ئەڤرۆ نیوز ، نەوزاد ھلۆری:
ل ھەرسێ رۆژانێن جەژنا رەمەزانا پیروز ل سنوورێ پارێزگەھا دھۆکێ 30 روودانێن جوراوجۆر ژلایێ رێڤەبەریا گشتی یا بەرەڤانیا باژێری ل دھوکێ ھاتینە تومارکرن.
بێوار عەبدولعەزیز بەرپرسێ راگەیاندنا رێڤەبەریا گشتی یا گشتی یا بەرەڤانیا باژێری ل دھوکێ بۆ ئەڤرۆ نیوز گۆت: (ل ھەرسێ رۆژانێن جەژنا رەمەزانا پیروز ل سنوورێ پارێزگەھا دھۆکێ 30 روودانێن جوراوجور سووتنا پوش و پاوان و خانی و ترومبێل و کارگەە و چەند روودانەکێن دن یێن سووتنێ روویداینە ، ژ ئەنجامێ ئەوان روودانان ژی زێدەتری 38 ملیون دینار زیان ھەبوینە)
زێدەتر گۆت: ( ھەر ل سنوورێ پارێزگەھا دھوکێ ل رۆژانێن جەژنێ 2  کەسان ژ ئەگەرا ئەوان روودانان گیانی َخوە ژ دەستدایە و کەسەک ژی خەندقیە ، تیمێن بەرەڤانیا باژێری شیاینە پشکەکا زور یا وان روودانان کونترول بکەن و کەسەکێ ژی ژ خەندقینێ ل زاخۆ رزگار بکەن)

ئەڤرۆ نیوز ، نەوزاد ھلۆری:
ژێدەرەکێ ل دێرەلووکێ یا سەر ب قەزا ئامێدیێ دیارکر کو ئەڤە ل رۆژھەلاتێ ھەتا نھا بەردەوام فرۆکەیێن تورکیا ل ھنداڤا ئاسمانێ سنوورێ ناحیا دێرەلوکێ ھاتن و چونێ دکەن و جار جار ژی دەنگێ بوردومانێ دھێتە بھیستن.
ئەوی ژێدەری زێدەتر بۆ ئەڤرۆ نیوز گۆت: ( فروکەیێن تورکی بەردەوامن لسەر بوردومانکرنا دەڤەرێ و ئەڤرو ژی دەنگێ بوردومانا وان ل پشتا چیایێ لینک و باکوورێ گوندێ رەشاڤا ھاتیە بھیستن ، بەلێ ژ بەرکو کەس ل وان جھان نینە چوو ژ زیانێن وان ناھێتە زانین ، ئەڤە زێدەباری کو ھژمارەکا خەلکێ دێرەلوک چوینە دەڤەرا نێروەورێکان ل ناڤا رەز و بیستانێن خوە و ھندەک ژ وان زڤرینەڤە و وەکو وان دایە دیارکرن کو دەنگێ فروکەیان ل ئەوێ دەڤەرێ و بوردومانا فروکەیان دھێتە بھیتسن )
دھێتە زانین کو ھەیاما نێزیکێ ھەیڤەکێ یە سوپایێ تورکیا ھژمارەکا زور یا سەربازێن خوە بو دەڤەرا چەلێ و شەمزینان ئینایە و ئڤ یەک ژی بوویە سەدەم کو ھەند جاران شەر و ئالوزی دناڤبەرا وان و پەکەکێ درۆست ببیت.
عومەر ئورەیی بەرپرسێ لقێ ١٨ێ پارتی دیموکراتی کوردستان ل قەزا ئامێدیێ پێشتر بو ئەڤرۆ نیوز دیارکر بو کو نھا شەرێ دناڤبەرا پەکەکێ و سوپایێ تورکیا ل قەزا ئامێدیێ گەرمتر بوویە و گۆت: ( پەکەکێ ٤٠% ژ ئاخا باشوورێ کوردستانێ ل قەزا ئامێدیێ داگیرکریە و خەلکێ دەڤەرێ دخوازن کو پەکەکە دەڤەرێ چول بکەن داکو چوو زیان نەگەھیتە رەز و بیستان و چاندنا وان و سەرو مالێ وان ژی یا پاراستی بیت)

ئەڤرۆ نیوز ، نەوزاد ھلۆری:
رێڤەبەریا گشتی یا ھاتن و چۆنا دھوکێ ب رێیا ئەڤرۆ نیوز ئامارا روودانێن ھاتن و چۆنێ ل سنوورێ پارێزگەھا دھۆکێ بەلاڤکرن.
ئازاد تەھا بەرپرسێ راگەھاندنا رێڤەبەریا گشتی یا ھاتن چۆنا پارێزگەھا دھۆکێ تایبەت بۆ ئەڤرۆ نیوز گۆت: ( ل ھەرسێ رۆژانێن جەژنا رەمەزانا پیروز ل سنوورێ پارێزگەھا دھۆک 12 روودانێن ھاتن و چوونێ درۆست بووینە و د ئەنجام دا 3 کەسان گیانێ خوە ژ دەستدایە و 7 کەس ژی برینداربووینە و زیانەکا زورا ماددی بەر ھژمارەکا ترومبێلان کەفتیە )
زێدەتر گۆت: ( ئەگەرا پرانیا روودنان ژی بو بلەز لێخورینا شوفێران و نەپێگیریکرن ب رێنمایێن ھاتن و چوونێ دزڤریت )

