ئه‌ڤرۆ نیوز:
مه‌سعود بارزانی سه‌رۆكێ هه‌رێما كوردستانێ، په‌یامه‌ك ل دۆر ئاماده‌كارییێن شه‌ڕێ رزگاركرنا مووسلێ به‌لاڤكر و تێدا دیاركر، ده‌مه‌كێ درێژه، د راگه‌هاندن و ناڤه‌ندێن سیاسی یێن ناڤخوه و ده‌رڤه دا، باس ل ئاماده‌كاریێن رزگاركرنا مووسلێ دهێته كرن و شكاندنا داعشێ و رزگاركرنا مووسلێ ژی، بۆ هه‌رێما كوردستانێ گرنگیا خوه‌یا تایبه‌ت هه‌یه و كارێ ده‌ستپێكی یی سیاسه‌تا هه‌رێمی یه.
ئاماژه‌كر ب وێ چه‌ندێ ژى كریه کو د رێككه‌ڤتنا پیشمه‌رگه‌ی و سوپایێ ئیراقێ دا، كار و ئه‌ركێ سه‌ربازی یێ هه‌موو هێز و یه‌كه‌یێن پشكدار د ئۆپه‌راسیۆنێ دا، ب هووری هاتینه دیاركرن، هه‌ماهه‌نگییا ته‌مام ژی د ناڤبه‌را هه‌ردو ئالییان دا هه‌یه، داكو چو بوویه‌رێن نه‌خواستی روونه‌ده‌ن.
ئه‌ڤرۆ نيوز، له‌زگين جۆقى:
رێڤه‌به‌رێ گشتيێ ساخله‌ميا پارێزگه‌ها دهۆكێ راگه‌هاند كو دێ ساخله‌ميا دهۆكێ د گەل مەحمەد حەماش بەرپرسێ رێکخراوا ساخلەمیا جیھانی ل دھۆکێ و د. کيفاح مەحمەد نوونەرێ رێڤەبەریا گشتیا ساخلەمیا نەینەوا و نوونەرێ رێکخراوێن نێڤدەولەتی و رێکخراوێن نەتەوەێن ئێکگرتی بەرھەڤیێن چاوانيا چاره‌كرنا ئاواره و پێشمه‌رگه‌ى كرن.
د. نزار عصمه‌ت ته‌يب، رێڤه‌به‌رێ گشتيێ ساخله‌ميا پارێزگه‌ها دهۆكێ د كۆنگره‌كێ رۆژنامه‌ڤانى دا ل دهۆكێ گۆت: “ل گه‌ل نه‌خۆشخانا شێخان مه به‌رهه‌ڤيێن چاوانيا هاريكاريكرنا پێشمه‌رگه‌ى ل شه‌رێ ئازاديا مووسل كرن و ل گه‌ل رێكخراوێن ساخله‌ميا جيهانى و نه‌ته‌وێن ئێكگرتى پلانه‌كا تۆكمه بۆ خزمه‌تكرنا پێشمه‌رگه‌ى و ئاواران ل شه‌رێ ئازادكرنا مووسل دانايه”.
دا زانين ژى كو ئه‌و دێ كار ژ بوو دو ئارمانجێن سه‌ره‌كى كه‌ن؛ يا ئێكێ نه‌هێلانا به‌لاڤبوونا نه‌خۆشيا و رێ گرتن ل به‌لاڤبوونا نه‌خۆشيا، يا دويێ ژى گه‌هاندنا هه‌موو خزمه‌تێن ساخله‌ميێ بۆ ئاواران ل هه‌ر جهه‌كێ هه‌بن.
د. نزار گۆت: “16 تيم هاتينه پێكئينان و بۆ ماوێ 12 رۆژا دێ كارێ ڤاكسنيدانا هه‌موو زارۆيێن د بن 15 ساليێ دا كه‌ن، دا كو مه‌ترسيا نه‌خۆشيا فالنجا زارۆيان و سوركا نه‌مينيت”، نه‌ڤه‌شارت ژى كو شه‌ش تيمێن دى دێ ل سه‌ر هه‌موو حاله‌تێن مه‌ترسيدار كار كه‌ن دا كو ب زووترين ده‌م نه‌خۆشيێن وان ده‌ستنيشان بكه‌ن بۆ وێ چه‌ندێ نه‌خۆشى نه‌هێنه به‌لاڤكرن و بشێن كونترۆلێ ل سه‌ر وان نه‌خۆشيان بكه‌ن”.
