ئه‌ڤرۆ نیوز:
كۆڤارا فۆرێن پۆلسی (ئێف پی) هه‌ڤپه‌یڤینه‌ك دگه‌ل سه‌رۆكێ هه‌رێما كوردستانێ مه‌سعود بارزانی دا كریه و باس ل 55 سالێن خه‌باتا وی بۆ سه‌رخوه‌بوونێ كرییه، ل بن ناڤێ (بۆچی ده‌مێ سه‌رخوه‌بوونا كوردستانێ یه؟) به‌لاڤ كرییه، بارزانی به‌رسڤا چه‌ندین پرسیاران ل دۆر رێفراندۆما سه‌رخوه‌بوونا كوردستانی َو چه‌ندین مژارێن هه‌رێم و ده‌ڤه‌رێ داینه، ئه‌ڤا ل خوارێ هنده‌ك ژ ده‌قێ وی یه:
ئێف پی: ژڤانێ رێفراندۆمێ هاتییه ده‌ستنیشانكرن، من زانی پشتی دیاركرنا وی ژڤانی هوون د گه‌ل سه‌رۆكوه‌زیران عه‌بادی ئاخڤتینه، كارڤه‌دانا وی چ بوو؟
بارزانی: راسته، به‌ری نها ژی مه ئه‌ڤ مژاره دگه‌ل عه‌بادی گوتوبێژ كرییه، من تایبه‌ت بۆ باسكرنا رێفراندۆمێ په‌یوه‌ندی پێڤه كر و بۆ شرۆڤه كر كو رێفراندۆم تشته‌كێ ئاسایی یه و مافێ قانوونی یێ گه‌لێ مه‌یه، هه‌روه‌سا من بۆ رۆن كر كو پشتی رێفراندۆمێ دێ ئه‌نجامان د گه‌ل گۆتوبێژ كه‌ین برێه‌كا ئاشتییانه، ئه‌وی تێگه‌هشتن بۆ هندێ هه‌بوو، من گۆتێ كو ئه‌م دخوازین مژارێ چاره‌سه‌ربكه‌ین برێییا ئاشتیێ نه توندوتیژیێ. وی تێگه‌هشتنا خوه نیشان دا و ب ئه‌رێنی ل مژارێ نێری.
ئێف پی: ته دیار كر كو هه‌ر گاڤه‌كا به‌ره‌ڤ سه‌رخوه‌بوونێ دێ د چارچووڤێ دانوستانان د گه‌ل به‌غدا دا بیت، د وان دانوستانان دا، دێ ب كێمتر ژ سه‌روه‌رییه‌كا ته‌مام رازی بن؟
بارزانی: رێفراندۆم بۆ سه‌رخوه‌بوونێ یه، ئه‌و پرسیار دێ ژ خه‌لكی هێـه كرن و خه‌لك دێ به‌رسڤێ ده‌ت.
ئێف پی: ئه‌ڤ رێفراندۆمه نه د چارچووڤێ به‌رسڤدانا سیسته‌مێ سیاسی یێ ناڤخۆ و ده‌رڤه یه، دێ شێی بێژی كاریگه‌رییا وێ دێ چ بیت.
بارزانی: مژارا رێفراندۆمێ ل دۆر چاره‌نیسێ گه‌له‌كی یه، له‌ورا ئه‌ڤ مژاره ژ هه‌ر چارچووڤه‌كێ سیاسی یان حزبی مه‌زنتره، یان هه‌ر ئاریشه‌كا د ناڤبه‌را پارتێن سیاسی دا، ئه‌زێ پشتراستم كو پرانییا خه‌لكێ كوردستانێ د گه‌ل رێفراندۆمێ دانه، پشته‌ڤانێن پارتێن سیاسی ژی پرانییا وان د گه‌ل رێفراندۆمێ دانه، مه كۆمبوونه‌كا ئه‌رێنی د گه‌ل هه‌می پارتان هه‌بوو و هه‌می پشته‌ڤانیێ لێ دكه‌ن.
