ئەڤرۆ نيوز:
دچارچۆڤێ پۆستەکێ تایبەت ل سەر توڕا جڤاکیا فیسبوکی دا، رێبین ھەردی شیرەتکارێ بەرێ یێ نەوشیروان موستەفای دبێژیت، ئەڤە دەمەکبوو دلێ مە ب وێ چەندێ یێ خوەش بوو کو ھێزێن کوردی چەند د ناڤخوەیا خوەدا ناکوکی ھەبن، ل بەغدا ھەردەم پێکڤەنە و پێکڤە بریاران ددەن، ھەروەسا دبێژیتمن بتنێ ئێک تشت وەک پرسیارەکا مەزن کو ل گەلەک بەرپرسێن سیاسی یێن مەزن پرسیار کریە کو ئاگەھداری و زانیاری، بەلێ بەرسڤ نەبوو، ئەو ژی پەترۆل مەیا ھەی بەلێ تێرا موچێن مە ناکەت، بەلێ ھەکە بتنێ 500 ھزار بەرمیلان ژ ڤێ پەترۆلێ بدەنە بەغدا یا ئامادەیە پشکا 17% نە بەلێ 13% یا بودجا عیراقێ بۆ مە ب ھنێریت، نھێنیا وێ چەندێ کو ئەم ڤی بجھنائینین چی یە ؟.
ھەروەسا رێبین ھەردی دبێژت، تۆ وەسا ھزر بکە، کو کوژمە پترە ژ کوژمێ بەغدا، ئەرێ بۆچی حساب ناھێتە کرن، نە بێژن سەربخوەیا ئابوری، چونکی ئەگەر ھەکە وێ پەترۆلێ رادەستی بەغدا ژی بکەین، ئەو پەترۆل ھەر یا لبەردەستێن مە و ل ژێر کونترۆلا مەدایە، ئانکو وەسا ھزر بکەن کو عیراق ژی بکڕە و یا ئامادەیە رۆژانە 500 ھەزار بەرمیلان کو ب کوژمەکێ زێدەتر بکڕیت، ئەرێ بۆچی برایێن پارتی بڤێ چەندێ رازی نابن؟.
ل بەارمبەر پرسیارا رێبین ھەردی، ئەندامێ دەزگەھێ رەوشەنبیری و راگەھاندنا پارتی دیموکراتی کوردستان ئاریان فەرەج بەرسڤا زۆر گرنگا رێبن ھەردی ددەت، و دبێژیت، ھەکە ھەرێم راستەخوە پەترۆلا خوە بفرۆشیت، دشێت (550) ھزار بەرمیلان رۆژانە رەوانەری دەرڤەی وەلاتی بکەت، ئانکو د ھەیڤەکێ دا دبیتە(722) ملیۆن دولار ب بھایێ نوکە یێ پەرتۆلا ھەرێما کوردستانێ ل بازاری کو(43) دۆلارە، ھەکە تەسلیمی بەغدا بھێتە کرن، و بەغدا 100% پێگیری ب بودجا عیراقێ بکەت، و رێژا 17% بەھرا کوردستانێ پشتی کێمکرنا مەزاختیێن سیادی بکەت، وی دەمی کوژمێ پارەی ھەیڤانە یێ بگەھیتە بەردەستێن مە دبیتە(513) ملیۆن دۆلار، ئانکو رادەستکرن بۆ بەغدا (تۆ کورد و کوردایتێ دەستان ژێبەردە) ھەیڤانە بتنێ (209) ملیۆن دولاران دێ زەرەر گەھێتە ھەرێما کوردستانێ.
ھەروەسا ئاریان فەرەجی گۆت: پرۆژێ ئێکەتی و گۆڕان و کومەلێ بتنێ رادەستکرنا پەترۆلا کەرکوکێ نینە بەرانبەری موچەی،چونکی (650) ھزار موچەخور، ئانکە ھەکە ئەو کوژمێ پارەی ل سەر فەرمانبەر و موچەخوران بھێتە بلاڤکرن کێمترە ژ وێ چارێکا نوکە حوکمەتا ھەرێما کوردستانێ ددەتە موچەخوران، یێن نوکە بایکوتا دەوامێ دکەن، ھەر ل گۆڕ پرۆژێ ھەرسێ ئالیێن سیاسی ھەکە حوکمەتا ھەرێما کوردستانێ پێگیری بوو و پەترۆل رادەستی بەغدا کر، وی دەمی بەغدا 17% یا بودجێ بدەتە ھەرێما کوردستانێ وەک مە گۆتی ھەیڤانە (209) ملیۆن دۆلاران کێمتر ژ داھاتێ نوکە ددەستێن مەدا ھەی.
