نێچیرڤان بارزانی، سەرۆكێ هەرێما كوردستانێ، ل دەمێ پێشوازیكرنێ ل د. محەمەد ئەلحەسان، سەرۆكێ نوو یێ نوونەرایەتییا نەتەوەیێن ئێكگرتی ل ئیراقێ (یونامی) راگەهاند» هەرێما كوردستانێ تاكو ب دووماهی هاتنا ئەركێ یونامی، هەموو جۆرە پشتەڤانییەكێ و ئاسانكارییەكێ پێشكێش دكەت».
د كۆمبوونەكێدا هەردو ئالییان دوپاتی ل چارەسەركرنا كێشەییێن د ناڤبەرا هەولێرێ وبەغدایێ دا كر، رەوشا سیاسییا ئیراقێ و هەرێما كوردستانێ، هەماهەنگییا د ناڤبەرا (یونامی) و ئالیێن پەیوەندیدار و دوماهی پێشهاتێن رۆژهەلاتا ناڤین و كاریگەریێن وان هاتنە گەنگەشە كرن.
نێچیرڤان بارزانی سوپاسییا هەرێمێ بۆ رۆلێ نەتەوەیێن ئێكگرتی ل ئیراقێ و هەرێما كوردستانێ دوپاتكر و بەرهەڤی نیشادا بۆ پێشكێشكرنا هەموو ئاسانكارییان و هەماهەنگی و پشتەڤانییەكا پێدڤی هەتا ب دووماهی هاتنا ئەركێ وان.
ژ ئالیێ خوەڤە د. محەمەد ئەلحەسان هاریكارییا ئالیێن هەرێما كوردستانێ بلند هەلسەنگاند و دوپاتی ل گرنگییا پاراستنا ئیراقێ ژ كێشە و ئالۆزیێن دەڤەرێ كر.
هەردو ئالی د هەڤڕابوون ل سەر وێ چەندێ كو چارسەركرنا كێشەیێن هەولێرێ – بەغدایێ و گەهشتن ب تێكگەهشتنێ، د بەرژەوەندییا هەموو ئیراقێدایە و خزمەتا پاراستنا ئارامیێ و گەشەكرنا وەلاتی دكەت.

نێچیرڤان بارزانی، سەرۆكێ هەرێما كوردستانێ و مەسرور بارزانی، سەرۆكێ حوكمەتا هەرێما كوردستانێ، جودا پشكداری د بەهییا محسن سالح ئامێدی، پێشمەرگێ شۆڕەشێن ئیلۆن و گۆلانێ و هەلگرێ مەدالییا بارزانی و كەسایەتیێ ناڤدارێ دەڤەرێ دا كر.
سەرۆكێ هەرێمێ و سەرۆكێ حوكمەتا هەرێمێ سەرەخوەشی و هەڤخەمییا خوە گەهاندە مالبات و كەسوكارێن رەحمەتی و هیڤی خواستن، خودایێ مەزن گیانی وی ب بەحەشتا بەرین شاد بكەت و ئارامیێ و هەداری ب بنەمال و كەسوكار و هەڤالێن وی ببەخشیت.
بنەمالا محسن سالح ئامێدی، سوپاسییا هەڤخەمی و بەرهەڤبوونا نێچیرڤان بارزانی و مەسرور بارزانی د بەهیێدا دیاركر.

وەزارەتا ناڤخوە ل حوكمەتا هەرێما كوردستانێ راگەهاند: هیچ بنگەهەكێ ئیسرائیلی ل هەرێما كوردستانێ نینە و ئەو دەنگوباسێن گوتین كو هێرش ل سەر بنگەهەكێ ئیسرائیلی ل سنوورێ پارێزگەها هەولێرێ، د راست نینن.
ب گۆڕەی بەیاننامەیەكا وەزارەتا ناڤخوە ل حوكمەتا هەرێما كوردستانێ» ل چەند میدیایێن ئەلكترۆنی یێن فەرمی ل ئیرانێ وەسا هاتیە بەلاڤكرن كو بەری چەند شەڤان ب درۆنان هێرش ل سەر بنگەهەكێ سەر ب ئیسرائیلێ ڤە هاتیە كرن».
وەزارەتا ناڤخوە ئەو دەنگوباس رەتكرن و دیاركر» د بێ بنەمانە و د دوورن ژ راستیێ، نە بنگەهێن ئیسرائیلی ل كوردستانێ هەنە و نە ئۆپەراسیۆنێن وەسا هاتینە ئەنجامدان».