ئێف پی: تۆ باس ل خواستێن كوردان دكه‌ی، لێ مه‌ترسی هه‌یه كو ب كرنا رێفراندۆمێ بێی پرۆسه‌كا فه‌رمی كو سه‌رخوه‌بوونێ بئینیته جهـ، پێشبینیێن ته ژ ئاستی مه‌زنترن؟
بارزانی: رێفراندۆم بۆ وه‌رگرتنا بۆچوون و ده‌ستوورییا گه‌لییه، بۆ نیشاندانا حه‌زا گه‌لی بۆ هێزێن ناڤخۆ و ده‌ره‌كی، پشتی خه‌لك بریارێ دده‌ت، وه‌كی من گۆتی دێ ئێكسه‌ر دانوستانێن جدی و ئاشتییانه د گه‌ل به‌غدا ده‌ست پێ كه‌ین بۆ بجهئینانا خواستا ملله‌تی ب ته‌مامی. رێفراندۆم بۆ سه‌رخوه‌بوونێ یه، له‌ورا من دڤێت هه‌می تێبگه‌هن كو هه‌رده‌ما مه دیالۆگ ده‌ست پێ كر ئه‌م ده‌ست ژ بجهئینانا خواستا خه‌لكی به‌رناده‌ین، ئه‌ڤجا رێفراندۆم بۆ سه‌رخوه‌بوونێ یه و پێدڤییه ئه‌نجامێن وێ بهێنه بجهئینان.
ئێف پی: ل سالا 2005 ژی رێفراندۆمه‌ك هاتبوو كرن، 98% ب ئه‌رێ ده‌نگ دابوو لێ سه‌رخوه‌بوونا كوردستانێ بده‌ستڤه نه‌هات، دێ رێفراندۆما ڤێ جارێ چاوا یا جیاواز بیت؟
بارزانی: رێفراندۆما 2005ێ ژ ئالیێ رێكخستنێن جڤاكا سڤیل ڤه بانگه‌شه بۆ هاتبوو كرن و هاتبوو رێكخستن، لێ ئه‌ڤه یا فه‌رمییه ژ ئالیێ حكومه‌ت و پارتێن سیاسی ڤه یه، ئه‌ڤه دێ هێته هه‌ژمارتن یا دی نه‌وه‌سا بوو.
ئێف پی: وه هاریكاری ژ پسصۆرێن قانوونێن نێڤده‌وله‌تی وه‌رگرتییه بۆ چاوانییا پێكئینانا ڤێ رێفراندۆمێ كو ب جۆره‌كی بیت كاریگه‌رییه‌كا مه‌زنتر هه‌بیت ڤێ جارێ؟
بارزانی: بۆ چه‌ندین ساله ئه‌م كار دگه‌ل پسپۆرێن نێڤده‌وله‌تی و پسپۆرێن قانوون و سیاسه‌تا نێڤده‌وله‌تی دكه‌ین، بۆ وێ یه‌كَ هاریكارییا مه د پێكئینانا ڤێ دا بكه‌ن، چ پێ نه‌ڤێت گه‌له‌ك هاری مه كرییه.
ئێف پی: دێ زڤرمه هندێ كا دێ ئه‌ڤ رێفراندۆمه چ ده‌ته كوردان، ژ ئالیێ ته‌كنیكی ڤه، هه‌تا نها هه‌چماره‌كا هێزان ب ئاشكرایی بزاڤ كرییه رێفراندۆمێ ب نه‌قانوونی نیشان بده‌ن به‌ری بهێته كرن، ئه‌مریكا دژه و توركیا ژی یا رۆن بوویه و ب نه‌به‌رپرسیارانه و شاشییه‌كا مه‌زن ب ناڤ كرییه، ئه‌ڤجا ئه‌ڤ رێفراندۆمه دێ چ هێز و هه‌ژمۆن ب وه ده‌ت كو وه هه‌تا نها نه‌بیت؟
بارزانی: مه گه‌له‌ك بۆ ئێكگرتوویا ئیراقێ كرییه، ئه‌ز دشێم په‌یوه‌ندییا مه د گه‌ل به‌غدا دا ل سه‌ر دو قۆناغا دیار كه‌م، قۆناغا ئێكێ د گه‌ل چێكرنا ده‌وله‌تا ئیراقێ ل ده‌مێ شه‌رێ جیهانیێ ئێكێ ده‌ست پێ كر هه‌تا 2003ێ، یا دووێ پشتی هنگی و هه‌تا نها.
ل سالا 1920 هه‌تا 2003ێ پشكا كوردان ژ حوكمی چ بوو؟ ئه‌نفال و هێرشێن كیمیایی، وێرانكرنا گوندێن مه، گۆرێن بكوم، كۆمكوژی، ئه‌و به‌هرا كوردا بوو د په‌یوه‌ندیێن د گه‌ل به‌غدا دا.
