ئەڤرۆ نێوز، لەزگین جوقی:
بەرپرسێ راگەھاندنێ ل رێڤەبەریا گشتی یا ساخلەمیا دھۆکێ، دیارکر:” ئەڤرۆ 23ى نيسانا 2017ێ ژێر دروشمێ نوشدار و کارمەندێن ساخلەمیێ ھەڤکارن د گەل وەلاتیان دژی سیستەمی ساخلەمیێ یێ لاواز و نە رێک و پێک خرڤەبوونەک ئەنجامدان”.
حەمزە رەزیکی، بەرپرسێ راگەھاندنێ ل رێڤەبەریا گشتی یا ساخلەمیا دھۆکێ، دیارکر” نوشدار و کارمەندێن ساخلەمیێ پاداشتنامەک بەلاڤکرن و تێدا دیارکرینە سەرەرایی ھێرشکرنا تیرۆرستێن داعش و قەیرانا دارایێ و نەبوونا مووچەکێ کونجایێ د گەل ژیانا کەرتی ساخله‌ميێ ئەم شیاینە باشترین خزمەتا پێشکێشی خەلکێ خوە بکەین”.
نوشدار و کارمەندێن ساخلەمیێ یاداشتنانەک بەلاڤکرن و تێدا ھاتیە: ل ڤی دووماھیێ ھیرَشەکا توند ژ لایێ ھندەک دەزگەھێن راگەھاندنێ و کەسایێن دوور ژ بەرپرسیاتی ل سەر کەرتی ساخلەمیێ دھێتە کرن ئەم دبینن ئەڤە خزمەتا وەلاتیان ناکەت و خەلک دێ بیتە قوربانی ئەم ئێدانا ھەر ھێرشەکا ب ڤێ شیوەیێ دکەین.
نوشدار وکارمەندێن ساخلەمیێ د پاداشتنامەیا خوە دا دبیژن: پێدڤیە ل سەر حکومەتی گەرەنتیا ژیانا کارمەندان ب شیوەیەکێ گشتی بھێتە کرن و کەسانێن دبنە ئەگەری پەیداکرنا فەوزایێ و تەشھیرا سومعەتا کەرتێ ساخلەمیێ دکەن دووڤ یاسایی بھێنە سزادان و ئەم ھەموو بەلگەنەمان گۆم دکەین دا کو نە ھەر کەسەک ل جھێ خوە ببیتە دادوەر و بریاران ل دووڤ حەزین خوە یێن کەسایەتیێ بدەت و نابیت چو کارمەند بیێ بریارا دادوەری ڤەکۆلینی بھێنە گرتن و زیندانکرن.
ئه‌ڤرۆ نيوز:
سەرۆکێ باژێرڤانیا قەزا زاخۆ بۆ رۆژناما ئەڤرۆ دیار کر کو کار کرن د پڕۆژێ پرا خانی دا ل قەزا زاخۆ یێ بەردەوامە و دبێژیت: ل دەمەکێ نێزیک دێ ب دووماھی ھێت و کەڤیتە د خزمەتا وەلاتیان دا.
بژار مونیب، سەرۆکێ باژێرڤانیا قەزا زاخۆ ئاشکرا کر، پشتی سێ سالان کارکرن د پڕۆژێ پرا خانی دا ل قەزا زاخۆ نوکە پڕۆژە د قوناغێن دووماھیێ دایە و گۆت: “ھەردو جاددێن ل رەخێن پرێ ھاتینە قێرکرن و دوھی 22/4/2017 دەست ب بۆیاغکرنا شۆستێ پرێ ھاتە کرن”.
سەرۆکێ باژێرڤانیا قەزا زاخۆ ئاماژە ب وێ چەندێ ژی کر، د دەمەکێ نێزیک دا پڕۆژێ پرا خانی دێ ھێتە ب دووماھی ئینان و کەڤیتە د خزمەتا وەلاتیان دا.