د بەیاننامەیا وەزارەتا ناڤخوە دا هاتیە ژی» ل شەڤا 3/7/2025 درۆنەك ل دەڤەرەكا چۆل ل نێزیك هەولێرێ كەفتە خوارێ، ئەڤ هێرشە ژی ژ ئالیێ هندەك گرۆپێن سەر ب حەشدا شەعبی ب مەبەستا دروستكرنا ئاژاوێ دهێنە ئەنجامدان، پێدڤییە ئالیێن پەیوەندیدار ل حوكمەتا فیدرالی سنوورەكی بۆ ڤان كارێن تێكدەرانە دانن و پێرابوونێن قانوونی بەرامبەر تاوانباران بهێنە وەرگرتن».
د بەیاننامەیەكا كورتدا كو شەڤا 3/7/2025 بەلاڤكربوو، دژە تیرۆرا كوردستانێ راگەهاندبوو»» ل سات 9:58 شەڤێ، درۆنەكا مینڕێژكری ل نێزیك فرۆكخانەیا نێڤدەولەتییا هەولێرێ هاتە ئێخستن».
دژە تیرۆرا كوردستانێ د بەیاننامەیا خوە دا دیاركربوو ژی» ژ ئەنجامێ وێ روودانێ چو زیانێن گیانی و مادی نەبوون».

دیدار/ دلۆڤان ئاكرەیی

پشتیوان سادق، ئەندامێ مەكتەبا سیاسییا پارتی دیموكراتی كوردستان و بەرپرسێ مەكتەبا رێكخستنا پارتی ل هەولێرێ ل دۆر رەوشا ئەڤرۆ یا هەرێما كوردستانێ بۆ رۆژنامەیا ( ئەڤرۆ) دیاركر: دەمەكە هەرێما كوردستانێ د ناڤ قۆناغەكا ئالۆز و هەستیار یا ئابۆریدا دبۆریت، بەلێ مەسرور بارزانی، سەرۆكێ حوكمەتا هەرێما كوردستانێ بزاڤێن خوە چڕ كرینە كو ب باشترین شێوە ئەڤ قۆناغا ئالۆز بهێتە دەربازكرن.
پشتیوان سادق ئاماژەكر» ئەڤ قۆناغا نوكە ئەم تێدا دەرباز دبین قۆناغەكا دەستكردە بۆ ئازاردانا حوكمەتا هەرێمێ و گەلێ وێ یێ خەباتكەر، ل چ وەلاتەكی ب قەد هەڤبەندیێن د ناڤبەرا هەرێما كوردستانێ (KRG) ل هەولێرێ و حوكمەتا فیدرال ل بەغدا ، ب شێوەیەكێ تراژیدی بەردەوام نەبوویە ، ئەڤە چەندین جارن رووب روویێ ئاستەنگان دبێن، دووبارە بوونەڤەیا چەندین زنجیرەیێن ناكۆكییان ل سەر بودجەی، پەترۆلێ ، یان ئاخێ كو ئەڤە هەموو ب تنێ نینن ، بەلكو ئەڤە هەموو رەچەلەكێن ئێك قەیرانێن درێژدەمێن رحا وێ ل رحا دەولەتا بۆرییا ئیراقێ هەتا ئەڤرۆ پەیدا بوویە، ل روویەكێ دیڤە ئەڤ بابەتە د بنیاتدا چێرۆكا نەتەوەیەكێ ئینكار لێ كریە ، كو ئەڤ نەتەوە ل سەردەستێ دەولەتەكا ناڤەندی یا ئیراقێ تووشی جینۆسایدێ و ئەنفالێ و ژناڤبرنا سیستماتیك بوویە، ل ڤێ رەوانگەهێ ، ئۆتۆنۆمی یان فیدرالی ئیمتیازەك نەبوویە ، كو ژ ئالیێ بەغدایێ ڤە بهێتە بەخشین ، بەلكو مافە كو ب خوین و بەرخودانێ ب دەستڤەهاتییە ، ئەو فیدرالیزما د دستوورێ ئیراقێدا ل سالا 2005 هاتیە چەسپاندێن ، كێمترین ئاست بوو بۆ مانەڤەیا كوردان ل گەل بەغدایێ ، هەر چەندە بەردەوام بەغدا گاڤان بۆ ناڤەندیكرنا دەستهەلاتی ب رێكا هەمان سیاسەتا بۆری كو یا تژییە ژ بڕینا ملی و ساڕێژنەبوونێ دهاڤێژیت ، د نوكەدا رەوشەكا نوو هاتیە پێش نابیت هەمان سیاسەتا بۆری بهێتە زیندی كرن و نەتەوەیەكی بێخیتە د ناڤ برین و خوین و ئازاراندا، ئەوا نوكە بەغدا دكەت برسیكرنا خەلكێ كوردستانێیە ، قۆناغ ب قۆناغ ، جوداهییەكا وەسا نینە ل گەل قۆناغێن دی یێن ئەنفالان چونكو مەژی یێ بەر ب هەمان ئاراستە دچیت ، ب هێزكرنا هزرێن شۆڤێنی ل ئیراقێ، ئیراق ئیفلیج كریە ، هەموو دانوستاندنێن ل سەر پشكا هەرێما كوردستانێ د بودجەیدا ل بن گرانییا بیرەوەریێن هێرشێن كیمیایی یێن رژێما بۆریدا ب رێڤەدچن ، هەموو لڤینێن هێزێن فیدرال ل نێزیك دەڤەرێن ناكۆكی ل سەر ل روانگەها داگیركاریێ رەفتار ل گەل دهێتە كرن ، بۆری ب دیماهیك نەهاتیە ، هێزەكا چالاك و زیانبەخشا نوكەیە، پیدڤی ب چارەسەرییا بنەرەتی و ئەقلانییە ، ئیراق نەشێت ببیتە ئیراقەكا نوو و فیدرال هەكە چارەسەرییەكا بنەڕەت بۆ كێشەیێن خوە نەكەت».