رێڤه‌به‌رێ گشتيێ ساخله‌ميا پارێزگه‌ها دهۆكێ گۆتژى: “40 تيمێن گه‌رۆك هاتينه درۆستكرن و دێ خزمه‌تێن ساخله‌ميێ گه‌هيننه ئاواران ل هه‌موو ده‌ڤه‌ران، ل ده‌شتا مووسل و ناڤ كه‌مپ و د ناڤ هه‌يكه‌لان دا و هه‌ر جهه‌كێ ئاواره لێ ئاكنجى دبن، زێده‌بارى 33 ترۆمبێلێن هاوار هاتنێ د خزمه‌تا ئاواران دا بن و ل ده‌شتا نه‌ينه‌وا چاره‌سه‌ريا وان هێته كرن و هه‌كه حاله‌ت يێ ته‌نگاڤ بيت دێ بۆ نه‌خۆشخانێن دهۆكێ هێنه ره‌وانه‌كرن ب مه‌ره‌ما چاره‌كرنێ”.
د درێژاهيا پرێس كۆنفرانسى دا، د. نزار عصمه‌ت خۆيا كر كو دو يه‌كێن مه‌يدانى يێن چاره‌سه‌ريێ دێ ژ لايێ رێكخراوا نوشدارێن بێسنور ڤه هێته دانان بۆ ئاوارێن شه‌رێ مووسل؛ ئێك دێ ل نێزيك گۆندێ خه‌تارێ ل ده‌ڤه‌را ئه‌لقۆش و يا دى ژى ل ده‌ڤه‌را ره‌بيعه هێنه دانان و دێ د تايبه‌ت بن بۆ چاره‌كرنا ئاوارێن شه‌رێ نه‌ينه‌وا، هه‌كه ژ شيانێن وان ده‌ركه‌فت ژ وان جهان نه‌خۆش دێ بۆ دهۆك هێنه ره‌وانه‌كرن.
ل دۆر پلانا پشته‌ڤانيكرنا پێشمه‌رگه‌ى ژى رێڤه‌به‌رێ گشتيێ ساخله‌ميێ ل پارێزگه‌ها دهۆكێ گۆت: “چوار جهـ هاتينه ده‌ستنيشانكرن و ل گۆر پرۆسا ئازادكرنا مووسل دێ چاڤدێريا سه‌ره‌كى يا وان پێشمه‌رگه بيت، دێ ل سه‌نگه‌رێن پێشيێ يێن شه‌رى ترۆمبێلێن هاوارهاتنێ هه‌بن، نه‌خۆشخانێن دهۆك و ئاكرێ يێن ته‌نگاڤيان دێ د ئاماده‌باشيێ دابن ل گه‌ل به‌نكا خوينێ”.
ئه‌ڤرۆ نيوز:
سێ بيڤه‌له‌رزان ئه‌ڤرۆ رۆژا شه‌مبى رێكه‌فتى 15ى چريا ئێكێ 2016 باژێرێن سته‌مبۆل و مانيسا ل توركيا هه‌ژاندن.
ل دووڤ پێگه‌هێ حورییه‌ت، ده‌زگه‌هێ فرياگۆزارى راگه‌هانديه كو بيڤه‌له‌رز ل ده‌ڤه‌را كوجارى يا سته‌مبۆل روودايه و ب گۆره‌ى پێڤه‌به‌رێ ريخته‌ر 4.8 پله بوويه.
ئاشكه‌را ژى كريه كو ئه‌ڤ بيڤه‌له‌رزه ل ده‌ريا ره‌ش ده‌سپێكريه ب كوراتيا 11كم ب تايبه‌تى پشكا ئاسيا يا سته‌مبۆل ب خوه ڤه گرتيه و ل رۆژهه‌لاتێ ده‌ريا مه‌رمه‌ر يا رۆژئاڤايێ ده‌ريا ره‌ش.