ئه‌ڤرۆ نيوز:
سەرۆکێ ئێکەتیا مامۆستایێن کوردستانێ دیار کر کو بڕیارە ڤێ حەفتیێ دەرمالێ ھاندانا مامۆستا بھێتە بەلاڤکرن و پارە ژی بۆ ڤێ مەرەمێ یێ ھاتیە مەزاختن و دبێژیت: سێ پێشنیار بۆ پێداچوونا مووچێ مامۆستایان ھاتینەکرن و بڕیارە پێشنیارەکێ ل دۆر زێدەکرنا مووچێ مامۆستایان بدەینە لایەنێن پەیوەندیدار.
عەبدولواحد محەمەد حاجی، سەرۆکێ ئێکەتیا مامۆستایێن کوردستانێ بۆ رۆژناما ئەڤرۆ ئاشکرا کر، بڕیارە ڤێ حەفتیێ دەرمالێ ھاندانا مامۆستایان بھێتە بەلاڤکرن و گۆت: “ل گۆرەی پێزانینێن ل وەزارەتا دارایی و ئابووری بۆ مە ھاتین، لیستێن ناڤێن مامۆستایان ل دارایی چووینە گەنجینێ و نوکە لیستێن ناڤێن مامۆستایان ل بانکێن ھەرێما کوردستانێ ینە و بڕیارە ڤێ حەفتیێ دەست بە بەلاڤکرنا پارێ ھاندانێ بھێتەکرن، چونکو حوکمەتێ پارێ پێدڤی بۆ بەلاڤکرنێ یێ بەرھەڤکری و ئەڤ دەرمالێ دھێتە بەلاڤکرن یێ ھەیڤا ئێکە، ژ بەرکو بەری نوکە دەرمالێ ھەیڤا دوازدە ل سەر پەروەردێن ھەرێما کوردستانێ ھاتبوو بەلاڤکرن”.
عەبدولواحیدی گۆتژی: “ئەم بەردەوام بزاڤان بۆ باشترکرنا ژیانا مامۆستایان دکەین، دیسا پارێ رێکخراوا ئەلمانی ژی ھاتیە بەلاڤکرن، بەلێ ب تنێ بۆ جارەکێ بوویە و ئێدی ناھێتە بەلاڤکرن، بەلێ بڕیارە دەستکاری د پاشەکەفتکرنا مووچێ فەرمانبەران دا بھێتەکرن و ھەتا نوکە دو ھەتا سێ پێشنیاران ھاتینەکرن، ھەر دەمێ بابەت ھاتە سەر بجە ئینانێ د ناڤبەرا زێدەکرنێ و دەرمالەی دا، ئەم ژی دێ پێشنیارا خوە دەینە حوکمەتێ، چونکو ھەکە بھێت و پێداچوون د پاشەکەفتکرنا مووچەی دا بھێتەکرن دەرمالە نامینیت”.
ئه‌ڤرۆ نيوز:
پشتی کو ل حەفتیا بۆری پەرلەمانێ عیراقێ سەرۆکێ کۆمسیۆنا سەربەخۆیا ھەلبژارتنێن عیراقێ گازیکریە پەرلەمانی و ھەڤدە پرسیار ئاراستەی سەرۆکێ کۆمسیۆنێ ھاتینەکرن، بڕیارە ڤێ حەفتیێ پەرلەمان بەرسیڤێن سەرۆکێ کۆمسیۆنێ بێخیتە بەردەنگدانێ، کائایا پەرلەمانی باوەری ب بەرسیڤێن وی ھەیە و کۆمسیۆن یا بەردەوامبیت لسەر کارێن خوە یان ژی دەست ژکارێ خوە ڤەکێشت، سەرۆکێ فڕاکسیۆنا پارتی ژی دبێژیت، ب دیتنامە بەرسیڤێن سەرۆکێ کۆمسیۆنێ جھێ باوەریامە بووینە.