دیاركر ژی» ئەو ستەما نوكە حوكمەتا ئیراقا فیدرال ل هەمبەر ب كوردان دكەت ، رێگریێ ل چارەسەرییێن دەمدرێژ دكەت، سەركردەیێن وێ یێن سیاسی دڤێن چارەسەریێن دەمكی بكەن ، بەلێ ئەڤ سیاسەتە باوەریێ كێم و شێلی دكەت، دڤێت ئیراق بگەهیتە وێ باوەریێ كوردستانەكا ئارام، پێشكەفتی ، پاراستی ، سەرمایەیەكا ژیانییە بۆ ئیراقا فیدرال».
ئەندامێ مەكتەبا سیاسییا پارتی دیموكراتی كوردستان گوت ژی» قەیرانا بەغدا – هەولێر میناكەكا بچووك یا هەڤڕكیێن چەرخێ بیست و ئێكێنە، چەوانییا دابەشكرنا ژێدەران ل جیهانەكا پشتی ئایدۆلۆژیان و چەوانییا دروستكرنا باوەریێ ل دەڤەرەكێ كو دیرۆكێ بتنێ توڤ و هێڤێنێ خیانەتێ تێدا چاندییە ، خەباتەكا بەردەوام و رژد دڤێت ، ئەڤ خەباتە یا بەردەوام و یا رژد ژئالیێ مەسرور بارزانی، سەرۆكێ حوكمەتا هەرێما كوردستانێ و ب رژدی كار ل سەر دهێتە كرن ، و ئەڤ بهێن فرەهییە و بەردەوام بوون ل ئەنجامێ چەوساندنا زێدەتر ل 100 سالایە كو ل گەلێ كوردستانێ ژێدەر وەرگرتییە ، سەرەرای ڤێ چەندێ هەردەم بزاڤێن وێ چەندێ داینە ، رێككەفتن ل گەل بەغدا ل سەر بنیاتێ دستوور و قانوونێ بیت، ئاریشەیا مەزن ئەوە بەغدا هەردەم لاوازكرنا قەوارەیا هەرێمێ و برسیكرنا گەلێ كوردستانێ ب سەركەفتنا خوە دزانیت ، كو ئەڤە مەژیێ رژێما بۆری بوو».
ل دۆر رۆلێ ئۆپۆزسیونێ، پشتیوان سادقی گوت» ب درێژییا دیرۆكێ ل پترییا وەلاتێن جیهانێ دەما وەلاتەك دكەڤیتە د ناڤا شەڕەكیدا ، ئۆپۆزسیۆنا وی وەلاتی هەموو چالاكییێن خوە ل دژی دەولەتا خوە رادگریت، ئیسرائیل و ئیران دو میناكێن نوونە ، ئۆپۆزسیۆنێن وان وەلاتان ئیستیغلالا رەوشێ نەكر، بەلێ ل هەرێما كوردستانێ نەك بتنێ چالاكیێن خوە ل ناڤا سۆشیال میدیایێ زێدە كرینە، بەلكو رێكلام و پرۆپاگندە بۆ دەهان بوختان و ئاخڤتنێن چێكری ژی دكەن كو ل دژی گەلێ كوردستانێنە».
پتر گوت» هەتا نوكە ئێك هێز یان ئالییەكێ سیاسی هەكە ناڤی ل سەر دانین ئۆپۆزسیۆن هەمبەر ب برسیكرنا خەلكێ كوردستانێ بۆ جارەكێ ژی تبلا خوە بۆ تومەتێن بێ بنەما یێن بەغدایێ درێژ نەكریە، ئەڤ چەندە ل هەر وەلاتەكێ دی بایە دا لێپرسینەكا تۆند ل دۆر هێتە كر».