نه‌خشێ بيڤه‌له‌رزا سته‌مبۆل
هه‌ر ديسا ل بۆلگاريا ژى هه‌ست ب ڤێ بيڤه‌له‌رزێ كريه، به‌لێ ب گۆره‌ى ده‌زگه‌هێ ڤه‌كولينێن جيولۆجى يێ ئه‌مريكى پله‌يا بيڤه‌له‌رزێ 5.3 بوويه.
هه‌ر ئه‌ڤرۆ ل ده‌ڤه‌را مانيسا د ماوێ دو چركان دا دو بيڤه‌له‌رزان ب پله‌يێن 4.1 و 4.2 ل ده‌مژمێر 5.49 ده‌قيقه رووداينه.
نه‌خشێ بيڤه‌له‌رزا مانيسا
ئه‌ڤرۆ نيوز:
ئه‌ندامێ ده‌سته‌يا سه‌رۆكاتيا جڤاتا وه‌زيران هه‌مام حه‌مودى راگه‌هاند كو زێده‌تر ژ سێ هزار چه‌كدارێن حه‌شه‌د شه‌عبى د شه‌رێن ئازادكرنا هه‌ردو پارێزگه‌هێن ئه‌نبا و سه‌لاحه‌دين دا هاتينه كوشتن.
حه‌مودى كو هه‌ڤده‌م ئه‌ندامێ جڤاتا بلندا ئيسلامى يه ل عيراقێ كو مه‌زنترين جڤاتا شيعايه ل عيراقێ د په‌يڤه‌كێ دا د چارچۆڤێ شه‌ڤبێريێن “حسێن مه دكه‌ته ئێك” دا گۆت: “حه‌شه‌د شه‌عبى زێده‌تر ژ سێ هزار شه‌هيد و شه‌ش هزار برينداران داينه و ئێك ل دووڤ ئێكێ د كريارێن رزگاركرنا سه‌لاحه‌دين و ئه‌نبار و فه‌لۆجه دا، ژ پێخه‌مه‌ت برايێن مه دا ده‌ڤه‌رێن وان بهێنه رزگاركرن و بهێنه ڤه‌گه‌راندن بۆ جهێن وان ب ئارام و سلامه‌تى”.
حه‌شه‌د شه‌عبى چه‌كدارێن شيعه‌نه و ل سه‌ر داخوازيه‌كا مه‌رجه‌عيێن شيعى يێن نه‌جه‌ف پشتى كه‌فتنا مووسل ل 2014ێ هاتينه راگه‌هاندن و پشكدارى د وان شه‌رێن حوكمه‌تا عيراقێ دژى چه‌كدارێن داعش دا كرين پشكدار بووينه.
ئه‌ڤرۆ نيوز:
وه‌زاره‌تا ئه‌وقافێ ل هه‌رێما كوردستانێ راگه‌هاند كو ب سه‌دان گه‌نجێن كورد يێن گه‌هشتينه چه‌كدارێن داعش ل عيراق و سوريا هاتينه كوشتن.
مه‌ريوان نه‌قشه‌به‌ندى، به‌رپرسێ رێڤه‌به‌ريا په‌يوه‌ندى و پێكڤه‌ژيانێ ل وه‌زاره‌تا ئه‌وقاف و كاروبارێن ئاينى ل هه‌رێما كوردستانێ، راگه‌هاند كو ل سالا بۆرى و پشتى راگه‌هاندنا هه‌وا نه‌هێلانا توندوتيژيێ چو حاله‌تێن گه‌هشتنا ناڤ رێزێن داعش نه‌هاتينه تۆماركرن
ده‌رباره‌ى ئه‌و گه‌نجێن پێشتر ژى چووينه ناڤ رێزێن داعش دا زانين كو نێزيكى 500 گه‌نجان چووبوونه ناڤ وێ رێكخراوا تيرۆرستى و نێزيكى 300 كه‌سان د روو ب رووبوونێن هێزێن ئه‌منى و پێشمه‌رگه‌ى و هێزێن هه‌ڤپه‌يمانان و ل سوريا ژى ل گه‌ل وان هێزێن شه‌رى دكه‌ن هاتينه كوشتن و 150 كه‌س ژى ڤه‌گه‌رياينه هه‌رێما كوردستانێ و نوكه د راگرتى نه و هنده‌ك ژى ژ وان هاتينه به‌ردان ژ به‌ر كو په‌يوه‌ندى ب كريارێن كوشتنێ ڤه نه‌بووينه و پشكدارى شه‌ران نه‌بووينه و ئه‌و ژى نوكه ل بن چاڤدێريێ نه.
