ئه‌ڤرۆ نيوز:
ژبو سڤكرنا بارێ دارايى لسه‌ر موچه‌خورێن هه‌رێما كوردستانێ دوهى ده‌سته‌يا سه‌روكاتيا ئه‌نجومه‌نێن هه‌رسێ پارێزگه‌هێن ( دهوك – هه‌ولێر – سلێمانى ) دگه‌ل ئيداره‌يا هه‌له‌بچه پروژه‌ك پێشكێشى ئه‌نجومه‌نێ وه‌زيران كر بو هندێ كو موچه‌خور بشێت پارێت باج و رسومات هاتن و چوونێ و ئاڤ و كاره‌ب و هه‌مي جورێن خزمه‌تگوزاريا ژ پاشه‌كه‌وتێ موچێ فه‌رمانبه‌رێ ئه‌وێ قه‌ر نك حكومه‌تێ بهێته برين و هه‌كه جڤاتا وه‌زيران رازى بوو، پرۆژه دێ بيته بريار و هێته بجهئينان.
ئه‌ڤرۆ نیۆز، رێوار مزیرى:
رێڤه‌به‌رێ گشتى یێ باژێرڤانیان ل پارێزگه‌ها دهۆكێ تایبه‌ت بۆ ئه‌ڤرۆ نیۆز ئاشكرا كر كو جڤاتا وه‌زیرێن حوكمه‌تا هه‌رێما كوردستانێ ب نڤیساره‌كا فه‌رمى خواستیه میكانزمه‌كێ بۆ وه‌رگرتنا پارێ گلێشى ژ وه‌لاتیان بدانن.
هه‌ڤال ئه‌حمه‌د، رێڤه‌به‌رێ گشتى یێ باژێرڤانیان ل پارێزگه‌ها دهۆكێ دیار كر كو جڤاتا وه‌زیران ئه‌و نڤیسارا فه‌رمى ئاراسته‌یى وه‌زاره‌تا باژێرڤانى و گه‌شوگوزارێ یا حوكمه‌تا هه‌رێمێ كریه كو كۆژمه‌كێ پاره‌ى هه‌مبه‌رى راكرنا گلێشى ژ وه‌لاتیان وه‌رگرن و گۆت: “ئه‌ڤ بڕیاره دێ ئه‌ڤ ساله كه‌ڤیته د وارێ بجهئینانێ دا و ره‌نگه سێ هه‌تا پێنج هزار دیناران بۆ راكرنا گلێشى ژ هه‌ر ماله‌كێ بهێته وه‌رگرتن”.
ناڤهاتى ئاماژه دا وێ چه‌ندێ كو ل هه‌یاما بۆرى بڕیاره‌كا ب ڤى ره‌نگى هاتبوو دان كو پاره ژ جهێن بازرگانى بهێته وه‌رگرتن و گۆت: “نوكه ئه‌م پارێ راكرنا گلێشى ژ هه‌موو جهێن بازرگانى وه‌ردگرین”.
ئه‌ڤرۆ نیوز:
جڤاتا وه‌زیرێن هه‌رێما كوردستانێ سه‌باره‌ت داهات و خه‌رجیێ خه‌ملاندى یێ سالا 2017 دێ سوبه كوم بیت و ده‌رئه‌نجامێ كومبوونێن فراكسیونێن كوردستانێ و حكومه‌تێ ژى دێ هێته به‌رچاڤكرن.
بریاره سێ ته‌وه‌ر بهێته به‌حسكرن، ئێك ده‌رئه‌نجامێ كومبوونا رۆژا 21-12-2016 یا دناڤبه‌را حوكمه‌ت و فراكسیونێن په‌رله‌مانێ عیراقێ ل دۆر بودجا 2017 یا عیراقێ و یا دوێ به‌حسێ راپورتا وه‌زاره‌تا دارایى سه‌باره‌ت پلانا وه‌زاره‌تێ بۆ ئاماده‌كرنا به‌یاننامه‌كێ سه‌باره‌ت داهات و خه‌رجیێن هه‌رێمێ بۆ سالا 2016 و ئاماده‌كرنا پرۆژه‌كێ سه‌ره‌تایى سه‌باره‌ت داهات و خه‌رجیێن خه‌لاملاندى یێن بۆ سالا 2017ێ، هه‌روه‌سا دێ دانوستاندن ل سه‌ر راپورته‌كا وه‌زاره‌تا ساخله‌میێ هێته كرن سه‌باره‌ت ده‌رمان و پێدڤیێن نوشدارى.