سەبارەت ب رۆلێ سۆشیال میدیایێ گۆت» گەلێ كوردستانێ ل هەمبەر بەغدا و جیهانێ ئێك چارەنڤیس هەیە ، لەوما هەر رەخنەیەك پێدڤییە ل زەمینەیا بەرژەوەندیا نیشتیمانیدا بیت و ب تێكگەهشتن و هەماهەنگییێ ل گەل هەڤ ب بەردەوامی چارەسەری بۆ كێشەیان بهێتە دیتن، چو تشتەك ب هاش و هوشان ل ناڤا سۆشیال میدیایێ چارەسەر نابیت ، ئەڤ هەموو هاواركڕن بتنێ بۆ لاوازكرنا ئیرادەیا خەلكی و نەهێلانا باوەریێ و چاندنا توڤێ بێ هیڤیبوونێیە ، لەوما ل جهێ ڤان بلا زمانێ تێكگەهشتنێ و هەڤئاهەنگییێ ب هەڤدو بۆ بهێزكرنا باوەریێ و ژیانێ ژ پێخەمەت هیڤیێن خوە گاڤان ب هاڤێژین».
ل دۆر چارەسەرییا كێشەیا مووچەیێ فەرمانبەرێن كوردستانێ ئاشكرا كر» ب بزاڤێن بەردەوام یێن مەسرور بارزانی، سەرۆكێ حوكمەتا هەرێما كوردستانێ ل ڤان رۆژان دێ كێشەیا مووچەی چارەسەر بیت ، كو مافەكێ ڕەوا یێ خەلكێ كوردستانێیە ، بێگومان حوكمەتا هەرێما كوردستانێ خوە ب بەرپرس دزانیت ل هەمبەر پاراستنا مافێن خەلكێ كوردستانێ، لەوما سەرۆكێ حوكمەتا هەرێما كوردستانێ گەلەك جاران دبێژیت، فەرمانبەران ئەرك ل سەر ملێ مە هەنە و ئەم خوە ب قەردارێن وان دزانین».

جڤاتا وەزیرێن هەرێما كوردستانێ دوهی ب سەرپەرشتییا سەرۆكوەزیران مەسرور بارزانی كۆمبوو و تێدا دیار كر كو هەر پابەندییەكا ل سەر هەرێما كوردستانێ هەی ب زێدەهی هاتییە بجهئینان و هەمی ژ بۆ دەستپێكرنا هنارتنا نەفتێ نەرمییەك نیشادایە و چاڤەرێی بەغدا دكەن.
هەر د كۆمبوونێ‌ دا ئاماژە ب وێ‌ چەندێ‌ ژی هاتیە كرن كو هەرێما كوردستانێ و كۆمپانیێن پەترۆلێ‌ ئامادەییا هاریكارییێ ل گەل حكومەتا فیدرال نیشا دایە بۆ دوبارە هنارتنا پەترۆلا هەرێمێ‌ و بۆ نەهێلانا وان هەموو بەهانەیان یێن بەغدا بكاردئینیت بۆ نەهنارتنا مووچەیان دئینیت و نوكە چاڤەرێی بڕیارا حكومەتا فیدرال دكەن بۆ پەسەندكرنا تێگەهشتنێن هەڤپشك یێن هاتینە ئەنجامدان.
هەروەسا هاتە باسكرن كو هەمی بابەتێن پەیوەندیدار ب لیستا مووچەیی، هەژمارا وەزیفی، هووربینیا هەڤپشك، و ب بانكیكرنا مووچەیان هاتینە بجهئینان و داخوازیا هەرێما كوردستانێ ئەوە كو بەغدا سیاسەتا نەهنارتنا مووچەیێ‌ خەلكێ كوردستانێ ب دووماهی بینیت، چونكو مووچە مافەكێ یاسایی و دەستوورییە.

پەیڤدارێ حوكمەتا هەرێما كوردستانێ راگەهاند: رێككەفتن ل دۆر دەستپێكرنا پەترۆلا هەرێما كوردستانێ بۆ دەرڤە هاتیە كرن و تنێ مایە سەرۆك وەزیرێن ئیراقێ ئیمزا بكەت و مووچە بهێتە هنارتن.
