ئەڤرۆ نيوز:

گولان حەسەن ئەحەمەد، خووشکا رۆژنامەڤان (محەمەد حەسەن ئەحمەد) یێ بەرنیاس ب (محەمەد سیاسی ئەشکەنەیی) ل دۆر دیارنەمانا برایێ خوە بۆ رۆژناما ئەڤرۆ ئاشکرا کر” ل دەستپێکێ برایێ من سەر ب ئێکەتی نیشتمانی کوردستان ڤە بوو، پاشی بیروباوەرێن وی ھاتنە گوھاڕتن و بوو پارتی و دەست ب کارێ رۆژنامەڤانیێ کر و ل سپێدەھیا رێکەفتێ (3/12/2007) ژمال دەرکەفت و گوتە مە سۆران عومەر ( کو وی دەمی رۆژنامەڤان بوو و نوکە کۆمەلا ئیسلامی کوردستانە ل پەرلەمانێ کوردستانێ) میھڤانی منە ل خوارنگەھی و برایێ من ژمال دەرکەفت وچو، بەلێ ھەتا نوکە ئەو چوون بوو و نەزڤریە و ئەم چو تشتەکێ ژێ نزانین کا چ ب سەرێ وی ھاتیە”.
خوشکا وی رۆژنامەڤانێ بەرزە زێدەتر دبێّیت” تنێ مە ئەو سەرەداڤ یێن ھەین کو دەمێ برایێ من بەرزەبووی، دووماھی کەس کو ل دەف بوویە، سۆران عومەر بوو، ھەر وی دەمی برایەکێ من تێلەفونا سۆرانی کر و گوتێ برایێ من ل گەل تەبوو بەلێ نەزڤریە مال، ل وی دەمی سۆران عومەر د ترومبێلێ دا بوو و بەر ب سلێمانیێ ڤە دچوو و گۆتە برایێ من (ئەز نزانم، تنێ مە خوارن پێکڤە خار و ئەو چوو). بەلێ بۆمە گومان چێبوون وھەر وێ رۆژێ سۆران عومەر گەلەک بلەز چو سلێمانیێ”.
گولان خانێ خویاکر ژی” ل سالا 2007 ێ مالباتا من سکالا ل دادگەھێ ل دژی سۆران عومەری تۆمارکر کو وی دەمی ئەو راگەھاندنکار بوو، بەلێ مالا وی ل سلێمانیێ بوو ونەھاتە دادگەھێ وھەتا من ب خوەژی جارەکا دی ل سالا 2014 ێ سکالا ل سەر تۆمارکر، بەلێ وی دەمی ئەو ببوو ئەندامێ پەرلەمانێ کوردستانێ ل سەر لیستا کۆمەلا ئیسلامی و ب ھیجەتا پارێزبەندیێ نەھاتە ھەمبەری دادگەھێ کو رۆھنکرنێ بدەت ل سەر دیارنەمانا برایێ من چونکی دووماھی جار برایێ من ل دەف وی بوو”.
گوت ژی” من بەلگە یێن ھەین ل سەر سۆران عومەری ئەوژی تۆمارەکا دەنگی یە ل نێزیک دێ بەلاف بیت دەمێ دبێژیت برایێ تە گوتیە من ئەز دێ خوە ژ ئێکەتیێ ڤەکێشم و ھەر د وێ تۆمارا دەنگی دا سوران عومەر دبێژیت دەمێ ئەم د خوارنگەھێ ڤە دروونشتی، تێلەفونەک بۆ برایێ تە ھات و رەنگێ وی تێک چوو، من ژی پرسیار ژێ کر ئەو کی بوو؟ گوت رێڤەبەرێ ئاسایشا قەلادزێ بوو”.
خویاکر ژی” من بەلگە ل سەر وێ چەندێ یێن ھەین کو سوران عومەر ژبلی کۆمەلا ئیسلامی، ل گەل دەزگەھێ لایەنەکێ دی ژی کاردکر، بەلێ من نەڤێت ناڤێ وی لایەنی بینم دا نەبیتە ئاریشەکا سیاسی، من گەلەک بزاف کرن کو سوران عومەری ببینم، بەلێ تنێ ئێک جار ئەز شیام ببینم و ل گەل ئاخڤتم، بەلێ مخابن سۆرانی ئەز ئاگەھدارکرم وگۆتە من، ھەکە خوە ژ ڤێ بادەکێ نەڤەکشینی، دێ ھێیە کوشتن، یان دێ ترومبێلەک خوە ل تە دەت و تە کوژیت، یان دێ سڤکاتی ب تە ھێتە کرن، من ژی گۆت وەسا دیارە تو ڤی کارێ دکەی، گۆت نەخێر ئەز نینم”.
