوپاسیا خەلکێ هەولێر و سوران و شەقلاوە و بالەکایەتی و بالیسان و دەڤەرێن دن دکەین کو د روژێن رەش دا زاروک و ژنێن بارزانیان ڤەحەواندی )
ل بارا بارودوخێ نهایێ کوردستان و عیراقێ بارزانی گۆت: (گەلێ کورد د دوو قوناغان کو ئەو ژی قوناغا سالا 1920 هەتاکو پروسەیا ئازادیا عیراقێ، و قوناغا ئازادیا عیراقێ هەتا نها ل گەل عیراقێ ژیایە و بریار بو کو پێکڤە هەڤپشک بژین بەلێ عیراقێ هەرێما کورستانێ ب هەڤپشک نەدانایە ، ژبەرڤێ تاکە دەرمان ل گەل عیراقێ سەربخو بوونە ژبەرکو پشتی ئەڤان هەموو نەخوشیان و پەیمانان ، عیراقێ پشکا بودجا هەرێمێ و نانێ خەلکی بری کو ئەڤ یەک ژی مەزنترین تاوانایە بەرامبەر گەلێ کورد )
داویێ بارزانی گوت: (پێدڤی یە لایەنێن سیاسی و گەلێ کورد قوربانێن بوری بینن بیرا خوە و هزرێ ل ئایندە بکەن و پێکڤە بەرەڤ ریفراندومێ بچین و بریارا سەربخویێ دەن)
ئەڤرۆ نیوز ، نەوزاد ھلۆری:
ب مەرەما زێدەتر خزمەتکرنا کەس و کارێن شەھید و ئەنفالکریێن گەلێ کورد ب درێژاھیا دیروکێ ، کومەلگەھەکا نوژداری ل قەزا سوران ھەموو خزمەتێن خوەیێن نوژداری کرنە بێ بەرامبەر بو کەس و کارێن شەھید و ئەنفالکریان.
دڤی واریدا ئەشقی مەلا رێڤەبەرێ رێڤەبەریا کاروبارێن شەھید و ئەنفالکریێن قەزا سوران تایبەت بۆ ئەڤرۆ نیوز گۆت: (لسەر داخوازی و دەستپێشخەریا رێڤەبەریا کاروبارێن شەھید و ئەنفالکریێن قەزا سوران کومەلگەھا نوژداری یا فارما ل قەزا سوران ھەموو خزمەتێن خوەیێن نوژداری و ساخلەمی بو کەس و کارێن شەھید و ئەنفالکریان کرنە بێ بەرامبەر کو پێکدھێن ژ دیتنا نوژداری ، سونار ، تاقیگەە ، دەرمان ، تیشک و چەند خزمەتگوزاریەکێن دن)
زێدەتر گۆت: (ھەر کەس و کارەکێ شەھید و ئەنفالکریان ب درێژاھیا دیروکێ بخوازن ل کومەلگەھا ناڤبری چارەسەریێن بێ بەرامبەر وەربگرن دڤێت دەستپێکێ سەرەدانا مە بکەن ئەم دێ ئەوان رەوانەیێ کومەلگەھا ناڤبری کەین)
ل گورەی ئاخفتنێن ناڤبری کەس و کارێن شەھید و ئەنفالکریێن ھەرچوار قەزایێن سوران و رەواندوز و چومان و مێرگەسوور دکارن مفایی ژ ڤێ یەکێ وەربگرن و گۆت ژى: (کومەلگەھا نوژداری یا فارما ب ستافەک ئەکادیمی و بسپوور ماوەیێ چەندەکێ یە کەفتیە د خزمەتا خەلکێ ھەرێما کوردستانێ و قەزا سوران و دەروبەرا)
ئەڤرۆ نیۆز،زنار تۆڤی:
ئاراس حەسۆ میرخان ل سەر زارێ سەرۆکوەزیرێن هەرێما کوردستانێ دبێژیت، دو هەیڤێن دیتر دێ دەستكاری د سیستەمێ مووچەی دا هێتەکرن و ل دووڤ سیستەمێ،هەر مووچەخۆرەك دێ نێزیكی 70% یا مووچێ خوە یێ جاران وەرگریت.
