ئه‌ڤرۆ نيوز:
وه‌زيرێ ده‌رڤه يێ توركيا مه‌ولود چاوش ئوغلو راگه‌هاند: ئه‌م د وێ باوه‌رێ دانه كو ئه‌مريكا درێژيێ ب وان شاشيان ناده‌ت كو ل قوناغێن بوورى دا كرين، دو پێشبينى يێن ل پێشيا مه، ئێك ئه‌وه كو دڤێت فه‌تحولا گوله‌ن و به‌رپرسێن دى يێن وێ رێكخراوێ راده‌ستى توركيا بكه‌ت، دووه‌م دڤێت ئه‌مريكا دووماهيێ ب هاريكاريكرنا يه‌په‌گێ بينيت.
ئه‌ڤرۆ نيوز:
رابه‌ر سه‌ديق بريكارێ وه‌زاره‌تا دارايى و ئابوورى ل حوكمه‌تا هه‌رێما كوردستانێ د ديداره‌كێ دا ل گه‌ل رووداو راگه‌هاند كو ره‌وشا هه‌رێما كوردستانێ دێ ل 2017 باشتر بيت و هه‌كه بهايێ په‌ترۆلێ وه‌كو نوكه د زێده‌بوونێ دا بيت، پشتى نه‌ورۆزێ دێ پێداچوون د سيسته‌مێ پاشكه‌فتكرنا مووچێ فه‌رمانبه‌ران دا هێته كرن.
ئه‌ڤرۆ نيوز:
چاڤدێرەکێ سیاسی ئاماژە ب ھەبوونا چەکدارێن پەکەکێ ل شنگالێ دکەت و دبێژیت، مانا پەکەکێ ل شنگالێ تنێ بۆ دژایەتیکرنا پڕۆژێ نیشتیمانی و نەتەوەیێ پارتی و سەرۆک بارزانیە، ھەروەسا دیارکر، ھەبوونا دانوستانان لدۆر ڤەکێشانا چەکدارێن پەکەکێ ل شنگالێ دناڤبەرێن ھێزێن سیاسیێن کوردستانی پێنگاڤەکا باشە و زامنێ سەرکەفتنا کوردانە و ئەڤا قەرەیلان بۆ ڤەکێشانا پەکەکێ ئیماژە بۆکری ھەر ئەو رێیا راستە.
خالد ئەحمەد، چاڤدێرێ سیاسی بۆ رۆژناما ئەڤرۆ گۆت” دەڤەر بگشتی یا کاودانێن ھەستیاردا دەربازدبیت، بتایبەتی دەڤەرا رۆژھەلاتا ناڤین کو کورد تێدانە، پارتا کرێکارێن کوردستانێ پەکەکە گورەی پڕۆژەیەکی نیشتیمانی ھزرناکەت، ھێشتا بەرێ پەکەکێ باشتر ھزردکر وی دەمی کاودانیش بوی شێوەی بەرتەنگ نەبوون و گۆتارەکا باشتر ھەبو، نوکە پەکەکە بۆیە پشکەک ژ ئەڤێ ھەڤکێش و میحوەربەندیا ل دەڤەرێ ھەی، وەک ئامرازەک بۆ شەڕێ مەزھەبی دھێتە بکارئینان، بێی کو چو دەستکەفت بۆ پەکەکێ ھەبن، دھەمان دەمدا ھەبوونا چەکدارێن پەکەکێ ل شنگالێ تنێ وەک ئامرازەکیە بۆ دژایەتیاکرنا ھەرێما کوردستانێ، ھەمان دەم بۆدژایەتیا پڕۆژێ نیشتیمانی و نەتەوەیێ پارتی دیموکراتی کوردستان و سەرۆک بارزانیە، پەکەکە ژلایێ دوژمنێن کوردا ئەڤێن دژی پڕۆژێ سەربخۆیێ دھێتە پالدان گڤاشتنان