ئه‌ڤرۆ نيوز:
پەیڤدارێ عەشیرەتێن عەرەبان ل دەشتا مووسل دیارکر، ئەڤرۆ 7/2/2017 دێ مەراسمێن دەرچوونا لیوا جزیرە یا تایبەت ب عەرەبان ڤە سەر وەزارەتا پێشمەرگەی کوردستانێ ڤە ل قەزا شێخان ھێنە گێران دێ بەرەڤانیی ژ دەڤەرا رەبیعە وزومار و عایزیە کەن.
موزاحم ئەحمەد ئاخڤتنکەری عەشیرەتێن عەرەبێن دەشتا مووسلێ بۆ ئەڤرۆ دیارکر لیوا جزیرە بۆ عەرەبان ھاتیە پێک ئێنان سەر ب وەزارەتا پێشمەرگەی حکومەتا ھەرێما کوردستانێ دێ ھەموو بریار و رێنما وراسپاران ژ ھەرێما کوردستانێ وەرگرتن ئەڤ ھەر 200 کەسین عەرەب یێن ھاتینە مەشقدان دێ ل سەر کەرتی زومار و رەبیعە و عایزیە دێ پاراستنا ڤان دەڤەران کەن.
خۆیا ژی کر سەربازگەە پێشمەرگەی ھێزا زێرەڤانیی ل دەڤەرا خنس سەر قەزا شیخان ڤە ئەڤ 200 کەسێن عەرەب ھاتینە مەشقدان دێ سوبەھێ رێ و رەسمێن دەرچوونا وان دەمژمیر 9 سپێدی دەست پێ کەن دێ چەندین چالاکێن سەربازی ئەنجامدەن.
پەیڤدارێ عەشیرەتێن عەرەبێن دەشتا مووسلێ گۆت ئەڤە قۆناغا ئێکی دەرچوون ، ل بەرە چەند قوناغێن دی ژێ بھێنە مەشقدان ھەموو خوەبەخشن دێ سەر ب وەزارەتا پێشمەرگەی ھەرێما کوردستانێ ڤەبن.
موزاحم ئەحمەد زێدەتر گۆت ئەڤ ھەژمارا کەنجێن عەرەب یێن ب شیوەیەکێ باش ل سەر دەستێن شارەزایێن سەربازی ل ھەرێما کوردستانێ بتایبەتی ژی وەزارەتا پێشمەرگەی کوردستانێ ھاتینە مەشقدان ل سەر جۆرێن چەک دێ پاراستنا دەڤەری رابن.

ئه‌ڤرۆ نيوز:

ھێزێن عیراقی یێن پێکھاتی ژ لەشکری و پۆلیسێن فیدرالی و ب پشتەڤانیا حەشدا شەعبی و پشتەڤانیا ئەسمانی یا فرۆکێن ھەڤپەیمانیا نێڤدەولەتی، یێ بەرھەڤیان بۆ ئازادکرنا لایێ راستێ یێ مووسلێ دکەن، چەندین ناڤەند و شرۆڤەکارێن لەشکری و سیاسی دبێژن ئەو شەڕە دێ گەلەک دژوارتر و ب زەحمەتر بیت ژ شەڕێ لایێ چەپی یێ باژێری، ژ بەر کو پتریا سەرکردە و چەکدارێن داعشێ یێن چووینە وی لایێ مووسلێ، زێدەباری ئاستەنگا ھەبوونا 750 ھزار وەلاتیێن سڤیل.
ل دووڤ ئامارێن نە فەرمی، 100 ھزار سەربازێن عیراقی، ھێزێن پێشمەرگێن کوردی، میلیشیێن حەشدا شەعبی یێن شیعی پشکداری د شەڕێ ئازادکرنا مووسلێ و دەوروبەرێن وێ دا کریە کو دھێتە ھژمارتن مەزنترین ئۆپەراسیۆنا لەشکری ل عیراقێ پشتی 2003ێ، دیسا پێنج ھەتا شەش ھزار چەکدارێن داعشێ دمووسلێ دا بوون کو ل دووڤ ئامارێن لەشکرێ عیراقێ 3300 ژوان چەکداران ل شەڕێ لایێ چەپێ یێن ھاتینە کوشتن.
