ئه‌ڤرۆ نيوز:
په‌رله‌مانتارێ هه‌ده‌پێ عوسمان بايده‌مير د كۆنگره‌كێ رۆژنامه‌ڤانى دا ل سلمێانيێ راگه‌هاند بۆ ماوێ 36 رۆژايه ده‌ميرتاش ل ژوورا تاكه‌كه‌سى يه د زيندانێ ڤه و هه‌تا نوكه پێنج هزار به‌رپرس و ئه‌ندامێن حزبا وان د زيندانێ دانه.
نووترين نووچه
- سەرۆك بارزانی دوپاتیێ ل ئێكڕێزییا كوردان ل سووریێ دكەت
- قونسلێ ئیتالیا بۆ نێچیرڤان بارزانی: گرنگییێ ب پەیوەندیێن خوە ل گەل هەرێما كوردستانێ د دەین
- ئارمانجا مە پێشئێخستنا ژێرخانەیا ئابوورییا هەرێما كوردستانێ یە
- دیدار و كۆمبوونێن سەرۆكێ حوكمەتا هەرێما كوردستانێ ل داڤۆس
- چاڤدێرێن سیاسی ژ چاوانیا برێڤەچوونا قۆناغا ئاشتیێ دلگرانن
- سەرۆك بارزانی و مەزلۆم عەبدی دوپاتیێ ل ئێكڕێزی و ئێكگرتنا كوردان دكەن
- نوونەرا حوكمەتا هەرێمێ ل واشنتۆن دێ پشكداریێ د رێوڕەسمێ دەستبكاربوونا ترەمپی دا كەت
- ئاسۆ كەریم: سەرۆك بارزانی فاكتەرێ سەرەكیێ ئێكبوونا گەلێ كوردە
- سەرۆكێ هەرێمێ و شاندەكێ ئەمریكا دوپاتیێ ل چارەسەركرنا كێشەیێن هەولێرێ و بەغدایێ ب گۆرەی دستووری دكەن
- سەرۆكاتییا هەرێما كوردستانێ پێشوازی ل ئاگربەستا غەزە كر
سهرهكى نوچێن گرنگ
كه‌شناسيا هه‌رێمێ: به‌فر دێ ل دهۆكێ باريت
ئه‌ڤرۆ نيوز:
رێڤه‌به‌ريا گشتيا كه‌شناسى و بيڤه‌له‌رزێ ل هه‌رێما كوردستانێ راگه‌هاند كو ل ڤێ حه‌فتيێ دێ به‌فر ل پارێزگه‌ها دهۆكێ باريت.
پشكا پێشبينيان ل رێڤه‌به‌ريا گشتى يا كه‌شناسى و بيڤه‌له‌رزێ ل هه‌رێما كوردستانێ د راگه‌هاندنه‌كێ دا كو دانه‌ك بۆ ئه‌ڤرۆ نيوز ره‌وانه كريه راگه‌هاند: هه‌رێما كوردستانێ دێ كه‌ڤيته بن كارتێكرنا پێله‌كا به‌فر و بارانان كو ژ ئه‌نجامێ درێژبوونا فشارێن نزمێن وه‌لاتيێ توركيا و هاتنا هه‌وايه‌كێ سارێ سێبيريايه و دێ ژ رۆژا سێشه‌مبى 13ى كانوونا ئێكێ 2016 ل دانێ پشتى نيڤرۆ ده‌سپێكه‌ت.
ل گه‌ل ده‌سپێكرنا ڤێ پێلێ ئه‌سمان دێ بۆ ئه‌وره‌كێ ناڤه‌ندى و پاشان بۆ ئه‌وره‌كێ ته‌مام هێته گوهۆڕين و باران ل ده‌ڤه‌رێن چيايى يێن پشكا باكوور و رۆژئاڤايێ هه‌رێمێ ده‌سپێكه‌ت.