دروست بکەن، ناھێتە ڤەشارتن مانا پەکەکێ ل شنگالێ بۆ بجە ئینانا پڕۆژێ ئیرانێ یە ھەتا رێیەکا لۆجستی ھەبیت دگەل سووریا و ئەڤژی بھەڤکاریا حەشدا شەعبی. جھێ داخێ یە پەکەکە ئەڤرۆ بۆیە پشکەک ژ ھەڤپەیمانێن ئیرانێ بێی کو ئیران دانپێدانێ ب مافێن کوردا بکەت، بەلکۆ ب ئەشکرا دژایەتیا مافێن سرۆشتیێن کورددا دکەت و پەکەکێ خوە کریە ئامرازەک بۆ بجە ئینانا تاکتیکا ھەڤکێشێن ھەرێمی و کارتەکا سووتی ددەستێ ئەڤان ھێزادا، ھەرچەند پەکەکە ل شنگالێ بمینیت دێ رەوش ئالۆزتربیت و دێ مللەتێ کورد ئێخیتە ھەمبەر ئاریشەیەکا مەزن، ئەوژی ب ھەلکرنا ئاگرێ شەڕێ نافخۆ لسەر حیسابا رۆلێ سیاسی و لەشکریێ کوردا ل شەڕێ بەرھنگاریا تیرۆرستێن داعش.
لدۆر ئاخفتنێن موراد قەرەیلان خالد ئەحمەدی گۆت”داخویانیا ڤێ دوماھیێ یا بەڕێز موڕاد قەرەیلانی جھێ ئومێدو رێیا راستە بۆ نەھێلانا مەترسیەکا مەزن کو ئیماژە بڤێ چەندێ کری چەکدارێن پەکەکێ دێ ھێنە ڤەکێشان ل شنگالێ، ھەبوونا دانوستانان دناڤبەرا لایەنێن سیاسیێن کوردستانێ زامنێ سەرکەفتنا کوردایە بسەر تیرۆرستان و دێ سەرکەفتنا سیاسیا کوردابیت دھەڤکێشێن دەڤەرێ کو دڕێیا مەدانە، بەلێ بەرۆڤاژی مانا پەکەکێ ل شنگالێ دێ زیان ب پەکەکێ گەھن، ژبلی کو دێ زەرەرێ بیرکاری خەلکێ ئاوارە و دەربەدەرێ شنگالێ کەڤن، ھیڤیدارم زمانێ عەقل و لوژیکێ یێ زالبیت پەکەکەژی خۆ نەئیخیتە ھەمبەر خیانەتەکا نیشتیمانی و دیرۆکی.
ئەڤرۆ نیوز:
زێرەڤان بەرواری ماموستایێ زانکۆیا دھوکێ بۆ رۆژناما ئەڤرۆ دبێژیت: تورکیا گوھۆڕین د سیاسەتا خوە یا رۆژھەلاتا ناڤین دا دروستکرینە و ئەڤ چەندە بۆ دو فاکتەرێن سەرەکی ڤەدگەریت، ژ وانا فاکتەرێ جیۆپۆلیتیکی، کو ئەنقەرە ھەست ب دۆرپێچا ھەرێمی دکر، ژلایێ رووسیا و ئیرانێ ڤە، بتایبەتی پشتی تێکچوونا بەلانسا ھێزێ د بەرژەوەندیا بلۆکێ رووسی دا، ھەروەسا فاکتەرێ ئەمنی کو تورکیا پرەنسیپا ئەمنی کریە ئێکەمین شەنگستێ سیاسەتا خوە یا دەرڤە ل رۆژھەلاتا ناڤین وەک ڤەرێژەک بۆ لاوازیا ھەلویستێ ئەمریکی و ئورۆپی و نەپێگیریا وان ب پەیمانێن ناتۆ یێن پاراستنا ئەندامێن خوە ژ مەترسیێن دەرڤە.
