ئه‌ڤرۆ نيوز:
ئەندامەکا پەرلەمانێ عیراقێ ژ فراکسیۆنا پارتی دیموکراتی کوردستان بۆ رۆژناما ئەڤرۆ ئاشکرا کر کو شیان 22 ملیار دیناران بۆ ھەرێما کوردستانێ بزڤرینن، زێدەباری کو بزاڤ دھاتنەکرن ئەو پارە نەزڤریت.
نەجیبا نەجیب ئەنداما پەرلەمانێ عیراقێ ژ فراکسیۆنا پارتی دیموکراتی کوردستان گۆت “حوکمەتا عیراقێ ل گەل رێکخراوا جایکا یابانی قەرزەک بۆ کارەبا ھەولێرێ ھنارتبوون و 22 ملیار دینار مابوون و دڤیان بھێنە ڤەگوھاستن بۆ ئاڤ و سولینێن پارێزگەھا ھەلبجە و سالەک بوو حکومەتا عیراقێ کێشە بۆ پەیدا دکرن و حوکمەتا ھەرێما کوردستانێ چەندین بزاڤ کرن کو زوو ئەڤ کێشە بھێتە چارەسەرکرن، لێ وان کێشێن ئیداری و قانوونی پەیدا دکرن”.
ھەروەسا نەجیبا نەجیب گۆت “مە دووڤچوونا بابەتی کر و نڤسیارەک ھاتە بلندکرن و قووناغا بۆ قووناغ و د بۆجێ دا ھاتە بنەجھکرن، ھەکە ئەڤ دەسکەفتیە دا ژ دەستێن مە چیت و ب دیتنا من ئەگەر ئەڤە نەھاتباکرن دا رێکخراوا ناڤبری ئێدی قەر ل گەل ھەرێما کوردستانێ نەدکرن و خۆشبەختانە ھاتە پەسەندکرن و دێ ئاڤ و سولینێن ھەلەبجە ھێنە چێکرن”.
پەرلەمانتارا فراکسیۆنا پارتی دیموکراتی گۆت ژی “22 ملیار نە گەلەکن، لێ دێ شێن ھەتا رادەکێ باش بۆ ئاڤ و سولینێن ھەلبجە پێ چێ کەن”.
ئه‌ڤرۆ نيوز:
رێڤەبەرێ ناحیا سنوونێ دیار کر شاندەکێ ئەمریکی ل سنوونی گەنگەشێ ل سەر ڤەکێشانا پەکەکێ ژ شنگال و سنوونێ دکەت، ئیدارا شنگالێ ب ئاشکرایی گۆتە ئەمریکا ھەکە پەکەکە ل شنگال بمینیت ئاوارێن شنگال و سنوونێ نەشێن ڤەگەرنە سەر مالێن خوە.
نایف سەیدو، رێڤەبەرێ ناحیا سنوونێ دیار کر ئەمریکی بۆ ماوی دو دەمژمێران دگەل ئیدارا شنگال ل ناڤ ئاڤاھیی رێڤەبەریا ناحیا سنوونێ کۆم بووینە پرسیارا ھاتیە کرن، ئەرێ بۆچی خەلکێ سنوونێ و شنگال ناڤەگەرنە سەر مالێن خوە و گۆت “ئەمریکا ھەموو بەرسڤێن ئیدارا شنگال ل دەف خوە نڤیسین و چوون، ب ئاوایەکی ئیدارا شنگالێ ب ئاشکرایی گۆتە ئەمریکا ھەکە پەکەکە ل شنگال بمینیت خەلک ناڤەگەریتە دەڤەری و ئەمریکا پرسیار کر کا بۆجی بەغدا ھەڤکاریا شنگال و سنوونێ ناکەت مە ژی ب ئاشکرایی گۆتە ئەمریکا بەغدا ب ھیچ شیوەیەکێ ھەڤکاریا مە ناکەت ئەو ژی ئەمریکا ل دەڤ خوە نڤیسی”.