دوهی چارشەمبی 2/7/2025، پێشەوا هەورامانی، پەیڤدارێ حوكمەتا هەرێما كوردستانێ د داخۆیانییەكا رۆژنامەڤانییا تایبەت دا بۆ مالپەرێ فەرمیێ پارتی دیموكراتی كوردستان گوت» ئەڤرۆ تەوەرێ ئێكێ یێ كۆمبوونا جڤاتا وەزیرێن هەرێما كوردستانێ ل دۆر مووچەی بوو و شاندێن حوكمەتا هەرێما كوردستانێ ل سەر پرسێن پەترۆلێ و مووچەی د دەمێ چەند رۆژێن بۆریدا كۆمبوون كرینە و هووركاری بەرچاڤكرن، كو سەرۆكێ حوكمەتا هەرێما كوردستانێ بەردەوام ل گەل وان بوو ل سەر هێلێ، چونكە نوكە بەغدا پەترۆل كریە مەرج بۆ هنارتنا مووچەی و سەرۆكێ حوكمەتا هەرێما كوردستانێ ژی وەكو نیازپاكی بێی رێككەفتن بەرهەڤی دیاركر ب 50 هزار بەرمیلان رۆژانە دەست پێبكەت ل دووڤ دانوستاندنان هەتا بەرهەمئینان وەكو خوە لێ دهێت، لەوما دخوازین دەست پێبكەت بۆ وێ چەندێ بزانین ئەم د نیازپاقژین و د ناڤبەرا كۆمپانییان و حوكمەتا ئیراقێ كۆمبوون هاتیە كرن و رەشنڤیسەك هاتیە بەرهەڤكرن، كو گرفت ل سەر تێچوویا بەرهەمئینانا پەترۆلێیە و گەلەك گەنگەشە هاتیە كرن و ب شاندێ مە گوتییە ئەم یێن رێككەفتین، لەوما ئەو رەشنڤیسە یێ هاتیە بەرهەڤكرن و چاڤەڕێ دهێتە كرن بهێتە ئیمزاكرن و دەست ب هنارتنا پەترۆلی بهێتە كرن، لەوما چاڤەڕێی ئیمزاگرنا وێ رێككەفتنێ دهێتە كرن».
پێشەوا هەورامانی گوت ژی» حوكمەت ب جۆرەكی یا چوویە پێش كو ئەو ب خوە ژی چاڤەڕێ ناكەن، لەوما حوكمەتا هەرێما كوردستانێ یا بەرهەڤە 50% ژ داهاتێ ناڤخوە بدەتە ئیراقێ و هنارتنا پەترۆلێ ژی دەست پێبكەت، لەوما نوكە تەپ یا د مەیدانا ئیراقێدا».
پەیڤدارێ حوكمەتا هەرێما كوردستانێ دیاركر ژی» هەتا دووماهی خولەك مە باوەری ب وێ چەندێ هەیە بشێین بگەهینە رێككەفتنێ ل گەل بەغدایێ بۆ چارەسەركرنا كێشەیێن دارایی و سەرۆكێ حوكمەتا هەرێما كوردستانێ ژی ژ هەر كەسەكێ دی ل هەرێمێ زێدەتر خەما چارەسەرییا وان گرفتان دخوت و هەتا دووماهی خولەك ژی كاری بۆ چارەسەریێ دكەین و چەندین رۆژە شاندێ هەرێمێ بەردەوام د بزاڤێدابوو و سەرۆكێ حوكمەتا هەرێمێ ژی ب خوە ل سەر هێل بوو ل دۆر وان كۆمبوونێن هاتینە كرن، ئەڤە بۆ وێ چەندێ كێشە بهێنە چارەسەركرن، لەوما نوكە هەموو هاتینە تمامكرن و رادەستی سەرۆك وەزیرێن ئیراقێ بووینە بۆ وێ چەندێ ئیمزایێ ل سەر بكەت، دەمێ پێدڤی ژی نینە و تنێ نیەتا جدی دڤێت و هەكە نیەتا جدی هەبیت دشێن ئەڤرۆ ئیمزا بكەن و مووچەی ب هنێرن.

سەرۆككۆمارێ ئیراقێ راگەهاند: رۆژانە پەیوەندی د ناڤبەرا حوكمەتێن هەرێما كوردستانێ و بەغدایێ بۆ چارەسەركرنا كێشەیێن هەلاویستی هەیە و بەردەوامە.
دوهی چارشەمبی 2/7/2025، د. لەتیف رەشید، سەرۆككۆمارێ ئیراقێ د دیدارەكێدا ل گەل رۆژنامەیا مۆندۆ یا ئیسپانی گوت» سەبارەت ناكۆكی و كێشەیێن هەلاویستی د ناڤبەرا هەولێرێ و بەغدایێ دا، رۆژانە پەیوەندی د ناڤبەرا حوكمەتا فیدرالی و حوكمەتا هەرێما كوردستانێ هەیە بۆ گەنگەشەكرنا كێشەیێن هەلاویستی».