ناڤھاتی دیارکر ژی: سەرەدانا سەرۆک وەزیرێن تورکیا بۆ عێراقێ نامەیەکا سیاسی یە بۆ دەستھەلاتا بەغدا ب دیارکرنا رۆلێ تورکیا و قەیرانا سووریێ دا و ھێزا ڤێ دەولەتێ بۆ گوھۆرینا ھەڤکێشەیێن سیاسی و دوورخستنا عێراقێ ژ چارچۆڤێن ئیرانێ و ھەروەسا دیارکرنا ھەلویستێ ئەنقەرە بەرامبەر شنگالێ و ھێزا پەکەکێ دڤێ دەڤەرێ دا،کو تورکیا ڤێ چەندێ ب مەترسی ل سەر خوە دزانیت،ھەروەسا ھەرێما کوردستانێ ژی گرنگیا خوە ھەیە بۆ تورکیا،ژبۆ پاراستنا بەلانسا ھێزێ دناڤبەرا ھێزێن کوردی دا،لەورا تورکیا ھەرێما کوردستانێ ب نموونە دزانیت بۆ خوەشکرنا پەیوەندیێن تورکی کوردی ل سەر ئاستێ ھەرێمی دا،دیسا ھەولدان ژلایێ تورکیاڤە بۆ دۆپاتکرنا پشتەڤانیێ بۆ ھەرێما کوردستانێ،کو بەغدا نابیتە بەدیل بۆ رۆلێ ھەولێرێ.
زێرەڤانی دیارکر ژی: تورکیا ھەولدەت پەیوەندیێن خوە ل گەل عێراقێ نورمال بکەت، بتایبەتی پشتی لێک نێزیکبوونا تورکیا و رووسیا، لەورا نوکە تورکیا ھەولددەت پەیوەندیێن ئابووری و سیاسی ل گەل بەغدا باش بکەت، ژ پێخەمەت لاوازکرنا رۆلێ ئیرانێ و زڤراندنا رۆلێ ئەنقەرە ل رۆژھەلاتا ناڤین دا،بتایبەتی پشتی ئالۆزبوونا قەیرانا سووریێ و دوورکەفتنا دەولەتێن عەرەبی ژ پرۆژێ تورکیا بۆ گوھۆرینا رژێما ئەسەدی تورکیا دێ ھەولدەت ب رەنگەکێ پراکماتیکی بەرژەوەندێن خوە ب پارێزیت،ھەروەسا گرنگترین گوتۆبێژ ژ سەرەدانا یلدرمی دێ بادەکا ئەمنی و سیاسی و ئابووری بن، لەورا ژلایێ ئەمنی ڤە تورکیا پێدڤی ب ھاریکاریا عێراقێ ھەیە، ژبۆ لاوازکرنا ھێرشێن پەکەکێ و نە ب کارئینانا وێ ل دژی بەرژەوەندێن تورکیا ل دەڤەرێ،دیسا ھەڤکاریا ئەمنی ل سەر بادەکا کوردی و تێگەھشتنێن ھەرێمی ل گەل بەغدا ژلایێ سیاسی ڤە تورکیا دێ بۆ بەغدا دیارکەت،کو ئەو خۆدانا کێشا سووریێ و کێشەیێن دی یێن عەرەبیە و ئێدی ئەنقەرە سەربەخۆتر دێ سیاسەتا دەڤەرێ کەت،بەغدا ژی پێدڤی ب گوھۆرینا ھەلویستێن خوەیە دڤێ پرسێ دا،ھەروەسا ژلایێ ئابووری ڤە تورکیا پێدڤی ب بازارێ عێراقی ھەیە، بتایبەتی پشتی لاوازبوونا لیرێ تورکی و کارتێکرنا وی ل سەر ئابوورێ تورکیا.
