ئەڤرۆ نیوز:
چاڤدێرێ سیاسی دیندار نەجمان دۆسکی ل سەر سەرەدانا سەرۆک بارزانی و شاندێ ل گەل دا بۆ بەغدا و ھێرشا راگەھاندنا کۆمەل و گۆرانێ بۆ سەر ئێکگرتوو بۆ رۆژناما ئەڤرۆ دبێژیت: دەمێ ئەو ھەر سێ لایەن ئۆپۆزسیۆن و نە دحوکمەتێ دا ئێک گۆتار ھەبوو، ھەروەسا دەمێ ھاتینە دناڤ حوکمەتێ ژی دا، ھەر گۆتارا وان گۆتارەکا ئوپۆزسیۆنی و دژی حوکمەتا ھەرێما کوردستانێ بوو، ھەروەسا کۆمەل و گۆرانێ ھزر دکر دێ ھەر ئێکگرتوو دڤی بەرەی دا مینیت، دێ ل دژی پارتی و حوکمەتێ وەکو ئوپۆزسیۆن کارکەت، ھەروەسا ھەبوونا گەندەلیێ و قەیرانا دارایی تارادەیەکێ بۆ وان یا ھاریکاربوو، دیسا ئەڤ کێشا دناڤبەرا گۆرانێ و پارتی چێبووی، گۆرانێ گڤاشتن ل سەر کۆمەل و ئێکگرتوو کر کو ب چنە بەرەیێ وێ، ھەتاکو رادەیەکی دڤیا ئێکەتی ژی ب چیتە ل گەل وان، لێ کۆمەلا ئیسلامی ب ھەموو ھێزا خوەڤە چوو بەرەیێ گۆرانێ، لێ ئێکگرتوو ھەتاکو بەری کونگرەی گۆتارا وێ یا ھەڤسەنگی بوو، دناڤبەرا پارتی و گۆرانێ دا، لێ چوونا سەلاحەدین بەھائەدینی ل گەل سەرۆک بارزانی بۆ بەغدا، سەنگەکێ دی دا ئێکگرتوویێ، چونکی وی شاندی داخوازا مافێ سەربەخۆیێ ل گەل حوکمەتا عێراقێ بەحسکریە،کو چەندین سالە کوردان خەبات و قوربانی ژبۆ وێ چەندێ داینە،کو ئەو ژی دامەزراندنا دەولەتا کوردستانێ یە، ئەڤە قۆناغەکا ھەڤچەرخە د مێژوویا خەباتا مللەتێ کورد دا.
ھەروەسا گۆت: گۆران و کۆمەلێ وەسا ھزر کریە پشتی کونگرێ ئێکگرتوو،کو ستافێ نوو یێ سەرکردایەتیا ئێکگرتوو و ل گەل ئەمیندارێ گشتی دێ سیاسەتا ئێکگرتوو گۆھوڕن و دێ چنە د بەرەیێ پارتی دا، ھەروەسا نوکە پەیوەندیێن ئێکگرتوو ل گەل پارتی و حوکمەتێ د ئاشکرانە، ئەڤە بوویە جھێ نیگەرانیا ھەردو یان و بتایبەتی کۆمەلا ئیسلامی کو ھێرشێن تۆند و دژوار دکەتە سەر ئێکگرتوویا ئیسلامی.
ناڤھاتی زێدەتر گۆت: خەما گۆران و کۆمەلێ بەغدا نەبوویە و پتر ئەو ل سەر حوکمەتا ھەرێمێ راوەستی یاینە، لەورا ئەڤ قەیرانا پەیدابووی ژی ئەگەرێ داکەفتنا نرخێ نەفتێ بوویە، ھەر چەندە خەلکێ گازندە ژ ئەدایا حوکمەتێ ھەیە، لێ دڤێت نوکە ھەموو پارتێن سیاسی یێن کوردستانێ ملێ خوە بدەنە بەر ئەڤێ قەیرانێ،داکو ڤی مللەتی ژ ڤێ قەیرانێ قورتال بکەن، لەورا دڤێت ھێزێن سیاسی مۆزایدێ ل سەر ڤێ چەندێ نەکەن، چونکی ئەڤە قەیرانەکا جەماوەری یە، ھەموو پارت و لایەنێن سیاسی ڤەگرتینە، لێ مخابن ھندەک لایەنا ئەڤ چەندە بۆ خوە ب دەلیڤە دیتیە و ڤێ چەندێ وەک بانگەشەک بۆ خوە ب کار دئینن، ھەروەسا ئەو لایەن ھاندانا خەلکی دکەن کو کارێن خراب دژی حوکمەتێ بکەن و ب چنە سەر بارەگایێن پارتێن سیاسی، ئەڤە نە د خزمەتا خەلکێ کوردستانێ دایە.