سەرۆككۆمارێ ئیراقێ گوت ژی» بۆ چارەسەركرنا وان كێشەیان دڤێت قانوونا پەترۆل و غازێ بهێتە دەركرن» .
د. لەتیف رەشید گوت ژی» ئیراق هەر جۆرە پێشێلكارییەكا ئەسمانێ خوە ل شەڕێ 12 رۆژی د ناڤبەرئا ئیسرائیلێ و ئیرانێدا رەت دكەت» هەروەسا ئاماژە ب وێ چەندێ ژی كر» پێدڤی بوو هەڤپەیمانییا نێڤدەولەتییا دژی داعشێ ب سەرۆكایەتییا ئەمریكا د وی دەمی دا ئەسمانێ ئیراقێ پاراستبا».
سەرۆككۆمارێ ئیراقێ دوپاتكر ژی» ئەم پێشێلكرنا ئەسمانێ ئیراقێ ل دەمێ شەڕێ د ناڤبەرا ئیسرائیلێ و ئیرانێدا پرۆتەستۆ دكەین و هەروەسا ئەم داخوازا كڕینا سیستەمێ بەرگریێ بۆ پاراستنا ئەسمانێ خوە دكەین».
هەروەسا خویاكر» پێدڤی بوو هێزێن هەڤپەیمانان پارێزگاری ژ ئەسمانێ ئیراقێ كربا».
سەرۆككۆمارێ ئیراقێ ل درێژییا دیدارێدا گوت» هەبوونا هێزێن هەڤپەیمانان ل سەر بنەمایێ رێككەفتنێن د ناڤبەرا واشنتۆنێ و حوكمەتا ئیراقێدا یە، هەروەسا چارەنڤیسێ بەردەوام بوونا یان چوونا وان گرێدایە ب دانوستاندنێن د ناڤبەرا حوكمەتا ئیراقێ و ئەمریكا دا» .
د. لەتیف رەشید هۆشداری دا ژ مەترسییا گرۆپێن چەكدار و راگەهاند» داعش ل هەموو جهان مەترسیێ دروست دكەت نەك تنێ ل ئیراقێ، بەلێ ئەڤە ئەو مەترسی نینە كو ل بۆری روو ب روو بووین ،چونكە شكەستن ئینایە، ئەو تاوانێن كو ب تایبەتی دژی ئێزدییان ئەنجامداین، ژ بیرا مە ناچیت».
سەرباەت دیاردەیا چەك هەلگرتنێ، سەرۆككۆمارێ ئیراقێ دیاركر» سیاسەتا حوكمەتا ئیراقێ یا ئاشكرایە، دڤێت چەك ب رێكا هێزێن ئەمنی یێن فەرمی د دەستێ دەولەتێدا بیت».
ل دۆر هەلبژارتنێن داهاتی یێن جڤاتا نوونەرێن ئیراقێ، د. لەتیف رەشیدی گوت» داخوازێ ژ هەموو هێزێن سیاسی دكەم پشكداریێ د هەلبژارتنێن جڤاتا نوونەرێن ئیراقێدا بكەن ،ب تایبەتی ئەو هێزێن بایكۆت كری». هەروەسا دویاتكر كو» پێدڤییە پێكڤە كاركەین بۆ چارەسەركرنا كێشەیان و بەرهنگاربوونا گەندەلیێ و پرسێن دی، بەلێ بایكۆت ژی دیاردەیەكا سرۆشتییە و ل هەموو وەلاتاندا روو ددەت».

وەزیرێ هەرێمێ بۆ كاروبارێن پێكهاتەیان راگەهاند: ئیراق خەلكێ هەرێما كوردستانێ برسی دكەت و یا رژد نینە د چارەسەركرنا كێشەیاندا، هەروەسا گوت ژی: بەغدا ستەم ل كۆتایا كریە.
ئایدن مەعرووف، وەزیرێ هەرێمێ بۆ كاروبارێن پێكهاتەیان گوت» پرسا مووچەیێ فەرمانبەرێن هەرێما كوردستانێ بابەتەكێ هەستیارە، مافێ قانوونی و بنەڕەتیێ فەرمانبەرێن هەرێمێیە، بەلێ حوكمەتا ئیراقێ یا رژد نینە د چارەسەركرنا كێشەیێ دا و نییەتا وێ یا باش نینە، هەروەسا بەغدا ل دەمێن بۆری ژی ب رژدی كار ل سەر چارەسەركرنا وێ كێشەیێ نەكریە».