ماموستایێ زانکۆیێ ھێشتا دبێژیت: پەکەکە ئێک ژ گرنگترین بادەکێن ئەمنی یە کو تورکیا دڤێت ل گەل بەغدا بەحس بکەت،بتایبەتی پشتی دیاربوونا پەیوەندیێن بەغدا ب پەکەکێ ڤە،دیسا تورکیا دێ ھەولدەت کو ھەرێما کوردستانێ ژی پشتەڤانیا وێ بکەت د ھەولێن دژایەتیا پەکەکێ دا،لێ ھەرێما کوردستانێ د قۆناغا نھۆ دا پشکدار نابیت د چو ناکۆکیێن لەشکەری دا ل گەل پەکەکێ، ژبەرکو ئەڤە د بەرژەوەندا کوردان دا نینە، ھەروەسا ناکۆکیێن ھەرێمی دێ کوردان کەتە کارتا گڤاشتنێ، لەورا ھەرێما کوردستانێ ژی مەترسیێ ل سەر ئەزمۆنا کوردستانێ دروست ناکەت ب دروستکرنا شەرێ برا کوژیێ.
ئەوژی دیارکر: تورکیا پەیوەندیێن ئیستیراتیجی ل گەل ھەرێما کوردستانێ ھەنە، لەورا سەرەدانا یلدرمی بۆ کوردستانێ بتنێ دۆپاتکرنا گرنگیا ھەرێما کوردستانێ یە د فەرھەنگا ئەمنی و سیاسی یا تورکیا دا، ھەروەسا ئەنقەرە ھەرێمێ ب فاکتەرێ بەلانسا ئەمنی دزانیت ھەمبەری پرۆژێ ئیرانێ و دیسا ب فاکتەرێ بەلانسا ئابووری ژی دزانیت،کو کوردستان نھۆ گرنگترین بازارە بۆ ئابوورێ تورکیا،لێ یا گرنگە کو ھەرێما کوردستانێ ب چارچۆڤەکێ نوو سەرەدەریێ ل گەل ئەنقەرە بکەت، بتایبەتی پشتی گوھۆرینا دراماتیکی د سیاسەتا تورکیا دا و ئامادەبوونا تورکیا بۆ گوھۆرینا گرنگترین پرۆژێن خوە ل دەڤەرێ، لەورا ھەرێما کوردستانێ ژی پێدڤی ب سیاسەتا ژیواری ھەیە، بۆ پاراستنا بەرژەوەندیێن خوە ل گەل تورکیا.
ئەڤرۆ نیوز:
سەرۆکوەزیرێن تورکیا، بینالی یلدرم، پشتی سەرەدانا خوە یا ئیراق و ھەرێما کوردستانێ ب داوی ئینای، ڤەگەریا تورکیا، داخویانی دا رۆژنامەڤانان و راگھاند: دەمەکێ نوو د مژارا پەیوەندیێن تورکیا و ئیراقێ دا دەست پێ کر.
یلدرمی گۆت ژی: د گەل بەرپرسێن ئیراقێ و ھەرێما کوردستانێ دا بریارا ھەڤپشک یا تێکۆشینا ل دژی تیرۆرێ دایە.
خالێن سەرەکی یێن داخویانییا یرلدرمی ل دۆر سەرەدانا وی بۆ بەغدا و ھەولێرێ ب ڤی رەنگی نە:
جڤین گەلەک باش ھاتن کرن.
ئەم د مژارا تێکۆشینا ھەڤپشک دژی رێخستنێن تیرۆرستی دا رێککەفتین.
تێکلیێن تورکیا-ئیراقێ کەتیە دەمەکێ نوو.
مە ئارمانجا خوە یا ل باشیکێ کو بتنێ تێکۆشینا دژی تیرۆرێ یە دۆپات کر.
مە راگھاند کو بجھبوونا پەکەکێ ل شنگالێ گرێدایی مژارا ئاساییشا نەتەوەییا تورکیا یە.
ئەم جھبوونا پەکەکێ ل شنگالێ ب چ رەنگان قەبوول ناکەین.
مە د گەل سەرۆکێ ھەرێما کوردستانێ، مەسوود بارزانی و دگەل سەرۆکێ حکوومەتا ھەرێما کوردستانێ، نێچیرڤان بارزانی ژی دا ل ھەولێرێ ھەڤدیتنێن بەرفرەھ پێکئینان.
