ئەڤرۆ نیوز:
رێڤەبەرێ گشتی یێ دەزگەھێ پاراستنا ئالایێ کوردستانێ، دیار کر دوھی 28ى ئادارا 2017ێ ل ناڤ بازارێ دھۆکێ خرڤەبوونەکا جەماوەری بۆ پشتەڤانیا کەرکووکێ و بلندکرنا ئالایێ پیرۆز یێ کوردستانێ ھاتە کرن.
پەھلەوان شێخ مەمی، رێڤەبەرێ گشتی یێ دەزگەھێ پاراستنا ئالایێ کوردستانێ، بۆ ئەڤرۆ دیار کر ژێر درووشمێ، بەلێ بۆ ئێکبوونا ناڤ مالا کوردی و بەلێ بۆ ئێکدەنگی و ھەلویستێ لایەنێن سیاسی ل ھەرێما کوردستانێ و بلندکرنا ئالایێ کوردستانێ ل سەرانسەری پارێزگەھا کەرکووکێ خرڤەبوونا جەماوەری ل بازارێ دھۆکێ دەست پێ کر.
پەھلوان شیخ مەمی، گۆت “ئەڤرۆ 29ى ئادارا 2017ێ ئەم دەزگەھێ پاراستنا ئالایێ کوردستانێ دێ بەرەڤ کەرکووکێ چین و ل ناڤ کەرکووکێ 10 مەزنترین ئالایێن کوردستانێ دێ ھێنە بلندکرن”.
خویا ژی کر ب درێژاھیا 30 مەتران و فرەھیا چار مەتران دێ ئالایێن کوردستانێ ل کەرکووکێ ھێنە بلندکرن و ھندەک ئالایێن کوردستانێ ژی ب درێژاھیا 15 مەتران و ب فرەھیا سێ مەتران دێ ل کەرکووکێ ھێنە بلندکرن.

ئه‌ڤرۆ نيوز:
میرێ ئێزدیان ل عیراقێ وجیھانێ تایبەت بۆ رۆژناما ئەڤرۆ ئاشکراکر، سەرۆک بارزانی ل سەر داخوازیێن ئێزدیان کاردکەت، ھەروەسا خوەیاکر دێ پاشەرۆژا ئێزدیان گەلەک باشتربیت ژ جاران، ئەم ژ ئەلمانیا ڤەگەریاینە ھەرێما کوردستانێ بۆ کارکرنێ ل سەر داخوازی و خزمەتکرنا ئێزدیان ل گەل سەرۆک بارزانی.
میر تەحسین سەعید بەگ، میرێ ئێزدیان ل عیراقێ وجیھانێ دیارکر ئێزدی تووشی کارەساتەکا مەزن بووینە ئەم ھەموو شیانێن خوە کار دکەین بۆ جینوساید ناساندنا کارەساتا شنگال و رزگارکرنا ژن وزارۆک وخووشکێن مە د دەستێن ھوڤێن تیرۆرستێن داعشێ دا.
میرێ ئێزدیان ئەو چەندە نەڤەشارت و گۆت: بەری چەند رۆژان ل سحێلا ئەم ل گەل سەرۆک بارزانی کۆمبووین د کۆمبوونێ دا مە چەندین داخوازیێن ئێزدیان گەھاندنا سەرۆک بارزانی ژ وانا ژێ مە داخواز کر شنگال ببیتە پارێزگەە و ئێدارا شنگال دەستێن خەلکێ شنگالێ دا بیت، ئەو بخوە ئێدارا خوە برێڤەبەن ببیتە پارێزگەھەکا سەربەخوە سەرب ھەرێما کوردستانێ ڤەبیت، ھەروەسا ژی کار بۆ رزگارکرنا ھەموو رەڤاندیێن ئێزدی بھێتە کرن، ئەو ژن و زارۆک و خووشکێن مە ھاتینە رەڤاندن ل سەر دەستێن رێکخراوا تیرۆستێن داعش بھێنە رزگارکرن، ئەو دەڤەرێن ھاتە نوکە نەھاتینە رزگارکرن ل شنگال ھەموو بھێنە رزگارکرن.
میر تەحسین سەعید بەگ خوەیاکر، پێدڤیە گرنگیەکا مەزن ئاڤەدانییێ و دابینکرنا خزمەتگوزاریان بۆ شنگال و باشیکێ بھێتە کرن، و وژین وژیارا خەلکێ بھێتە خوشکرن ھەموو کەسین زەرمەند بھێنە قەرەبوکرن، وئەو کەسین دەست کوشتن و رەڤاندنا کچ و ژن و زارۆکێن مە دا ھەی ھەموو ل دووڤ قانوونی بھێنە سزادەن و گرتن.
