NO IORG
نووترين نووچه
نوچێن گرنگ

ئەڤرۆ نیوز:
ب تۆمەتا گەفێن کوشتنێ و تەشھیرکرنێ ب ھەڤژینا خوە، دادگەھا توندوتیژیا خێزانی ل ھەرێما کوردستانێ فەرمانا دەستەسەرکرنێ بۆ پەرلەمانتارەکێ کورد ل پەرلەمانێ عێراقێ دەرکریە و پارێزەرێ بادەکا ھەڤژینا ئەڤی پەرلەمانتاری ژی دبێژیت، ب نڤیسارا فەرمی دادگەھێ داخوازا ھەلگرتنا پارێزبەندیێ ل پەرلەمانێ عێراقێ کریە ھەتا ئەڤ پەرلەمانتارێ تۆمەتبار ب گەفکرنێ ل ھەڤژینا خوە بھێتە دەستەسەرکرن، ھەکە پارێزبەندی ھاتە ھەلگرتن ژی دێ گەشت کرن ل ڤی پەرلەمانتاری ھێتە قەدەغە کرن.
پارێزەر ئاسۆ ھاشم، بریکارێ ھەڤژینا بەرێ یا مەسعود حەیدەر پەرلەمانتارێ کورد ل پەرلەمانێ عێراقێ بۆ رۆژناما ئەڤرۆ گۆت” مەسعود حەیدەر پەرلەمانتارێ عێراقێ ھەڤژینەکا دی ئینایە و تەشھیر ب ھەڤژینا خوە یا بەرێ کریە، لەوڕا من وەک بریکارێ ھەڤژینا ئێکێ یا مەسعود حەیدەری ل دادگەھا خێزانی و نەھێلانا توندوتیژیێ سکالا ل سەر تۆمار کریە و دادگەھێ ب تۆمەتا ناڤبرنێ فەرمانا دەستەسەرکرنی بۆ مەسعود حەیدەر دەر کریە، بەلێ ژبەر ھەبوونا پارێزبەندیێ ھێشتا پۆلیسان دەستەسەر نەکریە، دادگەھا توندوتیژیا خێزانی ب نڤیسارەکا فەرمی داخواز ل پەرلەمانێ عێراقێ کریە پارێزبەندی ل پەرلەمانتار مەسعود حەیدەر بھێتە وەرگرتن ھەتا پۆلیس بشێن دەستەسەر بکەن.
پارێزەر ئاسۆی گۆتژی” ھێشتا پەرلەمانێ عێراقێ چ بەرسڤ نەدایە، بەلێ ئەگەر پەرلەمان نوونەرێ خەلکی یە و دڤێت قانوون بھێتە بجە ئینان، ئەڤە پێدڤیە پارێزبەندی ل سەر ئەڤی پەرلەمانتاری بھێتە راکرن ھەتا بھێتە دادگەە کرن، چونکو مەسعود حەیدەری ژبلی سفکاتی و ئاخفتنێن نەھەژی گوژمەکێ پارەی ژی ل ھەڤژینا خوە یا کەڤن برینە و گەفێن کوشتنێ ژی لێ کرینە و ھەر دەمێ پەرلەمانی پارێزبەندی ل سەر راکر دێ گەشتگرن ژی لێ ھێنە قەدەغەکرن و گورەی قانوونێ دێ ھێتە سزادان، چونکی مەسعود حەیدەری سەرەرای ئینانا ھەڤژینا دویێ ل دەرڤەی قانوونێن ھەرێما کوردستانێ گەفێن کوشتنێ ل ھەڤژینا کەڤن کرینە و توندوتیژی ھەمبەر بکارئینایە.