پشتی 2003ێ پشكا كوردان چ بوو؟ برینا بۆدجه‌ی و نه‌پێگیریكرن ب ده‌ستوورێ ئیراقێ ژ ئالییچ وان ڤه، ئه‌ڤجا پرسیارا مه بۆ ئه‌مریكا و وه‌لاتێن دی: دڤێت ئه‌م چ تشتێ دی بكه‌ین، مه گه‌له‌ك زه‌حمه‌ت بر بۆ چێكرنا ده‌ستووری بۆ ئیراقێ كو گه‌ره‌نتیكه‌رێ ماف و شه‌ركێن مه هه‌مییا بیت، مه ده‌نگ پێ دا، د ده‌ستوورێ ئیراقێ دا نڤیسییه كو ئێكگرتنا ئیراقێ گرێدایی بجهئینانا ده‌ستووری یه. پرسیارا من بۆ وان ئه‌وه: ده‌ستوورێ ئیراقێ هاتییه بجهئینان. هه‌لبه‌ت نه‌خێر.
له‌ورا ب نێرینا من و ب نێرینا زلهێزێن جیهانێ، چ ژ وان نه‌گۆتییه ئه‌و دژی رێفراندۆمێ نه، ئه‌و دبێژن كو چێدبیت نه‌ده‌مه‌كێ گونجای بیت، یان ئاریشه‌یان چێكه‌ت، من جیاوازی د گه‌ل وان هه‌یه ل سه‌ر هه‌ردو خالان. ئه‌ڤ یه‌ك ئاریشه‌یان زێده ناكه‌ت، هه‌كه‌ر ئه‌ڤ رێفراندۆمه نه‌هێته كرن، نه‌خوه‌جهییا په‌یوه‌ندییان زێده كه‌ت، و نه‌ئارامی دێ ل ده‌ڤه‌رێ پتر بیت، ئه‌م دخوازین رێفراندۆمێ بكه‌ین دا رێ ل نه‌ئارامیێ بگرین.
هه‌كه‌ر ئه‌و وه‌لاتێن خۆدان بریار دژی رێفراندۆمێ بن، ئه‌و هنگی دژی بنه‌مایێ خوه‌ب خوه نه، كو ئه‌و ژی مافێ راست و دیمۆكراسییانه یێ خه‌لكی بۆ بریاردانا چاره‌نڤیسێ خوه، دژایه‌تییا وان بۆ رێفراندۆمێ دژایه‌تیكرنادسمركاسیێ یه.
ئێف پی: سه‌رباری وێ، وان نێرینا خوه هه‌یه، ئابۆرییا وه ب جۆره‌كی یه كو هین پشت ب جیرانان دبه‌ستن، وه پلان هه‌یه ل سه‌ر جیرانێن خوه بۆ نمونه توركیا ب سه‌ركه‌ڤن؟ مه به‌ری چه‌نده‌كێ دیت چ ب سه‌رێ قه‌ته‌رێ هات ده‌مێ جیرانێن وێ دۆرپێچ دانایه سه‌ر، ئیرانێ ب فرۆكه‌یان خوارن بۆ بر، وه پلان هه‌یه هه‌كه‌ر تشته‌كێ وه‌سا د گه‌ل وه ژی چێبوو كو هین بشێن به‌رده‌وام بن و د دۆرپێچ و دوورپه‌رێزیێ دا سه‌ر هه‌ڤپه‌یمانێن خوه ب سه‌ركه‌ڤن؟
بارزانی: مخابن، نها به‌رژه‌وه‌ندی به‌ری بنه‌ما و ره‌وشت و مرۆڤاتیێ هه‌یه د په‌یوه‌ندییان دا، بۆ نمونه ئاریشه‌یا قه‌ته‌رێ، ئه‌و وه‌لات ب پشته‌ڤانیكرنا تیرۆرێ دهێته سووچباركرن، نها تو دبینی ئه‌و چاوا پشته‌ڤانیێ بده‌ستڤه دئینن،
ئه‌ڤ مژاره یا جودا یه، ئه‌و دۆرپێچێ دداننه سه‌ر قه‌ته‌رێ و ئه‌گه‌ری بۆ پشته‌ڤانیكرنا وێ بۆ تیرۆرێ ڤه‌دگه‌رینن، لێ بۆ مه، ئه‌م شیاین دربه‌كێ مه‌زن ل تیرۆرێ بده‌ین، مه خوین دا بۆ ژناڤبرنا تیرۆرێ. خوه‌ش ده‌لیڤه یه ئه‌ز نها ڤێ داخویانیێ ب ۆته و جیهانێ بده‌م، بۆ مه خۆشتره ئه‌م ژ برسا بمرین نه‌كو د بن زۆرداری و داگیركاریێ دا بژین، هه‌كه‌ر بریار برێیا رێفراندۆمێ بیت و ئه‌و دۆرپێچێ داننه سه‌ر مه بلا ئه‌م بمرین، دێ جیهان چ بێژیته خوه كو هێلای ملله‌ته‌ك ژ برسا بمریت ژبه‌ركو دخواست برێیێن دیمۆكراسییانه چاره‌نڤیسێ خوه دیار بكه‌ن.
