ئەڤرۆ نیوز; ڤەدەر رەشاڤایی:
ھونەرمەندێ کورد شڤان پەروەر، پشتی کو بەری چەند سالان ل ئامەدێ کۆنسێرتەک کری و بەشداری کۆمبوونەکا سەرۆکۆمارێ تورکیا بووی، ژ ئالیێ ھندەک کوردێن باکۆرێ کوردستانێ ڤە تۆشی رەخنەیێن گران ببوو. شڤان پەروەری د نها دا بەرسڤا رەخنەگران دا و گۆت:” من خوەست کو ئەز پشتگریێ بدم ئاشتیا ھەردوو ئالیان. لێ ھەردوو ئالییان مللەت قوربانی سیاسەتا خوە کرن. وان بەرێ خوە دا شەر.”
شڤان پەروەری بۆ ئاژانسا سپوتنیک یا رۆسی گۆت: “من د گۆ تورکیا دکارە ببە باڤێ رۆژھلاتا ناڤین. ملەتا ل ھەڤ بینە. نەھێلە شەر چێببە. من ژ ئەردۆگانی خوەست کو ھەقێ کوردان بدن، دۆزا کورد چەرەسەر بکن، لێ وان تورکیا بخوە ژی خست ناڤ شەر، وەسا تەڤلھەڤیەک ھەیە کو ملەت بوونە قوربانیێن ئەز ئەزا پارتیێن سیاسی.”
شڤان پەروەر رەخنە ل تورکیا و ھەدەپی ژی گرت ژ بۆ تێکچوونا پرۆسەیا چارەسەریێ ل باکۆرێ کوردستانێ و دژواربوونا شه‌رێ په‌كه‌كێ و توركیا، گۆت: “کورد ژ خوە خوە نەگوھەراندن، لێ تورکا ژی خوە نەگوھەراند. ترک دبێژن ھەر گاڤ دڤێ بریار د دەستە مە دە بە. ھەر دخوازن ل سەر کوردان سەردەست بن، کورد ژی نکارن خوە وەک ئۆپۆزیسیۆنەکە خورت ل مەجلیسا وان بجھ بکن. ئۆپۆزیسیۆنا کورد ژی چێنابە. ھەکەر ھەدەپێ وەک پارتیەکیا کوردان و ئۆپۆزسیۆنێ مابا، دا تورکیا ژی وێ قەبوول کەت. ئۆپۆزیسیۆنەک کو مافێن کوردان ژی بپارێزن دەرنەکەت.”
شڤان پەروەر ئاماژە کرە پەڤچوونێن سالێن داوییێن ل باژارێن کوردان و گۆت:” یانی حالێ وان ھەندەکان چ بوو؟ خوەسەری چبوو؟. ھەردەرێ ھەموو باژارێن کوردان خراب کرن. ھەم دەولەتێ خراب کر، ھەم ژی وانا خراب کر. ڤێجا ئەمێ بێژن کیژان ھەقە. ھەردوو ئالی ژی ئەز ئەزا وانە، ملەت ل بەر دەستێ وان پەریشان بوون.”
شڤان پەروەری کو بەری چەند سالان ل ئامەدێ ھەڤدیتن د گەل ئەردۆگانی پێکئینا بوو، گۆت: “جارا پێشین ل تورکیا پێڤاژۆیەکیا چارەسەریێ،یا ئاشتیێ چێببوو، خۆدان دەرکەفتنەک چێببوو. پێڤاژۆیەکیا سەربەستیا ملەتان ئانیبوون بەرچاڤان کو کوردان قەبوول دکرن. رەوشەک وەسا چێببوو کو تورکیا ملەتێ کورد ژی قەبوول دکر. ھەردوو ئالی ژی رازی بوون. وان بخوە پێڤاژۆیەکیا ئاشتیێ چێکربوو، ژ من رە گۆتن “پێڤاژۆکا ئاشتیێ ھەیە وەرە” من گۆت ئەم دێ بچن ژ بۆ ئاشتیێ ئەم وان پیرۆز بکن. ئاشتیێ بێتر ئەم پێش بخن، ئالیکاریا وان بکن.”