دکتۆر عەرەفات کەرەم، سەرۆکێ فڕاکسیۆنا پارتی دیموکراتی کوردستان لپەرلەمانێ عیراقێ بۆ رۆژناما ئەڤرۆ گۆت” ددەمێ بەرسیڤدانێ پتریا پەرلەمانتاران باوەری ب بەرسڤێن سەرۆکێ کۆمسیۆنێ ھەبوون و بەری گازیکرنێ بۆ پەرلەمانی ژی مە سەرەدانا کۆتلا سەدر لپەرلەمانیکریە و وانا ئەم پشتڕاستکرینە مەرەم ژ گازیکرنا سەربەست مستەفای ئەوە ئەندامەکێ کۆمسیۆنا سەربخۆیا ھەلبژارتنان کو سەر ب دەولەتا قانوونێ یە یاکو نووری مالکی سەرۆکایەتیا وێ دکەت، نەک سەرۆکێ کۆمسیۆنێ یە، پتریا ئەندامێن پەرلەمانی ل گەل وێ چەندێ نە سەرۆکێ کۆمسیۆنێ کەسەکێ پیشەیە و ب دروستی ب کارێ خوە رابوویە، لەوڕا بڕیارە ڤێ حەفتیێ پرسا مان و نەمانا کۆمسیۆنێ بھێتە ئێکلاکرن، بەلێ ھەکە باوەری ژ کۆمسیۆنێ بھێتە وەرگرتن کارەکێ شاشە، چونکە دەم یێ کێمە و نێزیکی پڕۆسا ھەلبژارتنایە و نابیت دڤی دەمیدا کۆمسیۆن بھێتە ھەلوەشاندن.
ژلایێ خۆڤەژی سیروان سیرینی، ئەندامێ فڕاکسیۆنا پارتی دیموکراتی کوردستان ل پەرلەمانێ عێراقێ بۆ رۆژناما ئەڤرۆ گۆت: سەرۆکێ کۆمسیۆنا بلندا ھەلبژارتنێن عیراقێ سەربەست مستەفا ھاتیە گازیکرن بۆ پەرلەمانی و مەرەما گازیکرنێ سەرۆکێ کۆمسیۆنێ نەبوویە، بەلکۆ مەرەم ھەموو کۆمسیۆنە، بەلێ دیارە تنێ کەسێ ئێکێ دێ بەرھەڤی پەرلەمانی بیت و کاک سەربەست ھاتیە کۆمبوونێ، ھژمارەک کۆتلەیێن پەرلەمانی دخوازن ستافێ کۆمسیۆنێ ھەموو بھێتە گوھۆڕین، راستە سەرۆکێ کۆمسیۆنێ بەھرا پارتی دیموکراتی کوردستانە، بەلێ بشێوەکێ گشتی ئەم ل ئەدایێ کارکرنێ وی رازیبووینە و ئاریشە ئەڤە ھێزێن سیاسی ل کۆمسیۆنێ نەدڕازینە نەک سەرۆکێ کۆمسیۆنێ، دخوازن دەستەکا رێڤەبرنێ بگوھۆڕن، ھەکە ب ھێت و باوەری ل کۆمسیۆنێ و سەرۆکێ نوکەیێ کۆمسیۆنێ بھێتە وەرگرتن، ئەڤە بێگومان دێ زیان بۆ ھەرێما کوردستانێ ھەبن ، ژبەرکو مەترسی ھەیە جارەکادی سەرۆکێ کۆمسیۆنێ بەر کوردا نەکەڤیت ئەڤەژی دێ بیتە ئەگەرێ ڤێ چەندێ زیان ب کورددان بکەڤیت.
ئەڤرۆ نيوز:
پەرلەمانتارەکا کورد ل پەرلەمانێ عیراقێ داخوەیانیێن ژ ئالیێ سەرۆکێ ھەڤیەمانیا شیعی عەمار حەکیم ل دۆر سەربخوەیا ھەرێما کوردستانێ، ب کارەکێ دلگران و نەچاڤەرێکری و بێ روومەتیا کوردا ھەژمارت، ھەروەسا دیارکر وی سەرکردێ شیعی وێنەیێن شاشی ل دۆر کوردا بەرچاڤکرن.
بەری نوکە عەمار حەکیم ل کەنالەکێ وەلاتێ مسرێ (TV ON) راگەھاند بوو دامەزراندنا دەولەتا کوردی دێ وەلاتی پارچە پارچە کەت و پشتی وێ ھەموو ئالیێن دیتر دێ داخوازا ھەرێمێن جودا و سەربخوە کەن، ھەروەسا ئاماژەدا ھندێ وەلات نەیێ بەرھەڤە بۆ دەولەتبوونا کوردستانێ و دانپێدانا وێ بتنێ دێ ژئالیێ وەلاتێ ئیسرائیلێ ڤە بیت.
