ئه‌ڤرۆ نيوز:

مەسعود بارزانی سەرۆکێ ھەرێما کوردستانێ ب سەرۆکاتیا شاندەکێ بلند گەھشتە بەغدا و بڕياره‌ ل گەل حەیدەر عەبادی کۆم ببیت.

شاندێ هه‌رێما كوردستانێ دێ كۆمبوونه‌كێ ل گه‌ل حه‌يده‌ر عه‌بادى سه‌رۆك وه‌زيرێن عيراقێ ئه‌نجام ده‌ن و پاشان ژى سه‌رۆكێ هه‌رێما كوردستانێ و حه‌يده‌ر عه‌بادى كۆمبوونه‌كا دوقولى ئه‌نجام ده‌ن.

پاشان ژى ل سه‌ر ته‌شريفا سه‌رۆك بارزانى، حه‌يده‌ر عه‌بادى دێ نانخوارنه‌كا نيڤرۆ ئاماده‌ كه‌ت و بڕياره‌ پتريا لايه‌نێن سياسى ئاماده‌ى وێ نانخوارنێ ببن. پاشان ژى بڕياره‌ حه‌يده‌ر عه‌بادى و مه‌سعود بارزانى داخۆيانيێن رۆژنامه‌ڤانى وه‌كو پرێس كۆنفرانس بێ پرسيارێن رۆژنامه‌ڤانان ئه‌نجام بده‌ن.

هه‌ر ديسان شاندێ هه‌رێما كوردستانێ دێ ل گه‌ل حزبا ده‌عوه‌ ژى كۆم بيت و حه‌يده‌ر عه‌بادى دێ سه‌رۆكاتيا حزبا ده‌عوه‌ د وێ كۆمبوونێ دا كه‌ت.

د په‌راوێزا كۆمبوونێن خوه‌ دا، شاندێ هه‌رێما كوردستانێ دێ ل گه‌ل فه‌رماندێن له‌شكرى يێن حوكمه‌تا عيراقێ ژى كۆم بيت و تێدا به‌حس ل پلانا رزگاركرنا مووسل كه‌ن.

هه‌ر د به‌رنامێ شاندێ كوردستانى دايه‌ ل گه‌ل هه‌ر ئێك ژ ته‌ڤگه‌را سه‌در و ئه‌ياد عه‌لاوى ژى كۆم ببن و دبيت سالح موتله‌گ ژى ببينن.

پاشان ژى شاندێ هه‌رێمێ دێ ل گه‌ل عه‌مار حه‌كيم سه‌رۆكێ ته‌ڤگه‌را شيعان كۆم بيت يێ ڤێ دووماهيێ ئه‌ڤ پۆسته‌ وه‌رگرتى و بڕياره‌ لايه‌نێن شيعى ئاماده‌ى ڤێ كۆمبوونێ ببن و پاشان ژى شيڤخوارن دێ ژ لايێ عه‌مار حه‌كيم ڤه‌ هێته‌ دانان ل سه‌ر ته‌شريفا سه‌رۆك بارزانى و پاشان ژى كۆنگره‌كێ رۆژنامه‌ڤانى گرێده‌ن.

د ڤان هه‌موو كۆمبوونان دا دێ به‌حس ل شه‌رێ دژى داعش و كۆنترۆلكرنا مووسل هێته‌ كرن و ديسا بابه‌تێ ئابووريا په‌ترۆلێ و بودجێ ژى دێ ئه‌جنيدايێن كۆمبوونێ بن ل گه‌ل په‌يوه‌نديێن هه‌رێما كوردستانێ و ده‌وله‌تا عيراقێ و هه‌ر وه‌كو نڤيسينگه‌ها كوسره‌ت ره‌سۆل ژى راگه‌هاندى: “ئه‌وله‌ويه‌تا سه‌ره‌دانێ دێ به‌حس ل مافێ چاره‌نڤيسێ خوه‌ كه‌ين”.

شاندێ هه‌رێما كوردستانێ پێكهاتيه‌ ژ هه‌ر ئێك ژ مه‌سعود بارزانى سه‌رۆكێ هه‌رێما كوردستانێ و كوسره‌ت ره‌سۆل جێگرێ سه‌رۆكێ هه‌رێما كوردستانێ و فوئاد حسێن سه‌رۆكێ ديوانا هه‌رێما كوردستانێ و ئازاد به‌روارى و د. رۆژ نورى شاويس ئه‌ندامێن مه‌كته‌با سياسى يا پارتى ديموكراتى كوردستان و سه‌لاحه‌دين محه‌مه‌د بهائه‌دين ئه‌ميندارێ گشتيێ ئێكگرتوو و حه‌مه‌يێ حاجى مه‌حمود سكرتێرێ حزبا سويشالست ديموكراتى كوردستان و مه‌لا به‌ختيار ئه‌ندامێ ده‌سته‌يا كارگێرى يا ئێكه‌تى نشتيمانى كوردستان و شێخ جه‌عفه‌ر ئه‌ندامێ مه‌كته‌با سياسى يا ئێكه‌تى نشتميانى كوردستان و فه‌رماندێ يه‌كا 70ێ يا پێشمه‌رگێ كوردستانێ.