من باوەریا خوە ب ئاشتیێ ئانیبوو
“ب سالان تورکیا گازی مە دکر، لێ باوەریا من ژ وان نەدبوو. لێ گاڤا کو من دیت تورکا و کوردان دەست دانە ھەڤ، من گۆ کا ئەز ژی وەک ھونەرمەندەکی کورد بچم بلا دەستێ من ژی د دەستێ وان دە بە. ب سەرۆککۆمارێ تورکیا برێز رەجەب تاییب ئەردۆگان ره. من دیت رەوشا ئابۆریا وان باش دچوو. ئێدی ناھێلن کەس بمرە. ئێدی ناھێلن مال خراب ببن. باشە ما کارێ مە چیە؟ ئەز ژی ب سالان قێریێن من بوو من بانگ ژ بۆ ئاشتی و ئازادیێ دکر، ئەز ژی ھاتم کو ڤێ ئاشتیێ پیرۆز بکم.” دەرفەتا ژیانێ ژ من رە نەھشتن.
پەروەری بەردەوام کر: “د بەردەوامیا ڤێ بەشداربوونێ دە من دیت کو دیسا سیاسەت کەتە ناڤ دا و یەکی گۆت چ شۆلێ تە ل ویرێ یە،یێ دی گۆ دڤێێ تو نەھاتبای. یەکێ دی گۆ نە رۆژا ھاتنا تە یە. من گۆ ئەز ھاتمە ژ بۆ پێڤاژۆیا کو وە دایە دەستپێکرن پیرۆز بکم، کا ھوون چ دخوازن ژ من. من دیت کو دەرفەتا ژیانا من ل وێرێ نەما. کو ئێدی بسترم.
بەرێ تورکا دژمناتی ل من دکر، ڤێ داویێ کوردان دژمناتیا من کر. رەڤیام چووم دیسا. شەڤەکێ مام من گۆ ب خاترێ وە. ئەز نامینم. ئەزێ وەک خوە بژیم. کەنگی کو ھون ل ھەڤ ھاتن وەک جامێرا ژ من رە بێژن، ڤایە ئەم ل ھەڤ ھاتن، کا تو ژی وەرە ژ مە رە بسترێ، ئەزێ وێ گاڤێ وەرم. نە کو تێکەڤم ناڤا پۆلەمیکێن سیاسی، قرێژ و شەر و کوشتن و مرن و ھیلەکاری و درەوان، ب ڤی ئاوایی ژ وێر دەرکەتم چووم.”
ھەردوو ئالییان ب ھەڤکاری ئاشتی خراب کرن
“داویێ من دیت کو دیسا شەر دەست پێ کر. ھەر رۆژ شەھید. ھەر رۆژ شەھید. ترک دەما کو کوردان دکوژن دبێژن (öldürdük). کورد گاڤا ترکا دکوژە دبێژن نزانم شەھید. کا ئەڤ چ حالە؟ ھەردوو ئالی ژی خەلەتە. ھەردوو ئالی ژی نە ژ بۆ ملەت ژ بۆ خوە نە. من د گۆ ترکیە دەولەتەکە مەزنە. تورکیا دکارە ببە باڤێ رۆژھلاتا ناڤین. ملەتا ل ھەڤ بینە. نەھێلە شەر چێببە. لێ ڤایە تورکیا ژی خوە خست ناڤ شەر، وسا تەڤلھەڤیەک ھەیە کو ھەردوو ئالی ژی ملەتان دکن قوربانا سیاسەتا خوە.”
باوەر ناکم کو جارەکا دی ڤەگەرمە وەلاتێ خوە
پەروەر ل دۆر ھلبژارتنان ژی گۆت “مفایێ ھلبژارتنان ژی نەبوو. ئیرادا ملەت نەھات بکارئانین. بتنێ سیاسەت و سەرۆکا رۆل ھەبوو. نە ئیرادا ملەتێ کورد ھات بکارئانین. نەیا ملەتێ تورک نەیێ مرۆڤایەتیێ ھات بکارئانین. تەڤا گۆ سیاسەتا مە. تەڤ ژی ئەز ئەزا وانە. تورکیە دەولەتەکە دیرۆکییە، ئەدەبییە، فەلسەفییە، کولتورییە دنیا ھەموو، لێ کۆم دبە. تەنێ تووریزما وێ تێرا خوەدیکرنا ڤی وەلاتییە. لێ ھەموویان خراب کرن. ئەز باوەر ناکم کو د رەوشەک وەسا دە جارەکە دین بێم. نایێم. ئەزێ مووزیکا خوە بکم. مووزیک ب سەر ھەموو ھونەران رەیە. و مووزیک وەک بایەکێ دھەرکە نکارە بسەکنە.”