ئێف بی: تو باوه‌ری كو گه‌ل دۆرپێچێ قه‌بوول بكه‌ن؟ ژ 1990 هه‌تا نها گه‌له‌ك تشت هاتینه گوهرین، وه په‌یوه‌ندی د ناڤبه‌را كورد و جیهانێ چێكرینه، وه فرۆكخانه چێكرینه، وه مۆلێن مه‌زن چێكرینه، ته باوه‌ره ملله‌تێ كورد دێ رازی بیت د ره‌وشه‌كێ دا بژین یاكو تو ل سالا 1990ێ دا تێدا ژیای؟
بارزانی: مه هزرا هه‌می تشتا كرییه، ئه‌ڤه گرێدایی ئیراده و ده‌نگێ خه‌لكی یه، خه‌لك تێدگه‌هیت كو ئه‌و دێ چن بریارا خوه ده‌ن، چێدبیت ئه‌و ب نه‌خێر ده‌نگ بده‌ن، ل وی ده‌می ئه‌و به‌رپرسیارییا مه یا دیرۆكی نابیت، لێ هه‌كه‌ر ب ئه‌رێ ده‌نگ بده‌ن ئه‌و رامانا هندێ دده‌ت كو گه‌ل یێ ئاماده‌یه بچن و هه‌می مه‌ترسییان قه‌بوول بكه‌ن.
ته به‌حسێ فرۆكخانه‌یان كر، هه‌تا نها ژی، ده‌ستهه‌لاتا هێلێن ئه‌سمانی یا سڤیل ل ئیراقی، ژبه‌ركو باوه‌ری ب فێدرالیێ و هه‌ڤپشكییا هاتووچوویا ئه‌سمانی نینه، ده‌ما فرۆكه‌یه‌ك ژ ئه‌ورۆپا یان هه‌ر وه‌لاته‌كێ دی دهێت، ئه‌و دشێن رێ ل دادانا وان بگرن، چ جۆرێ ده‌ستهه‌لاتێ و چ جۆرێ ده‌وله‌تێ ئه‌و هێز هه‌یه؟
ئێف پی: سەرخوەبوونا کوردستانێ چەندا گرنگە بۆ تە؟
بارزانی: ئەز بۆ سەرخوەبوونا کوردستانێ ژدایک بوویمە، دەمی ئەز ژدایک بووی مالا مە بارزان ھێلا بوو و چووبوونە مھابادێ بۆ پشتەڤانیکرنا کۆمارا کوردستانێ ل مەھابادێ، ئەز ل ویرێ ژ دایک بووم، من چەک ھەلگرت دەمی ئەز شازدە سال، ھەمی ژیانا من بۆ سەرخوەبوونا کوردستانی بوویە.
بۆ ئێکەم جار د دیرۆکا کوردستانێ دا، ئیکەم کۆمار کۆمارا کوردستانێ ل مەھابادێ بوو، دەمی ئالایێ کوردستانێ بلند کری ئەز ل بن سیبەرا وی ئالای دا ژدایکبووم، من د ڤێت ئەز ل بن سیبەرا ئالایێ کوردستانا سەربخوە دا بمرم.
ئێف پی: تو ھزر دکەی ئەڤ رێفراندۆمە دێ رێیا بریاردانا چارەنڤیسی بۆ کەمینەیین دی ل ئیراقێ ڤەکەت؟
بارزانی: ئەم د گەل کەمینەیێن دی نە کا چ چارنڤیسی بۆ خوە د ھەلبژێرن، ئەگەر بخوازن د ھەرێمێ دا بن یان پەیوەندی د گەل بەغدا دا ھەبن، یان رێیەکا دی بھەلبژێرن، بلا وەکی وان بیت.
ئه‌ڤرۆ نيوز:
پلەیێن گەرمایێ ب رێژیەکا بەرچاڤ بلند دبن و رێڤەبەریا گشتی یا کەشناسی و بیڤەلەرزان ل ھەرێما کوردستانێ دیار کر ئەو بارستەیا ھەوایێ روو ل دەڤەرێ کری کو ھەرێما کوردستانێ ژی ب خوەڤە گرتیە تاکو ئەڤرۆ ئانکو رۆژا پێنجشەمبێ دێ بەردەوام بیت.
