ئه‌ڤرۆ نيوز:
مه‌نسور بارزانى فه‌رماندێ له‌شكرێ تايبه‌تێ ئێك و گۆلان د كۆنگره‌كێ رۆژنامه‌ڤانى دا، د چارچۆڤێ پشكداريكرن د خوه‌نيشاندانێن پێشمه‌رگه‌ى ل دژى گۆتنێ سروه عه‌بدولواحد په‌رله‌مانتارا گۆڕان راگه‌هاند: “ئه‌م يێن هاتين پشته‌ڤانيێ ل سكالايا وه‌زاره‌تا پێشمه‌رگه‌ى بكه‌ين”.
گۆتژى: “من گه‌ف ل چو كه‌سان نه‌كرينه، ئه‌ز وێ رۆژێ كو ل گه‌ل خه‌لكى ژى دژى گۆتنێن ئه‌وێ په‌رله‌مانتارێ چوومه سه‌ر جادێ وه‌كو كورێ سه‌رۆكى نه‌چوويمه، به‌لكو وه‌كو پێشمه‌رگه‌يه‌كێ ئه‌ڤێ ئاخێ يێ چوويم و چو هه‌ره‌شه من نه‌كرينه، قانوون و دادگه‌هـ يێن هه‌ين و مه داخوازا ژ داخوازكه‌رێ گشتى كريه كو سكالايا قانوونى تۆمار بكه‌ت دا كو ئه‌و په‌رله‌مانتار بێت و پاكانا خوه بنه‌جهـ بكه‌ت، به‌لێ ژ به‌ر كو عه‌ره‌بيا وێ يا ب هێزه و كوردى يا ژبيركرى وه‌سان تێگه‌هشتيه كو من گه‌ف يێن كرين، هه‌كه من گه‌ف نه‌كرينه و ئه‌م هى نه‌بووينه ڤان كاران، به‌لكو دێ د رێيا قانوونێ دا سكالايێ تۆمار كه‌ين”.
مه‌نسور بارزانى ئه‌و چه‌ند ژى ئاشكه‌را كر كو ئه‌و كه‌سێن دبێژن پێشمه‌رگه ميليشيايه كرێگرتى نه، پێشمه‌رگه پارێزگارێن وه‌لاتى و رۆندكێن چاڤێن دايكێن شه‌هيدانه، خێزانێن شه‌هيدان تاجا سه‌رێ كورد و كوردستانێ نه”.
ئه‌ڤرۆ نيوز:
نێچيرڤان بارزانى سه‌رۆكێ حوكمه‌تا هه‌رێما كوردستانێ هوشداريا دوخێ ب رێڤه‌برنا مووسل ل پشتى رزگاركرنێ راگه‌هاند، رزگاركرنا ئه‌وى باژێرى گه‌له‌ك ژ پرۆسا ب رێڤه‌برنا پشتى رزگاركرنێ ب ساناهيتره.
ئه‌ڤ گۆتنێن نێچيرڤان بارزانى سه‌رۆكێ حوكمه‌تا هه‌رێما كوردستانێ د كۆنفرانسێ لێبۆرين و گه‌فا تيرۆرێ و پێكڤه ژيان كو ل باژێرێ هه‌ولێرێ هاتبوو ئه‌نجامدان هاتن.
ل ده‌سپێكا گۆتارا خوه ئاماژه ب پێكڤه‌ژيان و لێبۆرينێ كر كو ل هه‌رێما كوردستانێ د ناڤبه‌را پێكهاتان دا هه‌يه و پێدڤيه هه‌موو پێكڤه ئه‌وێ په‌ياما گرنگ بگه‌هينن كو رێ نه‌هێته دان ئاشتى بهێته تێكدان.
نێچيرڤان بارزانى هاته سه‌ر به‌حسا پرۆسا ئازادكرنا مووسل و د وێ ده‌ربارێ دا گۆت: “پێدڤيه رێكه‌فتنه‌كا سياسى بۆ قووناغا پشتى كونترۆلكرنا باژێرێ مووسل بهێته كرن كو هه‌موو لايه‌ن و پێكهاتێن جودا پشكدار بن تێدا، چونكو ئه‌و قووناغ ژ قووناغا رزگاركرنا باژێرى گرنگتره و ب مخابنى ڤه هه‌تا نوكه پێنگاڤ بۆ وێ نيه‌تێ نه‌هاتينه هاڤێتن”.