ئه‌ڤرۆ نیوز:
ئه‌ڤرو ئێڤاری 11-1-2017 ل ئوتێلا ریكسوس ل باژێرێ دهوكێ ب ئاماده‌بونا فه‌رهاد ئه‌مین ئه‌تروشی پارێزگه‌رێ دهوكێ وعبدالخالق بابیری به‌رپرسێ لقێ1 وچه‌ند به‌رپرسێن حزبی ومیری وسازیێن راگه‌هاندنێ ، رێڤه‌به‌ریا گشتی یا ره‌وشه‌نبیری وهونه‌ری ل دهوكێ ب هه‌ڤكاری دگه‌ل ئوتێلا ریكسوس رێ ورسمه‌كێ رێزگرتنێ یێ تایبه‌ت سازكر بو چه‌ند میدیاكار وده‌زگه‌هێن راگه‌هاندنێ ئه‌وێن پشكداری كری درومالكرنا به‌رخودانا هێزێن پێشمه‌رگه‌ی ل دژی تیرورستێن داعش.
لبه‌راهیێ په‌یڤا بخێرهاتنێ یا رێڤه‌به‌ریا ره‌وشه‌نبیری ژلایێ ئێكه‌م بێژه‌رێ ته‌له‌فزیونا دهوك نسره‌ت هادی هاته خاندن تێدا ده‌ست خوشی وپیروزباهی ل وان هه‌موو میدیاكاران وده‌زگه‌هێن راگه‌هاندنێ كر یێن به‌رده‌وام رومالا به‌روكێن شه‌ری دكر وسه‌ركه‌فتنێن پێشمه‌رگه‌ی بو خه‌لكێ كوردستانێ وجیهانێ ڤه‌دگوهاستن وگوت ئه‌ڤ كارێ وان میدیاكارا كری كاره‌كێ پیروزه وجهێ رێزگرتنێ یه وخواست ژئیرو وێڤه میدیاكار وسازیێن راگه‌هاندنێ خو بو رومالكرنا ده‌وله‌تبونا كوردی به‌رهه‌ڤكه‌ن وسه‌ركه‌فتن بو هه‌موویان خواست.
پاش پارێزگه‌رێ دهوكێ دپه‌یڤه‌كێدا لبه‌راهیێ سلاڤ ورێز بو هێزێن پێشمه‌رگه‌ی دبه‌روكێن شه‌ریدا وخێزانێن شه‌هیدا هنارتن وئاماژه كره دوو خالا یا ئێكێ ئه‌وه كو ئه‌و پێشكه‌فتنا ئه‌ڤرو ل كوردستانێ په‌یدابوی هه‌تا راده‌كی فه‌زلێ وێ ڤه‌دگه‌ریت بو ده‌زگه‌هێن راگه‌هاندنێ ورومالكرنا وان سازیا بو بزاڤا ئاڤه‌دانكرن وپێشكه‌فتنا كوردستانێ ویا دووێ ئه‌وه كو ده‌زگه‌هێن میدیایا كوردی شیاینه روماله‌كا به‌رچاڤ بكه‌ن بو وان سه‌ركه‌فتنێن هێزێن پێشمه‌رگێ كوردستانێ ل دژی تیرورستێن داعش توماركرین وبوینه ژێده‌ر بو سازیێن راگه‌هاندنا بیانی وخه‌لكێ كوردستانێ وجیهانێ مفا ژێ وه‌رگرتیه وشیاینه دوزا ملله‌تێ كورد بو جیهانێ بده‌نه دیاركرن وپیروزباهیی ل هه‌موویان كر وسه‌ركه‌فتن بو خواست.