ئه‌ڤرۆ نیوز:
سه‌رۆكاتییا توركیا كارڤه‌دانه‌كا تۆره ل دۆر رژدییا ئه‌مریكا ل سه‌ر پشته‌ڤانیكرنا هێزێن پاراستنا گه‌ل یه‌په‌گێ ل رۆژئاڤایێ كوردستانێ نیشان دا.
فه‌رماندارییا ناڤه‌ندی یا ئه‌مریكا به‌یاننامه‌یه‌كا هێزێن سووریا دیمۆكرات هه‌سه‌دێ كو یه‌په‌گێ هێزا سه‌ره‌كییه تێدا، به‌لاڤ كر كو گۆتبوو وێ هێزێ چ په‌یوه‌ندی ب په‌كه‌كێ ڤه نینه و هێزه‌كا سووریه ژ كورد و عه‌ره‌ب و ئاشۆرییان پێكدهێت.
ئیبراهیم كالین، په‌یڤدارێ سه‌رۆككۆمارێ توركیا به‌رسڤا ڤێ گاڤا ئه‌مریكا دا و گۆت: ئه‌مریكا هشێن خوه ژ ده‌ست دانه، كه‌س باوه‌ر ڤان گۆتنان ناكه‌ت، پێتڤییه هوون بزاڤێن خوه یێن شه‌رعییه‌تدانێ ب تیرۆرستان براوه‌ستینن.
ئه‌ڤه نووترین تێكچوونا په‌یوه‌ندییانه د ناڤبه‌را ئه‌مریكا و توركیا دا، لێ ل گۆری گۆتنا رێكس تیله‌رسن، كو دێ د ئیدارا ترامپی دا بیته وه‌زیرێ ده‌رڤه یێ ئه‌مریكا، ئه‌و دێ بزاڤان كه‌ت ل دۆر سووریێ خوه نێزیكی توركیا كه‌ت، لێ ره‌ت كرییه كو پشته‌ڤانییا یه‌په‌گێ رابگریت.
پشته‌ڤانیكرنا یه‌په‌گێ ژ ئالیێ ئه‌مریكا ڤه د شه‌رێ دژی داعشێ دا خالا سه‌ره‌كی یا ناكۆكیێن هه‌ردو وه‌لاتێن هه‌ڤپه‌یمانییا ناتۆیێ نه.
ئه‌ڤرۆ نيوز:
ئه‌ڤرو ب ئاماده‌بونا ( فه‌رهاد ئه‌مین ئه‌تروشی )پارێزگه‌رێ دهوكێ و فوئاد قاسم برێكارێ وه‌زاره‌تا خاندنا بلند ل ئێراقێ و سه‌روكێ زانكویا دهوك و هژماره‌كا پروڤيسورێن بریتانی كولیژا نوژداری و هژماره‌كا زور یا نوژدارێن هه‌می پارێزگه‌هێن هه‌رێما كوردستانێ ل پارێزگه‌ها دهوكێ ئێكه‌مین كونفرانسێ ئێشێن دوم درێژ ل هولا كونفرانسا ل زانینكه‌ها دهوكێ ده‌ست پێكر به‌راهیێ سه‌رپه‌رشتێ كونفرانسی دكتور جه‌مال به‌شیر دپه‌یڤه‌كێ بخێرهاتن ل میهڤانێن كونفراسنی و هه‌روه‌سا سوپاسیا زانكویا هیلپ یا بریتانی و كارگێریا پارێزگه‌ها دهوكێ و هه‌ر لایه‌كێ پشته‌ڤلانی ل ساز كرنا كونفرانسی كری كر , هه‌روه‌سا سوپاسیه‌كا تایبه‌ت ل پێشمه‌رگێن قه‌هره‌مان كر كو ب خوینا خو پاراستنا ئێمناهیا كوردستانێ دكه‌ن و سه‌ر و سامان و كه‌رامه‌تا هه‌می خه‌لكێ ئاكنجیێ كودرستانێ دكه‌ن ژ تیرورستێن داعش و ئه‌ڤرو بوینه پارێزه‌رێن هه‌می ئول و نه‌ته‌وێن ل كوردستانێ دژین بیێ جواهی, هه‌روه‌سا ئاماژه كره وێ چه‌ندێ كو كوردستان بو په‌ناگه‌ها هه‌می خه‌لكێ ژ به‌ر تیروستا دره‌ڤن نوكه ل كوردتانێ كرستیان و ئێزدی و موسلمان و كورد و عه‌ره‌ب و توركمان وه‌كو برا دژین و دهێنه پاراستن.
