ئەڤرۆ نیوز،زنار تۆڤی:

عەبادی ب فەرمانەکێ گەشتێن دەرڤەی وەلاتی ل ھەمی وان بەرپرس و پەرلەمانتاران قەدەغە کرینە،یێن کو ناڤێن وان د روونشتنا پەرلەمانی دا ھاتین.
سەرۆکێ داخوازکەرێ گشتی یێ عێراقێ سکالا ل دژی وان کەسان تۆمار دکەت،یێن کو وەزیرێ بەرەڤانیا عێراقێ ل روونشتنا دوشەمبێ یا پەرلەمانی دا ناڤێن وان ئیناین و تۆمەتبارکرین ب گەندەلیێ،دناڤ وان دا سەلیم جبۆری سەرۆکێ پەرلەمانێ عێراقێ،عەبدولستار بیرقدار پەیڤدارێ بناڤێ دەسھەلاتا دادوەریا عێراقێ د راگەھاندنەکێ دا دبێژیت:سەرۆکێ داخوازکەرێ گشتی/دەستھەلاتا دادوەریا فیدرالی رابووینە ب جۆلاندنا سکالایێ لدووڤ ماددێ دویێ یێ یاسا داخوازکەرێ گشتی ل دژی وان ھەمی کەسان یێن کو وەزیرێ بەرەڤانیا عێراقێ د کومبۆنا پەرلەمانی دا ناڤێن وان ئیناین.
بیرقداری ئاماژە ب ھندێ ژی دایە:کو ئەنجۆمەنێ دادوەریا بلند بریاردایە ب پێکئینانا دەستەیەکا ڤەکۆلینا دادوەری دالێکۆلینێ بکەت ل گۆتنێن خالد عوبێدی ب ھەماھەنگیا دەستەیا نەزاھێ،د کومبوونا دوشەمبێ یا پەرلەمانێ عێراقێ دا کو تایبەت بوو ب لێپرسینێ دگەل خالد عوبێدی وەزیرێ بەرەڤانیێ،تێدا عوبێدی سەرۆکێ پەرلەمانی و ھژمارەکا پەرلەمانتار و بەرپرسان تۆمەتبارکرن ب کەیسا گەندەلیێ ل عێراقێ،ب ئەگەرێ تۆمەتبارکرنا سەلیم جبۆری سەرۆکێ پەرلەمانی روونشتنا پەرلەمانی بجە ھێلا و راگەھاند،ھەتاکو بێتاوانیا خۆ نە سەلمینم ناڤەگەرمە پەرلەمانی.
ئەو تۆھمەتێن کو وەزیرێ بەرەڤانیێ ئاراستەی جبۆری کرین گرێدای بوون ب ھندێ کو سەرۆکێ پەرلەمانی د گرێبەستا کرینا خوارنێ بۆ ھێزێن چەکدار،دگەل چەند بازرگانان گەندەلی کریە و کۆمەکا چەکداران دامەزراندینە و ل بەرامبەردا پارە وەرگرتینە،ھەروەسا ل گرێبەستا کرینا کۆمەکا ترۆمبێلێن ھەمەر و ھندەک گرێبەستێن دیتردا گەندەلی کریە،د ھەمان دەمدا نڤێسینگەھا سەرۆک وەزیرێ عێراقێ دبەیاننامەکێ دا گۆتیە،عەبادی ب فەرمانەکێ گەشتێن دەرڤەی وەلاتی ل ھەمی وان بەرپرس و پەرلەمانتاران قەدەغە کرینە،یێن کو ناڤێن وان د روونشتنا پەرلەمانی دا ھاتین،لەورا گازیکرنا وەزیرێ بەرەڤانیا عێراقێ بۆ پەرلەمانی ب مەبەستا لێپرسینێ بوو،ژ ئەگەرێ ھەبوونا گەندەلیێ د وێ وەزارەتێ دا و ب تۆمەتا ب ھەدەردانا ملیۆنەھا دۆلاران و لاوازکرنا ھێزێن چەکدار ھەتاکو ئاستێ روخاندنێ ل سالا 2014 بەرامبەر رێکخراوا داعش دا.
ھەروەسا خالد عوبێدی بەری بھێتە گازیکرن ژلایێ پەرلەمانی ڤە بۆ کەنالەکێ حکومی راگەھاندبوو،کو گازیکرنا وی بۆ پەرلەمانی ھیچ تشتەک نینە،ژبلی پیلانگێریەکێ،ژلایێ ھندەک کەسان ڤە،کو ئەو ب گەندەل ناڤکریە،دیسا حەیدەر عەبادی سەرۆک وەزیرێ عێراقێ پتری دو سالایە ھەولا بەرھنگاربوونا گەندەلیێ ددەت د عێراقێ دا،کو عێراق د پلەیا 161 دایە د شەفافیەتێ دا،لدووڤ راپۆرتا رێکخراوا شەفافیەتا نێڤدەولەتی دناڤا 168 دەولەتاندا.

ئه‌ڤرۆ نيوز:

سه‌ركرده‌كێ ميليشياتێن حه‌شدا شه‌عبى راگه‌هاند كو فه‌رماندێ سۆپايێ قودسا ئيرانى و فه‌رماندێ هێزێن عيراقيان دێ پشكداريێ د ئۆپه‌راسيۆنا رزگاركرنا مووسل دا كه‌ن.

باژێرێ مووسل ل ناڤه‌ندا پارێزگه‌ها نه‌ينه‌وا ل هه‌يڤا خزيرانا 2014ێ و پشتى شكه‌ستنا سۆپايێ عيراقێ ژ لايێ چه‌كدارێن داعش ڤه‌ هاته‌ داگيركرن بێى كو حوكمه‌تا عيراقێ چو به‌ره‌ڤانيه‌كێ ژ خوه‌ بكه‌ت.

ئه‌حمه‌د ئه‌لئه‌سه‌دى، ئاخفتنكه‌رێ ب ناڤێ ميليشياتێن حه‌شدا شه‌عبى ته‌كست ل سه‌ر پشكداريا ميليشياتان د رزگاركرنا مووسل دا كر و راگه‌هاند كو قاسم سوله‌يمانى، فه‌رماندنێ سۆپايێ قودسا ئيرانى دێ فه‌رمانده‌يا ئۆپه‌راسيۆنێ كه‌ت.

به‌رى نوكه‌ رۆژناما “الشرق الاوسط” راگه‌هاند بوو كو سۆپايێ ئيرانێ بنكه‌يه‌كێ مه‌شق و راهێنانێ د سنورێ ناڤبه‌را رۆژهه‌لاتێ كوردستانێ و سلێمانيێ دا هه‌يه‌ و ل وێ ده‌ڤه‌رێ مه‌شقێ ب له‌شكرێ حه‌شدا شه‌عبى و يێن شيعه‌ مه‌زهه‌ب دكه‌ت.

په‌رله‌مانتاره‌كێ عيراقى ژى بۆ رۆژناما “الشرق الاوسط” راگه‌هاند كو قاسم سوله‌يمانى ل خالا سنورى يا مونزه‌ريه‌ ل خانه‌قين ب چه‌ندين ترۆمبێلێن بلند هاته‌ ناڤ ئاخا عيراقێ، “ب مه‌ره‌ما پشكداريكرن د ئۆپه‌راسيۆنا رزگاركرنا مووسل دا”.