وێ خوشکا رۆژنامەڤانێ بەرزە ئاشکراکر ژی کو” ھەر سوران عومەری ب خوە ل فەیسبوکێ سڤکاتی ب من کر و نەھاتنا وی بۆ دادگەھێ کو رۆھنکرنێ بدەت ل سەر دیارنەمانا برایێ من ھۆکارن کو ئەو دبابەتی دایە و ل دووڤ بەلگەیان سۆران ھاتبوو کرێکرن کو وێ رۆژی سەرەدانا برایێ من کری ل ھەولێرێ و ب ڤی کارێ رابوویە و ئەو بەردەوام گوتنێن خوە دگوھۆڕیت، جار دبێژیت برایێ تە نە ھەڤالێ من بوو، جار دبێژیت ھەڤالێ من بوو” خویاکر ژی” سۆران عومەری گەلەک پێزانین یێن ل دەف ھەین ل سەر دیارنەمانا برایێ من، بەلێ ئەو خوە ژێ ڤەددزیت، چونکی جارەکێ برایێ من ژلایێ ئێکەتیێ ڤە ب نەحەقی ھاتبوو دەستەسەرکرن، پاشی ھاتە ئازادکرن و سۆران عومەری گوتە مە برایێ تە گۆتیە من، من گەلەک بەلگە یێن ل سەر ئێکەتیێ ھەین و دێ بەلاڤکەم وئەڤە بۆ ھەوە بەلگەنە”.
زێدەتر دبێژیت” ل دەف من ھەتا نوکە سۆران عومەر یێ گونەھبارە ھەتا نەھێتە بەردم دادگەھێ، ئەز داخواز ژێ دکەم کو ئەو سەرۆکێ لژنا مافێن مرۆڤی یە ل پەرلەمانێ کوردستانێ، ھەگە ئەو راست دکەت ل دووڤ قانوونێ و مافێن مرۆڤی دچیت، بلا بچیتە بەردەم دادگەھێ و بۆمە رۆھن بکەت کا چ ل برایێ مە ھاتیە” گۆت ژی” پشتی سۆران عومەر بوویە ئەندامێ پەرلەمانێ کوردستانێ، مالا خوە ئینابوو ھەولێری، بەلێ پشتی نەچوونا وی بۆ بەردەم دادگەھێ و فەرمانا دەستگیرکرنا وی دەرچووی، مالا خوە ڤەگوھاستە سلێمانیێ و نەھاتیە ھەولێرێ و بەرسڤا وێ بادەکێ ژی نادەت”.
خووشکا رۆژنامەڤانێ بەرزە دبێژیت” بۆچی سۆران عومەر یێ بەرھەڤ نینە بھێتە بەردەم دادگەھێ، یان ل راگەھاندنێ بەحسێ وێ چەندێ بکەت کو رێڤەبەرێ ئاسایشا قەلادزێ تەلەفونا برایێ من کریە, سۆران خوە ب سەرۆکێ لژنا مافێن مرۆڤی ل پەرلەمانێَ کوردستانێ دزانیت، بۆچی نەشێت پرسیارێ ل ڤێ بادەکێ ژ ئێکەتیێ بکەت و بۆچی نەشێت ل سنورێ ئێکەتیێ بەحسێ مافێ رۆژنامەڤانان بکەت؟”.

ئەڤرۆ نیوز:
ئەندامەکێ فراکسیۆنا ئێکەتی نیشتمانی کوردستان ل جڤاتا نوونەرێن عیراقێ داخواز ژ پارتی دیموکراتی کوردستان دکەت، بۆ دەنگدانا وان ب وەزیرێ دارایی عیراقێ، داخواز ژ ھشیار زێباری بکەت، سێ ھزار فەرمانبەران بۆ کەرکووکێ ب دامەزرینیت، پەرلەمانتارەک ژی دبێژیت، ڤێ داخوازێ چو جوداھی ل گەل رێککەفتنا پارەی دا نینە.