سه‌رۆكێ حوكمه‌تا هه‌رێما كوردستانێ ئاماژه ب وێ مه‌ترسيا مه‌زن كر يا كو ل شه‌رێ ده‌سته‌وياخا داعش مه‌ترسيدارتر و گۆت: “ئه‌و شه‌ر شه‌رێ هزرێن تارى يه كو به‌رى قاعيده ژى چه‌ندين گرۆپێن يترۆرستى يێن دى و پشتى وێ ژى داعش دروست كر، مه‌ره‌ما وێ هزرا تارى تێدانا ئه‌وێ پێكڤه‌ژيانێ و ئاشتايه‌تيێ يه كو د ناڤبه‌را پێكهاتان دا هه‌يه”.
سه‌رۆكێ حوكمه‌تێ داخواز ژ زه‌لامێن ئاينى كر كو پشكدار بن د بنبڕكرنا ئه‌وێ هزرا تارى و توندڕه‌وى ل سه‌ر هه‌موو ئاسته‌كى و به‌رسينگێ وێ بگرن دا كو پێكڤه ژيان و ئاشتايه‌تى د ناڤبه‌را پێكهاتێن ئاينى و نه‌ته‌وايه‌تى دا يا پاراستى بيت و رێ نه‌هێته دان كۆمه‌لگه‌هـ زێده‌تر ببيته قوربانى و گرنگى ب كه‌لتۆرێ پێكڤه‌ژيانێ بهێته دان.
ئه‌ڤرۆ نيوز:
پارێزگارێ دهۆكێ بلندبوونا رێژا بێكاريێ ل سنورێ پارێزگه‌ها دهۆكێ بۆ 20% راگه‌هاند كو ژ ئه‌گه‌رێ به‌رده‌واميا قه‌يرانا دارايى يه.
فه‌رهاد ئه‌مين، پارێزگارێ دهۆكێ ئه‌ڤرۆ رۆژا سێشه‌مبى د وركشۆپه‌كا تايبه‌ت دا راگه‌هاند كو پارێزگه‌هێ بۆ خوه گۆنجاندان ل گه‌ل قه‌يرانان و پرسا ئاواران ئاماژه ب وێ چه‌ندێ كر كو پێشوازى ل هه‌ر كه‌س و لايه‌نه‌كى دكه‌ن كو هاريكاريا ئاواران بكه‌ت، به‌لێ هه‌ر رێكخراو و لايه‌نه‌ك كو مه‌ره‌ما سياسى هه‌بيت رێ پێ ناهێته دان.
ئاماژه ب وێ چه‌ندێ ژى كر كو قه‌يرانا دارايى ژ ئه‌گه‌رێ بڕينا پشكا بۆدجا هه‌رێمێ ژ لايێ به‌غدا و هاتنه خوارا بهايێ په‌ترۆلێ و هاتنا ئاوارێن زۆر، بێكارى ل هه‌رێمێ به‌لاڤ بوويه.
ته‌كست ل سه‌ر وێ چه‌ندێ كر كو رێژا بێكاريێ ئه‌ڤ ساله ل دهۆكێ بۆ 20% بلند بوويه د ده‌مه‌كى دا كو ئه‌و رێژه ل سالا 2014ێ 9.4 بوويه و ل سالا 2015ێ 14.4% بوويه.
پارێزگارێ دهۆكێ ئاماژه ب وێ چه‌ندێ ژى كر كو نوكه ل پارێزگه‌ها دهۆكێ نێزيكى مليۆنه‌ك و 490 هزار كه‌سان هه‌نه و رێژا ناڤه‌ندى يا هه‌ر خێزانه‌كێ ژى حه‌فت كه‌سن.