بژار ئەکرەم رێڤەبەرێ پشکا پێشبینیان ل رێڤەبەریا کەشناسی و بیڤەلەرزان ل ھەرێما کوردستانێ بۆ رۆژناما ئەڤرۆ راگەھاند، ئەو بارستەیا ھەوایێ گەرم کو روو ل دەڤەرێ و ھەرێما و کوردستانێ کری ب درێژاھیا دوھی و ھەتا ئەڤرۆ دێ یا بەردەوام بیت.
ناڤبری ئەو چەندە ژی دازانین کو پێشبینی دھێتەکرن ل ھندەک دەڤەرێن دەشتایێ یێن ھەرێما کوردستانێ پلەیا گەرمایێ بگەھیتە 50% و ئەگەر بۆ کارەکێ پێدڤی نەبیت ب تایبەتی ل دەمێ نیڤرۆ وەلاتی ژ مالێن خوە دەرنەکەڤن.
بژار ئەکرەم گۆت ژی “رۆژا پێنجشەمبێ 15 حوزەیرانێ بارستەیا ھەوایێ گەرم ب دوماھی دھێت ل ھەمبەر ھەوایەکێ ھین روو ل ھەرێما کوردستانێ کەت و نێزیکی پێنج پلەیێن گەرماتیێ دا دکەڤیت و پێشبینیا بلندبوونا ھەوایێ تۆزێ و غوبارێ ل دەڤەرێن باشووری یێن کوردستانێ دئێتەکرن”.
ئه‌ڤرۆ نيوز:
بڕیارە بەھی جارەکا دی بھێنە رێکخستن و نابیت ھەر کەسەک د ناڤ بەھیێ دا قورئانێ بخوینیت و سەرۆکێ کۆمەلا قورئان خوینان ژی دیار کر کو نابیت قورئان خوین بۆ بەھیێ ب پارە بھێتە دابینکرن و گۆت: “دڤێت ھەموو لایەک پێگیریێ ب بڕیار و رێنمایێن وەزارەتێ بکەت”.
فوئاد ئەحمەد، سەرۆکێ کۆمەلا قورئان خوینێن کوردستانێ بۆ رۆژناما ئەڤرۆ ئاشکرا کر کو ئەو دگەل دیوانا وەزارەتا ئەوقاف و کاروبارێن ئایینی کۆمبووینە و دانوستاندن ل دۆر پرسا ب رێڤەبرنا بەھیان و چاوانیا خواندنا قورئانێ د بەھیان دا کریە و بۆ ڤێ مەرەمێ ژی چەندین رێنمایی و بڕیارەک ھاتینە بەرھەڤکرن، بەلێ ھێشتا نەگەھشتینە قووناغا دووماھیێ داکو ب ئێکجاری بھێنە پەسەندکرن و بجە ئینان و گۆت “پشتی چەندین کۆمبوونێن دی دھێنە ئەنجام دان ژنوو دێ بڕیار بۆ شێوازێ ب رێڤەبرنا بەھیان ل ھەرێما کوردستانێ ب تایبەتی کریا خواندنا قورئانێ ھێنە دەرکرن”.
ناڤھاتی ئاماژە دا وێ چەندێ کو نابیت کریا خواندنا قورئانێ د رۆژێن بەھیێ دا ژ 200 ھزار دیناران زێدەتر بیت و ھەر قورئان خوینەکێ مۆلەتا کۆمەلا قورئان خوینێن کوردستانێ نەبیت رێ پێ ناھێتەدان قورئانێ د بەھیان دا ب خوینیت، چونکی ھندەک کەس فێربووینە ب ناڤێ قورئان خواندنێ پارەکێ زۆر وەردگرن و گۆت: “بەھی ب تنێ دێ دو رۆژبن و نابیت قورئان خوین بۆ بەھیا ئافرەتان بھێتە دابینکرن، ھەکە بەھی ل ھۆلا بیت ب تنێ دێ ب دەنگێ تۆمارکری یان ژی دەنگێ ھۆلا زەلامان ب رێیا سەماعێ ھێتە ڤەگوھاستن”.
ئه‌ڤرۆ نيوز:
رێڤەبەرێ گشتیێ ساخلەمیا ھەولێرێ دیار کر، چ ئاوارەیان ب ئەگەرێ ژەھربوونێ گیانێ خوە ژدەست نەدایە، بەلکو شەش کەس خودانێن خوارنگەھا خوارنا ژەھرکری دایە ئاوارەیێن کەمپا خازر ژلایێ ھێزێن پۆلیسان ڤە ھاتینە دەستەسەرکرن و ڤەکۆلین دگەل یا دھێتەکرن.