ئەڤرۆ نیوز:
شێخێ عەشیرەتا ئەلبەیات ل پارێزگەھا نەینەوا رەخنە ل ھندەک سیاسیێن عیراقی گرتن ئەوێ دبێژن ھەرێما کوردستانێ چاڤ ل ھندەک دەڤەرێن پارێزگەھا نەینەوا ھەیە و ئاماژە دا کورد ژمێژە ل نەینەوا یێن ھەین و ل سالێن بۆری ژی لیستێن کوردی ژی پشکداری د ھەلبژارتنێن نەینەوا دا کریە و جەماوەر و دەنگدەرێن خوە ژی یێن ھەین و پەسنا رێککەفتنا ڤێ دووماھیێ ژی دناڤبەرا ھەرێمێ و بەغدا و ئەمریکا دکەت.
شێخ عەلی ئەلبەیاتی شێخێ عەشیرەتا ئەلبەیات ل پارێزگەھا نەینەوا بۆ رۆژناما ئەڤرۆ گۆت” رێککەفتنا ل ڤێ دووماھیێ ئەوا د ناڤبەرا حوکمەتا ھەرێما کوردستانێ و حوکمەتا بەغدا و ئەمریکا و ھەڤپەیمانیا نێڤدەولەتی دا ل دۆر پرۆسا ئازادکرنا مووسلێ ھاتیە ئەنجامدان، و تێدا ھەرێما کوردستانێ ئاسانکاری و شیانێن ھەرێما کوردستانێ بەرھەڤکرین ل بەردەم حوکمەتا عیراقێ و ئەمریکا و ھەڤپەیمانیا نێڤدەولەتی، پێنگاڤەکا ئەرێنی یا گرنگ بوو ژلایێ ھەرێما کوردستانێ ڤە ھاتیە ھاڤێتن و دەرئەنجامێن وێ چەندێ ژی دێ د ئەرێنی بن ل سەر خەلکێ مووسلێ و ھەموو پارێزگەھا نەینەوا ژ روویێ پرۆسا ئازادکرنێ و ڤەگەراندنا ئاواران ڤە، و سەرۆکێ ھەرێمێ و حوکمەتا ھەرێما کوردستانێ ژی دێ رۆلەکێ باش ھەبیت د جھگیربوونا رەوشا مووسلێ دا”.
شێخ عەلی ئەلبەیاتی رەخنە ل ھندەک کەسایەتیێن سیاسی یێن عیراقی گرتن ئەوێن دبێژن کورد بزاڤێ دکەن نەینەوا بکەنە دبن دەستھەلاتا خوەڤە، و گۆت” ھندەک سیاسیێن عراقی یێن فاشل ڤان ئاخڤتنان دبێژن، ل ھەموو سالێن بۆری مە چو نەدیتیە یا ئەو ئاماژێ بۆ دکەن، بەلکو ل سالێن بۆری و د ھەلبژارتنان دا ژی، کورد و لیستێن کوردستانی ل نەینەوا ھەبوون و جەماوەر و دەنگدەرێن خوە ژی یێن ھەین”.
ل دۆر قۆناغا پشتی داعشێ ل مووسلێ و ل پارێزگەھا نەینەوا ب گشتی، کو ھندەک شرۆڤەکار ئاماژێ ددەن ئەو قۆناغا دێ گەلەک یا نەخوەشتر و ب مەترسی تر بیت ژ قۆناغا داعشێ، شێخ عەلی ئەلبەیاتی دبێژیت” پێدڤیە خەلکێ نەینەوا پارێزگەھا خوە ژ داعشێ ئازاد بکەت، ل قۆناغێن بۆری ژی مە داخوازدکر کو ھێزێن لەشکری و پۆلیس ژ خەلکێ پارێزگەھێ ل سەنتەرێ مووسل و دەڤەرێن دی یێن نەینەوا بھێنە بەلاڤکرن، بەلێ ئەو چەندە نەدھاتە کرن، بەلکو لەشکرێ عیراقێ کو پتریا سەربازێن وی ژ باشوورێ عیراقێ بوون ئەڤ چەندە ب ستوویێ خوەڤە گرتبوو کو وی دەمی وان ھێزان چو دانپێدان ب بۆچوونا خەلکێ نەینەوا نەدکر و ھەتا حوکمەتا عیراقێ ژی کو مە بەردەوام داخواز ژێ دکر کو خەلکێ نەینەوا رۆل ھەبیت د بادەکا ئەمنی دا، بەلێ مخابن چو گوھداری بۆ وان داخوازیێن مە نەبوو، ئەنجام ژی ئەوا ل 10/6/2014 ێ روودای کو داعشێ مووسل کونترۆلکری، لەوما پێدڤیە خەلکێ پارێزگەھێ نەینەوا رۆلەکێ سەرەکی ھەبیت د گرتنا ئەردی و پاراستنا پارێزگەھا خوە و ھەر ئێک ل دووڤ دەڤەر و جوگرافیا خوە و پێکھاتێن دیەکەیێن ئیداری دا ھەین”.
سەبارەت رۆلێ پێشمەرگەی، گۆت” ھێزێن پێشمەرگەی ھەر ژ 2003 ێ رۆلەکێ بەرچاڤ یێ ھەی و قوربانیێن داین بۆ پاراستنا عیراقێ و نەینەوا و پێشمەرگەی رۆلەکێ پیرۆز ھەبوو د شەڕێ دژی تیرۆرێ دا د سالێن بۆری و ب تایبەتی پشتی 2014 ێ و پپێشمەرگەی قوربانی و شەھید یێن داین و ئەم دخوازین پێشمەرگەی رۆل ل نەینەوا ھەبیت، ژبەرکو د پەسەند کرینە ژلایێ خەلکێ مووسلێ و نەینەوا ڤە” سەبارەت مەترسیێن پشکداریا حەشد شەعبی د شەڕێ مووسلێ دا، دبێژیت” ئەم دژی حەشد شەعبی نینین، بەلێ ژ ھەبوونا ئاریشان پشتی ئازادکرنا مووسلێ دترسین کو ھندەک کارێن تایفگەری پەیداببن”.
ئەلبەیاتی نەرازیبوونا خوە ژ ھزرا پێکئینانا شەش پارێزگەھان ل شوونا پارێزگەھا نەینەوا یا نوکە دیارکر کو ل ھندەک ناڤەندان بەحس ل وێ چەندێ دھێتە کرن، و گۆت” ل دەستپێکێ پێدڤیە داعش و شوونوارێن وێ و ھەر کەسێ پشتەڤانی لێکری ژ پارێزگەھا نەینەوا نەمینن، وی دەمی دێ ھەڤتێگەھشتنەک د ناڤبەرا پێکھاتێن نەینەوا دا ھەبیت کو پەیوەندیێن باش دناڤبەراپێکھاتێن پارێزگەھا نەینەوا دا یێن ھەین، ئاریشە نینە ھەموو حزب ل نەینەوا ھەبن و بارەگایێن خوە ژی ل ھەر باژێرەکێ نەینەوا ھەبن، بەلێ پارچەکرنا نەینەوا ل سەر چو بنەما بیت یا پەسەند کری نینە و کارەکێ نە باشە و مە وەکو شێخ و سەرۆک عەشیرەتێن نەینەوا چەند کۆنگرە یێن گرێدای ڤی بابەتی ئەنجامداینە و ھەموو دژی پارچەکرنا پارێزگەھا نەینەوا بوون و دێ کارەکێ باش بیت پشتی ئازادکرنا مووسلێ، ھێزەک ژ خەلکێ پارێزگەھا نەینەوا بھێتە دروستکرن کو ژ ھەموو پێکھاتێن وێ بیت و ئەرکێ وێ پاراستنا سنوورێ و قەزا و ناحیێن وێ بیت وب وی شێوەی دێ پتر بارێ ئێمناھیێ ل پارێزگەھێ ھێتە پاراستن” .