ھەروەسا ئاریان فەرەج پرسیار کر و گۆت: ئەرێ حوکمەت ھەرێما کوردستانێ بڤی داھاتێ خوەڤە بوچی نەشێت موچێ تەمامێ موچەخوران و پێدڤیێن وان دابین بکەت؟، ھەر ئەو بخوە بەرسڤێ ددەت و دبێژیت، چونکی ھەرێما کوردستانێ ھەیڤانە ژ بلی (750) ملیۆن دۆلاران بۆ موچەی، پێدڤی ب نێزیکی (500) ملیۆن دۆلارێن دی ژی ھەیە، کو (89) ملیۆن بۆ کۆمپانیێن پەرتۆلێ نە، (120) ملیۆن بۆ کارەبێ نە، (198) ملیۆن بۆ ئەداکرنا قەرێن وەرگرتی بۆ دانا موچێ فەرمانبەران ل دەستپێکا پەیدا بوونا قەیرانێ و بەری دەست ب سیستەمێ پاشکەوتی بھێتە کرن، (100) ملیۆن دۆلار بۆ بودجا تەشغیلی یا حوکمەتێ کو سلانە بەری قەیرانێ سێ جاری وی کوژمی بوویە.
ئەندامێ دەزگەھێ رەوشەنبری و راگەھاندنا پارتی زێدەباری وێ خوەیاکر، لەورا حوکمەتا ھەرێمێ دبێژیت ھەکە بەغدا موچەی دابین بکەت، پەرتۆلێ دێ رادەست کەین، بەغدا ژی کو ھەموو پەترۆلێ رادەست بکەین ھەر ناھێتە ژێر بارێ دابینکرنا ھەموو موچەی، چونکی ئەو باش دزانن حوکمەتا ھەرێمێ چ دبێژیت و چ دخوازیت، بەغدا ل ژێر کورتە ئینانا بودجێ و قەرکرنا یەدکی و بانکێن مەرکزی بۆ دابینکرنا موچەی دکەت، ھەکە نیاز پاکی ژی ھەبیت ،( وەک ھوشیار عەبدوللا) ھزر دکەت، بەغدا پارە نینە بدەتە مە، ھەروەسا گۆت: دڤێ ناڤبەر ژی دا پرۆێ گۆڕان و ئێکەتیێ و ئیسلامیان بتنێ بەرھەلایەکا جەماوەری و موزایدەکا حزبی یا گەلەک ئەرزانە ل سەر حسابا پارتی دیموکراتی کوردستان دکەن.
ئاریان فەرەج ل دووماھیا گۆتنا خوە دبێژیت، ئەڤ قەیرانە ژ کیرێ ھات؟، بەرسڤ داکەفتنا بھایێ پەترۆلێ ژ (110) دۆلاران بۆ (20) دۆلاران نوکە یا بەر ب (50) بلند دبیت، رادەستکرنا پەترۆلێ مەزنترین تاوانە و گونەھەکا گەلەک مەزنە.
ل بەرامبەر گۆتنێن ئاریان فەرەجی دا، شیرەتکارێ نەوشیران بەرسڤ ددەت و دبێژیت، ب ڤی رەنگی ھوور بین و ژمارێن ددەستدا بەرسڤێن تە گەلەک باوەری بۆ من چێکر، چونکی رێژا 17% ژ بودجا عیراقێ کێمترە یا نوکە ئەم پەیدا دکەین، لەورا گەمژەیە ھەکە ئەم پەترۆلێ رادەستی عیراقێ بکەین، ھەکە ئەو ژمارە ھەموو دھووربین بن وللاھی ئەز ل گەل ھندێ مە ئەم بخوە پەترۆلا خوە بفرۆشین باشترە.