دکتۆر سامان بەرزنجی، رێڤەبەرێ گشتیێ ساخلەمیا ھەولێرێ د کۆنگرەیەکێ رۆژنامەڤانی دا دگەل رێڤەبەرێ دیوانا وەزارەتا ساخلەمیا عیراقێ دیار کر روودانا ل کەمپا خازر چێبووی کو تێدا ھژمارەکا ئاواران ژەھراوی ببوون ب ئەگەرێ خوارنێ و ژلایێ رێکخراوەکێ ل خوارنگەھەکا باژێڕێ ھەولێرێ ھاتبوو بەرھەڤکرن، بەلێ خۆشبەختانە ژلایێ ساخلەمیێ ڤە چارەسەری بۆ 835 ئاوارەیان ھاتیەکرن و چ حالەتێن مرنێ ژی نەھاتینە تۆمارکرن و گۆت “ئەم سوپیا ساخلەمیا دھۆکێ ژی دکەین کو ھاریکار بووینە دگەل مە، چونکی چارەسەرکرنا پتری 800 نەساخانا کارەکێ ئاسان نینە، پشتی دووڤچوونێ ژی دەرکەفتیە ئەڤ خوارنا سپێدێ ھاتیە بەرھەڤکرن ھەتا فتارێ مایە لەوڕا شەش کەس ل خارنگەھێ ھاتینە دەستەسەرکرن و ڤەکۆلین دگەل یا تێتەکرن”.
دکتۆر سامان بەرزنجی گۆت ژی “نوکە پارێزگەھا ھەولێرێ یا چارەسەریێ بۆ نەخۆش و بریندارێن دو پارێزگەھان دکەت ئەو ژی ھەولێر و مووسلە، لەوڕا دڤێت ساخلەمیا عیراقێ یا ھاریکار بیت دگەل مە و پشکا خوە دەرمان و پێدڤیێن ساخلەمی بدەتە ھەولێرێ، ژبەرکو وەکی کارەکێ مرۆڤی ئەم یێ دەرمانێن بەھرا ھەولێرێ دەینە ئاوارەیێن مووسل، ھەتا نوکە 22 ئەمبۆلانسێن ساخلەمیێ ب رێیا ئەڤان کەمپا ژکار کەفتینە و عیراق یا ھاریکار نینە دگەل ساخلەمیا ھەرێما کوردستانێ”.
ئه‌ڤرۆ نيوز:
قایمقامێ قەزا شنگالێ دیار کر کو بەغدا یا کار دکەت راستیا کارەساتا شنگالێ ل بەعاج بەرزە بکەت، ژبەر ڤێ یەکی ژی بڕیار یا دای دادگەھەکا تایبەت بۆ تاوانێن دژی کوردێن ئێزدی ل بەعاج ڤەکەت.
مەحما خەلیل، قایمقامی قەزا شنگالێ بۆ ئەڤرۆ ئاشکرا کر، ئەو دانانا دادگەھەکا تایبەت بۆ تاوانێن دژی ئێزدیان ل بەعاج رەت دکەن و رازی نابن ل وێرێ بھێتە ڤەکرن، چونکو خەلکێ بەعاج و دەروبەران خیانەتا ل شنگالیان کری، لەو چاوا دادگەە د ناڤ واندا دێ ھێتە ڤەکرن و گۆت: “وەسا دیارە عیراقێ نەڤێت راستیا کارەساتا شنگالێ بھێتە ئاشکراکرن، وان ل بەر ل بەعاج ھەموو راستیان ڤەشێرن، لەوڕا ژی وێرێ یا ھەلبژارتی”.
ئاماژە دا وێ چەندێ ژی کو خەلکێ بەعاج و دەوروبەران بوون ئەو کارەسات ل 3/8/2014 و ل سەر دەمێ حوکمەتا مالکی ب سەرێ کوردێن ئێزدی ئینای و گۆت: “ئەم داخوازێ دکەین ئەو دادگەھە ل شنگالێ یان سنۆنێ بۆ سزادانا تاوانباران بھێتە ڤەکرن”.