پشكا پێشبينيان دايه زانين ژى كو ل گه‌ل زێده‌بوونا كارتێكرنێ ل رۆژێن چارشه‌مبى و پێنجشه‌مبى باران بارين دێ ل ده‌ڤه‌رێن جودا يێن هه‌رێما كوردستانێ باريت و ل هنده‌ك جهان ژى باران دێ ب دژوارى باريت و به‌فر بارين ژى دێ ل پتريا ده‌ڤه‌رێن چيايى باريت و ل سه‌نته‌رێ پارێزگه‌هێن دهۆك و سلێمانيێ ژى پلێن گه‌رمێ دێ گه‌له‌ك هێنه خوار و ئه‌گه‌رێ به‌فر بارينێ ل وێرێ ژى هه‌يه و له‌زاتيا هه‌وايى ژى دێ گه‌له‌ك زێده بيت.
پشكا پێشبينيان ل رێڤه‌به‌ريا گشتيا كه‌شناسى و بيڤه‌له‌له‌رزێ ل هه‌رێما كوردستانێ دايه زانين ژى كو كارتێكرنا ڤێ شه‌پۆلێ هه‌تا رۆژا ئه‌ينى دێ ل سه‌ر هه‌رێما كوردستانێ يا به‌ره‌ده‌وام بيت.
ب وێنه: دژى چوونا مالكى بۆ به‌سرا خوه‌نيشاندان دهێنه كرن
ئه‌ڤرۆ نيوز:
وه‌لاتيێن باژێرێ به‌سرا ل باشوورێ عيراقێ داخوازا ده‌ركرنا جێگرێ سه‌رۆك كۆمارێ عيراقێ ژ باژێرێ خوه دكه‌ن.
شه‌ڤا شه‌مبى 10ى كانوونا ئێكێ يا 2016ێ ب سه‌دان وه‌لاتيێن باژێرێ به‌را ل به‌ر ده‌رگه‌هێ پارێزگه‌ها به‌سرا خرڤه‌بوونه‌ك ئه‌نجام دا و دژاتيا خوه بۆ سه‌ره‌دانا نورى مالكى جێگرێ سه‌رۆك كۆمار و سه‌رۆك وه‌زيرێن به‌رێ يێن عيراقێ نيشان دا.
وه‌لاتيێن به‌سرا هيتاف ل دژى مالكى ددان و د گۆت: “مه‌لعون.. مه‌لعون نورى مالكى”، هه‌ڤده‌م به‌حس ل وێ چه‌ندێ دكر كو مالكى ب خرابترين ره‌نگ حوكمرانى ل عيراقێ كريه و بوويه ئه‌گه‌رێ داگيركرنا پشكه‌كا زۆر ژ ئاخا وێ ژ لايێ تيرۆرستێن داعش ڤه.
د خرڤه‌بوونه‌كێ دا، وه‌لاتيێن به‌سرا به‌رپرساتيا گه‌نده‌لى و هه‌ده‌ردانا سامانێ عيراقێ خسته ستوويێ مالكى و ژبلى وێ چه‌ندێ كو تاوانبار كر ب ئه‌گه‌رێ كوشتارگه‌ها سپايكه‌ر كو نێزيكى 1700 له‌شكرێ عيراقێ تێدا ب ده‌ستێ چه‌كدارێن داعش هاتنه كوشتن.
پێشتر وه‌لاتيێن باژێركێ ناسريه و ميسان ژى سه‌رۆك هه‌ڤپه‌يمانيا ده‌وله‌تا قانوونێ و حزبا ده‌عوه يا ئيسلامى نه‌چار كربوو كو باژێرێ وان ب جهـ بهێلن و ب به‌ر و پێلاڤان هێرش كربوو سه‌ر كاروانێ ترۆمبێلێن وى.