دیندار دوسکی دیارکر:ڤێ جارێ سەرۆک بارزانی بەحسێ دەولەتا کوردی و جودابوونێ ب گەرمی ل گەل عەبادی و سەرکردێن عێراقێ بەحسکریە،ھەروەسا ئەڤ بابەتە بۆ سەرکردێن عێراقێ ژی تشتەکێ غەریب نەبوویە، وان گۆتیە بارزانی وە دڤێت ل گەل مە بن، یان ژی بڕیارا جودابوونێ بدەن، ھەروەسا گرنگیا ڤێ سەرەدانێ ئەو بوو،کو شاندێ ھەرێما کوردستانێ بەحسێ وان ھەموو کێشەیێن ھەرێمێ ل گەل بەغدا کریە، لێ تەوەرێ سەرەکی یێ سەرەدانا سەرۆک بارزانی بۆ بەغدا بەحسێ جودابوونا کوردستانێ و دامەزراندنا دەولەتا کوردی ھاتیە کرن، لەورا ئەمریکا و وەلاتێن ئورۆپی ژی گۆتیە،کو دڤێت کورد ل گەل بەغدا رێک بکەڤن،ل سەر ڤی بابەتی،لەوما ھەر بریارەکا خەلکێ عێراقێ ب کورد و عەرەب ڤە بدەن،ئەو ژی دێ پشتەڤانیێ لێ کەن.
چاڤدێرێ سیاسی ھێشتا دبێژیت: مللەتێ مە خەبات کریە دا بگەھنە ئارمانجا خوە یا سەرەکی یا پیرۆز و مەزن کو ئەو ژی دەولەتبوونە،لەورا دانوستاندن ل گەل بەغدا ل سەر جودابوون و دامەزراندنا دەولەتا کوردی،دبیت چەند دەم ژی ڤەکێشیت،لێ ئامادەبوونا بەغدا ل ناڤ ڤان دانوستاندنا پێشکەفتنەکا ب بھایە بۆ کوردان،ھەر چەندە تشتەکێ ب ساناھی نینە،کو بەغدا رازی بیت کورد دەولەتا خوە رابگەھینن،ھەکە رازی ببیت ژی دێ ھەر مە دانوستاندن ھەبن ل سەر سنۆر و جۆگرافیا کوردستانێ و ھەروەسا ئالیەتا جودابوونێ،لەورا ھەکە دانوستاندن ل سەر ڤان تشتان ھاتەکرن، ناڤەرۆکا ڤێ چەندێ ھندێ دگەھینیت کو بەغدا ژی یا ئامادەیە کو ئەم ژێ جودا بین، ئەڤ چەندە ب جددی و رژدی ل گەل بەغدا ھاتیە بەحسکرن و بەغدا ژی ئامادەیا خوە دەربریە کو ئەڤان دانوستاندنا ل گەل ھەرێما کوردستانێ بکەت.
دیندار نجمان خوەیاکر: ئیران دەولەتەکا ھەرێمی یە و ب درێژاھیا مێژوویێ کارتێکرنا خوە ھەبوویە ل سەر ڤێ دەڤەرێ و پشتەڤانیا بزاڤا رزگاریخوازا کوردستانێ کریە، لێ نوکە عێراق تا رادەیەکی وەکو مەزھەب یا گرێدایی ئێرانێ یە و ھێزێن سیاسی فەرمانرەوانە ل عێراقێ و گەلەک ژ وان پەیوەندیێن تایبەت و دینی و مەزھەبی ل گەل ئیرانێ ھەنە، لەوما ئێرانێ کارتێکرنا خوە ل سەر بریارێن عێراقێ ھەیە، لێ ھەتاکو نوکە دبلۆماسیەن پەیوەندیێن ھەرێما کوردستانێ ل دژی چو دەولەتێن ھەرێمی نەبووینە، چوونا سەرۆکێ ھەرێمێ ل گەل شاندەکێ بۆ ئیرانێ پێنگاڤەکە بەرەف پرسا سەربەخۆیێ و دەولەتبوونێ، ئەم ب ھیڤی نە کو ھەلویستێ ئیرانێ ژی یێ ئەرێنی بیت، بەرامبەر داخوازیێن مللەتێ مە.
سەبارەت ھەلویستێ تورکیا ناڤھاتی گۆت: ترسا تورکیا بۆ کێشا کوردان گەلەکە و رێژەیا ھەرە مەزنا کوردان ل تورکیا ھەنە، لێ ھەر پارچەکا کوردستانێ کێشەیا خوە یا تایبەت ھەیە، ھەر چەندە نوکە پەیوەندیێن ھەرێمێ ژلایێ سیاسی و ئابووری ڤە ل گەل تورکیا د ئاستەکێ باش دانە، ھەروەسا ھەرێما کوردستانێ دشێت تورکیا دلنیا بکەت،کو چێبوونا دەولەتا کوردستانێ ژ عێراقێ چو مەترسیێ ل سەر ئێمناھیا نیشتیمانی یا تورکیا دروست ناکەت،لەورا دڤێت ئەم بۆ وان دیار کەین کو ئەڤە کێشەیەکا نافخۆیا خەلکێ عێراقێ یە.