دیڤدا راگرێ كولیژا نوژداری یا دهوكێ دپه‌یڤه‌كێ دا سوپاسیا هه‌می وان لایه‌نا كر یێن بوینه هاریكار بو ساز دانا ڤی كونفراسنی و ئاماژه كره گرنگیا ڤێ كونفراسی بو پێًشڤه برنا شیانێن نوژدارێن پاریبَزگه‌هێ و هیڤی خواست كو ئه‌ف جره كونفرانسه دبه‌رده‌وام بن بو پێشڤه برنا شیانێن نوژدارێن دهوكێ و مفا وه‌رگرتن ز زانستێن نوی یێن وه‌لاتێن پێشكه‌فتی نه‌خاسمه وه‌لاتێ بریتانیا.
دیڤدا پێشانگه‌هه‌كا ده‌رمانا كو ژلایێ هژماره‌كا كومپانیێن تایبه‌تمه‌ند یێن چێكرنا ده‌رمانا هاتبو رێكخستن هاته ڤه‌كرن و سه‌حكره وان ده‌رمانێن ڤان ئێشێن دوم درێژ ئه‌وێن ژلایێ وانڤه دهێنه به‌رهه‌م ئینان.
دیڤدا ده‌ست ب برگێن كونفرانسی و روینشتنێن زانستی هاته كرن .
هه‌ژی گوتنێ یه كونفرانس بو دوور وژا به‌رده‌وام بیت و چه‌ندین سمینارێن تایبه‌ت دێ ژلایێ بسپورێن بریتانی ڤه ل سه‌ر زانستێن نوی و رێكێن چاره‌سه‌ریێ یێن نوی هێنه گوتن.
ئه‌ڤرۆ نيوز:
بنگەھێن پۆلیسان ل سەنتەرێ بازارێ دھۆکێ چەند رۆژە یێ دھێتە خرابکرن، سەرۆکاتیا باژێرڤانیا دھۆک ژی ئاشکرا دکەت کو ئەڤە دچارچووڤێ ھەبوونا پارکەکا بەرفرەە دایە کو ل سالا 2013 ھاتیە پەسەندکرن و ژ بەر تێکچوونا کاودانێن دارایی و ئابووری دەست ب پرۆژەی نەھاتیەکرن، ب تنێ فەرمانگەھێن حکومی ئاڤاھیێن خوە چوولکرینە و دیسا ژ نەبوونا بۆدجێ نەشێن خودانێن مولکان ل وی جھی رازی بکەن. ئەڤرۆ، سالار دۆسکی: ئەندازیار خالد حەسەن سەنعان، جێگرێ سەرۆکێ سەرۆکاتیا باژێرڤانیا دھۆک ئاشکراکر، نەخشێ پارکەکا بەرفرەھە کو پتریا پێدڤیێن دلڤەکەر ب خوە ڤەدگریت دکەڤیتە ناڤا سەنتەرێ بازرێ دھۆک و نەخشە ژلایێ کومپانیەکا ئەلمانی ڤە بۆ ھاتیە دانان، ھزر ل دانانا ڤێ پارکێ ھات، چونکو جھەکێ بەرتەنگە و دبینین جھەکێ خەندقی یە و پێدڤی ب ھەبوونا پارکەکێ یە دا خەلک بھێنڤەدانا تێدا بۆرینت، ب تایبەت ھاتن و چوونێ و دیسا ل گەل ڤێ چەندێ چو جھێن بھێنڤەدانێ وەک کەساتی و پارک ل ناف سەنتەرێ بازاری نینن، ل سەر ڤی بنیاتی د نەخشێ ستی سەنتەر دا ئەو جە ھاتیە دەست نیشانکرن ببیتە پارکەکا بەرفرەە و دلڤەکەر بۆ خەلکی و مفا ژ ڤی جھی بھێتە وەرگرتن. ئەندازیاری گۆت: پارک ژ جھێ باژێرڤانیا دھۆک بەرامبەر بورسێ بخوە ڤەدگریت کو رووبارێ دھۆک سنۆرە و ھەتا دگەھیتە پانورامایێ و ئەڤە ھەموو د چارچووڤێ ڤێ پارکێ دانە، دیسا بەری چەند سالا ئاڤاھیێ باژێرڤانیا دھۆک یێ کەڤن ھاتە خرابکرن و نوکە