به‌سرا
ديمه‌نێن پێشتر يێن پارێزگه‌ها ناسيره و ميسان
قووناغا ئێكێ يا ئۆپه‌راسيۆنا مووسل ب دووماهى هات
ئه‌ڤرۆ نيوز:
هێزێن عيراقێ پشتى گه‌هشتينه رووبارێ “الخوصة” ل به‌رێ چه‌پێ يێ مووسل دووماهى ب قووناغا ئێكێ يا ئۆپه‌راسيۆنا خوه بۆ كونترۆلكرنا باژێرێ مووسل ئينا.
ليوا روكن سامى عارز فه‌رماندێ هێزێن بژاره يێن دژه تيرۆرێ بۆ ئاژانسا “أين” راگه‌هاند، هێزێن وان گه‌هشتنه رووبارێ خه‌وسه ل به‌رێ چه‌پێ يێ باژێرێ مووسل و دووماهى ب قووناغا ئێكێ يا ئۆپه‌راسيۆنێ ئينا.
هه‌ر د ڤێ ده‌ربارێ دا گۆت: “ب ئێكگه‌هشتنا هێزێن عيراقى پێنگاڤه‌كا گرنگه بۆ ئۆپه‌راسيۆنا له‌شكرى و ب له‌ز رزگاركرنا باژێرێ مووسل”.
هێزێن دژى تيرۆرا عيراقى هه‌ر ئه‌ڤرۆ چوونه ناڤ تاخێ فه‌لاحات ل لايێ چه‌پێ يێ باژێرێ مووسل.
ئۆپه‌راسيۆنا كونترۆلكرنا مووسل ل 17ى چريا ئێكێ 2016 ب فه‌رمانا فه‌رماندێ هێزێن چه‌كدارێن عيراقێ حه‌يده‌ر عه‌بادى و ب پشكداريا نێزيكى 100 هزار كه‌سان ژ هێزێن عيراقى و كوردستانى و تيمێن تايبه‌ت يێن ئه‌مريكا و پشته‌ڤانيا ئه‌سمانى يا هه‌ڤپه‌يمانان ده‌سپێكريه و هه‌تا نوكه زێده‌تر ژ نيڤا تاخێن لايێ چه‌پێ يێ مووسل كونترۆل كرينه.
ئه‌وى فه‌رماندێ له‌شكرى يێ دژى تيرۆرێ ئاماژه ب وێ چه‌ندێ ژى كريه كو هێزێن وان رۆژا شه‌مبى هه‌رچار تاخێن قادسيه يا ئێكێ، نمور، مه‌شارق و شه‌خچيه‌يان ل رۆژهه‌لاتێ مووسل كونترۆل كرينه و هه‌تا نوكه 33 تاخ كۆنترۆل كرينه.
- ل دووڤ ڤان گۆتنێن ئه‌ڤى فه‌رماندێ دژى تيرۆرێ ب تنێ 10 تاخ ل لايێ چه‌پێ يێ باژێرێ مووسل دمينن كو نه‌هاتبنه كونترۆل كرن.
وه‌زيرێ به‌ره‌ڤانيا ئه‌مريكا دێ هێته هه‌رێما كوردستانێ
ئه‌ڤرۆ نيوز:
وه‌زيرێ به‌ره‌ڤانيا ئه‌مريكا ب سه‌ره‌دانه‌كا چاڤه‌رێكرى گه‌هشته به‌غدا و بڕياره سه‌ره‌دانا هه‌ولێر ژى بكه‌ت و ل گه‌ل سه‌رۆكێ هه‌رێما كوردستانێ كۆم ببيت.
ئه‌ڤرۆ رۆژا ئێكشه‌مبى 11ى كانوونا دويێ 2016 وه‌زيرێ به‌ره‌ڤانيا ئه‌مريكا ب فرۆكه‌كا بارهه‌لگر يا له‌شكرى گه‌هشته به‌غدا و بڕياره ل گه‌ل حه‌يده‌ر عه‌بادى سه‌رۆك وه‌زيرێن عيراقێ كۆم ببيت.