وەزیرێ هەرێمێ بۆ كاروبارێن پێكهاتەیان رۆهنكر ژی» دستوورێ ئیراقێ كو مافێ هەموو پێكهاتەیان تێدا هاتیە گرەنتیكرن، وەكو خوە ناهێتە بجهئینان و پێدڤییە حوكمەتا ئیراقا فیدرال پێگیری بڕیارێن دادگەها فیدرالی و دستوورێ ئیراقێ بیت، بەلێ مەژیێ حوكمڕانێن بەغدایێ ژ دەرڤەی دستووری بڕیارێ دەردكەت و ب ئارەزوویا خوە سیاسەتێ دكەن، پێدڤییە گوهۆڕین د وی مەژیێ ل بەغدا حوكمڕان بهێتە كرن، ئەڤ مەژیە نوكە نینە ستەمێ ل مللەتێ كورد دكەت، بەلكو پێشتر ژی ستەم لێكریە».
ل دۆر دانوستاندنێن د ناڤبەرا هەولێرێ و بەغدایێ ژی، ئایدن مەعرووفی گوت» دانوستاندن د ئەرێنی بوون و نێزیكبوونەك یا هەی، هیڤیدارین ئەڤ تێكگەهشتنە بگەهیتە رێككەفتنا دووماهیێ و هنارتنا مووچە و شایستەیێن دارایی یێن خەلكێ كوردستانێ».
پتر گوت» تێكگەهشتنەكا خراب ل بەغدایێ هەیە بۆ بڕێڤەبرنا پرسا دەولەتسازیێ و داهاتێن وەلاتی، ئەڤ رەفتارە وەدكەت بەری هەموو ئالییەكی ئیراق ب خوە زیاندارا ئێكێ بیت و ل پاشەڕۆژێ ژی دێ باجا وێ چەندێ دەت».
ئەوژی بەرچاڤكر» رەفتارێن حوكمەتا ئیراقێ بۆ ئیدارەدانا پارەی و داهاتی ب جۆرەكییە، هەست دهێتە كرن ئەڤ حوكمەتە ناخوازیت گرفتان چارەسەر بكەت، ئەگەر نە هەكە نیازەكا جدی هەبا بۆ چارەسەریێ، دەمەك بوو ئەو دەرفەتا سەرۆكێ حوكمەتا هەرێما كوردستانێ بۆ چارەسەرییا پرسان دایە ئیراقێ دا كەنە دەلیڤە. پرسا مووچەی د قانوونا بودجەیا ئیراقێدا ب رۆهنی هاتیە باسكرن و بابەتەكێ قانوونییە، سەبارەت وێ چەندێ ژی بڕیارا دادگەها فیدرالی هەیە ب وێ چەندێ ئەڤ پرسە ژ ململانێیا سیاسیدا بهێتە دەرئێخستن، هەكە نیازەك بۆ چارەسەریێ هەبا، دەمەك بوو ئەڤ پرسە دا هێتە چارەسەركرن، ئەڤ رەفتارێن حوكمەتا ئیراقێ دژی فەرمانبەرێن هەرێما كوردستانێ باشترین بەلگەنە بۆ ئەوێن هێشتا ل هەرێمێ دبێژن كو خەتایێن هەرێما كوردستانێ نە، پشتی ڤان هەموو فشار و سزادانا خەلكێ هەرێما كوردستانێ بۆ من جهێ حێبەتیێیە هێشتا خەلكەك هەیە بەرگریێ ژ نەحەقیێن دەستهەلاتدارێن ئیراقێ دكەن».
وەزیرێ هەرێمێ بۆ كاروبارێن پێكهاتەیان دیاركر ژی» ئێدی دەمێ گوهۆڕینێیە د مەژیێ بڕێڤەبرن ئیراقێدا یا هاتی، گوهۆڕینێن مەزن ل دەڤەرێ رووداینە، نابیت ئیراق ب ڤێ نكۆلیكرنێ و سیاسەتا نەهێلانا كوردستانێ بەردەوام بیت. دستوور كو مافێ هەموو پێكهاتەیان تێدا یا هاتیە گرەنتیكرن، وەكو خوە ناهێتە بجهئینان، پێدڤییە حوكمەتا فیدرالی پێگیری بڕیارێن دادگەها فیدرالی و دستوورییا ئیراقێ بیت، بەلێ بەرۆڤاژی هاتیە كورسیێن پێكهاتەیان ژ 11 كورسییان هاتنە لادان و پاشی ب فشاران پێنج كورسی هاتنە زڤراندن».

شیرەتكارێ سەربازیێ سەرۆكێ هەرێما كوردستانێ راگەهاند: ل دووماهییا ئەڤسالە هەرێما كوردستانێ 11 فیرقە و ئێك هێزا پێشمەرگێ كوردستانێ دێ هەبیت.