ئەڤرۆ نیوز:
جێگرێ سەرۆکێ ئێکەتیا مامۆستایێن کوردستانێ ئاشکرا کر کو ڤێ ھەیڤێ دێ ھاریکاریا حوکمەتێ ل سەر مامۆستایان ھێتە بەلاڤکرن و گۆت: “پارێ سندۆقا ھاریکاریا مامۆستایان ل سلێمانیێ دێ بۆ مامۆستایێن ھەموو کوردستانێ بیت”.
عەتا ئەحمەد، جێگرێ سەرۆکێ ئێکەتیا مامۆستایێن کوردستانێ بۆ رۆژناما ئەڤرۆ دیار کر کو ئەو شه‌ش ملیارێن حوکمەتێ بۆ ھاتنوچوونا مامۆستایان مەزاختین دێ وەک پاداشت ژ دەرڤەی مووچەی ل سەر مامۆستایان ھێتە بەلاڤکرن و گۆت: “ل دووڤ ئامارا مامۆستایێن دەوامێ دکەن ھەر مامۆستایەک دێ کۆژمێ 60 ھزار دیناران وەرگریت و ھێشتا ژڤانێ بەلاڤکرنێ نەھاتیە دیارکرن، بەلێ ئەم پێشبینیێ دکەین پارێ کریا ھاتنوچوونا ماموستایان ڤێ ھەیڤێ بھێتە بەلاڤکرن و ژ ھەیڤا بۆری دێ بۆ مامۆستایان ھێتە ھژمارتن، چونکی ھەر ژ دەستپێکا سالا نوو یا خواندنێ ھەر ھەیڤ دێ کرێ یا ھاتنوچوونا مامۆستایان ھێتە مەزاختن”.
ناڤھاتی ئاماژە دا وێ چەندێ کو سندۆقا کۆمکرنا پارەی ژ لایێ ژۆرا بازرگانیا سلێمانیێ ڤە ھێشتا ب تمامی نەھاتیە پەسەندکرن، چونکی مامۆستا د رازی نینن ب ھەر شێوەکێ ھەبیت پارە بۆ بھێتە کۆمکرن و گۆت: “مامۆستا خوازوک نینە و دڤێت کەسایەتیا مامۆستای بەرچاڤ بھێتە وەرگرتن”.
جێگرێ سەرۆکێ ئێکەتیا مامۆستایێن کوردستانێ خویا کر کو پارێ سندۆقا ھاریکاریا مامۆستایان دێ بۆ مامۆستایێن کوردستانێ ھەموویێ بیت نەبتنێ بۆ یێن پارێزگەھا سلێمانیێ و گۆت: “بشێوەکێ گشتی ھاریکاریەکا باشە دگەل پارێ ئەڤێ رێکخراوا ئەلمانی و پارێ حوکمەتێ و سندۆقا ھاریکاریا مامۆستا دێ پارەکێ باش کۆمبیت، بەلێ ھەر چارەسەریا ئاریشا مووچێ مامۆستایان ناکەت”.

ئەڤرۆ نيوز:
رێڤەبەرێ پەروەردا قەزا شنگالێ دیار کر کو ھەتا نوکە 15 قوتابخانە ل شنگال و دەوروبەران ھاتینە ڤەکرن و پتری ھزار و 700 قوتابی ل وان قوتابخان دخوونن، دیسا پەکەکێ ژی چەند قوتابخانەک بۆ شووشتنا مێشکێ زارۆیێن ئێزدی ڤەکرینە و دبێژیت: ئەڤە کارەکێ خرابە و مە داخواز ژ دایک و بابێن زارۆیان کریە، زارۆیێن خوە ژ وان قوتابخانان دوور بێخن.
حسێن خدر، رێڤەبەرێ پەروەردا قەزا شنگالێ ئاشکرا کر، پتری 57 قوتابخانە ل سنوورێ پەروەردا شنگالێ، ل شنگالێ و د ناڤ کەمپان دا ھاتینە ڤەکرن و بۆ مالپەرێ فەرمیێ پارتی دیموکراتی کوردستان گۆت: “نوکە پتری 29 ھزار قوتابی ل وان قوتابخانان بەردەوامیێ ب خواندنا خوە یا سالا خواندنێ 2016 – 2017 ددەن”.
گۆتژی: “ب تنێ ل سنوورێ قەزا شنگالێ 15 قوتابخانە ھاتینە ڤەکرن، ژ وان 14 بنەرەتن و ئێک ژی ئامادەیی یە و پتری ھزار و 700 قوتابی ل وان قوتابخان دخوونن، دیسا ھەکە ئاوارە پتر ڤەگەرنە سەر مالێن خوە دێ ھێشتا قوتابخانان ڤەکەین”.
حسێن خدر ئاماژە ب وێ چەندێ ژی کر، سالا بۆری پەکەکێ چەند قوتابخانەک ڤەکربوون و مەرەم ژ ڤەکرنا وان قوتابخانان، شووشتنا مێشکێ زارۆیێن ئێزدی بوو و گۆت: “ئەڤ سالە ژی پەکەکێ ھندەک قوتابخانە بۆ کادرێن خوە ڤەکرینە، پشتی ئەم چووینە نک دایک و بابێن زارۆیێن خوە دھنێرنە قوتابخانێن پەکەکێ و مە گۆتیێ، ھەکە زارۆیێن ھەوە 20 سالێن دی ل قوتابخانێن پەکەکێ بخوونن، نە ھەرێما کوردستانێ و نە ژی عیراق دانپێدانێ ب وان باوەرنامان ناکەت، لەو دایک و بابێن وان زارۆیێن خوە ژ قوتابخانێن پەکەکێ دەرخستن و ئینانە قوتابخانێن مە”.
رێڤەبەرێ پەروەردا قەزا شنگالێ ئاشکرا ژی کر، وان بۆ ئەڤ سالە ژی ئاریشا پرتووک و میلاکان ھەیە و ئەڤێ چەندێ ژی گەلەک ئاریشە بۆ وان دروستکرینە.