ل دۆر ژمارا گه‌نجێن كورد يێن نوكه ژى د ناڤ رێزێن چه‌كدارێن داعش شه‌رى دكه‌ن، مه‌ريوان نه‌قشه‌به‌ندى گۆت: “نێزيكى 40 هه‌تا 50 گه‌نجانن”، به‌لێ نه‌ڤه‌شارت كو هه‌تا نوكه چاره‌نڤيسێ وان نه‌هاتيه زانين و گۆتژى: “هنده‌ك ژ وان ناڤێن خوه ژى گوهۆڕى نه و ل گه‌ل تۆڕێن ژ ناڤ داعش ره‌ڤين به‌ر ب وه‌لاتێن فره‌نسا و به‌لچيكا و ئيتاليا چووينه و بۆ ڤێ مه‌ره‌مێ مه ئێكه‌تيا ئورۆپا ئاگه‌هدار كريه و ناڤێن وان يێن دروست بۆ ره‌وانه كرينه”.
ل دووماهيێ ژى به‌رپرسێ رێڤه‌به‌ريا په‌يوه‌ندى و پێكڤه‌ژيانێ ل وه‌زاره‌تا ئه‌وقاف و كاروبارێن ئاينى ل هه‌رێما كوردستانێ گۆت: “نوكه چو گه‌نجێن هه‌رێما كوردستانێ د ناڤ رێزێن داعش دا نه‌ماينه و هه‌كه كورد هه‌بن ژى يێن رۆژهه‌لاتێ كوردستانێ يان جهه‌كێ دى نه”.
ئه‌ڤرۆ نيوز:
سه‌رۆك وه‌زيرێن عيراقێ ژ بزاڤه‌كێ كوشتنێ ل پارێزگه‌ها كه‌ركووك رزگار بوو.
رۆژا ئه‌ينى 24ى چريا ئێكێ 2016 حه‌يده‌ر عه‌بادى سه‌رۆك وه‌زيرێن عيراقێ سه‌ره‌دانا باژێرێ كه‌ركووك كر و سه‌ره‌دانا به‌ره‌يێن هێزێن پێشمه‌رگه‌ى ژى كر.
حه‌يده‌ر عه‌بادى ل سه‌نگه‌رێن پێشيێ يێن پێشمه‌رگه‌ى دانوستاندن ل سه‌ر رزگاركرنا باژێركێ حه‌وێجه يێ باشوورێ كه‌ركووكێ ل گه‌ل فه‌رماندێن پێشمه‌رگه‌ى كر.
ماوه‌كێ كێم پشتى سه‌ره‌دانا سه‌رۆك وه‌زيرێن عيراقێ بۆ سه‌نگه‌ران ل نێزيك مه‌كته‌ب خالد ل رۆژئاڤايێ كه‌ركووك و ب جهـ هێلانا ده‌ڤه‌رێ، سێ هاوان ب ده‌ڤه‌رێ كه‌فتن، به‌لێ خۆشبه‌ختانه چ زيان ل دووڤ خوه نه‌هێلان.