پشكا پێشبينيان ل رێڤه‌به‌ريا گشتيا كه‌شناسى و بيڤه‌له‌رزێ ل هه‌رێما كوردستانێ د نڤيساره‌كێ دا كو دانه‌ك بۆ ئه‌ڤرۆ نيوز ره‌وانه كرينه راگه‌هاند كو ژ ئه‌نجامێ كووربوونا كارتێكرنا فشارێن نزمێن وه‌لاتێ توركيا كو بارسته هه‌وايه‌كێ سار ل گه‌ل دايه بۆ سه‌ر هه‌رێما كوردستانێ دهێته پێشبينيكرن ئه‌سمان ب ته‌مامى ئه‌ور بيت و باران و به‌فر دێ بارن و ل سه‌نته‌رێ قه‌زا دهۆك ژى ده‌ليڤا به‌فر بارينێ يا هه‌ى.
پشكا پێشبينيان دايه زايه زانين كو دێ ئاراستێ باى ژى دێ باكوورێ رۆژهه‌لات بيت ب ره‌نگه‌كى د ناڤبه‌را 5 هه‌تا 15كم دا و ماوێ ديتنێ ژى دێ د ناڤبه‌را 6 بۆ 7كم دا بيت، پلێن گه‌رمێ ژى دێ د ناڤبه‌را 1 بۆ 8 پلان دا بن.
ئەڤرۆ نيوز:
ئەندامەکێ پەرلەمانێ کوردستانێ ئاشکرا کر کو دبیت رێکخراوا ئۆپێک دانوستاندنان ل گەل ھەرێما کوردستانێ بکەت، چونکی ھەرێمەک رۆژانە پتر ژ 600 ھزار بەرمیلان بفرۆشیت نەکێمە، لێ بەرامبەر دڤێت ھەرێما کوردستانێ ژی خوە بەرھەڤی ئەڤێ چەندێ بکەت.
عەلی ھالو ئەندامێ لیژنا پیشەسازی و سۆتەمەنیێ ل پەرلەمانێ کوردستانێ دیار کر کو کۆمبوونێن رێکخراوا ئۆپێک ل سەر کێمکرنا رێژا بەرھەمئینانا پەترۆلێ و ھەکە ئۆپێک رۆژانە ملیۆنەک 200 ھزار بەرمیلان کێم بکەت دێ کارتێکرنا ئەرێنی بیت ل سەر ھەرێما کوردستانێ و ھەر دەسپێکێ چەند دولارەک چوونە سەر بھایێ بەرمیلا پەترۆلێ دێ داھاتێ ھەرێما کوردستانێ ژی زێدەتر بیت و گۆت: ھەکە ئۆپێک بەرھەڤ بیت دانوستاندنان ل گەل ھەرێما کوردستانێ بکەت وی دەمی کوردستان دێ بیتە خودان سەنگ و رۆل و گرنگیەکا مەزنتر ھەبیت و ھەکە دانوستاندنێ نەکەت ژی دێ ل دووڤ پێدڤیێن خوە پەترۆلێ ھنێریتە دەرڤە”.
ئەندامێ لیژنا پیشەسازی و سۆتەمەنیێ ل پەرلەمانێ کوردستانێ دیار کر ژی کو ھەتا نوکە دیار نینە کو دێ ئۆپێک دانوستاندنێ کەت یان نە، لێ ھەرێمەک رۆژانە پتر ژ 600 ھزار بەرمیلان فرێکەتە دەرڤە وی دەمی دڤێت ھەرێما کوردستانێ ژی ئەو ھزر ھەبیت ل گەل ئۆپێکێ بکەڤیتە دانوستاندنێ.
ھەروەسا عەلی ھالوی گۆت: ب تنێ ئەندامێن ئۆپێکێ دێ بەرھەمێ خوە کێم کەن و عیراق ئەندامە و ھەرێما کوردستانێ پشکەکە ژ عیراقێ، ئێدی ئەڤە دێ مینت ل سەر دانوستاندنێن ھەرێما کوردستانێ ل گەل عیراقێ یان ئۆپێک شێوازەکێ دی ل گەل ھەرێما کوردستانێ بکەت و ژ بەر راوستاندنا پەرلەمانێ کوردستانێ نەشێین چاڤدێریا کاروبارێن وەزارەتێ بکەین و ئەم نزانین رۆژانە چەند پەترۆل دچیتە دەرڤە.