ئه‌ڤرۆ نیوز:
فراكسیونا پارتى دیموكراتى كوردستان ل په‌رله‌مانێ كوردستانێ، ب ناراسته‌خو به‌رسڤا ئارام شێخ محه‌مه‌د دا و د راگه‌هاندنه‌كێ دا دیاركریه‌ ” ئه‌و كه‌سێن داخوازێ دكه‌ن به‌غدا وه‌كو پارێزگه‌هێن دى یێن عیراقێ ره‌فتارێ ل گه‌ل هه‌رێمێ بكه‌ت، یاریكرنه‌ ب چاره‌نڤیسێ خه‌لكێ كوردستانێ و دژایه‌تیكرنا خه‌باتا گه‌لێ كوردستانێ یه‌ و بێ بهاكرنا ته‌ماشه‌كرنا خوونا شه‌هیدان و ئه‌نفال و قوربانیێن مه‌یه‌ و دچیته‌ خانا دژایه‌تیكرنا راسته‌وخو یا تمامیا خه‌لكێ كوردستانێ و دیرۆكا وێ یا خویناوى، هه‌روه‌سا دچیته‌ خانا خیانه‌ت و خوه‌فرۆشیێ و بۆ كه‌سێ ناچیته‌ سه‌ر”.
رۆژا شه‌مبى 12/11/2016 ل باژێرێ سلێمانیێ ماموستایێن نه‌رازى خونیشادانه‌ك ئه‌نجامدا، ئارام شێخ محه‌مه‌د جێگرێ سه‌رۆكێ په‌رله‌مانێ عیراقێ د ناڤ خونیشاده‌ران گوتاره‌ك پێشكێش كر و راگه‌هاند” دێ بزاڤێ كه‌ین حوكمه‌تا عیراقێ راسته‌وخو ره‌فتارێ ل گه‌ل پارێزگه‌هان بكه‌ت و فشارا جه‌ماوه‌رى پێدڤیه‌ هه‌بیت بۆ وێ یه‌كێ بگه‌هیننه‌ ئارمانجێن خوه‌”.

ئەڤرۆ نیوز:
وەزارەتا بازرگانییا ئیراقێ راگەھاند: ئالوگورییا بازرگانییا دناڤبەرا ئیراق و ئیرانی دا بتنێ د نیڤا ئێکی یا ئەڤ سالە دا، دو ملیار و پێنجسەد ملیۆن دۆلار دەربازکرینە.
بەرھەمێن ئیراقێ ژ ئیرانێ ھاوردە کرین پێک دھێن ژ: ترۆمبێل، تراکتۆر، پلاستیک، گلاس، پەرۆک، زێدەباری خواراک و مادەیێن ئاڤاکرنێ.

ئەڤرۆ نیوز:
دۆنالد ترەمپ، سەرکەفتیێ ھەلبژارتنێن سەرۆکاتییا ئەمریکا د بانگەشەیا ھەلبژارتنان دا وی بخوە پارە ل بانگەشەیا خوە دمەزاختن، ژبەرکو بھایێ تۆرا سامانی وی ل گۆری گۆفارا فۆربس سێ ملیار و پێنجسەد ملینۆن دۆلارن.
دەمێ د بانگەشەیێ دا پرسیار ژ ترامپی ھاتیە کرن دی چ ل ٤٠٠ ھزار دۆلاران ژ مووچەیێ سەرۆکاتییا ئەمریکا کەت دەمی دبیتە سەرۆک، ناڤھاتی گۆت بوو: ئەز خوە سەنتەکی ژ وان ٤٠٠ ھزار دۆلاران وەرناگرم، ئەو مووچە بۆ من نەیێ گرنگە.
ترەمپی بەردەوامی ئاماژە کرییە بێ منەتییا خوە ژ وی مووچەی، لێ ھێشتا دیارنەبوویە ل دەمێ ب فەرمی پۆستی سەرۆکاتیێ وەردگریت دێ چاوا سەرەدەریێ دگەل وی کوژمەیێ پاران کەت.