شوان داودی، پەرلەمانتارێ فراکسیۆنا ئێکەتی نیشتمانی کوردستان ل جڤاتا نوونەرێن عیراقێ، دنڤیسینەکێ دا کو ل بەرپەرێ خوە یێ تایبەت ل سەر تۆرا جڤاکی یا فیسبووکی و دەزگەھێن راگەھاندنێ یێن نێزیک ژ ئێکەتی نیشتمانی کوردستان بەلاڤکریە، ئاماژێ ب وێ چەندێ ددەت کو” ل رۆژا 8/9/2016 ێ، د سەرەدانەکێ دا وەکو فراکسیۆنا ئێکەتی نیشتمانی کوردستان ل جڤاتا نوونەرێن عیراقێ بۆ وەزارەتا پەروەردێ یا حوکمەتا فیدرال، ب مەرەما ل بەرچاڤ وەرگرتنا باژێرێ کەرکووکێ دپرسا دامەزراندنێ دا، محەمەد ئیقبال وەزیرێ پەروەردا عیراقێ ب مە راگەھاند کو کەرکووکێ سێ ھزار پلێن فەرمانبەریێ یێن ھەین و پێدڤی ب ( تخێیێ مالی) یە ژ وەزارەتا دارایی یا عیراقێ”.
ئەو پەرلەمانتارێ فراکسیۆنا ئێکەتی نیشتمانی کوردستان، داخواز ژ ھشیار زێباری وەزیرێ داراییێ عیراقێ و پارتی دیموکراتی کوردستان کریە ( وی کاری بجە بینیت) و ب مفایێ گەنجێن کەرکووکێ زانیە کو ژ وان دەلیڤێن کاری مفادارببن.
پەرلەمانتار شوان داودی ئەو چەندە ژی ئاشکراکریە کو مەرجێ وان بۆ مانا ھشیار زێباری د پۆستێ وەزیرێ دارایی دا، ئەو بادەکەیە و دبێژیت” ھەکە دەنگدانا مە ب مانا زێباری، وەکو پارتی دبێژیت رەھەندا نەتەوی ھەیە، پێدڤیە وەکو نیازپاکیەک، زێباری پێشوەخت وی کاری بکەت”.
د بەرامبەر دا شاخەوان عەبدوللا، پەرلەمانتارێ کەرکووکێ ل فراکسیۆنا پارتی دیموکراتی کوردستان ل جڤاتا نوونەرێن عیراقێ ب باسنیۆز راگەھاند” ئەڤ داخوازیا پەرلەمانتار شوان داودی چو جوداھی نینە ل گەل داخوازا پەرلەمانتار ھەیسەم جبووری کو داخوازکریە پارچەکا ئەردی ب بھایێ دو ملیۆن دۆلاران پێ بدەن”. شاخەوانی دووپاتی ل سەر وێ چەندێ ژی کر” ئەو پشکەکە ژ گەندەلیێ، ئەز تەحەدایێ دکەم ھشیار زێباری ئێک فەرمانبەر بۆ پارتی دیموکراتی کوردستان ل کەرکووکێ نە دامەزراندیە، ھەتاکو بۆ ئێکەتیێ ب دامەزرینیت”.
ڤی پەرلەمانتارێ فراکسیۆنا پارتی ل جڤاتا نوونەرێن عیراقێ ئاماژە ب وێ چەندێ ژی کر” ئێکەتی نیشتمانی کوردستان بۆ پۆستێن سەرۆک کۆماری و وەزیرێ رەوشەنبیری نەشیایە سێ ھزار کەسان ب دامەزرینیت، چاوان وەزیرێ دارایی ھشیار زێباری د ڤێ رەوشێ دا دێ شێت وێ چەندێ کەت؟ ژبلی وێ چەندێ ژی د دەمێن بۆری دا ژی وان دەستێ خوە وەشان دبوو، ئێدی دێ داخوازا چ دی کەن؟ “. گۆت ژی” ئەڤێ چەندێ چو جوداھی ل گەل رێککەفتنا پارەی دا نینە”.