ئەم چووینە بنگەھێن ھێزێن پێشمەرگە ل نێزیک مووسلێ.
وەزیرێن مە د گەل ھێزێن ل کەمپا باشیکێ ھەڤدیتن پێکئینان.
ھەبوونا مەیا ل باشیکێ تشتەک گرێدایی حەزا مە نینە بەلکو ژ نەچارییە.
بۆ نەھێلانا تیرۆرێ ل ھەرێمێ دێ رێکارێن بلەز ھێنە دەست پێ کرن.
ئه‌ڤرۆ نيوز:
ئاژانسا ئيرنا يا فه‌رمى يا ئيرانێ ئه‌ڤرۆ به‌لاڤ كر كو هاشمێ ره‌فسه‌نجانى سه‌رۆكێ ئه‌نجومه‌نێ دياريكرنا به‌رژه‌وه‌نديێن ئيرانێ ژ ئه‌گه‌رێ خرابيا ره‌وشا وى يا ساخله‌ميێ گه‌هاندنه نه‌خوشخانێ پاشان وه‌غه‌ركر.
عه‌لى ئه‌كبه‌ر هاشمێ ره‌فسه‌نجانى 82 سالان ته‌مه‌ن بر ، ل سالا 1934 ژ دايك بوويه و چه‌ندين پوست د ژيانا خوه‌دا وه‌رگرتبوون وه‌كو ئێكه‌مين سه‌رۆكێ په‌رله‌مانێ ئيرانێ پاشان 8 سالان سه‌رۆك كومارێ ئيرانێ و ب ئێك ژ كاريگه‌رترين كه‌سايه‌تيێن سياسيێن ئيرانێ دهاته نياسين.
ره‌فسه‌نجانی ژ سالا 1989 هه‌تا 1997ێ سه‌رۆكێ ئیرانێ بوو، لێ ل سالا 2005ێ ل ده‌مێ هه‌ڤركییا ئه‌حمه‌دینه‌جاد كری و خوه به‌ربژار كری بسه‌رنه‌كه‌فت بوو.
ناڤهاتی ژ وان كه‌سایه‌تیێ، ئیرانی بوو كو داخوازا ئازادكرنا زیندانیێن سیاسی و دانا ئازادییه‌كا پتر یا سیاسی د چارچووڤه‌یێ ده‌ستووری دا دكر.
داوی رۆلێ ره‌فسه‌نجانی سه‌رۆكێ جڤاتا ده‌ستنیشانكرنا به‌رژه‌وه‌ندییا رژێمێ بوو كو ناكۆكیێن د ناڤبه‌را په‌رله‌مان و جڤاتا ده‌ستووری. بۆ پۆستێ سه‌رۆكایه‌تیێ چاره‌سه‌ر دكرن
ئه‌ڤرۆ نيوز:
سه‌رۆك وه‌زيرێن توركيا پێكئينانا لژنه‌كا ئابوورى د ناڤبه‌را ئه‌نقه‌ره و هه‌ولێر بۆ چاره‌كرنا قه‌يرانا ئابووريا هه‌رێما كوردستانێ راگه‌هاند، سه‌رۆكێ هه‌رێما كوردستانێ ژى سوپاسيا پشته‌ڤانيێن توركيا كر و راگه‌هاند : هاتنا يلدرم بۆ هه‌ولێرێ پشته‌ڤانيه‌كا مه‌زنه بۆ هه‌رێما كوردستانێ.
د كۆنگره‌يه‌كێ هه‌ڤپشك دا ل گه‌ل سه‌رۆك وه‌زيرێن توركيا، سه‌رۆك بارزانى راگه‌هاند: ئه‌م ئاماده‌ينه ل هه‌موو بواره‌كێ په‌يوه‌نديێن خوه زێده‌تر گرنگيێ پێ بده‌ين.