رێڤەبەرێ ناحیا سنوونێ گۆت ژی “ل رۆژا 12 كانوونا ئێكێ 2016 کۆنسۆلی گشتیێ ئەمریکا دگەل شاندەکێ ئەمریکی سەرەدانا سنوونێ کریە و نوکە ئەمریکی کار دکەن پەکەکە ل شنگال نەمینیت و دێ میکانزمەکێ دانن و ئەم چاڤەرێی دانانا میکانزما ئەمریکا دکەین بۆ دوورخستنا پەکەکێ ژ شنگالێ”.
ل کارەساتا شنگال 3ته‌باخا 2014 پەکەکە ھاتنە شنگالێ و خەلکێ شنگال نەوێرن ژبەر رەڤاندنا کچ و زارۆیێن خوە قەستا سەر مالێن خوە بکەن، ئیدارا شنگالێ ژی چەندین جاران داخواز کریە ھێزێن نەفەرمی شنگال چول بکەن و رێزێ ل ئیرادا خەلکێ شنگالێ گرتن.
ئەڤرۆ نيوز:
سەرۆکێ فراکسیۆنا پارتی دیموکراتی کوردستان ل پەرلەمانێ عیراقێ دبێژیت، بڕیارە ئەڤرۆ فڕکسیۆنێن کوردستانی ل گەل جڤاتا وەزیرێن کوردستانێ کومببن و قانوونا بودجا عیراقێ گەنگەشە بکەن، ب ھیڤیا ھەموو فراکسیۆن پشکداری وێ کومبونێ بکەن.
سەرۆکێ فڕاکسیۆنا پارتی خسرو گۆران بۆ مالپەرێ پارتی گۆت: کومبونا ناڤبری ل سەر داخوازیا حوکمەتا ھەرێما کوردستانێ یە، و رێ وکارێ کومبوونێ ھاتیە ئامادەکرن و ل سەر فڕاکسیۆنێن کوردستانێ ھاتیە بەلاڤکرن بوەَ ھندێ ھەموو ئامادەی وێ کومبوونێ ببن، ئەم وەکی فڕاکسیۆنا پارتی دێ ئامادەبین و ھەلبەت ژ سەرۆکێ فڕاکسیۆنا یەکگگرتوو من بھیستیە ھەولیستێ ھەموو فڕاکسیۆنان یێ ئەرێنی یە بۆ ڤێ جورە کومبوونێ، بەلێ کا دێ ھەموو ئامادەبن یان نە ئەو نەیا دیارە.
خسرۆ گۆران ھەروەسا گۆت: ھیڤیدارم ھەموو فڕاکسیۆن ئامادەیی وێ کومبوونێ ببن،چونکی ئەڤ ھەڤدیتنە نەیا سیاسی و و حزبی و پرۆپاگندا ھەلبژارتنا نینە، بەلکو بۆ چاڤروونکرنا مەیە دا بزانین حوکمەت دڤێت ھندەک داھاتی ب دەتە مە و سەرۆک و جێگرێ حوکمەتێ ژ دێ ئاخفتنا خوە ھەبیت.
بڕیارە ئەو کومبون ئەڤرۆ 11 پسێدێ ل رۆژا چارشەمبی ل باەرگایێ جڤاتا وەزیران ل ھەولێرا پایتەخەت بھێتە ئەنجامدان.
ئه‌ڤرۆ نيوز:
مه‌نسور بارزانى فه‌رماندێ له‌شكرێ تايبه‌تێ ئێك و گۆلان د كۆنگره‌كێ رۆژنامه‌ڤانى دا، د چارچۆڤێ پشكداريكرن د خوه‌نيشاندانێن پێشمه‌رگه‌ى ل دژى گۆتنێ سروه عه‌بدولواحد په‌رله‌مانتارا گۆڕان راگه‌هاند: “ئه‌م يێن هاتين پشته‌ڤانيێ ل سكالايا وه‌زاره‌تا پێشمه‌رگه‌ى بكه‌ين”.