ئه‌ڤرۆ نيوز:

شالاو عه‌لى عه‌سكه‌رى ئه‌ندامێ سه‌ركردايه‌تيا ئێكه‌تيێ وه‌كو په‌يڤدارێ ناڤه‌ندا بريارا ئێكه‌تيێ  هاته‌ دياركرن.

ل رۆژا 1 ئيلونێ جێگرێن سكرتێرێن گشتى يێن ئێكه‌تيێ دروستكرنا ناڤه‌ندا بريارێ ل ناڤ ئێكه‌تى نيشتمانى كوردستان راگه‌هاند و د هه‌مبه‌ردا بالێ هيرۆ ئيبراهيم كو خوه‌ ب پرانيا مه‌كته‌با سياسى يا ئێكه‌تيێ دده‌نه‌ نياسين ب ده‌ركرنا به‌ياننامه‌كێ شه‌رعيبوونا وێ ناڤه‌ندێ ره‌تكر.

ئەڤرۆ نیوز،زنار تۆڤی:
ئەڤرۆ رۆژا دوشەمبی 19.9.2016 و لدەمژمێر 4 سپێدێ تۆپخانەیا سۆپایێ تورکی ب دژواری دەوروبەرێن گوندێ کێستە ل بەرواری بالا تۆپ بارانکر و ڤێ تۆپ بارانێ بۆ ماوێ 7 دەمژمێران ڤەکێشا
کۆڤان ئەحمەد وەلاتیەکێ گوندێ کێستەیە بۆ ئەڤرۆ نیوز دبێژیت:ئەڤرۆ ل دەمژمێر 4 سپێدێ تۆپ خانەیا سۆپایێ تورکی ب دژواری گوندێ کێستە ل بەرواری بالا تۆپ بارانکر و ڤێ تۆپ بارانێ بۆ ماوێ پتری 7 دەمژمێران ڤەکێشا و چەندین پرچک و سەچمێن تۆپان ل نێزیکی گوندی کەفتینە و گۆت ژی:ئاگرەکێ مەزن بەربوویە پیش و پەلەخی و پتری 500 دۆنەمێن ئەردێ دارستانێ ھاتینە سوتن و ب ھزاران دارێن کەزانێ و گھیشک و باھیڤ و چەندین جۆرێن دی یێن دارێن بەری و مازی ھاتینە سوتن و نوکە ژی ئاگر یێ بەرەف گوندی ڤە دھێت و گەلەک زیان دێ گەھیتە خەلکێ گوندی و ھەروەسا گەلەک ترس لدەف خەلکێ گوندی پەیدابوویە،چونکی تۆپ ل نێزیکی گوندی داینە.

ئەڤرۆ نیوز:
ئەندامەکێ پەرلەمانێ کوردستانێ ژ فراکسیۆنا پارتی دیموکراتی کوردستان رەخنە ل ھندەک بەرپرس و پەرلەمانتارێن ئێکەتی نیشتمانی کوردستان گرتن و خویاکر، داخویانیێن وان ل دۆر پرسا پەترۆلا ھەرێما کوردستانێ ب تنێ بۆ راکێشانا سۆزا وەلاتیانە و پێدڤی بوو بەری ئالا تالەبانی داتایێن پەترۆلا ھەرێمێ بەلاڤ بکەت، تەلەفۆنەک بۆ قوباد تالەبانی کربا ھەتاکو بزانیت چەند پەترۆل ھاتیە فرۆتن.
د. فەرسەت سوفی ئەندامێ پەرلەمانێ کوردستانێ ژ فراکسیۆنا پارتی دیموکراتی کوردستان بۆ مالپەرێ فەرمیێ پارتی گۆت” پێدڤیە پەرلەمانتار و سیاسەتمەدار ب شێوەکێ بەرپرسیارانە باخڤن و ھەر بۆ جادێ و لڤینا سوزا خەلکی نەئاخڤن، رێژە و چاوانیا فرۆشتنا پەترۆلێ کو وان بەرێزان بەحس لێکری، گەلەک د نەبەرپرسیارانەنە، دێ بێژی وان ئاگەە ژ رەوشا کوردستانێ و بارێ خەلکی نینە، ئەو تنێ بۆ دووبەرەکیێ یە، ل دۆر رێژە و چاوانیا فرۆشتنا پەترۆلێ، دچەند رۆژێن بھێت دا، سەرۆکاتیا جڤاتا وەزیرێن ھەرێما کوردستانێ دێ ل گەل لایەنێن سیاسی ل ھەرێما کوردستانێ کۆمبیت، بلا کەرەم بکەن بچن وان ھژمار و داتایێن خوە ببەن ل وێرێ و ب بەرھەڤبوونا سەرۆک وەزیران و جێگرێ سەرۆک وەزیران و ھەموو وەزیران ئاخڤتنێن خوە بکەن”.
