ئەڤرۆ نیوز ، نەوزاد ھلۆری
سەرۆکێ ھەرێما کوردستانێ دچارچوڤێ دیدارەکێ ل گەل رۆژناما ئەھرام یا مسری کو ئەڤرۆ ھاتیە بەلاڤکرن دیارکر کو ھەر پارتەکا کوردستانێ دژی ریفراندۆمێ بیت ھەر وەکو خوکوژیەکا سیاسی و نیشتمانی ئەنجامدای و باشترە گەل چارەنڤیسێ خوە ل گەل عیراقێ ئێکلا بکەت و ھەرێم و عیراق ببنە دوو ھەڤسوو و ھەڤپەیمانێن باش.
بارزانی دیارکر کو پەیوەندیێن دناڤبەرا مسرێ و ھەرێما کوردستانێ د خورتن و کونسولگەریا مسرێ ل ھەولێر ھەیە بو زێدەتر بەر ب باشتر برنا پەیوەندیێن ھەردوولا و گۆت: (ھەموو حکومەتێن عیراقێ ژ سالا ١٩٢٠ ھەتا نھا شکەستن ئینایە و ئەم وەکو کورد ب ھەڤپشکێن راستەقینە نەداناینە و وەکو دوژمن سەرەدەری ل گەل مە کریە و ھەموو جورێن شەر و کومکوژی و جینوسایدان ب سەر گەلێ کورد ئیناینە و وەلاتێ مە وێرانکریە ، پشتی سالا ٢٠٠٣ مە ئومێد ھەبوو جارەک دن ل سایا عیراقێ بژین ڤە و چوینە بەغدا داکو پێکڤە ل عیراقێ بژین وەکو ھەڤپشک و مە پشکداری د دەستورێ عیراقێ دا کر بەلێ پشتی ١٤ سالێن حوکمرانیا عیراقێ بەغدا نەشیا بسەلمینیت کو ژ حکومرانیا بەری خوە جودایە ، ئەوان ژی ئەم پشتگوە ڤە ھاڤێتین و بودجە و نانێ خەلکی َکوردستانێ بری و دەستوور بنپێکر کو ئەڤ یەک ژی جورەکێ دن یێ کومکوژیێ و ئالوزیانە)
زێدەتر گۆت: ( مەرەم ژ ریفراندۆمێ سەربخوەیە ، و داعشێ بزاڤ کر بچیتە عیراق و سوریا و چەند دەڤەرێن کوردی ژی ل گەل داگیرکرن و ڤیا بھێتە ھەولێر و کەرکوک و دھۆک ژی ، و ھەر د وی دەمی دا بەغدا موچەیێن پێشمەرگە و فەرمانبەرێن ھەرێمێ بری و بزاڤکرن پێشمەرگەی لاواز بکەت ب تایبەتی د رێگرتنا وێ یەکی َکو چەک بو پێشمەرگەی بھێت ئەڤە د دەمەکێ دایە کو د سوپایێ عیراقێ دا پێشمەرگە ھەڤپشکە ، ژبەرڤێ ئێدی ئاشکرایە کو گەلێ کورد دخوازیت سەربخوە بیت و چارەنڤیسێ خوە دیار بکەت و ئەم دێ دانوستاندنێ ل گەل عیراقێ بو پرسا ریفراندۆمێ کەین و مە دڤێت ئێدی ب ئاشتی بژین )
