فوتوو زانیاری ، نەوزاد هلوری:

ئێڤاریا ئەڤرو سەروکێ هەرێما کوردستانێ مەسعود بارزانی پشکداری د سالروژا جینوسایدا بارزانیان کرد و دگوتارەکێ دا دیارکر کو تاکە دەرمان برینێن گەلێ کورد ل گەل عیراقێ ساخ بکەت سەربخوە بونە و گۆت: ( جینوسایدا بارزانیان ئێکە ژ ئازارێن گەلێ کورد کو تاوانا وان تنێ ئەو بویە کو کوردبوون و بارزانی بوون ، ئەڤ جینوسایدە ژی ئێکەمین جار نەبویە  سەر بارزانیان داهاتی بەلکو پیشتر ژی 16 جاران بارزانی توشی ئەنفال و وێرانکاری کوشتنێ بوینە و هیڤیا مە ئەوە دوبارە نەبن ڤە ، ژنێن بارزانیان کو رەمزا شەرەفێ بوینە زاروکێن بارزان بێی باب جارەکا دن پێگەهاندن ڤە ، بارزانی لسەر رێبازەکا پیروز رابویە و چو جاران سەر بو کەسێ نەدانایە و نادانیت ژی)

زێدەتر گۆت: (سوپاسیا خەلکێ هەولێر و سوران و شەقلاوە و بالەکایەتی و بالیسان و دەڤەرێن دن دکەین کو د روژێن رەش دا زاروک و ژنێن بارزانیان ڤەحەواندی )

ل بارا بارودوخێ نهایێ کوردستان و عیراقێ بارزانی گۆت: (گەلێ کورد د دوو قوناغان کو ئەو ژی قوناغا سالا 1920 هەتاکو  پروسەیا ئازادیا عیراقێ، و قوناغا ئازادیا عیراقێ هەتا نها ل گەل عیراقێ ژیایە و بریار بو کو پێکڤە هەڤپشک بژین بەلێ عیراقێ هەرێما کورستانێ ب هەڤپشک نەدانایە ، ژبەرڤێ تاکە دەرمان ل گەل عیراقێ سەربخو بوونە ژبەرکو پشتی ئەڤان هەموو نەخوشیان و پەیمانان ، عیراقێ پشکا بودجا هەرێمێ و نانێ خەلکی بری کو ئەڤ یەک ژی مەزنترین تاوانایە بەرامبەر گەلێ کورد )

داویێ بارزانی گوت: (پێدڤی یە لایەنێن سیاسی و گەلێ کورد قوربانێن بوری بینن بیرا خوە و هزرێ ل ئایندە بکەن و پێکڤە بەرەڤ ریفراندومێ بچین و بریارا سەربخویێ دەن)

ئەڤرۆ نیوز ، نەوزاد ھلۆری:
ب مەرەما زێدەتر خزمەتکرنا کەس و کارێن شەھید و ئەنفالکریێن گەلێ کورد ب درێژاھیا دیروکێ ، کومەلگەھەکا نوژداری ل قەزا سوران ھەموو خزمەتێن خوەیێن نوژداری کرنە بێ بەرامبەر بو کەس و کارێن شەھید و ئەنفالکریان.
دڤی واریدا ئەشقی مەلا رێڤەبەرێ رێڤەبەریا کاروبارێن شەھید و ئەنفالکریێن قەزا سوران تایبەت بۆ ئەڤرۆ نیوز گۆت: (لسەر داخوازی و دەستپێشخەریا رێڤەبەریا کاروبارێن شەھید و ئەنفالکریێن قەزا سوران کومەلگەھا نوژداری یا فارما ل قەزا سوران ھەموو خزمەتێن خوەیێن نوژداری و ساخلەمی بو کەس و کارێن شەھید و ئەنفالکریان کرنە بێ بەرامبەر کو پێکدھێن ژ دیتنا نوژداری ، سونار ، تاقیگەە ، دەرمان ، تیشک و چەند خزمەتگوزاریەکێن دن)
زێدەتر گۆت: (ھەر کەس و کارەکێ شەھید و ئەنفالکریان ب درێژاھیا دیروکێ بخوازن ل کومەلگەھا ناڤبری چارەسەریێن بێ بەرامبەر وەربگرن دڤێت دەستپێکێ سەرەدانا مە بکەن ئەم دێ ئەوان رەوانەیێ کومەلگەھا ناڤبری کەین)
ل گورەی ئاخفتنێن ناڤبری کەس و کارێن شەھید و ئەنفالکریێن ھەرچوار قەزایێن سوران و رەواندوز و چومان و مێرگەسوور دکارن مفایی ژ ڤێ یەکێ وەربگرن و گۆت ژى: (کومەلگەھا نوژداری یا فارما ب ستافەک ئەکادیمی و بسپوور ماوەیێ چەندەکێ یە کەفتیە د خزمەتا خەلکێ ھەرێما کوردستانێ و قەزا سوران و دەروبەرا)

ئەڤرۆ نيوز:
سکرتێرێ مەکتەبا سیاسی یا پارتی دیموکراتی کوردستان 14 سالیا دەرکەفتنا رۆژناما ئەڤرۆ پیرۆز دکەت و دبێژیت: رۆژناما ئەڤرۆ جھێ رێزگرتنێ یە.
فازل میرانی، سکرتێرێ مەکتەبا سیاسی یا پارتی دیموکراتی کوردستان ب ھەلکەفتا 14 سالیا دەرکەفتنا رۆژناما ئەڤرۆ برۆسکەکا پیرۆزباھیێ ئاراستەی رۆژنامێ کریە و تێدا ھاتیە: “14 سال دەمەکێ درێژە ژ بۆ خەباتا رۆژنامەڤانی و راگەھاندنێ، ژ بەرکو کارەکێ پری ماندیبوون و مەترسیدارە، ب تایبەت د دەمێ شەڕان دا”.
فازل میرانی د وێ برۆسکا پیرۆزباھیێ دا خویا ژی کریە کو بەردەوامیدان ب کارێ خزمەتکرنێ ژ لایێ رەوشەنبیری و خزمەتکرنا زمان و پەیڤا رەسەن ژ لایەکیڤە، دیسا گەھاندنا پێزانین و چاڤدێریکرنا ھەموو سازیان ژ لایەکێ دیڤە و پاراستنا بێلایەنیێ ھەر ژ سەردەمێ حەفتیناما (پەیمان) و (ئەڤرۆ) یا رۆژانە جھێ رێزگرتنێ یە و تێدا ھاتیە: “دەستخوش بۆ ماندیبوونا ھەوە و چێکرنا کادرێن رۆژنامەڤانی یێن بەرکەفتی و خزمەتکارێن وەلاتی و وەلاتیان”.
د برۆسکا پیرۆزباھیا سکرتێرێ مەکتەبا سیاسی یا پارتی دیموکراتی کوردستان دا ھاتیە: “دوبارە رۆژا دامەزراندنا رۆژنامەیا ھەوە پیرۆزە”.