میرێ ئێزدیان ل عیراقێ و جیھانێ ئاماژە دا وی چەندی کو ئێک ژ داخوازیێن ئێزدیان یێن مە گەھاندینە سەرۆک بارزانی ئەو بوویە، ئێزدی پێگھاتی دویێ بن ل ھەرێما کوردستانێ، وەکو ئەم دزانین موسلمان پێگھاتێ ئێکی نە و کریستیان پێگھاتێ دویێ نە و ئێزدی پێگھاتێ سیێ نە، ئەم دخوازین ئێزدی ببینە پێگھاتیی دویێ ل ھەرێما کوردستانێ و پتر گرنگی ب ئێزدیان بھێتە دان.
میر تەحسین بەگ زێدەتر گۆت: خەلکی شنگال ژی دخوازین دەڤەرا وان ببینە پاریزگەە سەرب ھەرێما کوردستانێ ڤە بیت، ئەم ل گەل وان روونشتینە ھەلوەیستی وان ژی ل گەل یێ مەیە بۆ پارێزگەە بوونا شنگال کو سەرب ھەرێما کوردستانێ ڤە بیت.
میرێ ئێزدیان ھەروەسا راگەھاند، حکومەتا عیراقی دخوازت ل عیراقی دادگەھکرنا تیرۆرستێن داعش بھێتە کرن، یێن دەست ب کوشتن ورەڤاندن وکارەساتا شنگال دا ھەیی، ئەم نە ل گەل داینە ل عیراقی بیت، پێدڤیە دادگەھێن نێڤدەولەتی تاوانبار بھێنە سزادان و بادەکا جینوسایدا ئێزدیان بھێتە برێڤەبرن، ئەم داخوازێ ژ حوکمەتا عیراقی دکەین، ھەڤکاربیت بۆ برێڤەبرنا بادەکا جینوسایدا ئێزدیان ل دادگەھێن نێڤدەولەتی.
ناڤبری ئەو ژی دیارکر عیراق دبیژت پێدڤیە عیراقی ل دادگەھێن عیراقێ بھێنە سزادان و دادگەھکرن، ئەم نە ل گەلداینە ل عیراقێ تیرۆرست بھێنە دادگەھکرن، پێدڤیە دادگەھێن جیھانی بیت بۆ ھەموو دونیای راستی روھن وئاشکرا بیت، وکەسێن دەست رەڤاندن و کوشتن و بی سەروشوونکرنا ئێزدیان دا ھەی ھەموو بگەھنە سزایێن خوە.
میرێ ئێزدیان ل عیراقێ و جیھانێ دیارکر، پێدڤیە ھەموو ئێزدی ببنە ئێک دەست وھەلوەیست نە بتنی ئێزدیێن ل ھەرێما کوردستانێ بەلکو ئێزدیێن جورجیا و ئەرمەنیا و روسیا و ئەمریکا و سوریا و تورکیا ھەموو بنە ئێک ھەلوەیست و دەنگ، چونکو دەولەتێن جیھانێ گۆتینە ھەکە ئێزدی ببنە ئێک دێ ھەموو تشتەک بۆ ئێزدیان ھێتە کرن، لێ ھەکە ئێزدی نە بنە ئێک دێ یا بزەحمەت بیت خزمەتا ئێزدیان بھێتە کرن د ھەموو وارەکی دا.
میر تەحسین بەگ گۆت: سەرۆک بارزانی ھەلوەیستەکێ مەزن بەرامبەر ئێزدیان و دۆزا مللەتی مە ھەیە پێدڤیە ئێزدی ژی پشتەڤانیی لێ بکەن، بۆ ب دەستڤەئینانا ھەموو مافێن مللەتی مە.
ل دووماھیێ ژی میرێ ئێزدیان ئاماژەدا کو پێدڤیە کار ب ئاشتی و برایەتی بھێتە کرن، ئالوزیێن شنگال بھێنە چارەسەرکرن، و دەست ب ئاڤەدانیێ و ڤەگەراندنا خەلکێ بھێتە کرن، ب راستی ژی سەرۆک بارزانی ژی کار ب ئاشتی و برایەتیێ دکەت لەورا ئالۆزی ل شنگال نامینن.