ئەڤرۆ نيوز:

بڕیارە ئەڤرۆ مەسعود بارزانی سەرۆکێ ھەرێما کوردستانێ ب سەرۆکاتیا شاندەکێ بلند بگەھیتە بەغدا و ل گەل حەیدەر عەبادی کۆم ببیت.
کیفاح مەحمود شیرەتکارێ سەرۆکێ ھەرێمێ راگەھاند، کو بارزانی ل گەل عەبادی دێ چەندین پرسان شرۆڤەکەت، وەکو پرسا کۆنترۆلکرنا مووسل و پرسێن نەفت و مووچێن فەرمانبەران و پێشمەرگە و چەندین پرسێن دی یێن ھەلاویستی یێن د ناڤبەرا ھەرێم و بەغدا.
د. محەمەد ئەحمەد ئەندامێ سەرکرداتیا یەکگرتوو دیارکر کو ئەمیندارێ گشتی یێ یەکگرتوو دێ ل گەل سەرۆک بارزانی چیتە بەغدا و مستەفا چاورەش ئەندامێ سەرکرداتیا ئێکەتیێ دیارکر، کو شاندێ ئێکەتیێ کو دێ ل گەل بارزانی چنە بەغدا پێکدھێت ژ شێخ جەعفەر مستەفا، مەلا بەختیار ، کوسرەت رەسول.
بڕیارە ژ سوشیالیستێ، حەمەی حاجی مەحمود و ژ پارتی، فازل میرانی و د.روژ نوری ل گەل شاندی بن و ژ بزاڤا گۆڕان و کۆمەلا ئیسلامی رەنگە کەس د گەل دا نەبیت.