ئەڤرۆ نيوز:

گەریلایێن رێکخستنا (فارک) یا کۆلۆمپیا د داخۆیانیەکا فەرمی دا راگەھاند کو وان و حوکمەتا کۆلۆمبیا پشتی شەرێ ٥٢ سالان پەیمانا ئاشتیێ مۆر کریە و ئێدی شەر ب تەمامی ھاتیە راوەستاندن و دێ پشکداریا د ژیانا سیاسی دا کەن و ئاشکرا ژی کریە کو ئەو د ئامادەنە بچنە رۆژئاڤا و ل گەل کوردان شەرێ داعشێ بکەن.
کۆمیتەیا ناڤەندی یا رێکخسنا ھێزێن شۆرەشگێرێن چەکدار یێن کۆلۆمپیا (فارک) د داخۆیانیەکێ دا راگەھاند کو ئەو ل کۆلۆمپیا گەھشتنە ئارمانجا خوە و شیان سیستەم، سیاسەت و رێڤەبەرنێ دا گوھۆرینان بکەن و ل گەل حوکمەتا کۆلۆمپیا پەیمانا ئاشتیێ مۆر بکەن و ڤەگەرنە د ناڤا ژیانا سیاسی دا و چەکداریێ ژ ھۆلێ راکەن.
کۆمیتەیا ناڤەندی ھەروەسا راگەھاندیە کو ئەندام و گەریلایێن وان خوەدان ئەزموونەکا گەلەک مەزنن و ئەزموونا وان یا شەری ٥٢ سالان ھەیە و ئاشکرا کریە کو ئەو دۆزا رەوا یا گەلێ کورد ژ نێزیک ڤە دشۆپینن و ھەکە ھاتە خواستن ئەم دشێین ل رەخ ھێزێن رۆژئاڤایێ کوردستانێ شەرێ داعشێ و کۆمێن تیرۆرستی یێن دی ژی بکەن و ببنە ھەڤال و پشتەڤانێ شۆرەشگێرێن کورد.
کۆمیتەیا ناڤەندی ھەروەسا سەرنجێ راکیشاندیە سەر داگیرکەریا دەولەتا تورک یا ل رۆژئاڤایێ کوردستانێ و بانگ ل ھەموو ھێزێن شۆرەشگێر و دیمۆکراتیک یێن جیھانێ کرینە کو ل ھەمبەر داگیرکەریا دەولەتا تورک بێدەنگ نەمینن و ڤێ یەکێ ژی ئاشکرا کرن کو ئەو بەرھەڤن ل ھەمبەر تیرۆرستێن داعشێ و دەولەتا داگیرکەر یا تورکیا ل گەل کوردان جە بگرن.
ل ئالیێ دی و ل دووڤ ئاژانسێن نووچەیێن ھەرێمی پەیوەندیێن راستەوخوە یێن یەپەگێ ل گەل گەریلایێن (فارک) ھەنە و ڤێ رێکخستنێ بۆ گەریلا و ئەندامێن خوە رێیا چوونا رۆژئاڤا ڤەکریە و ھژمارەک گەلەک زێدە گەریلایێن رێکخستنا ناڤھاتی پێشنیاز کرینە کو بچنە کوردستانێ.
د ڤێ دەربارێ دا بەرپرسێن یەپەگێ ژی ئاشکرا دکەن کو پەیوەندیێن وان یێن دۆستانە ل گەل (فارک) ھەنە و ڤێ یەکێ ژی راگەھاندن کو پێزانین وان ھەنە کو ھژمارەک گەلەک زێدە گەریلایێن کۆلۆمپی خوە بەرھەڤ کرینە کو بھێنە کوردستانێ و گەنگەشا سەرەکی ل سەر چاوانیا ھاتنا ڤێ ھێزا شۆرەشگێرە بۆ رۆژئاڤایێ کوردستانێ.