عەلی ھالو ئەندامێ لیژنا پیشەسازی و سۆتەمەنیێ ل پەرلەمانێ کوردستانێ خویا ژی کر ھەکە ھەرێما کوردستانێ ب دروستی و شەفاف ل گەل خەلکێ کوردستانێ خوە ژ قەیرانا دارایی و ئابووری رزگار بکەت گەلەک باشترە ژ شێوازێ ھنارتنا سەربخوە و گۆت: خەلک بێ تاقەت بوویە و ئێدی تەحمولا ڤێ رەوشا ئابووری یا گران ناکەن، لەوما بەحسێ عیراقێ دھێتەکرن، چونکی سەربۆرا مە یا 90 سالی ل گەل عیراقێ دیارە و رۆژ بۆ رۆژێ خرابترە و عیراق وێ رێکێ نادەت وەلاتێن پلە ئێک بین و سەردەریەکا دیموکراسی ل گەل ھەرێما کوردستانێ ناھێتەکرن.
ژ ئالیێ خوەڤە نەجیبا نەجیب ئەنداما لیژنا ئابووری ل پەرلەمانێ عیراقێ گۆت: ھەموو وەلاتێن ئەندام د رێکخراوا ئۆپێکێ دا خواستیە رێژا فرۆتنا پەترۆلێ کێم بکەت، داکو بھایێ پەترۆلێ گران بیت و ئەڤە پێنگاڤەکا باشە و چەندین جاران کۆم بووینە، لێ نە گەھشت بوونە چ ئەنجامدانان، عیراق ل گەل کوردستانێ رۆژانە یا نێزیکی 4 ملیۆن بەرمیلان بەرھەم دئینیت و ھەکە عیراق بێژیتە ھەرێما کوردستانێ کێم بکە، باوەرنا کەم پێگیریێ پێ بکەت، چونکی چەند کێم بکەت نەشێت مووچێن فەرمانبەرێن خوە بدەت، دڤێت حوکمەتا عیراقێ قەربوویا ھەرێما کوردستانێ بکەت ب دانا مووچان، چونکی ھەکە نوکە عیراق سێ ملیۆن و 700 بەرمیلێن پەترۆلێ دەربکەت و بھا زێدە ببیت دێ شێت پێگیر بیت ب بریارێ.
نەجیبا نەجیب ئەو ژی گۆت: بریارا کێمکرنێ بریارەکا د جھێ خوە دایە بۆ وەلاتێن ئەندام ل ئۆپێکێ و نە ئەندام ژی و بەرژوەندیا ھەموویان دایە، پێشبینی دھێـتەکرن بەرمیل بگەھیتە 60 بۆ 65 دولاران و ئەگەر کێم و زێدە ببیت دێ مینتە ل سەر خواست و داخوازیا ل سەر پەترۆلێ.
ئه‌ڤرۆ نيوز:
رۆژناما ئیندێپێندێنت یا بریتانی د راپۆرتەکا خوە دا ژ نیویۆرک دبێژیت، سەرۆکێ ئەمریکی یێ نوو ھەلبژارتی ل مەھا بھێت نابیتە سەرۆکێ وی وەلاتی و ئەندامێن جڤاتا ھەلبژارتنێ دەنگێ خوە نادەنە ترامپی، ھەرچەندە پتریا وان ژ حزبا ترامپی ب خوەنە ئەو ژی حزیا کۆماری یا ئەمریکی.
رۆژناما ناڤبری ل سەر زارێ مایکل مۆر، دەرھێنەرێ ئەمریکی یێ ھەلگری ئۆسکاری، ڤەگوھاستیە” د کۆمبوونا جڤاتا ھەلبژارتنێ کو دێ ل رۆژا 19 ڤێ مەھێ ھێتە ئەنجامدان بۆ ھەلبژارتنا سەرۆکێ ئەمریکی یێ نوو، ئەندامێن وێ جڤاتێ دەنگی بۆ دونالد ترامپی نادەن، سەرەرای وێ چەندێ ژی کو پتریا ئەندامێن وێ جڤاتا ژ حزبا ترامبی نە”.