بوویە پارکا راوەستاندنا ترۆمبێلان. ئەندازیار خالد ئەو ژی گۆت: فەرمانگەھێن حوکمەتێ ھەر فەرمانگەھەکێ ھەکە بۆ خوە جھەک دیت دھێتە ڤەگوھاستن و ھەردو باژێرڤانیێن دھۆک و رێڤەبەریا باژێرڤانیان و بنگەھێ پۆلیسان و ئەڤە ھەموو ھاتینە ڤەگوھاستن و ئەڤێن مای ژی دێ ھێنە ڤە گوھاستن و ب تنێ مە ئاڤاھیێن خەلکی ماینە و رازیکرنا ڤی خەلکی ژی پێدڤی بۆدجەکا مەزنە و ھەتا ئەڤ جھە ھەموو دبیتە پارک، لەوما ژ بەر ڤان کاودانێن ئابووری یێن بەرتەنگ پرۆژە ھاتیە راوستاندن و نوکە ب تنێ رازیکرنا خەلکی مایە. جێگرێ سەرۆکێ باژێرڤانیا دھۆک ئەو ژی گۆت: نەخشە ھاتیە پەسەندکرن و نوکە ب تنێ ئاڤاھیێن حوکمەتێ یێ دھێتە خرابکرن و بەروەخت دێ پارکەک ھێتە دروستکرن و ئەڤە دێ بەر وەخت بیت، چونکو مە دیزاینەکا سەرەکی یا بەرفرەە بۆ پارکێ ھەیە، لێ ئەڤە ھەتا دەم دھێت و بۆدجە ھەبیت دێ دەست پێ ھێتەکرن. ئەندازیار یونس عەلی محمەد بەرپرسێ پشکا تەکنیکی ل سەرۆکاتیا باژێرڤانیا دھۆک، زێدەتر بەحسێ نەخشێ پارکا ناڤبری کر و ئاشکراکر کو پرۆژە ل سەر رووبەرێ نێزیکی 40 دونەمان ھاتیە دروستکرن ژلایێ کومپانیەکا ئەلمانی ڤە ل سالا 2013 پرۆژە ژ چەندین پارک و جھێن گەشتیاری و دیسا جھەکێ بەرفرەە بۆ راوستاندنا ترۆمبێلان پێک دھێت. ناڤبری ئاشکراکر کو پرۆژەی دەست پێکرەی و ھندک فەرمانگەھێن میری ئەوێن دکەڤنە د ناڤا ڤێ پارکێ دا یێ دھێنە ڤەگوھاستن و ئەو ئاڤاھیی یێ دھێنە خرابکرن، ب تنێ ئاڤاھیێن کارگێریا پارێزگەھا دھۆک و دادگەھا کەڤن ب گەلەریا دھۆک یا نافکریە و دیسا ئاڤاھیێ بەرێ یێ پەیمانگەھا ھونەرێن جودان دێ دناڤ پارکێ دا د پاراستی بن و دێ ھەر ل جھێ خوە مینن، ل دووڤ نەخشێ ھاتیە دروستکرن مانا ڤان ئاڤاھیان مینیت ل گەل دەردورێن خوە. ئەندازیار یونس عەلی ئەو ژی گۆت: چەندین قات بن ئەردی دێ ھەبن بۆ راوەستاندنا ترۆمبێلان و نێزیکی 1500 ترۆمبێلان دێ ھێنە ڤەحەواندن و ئەڤە ژی رێژەکا مەزنە، دیسا پارک ژ گەلەک باخچان پێک دھێت و جھێن ھاتن و چوونا مرۆڤان، زێدەباری جھێن بازرگانی و گەشتیاری.
ئەڤرۆ نيوز:
ئەندامەکا پەرلەمانێ عیراقێ ژ فراکسیۆنا پارتی دیموکراتی کوردستان ئاشکرا کر کو کو دوڤچوونەکا جدی ل سەر بەلاڤکرنا وی برنجی دھێتە کرن کو ل سەر وەلاتیان ھاتیە بەلاڤکرن و ب کێری خوارنێ نەھێت و گۆت: ئەو کەسێن ئەڤ برنجە وەرگرتی دێ ھێنە قەرەبووکرن و کەسێن دەست ل گەل ئینانا ڤی برنجی ھەی دێ بەرپرسیار بن.