ب گۆره‌ى ئه‌و پێزانينێن ل به‌ر ده‌ست، بڕياره سوبه‌هى وه‌زيرێ به‌ره‌ڤانيا ئه‌مريكا سه‌ره‌دانا هه‌رێما كوردستانێ بكه‌ت و ل گه‌ل مه‌سعود بارزانى سه‌رۆكێ هه‌رێما كوردستانێ كۆم ببيت.
سه‌ره‌دانا وه‌زيرێ به‌ره‌ڤانيا ئه‌مريكا د ده‌مه‌كى دايه كو نێزيكى دو هه‌يڤايه ئۆپه‌راسيۆنا رزگاركرنا مووسل ده‌سپێكريه و هێزێن پێشمه‌رگێ كوردستانێ و له‌شكرێ عيراقێ و حه‌شه‌د شه‌عبى پێشڤه‌چوونێن به‌رچاڤ ئه‌نجام داينه.
د هه‌ردو ته‌قينێن سته‌مبۆل دا نێزيكى 200 كه‌سان بوونه قوربانى
ئه‌ڤرۆ نيوز:
د كۆنگره‌كێ رۆژنامه‌ڤانى دا، سلێمان سويلۆ، وه‌زيرێ ناڤخۆ يێ توركيا راگه‌هاند، ژمارا قوربانيێن هه‌ردو ته‌قينێن شه‌ڤا بۆرى 11ى كانوونا ئێكێ 2016 ل سته‌مبۆل گه‌هشته 29 كوشتى و 166 برينداران، هه‌ڤده‌م جێگرێ سه‌رۆك وه‌زيرێن توركيا ژى ئاشكه‌را كر كو ماوێ ناڤبه‌را هه‌ردو ته‌قينان 45 چركه بووينه.
ته‌عمان كوترلمۆش جێگرێ سه‌رۆك وه‌زيران و ئاخفتنكه‌رێ فه‌رميێ حوكمه‌تا توركيا، د كۆنگره‌كێ رۆژنامه‌ڤانى يێ هه‌ڤپشك دا ب ئاماده‌بوونا ژماره‌كا وه‌زيرێن په‌يوه‌نديدار و واليێ سته‌مبۆلێ راگه‌هاند: “ته‌قينا ئێكێ ترۆمبێله‌كا مينرێژكرى بوو ل پاركا ماچكا ل به‌رامبه‌ر ياريگه‌ها ڤۆدافۆن ئارينا يا يانا وه‌رزشى يا بێشكتاش و يا دويێ ژى كه‌سه‌كێ خۆكۆژ بوو ل پاركا بێشته‌په ل سه‌نته‌رێ باژێرى خوه په‌قاند، ماوێ ناڤبه‌را هه‌ردو ته‌قينان ژى 45 چركه بووينه”.
سلێمان سۆيلۆ، وه‌زيرێ ناڤخۆ يێ توركيا ژى ته‌كست ل سه‌ر وێ چه‌ندێ كر كو ژمارا قوربانيان د زێده‌بوونێ دايه و 29 كه‌س هاتينه كوشتن كو دو ژ وان سڤيلن و 27 پۆليسن و 166 بريندار هه‌نه و 10 گۆمانلێكرى هاتينه ده‌سته‌سه‌ركرن.
كۆرتۆلموش راگه‌هاند ژى كو كريارا ئێكێ لاپه‌نگر و پشته‌ڤانێن هه‌ردو يانێن بێشكتاش و بۆرسا سپۆرت كربوونه ئارمانج، چونكو ل ده‌مێ ته‌مامبوونا ياريێ دا ب هزارا پشته‌ڤانێن ڤان هه‌ردو يانان رژيانه سه‌ر جادا، ته‌قين ژى ل ده‌مژمێر 22:29 ده‌قيقه و 22:30 ده‌قيقه رووداينه.
تۆرکیا دەڤەرا بەرواری بالا تۆپبارانکر
ئەڤرۆ نیوز،زنار تۆڤی:
ئەڤرۆ ل رۆژا شەمبی 10.12.2016 جارەکادی تۆپخانا سۆپایێ تورکیا دەڤەرا بەرواری بالا تۆپبارانکر.