ژێده‌ر: باسنيوز
ئه‌ڤرۆ نيوز:
مارك تۆنه‌ر جێگرێ ئاخفتنكه‌رێ ب ناڤێ وه‌زاره‌تا ژ ده‌رڤه يا ئه‌مريكا راگه‌هاند كو ئه‌و پشته‌ڤانيا په‌كه‌كێ د ئۆپه‌راسيۆنا رزگاركرنا مووسل دا ناكه‌ن و جاره‌كى دى ژى وه‌كو رێكخراوه‌كا تيرۆرستى دده‌ينه نياسين.
ئه‌ڤ گۆتنێن مارك تۆنه‌ر د كۆنگره‌كێ رۆژنامه‌ڤانى دا هاتن كو به‌حس ل چه‌ند ته‌وه‌ران كر و گرنگترين ژى پرۆسه‌يا رزگاركرنا باژێرێ مووسل بوو كو بڕياره ل ڤان رۆژان ده‌سپێ پێ بهێته كرن.
ل دۆر بۆچوونا ئه‌مريكا كو په‌كه‌كه نڤيسينگه‌هه‌كێ ل به‌غدا ڤه‌كه‌ت، تۆنه‌ر گۆت: “يا ئاشكه‌رايه ئه‌مريكا په‌كه‌كێ وه‌كو رێكخراوه‌كا تيرۆرستى دنياسيت و هايدارى چو راپۆرت و بابه‌تێن ژ وى ره‌نگى ژى نينم كو دێ نڤيسينگه‌هه‌كێ ل به‌غدا ڤه‌كه‌ت”.
ده‌رباره‌ى وێ چه‌ندێ كا هه‌كه هات و په‌كه‌كێ پشكدارى د شه‌رێ ئازادكرنا مووسل دا كر ئه‌و دێ دژاتيا وان كه‌ن؟ د به‌رسڤێ دا جێگرێ ئاخفتنكه‌رێ ب ناڤێ وه‌زاره‌تا ژ ده‌رڤه يا ئه‌مريكا گۆت: “گه‌له‌ك ب روونى ئه‌م هاريكاريا په‌كه‌كێ ناكه‌ين”.
د ده‌رباره‌ى پرسياره‌كا دى كا هه‌كه حوكمه‌تا عيراقێ بڕيار دا په‌كه‌كه پشكداريكرى شه‌رێ ئازادكرنا مووسل بكه‌ت هوون دێ چ كه‌ن؟ مارك تۆنه‌ر گۆت: “ئه‌و هێشتا گريمانه و نوكه به‌رسڤێ ناده‌م”.
ئه‌ڤرۆ نيوز:
وه‌لاتيه‌كى ل ئێك ژ مزگه‌فتێن ته‌ناهى ل پارێزگه‌ها دهۆكێ پشتى ب دووماهى هاتنا گۆتارا ئه‌ينيێ ئاگر به‌ردا لاشێ خوه و نامه‌ك ل پشت خوه هێلايه.
رۆژا ئه‌ينى 14ى چريا ئێكێ 2016 ل مزگه‌فته‌كا ته‌ناهى كه‌سه‌كى ل ناڤ مزگه‌فتێ و پشتى ب دووماهى هاتنا نڤێژا ئه‌ينيێ ئاگر به‌ردا خوه و خوه سۆت.
رائيدێ مافپه‌روه‌ر، بێوار عه‌بدولعه‌زيز، به‌رپرسێ راگه‌هاندنێ ل به‌ره‌ڤانيا باژێرى ئه‌ڤ نووچه پشت راست كر و راگه‌هاند كه‌سه‌كى خوه سۆتيه و ره‌وانه‌ى نه‌خۆشخانێ كريه، به‌لێ هه‌تا نوكه نه‌هاتيه زانين ره‌وشا وى يا ساخله‌ميێ يا چه‌وايه.
ب گۆره‌ى گۆتنێن وه‌لاتيێن خه‌لكێ ته‌ناهى ئه‌و كه‌سێ ئاگر به‌ردايه لاشێ خوه نامه‌ك ل پشت خوه هێلايه، به‌لێ هه‌تا نوكه راستيا وێ چه‌ندێ نه‌هاتيه پشت راستكرن.
ڤيديۆ ژ رووداو هاتيه وه‌رگرتن
نيشاندان