ئەڤرۆ نیوز:
دەزگەھێن راگەھاندنا تورکیا ب گرنگی بەحسێ سەرەدانا شاندێ ھەدەپێ ب سەرۆکاتیا سەلاحەدین دەمیرتاش بۆ ھەرێما کوردستانێ و ھەڤدیتنا وی ل گەل سەرۆکێ ھەرێما کوردستانێ کرینە و دبێژن کو سەلاحەدین دەمیرتاش داخوازا ھاریکاریێ ژ سەرۆکێ ھەرێما کوردستانێ مەسعود بارزانی کریە.
دەربارەی سەرەدانا سەلاحەدین دەمیرتاش ھەڤسەرۆکێ ھەدەپێ بۆ ھەرێما کوردستانی و ھەڤدیتنا وی ل گەل سەرۆک بارزانی، راگەھاندنا تورکیا ب گرنگی ل سەر ڤێ سەرەدانێ راوەستیاینە و ب ڤی رەنگی بەحس لێ کرینە. رۆژناما جمھورییەت کو رۆژنامەکا ھەرە ناڤدارە ل ناڤ چەپگرێن تورکی دا، دەربارەی ھەڤدیتنا سەلاحەدین دەمیرتاشی ھەڤسەرۆکێ ھەدەپێ ل گەل سەرۆک بارزانی را دبێژیت، دەمیرتاشی و شاندێ ھەدەپێ ھەڤدیتن ل گەل بارزانی ئەنجامدا، ھەروەسا بەحسێ ھندێ ژی کریە، کو ل ھەرێما کوردستانێ دەمیرتاش ب کوردی نە ئاخفتیە و گۆتیە، دەمیرتاش کوردیێ نزانیت و ئۆسمان بایدەمیری وەرگێران بۆ کریە، ھەروەسا گۆتیە کو دەمیرتاشی ژ بۆ دەستپێ کرنا قۆناغا ئاشتیێ داخوازا ھاریکاریێ ژ کریە، ھەروەسا ھەدەپە دخوازیت پێڤاژۆیا ئاشتیێ ل تورکیا دەست پێ بکەت. رۆژنامەیا یەنی ئاکیت کو رۆژنامەیا کەڤنە شۆپێن تورک یێن ئۆلدار و نەژادپەرستە، دڤێ رۆژنامێدا ھاتیە کو ئەو دژی ڤێ سەرەدانێ نە، ئەو ناخوازن پەیوەندیێن دناڤبەرا بارزانی و ھەدەپێ دا خۆش ببن و ژ ڤێ سەرەدانێ دلگرانن، ھەروەسا ڤێ رۆژنامێ نڤێسییە کو د سەرەدانا دەمیرتاشی دا تشتەکێ بالکێش چێبوویە، ئەو ژی کو دەمیرتاش کوردیێ نزانیت، دلایەکێ دی دا ڤێ رۆژنامێ گۆتیە کو دەمێ پەکەکە و پەیەدە ل تورکیا و سووریێ دکەڤنە د تەنگاسیێ دا، ھەدەپێ بریاردا سەرەدانا بارزانی بکەت.
رۆژنامەیا سۆزجوو دەربارەی ڤێ سەرەدانێ دبێژیت دەمیرتاشی ژ بارزانی بۆ پێڤاژۆیا ئاشتیێ پشتگیری خواستییە، ھەروەسا دەمیرتاشی گۆتیە بارزانی ئەم تە وەک برایێ خوە دبینین ژ تە ھاریکاریێ دخوازین.
رۆژناما خەبەر تورک سەبارەت ڤێ سەرەدانێ د مانشێتێ خوە دا وەسا نڤێسییە دەمیرتاشی داخوازا ئاشتیێ ژ بارزانی کریە ھەدەپە دخوازیت جارەکا دی پێڤاژۆیا ئاشتیێ ل تورکیا دەست پێ بکەت.
ل ئالیێ دی رۆژنامەیا حورییەت کو رۆژنامەیا ھەرە مەزنە ل تورکیا ب ڤی سەرنووچەیی بەحس ل ڤێ سەرەدانێ کریە و گۆتیە کەکو ژ بۆ دیالۆگێ پشتگیریێ بدە مە. ھەروەسا گۆتیە کو ھەڤدیتنا بارزانی و دەمیرتاشی بۆ ماوێ پێنج دەمژمێرا ڤەکێشایە.
ھەروەسا چەندین مالپەر و روژنامەیێن دی یێن تورکی وەسا بەحس ل ڤێ سەرەدانێ کرینە کو دەمیرتاشی ژ بارزانی ھاریکاری خواستییە ژ بۆ کو پێڤاژۆیا ئاشتیێ دەست پێ بکەت، وان مالپەر و رۆژناما گۆتیە دەمیرتاش د ناڤبەرا کوردان دا ئێکەتی و ئاشتیێ دخوازیت.
ل ئالیێ دی رۆژناما یەنی شەفەق کو نێزیکە ژ پارتیا دەستھەلاتدار ل تورکیا ئانکو ئاکپارتی ب ئێکجاری بەحسێ ڤێ سەرەدانێ نەکریە.

ئه‌ڤرۆ نيوز:

میرێ ئێزدیان داخوازێ ژ ئاواران دکەت ڤەگەرَنە شنگالێ و د ھەمان دەم دا دخوازیت ھاریکاریا ئێزدیان بھێتەکرن بۆ ئاڤەدانیا شنگالێ.
میر تەحسین سەعید بەگ میرێ ئێزدیان دیار کر کو گەلەک گرنگە ئێزدی ڤەگەڕنە سەر مال و مولکێن خوە و داخوازێ ژ ئێزدیان دکەت بزڤرنە شنگالێ بۆ ڤێ مەرەمێ ژی ژێ پێدڤیە جڤاکێ نێڤدەولەتی ئێزدیان ب پارێزیت و ھەروەسا جڤاکێ نێڤدەولەتی ژی بێدەنگ نەمینیت و ھاریکاریا ئێزدیان بکەت بۆ ئاڤەدانکرنا ھەموو دەڤەرێن ژ لایێ تیرۆرستێن داعش ڤە ھاتینە وێرانکرن بۆ وێ چەندێ وەلاتی بشێن ڤەگەرنە سەر مالێن خوە.
نایف سەیدو، رێڤەبەرێ ناحیا سنوونێ بۆ رۆژناما ئەڤرۆ دیار کر کو ھەتا نوکە پتر ژ 7 ھزار خێزانان یێن ڤەگەڕیاینە دەڤەرا سنوونێ ب دیتنا وان وەلاتی ژ بەر نەبوونا خزمەتگوزاریان و ناکوکی یێن سیاسی نەشێن ڤەگەڕنە دەڤەرێ و گۆت: “ھەر دەمێ ئەو لایەنێن سیاسی یێن نە خەلکێ عیراقێ و ھەرێما کوردستانێ دەڤەرێ چوول بکەن ب دیتنا مە دێ پتریا ئاواران ڤەگەڕنە سەر مالێن خوە ل دەڤەرێ، بەلێ مخابن ھەتا نوکە حوکمەتا عیراقێ بۆ ئاڤەدانکرنا شنگال و سنوونێ و ھەموو دەڤەرێن رزگارکری چوو نەکریە وحوکمەتا ھەرێما کوردستانێ سەرەرایی قەیرانا دارایی ھەموو شیانێن خوە بزاڤێ دکەت خزمەتان بگەھینیتە دەڤەرێ”.