گۆتژى: “من گه‌ف ل چو كه‌سان نه‌كرينه، ئه‌ز وێ رۆژێ كو ل گه‌ل خه‌لكى ژى دژى گۆتنێن ئه‌وێ په‌رله‌مانتارێ چوومه سه‌ر جادێ وه‌كو كورێ سه‌رۆكى نه‌چوويمه، به‌لكو وه‌كو پێشمه‌رگه‌يه‌كێ ئه‌ڤێ ئاخێ يێ چوويم و چو هه‌ره‌شه من نه‌كرينه، قانوون و دادگه‌هـ يێن هه‌ين و مه داخوازا ژ داخوازكه‌رێ گشتى كريه كو سكالايا قانوونى تۆمار بكه‌ت دا كو ئه‌و په‌رله‌مانتار بێت و پاكانا خوه بنه‌جهـ بكه‌ت، به‌لێ ژ به‌ر كو عه‌ره‌بيا وێ يا ب هێزه و كوردى يا ژبيركرى وه‌سان تێگه‌هشتيه كو من گه‌ف يێن كرين، هه‌كه من گه‌ف نه‌كرينه و ئه‌م هى نه‌بووينه ڤان كاران، به‌لكو دێ د رێيا قانوونێ دا سكالايێ تۆمار كه‌ين”.
مه‌نسور بارزانى ئه‌و چه‌ند ژى ئاشكه‌را كر كو ئه‌و كه‌سێن دبێژن پێشمه‌رگه ميليشيايه كرێگرتى نه، پێشمه‌رگه پارێزگارێن وه‌لاتى و رۆندكێن چاڤێن دايكێن شه‌هيدانه، خێزانێن شه‌هيدان تاجا سه‌رێ كورد و كوردستانێ نه”.
ئه‌ڤرۆ نيوز:
نێچيرڤان بارزانى سه‌رۆكێ حوكمه‌تا هه‌رێما كوردستانێ هوشداريا دوخێ ب رێڤه‌برنا مووسل ل پشتى رزگاركرنێ راگه‌هاند، رزگاركرنا ئه‌وى باژێرى گه‌له‌ك ژ پرۆسا ب رێڤه‌برنا پشتى رزگاركرنێ ب ساناهيتره.
ئه‌ڤ گۆتنێن نێچيرڤان بارزانى سه‌رۆكێ حوكمه‌تا هه‌رێما كوردستانێ د كۆنفرانسێ لێبۆرين و گه‌فا تيرۆرێ و پێكڤه ژيان كو ل باژێرێ هه‌ولێرێ هاتبوو ئه‌نجامدان هاتن.
ل ده‌سپێكا گۆتارا خوه ئاماژه ب پێكڤه‌ژيان و لێبۆرينێ كر كو ل هه‌رێما كوردستانێ د ناڤبه‌را پێكهاتان دا هه‌يه و پێدڤيه هه‌موو پێكڤه ئه‌وێ په‌ياما گرنگ بگه‌هينن كو رێ نه‌هێته دان ئاشتى بهێته تێكدان.
نێچيرڤان بارزانى هاته سه‌ر به‌حسا پرۆسا ئازادكرنا مووسل و د وێ ده‌ربارێ دا گۆت: “پێدڤيه رێكه‌فتنه‌كا سياسى بۆ قووناغا پشتى كونترۆلكرنا باژێرێ مووسل بهێته كرن كو هه‌موو لايه‌ن و پێكهاتێن جودا پشكدار بن تێدا، چونكو ئه‌و قووناغ ژ قووناغا رزگاركرنا باژێرى گرنگتره و ب مخابنى ڤه هه‌تا نوكه پێنگاڤ بۆ وێ نيه‌تێ نه‌هاتينه هاڤێتن”.
سه‌رۆكێ حوكمه‌تا هه‌رێما كوردستانێ ئاماژه ب وێ مه‌ترسيا مه‌زن كر يا كو ل شه‌رێ ده‌سته‌وياخا داعش مه‌ترسيدارتر و گۆت: “ئه‌و شه‌ر شه‌رێ هزرێن تارى يه كو به‌رى قاعيده ژى چه‌ندين گرۆپێن يترۆرستى يێن دى و پشتى وێ ژى داعش دروست كر، مه‌ره‌ما وێ هزرا تارى تێدانا ئه‌وێ پێكڤه‌ژيانێ و ئاشتايه‌تيێ يه كو د ناڤبه‌را پێكهاتان دا هه‌يه”.