پەرلەمانتارا کورد بێریڤان خەیلانی یا سەر ب لیستا پارتی دیموکراتی کوردستان ڤە گۆت: وەکی ڤان داخویانیان دلئیشن و نەھامەتیا مللەتێ کورد و خوینا مللەتێ کورد پێ بێ روومەت دبیت.
ئەو داخویانی ددەمەکێ دا دھێن کو سەرکردێن کوردا پێنگتڤێن بلەز بۆ ریفراندۆمێ و زانیانا رێژا پشتەڤانیا جەماورێ کوردی بۆ پرۆژێ سەربخوەیی د ھاڤێژن، ھەروەسا پشتی مللەتێ کورد ژ پەیرەوکرنا دەستھەلاتێن عیراقێ ئێک ل دووڤ ئێک ھەر ژ دامەزراندنا دەولەتا عیراقێ ل سالێن 20 ژ چاخێ بۆری و ھەتا نوکە بێزار بووین، نەخاسمە ھەموو مافێن وانا ل گەل چارەنڤیسێ مللەتێ کورد دھێتە بنپێکرن.
سەرۆکێ ھەڤپەیمانیا شیعی عەمار حەکیم، حەزا مللەتێ کورد یا سەربخوەیێ ب پەیڤا (تسۆنامی) سالوخەتکر، و گۆت: کو بتنێ نیک سنۆرێن عیراقێ ناراوەستیت، بەلکی دێ ھەموو وەلاتێن دریتر ڤەگریت، عەمار حەکیم داخواز ژ وەلاتێن عەرەبی کر ل گەل ھەلویستێ عیراقێ بن بۆ ئێکگرتنا ئاخا عیراقێ.
ژئالیێ خوەڤە ئەنداما جڤاتا نوونەرێن عیراقێ بێریڤان خەیلانی ئاشکراکر، داخویانیێن حەکیمی، پشتەڤانی و باوەریا کوردان موکمتر دکەت، ب رێیا کورا ب لبەر خوە گرتی بۆ نەھێلانا پشتگوھخستنێ و کودەتایێًن ل سەر ھەڤپشکیا نیشتیمانی ل عیراقێ.
بێریڤان خەیلانی خوەیاکر، کوردا ئێدە باوەری و ھیڤی ب ھەڤپەیمانیا نیشتیمانی نەمایە کو بشێن چو پێنگاڤێن پراکیتیکی بھاڤێژن، بۆ ھندێ دەرد و مەینەتێن مللەتێ کورد نەمینن، نەخاسم پشتی وان ھەموو رەفتار و بڕیارێن حوکمەتا عیراقێ یا ناڤەندی یێن بێ بنەما و زۆردارانە ھەر بگرە ژ بڕینا مووچێ فەرمانبەران و مللەتێ کورد و بۆدجا ھەرێما کوردستانێ کو ھەڤپەیمانیا نیشتیمانی نەشیایە یان بۆ وی خەم نەبوویە، ھندەک ژوان بڕیاران راستڤەکەت یان ژی لابدەت.
پەرلەمانتارا کورد ھەروەسا گۆت: گۆتنێن عەمار حەکیم سەبارەت دانپێدانا وەلاتێن جیھانی ب سەربخوەیا ھەرێما کوردستانێ، بەرۆڤاژی دورھێلی و دوورن ژ راستیێ، بەلکی ھەموو وەلاتێن جیھانێ دێ دانپێدانێ ب دەولەتا کوردستانێ کەن، و بەلگە ل سەر ڤێ چەندێ ژی، ھەرێما کوردستانێ پتر ژ 36 قونسلخانە و بنگەھێن دبلوماتکاری یێن وەلاتێن جیھانی ل ھەرێما کوردستانێ ھەنە، زێدەباری ھەرێما کوردستانێ وەک وەلاتەکێ نیمچە سەربخوە دھێتە ھژمارتن و سەرەدەری ل گەل دھێتە کرن، ھەروەسا لەشکرێ چەکدارێ خوە ھەیە کو پێشمەرگە یە و رێزە کا تایبەت ل ھەموو جیھانێ لێ دھێتە گرتن، حوکمەت و دامودەزگەھێن فەرمی و سەرەدەریێن ئابووی و سیاسی یێن سەربخوە ل گەل وەلاتێن جیھانی ھەنە.