جڤاتا ھەلبژارتنێ، دەستەیەکا ھەلبژارتنێ یە و ئەرکێ وێ ھەلبژارتنا سەرۆکێ ئەمریکی و جێگرێ وی یە، ئەمریکا دەولەتا ئێکانەیە کو ئەو جۆرە ھەلبژارتنا نە راستەوخوە لێ ھەی کو ل شوونا دەنگدانا راستەوخوە بۆ بەرژەوەندیا سەرۆکی ژلایێ دەنگدەران ڤە، دەنگدان ژلایێ ئەندامێن ڤێ جڤاتێ دھێتە کرن و ئەو دێ کەسێ حوکمڕانیێ ل وەلاتی کەت د ھەلبژێرن.
ل دووڤ وێ رۆژنامێ پشتی سەرکەفتنا ترامپی ل ھەمبەر ھیلاری کلینتۆنێ، دانوستاندن دھێنە کرن بۆ رێگرتنێ ل ترامپێ بزنسمان کو ببیتە سەرۆکێ ئەمریکا و ھەتا بزاڤێن مەزن دھێنە کرن بۆ دوبارە ڤاڤارتنا دەنگدان ب ئەگەرێ پێشبینیا ھەبوونا سەختەکاریێ تێدا و چەندین داخوازی ژی ھاتینە کرن کو ئەندامێن جڤاتا ھەلبژارتنێ دەنگی بۆ ھیلاری کلینتۆن ل شوونا دونالد ترامپی بدەن.
مۆر دبێژیت” ھەتا نوکە ترامپ سەرۆکێ ئەمریکا نینە و ھەتا بەری نیڤرۆیا 20 کانوونا دویێ 2017 ێ ژی نابیتە سەرۆک، ھەلبژارتنێن سەرۆکاتیا ئەمریکا یێن سالا 2016 ێ ژی سەیرترین ھەلبژارتن بوون و دبیت ددەمێ ڤان چەند رۆژان دا تشتەکێ دی یێ سەیر بھێتە ئەنجامدان ( مەرەما وی لادانا ترامپی یە ژلایێ جڤاتا ھەلبژارتنێ ڤە)”.
د حەفتیا بۆری دا، ئەندامێ جڤاتا ھەلبژارتنێ (کریستوفەر سوبران) بۆ ئێکەمین ئەندامێ وێ جڤاتێ، کو ژ حزبا کۆماری یە، سۆزدای دەنگ ب ترامپی نەدەت د کۆمبوونا جڤاتا ھەلبژارتنێ ل 19 ڤێ مەھێ و دیار کر کو ئەو دخوازیت ئێکێ دی ل شوونا ترامپی ب ھەلبژێریت.
ناڤبری گۆتبوو” مادا 86 ژ دستوورێ فیدرالیێ ئەمریکی دبێژیت، پێدڤیە جڤاتا ھەلبژارتنێ دیار بکەت کو بەربژار خوەدان شیانن و چو کارێن ئاژاوەگێری نەکرینە و د سەربخوەنە ژ کارتێکرنا بیانی، ترامپی ژی چەندین جاران یا بۆ مە سەلماندی کو ئەڤ پرنسیبە ل دەف نینن”.
ھیلاری کلینتۆنێ دو ملیۆن و 700 ھزار دەنگ زێدەتر ژ ترامپی بدەستڤە ئینابوون د ھەلبژارتنێن سەرۆکاتیا ئەمریکا دا ل 8 چریا دویێ 2016ێ و ئەڤ چەندە ژی دھێتە ھژمارتن مەزنترین جوداھی د ناڤبەرا یێ سەرکەفتی و نەسەرکەفتی د دیرۆکا ھەلبژارتنێن سەرۆکاتیا ئەمریکا دا.
ئەڤرۆ نیوز:
سەرۆکێ ئەنجوومەنێ نیشتیمانیا کوردێن سووریا (ENKS) دیار دکەت کو رەوشا گەلێ کورد ل رۆژئاڤایێ کوردستانێ گەلەک خرابە و ژ بەر سیاسەتا شاش یا PYD رۆژ ب رۆژێ رەوشا خەلکێ خرابتر دبیت و پرانیا لاوێن کورد یێن رۆژئاڤایێ کوردستانێ ژی ژ بەر سیاسەتا PYD درەڤن و رۆژئاڤایێ کوردستانێ بجە دھێلن.