مەحما خەلیل خویا ژی کر کو خەلکێ شنگالێ نەشێن ژ بەر خیانەتا عەرەبان قەستا بەعاج بکەن و سکالایان تۆمار بکەن، چونکو رەنگە شانێن نڤستی یێن تیرۆرستان ل وێ دەڤەرێ ھەبن و دەستی عەرەبێن خیانەتکار د گەلدا بیت و خەلکێ مە بکوژن و نەھێلن دێدەڤان راستیان دیاربکەن ژبەر ڤێ چەندێ ئەم دخوازین دادگەھەکا تایبەت بۆ ڤەکۆلینێ ل کارەساتا شنگالێ، ھەر ل شنگالێ یان ناحیا سنۆنێ بھێتە ڤەکرن.
ئەڤرۆ نیوز ، نەوزاد ھلۆری:
کەوێ عەبدوللا ، دایکا ئێکەم شەھیدێ کوبانێ ” زێرەڤان ئەکرەم مزوری ” دیارکر کو گەلەک گرنگە گەلێ کورد ھەموو پێکڤە پشکدارێ پروسەیا دەنگدانێ بو ریفراندومێ بکەن ، تنێ بەلێ بو ریفراندۆم و سەربخویی دێ برینێن دایکێن شەھیدان ساخکەن.
کەوی وەکو دایکا ئێکەم شەھیدێ کوبابنێ ل پێش مالاخوڤە زێدەتر بو ئەڤرۆ نیوز گۆت: (داخوازێ ل ھەموو لایەنێن سیاسی دکەین کو خوونا شەھیدان ل بەرچاڤ وەبگرن و ھەموو پێکڤە ب گیانەکێ لێبورینێ و ل بەرچاوەگرتنا ھەستا نەتەوەیی پشکداریێ د پروسەیا ریفراندۆمێ ل رۆژا ٢٥/٩/٢٠١٧ ب بەلێ بکەن ، ژبەرکو تنێ پرسێن نەتەوەیێن مینا ریفراندۆم و سەربخویا کوردستانی دکاریت برینێن دایکێن شەھیدان ساخ بکەن و روندکێن وان ژی زوھا بکەن)
زێدەتر گۆت: (ھەردەم بزاڤێن بارزانی بۆ سەربخو و راگەھاندنا دەولەتا کوردی بوویە ژبەرڤێ گرنگە ئەم ھەموو پێکڤە پشتەڤانیا ئەوی بکەین ، خەونا ھەموو شەھیدان بوویە بەری کو شەھید ببن دەولەتا کوردی ب چاڤ دیتبایە بەلێ ئەوان خوونا خوە رشت و نەدیت ، ھەر چ نەبیت بلا دایک و خێزان و زاروکێن وان ببینن ، گرنگە د ئەڤرو دا کەرب و کین و نەدادپەروەری نەمینیت و ل شوونا وێ پێکڤە ژیان دەست پێ بکەت)
زێرەڤان زوری لرۆژا ٢٠/١/٢٠١٥ ل بلنداھیێن مشتەنور ل کوبانێ شەھید دبیت و دبیتە ئێکەم شەھیدێ پێشمەرگە ل باشورێ کوردستانێ کو ل کوبانێ شەھیدبوویە.
ئەڤرۆ نیوز ، نەوزاد ھلۆری:
سپێدەھیا ئەڤرۆ ل ھەرێما کوردستانێ ئەزموونێن رێزا ١٢ێ ئامادەیی دەست پێ کرد و تێدا بو جارا ئێکێ کاغەزا سوما دھێتە بکارئینان کو کودێ قوتابی لسەر نڤیسایە ، ئەڤە د دەمەکێ دایە کود وھی ژی ئەزموونێن نیشتمانی یێن رێزا نەھێ بنەرەتی دەست پێ کربوون.