بابەكر زێباری، شیرەتكارێ سەربازیێ سەرۆكێ هەرێما كوردستانێ د داخۆیانییەكا رۆژنامەڤانیدا گوت» نوكە ژ سەرجەمێ 11 فیرقەیان 10 فیرقە یێن تمام بووین و كارێن ئێكگرتنا هێزا پێشمەرگەی بەر ب دووماهییێە».
شیرەتكارێ سەربازیێ سەرۆكێ هەرێما كوردستانێ دوپاتی ل سەر بەردەوامییا هاریكاریێن هەڤپەیمانان بۆ هێزا پێشمەرگێ كوردستانێ كر.
دیاركر ژی» پرۆسەیا ئێكخستنا هێزا پێشمەرگێ كوردستانێ ب شێوەیەكێ باش یا بەردەوامە و سەركەفتییە و پێشكەفتنا بەرچاڤ بخوەڤە دیتییە، ئەوژی پێنگاڤەكا گرنگە بەر ب دروستكرنا لەشكرەكێ نیشتمانیێ ئێكگرتی بۆ هەرێما كوردستانێ».
زێباری ئاشكراكر ژی» هەموو هێزا پێشمەرگێ كوردستانێ دێ هێتە رێكخستن و لەشكرەكێ رێكوپێك دێ هێتە دروستكرن، هەتا نوكە 10 فیرقە ژ سەرجەمێ 11 فیرقەیان تمام بووینە، هەتا دووماهییا ئەڤسالەژی هەرێما كوردستانێ دێ بیتە خودانا 11 فیرقەیێن هێزا پێشمەرگێ كوردستانێ».
زێدەتر گوت» ئارمانجا سەرەكی ژ وێ چەندێ ئەوە، كو هەموو هێزێن كوردستانێ ل بن چەترێ وەزارەتا كاروبارێن پێشمەرگەیدا بهێنە ئێكخستن. ئێدی ناخوازین جوداهی د ناڤبەرا پێشمەرگەیاندا هەبیت، یان بهێتە كوتن ئەڤە پێشمەرگەیێ ئالییەكییە و ئەوێ دی سەر ب ئالییەكی دیڤەیە».
بابەكر زێباری دیاركر دوپاتی ل سەر وێ چەندێ ژی كر» هێزێن هەڤپەیمانان گەلەك د هاریكارن و پشتەڤانیێ ل هێزا پێشمەرگەی دكەن و هەماهەنگییەكا گەلەك باش د ناڤبەرا مەدا هەیە و هەر ژ دەستپێكێ هەڤپەیمان بۆ ئێكخستنا هێزا پێشمەرگێ كوردستانێ د هاریكار بوون».

سەرۆكێ هەرێما كوردستانێ وبالیۆزێ فرەنسا ل ئیراقێ دوپاتی ل وێ چەندێ دكەن كێشەیێن د ناڤبەرا هەولێرێ و بەغدایێ ب رێكا دانوستاندنێ و ل سەر بنەمایێ دستووری بهێنە چارەسەركرن.
نێچیرڤان بارزانی، سەرۆكێ هەرێما كوردستانێ، پێشوازی ل پاتریك دورێل، بالیۆزێ فرەنسا ل ئیراقێ كر.
د دیدارەكێدا، هەڤبەندیێن فرەنسا ل گەل ئیراقێ و هەرێما كوردستانێ هاتنە گەنگەشەكرن و هەروەسا بیر و بۆچوون ل دۆر رەوشا گشتییا ئیراقێ و هەرێما كوردستانێ، دەلیڤەیێن وەبەرئێنانێ و بازرگانیێ بۆ كۆمپانیێن فرەنسی ل ئیراقێ و هەرێما كوردستانێ، هاتنە لێكگۆهارتن.
هەردو ئالییان دوپاتی ل چارەسەركرنا كێشەیێن د ناڤبەرا هەردو حوكمەتێن ئیراقا فیدرال و هەرێما كوردستانێ ب رێكا دانوستاندنێ و ل سەر بنەمایێ دستوورێ ئیراقێ، كر.
د تەوەرەكێ دی یێ كۆمبوونێدا، باس ل دووماهی پێشهاتێن رۆژهەلاتا ناڤین هاتە كرن و سەبارەت ڤێ چەندێ هەردو ئالییان ب گرنگییا پاراستنا ئارامییا دەڤەرێ دوپاتكر و داكۆكی ل پێدڤییا دوورئێخستنا ئیراقێ ژ كێشە و ئالۆزیێن دەڤەرێ، كر.
چەند بابەتێن جهێ گرنگییا هەڤپشك، ئالییەكێ دی یێ دیدارێ بوو كو یان برێم، قۆنسلێ گشتیێ فرەنسا ل هەرێما كوردستانێ تێدا بەرهەڤ بووی.