ئیبراھیم خەلیل برۆ سەرۆکێ ئەنجوومەنێ نیشتیمانیا کوردێن سووریا بۆ روژناما ئەڤرۆ دیار کر کو رەوشا گەلێ کورد ل کوردستانا سووریا وەکو ھەموو گەلێ سووریا د زەحمەتیێ دایە چونکو پشتی شەش سالان ژ شەر و خرابکرن و وێرانکرنێ د بەرامبەری سووریا رەوشەکا وەسا دروست بوویە و ھەموو گەلێ سووریا د زەحمەتیێ دانە، پتر ژ نیڤێ گەلێ سووریا پەنابەر بووینە، دیسان ھەرێما کوردستانا سووریا د رەوشەکا خراب دایە سەدەمێ خرابیا رەوشا گەلێ کورد گەلەک ژ وان دەڤەرێن کوردنشین شەرێن مەزن لێ ھەبوون ژ لایێ داعش ڤە دھات کرن پرانیا خەلکێ ژی ژ بەر خرابیا رەوشا ئابووری نەچار ماینە رۆژئاڤایێ کوردستانێ بجە بھێلن.
ناڤبری دیار کر کو پتریا گەلێ مە دەرکەفتینە دەرڤەی وەلات ژ بەر کریارێن PYD بوویە چونکو وان دڤێت ل گۆر خوە خەلکێ برێڤە ببەن و ئیدارەکا ئێک ئالی دروست کرن، ئەو ئیدارە ژ ئەنجاما رێککەفتنا د ناڤبەرا وان و رژێما سووریێ دا بوو و گەلەک مەرج ل سەر مللەتێ کورد سەپاندن تایبەت ل سەر تەڤگەرا سیاسی، ئانکۆ PYD ئەو ئیدارە دروست کرن دخواست کارێ سیاسی و ئیداری و لەشکری ل بن ئیدولوجیا وێ دابیت و گەلێ کورد ژی ل کوردستانا سووریێ ئەڤ مەرجە قەبول نەکرن و گۆت: (80% ژ کچ و کوڕێن 18 سالی ھەتا 30 سالی یێن رۆژئاڤایێ کوردستانێ ژ وەلاتێ خوە رەڤین، پشتی خەلکێ مە بەرەڤ ھەرێما کوردستانێ و تورکیا دچوون دەمەکێ درێژ ل وان جھان مان و ھیڤیا وێ چەندێ بوون کو شەر راوەستیت و ل سووریا ئارامی دروست بیت و رەوشا سووریا بھێتە گوھوڕین، لێ مخابن ھەم رەوش خرابتر بوو ھەم ژی رەوشا ئابووری ل ھەرێما کوردستان و تورکیا ژی خراب بوو، ئەو کەسێن ل سووریا دەرکەفتین ل تورکیا و ھەرێما کوردستانێ نەچار بوون پرانیا وان بەرێ خوە دانە ئورۆپا و دوبارە مەترسی ل سەر وان کوچبەرێن چووینە ئورۆپا ژی دروست بوو.
سەرۆکێ ئەنجوومەنێ نیشتیمانیا کوردێن سووریا ھەر وەسا دیار کر کو کورد ژ بەر کریارێن PYD درەڤن و خەلکێ پارێزگەھێن دی دھێن و ل باژێرێن کوردان بنەجە دبن، ئەو یەک بێگومان دێ مەترسیەکا مەزن ل سەر دیموگرافیا رۆژئاڤایێ کوردستانێ دروست کەت و گۆت: (ئەز باوەرم ھەتا شەر بەردەوام بیت خەلک نەشێن ڤەگەرنە جھێن خوە و ب تایبەتی ژی ھەتا رەققە ژ دەستێ داعشێ ئازاد نەبیت شەر دێ بەردەوام بیت و ژ بەر بەردەوامیا شەری ژی خەلک نەشێن ڤەگەرنە ڤە مالێن خوە).