ل ئێڤاریا رۆژا شەمبی و ل دەمژمێر 4:30 جارەکادی تۆپخانا سۆپایێ تورکی دەردورا گوندێ کێستە ل دەڤەرا بەرواری بالا بۆ ماوێ دەمژمێرەکێ تۆپبارانکر و ترس ل دەف خەلکێ گوندی پەیداکر و د ھەمان دەمدا ھەر ئەڤرۆ ئێڤاری تۆپخانا سۆپایێ تورکی گوندێ بارزانکا و نزدۆرێ ژی تۆپبارانکریە.
خشته‌كێ نوو يێ مووچان
ئه‌ڤرۆ نيوز:
وه‌زاره‌تا دارايى و ئابوورى راگه‌هاند كو دێ مووچێ ڤان وه‌زاره‌تان به‌لاڤ كه‌ت
١- رۆژا دووشەمبی و سێشەمبیێ رێکەفتی ١٢و١٣-١٢-٢٠١٦ێ، مووچەیێ مالباتێن شەهیدان و ئەنفالکریان و زیندانیێن سیاسی دێ هێته به‌لاڤكرن.
٢- رۆژا چارشەمبیێ رێکەفتی ١٤-١٢-٢٠١٦ێ مووچەیێ (کێم ئەندامان)یێن سەر ب وەزارەتا کاروبارێ کۆمەلایەتی دێ هێته به‌لاڤكرن.
٣- رۆژا پێنجشەمبیێ رێکەفتی ١٥-١٢-٢٠١٦ێ، مووچەیێ دیوانا وەزارەتا پێشمەرگە دگەل لیوایان دێ هێته به‌لاڤكرن.
ل چار پارێزگه‌هان خوه‌نيشاندان دژى گۆتنێن په‌رله‌مانتارا گۆڕان برێڤه‌چوون
ئه‌ڤرۆ نيوز:
ل چار پارێزگه‌هێن هه‌رێما كوردستانێ كه‌سوكارێن شه‌هيد و پێشمه‌رگه‌ى، چالاكڤانێن مه‌ده‌نى و په‌رله‌مانتار و خه‌لكێ ئاسايى دژى گۆتنێن په‌رله‌مانتاران گۆڕان چوونه سه‌ر جادێ و ئيدانه كرن.
به‌رى نيڤرۆيا ئه‌ڤرۆ رۆژا شه‌مبى 10ى كانوونا ئێكێ 2016 ل پارێزگه‌هێن هه‌ولێر، دهۆك، هه‌له‌بچه و كه‌ركووك ل دژى گۆتنێن سروه عه‌بدولواحد په‌رله‌مانتارا بزاڤا گۆڕان ل جڤاتا نوونه‌رێن عيراقێ خوه‌نيشاندان ب رێڤه‌چوو ژ ئه‌گه‌رێ گۆتنێن وێ كو “سڤكاتى ب پێشمه‌رگه‌ى و خێزانێن شه‌هيدان” كريه.
سروه عه‌بدولواحد په‌رله‌مانتارا بزاڤا گۆڕان ل جڤاتا نوونه‌رێن عيراقێ د چه‌ند رۆژێن بۆرى دا ل گه‌ل كه‌ناله‌كێ عه‌ره‌بى ئاخف و گۆتنێن وێ ده‌رباره‌ى پێشمه‌رگه‌ى و كه‌سوكارێن شه‌هيدان كاردانه‌ڤێن مه‌زن ڤێ كه‌فتن و ب دژووارى هاتنه ئيدانه‌كرن، وه‌زاره‌تا پێشمه‌رگه‌ى و هێزێن 70 و فه‌رماندا هێزێن پێشته‌ڤانيا 1 يا له‌شكرێ كوردستانێ گۆتنێن وێ ئيدانه كرن. فراكسيۆنا پارتى و دو په‌رله‌مانتارێن وێ ئامينا زكرى و دلشاد شه‌عبان و رێكخراوا خێرخوازى يا ئاشتيا نێڤده‌وله‌تى سكالا ل سه‌ر تۆمار كرينه.