نەجیبا نەجیب ئەنداما پەرلەمانێ عیراقێ ژ فراکسیۆنا پارتی دیموکراتی کوردستان بۆ رۆژناما ئەڤرۆ گۆت: رێژا ھاتیە وەرگرتن کو ب کێری خوارنێ نەھێت چل ھزار تەن بووینە، پشتی ھاتیە پشکنین ھوسا ھاتە دیارکرن کو نیڤا ڤێ رێژێ یا باشە و ب کێری خوارنێ دھێت و فەرمان ل سەر ھاتەدان کو ئەڤ رێژا باش پشتی پشکنینێ بھێتە بەلاڤکرن.
نەجیبا نەجیب ئەو ژی گۆت: پشتی من پەیوەندی ل گەل وەزارەتا بازرگانی یا عیراقێ کری و ب نڤیسار ھاتیە بەلاڤکرن کو ھەر وەلاتیەکێ برنج وەرگرتی ل سەر ئازوقەی بلا بۆ بریکارێ خوە بزڤرینتەڤە و دێ ژلایێ وەزارەتا بازرگانی یا عیراقێ ڤە ئەو وەلاتی ھێنە قەرەبووکرن و ئەڤ بریارە ھەرێما کوردستانێ ژی ڤەدگریت.
ئەنداما پەرلەمانێ عیراقێ ژ فراکسیۆنا پارتی دیموکراتی کوردستان ئاشکرا کر ژی کو ھاتنا ڤی برنجی ژلایێ وەزارەتا بازرگانی یا حوکمەتا عیراقێ ڤە ل گەل ھندەک کۆمپانیان کو برنجی بینە و ھاتنا وی برنجی نە ل وی ئاستی بوویە کو ب کێری خوارنێ بھێت، ھەتا رۆژێن بۆری دادگەھا نەزاھێ ل پارێزگەھا بەسرا بریار دای 600 تەنێن ھەمان برنجی بھێنە ژناڤبرن، ئەڤە نە جارا ئێکێ یە و پێشتر ژی ب ھەمان شێوە برنج ھاتبوو بەلاڤکرن و ب کێری خوارنێ نە دھات.
نەجیبا خانێ گۆت ژی: لیژنا مە ل پەرلەمانێ عیراقێ ل سەر ڤێ روودانێ لیژنەکا دوڤچوونێ پێک ئینا بوو، ئەڤ لیژنە بەردەوام یا دوڤچوونێ ل سە ئینانا ڤی برنجی دکەت کا چەوا و ب چ رێک گەھشتیە عیراقێ و ھاتنا ڤی برنجی بوویە زیانەکا مەزن بۆ وەلاتیان و تایبەت تەخا ھەژاران و دیسا ئەڤ برنجە ب چ گرێبەست و چ رێک ھاتیە.
نەجیبا نەجیب ئەنداما پەرلەمانێ عیراقێ ژ فراکسیۆنا پارتی دیموکراتی کوردستان ئەو ژی نەڤەشارت و گۆت: پێشتر ھەتا نوکە داخوازی و نەرازیبوون ل سەر برنجی ژلایێ وەزارەتا بازرگانی یا حوکمەتا ھەرێما کوردستانێ ژ مە نەھاتیەکرن.
ھەمان ئەندام پەرلەمان ئەو ژی ئاشکرا کر کو کۆمپانیا برنج ئینای بۆ وەزارەتا بازرگانی چوو د لیستا رەش دا و ئێدی سەردەری ل گەل ناھێتەکرن، دیسا ئەڤ کارە وەزیرێ بازرگانی و رێڤەبەرێن گشتی.
ئه‌ڤرۆ نيوز:
جێگرا سەرۆکا لیژنا ساخلەمی یێ ل پەرلەمانێ کوردستانێ ئاشکرا کر کو سەرۆکاتیا جڤاتا وەزیران بڕیاردایە ھاریکاریێن بۆ نشتەرگەریێن ئێڤاریان دھێنەکرن بھێنە راگرتن و گۆت: “نوکە ئەو ھاریکاری ھاتینە راگرتن و تنێ ھاریکاری ب رێژەکا کێم بۆ ھندەک جۆرێن نشتەرگەریان یا مای”.