ئالا تالەبانی سەرۆکا فراکسیۆنا ئێکەتی نیشتمانی کوردستان ل جڤاتا نوونەرێن عیراقێ ددیارەکا تەلەڤزیۆنی دا راگەھاندبوو کو ل دووڤ داتایێن وەزارەتا پەترۆلا عیراقێ، ل ھەیڤا بۆری ھەرێما کوردستانێ رۆژانە 661 ھزار بەرمیلێن پەترۆلێ یێن ھنارتینە بازارێن جیھانێ، ئەڤە ددەمەکی دا و ل دووڤ داتایێن وەزارەتا سامانێن سروشتی ل ھەرێما کوردستانێ ریژا پەترۆلا ھاتیە ھنارتن بۆ دەرڤە ژ وێ ھژمارێ کێمترە.
د. فەرسەت سوفی، ل دۆر ڤێ پرسێ دبێژیت” ھەکە شیان بسەلمینن ھژمار و داتایێن وان ددروستن و حوکمەتێ راستی نەگۆتیە، بلا ب مەردانە ھەلویستی وەرگرن، بەلێ ھەکە حوکمەتێ باوەری بۆ وان دروستکر ل دۆر داتایێن خوە، ئێدی چو تشت نامینیت کو د دەزگەھێن راگەھاندنێ دا باخڤن، ئەڤە حوکمەت دەرگەە ڤەکرن، ھەکە نەچن ب راشکاوانە ئاخڤتنێن خوە بێژن، یان ژی بەرھەڤی کۆمبوونێ نەبن، حەق نینە ئێدی خەلک گوە لێ بگریت”.
گۆت ژی” پێدڤی بوو برادەرێن ئێکەتیێ پرسیارێ ژ قوباد تالەبانی کو کەسەکێ بەرێزە و ب شێوەکێ دەزگەھی کاردکەت، حەق ئەوە بچن پرسیارێن خوە ژ وی بکەن، زەحمەتەک بربا و تەلەفۆنەک بۆ جێگرێ سەرۆکێ حوکمەتا ھەرێما کوردستانێ کربا و گوتبایێ ئەو 410 ھزار بەرمیلێن بەلاڤکرین ئیشکال ل سەر ھەیە، ئایا 661 ھزارن، یان 410 ھزارن، ب راستی ژی ل دەڤ من جھێ حێبەتیێ یە ئەو داخۆیانی و رەفتارێن نەبەرپرسانە یا ھندەک کەسان، ژبلی لڤینا سوزا خەلکی و بەرژەوەندیا سیاسی چو دی نینە، حوکمەت یا ھاتیە سەر خەتێ، بلا لایەنێن سیاسی بچن ل وێرێ ئاخڤتنێن خوە بێژن، خەلک یێ ژ وان داخۆیانیان وەستیای، بلا بچن ئاخڤتنێن خوە ل بەرامبەری حوکمەتێ بکەن”.

ھەر ل دۆر ڤی بابەتی و ل دووڤ باسنیۆز، بەھرۆز جەعفەر چاڤدێرێ سیاسی و ئێک ژ رێکخەرێن خوەنیشادانێن 17 شوباتێ د بەرپەرێ خوە ل سەر تۆرا جڤاکی یا فیسبووکێ نڤیسی یە” 23% ژ داھاتێ پەترۆلا کەرکووکێ دچیتە سەر حیسابا کەسی یا پارێزگارێ کەرکووکێ و نەجمەدین کەریم پارێزگارێ کەرکووکێ ب دەھان کەسێن دەوروبەرێ خوە یێن کرینە ملیۆنێر و ھەموو لڤینەکا رەوشەنبیری و رۆژنامەڤانی ل کەرکووکێ یا ھاتیە ژناڤبرن”.