ئه‌ڤرۆ نيوز:
بينالى يلدرم، سه‌رۆك وه‌زيرێن توركيا نوكه يێ ل هه‌ولێر و بڕياره ل گه‌ل هه‌ر ئێك ژ مه‌سعود بارزانى، سه‌رۆكێ هه‌رێما كوردستانێ و نێچيرڤان بارزانى، سه‌رۆكێ حوكمه‌تا هه‌رێما كوردستانێ كۆم ببيت و نوكه كۆمبوونا ئێكێ يا ده‌سپێكرى.
رۆژا شه‌مبى رێكه‌فتى 7ى كانوونا دويێ 2017 بينالى يلدرم، ب سه‌ره‌دانه‌كا فه‌رمى گه‌هشته به‌غدا و ل گه‌ل حه‌يده‌ر عه‌بادى سه‌رۆك وه‌زيرێن عيراقێ و فوئاد مه‌عسوم يێ سه‌رۆك كۆمار و سه‌ليم جبۆرى يێ سه‌رۆك وه‌زير كۆمبوو و دره‌نگى شه‌ڤ ژى گه‌هشته هه‌ولێر.
ئه‌ڤرۆ نيوز:
رێڤەبەرێ راگەھاندنا وەزارەتا رۆشنبیری و لاوان راگەھاند، وەزارەتا وان ب نڤیسارا فەرمی ھەموو کەنالێن راگەھاندنێ ئاگەھدارکرینە د دەمێ ھەیڤەکێ دا مۆلەتا خوە نوو بکەن و پارێ کارکرنێ بدەن، بەرۆڤاژی دێ پێڕابوونێن قانوونی ھەمبەر ھێنە وەرگرتن و کەنال دێ ھێتە گرتن، ھەروەسا دیار کر، نوکە پلان ھاتیە دانان ماڵپەڕێن ئینتەرنێتێ ژی ب مۆلەت کاربکەن و یێ مۆلەت نەبیت دێ ھێتە فلتەرکرن و ناھێتە ڤەکرن.
فەرھنگ تاھر، رێڤەبەرێ راگەھاندنا وەزارەتا رەوشنبیری و لاوان بۆ رۆژناما ئەڤرۆ گۆت” پتری 100 کەنالێن راگەھاندنێ ل ھەرێما کوردستانێ ھەنە یێن رادیۆ تیڤی، ساڵانە مۆلەتا وان کەنالا ژلایێ وەزارەتا رەوشنبیری و لاوان دھێتە نوکرن بۆ بەردەوامیا کاری و چو کەنالەک بێی مۆلەت نەشێت کاربکەت و نینە ژی مۆلەت وەرنەگرتبیت ل حوکمەتێ و پەخشێ خوە بەلاف بکەت.
گۆت ژی: ل ھەر سێ پارێزگەھێن ھەرێما کوردستانێ ھەولێر و دھۆک و سلێمانیێ یێن مۆلەت نوو نەکربیت قەڕدارێ حوکمەتێ نە، لەوڕا وەزارەتا رەوشنبیری ب نڤیسارا فەرمی و فەرمانا وەزیرێ رەوشنبیری ئاگەھداریا وان کەنالا کریە بۆ دەمێ ھەیڤەکێ بھێن مۆلەتێن خوە نوو بکەن و پارەی بدەن، کو پارێ وانا ملیارەک دینار دکەڤن و ھەر کەنالەکێ نەھێت ڤی ژڤانێ دیاریکری مۆلەتا خوە نوو بکەت ئەڤە دێ پێڕابوونێن قانوونی ل ھەمبەر بھێنە وەرگرتن و کەنال دێ ھێتە گرتن، دەمێ وان چوار رۆژێن بۆری چو کەنالەک نەھاتیە بۆ نووکرنا مۆلەتا خوە، بەلێ ھژمارەکا کەنالان پەیوەندی ب وەزارەتێ کریە.