پاش چه‌ند پارچه موسیقه ژلایێ تیپا رباد یا هونه‌ری هاتنه لێدان ول دویڤدا سپوتێن ده‌زگه‌هان هاتنه نمایشكرن وخه‌لاتێن رێزگرتنێ ل سه‌ر ده‌زگه‌هێن راگه‌هاندنێ ومیدیاكارێن پارێزگه‌هێ هاتنه به‌لافكرن.
ل دوماهیێ سپوتێن ته‌له‌فزیونا كورستان یا ئه‌سمانی وه‌كو ئێكه‌م باشترین سپوت هاتنه هه‌لبژارتن.
هه‌ژی گوتنێ یه دڤان ری ورسمان دا نڤیسینگه‌هێن (20) ده‌زگه‌هێن را گه‌هاندنێ ل دهوكێ و(254) میدیاكار هاتنه خه‌لاتكرن( ده‌نگێ كوردستانا عیراقێ – تی ڤی دهوك- كوردستان تی ڤی ئه‌سمانی – كوردسات- العراقیه – زاگروس- ده‌زگه‌هێ ده‌لال ل زاخو – كومه‌لا فوتوگرافا – تی ڤی سپێده –چار چرا تی ڤی لزاخو – رادیو وته‌له‌فزیونا تیكو ل ئاكرێ – ئێن ئار تی – تی ڤی زاخو – بادینان سات- روداو – وار – رێگا – كوردستان 24- ئاری جه‌لال ژئاژانسا رویته‌رز – رشید یه‌حیا ژئاژانسا ئه‌سشیوسێت پرێس – ئانادول – ده‌نگێ ئه‌مریكا- رشید عبدالعزیز ومیهڤان به‌رواری ژسومه‌ریه وهتد…).
ئه‌ڤرۆ نيوز:
بەرپرسەکا تورکومان ل ھەرێما کوردستانێ دیار کر کو لیژنەکا ئابووریا بلند د ناڤبەرا ھەرێما کوردستانێ و تورکیا دا دێ ھێتە پێکئینان، تورکیا بۆ دەربازکرنا قەیرانا دارایی دێ ھاریکاریا ھەرێما کوردستانێ کەت، بەری نوکە وەلاتێ تورکیا ھژمارەکا بەرچاڤا پێشمەرگێن بریندار چارەسەرکرینە و قەڕ داینە ھەرێما کوردستانێ بۆ دانا مووچێن فەرمانبەران.
مونا قەھوەچی، سەرۆکا فڕاکسیۆنا پێشکەفتنا تورکومانی ل پەرلەمانێ کوردستانێ بۆ رۆژناما ئەڤرۆ ئاشکرا کر، د سەرەدانا خوەدا بۆ ھەرێما کوردستانێ سەرۆک وەزیرێن تورکیا سۆزدایە لیژنەیەکا بلند یا ئابووری د ناڤبەرا ھەرێما کوردستانێ و وەلاتێ تورکیا دا بھێتە پێکئینان و بارەگایێ وێ دێ ل ھەولێرێ بیت و گۆت: “ھەردو وەلات د وێ لیژنێ دا دێ ئەندام بن و لندترین لیژنە بیت د ناڤبەرا ھەولێر و ئەنقەرە دا بۆ پەیوەندیێن ئابووری و بازرگانی، چونکو تورکیا بۆ ئابوورێ ھەرێما کوردستانێ وەلاتەکێ گرنگە، ھەردو وەلاتان بەرژەوەندیێن تایبەت یێن ئابووری ھەنە، ئەڤە ژی دەستکەفتەکێ مەزنە بۆ ھەرێما کوردستانێ”.
مونا قەھوەچی ئاماژە ب وێ چەندێ ژی کر، ب ڕێیا ڤێ لیژنا ھەڤپشک تورکیا دێ ھاریکاریا ھەرێما کوردستانێ بۆ کێمکرنا زیانێن قەیرانا دارایی و زێدەکرنا ھنارتنا پەتڕۆلا ھەرێما کوردستانێ بۆ دەرڤە و بازاڕێن جیھانێ کەت و گۆت: “بەری نوکە ژی تورکیا ب دانا قەڕان بۆ ھەرێما کوردستانێ و چارەسەرکرنا ھژمارەکا بەرچاڤا پێشمەرگێن بریندار ھەڤکاریا ھەرێمێ کریە، بەلێ ئێدی ژ نوکە پێڤە دێ ھاریکاری پتر بنە فەرمی و دەستێ تورکیا بۆ ھاریکاریکرنا ھەرێما کوردستانێ د بیاڤێن جودا دا دێ یێ ڤەکریتر بیت”.