ل دۆر راستيا گۆتنێن وێ ئه‌ڤرۆ نيوز ئه‌وێ ڤيديۆيێ به‌لاڤ دكه‌ت كو ب زمانێ عه‌ره‌بى يه و هه‌ر وه‌كو فراكسيۆنا پارتى ژى به‌حس لێ كرى ده‌رباره‌ى كه‌سوكارێن شه‌هيدان دبێژيت: “پشكه‌ك ژ وان ژنێن زه‌لامێن وان شه‌هيد بووين، ژ به‌ر هه‌ژاريێ نه‌چارن لاشێ خوه ب فرۆشن”.
هه‌ر ديسا به‌حس ل توندوتيژيا پێشمه‌رگه‌ى دكه‌ت ل سنورێ كه‌ركووك ل دژى ئه‌و پێكهاتێن نه‌يێن كورد و دبێژيت: “قيادا سياسى يا كوردى گوندێن عه‌ره‌ب تێكداينه و خه‌لك ته‌هجير كريه و دڤێت حوكمه‌تا ئتيحادى محاسبا حوكمه‌تا هه‌رێمێ بكه‌ت”.
دبێژيت ژى: “نابيت حوكمه‌تا ئتيحادى پارێ پێشمه‌رگه‌ى بهنێريت بۆ حوكمه‌تا هه‌رێمێ، دڤێت پێشمه‌رگه بچيت ژ به‌غدا وه‌ربگريت، هه‌كه نه ل كوردستانێ دێ هێته دزين”.
به‌لێ ئه‌و په‌رله‌مانتار د روونكرنه‌كێ دا كو ل رۆژا 8ى كانوونا ئێكێ 2016ێ دبێژيت: “من د به‌رنامه‌كێ تله‌ڤزيۆنى دا، به‌حسێ ژنا پێشمه‌رگه‌ى كريه و من گۆتيه كو نه‌چارن ژ به‌ر هه‌ژاريێ لاشێ خوه بفرۆشن… د ده‌مه‌كى دا ئه‌ڤان من گۆتى به‌ره‌ڤانيه ژ شكويا پێشمه‌رگه‌ى و خێزانێن پێشمه‌رگه‌ى و ئه‌وان ب ئه‌نقه‌ست ب وى ره‌نگى تێكدايه و وه‌رگرتيه”.
هه‌تا نوكه 27 تاخێن مووسل هاتينه رزگاركرن
ئه‌ڤرۆ نيوز:
فه‌رمانده‌يێ پرۆسا له‌شكرى يا “قادمون يا نه‌ينه‌وا” ئاشكه‌را كر كو هه‌تا نوكه 27 تاخێن رۆژهه‌لاتێ باژێرێ مووسل پاقژكرينه و پێشڤه‌چوونێن هێزێن عيراقى د به‌رده‌وامن.
د به‌ياننامه‌كێ دا كو ل مالپه‌رێ كه‌نالێ عيراقيه يێ حكومى ئه‌ڤرۆ رۆژا شه‌مبى به‌لاڤ بوويه، راگه‌هانديه كو فه‌رمانده‌يا پرۆسا له‌شكرى يا ئۆپه‌راسيۆنا مووسل ئاماژه ب وێ چه‌ندێ دايه كو د به‌رده‌واميا هه‌وا هێزێن عيراقى بۆ ئازادكرنا تاخێن باژێرى.
ب گۆره‌ى ئامارا وێ فه‌رمانده‌يێ، هێزێن عيراقى شياينه هه‌تا نوكه 27 تاخان ل رۆژهه‌لاتێ باژێرێ مووسل ب ته‌مامى ژ داعش پاقژ بكه‌ن.
نيشاندان
WP Facebook Auto Publish Powered By : XYZScripts.com