رێڤەبەرێ راگەھاندنا وەزارەتا رەوشنبیری دیار کر “ب تنێ ل سنورێ پارێزگەھا دھۆکێ 30 کەنالێن رادیۆ تیڤی ھەنە و مۆلەت ھەیە بۆ کارکرنێ، ژلایێ پشکا قانوونی دێ دووڤچوون بۆ ھێتەکرن یێن مۆلەت نوو نەکر و پارە نەدای، نەچارین مۆلەتا وانا بھێتە ھەلوەشاندن، کەنالێن بیانی ژی نڤیسینگەھێن خوە ل ھەرێما کوردستانێ ڤەکرینە و ل سەرانسەری ھەرێما کوردستانێ 40 کەنالێن ئاسمانی ھەنە و بیانی نافخۆ، یێن نافخۆ واتە یێن ھەرێما کوردستانێ بنگەھێن سەرەکی ھەنە و یێن بیانی ژی نڤیسینگەھێن خوە ھەنە، بەلێ رێنمایێن تایبەت بۆ کەنالێن بیانی ھەنە و پارە ژێ ناھێتە وەرگرتن.
ل دۆر رۆژنامە و گۆڤاران ژی فەرھەنگ تاھر گۆت “ب ئەگەرێ قەیرانا دارایی ھژمارەکا زۆرا رۆژنامە و گۆڤارا ھاتینە گرتن و بەرەف کێمبوونێ دچن، مالپەڕێن کۆمەلایەتی و ئینتەرنێتێ جھێ رۆژنامێن کاغەز گرتیە و نوکە وەزارەت یا کار دکەت بۆ پێدانا مۆلەتێ بیرکاری ماڵپەڕێن ئینتەرنێتێ و ھەر ماڵپەڕەکێ نوچەیان و بیاڤێن دی بھێتە ڤەکرن، دڤێت مۆلەتێ ل وەزارەتا رەوشنبیری و لاوان وەربگریت، بەرۆڤاژی رێ بیرکاری چو مالپەڕەکێ بێ مۆلەت ناھێتە دان بێ مۆلەت کاربکەن، چونکو وەزارەت ب رێیا پشکا قانوونی دێ فلتەری ئێخیتە سەر ڤان ماڵپەڕان و یێن زێدەگاڤیێ دکەین دێ لێپرسین د گەل دا ھێتەکرن، مینا دەزگەھێن دی یێن راگەھاندنێ دڤێت بن چاڤدێریا حوکمەتێ دا بن.
ئه‌ڤرۆ نیوز:
حه‌یده‌ر عه‌باى، سه‌رۆك وه‌زیرێن عیراقێ و بینالى یلدرم سه‌رۆك وه‌زیرێن توركیا پشتى ئه‌ڤرۆ ل به‌غدا كۆم بین، ل سه‌ر نه‌ه خالان رێككه‌فتن كو ژ گرنگترین وان خالان، سه‌ربازگه‌ها باشیك، بنگه‌هه‌كێ سه‌ربازى یێ عیراقى یه و پشتى رزگاركرنا مووسل، دێ هێلا نه‌فتا په‌ترۆلا عیراقێ ل گه‌ل توركیا هێته راكێشان.
سه‌باره‌ت هه‌بوونا چه‌كدارێن په‌كه‌كێ ل ئاخا عیراقێ، عه‌بادى د كۆنگره‌یه‌كێ رۆژنامه‌ڤانى دا گوت” دستورێ عیراقێ ب چ ره‌نگان رێكێ ب چ كه‌سه‌كێ ناده‌ت كو هێرشێ بكه‌ته سه‌ر وه‌لاتێن هه‌ڤسوو”.
سه‌باره‌ت قوتابخانێن سه‌ر ب فه‌تحولا گوله‌ن، عه‌بادى گوت” قوتابیێن عیراقێ ل ڤان قوتابخانان دخوینن، دڤێت به‌رژه‌وه‌ندیا قوتابیان ل به‌رچاڤ بهێته وه‌رگرتن و ب هه‌ماهه‌نگیا د ناڤبه‌را مه‌دا، دێ چاره‌یه‌كێ بینین”.
نيشاندان