مریەم سەمەد، جێگرا سەرۆکا لیژنا ساخلەمی یێ ل پەرلەمانێ کوردستانێ بۆ رۆژناما ئەڤرۆ دیار کر کو ب فەرمانا سەرۆکاتیا جڤاتا وەزیران ئەو پارێ وەکو ھاریکاری بۆ وەلاتیان دھاتە مەزاختن ل دەمێ نشتەرگەری ئێڤاریان ل نەخۆشخانێن گشتی دکرن ھاتیە راگرتن و گۆت: “بەری نوکە ھەر وەلاتیەکێ ل نەخۆشخانەکا گشتی ب شەڤ یان دانێ ئێڤاری نشتەرگەریەک بۆ ھاتبا کرن 80%ێ بھایێ نشتەرگەریێ ژ لایێ حوکمەتێ ڤە دھاتە مەزاختن وەکو ھاریکاری بۆ وەلاتیێن ھەژار و پشتەڤانیەکا باش بۆ وان نەخۆشێن دەست کۆرت”.
ناڤھاتی ئاماژە دا وێ چەندێ کو بۆ دەمەمێ چەند رۆژانە ئەو دووڤچوونا ڤێ بڕیارێ دکەن و ل دووڤ وان پێزانینێن وەزارەتا ساخلەمیا حوکمەتا ھەرێما کوردستانێ داینە وان ھەتا نوکە رێژەکا کێم ژ وی پارەی بۆ ھندەک نشتەرگەریان دھێتە مەزاختن بۆ نموونە ھەکە ئافرەتەک ل نەخۆشخانەکا تایبەت نشتەرگەریا زارۆبوونێ ئەنجام بدەت بھایێ وێ نشتەرگەریێ 750 ھزار دینارن، بەلێ حوکمەت دێ پشتی دەواما فەرمی ب 400 ھزار دیناران ھەمان نشتەرگەری بۆ ئەنجام دەت، چونکی گەلەک وەلاتیان ئەو شیانێن ماددی نینن بچنە نەخۆشخانێن ئەھلی.
مریەمێ خویا کر کو مخابن حوکمەتا عیراقێ وەکو پێدڤی دەرمانان بۆ ھەرێما کوردستانێ ناھنێریت ئەڤ چەندە ژی بوویە بارگرانیەک ل سەر حوکمەتێ و نەخۆشان، چونکی ھەکە دەرمان نەبن وەلاتی نەچار دبن بچنە بازاڕی ب بھایەکێ گران دەرمانان بکرن و گۆت: “ھەتا نوکە وەزارەتا ساخلەمیا ھەرێمێ خەمساری د وارێ دابینکرنا دەرمانان دا نەکریە، بەلێ پتریا وەلاتیێن ل نەخۆشخانێن حوکمەتێ دھێنە چارەسەرکرن دەرمانان ژ دەرڤە دکرن، چونکی ھەموو جۆرێن دەرمانان ل نەخۆشخانان نینن”.
ئەڤرۆ نيوز:
وەزیرێ ڤەگوھاستن و گەھاندنێ ل حوکمەتا ھەرێما کوردستانێ دیار کر، د دەمەکێ نێزیک دا ھێلەکا نوو یا ئنترنێتا بێ سنوور ل ھەرێما کوردستانێ دێ کەڤیتە کاری و دبێژیت: مە تەندەرێ پرۆژەی یێ ئێخستیە ھەڤڕکیەکا راستەخوە یا کۆمپانیان.
مەولۆد باوەمراد، وەزیرێ ڤەگوھاستن و گەھاندنێ ل حوکمەتا ھەرێما کوردستانێ د راگەھاندنەکێ دا ئاشکرا کریە کو ناڤێ وێ ئنترنێتا نوو فایبەر ئوپتیکە (FTTH) و تێدا ھاتیە: ئنترنێتەکا بێ سنوورە و (تێلەفزیۆن، ئنترنێت و تێلەفۆن) ھەرسێکان ڤەدگریت و ل پارێزگەھێن سلێمانیێ و حەلەبجە و ئیدارێن راپەرین و گەرمیان دێ کەڤیتە کاری.
وەزیرێ ڤەگوھاستن و گەھاندنا ھەرێمێ خویا ژی کر، د نوکە دا ئەڤ ھێلە وەکو تێست ل پارێزگەھێن دھۆک و ھەولێرێ دھێتە بکارئینان، داکو وەلاتی گەلەک مفای ژێ ببینن و ب بھایەکێ گونجای ل ئاست بھایێن نێڤدەولەتی.