سەرۆکێ ھەرێما کوردستانێ د درێژاھیا چاڤپێکەفتنا خودا دیارکر ژی کو عیراقێ دڤێت رژدیێ لسەر دەڤەرێن ڤەقەتیابی بکەت دبن ماددا ١٤٠ دا بمینن مینا کەرکوک و زومار و شنگال و مەخمور و خانەقین و شێخان و دەڤەرێن دن و گۆت: (ئەڤ دەڤەرەکە پشکەکن ژ ھەرێمێ و بناڤی َدەڤەرێن ڤەقەتیاینە و عیراقێ ھەردەم ڤیایە کو ئاریشەیان بو ئەوان دەڤەران چێبکەن ئەڤە د دەمەکێ دایە کو دڤیابا بەرا سالا ٢٠٠٧ ئەڤ دەڤەرە ھاتبانە چارەسەرکرن)
ل بارا ھەلویستێ تورکیا بو ریفراندۆمێ گۆت: ( لێدوانێن تورکیا دچارچوڤێ ئەندامەتیا نەتەوەیێن ھەڤگرتی یە کو دڤێت ئەو پێگریێ ب رێکەفتنامەیان و بریارێن نەتەوەیێن ھەڤگرتی بکەن و رێزێ ل ئێکەتیا ئاخا وەلاتێن دن بگرن ژبەرڤێ پرانیا لێدوانێن وان دڤی واریدا بویە ژێدەر بەلێ د بنەرەت دا دژی ریفراندۆمێ نینە و ئەم ژ ھەلویستێن وەلاتان دگەھین ، پەیوەندیێن دناڤبەرا مە و تورکیا زور دباشن مینا پەیوەندیێن بارزگانی و ئابووری و دوستایەتی و ئەو بەردەوام وەبەرھێنانێ ل کوردستانێ دکەن و ملیاران دولار ل کوردستانێ ئێخستینە کاری)
پرانیا وەلاتێن کو ھاتینە چێکرن ھەمووان رەزامەندیا جیھانی وەرنەگریتە و بەلکو زور دەم پێدڤی بوویە ھەتاکو دانپێدان بھێتەکرن ، ئەم دێ حەزا گەلێ خوە بجھکەین و داخوازێ ژی ل وەلاتێن جیھانێ کەین کو رێزی َل پێگیریێن نیڤدەولی و بھایێن رەوشتیێن سیاسی بگرن و نابیت ئەو دژی ئیرادا شەش ملیون کەسان بن ل ھەرێما کوردستانێ ، بارزانی ھوسا گۆت.
بارزانی دیارکر ژی کو چوو حزبێن کوردستانێ دژی ریفراندۆمێ نینە و بەلکو تنێ ناکویێن سیاسی ھەنە کو ئەڤ یەک ژی د سیستەمێ دیموکراسی دا نورمالە و گۆت ژی: ( ھەر پارتەکا دژی ریفراندۆمێ ب راوستیت ھەروەکو خوە کوژیەکا سیاسی و نیشتمانی ئەنجامدای ، ئێدی مە دڤێت ل گەل عیراقێ ببینە دوو ھەڤسو و ھەڤپەیمانێن باش )

ئەڤرۆ نیوز ، ھلۆری:
ئەڤرۆ سپێدێ ل ھولا سەعەد عەبدوللا ل ھەولێر سەرۆکێ ھەرێما کوردستانێ ل گەل ماموستایێن ئاینی کومبوو و د گوتارەکێ دا دیارکر کو عیراق ئەگەرا ھەموو ئەوان ئاریشەیانە یێن کو روودایی و بو چارەسەرکرنا ھەموو ئاریشەیان ژی گەلێ کورد دێ پەنایێ بو ئەنامدانا ریفراندۆمێ بەت.