ئەفسەرەکێ عیراقی ب پلەیا سەرھەنگ بۆ الخلیج اونلاین دبێژیت، ئازادکرنا لایێ راستی پێدڤی ب پلانێن نوو و ھەڤکاریەکا مەزن ب تایبەتی ژلایێ ھەوالگیری ڤە یا ھەی، چونکی دێ شەڕێ ب دووماھی ئینانا داعشێ بیت ل عیراقێ و داعش دێ ھەموو ھێز و پلانێن خوە د وی شەڕی دا بکارئینیت، نە ژ بۆ بدەستڤەئینانا سەرکەفتنێ، بەلکو بۆ گەھاندنا زیانێن مەزن ب لەشکرێ عیراقێ، ھەموو رێ ژی ل داعشێ یێن ھاتینە گرتن و چو رێیێن رەڤینێ نینن و تنێ دو بژاردە یێن ل بەردەم چەکدارێن داعشێ ئەوژی خوە خوە تەسلیمکرن، یان ژی شەڕکرن ھەتا مرنێ.
عەبدوللا ئیبراھیم، ئێک ژ سەرکردێن حەشدا نیشتمانی ب سەرۆکاتیا ئەسیل نوجێفی بۆ ھەمان سایت دبێژیت، شەڕێ لایێ راستێ یێ مووسلێ پێدڤی ب ھێزێن نێڤدەولەتی یا ھەی، ژبەر زەحمەتیا شەڕی بۆ ھێزێن عیراقی دناڤ تاخێن وی دا، زێدەباری ھەبوونا ھژمارەکا مەزن یا وەلاتیێن سڤیل و کولانێن تەنگ کو جھێ ھاتنوچوونا ترومبێلەکا بچووک ژی ناکەت کو ئەڤ چەندە ژی دێ بیتە ئەگەر ھێزێن عیراقی ب پیان ھاتنوچوونێ تێدا بکەن، یان ژی ئۆپەراسیۆنێن ھاتنا خوارێ ژ ھەلیکوپتەران ئەنجام بدەن، ددەمەکی دا داعشێ پتریا رێێن سەرەکی و جادێن لایێ راستی یێن مینڕێژکرین و ئەڤە دێ زیانێن مەزن گەھینیتە ھێزێن عیراقی.
ھەڤپەیمانیا نێڤدەولەتی دژی داعشێ ژی، سەرەرای شکەستن و زیانێن مەزن یێن ب داعشێ کەفتین، پێشبینیا وێ چەندێ دکەت کو شەڕێ لایێ راستێ دێ یێ دژوار بیت، عەقید جۆن دوریان پەیڤدارێ ھەڤپەیمانیا نێڤدەولەتی د پرێس کونفرانسەکی دا دیارکر کو شارەزایی و کاریگەریا سەرکردێن نوکە یێن داعشێ ل لایێ راستێ یا کێمترە ژ سەرکردێن ھاتینە کوشتن د شەڕێ چەند ھەیڤێن بۆری دا ل لایێ چەپێ یێ مووسلێ، بەلێ پێشبینی ژی کر کو شەڕێن دژوار د رۆژێن بھێت دا ل لایێ راستێ دێ ھێنە روودان.
ل دۆر داخۆیانیێن ھەڤدژ یێن فەرماندە و بەرپرسێن عیراقی سەبارەت ب ساناھیا ئازادکرنا لایێ راستێ و دەستنیشانکرنا دەمەکی دیارکری بۆ ئازادکرنا ھەموو باژێرێ مووسلێ، شارەزایێ لەشکریێ عیراقی نەجم عوبەیدی دبێژیت، ب زەحمەتە دەمەکێ دیارکری بۆ ئازادکرنا ھەموو باژێرێ بھێتە دانان، چونکی داعشێ پتریا چەکدار و ترومبێلێن خوە یێن مینڕێژکری یێن ڤەگوھاستینە لایێ راستێ بۆ بەرھنگاریا ھێزێن عیراقی، لەوما ھێرشا ل سەر وی لایی دێ یا بزەحمەت بیت، چونکی دێ داعش ھەموو شیان و ھێزا خوە بۆ بەرگریێ بکارئینیت و پتریا چەکدارێن وێ دێ کریارێن خوەکۆژی ئەنجامدەن.
ناڤبری پێشبینیێ دکەت کو شەڕێ لایێ راستێ بۆ ھێزێن عیراقی، دێ یێ دژوارتر و خویناویتر بیت ژ شەڕێ بۆری، ب تایبەتی ژی ب سەدان ھزار وەلاتیێن سڤیل یێن دبن دەستھەلاتا داعشێ دا ماین.