پشتیوان سادق وەزیرێ پەروەردە و فێرکرنێ یا حکومەتا ھەرێما کوردستانێ ل دەما دەست پێکرنا ئەزموونێن نیشتمانی و دوازدێ ئامادەیی د کونگرەیەکێ رۆژنامەڤانی دا گۆت: (ھەردوو قوناغێن نەھێ بنەرەتی و ١٢ێ ئامادەیی ٢٥٥ ھزار ٩٧٩ قوتابی دێ پشکداریێ د ئەزموونان دا کەن ، چوار ھزار ١٦٥ ھول بو ئەزموونان ھاتینە تەرخانکرن و ٢٧ ھزار ماموستا ژی وەکو چاڤدێر دێ ب ئەرکێ چاڤدێریا ئەزموونان رابن وەکو ماموستایێ چازدێر و سەرپەرشت و رێڤەبەر)
ئه‌ڤرۆ نیۆز،زنار تۆڤى:
موسا ئه‌حمه‌د به‌رپرسێ ده‌زگه‌هێ خێرخوازیێ بارزانى بۆ ئه‌ڤرۆ نیۆز دیاركر:كو سوبه‌هى ل رۆژا پێنجشه‌مبى 15/6/2017 ده‌زگه‌هێ خێرخوازیێ بارزانى بێى جۆداهى دێ گۆژمێ ئێك ملیۆن دیناران ل سه‌ر هه‌موو خێزانێن شه‌هیدێن شه‌رێ داعش دابه‌شكه‌ت و هه‌روه‌سا لیستا ناڤێن شه‌هیدێن شه‌رێ داعش ژ وه‌زاره‌تا پێشمه‌گه‌ى بۆ مه هاتینه كو سه‌رجه‌مێ وان دبنه 1410 شه‌هید،هه‌روه‌سا گۆت ژى:ئه‌و شه‌هیدێن دو یان سێ ژن هه‌ین دێ هه‌ر ئێك ژ وان ئێك ملیۆن دیناران وه‌رگریت،دیسا ئه‌ڤ هاریكاریه ژلایێ سیروان بارزانى ڤه بۆ خێزانێن ئه‌ڤان شه‌هیدان هاتیه دابینكرن،دیسا هه‌موو خێزانێن شه‌هیدان هه‌ر ژ كه‌ركوكێ و گه‌رمیان و سلێمانى و دهوك و هه‌ولێرێ و هه‌له‌بجه و بێى جۆداهى دێ ڤێ هاریكاریێ وه‌رگرن،ناڤهاتى دیاركر ژى:مه گه‌له‌ك هه‌ولدان كرینه كو هاریكاریێ پێشكێشى خێزانێن شه‌هید و بریندارێن شه‌رێ داعش بكه‌ین و ئه‌م ڤێ چه‌ندێ ب ئه‌ركێ خوه دزانین و ئه‌وا ژ ده‌ستێ مه بهێت ئه‌م دێ دێ پێشكێشى وان كه‌ین،چونكى وان هه‌قه‌كێ مه‌زن یێ ل سه‌ر مه هه‌ى كو ئه‌م خزمه‌تا وان بكه‌ین،هه‌ر چه‌نده ئه‌م رێكخروا وه‌كین ئه‌م چ هاریكاریا ژ حوكمه‌تا هه‌رێمێ وه‌رناگرین،لێ ئه‌م پره‌كین دناڤبه‌را خه‌لكێ ده‌وله‌مه‌ند و رێكخراوێن نێڤده‌وله‌تى دا،ژ پێخه‌مه‌ت هاریكاریا بگه‌هینه ئاواره‌یان و خه‌لكێ كێم ده‌رامه‌ت و خێزانێن شه‌هیدان.
به‌رپرسێ ده‌زگه‌هێ خێرخوازیێ بارزانى دیاركر ژى:سوبه‌هى دێ ئێكه‌م هه‌لمه‌تا دابه‌شكرنا ڤى پاره‌ى ل سه‌ر خێزانێن شه‌هیدان هێنه دابه‌شكرن و مه هه‌مى هه‌ولداینه كو تیمێن مه یێن مه‌یدانى ل هه‌موو ده‌ڤه‌ران به‌رى جه‌ژنا ره‌مه‌زانێ ئه‌ڤان هاریكاریان ل سه‌ر هه‌موو خێزانێن شه‌هیدان دابه‌ش بكه‌ن.
ئەڤرۆ نیوز ، نەوزاد ھلۆری:
ئێڤاریا ئەڤرۆ ئاگر بەربوویە کەمپا بێرسڤ ئێک ل سنوورێ قەزا زاخو کو یا تایبەتە ب ئاوارەیان و ئەڤرۆ نیوز ژی زیانێن وێ ئاشکرا دکەت.
بێوار عەبدولعەزیز بەرپرسێ رێڤەبەریا گشتی یا بەرەڤانیا باژێری ل دھوکێ بۆ ئەڤرۆ نیوز گۆت: (ژ بەر سەدەما نارگیلەکێ 35 دوکان و جھێن تایبەت یێن بازارێ کەمپا بێرسڤ ئێک ل سنوورێ قەزا زاخۆ ھاتنە سووتن)
زێدەتر گۆت: (ھەر چەندە ئاگر ژلایێ تیمێن بەرەڤانیا باژێری ل دەڤەرێ و دھوکێ ھاتیە کونترولکرن بەلێ ب مخابنیڤە نێزیکێ 50 ملیون دیناران زیان ب بازارێ بێرسڤێ ئێک یا کەمپا ئاوارەیان کەفتن)
نيشاندان