ئەڤرۆ نیوز:
شارەزایەکێ سیاسەتا ئیرانێ ئاماژە ب سەرەدانا سەرۆک بارزانی بۆ کۆمارا ئیسلامیا ئیرانێ دکەت و دبێژیت، سەرەدانا سەرۆکێ ھەرێما کوردستانێ پێدڤیە بھێتەکرن، ژبەرکو دەمەکێ نێزیک دێ گۆھڕین بسەر نەخشەیێ دەڤەرێ دا بھێت ، ھەروەسا دیارکر، پرسا کاریگەریا ئیرانێ لسەر وەلاتێ عێراقێ دێ ھێتە بەحسکرن و عێراق یا بەرەف دەولەتەکا عەسکەریا شیعی دچیت.
حیسام سدیق، شارەزا ل کاروبارێن سیاسەتا ئیرانێ بۆ رۆژناما ئەڤرۆ گۆت” سەرەدانا ڤێجارێ یا سەرۆکێ ھەرێما کوردستانێ بۆ کۆمارا ئیسلامیا ئیرانێ سەرەدانەکا جۆدایە ل سەرەدانێن بەرێ، چونکە کۆمەکا پرسێن گرنگ ھەنە ڤێجارێ سەرۆکێ ھەرێما کوردستانێ دێ دگەل بەرپرسێن تەھران دانوستانان لدۆر بکەت، ئێک ژوان پرسان کۆ مەسعود بارزانی دێ ب رژدی دگەل ئیرانێ بەحس کەت، ئەف گۆھڕینێن نوکە ل دەڤەرێ پێشبینی دھێتەکرن گۆھڕین بسەر نەخشەیێ دەڤەرێ دا بھێن و بۆچوونا ئیرانێ وەربگریت، ھەروەسا بارزانی دێ دیتناخۆ بۆ روویدان و پێشھاتێن دەڤەرێ بۆ ئیرانێ ئاشکراکەت، بدیتنامن ئەف گەشتا سەرۆکێ ھەرێما کوردستانێ بۆ ئیرانێ د قۆناغەکا گرنگدایە، ھەم دەڤەر یا دگۆھڕیناندا ھەم ئیران وەلاتەکێ گرنگ و کاریگەرە لسەر نەخشێ دەڤەرا رۆژھەلاتا ناڤین، پرسەکادی یا دگەل ئیرانێ دھێتە بەحسکرن، ئاریشەیا عێراقێ یە خویایە عێراق یا بەرەف دەولەتەکا عەسکریا شیعی دچیت و ئیرانێ رۆل و کاریگەری لسەر عێراقێ ھەیە، ھەرێما کوردستانێ دخوازیت بۆچوونا ئیرانێ وەربگریت، کو ئایا دێ پاشە رۆژا ھەرێما کوردستانێ چبیت دچوارچوڤێ عێراقێ دا، ئەگەر رەوشا عێراقێ یا ھوسابیت بەرەیێ سوننە و کورد دێ ھێتە بکارئینان.
حیسامی گۆتژی” مژارەکادی ئیران دخوازیت دگەل سەرۆکێ ھەرێما کوردستانێ دانوستان لسەر بکەت، پرسا کوردێن رۆژھەلاتێ کوردستانێ یە، چونکە ھەتا نوکە کۆمارا ئیسلامیا ئیرانێ پرسا رۆژھەلاتێ کوردستانێ وەکی پرسەکا مری سەرەدەری دگەلکریە و نوکە گەھشتیە ڤێ باوەریێ باشورێ کوردستانێ کاریگەری لسەر رۆژھەلاتێ کوردستانێ یەو دشێن بڕێیا ھەرێما کوردستانێ چارەسەریا شەڕۆئالۆزیێن ڤێ دوماھیێ بکەن، کو دناڤبەرا پێشمەرگەیێن حزبا دیموکراتا کوردستانێ و سوپایێ پازدارێن ئیرانێ چێبوی، ئەڤادی دمینیت لسەر سەرۆکایەتیا ھەرێما کوردستانێ چو ئەجندا بۆ سەرەدانا ڤێجارا یا ئیرانێ ھەیە یاکو بڕیارە ل داھاتی مەسعود بارزانی وەکی سەرۆکێ ھەرێما کوردستانێ سەرەدانا ئەڤی وەلاتی بکەت.