ناڤبری زێدەتر گوت: (ئەڤرۆکە سیاسەتا PYD بەردەوامیا ھەمان سیاسەتا پەکەکێ یە کو ل کوردستانا باکور برێڤە بری و وان چ کەسێن دی ژ بلی خوە قەبوول نەکرن و کەسێن کو ل گەل وان نەبوون ژی کوشتن یان پەنابەر دبوون وان دخواست ڤێ سیاسەتێ ل کوردستانا سووریا دا ژی بەردەوام بکەن، ئانکۆ چ ئالیێن دی یێن سیاسی قەبوول ناکەن، سێ رێککەفتن د ناڤبەرا مە و وان دا ھاتنە کرن. ھەولێر ئێک و ھەولێر دوو و دھوک، لێ وان پێگری ب ھەر سێ رێککەڤتنان ژی نەکرن چونکو رێککەفتن د ناڤبەرا وان و رژێما سووریا دا ھەبی و نەدشیان ل گەل ئالیێن کوردی ئانکو ل گەل مە کار بکەن، یا دی ژی گرێدایی ئایدولوجیا وان وەکو پارتەکا خوەدان ھزرێن بەرتەنگە کو نەشێن چو دەمەکێ کەسێن ژ بلی خوە قەبوول بکەن.
ناڤھاتی ھەروەسا دیار کر کو بەری دەمەکێ چەکدارێن PYD ھێرش کرە سەر نڤیسینگەھا پارتی ئێکەتی کوردی ل سووریا ل باژێرێ عامودێ و ل دووڤ دا ھێرش کرە سەر رادیویا ئێف ئێم یا عامودێ و چار کارمەندێن رادیویێ دەستەسەرکرن، پشتی دەمەکێ بەردان لێ ھەر د ھەمان رۆژێ دا سەرکردەیێن پارتی ئێکەتی کوردی بریار دان دوبارە نڤیسینگەھا خوە ڤەکەن، ھژمارەمکا مەزن یا سەرکردایەتیا پارتا مە چوونە دەرگەھێ نڤیسینگەھێ ڤەکرن تێدا بنەجە بوون پشتی دەمەکێ چەکدارێن PYD ھاتن و شەش ژ سەرکردێن مە دەستەسەر کرن و پشتی دەمەکێ دو ژ وان کەسان ھاتنە بەردان.
ل دووماھیێ ناڤبری ئەو یەک ژی دیار کر کو ئەم وەکو ئەنجوومەنێ نیشتیمانی یێ کوردی پەیوەندیێن مە ل گەل پارتێن کوردستانێ ب گشتی باشن، بەری دو مەھان مە خواست وەکو ئەنجوومەن ھەموو پارتێن کوردستانی یێن ھەر چار پارچێن کوردستانێ بینین دا ئەم بۆ وان دیار بکەین کا رەوشا کوردستانا سووریا د چ زەحمەتیێ دا دەرباز دبیت و کریارێن PYD تا چ رادە زیانێ دگەھیننە بەرژەوەندیێن نەتەوی، لێ مخابن دو پارتێن سیاسی ل ھەرێما کوردستانا بەرسڤا مە نەدان و نەخواستن گوھداریا مە ژی بکەن، ئەو ژی ئێکەتی نیشتیمانی کوردستان و تەڤگەرا گوران کو نەخواستن گوھداریا داخوازیێن مە بکەن، لێ 12 قونسولێن وەلاتێن بیانی خواستن گوھداریا مە بکەن ل سەر رەوشا کوردستانا سووریا، لێ ب گشتی پارتیێن مە ھەڤدیتن ل گەل وان دروست کری دژی ڤان کریارێن PYD بوون و گۆت: (ئەم وەکو تەڤگەرا سیاسی یا کوردی جەنابێ سەروک بارزانی وەکو سەرۆکەکێ خەمخۆرێ ھەموو کوردستانێ دبینین کو ھەلگرێ پرۆژێ نەتەوی یێ کوردیە، ئەڤرۆکە جەنابێ سەرۆک بارزانی بزاڤەکا مەزن دکەت کو دەولەتا کوردی بھێتە راگەھاندن دا کورد ژی وەکو ھەموو گەلێن دی بگەھنە مافێن خوە، لێ مخابن پەکەکێ و لقێن وێ دیسان ب ھەموو رەنگەکێ دژبەریا دەولەتا کوردی دکەن و کار بۆ بەرژەوەندیێن دوژمنان دکەن و ھەر رۆژ ب ئاشکرایی دبێژن ئەم ناھێلن تورکیا، عیراق، ئیران و سووریا بھێنە پارچە کرن).
نيشاندان