ئه‌ڤرۆ نيوز:
ل ھەولێرێ فەرمانا دەستەسەرکرنێ بۆ شەش وەبەرئینەران ھاتە دەرکرن و وەبەرئینەرەک ژی ھاتیە دەستەسەرکرن، رێڤەبەرێ گشتی یێ وەبەرئینانا ھەولێرێ ئاشکرا کر کو وەبەرئینەرەکی تنێ د پرۆژەکی دا 60 ملیۆن دۆلاران وەلاتیان خوارینە و رەڤیە دەرڤەی وەلاتی، بەلێ وان پۆلیسێن نێڤدەولەتی بۆ دەستەسەرکرنا وی وەبەرئینەری یێن ئاگەھدارکرین.
سامان عەرەب، رێڤەبەرێ گشتی یێ وەبەرئینانێ ل پارێزگەھا ھەولێرێ بۆ رۆژناما ئەڤرۆ دیار کر کو ھژمارەکا وەبەرئینەران کۆژمەکێ مەزنێ پارەی یێ ژ وەلاتیان وەرگرتی و گەلەک وەلاتیان ژی سکالا یێن ل سەر وان تۆمارکرین و گۆت: “تنێ ل پارێزگەھا ھەولێرێ فەرمانا دەستەسەرکرنێ بۆ شەش وەبەرئینەرا ژ لایێ دادگەھێ ڤە یا ھاتیە دەرکرن، بەلێ ھەتا نوکە چو ژ وان نەھاتینە دەستەسەرکرن”.
ناڤھاتی ئاماژە دا وێ چەندێ کو بەری نوکە ژی بڕیارا دەستەسەرکرنێ بۆ وەبەرئینەرەکی ھاتبوو دەرکرن و ھاتە دەستەسەرکرن و گۆت: “ئەو شەش وەبەرئینەرێن بڕیارا دەستەسەرکرنێ بۆ دەرکەفتی 10 ملیۆن دۆلارێن وەلاتیان یێن خوارین، بەلێ وەبەرئینەرێ پرۆژێ دەشتی بەھشت 60 ملیۆن دۆلارێن وەلاتیان یێن خوارین و مە پۆلیسێن ئینتەر پۆل بۆ دەستەسەرکرنا وی یێن ئاگەھدارکرین”.
سامانی خویا کر کو مۆلەتێن وان پرۆژێن وەبەرئینانێ یێن ب نیڤەرۆ ماین یێن ھاتینە ھەلوەشاندن و گۆت: ” ژ سەرجەمێ 332 پرۆژێن وەبەرئینانێ ل پارێزگەھا ھەولێرێ تنێ 82 پرۆژە ب دروستی یێن تمام بووین و مۆلەتێن 30 پرۆژان ژی یێن ھاتینە ھەلوەشاندن و ھندەک پرۆژە ژی ب نیڤەرۆ ماینە و پێداچوون بۆ ھندەکێن دی یا دھێتەکرن”.
ل دووماھیێ رێڤەبەرێ گشتی یێ وەبەرئینانێ ل پارێزگەھا ھەولێرێ دیار کر کو نوکە وەلاتی ب رێیا بانکێ پارەی بۆ پرۆژان د مەزێخن داکو مافێ وان بەرزە نەبیت.
ئه‌ڤرۆ نيوز:
پشتی رێکخستیا تیرۆرستی یا داعشێ تووشی شکەستنێن مەزن بووی ل عیراقێ و سووریێ و رۆژانە رووبەرێ ئاخا دبن کونترۆلا وێ ڤە ل وان ھەرو وەلاتان بەر ب کێمیێ دچیت و پشتی ئەنجامدانا چەندین کریارێن تیرۆرستی ل ئورۆپا ب رێیێن جوراوجور، رێکخستیا تیرۆرستی ھزر د ئەنجامدانا کریارێن تیرۆرستی ب چەکەکێ دی و ب شێوەکێ دی دکەت، رۆژناما (ده‌یلی بیست) یا ئەمریکی چەکێ نوو یێ رێکخستیا داعش یا تیرۆرستی دیاردکەت ئەو ژی ئاگربەردانە کو رێکخستیا ناڤبری ل بەرە ل دژی ئارمانجێن گرنگ ل چەندین وەلاتێن جیھانێ پەنایێ بۆ بدەت ل شوونا ھێرش و کریارێن خوە یێن تیرۆرستی یێن دی.