سەرکردێن ھەرێما کوردستانێ گەھشتینە وێ باورەیێ کو ئەزموونا ل گەل دەستھەلاتا عیراقێ پشتی سالا 2003 شەکەستن خوار، و باشتر چارەسەری ل گەل عیراقێ بھێتە پارچەکرن بۆ دو وەلاتێن ھەڤسووی و جودا.
ئامێدیێ، مەحمود نهێلی
د بوردمانا ئەڤرۆیا فروکەیێن تورکیادا بو سەر دەڤەرا ئامێدیێ زێدەباری سوتنا ترومبێلەکی موحمەد موحسن ئامێدی کەساتیێ دەڤەرا ئامێدیێ ب سڤکی بریندار دبیت و دهێتە رەوانەکرن بۆ نەخوشخانا ئامێدیێ.
د پەیوەندیەکا تەلەفونی دا ناڤبری بۆ ئەڤرۆنیوز دیار کر کو برینا وی یا سڤکە و ساجمەک ب دەستی وی کەفتیە و یێ دهێتە چارەسەرکرن و سوپاس بۆ خودێ .
هەر دڤی دەربارێ دا ابراهیم دێرەشی هەلبژیری گوندێ دێرەش دیارکر کو ژ ئەنجامی بوردومانی ترومبێلەک هاتیە سوتن و چێدبیت یا گەریلایێن پەکەکی بیت و ئاشکرا کر کو چ زیانین گیانی نە بووینە.
ئه‌ڤرۆ نيوز:
شانده‌كێ ته‌ڤگه‌را سه‌در چه‌نده‌كێ به‌رى نوكه گه‌هشته هه‌ولێر و بڕياره ل گه‌ل به‌رپرسێن هه‌رێما كوردستانێ كۆم ببيت.
شاند يێ پێكهاتيه ژ سه‌باح سه‌عدى و زيا ئه‌سه‌دى و محه‌مه‌د موسلى و نه‌سار روبه‌يعى و ژ لايێ فوئاد حسێن سه‌رۆكێ ديوانا سه‌رۆكاتيا هه‌رێمێ ڤه هاتنه پێشوازيكرن.
ده‌سته‌يا سياسى يا ته‌ڤگه‌را سه‌در د راگه‌هاندنه‌كێ دا راگه‌هاند ئامانج ژ سه‌ره‌دانا شاندى بۆ هه‌رێمێ كوردستانێ دانوستاندنه ل سه‌ر كاودانێن سياسى يێن عيراقێ.
ئەڤرۆ نیوز، کاروان باعەدری:
د جەژنا چارشەمبوويا سۆرا یا کوردێن ئێزدی دا ژمارەکا زۆر یا کوردێن ئێزدی قەستا پەرستگەھا لالش کرن.
لوقمان سلێمان، بەرپرسێ راگەھاندنا بنگەھێ لالش ل پەرستگەھا لالش بۆ ئەڤرۆ نیوز گۆت: “د جەژنا چارشەمبوويا سۆر یا کوردێن ئێزدیدا نێزکی 60 گەشتیاران سەرەدانا پەرستگەھا لالش کرن کو ژ ھەموو ئاین و پێکھاتێن جودایێن جیھانێ بوون”.
گوتژی: “سەرەرای کارەساتا شنگالێ لێ ھێشتا خەلک قەستا پەرستگەھا لالش دکەن”، دا زانين ژى كو “ھەرچەندە جەژن ب شیووەیەکی فەرمی نەھاتە گێران ب تنێ رێورسمێن جەژنێ ھاتنە گێران و 365 چرا ھاتنە ھەلکرن ل پەرسگەھێ کو رامانا 365 رۆژێن ساڵی دکەت و چەندین و رێورسمێن دى ھاتنە گێران”.
جەژنا چارشەمبوويا سۆر کەڤنترین و پیرۆزترین جەژنا کوردێن ئێزدی یە کو دکەڤیتە د چارشەمبوويا ئێکی ژ ھەیڤا نیسانا رۆژھەلاتی.
نيشاندان