وەکو دیار د دووماھیک کۆمبوونا جڤاتا شیرەتکاری یا وەزارەتا ڤەگوھاستن و گەھاندنێ پڕۆژێ تەندەرێ راستەوخوە بۆ قەزا و ناحیێن سنوورێ پارێزگەھێن سلێمانیێ و حەلەبجە و ئیدارێن راپەرین و گەرمیان بۆ ڤێ ھێلا نوو یا ئنترنێتا بێ سنوور بڕیار ل سەر ھاتیە دان کو بکەڤیتە ھەڤڕکیا راستەوخوە یا کۆمپانیێن ئنترنێتێ.
ئه‌ڤرۆ نيوز:
رێڤەبەرێ رێکخستنا پلێتێن ئاھێن خوارنێ ل پارێزگەھا دھۆکێ بۆ رۆژناما ئەڤرۆ دیار کر، بڕیارە پلێتێن ئاھێن خوارنێ ل 18 پارێزگەھێن عیراقێ بھێنە گوھۆڕین و دبێژیت: بۆ سالا 2017 پلێتێن نوو بۆ ھەموو سەرۆک خێزانان دێ ھێنە چاپکرن.
حسێن سەبری، رێڤەبەرێ رێکخستنا پلێتێن ئاھێن خوارنێ ل پارێزگەھا دھۆکێ ئاشکرا ژی کر، دەست ب کۆمکرنا داتایێن ھەموو پارێزگەھێن عیراقێ ھاتیە کرن بۆ دروستکرنا پلێتێن نوو یێن ئاھێن خوارنێ و گۆت: “بەغدا ئەڤ سالە دێ پلێتا ئاھێن خوارنێ بۆ دو سالان چاپکەت، ئانکو پلێتا نوو دێ بۆ سالێن 2017 و 2018 ھێتە چاپکرن”.
گۆتژی: “ب بڕیارەکا وەزارەتا بارزگانیا عیراقێ ل سالا 2016 پلێتێن ئاھێن خوارنێ نەھاتبوونە چاپکرن، ئەڤە ژی سەرپێچیەکا مەزن بوو ل سەر مافێن وەلاتیان ھاتیە کرن، چونکو نابیت وەلاتی بمیننە بێ پلێتێن ئاھێن خوارنێ، دیسا ئەڤ سالە ل 18 پارێزگەھێن عیراقێ دێ پلێتێن ئاھێن خوارنێ ھێنە گوھۆڕین و پلێتەکا نوو دێ ھێتە چاپکرن و ل سەر وەلاتیان ھێتە بەلاڤکرن”.
حسێنی ئاماژە ب وێ چەندێ ژی کر، ب مەرەما چاپکرنا پلێتێن نوو یێن ئاھێن خوارنێ، داتایێن پارێزگەھێن ھەرێما کوردستانێ ژی بۆ بەغدا دێ ھێنە ھنارتن.
ئه‌ڤرۆ نیوز:
باراك ئۆباما د مه‌راسیمه‌كێ مه‌زن دا گۆتارا خوه یا خاترخواستنێ پشتی هه‌شت سالێن سه‌رۆكاتییا ئه‌مریكا پێشكێش كر، تێدا ب چاڤێن رۆندك ڤه سۆپاسییه‌كا ب باندۆر پێشكێشی هه‌ڤژینا خوه و هه‌ردو كچێن خوه كر، هه‌روه‌سا سۆپاسییا جێگرێ خوه جۆن بایدنی ژی كر.
تشتێ سه‌رنجا خه‌لكی و میدیایێ راكێشای ئه‌و بوو كو كچا وی مالییا به‌رهه‌ڤی مه‌راسیمێ ببوو لێ كچا وی یا بچووكتر ساشا به‌رهه‌ڤ نه‌ببوو، هه‌ژماره‌كا مه‌زن یا خه‌لكی ل سه‌ر تۆرێن جڤاكی پرسیار كر بۆچی ناڤهاتی به‌رهه‌ڤ نه‌بوویه.
ل داویێ دیار بوو كو ساشایێ ئه‌زموون هه‌بوون ل قۆتابخانێ و نه دهاته پاشخستن له‌ورا نه‌چار بوو بخینیت و ئه‌زموونا خوه د ده‌مێ پێدڤی دا بكه‌ت ل شوونا ل مه‌راسیمێ سه‌رۆكێ وه‌لاتی دا ئاماده ببیت.
نيشاندان