رۆژناما ناڤبری د بابەتەکێ خوە دا کو ژلایێ (میشێل دالی) ھاتیە نڤیسین و سایتێ الخلیج اونلاین بۆ زمانێ عەرەبی ڤەگوھاستیە، دبێژیت، ئاگربەردان چەکێ ب ترس یێ نوو یە کو داعش دێ بکار ئینیت و رێکخستیا ناڤبری د ھژمار پێنج یا گوڤارا خوە ( رومیە) ئەندامێن خوە ل ئورۆپا ھانداینە بۆ بکارئینانا ڤێ چەکێ نوو د ھێرشێن خوە دا ئەو ژی ئاگربەردانە.
رۆژناما ئەمریکی ئاماژێ ب وی بابەتێ د کوڤارا داعشێ دا بەلاڤبووی دکەت کو ھاندانا گۆرگێن بەرەللا (ئانکو ئەندامێن داعشێ ل ئورۆپا) دکەت بۆ بکارئینانا چەکێ ئاگربەردانێ وەکو باشترین چەک بۆ بەلاڤکرنا ترسێ و چەکەکێ کێم مەزاختنە و پێدڤی ب چەکی و بۆمبان ژی ناکەت و ھەتا کو پێدڤی ب بکارئینانا ترۆمبێلان ژی ناکەت وەکو چاوان ل ڤێ دووماھیێ ھاتینە بکارئینان د ھەر دو ھێرشێن فرەنسا و ئەلمانیا دا کو د ئەنجامێن وان ھێرشان دا چەندین وەلاتی ل نیس یا فرەنسی و بەرلین یا ئەلمانی ھاتینە کوشتن و داعشێ بەرپرسیاریا خوە ل دۆر وان ھەر دو ھێرشان دا راگەھاندی، بەلکو تنێ پێدڤی ب چەند کەرەستان ھەیە. دیسا داعش داخواز ژ ئەندامێن خوە کریە کو چەکێ ئاگربەردانێ ل پشت گوە نەھاڤێژن، چونکی ئەو چەکە دبیتە ئەگەرێ پەیداکرنا زیانێن ئابووری یێن مەزن ھەروەسا گەلەک یا ب ساناھی یە ژی کارێ ئاگربەردانێ بھێتە دوبارەکرن ژی بێی کو ئێک کەس ژی بھێتە کوشتن.
ئەڤرۆ نیوز، زنار تۆڤی:
دۆھی رۆژا سێشەمبی 10ى كانوونا دويێ2017 فومیۆ کیشیدا وەزیرێ دولەتێ بۆ کاروبارێن دەرڤە یێ ژاپۆنێ گەھشتە ھەولێرێ و د وێ سەرەدانێ دا و ل شەڤا بوری فۆمیۆ کیشیدا ل گەل سەرۆکێ حوکمەتا ھەرێمێ کومبۆ،ھەروەسا بریارە ئەڤرۆ رۆژا چارشەمبی ب بەرھەڤبۆنا سەرۆکێ حوکمەتا ھەرێما کوردستانێ و کۆنسلخانەیێن وەلاتێن بیانی و د مەراسیمەکێ دا کۆنسلخانەیا وەلاتێ ژاپۆنێ ل ھەولێرێ بھێتە ڤەکرن.
ئه‌ڤرۆ نیوز:
جڤاتێن پارێزگه‌هێن هه‌رێمێ، پشتگیریا پڕۆژێ ئه‌نجومه‌نێ پارێزگه‌ها هه‌ولێرێ كر و ڕازیبوون نیشا دا كو حكوومه‌ت مووچێن پاشخستى یێن فه‌رمانبه‌ران بكه‌ته چه‌كێ پاره‌ی.