ئه‌ڤرۆ نيوز:

وه‌زاره‌تا خواندنا بلند بۆ جارا دووێ سێ پوستان ل زانكۆيا پوليته‌كنيك يا دهۆك رادگه‌هينيت، له‌وما داخواز كريه‌ ئه‌وێن كو مه‌رج تێدا سيڤيێن خوه‌ بۆ ڤى ئيميلى فرێكه‌ن [email protected]

پۆست ئه‌ڤه‌نه‌:

1- ڕاگرێ کۆلێژا تەکنیکى ئەندازیارى دهۆک

2- ڕاگرێ کۆلێژا  تەکنیکى کارگێرى دهۆك

3- ڕاگرێ پەیمانگه‌ها تەکنیکى کارگێرى دهۆک

مه‌رج ژى ئه‌ڤه‌نه‌:

1- ناسناڤێ وى يێ زانستى ژ پروفيسورێ هاريكار كێمتر نه‌بيت

2- خزمه‌تا وى يا زانكۆيێ ژ 10 سالان كێمتر نه‌بيت

دووماهى ژڤان ژى بۆ پێشكێشكرنا فورمان، 15/11/2016

بۆ پتر پێزانينان سه‌ره‌دانا لينكێ وه‌زاره‌تا خواندنا بلند بكه‌ن

لينك

ئه‌ڤرۆ نيوز:

وەزارەتا دارایی ئەڤرۆ ١٢ێ تشرینا دوێ یا ٢٠١٦ێ خشتەیەکا نوو یا موچه‌ى  راگەهاند.

 د راگەهاندنێ دا هاتییە، رۆژا دووشەمبیێ ١٤ێ تشرینا دوێ یا ٢٠١٦ێ موچەیێ دیوانا وەزارەتا پێشمەرگە دێ هێتە دابەشکرن.

هەروەسا د راگەهاندنێ دا وەزارەتا دارایی ئاماژە ب وێ ئێکێ ژی کریە، کو رۆژا سێشەمبی و چارشەمبیێ ژی رێکەفتی ١٥ێ و ١٦ێ تشرینا دوێ یا ٢٠١٦ێ مووچەیێ یەکەیێن (٧٠ێ و ٨٠)ێ یێن هێزێن سەر ب وەزارەتا پێشمەرگە دێ هێتە دابەشکرن.

ئه‌ڤرۆ نيوز:

شيره‌تكاره‌كێ سه‌رۆكێ هه‌لبژارتى يێ ئه‌مريكا رادگه‌هينيت كو ئيدارا نوو يا ئه‌مريكا رێزه‌كا زۆر بۆ سه‌رۆكێ هه‌رێما كوردستانێ و هێزێن پێشمه‌رگێ كوردستانێ هه‌نه‌.

سام يۆنۆ، شيره‌تكارێ دۆنالد تره‌مپ، سه‌رۆكێ هه‌لبژارتيێ ئه‌مريكا بۆ كاروبارێن رۆژهه‌لاتا ناڤه‌راست كو K24 راگه‌هاند كو ئيدارا نوو يا وه‌لاتێ وى رێزه‌كا تايبه‌ت بۆ هێزێن پێشمه‌رگه‌ى و قوربانيدانێن وان ل دژى تۆندڕه‌وێن داعش هه‌يه‌.

سام يۆنۆ گۆتژى: “ئێك ژ كارێن ده‌سپێكێ يێن تره‌مپ گرنگيدانه‌كا زێده‌تره‌ ب هه‌رێما كوردستانێ و عيراقێ و سه‌رۆكێ هه‌لبژارتى ژى رێزه‌كا زۆر بۆ مه‌سعود بارزانى سه‌رۆكێ هه‌رێما كوردستانێ و گه‌ل و حوكمه‌تا هه‌رێما كوردستانێ هه‌يه‌.

website security
WP Facebook Auto Publish Powered By : XYZScripts.com