بارزانی بو ماموستایێن ئاینی دیارکر کو بەری ھاتنا داعشێ ژی ئەوی داخواز ل پەرلەمانێ کوردستانێ کربوو کو ریفراندمێ ئەنجام بدەن و گۆت: (پێشر ھەموو رێیێن پێکڤە ژیانێ ل گەل عیراقێ ھاتینە تاقیکرن بەلێ چوو پێکڤە ژیانێن بزوری سەرنەگریتنە و مە دڤێت بو خەلکێ کوردستانێ روون بکەین کو ریفراندۆم بتنێ ئامانجەکە نەک ئامرازە بو گەلێ کورد ، ئەوێن کو داخوازا پاشئێخستنا ریفراندۆمێ ژی دکەن بلا بھێن و بو خەلکێ کوردستانێ روون بکەین و بێژن بوچی ئەم پاشبێخین )
سەرۆکێ ھەرێما کوردستانێ مەسعود بارزانی دیارکر ژی کو ریفراندۆم مافێ ھەموو گەلێ کوردە و چوو حزب و لایەنێن سیاسی ماف نینە ب مولکی َخوە بزانن و زێدەتر گۆت: ( مافەڤا ل گەل عیراقێ و ئەو بارودوخێ نھا ھەیی بو ھەرێما کوردستانێ و خەلکێ وێ جھێ قبولکرنێ نینە و چوو رامانێن پێکڤە ژیان و شەراکەتێ لگەل عیراقێ نەمایە ھەر بوو نموونە پێشتر ٤٠% بو کوردان دناڤ سوپایێ عیراقێ ھاتبویە دانان بەلێ نھا چوو ژ وێ رێژەیی َنەمایە ، ئێدی دەم ھات رێکێ ل عیراقێ بگرین و دڤێت گەل بریارا خوە بدەت )

ئەڤرۆ نیوز ، ھلۆری:
سەرۆکێ ھەرێما کوردستانێ د چارچوڤێ دیدارەکا رۆژناما ” الحیاە” دیارکر ئەنجامدانا ریفراندۆمێ ل ھەرێما کوردستانێ چوو پەیوەندی ب لایەنێن سیاسی ڤە نینە و بریارا وێ د دەستێ گەلێ کورد دایە و پەشیمان بوون ژی بوو نینە بەلکو ئەڤ یەک نووترین شێوازێ پێکڤە ژیانێ یە کو ھەرێما کوردستانێ نەبویوە شەراکەتا راستەقینە ل گەل عیراقێ و چوو پێگری ب دەستوورێ عیراقێ نەھاتینەکرن.
سەروک بارزانی دیارکر ژی کو ئەو دخوازن ل دەما کونترولکرنا باژێرێن تەلەعفەر و قایم و حەویجە کێمترین زیان ب خەلکێ سڤێل بگەھن و گۆت: ( ژ روویێ کریاری ڤە داعشێ چوو ھێز نەمایە کو بەرەڤانیێ ژ خوە بکەت ، ل دەستپێکێ ئەم ل وێ باوەریێ بووین کو ئەرکێ کونترولکرنا تەلەعفەر د ستوویێ سوپایێ عیراقێ دایە ل گەل ھێزێن نیڤدەولی ، ئەوێن کو ل تەلەعفەر مایی تورکمانێن سونەنە و پشکەک ژ وان ھەڤکاریا داعشێ کریە و مەترسی ھەیە د ئەرکی َکونترولکردنێ دا تولا خوە ڤەکەن و رەنگە زاروک و ئافرەتان ژی بخوڤە بگریت )
بارزانی د درێژاھیا ھەڤدیتنا خوە ل گەل رۆژناما ناڤبری دیارکر ژی کو ئەنجامدانا ریفراندۆمێ و پێنگاڤێن بەر ب سەربخووەبوونێ ، پرسەکا ئاشتیانەیە و دویرە ژ توندوتیژیێ و گۆت ژی: (مەرەما سەرەکی ژ ریفراندۆمێ رێگرتنە ل کارەسات و شەرێن نوو ، ئەم ل گەل شەری نینن بەلکو بەردەوام دژی شەرابووینە و مە برایەتی و پێکڤەژیان ڤیایە ، سەرکرداتیا سیاسیا کوردستانێ بریار لسەر ئەنجام دانا ریفراندۆمێ دایە کود نھادا بھێتە ئەنجام دان و پاشڤە زڤین ژی بوو نینە و مە دڤێت ئیرادا