سه‌رۆكێ حوكمه‌تێ داخواز ژ زه‌لامێن ئاينى كر كو پشكدار بن د بنبڕكرنا ئه‌وێ هزرا تارى و توندڕه‌وى ل سه‌ر هه‌موو ئاسته‌كى و به‌رسينگێ وێ بگرن دا كو پێكڤه ژيان و ئاشتايه‌تى د ناڤبه‌را پێكهاتێن ئاينى و نه‌ته‌وايه‌تى دا يا پاراستى بيت و رێ نه‌هێته دان كۆمه‌لگه‌هـ زێده‌تر ببيته قوربانى و گرنگى ب كه‌لتۆرێ پێكڤه‌ژيانێ بهێته دان.
ئه‌ڤرۆ نيوز:
پارێزگارێ دهۆكێ بلندبوونا رێژا بێكاريێ ل سنورێ پارێزگه‌ها دهۆكێ بۆ 20% راگه‌هاند كو ژ ئه‌گه‌رێ به‌رده‌واميا قه‌يرانا دارايى يه.
فه‌رهاد ئه‌مين، پارێزگارێ دهۆكێ ئه‌ڤرۆ رۆژا سێشه‌مبى د وركشۆپه‌كا تايبه‌ت دا راگه‌هاند كو پارێزگه‌هێ بۆ خوه گۆنجاندان ل گه‌ل قه‌يرانان و پرسا ئاواران ئاماژه ب وێ چه‌ندێ كر كو پێشوازى ل هه‌ر كه‌س و لايه‌نه‌كى دكه‌ن كو هاريكاريا ئاواران بكه‌ت، به‌لێ هه‌ر رێكخراو و لايه‌نه‌ك كو مه‌ره‌ما سياسى هه‌بيت رێ پێ ناهێته دان.
ئاماژه ب وێ چه‌ندێ ژى كر كو قه‌يرانا دارايى ژ ئه‌گه‌رێ بڕينا پشكا بۆدجا هه‌رێمێ ژ لايێ به‌غدا و هاتنه خوارا بهايێ په‌ترۆلێ و هاتنا ئاوارێن زۆر، بێكارى ل هه‌رێمێ به‌لاڤ بوويه.
ته‌كست ل سه‌ر وێ چه‌ندێ كر كو رێژا بێكاريێ ئه‌ڤ ساله ل دهۆكێ بۆ 20% بلند بوويه د ده‌مه‌كى دا كو ئه‌و رێژه ل سالا 2014ێ 9.4 بوويه و ل سالا 2015ێ 14.4% بوويه.
پارێزگارێ دهۆكێ ئاماژه ب وێ چه‌ندێ ژى كر كو نوكه ل پارێزگه‌ها دهۆكێ نێزيكى مليۆنه‌ك و 490 هزار كه‌سان هه‌نه و رێژا ناڤه‌ندى يا هه‌ر خێزانه‌كێ ژى حه‌فت كه‌سن.
پشكا پێشبينيان ل رێڤه‌به‌ريا گشتيا كه‌شناسى و بيڤه‌له‌رزێ ل هه‌رێما كوردستانێ د نڤيساره‌كێ دا كو دانه‌ك بۆ ئه‌ڤرۆ نيوز ره‌وانه كرينه راگه‌هاند كو ژ ئه‌نجامێ كووربوونا كارتێكرنا فشارێن نزمێن وه‌لاتێ توركيا كو بارسته هه‌وايه‌كێ سار ل گه‌ل دايه بۆ سه‌ر هه‌رێما كوردستانێ دهێته پێشبينيكرن ئه‌سمان ب ته‌مامى ئه‌ور بيت و باران و به‌فر دێ بارن و ل سه‌نته‌رێ قه‌زا دهۆك ژى ده‌ليڤا به‌فر بارينێ يا هه‌ى.
پشكا پێشبينيان دايه زايه زانين كو دێ ئاراستێ باى ژى دێ باكوورێ رۆژهه‌لات بيت ب ره‌نگه‌كى د ناڤبه‌را 5 هه‌تا 15كم دا و ماوێ ديتنێ ژى دێ د ناڤبه‌را 6 بۆ 7كم دا بيت، پلێن گه‌رمێ ژى دێ د ناڤبه‌را 1 بۆ 8 پلان دا بن.
نيشاندان