ئەڤرۆ نیوز:
پەرلەمانتارەکا کورد ل پەرلەمانێ عیراقێ دوپات کر، ب ئەگەرێ ناکۆکیێن ناڤبەرا شیعە و سونەیان کۆمبوونا پەرلەمانی بۆ پەسەندکرنا پڕۆژێ قانوونا بودجا گشتی یا عیراقێ کەفتیە ئەڤرۆ رۆژا چارشەمبی و دەلیڤە مایە ھێشتا پێداچوون ب داخوازیێن فڕاکسیۆنێن کوردستانی دا بھێتەکرن، ھەتا گھۆڕین ب سەر بودجا ھەرێما کوردستانێ دا بھێن.
نەجیبە نەجیب، ئەنداما لیژنا دارایی و ئابووری ل پەرلەمانێ عیراقێ بۆ رۆژناما ئەڤرۆ گۆت “د کۆمبوونا رۆژا دوشەمبی دا یا پەرلەمانێ عیراقێ، ل دۆر بنەھجکرنا بودجا حەشدا شەعبی ئاریشە کەفتە د ناڤبەرا کۆتلەیێن سونە و شیعە دا و بوویە ئەگەرێ پاشخستنا دەنگدانێ ل سەر پڕۆژێ قانوونا بودجا عیراقێ بۆ ئەڤرۆ رۆژا چارشەمبی و گۆت “ئاریشا د ناڤبەرا وان ژی دا ل دۆر ڤێ چەندێ بوو کو سونیا داخواز کر 40%ێ بودجا حەشدا شەعبی بۆ عەرەبێن سونە بیت و کۆتلێن شیعە ژی ب ڤێ رێژێ رازی نەبوون، واتە ئەگەر مووچە بۆ سەد ھزار چەکدارێن شیعە بھێتە مەزاختن ئەڤە ژ وان سەد ھزاران چل ھزار بۆ عەربێن سونە بیت، بەلێ ئەز د وێ باوەریێ دانینم کو عەرەبێن شیعە ب ڤێ داخوازا کۆتلێن سونی رازیبن و سەربگریت”.

ل دۆر وان مادێن پەیوەندی ب ھەرێما کوردستانێ ڤە ھەی، نەجیبە نەجیب گۆت “مە وەک فڕاکسیۆنا پارتی دیموکراتی کوردستان ل پەرلەمانێ عیراقێ رۆژا دوشەمبی ژی بایکۆتا کۆمبوونا پەرلەمانی کر، چونکی مە وەسا پێ باشە گھۆڕین ب سەر ئەڤان مادێن پەیوەندی ب ھەرێما کوردستانێ و ھێزا پێشمەرگەی ڤە ھەیە بھێنەکرن، ئەگەر ھەتا بەری دەستپێکرنا کۆمبوونا رۆژا چارشەمبی نەھێنە راستڤەکرن، دیسان دێ کۆمبوونا پەرلەمانی بایکۆت کەین و پشکداریێ ناکەین، نوکە ژی دەلیڤە ھەیە گھۆڕین بھێنەکرن”.
ھەروەسا نەجیبا خانێ گۆت “ئەز چ جاران باوەر ناکەم پەرلەمانتارێن عیراقێ دەنگی بۆ پڕۆژێ فڕاکسیۆنێن کوردستانی بدەن و دڤێت گھۆڕین تێدا بھێنەکرن، ئەڤا نوکە بۆ ھەرێما کوردستانێ ھاتیە دیارکرن د بەرژەوەندیا ھەرێما کوردستانێ دا نینە و ھەکە ب ڤی شێوەی پڕۆژێ قانوونا بودجەی بھێتە پەسەندکرن، دێ زیان بۆ ھەرێما کوردستانێ ھەبن، تنێ وەکی فڕاکسیۆنا پارتی و حوکمەتا ھەرێما کوردستانێ پێشنیار کرینە دێ چارەسەریا ئاریشا بودجە و مووچێن ھەرێما کوردستانێ ل بەغدا بکەن”.