ئاراس حەسۆ میرخان،ئەندامێ سەركردایەتا پارتی دیموكراتی كوردستان،بۆ رووداو گۆتیە،هوورکاریێن سیستەمێ نوو یێ مووچەی ل سەر زارێ نێچیرڤان بارزانی،سەرۆكوەزیرێن هەرێما کوردستانێ ئاشکراکریە.
هەروەسا گۆتیە،حوکمەتا هەرێما كوردستانێ ل گەل بانكا نێڤدەولەتی مژۆلی لابرنا پاشكەفتا مووچەی و سیستەمەكێ نوو یێ مووچەینە،گوتیە ژی: ئەڤێ پێدڤی ب یاسایێ هەیە،هەروەسا پەرلەمان دشێت یاسایا مووچەی هەموار بكەت كو د بەرژەوەندییا خەلکێ دایە و هەکە پەرلەمان چو كاران نەكەت و بتنێ ئەڤێ بكەت، گەورەترین خزمەتە بۆ خەلكێ كوردستانێ،یان هەکە یاسایێ ژی بۆ بۆ دەرنەكەت بلا چاڤدێریێ بكەت و پشکداربیت دڤێ پێنگاڤێ دا.
ئاراس حەسۆ میرخان هێشتا گوتیە: حكومەتا هەرێما كوردستانێ كەفتبوو ناڤ قەیرانەکا دارایی، نوکە ئەو دۆخە باشتر بوویە،پشتی دو هەیڤێن دیتر دێ سیستەمێ نوویێ مووچەی هێتە جێبەجێکرن كو دێ ل سەر بنەمایێ مووچێ بنەرەتی بیت ل گەل هژماركرنا بروانامێ،لێ خزمەت و خێزان و چەند پێڤەرێن دیتر یێن وێ پاشكەفتێ نامینن.
دیارکریە ژی: نوکە خەلك ب رێژا 25% و 30% یا مووچێ خوە وەردگریت،لێ ل وی دەمی هیچ فەرمانبەر و مووچەخۆرەك ژ 70% یا مووچێ خوە كێمتر وەرناگریت،هەر چەندە ناگەهیتە مووچێ بەرێ،بەلێ دڤی دۆخی دا دێ گوهۆرینێن زۆر باش د ژیانا خەلکێ دا کەت، بۆ هندێ کو ئەڤ پرۆژەیە سەركەفتی بیت و كەس دژایەتیێ نەکەت،گرنگە پەرلەمان بهێتە کاراکرن، ئەو ژی تێدا پشکدار بن.
ئەڤرۆ نیوز ، نەوزاد ھلۆری:
ب مەرەما باشتر ب رێڤەبرنا کار و بارێن خوە ل عیراقێ و دەلیڤەدان ب وەلاتیێن ھەرێما کوردستانێ کونسولخانا ئەمریکا ل ھەولێر چەند دەلیڤەکێن کاری راگەھاندن کو رەنگە کومەکا کەسان تێدا بھێنە وەرگرتن و کار بکەن بو خزمەتا گەلێ ئەمریکی ل عیراق و ھەرێما کوردستانی.
ئەڤرۆ رۆژا دووشەمبی رێکەفتی ٣١ تەمووزا ٢٠١٧ کونسولخانا گشتی یا ئەمریکا ل ھەولێر لسەر مالپەرێ تایبەتیێ خوە چوار جورێن دەلیڤەیێن کاری راگەھاندن و داخواز ل وان کەسان کر یێن کو حەز ھەیی ل کونسولخانا وان کار بکەن بلا پەیوەندیێ ب وان بکەت ب زوترین دەم دێ بەرسڤا وان ھێتەدان و کارکرنا وان ژی دێ ل عیراق و ھەرێما کوردستانێ بیت بو خزمەتا گەلێ ئەمریکی.
ئەو دەلیڤەیێن کاری کو ل کونسولخانا ئەمریکا ھاتینە راگەھاندن ئەڤێن ل خوارێ نە کو رەنگە ھەر خالەک ژ ئەڤان خالان چەند کەسەک پێدڤی بن.
ئێک:- ھاریکارەک بو کاروبارێن کومپیوتەری.
دوو:- زێرەڤان بو چاڤدێریێ.
سێ :- سەرپەرشتیار بو ھێزا زێرەڤانیا لوکالی.
چوار: کارمەندێ نڤسەر بو ھێزا زێرەڤانیا لوکالی.
نيشاندان