گەلێ کورد نیشا جیھانێ بدەین ، ھەر کەسەکێ بێژیت دەم نینە ئەم دبێژین وان کەنگی دەمە ، مە رێیا ئازاد و ھەڤپشک ل گەل عیراقێ تاقیکر بەلێ یا سەرکەفتی نەبوو ژبەرڤێ گەلێ کورد بریاردایە کو ریفراندۆمێ بو سەربخوەیێ ئەنجام بدەت و مە نەڤێت جارەک دن ئەزموونا سەد سالی یا شکەستی ل عیراقێ دووبارە بکەین ڤە و پێدڤی یە وەلاتێن ھەرێمی ل وێ یەکێ تێبگەھن کو ئەم ئەگەرا ئەمن و ئاسایش و سەقامگیریا دەڤەرێ نە ، و ئەنجامدانا ریفراندومێ ژی ب رامانا راگەھاندنا شەری ل گەل وەلاتێن ھەڤسوو ناھێن و مە باوەری ب دوستاتیێ ھەیە ب تایبەتی ل گەل تورکیا )
سەرۆکێ ھەرێما کوردستانێ ئەو یەک ژی روونکر کو ئەوان داخوازا درۆستکرنا چوو پارتان ل تورکیا نەکریە و ڤەکرنا نڤیسینگەھا پارتی ژی ل تورکیا تشتەک نورمالە ئەگەر بھێتەڤەکرن و گۆت ژی: ( ریفراندۆمێ چوو پەیوەندی ب لایەنێن سیاسی ڤە نینە و بتنێ وەلاتیان ماف ھەیە دەنگی بو بدەن و نابیت کەس ژی ب مولکێ خوە بدانن ، کومسیونا بلندا سەرخویێ ژ ھەر شاشیەکا تەکنیکی بەرپرسیارە و نھا بزاڤ دھێنە کرن بو ئاسایکرنا ھەر ئەگەرەکێ ، و دەنگدان ل ھەرێما کوردستانێ دێ ب شێوەیێ کاغەزی بیت بەلێ بو ئەوێن ل دەرڤە نھا کومسیون د بزاڤا دایە بو دیتنا چارەسەریەکا گونجای )
ھەبوونا پەکەکێ ل شنگال نەیا قانونی یە و ئەم رێکێ نادەین چوو ھێزەکا نەفەرمی ل دەڤەرێ ھەبیت و ئەم نھا بزاڤان دکەین کو چوو رووب روو بوونێن سەربازی ل دەڤەری َدرۆست نەبن و تنێ خەلکێ شنگالێ ماف ھەیە چارەنڤسیێ دەڤەرا خوە ئێکلا بکەن ، مە چوو پەیوەندی و ئاریشە ل گەل حەشد شەعبی نینە بەلێ ئەم رێکێ ب چوو ھێزان ژی نادەین کو بھێنە ناڤا ئاخا ھەرێما کوردستانێ کو دڤێت دژی داعش شەری بکەن ب تایبەتی د چارچوڤی َ کونترولکرنا موسل دا ، مە ھەماھەنگی ل گەل حەیدەر عەبادی ھەیە و چوو جاران داخوازا شەری ناکەین و ئەم دەستپێشخەر ژی نابین بەلێ ب پشتراستی ڤە مە مافێ پاراستن ژ خوە ھەیە ، پێشتر ژی چوو ئاریشەیێن ھەلاویستێن دناڤبەرا ھەرێم و عیراق نەھاتینە چارەسەرکرن و ھەموو رێکەفتن ژی ھاتینە ھەلوەشاندن ، ئەگەر ئەم رێفراندومێ ئەنجام بدەین ئەڤە رامان ئەوە مە دەست ب شێوازەکێ نوو یێ پەیوەندیان ل گەل عیراقێ کر ، و پشتی ریفراندومێ دی َدەست ب چارەسەرکرنا ھەموو ئەوان ئاریشەیان کەین یێن کو دناڤبەرا ھەرێم و عیراقێ ھەی و ئێک ژ وان ژی دوسیا پەترولێ یە ، بارزانی ھوسا گوت.
بارزانی ل بارا کەرکوکێ دیارکر کو ئارمانجا ئەوان وەکو ھەرێما کوردستانێ ئەوە کو کەرکوک ببیتە نموونەکا پێکڤە ژیانا ئولی و نەتەوەیی و دەستوورێ عیراقێ بتنێ گەرنتی بوو بو پاراستنا ئێکپارچەیا عیراقێ دکر بەلێ عیراقێ ئەڤ یەک بجھنەکر.