ل گۆر وى پڕۆژه‌ی مووچه‌خۆر دشێن ب چه‌كێ بانكی، پارێ خوه یێن ئاڤ و كاره‌بێ و سزایێن هاتنوچوونێ ژ مووچێن پاشخستى یێن خوه بده‌ن، لێ نابیت چه‌كێ پاره‌ی بۆ مامه‌لێن كه‌رتێ تایبه‌ت بهێته بكارئینان.
د پڕۆژێ ئه‌نجوومه‌نێن پارێزگه‌هێن هه‌رێمێ دا هاتیه، پێدڤیه حكوومه‌ت كار بكه‌ت كو فه‌رمانبه‌ران حسابا بانكی یا تایبه‌تا خوه هه‌بیت و ئه‌و پارێ پاشخستیێ مووچه‌خۆران دیار بكه‌ت، داكو هه‌مبه‌ری وى پارێ پاشخستى پارێ خزمه‌تگوزاریێن حكوومه‌تێ بده‌ن، وه‌كو پارێ خزمه‌تگوزاریێن كاره‌بێ و ئاڤێ خزمه‌تگوزاریێن دی.
پڕۆژێ ئه‌نجومه‌نێن پارێزگه‌هێن هه‌رێمێ ژ پازده خالان پێك هاتیه و چه‌ندین مه‌رج داناینه كو پێدڤیه ل گۆر وى شێوازى و مه‌رجان كار پێ بهێته كرن، بۆ نموونه ئه‌و چه‌كێ بانكى پێدڤیه ل سه‌ر ناڤێ فه‌رمانبه‌ری ب خوه بیت نه‌كو بێخیته سه‌ر ناڤێ كه‌سه‌كێ دی و ئه‌ڤ پرۆژه پێدڤى ب رازیبوونا جڤاتا وه‌زیرانه كو ئه‌نجومه‌نێن پارێزگه‌هان ئاراسته كریه.
ئه‌ڤرۆ نیوز:
كوسره‌ت ره‌سول عه‌لى جێگرێ سكرتێرێ گشتى یێ ئێكه‌تیا نیشتمانیا كوردستانێ مه‌ترسیێن سه‌ر هه‌رێما كوردستانێ ب جدى دبینیت و بۆ زالبوون ل سه‌ر وان مه‌ترسیان ب پێدڤى دزانیت ب زووترین ده‌م كۆمبوونه‌كا كوپیتكا لایه‌نێن سیاسى یێن هه‌رێمێ ب گشتى و ب تایبه‌ت لایه‌نێن سه‌ره‌كى.
د پشكه‌كا ده‌ستپێشخه‌ریێ دا كوسره‌ت ره‌سول داخواز دكه‌ت كۆمبوونا كۆپیتكا لایه‌نێن سیاسى بهێته رێكخستن بۆ دروستكرنا چه‌ند ده‌سته‌یه‌كان ژ ئه‌ندامێن مه‌كته‌با سیاسى ب مه‌ره‌ما چاره‌كرنا كێشان.
كوسره‌ت ره‌سول دیاركر كو ئه‌ڤ ره‌وشه دێ كارتێكرنێ ل سه‌ر بێ هیڤیبوون و كێمكرنا باوه‌ریا جه‌ماوه‌رى ب سازیێن شه‌رعى یێن هه‌رێمێ و رۆلێ حزبان دروست كه‌ت، له‌وما ئه‌ركێ نه‌ته‌وه‌یى و ئه‌خلاقى یێ هه‌موو لایه‌نانه ب تایبه‌ت ئه‌و لایه‌نێن ده‌ستهه‌لات كو ب گیانێ به‌رپرسیارانه خوه بۆ قوناغه‌كا نوو به‌رهه‌ڤ بكه‌ن.
كوسره‌ل ره‌سول ئاماژه ب وێ یه‌كێ كریه كو دڤێت پرسێن سه‌رۆكایه‌تیا هه‌رێمێ و پرسیا په‌رله‌مان و حوكمه‌تێ و پرسا موچه و ژیارا خه‌لكى و خزمه‌تگوزاریان بهێته چاره‌كرن.
نيشاندان