ئەڤرۆ نیوز ، نەوزاد ھلۆری:
رێڤەبەریا پۆلیسێن پارێزگەھا دھوکێ تایبەت بۆ ئەڤرۆ نیوز دیارکر کو پلانا وان یا رۆژانێن جەژنێ بو پاراستنا سەر و مالێن وەلاتیان سەرکەفتن ئینایە.
دڤی واریدا رائید ھێمن سلێمان بەرپرسێ راگەھاندنا رێڤەبەریا گشتی یا پۆلیسێن پارێزگەھا دھۆکێ بۆ ئەڤرۆ نیوز گۆت: ( ژبەر وێ پلانا ب ھێز و رێک و پێکا ژلایێ پولیسێن پارێزگەھا دھۆک ھاتیە دانان بۆ پاراستنا سەر و مالێ وەلاتیان ، سوپاس بو خودێ 100% سەرکەفتن ئینا و چوو ریدانێن کوشتن و رەڤاندن و دزی ل سنوورێ پارێزگەھا دھۆکێ نەھاتینە ئەنجامدان )
زێدەتر گۆت: ( پلانا مە دێ یا بەردەوام بیت بو پاراستنا سەر و مالێ وەلاتیان نەک تنێ ل رۆژێن ەژن بەلکو ب درێژاھیا سالێ)

ئەڤرۆ نیوز، لەزگین جوقی
رێڤەبەرێ نڤیسینگەھا رزگارکرنا رەڤاندیێن کوردێن ئێزدی، دیارکرکو ئەڤرۆ ٢٧/٦/٢٠١٧ ل مووسلێ کچەکا کوردێن ئێزدی ژدەستێن تیرۆرستێن داعش ھاتە رزگارکرن وگەھشتە ناڤ کەس وکارێن خوە ل دھۆکێ ھیشتا چارەنڤیسی دایک و بابێن وێ دیارنینە ل کارەساتا شنگال سەر دەمێ حکومەتا مالیکی ھاتبوونە گرتن ورەڤاندن.
حسێن کورۆ قائێدی، رێڤەبەرێ نڤیسینگەھا رزگارکرنا رەڤاندیێن کوردێن ئێزدی، دیارکرکو کچەک ب ناڤێ( ر،ع) تەمەن ١٧ سالیێ ژ دەستێن تیرۆرستان ژباژێری مووسل ھاتە رزگارکرن ئەڤە سێ سالن دناڤ دەستێن ھوڤانێن تیرۆرستێن داعشێ دا ئەڤرۆکە مە شیا ل مووسل ڤێ کچێ رزگاربکەین.
ئاماژە دا وی چەندی ژی کو پشتەڤانیا نڤیسینگەھا سەرۆکێ حکومەتا ھەرێما کوردستانێ ھەتا نوکە پتر ژ سێ ھزار کەسان ژدەستێن تیرۆرستان یێن ھاتنیە رزگارکرن وبەردەوام ژێ کار دھێتە کرن بۆ رزگارکرنا ھەموو رەڤاندیان.

ئەڤرۆ نیوز ، نەوزاد ھلوری:
سپێدەھیا ئەڤرۆ رۆژا سێ ژ جەژنا رەمەزانا پیروز وەلاتیەکێ گوندێ ھلورا یا سەر ب ناحیا شێلادزێ د روبارێ زێ مەزن دا خەندقی و تیمێن نقومڤانان ژی مژولێ لێگەریانا تەرمێ وینە.
عەبدوللا ھلوری ھەلبژێرێ گوندێ ھلورا یا سەر ب ناحیا شێلادزێ بۆ ئەڤرۆ نیوز گۆت: ( ئەڤرۆ سپێدێ وەلاتیەکێ گوندێ مە ب ناڤێ مێڤان نەجمەدین ھلوری د رووبارێ زێ ی بچو کدا خەندقیە و ھەتا نھا ژی ناھێتە زانین ئەگەر چ بوینە بەلێ وەسا دیارە چویە ماسیان)
ژلایەکێ دنڤە رۆژھاد سیتەیی ژ تیما نقومڤانێن شێلادزێ ھەوالا حەندقینا ئەوی وەلاتی دوپاکر و بو ئەڤرۆ نیوز گۆت: ( بەلێ ئەڤرۆ سپێدێ ل دەما گرتنا ماسیان وەلاتیەکێ گوندێ ھلورا بناڤێ مێڤان نەجمەدین ھلوری د ژیێ 13 سالیێ دا خەندقیە و تیمێن مەژی مژولێ دەرئینانا تەرمێ وی نە)

ئەڤرۆ نیوز ، ھلوری:
ب ھەلکەفتا رۆژا جیھانیا نەھێلانا ماددێن بێھوشکەر رێڤەبەریا گشتی یا نەھێلانا ماددێن بێھوشکەر یا سەر ب ئاسایشا گشتی یا ھەرێما کوردستانێ ئامارا شەش مەھێن ئەڤ سالە یا ماددێن بێھوشکەر دراگەھاندنەکێ دا بلاڤکر و تێدا ھژمارەکا بکارھێنەرێن وێ ل گەل ماددەیێن بێھوشکەر ھاتینە گرتن.
د راگەھاندنا وان دا ھاتیە : (د شەش مەھێن بوری دا ئەم شیانیە 235 کەسان ب تومەتا بازرگانیکرن و بکارئینانا ماددێن بێھوشکەر بگرین ل گەل 43 کیلویێن ماددێن بێھوشکەر کو پێکھاتبوون ژ تریاک و حەشیش و کوکاین و چەند ماددەیەکێن دن ، ئەڤە زێدەباری گرتنا 18 ھزار حەبکێن بێھوشکەر)

د راگەھاندنا وان دا زێدەتر ھاتیە: (ھەر د ئەڤا شەش مەھێن بوری دا مە شیایە ملیونەک دولارێن ئەمریکی یێ ساختە ژی بگرین)