ئەڤرۆ نيوز:
رۆژنامەکا ئەمریکی نھێنیەکێ سەبارەت ئاخڤتنێن جێگرێ سەرۆکێ ئەمریکا د سەرەدانا وی دا بۆ عیراقێ و ھەرێما کوردستانێ ئاشکراکر کو بەحس ل وێ چەندێ کریە کو سنورێن عیراقێ ددەستکردن.
ل دووڤ راپۆرتەکا رۆژناما (نیویۆرک تایمز) یا ئەمریکی، ئەو چەندە ھاتیە ئاشکراکرن کو جۆ بایدن جێگرێ سەرۆکێ ئەمریکا د سەرەدانەکێ دا بۆ بەغدا، دیدارەک ل گەل دبلوماتکار و سەربازێن ئەمریکی ل بەغدا ئەنجامدابوو و تێدا گۆتبوو وان” مە ھوون بۆ ھەر جھەکی ھنارتبن، مە بۆ وێ چەندێ بوو کو ئاسایش و ئاشتیێ ل وی جھی بپارێزن، ئەو جھێن کو مە ل دەمێ بۆری سنورێن دەستکرد بۆ دروست کرین، خەلکەکێ جودا ژروویێ ئاینی و نەتەوی و کلتوری مە پێکڤە دچارچۆڤەکی دا دانابوو”.
رۆژناما نیویۆرک تایمز رۆھنکر کو مەرەما جۆ بایدنی ژ وان وەلاتان، عیراق و ب ئاماژە بۆ بۆچوونێن پێشتر یێن جێگرێ سەرۆکێ ئەمریکی، سەبارەت پرسا پارچەبوونا عیراقێ.
پێشتر ل سالا 2006 ێ، جۆ بایدنی بەحسێ پرۆسەکا پارچەبوونا عیراقێ کربوو، نوکە ژی پرسیار ل سەر وێ چەندێ ھەیە کو ئایا عیراق دشێت وەکو نوکە بمینیت، یان دەولەتەکا کارا بیت؟ ل دۆر ڤێ چەندێ عەلی خدری، شیرەتکارێ بەری یێ بالیۆزێ ئەمریکی ل عیراقێ، کو ل دووڤ وێ رۆژنامێ، ئەو شیرەتکارێ پتریا بالیۆزێن ئەمریکا ل عیراقێ بوو، دبێژیت” ب دیتنا من عیراق نەشێت ژ قەوارێ خوە یێ نوکە بشێت سیاسەتەکا کارا ھەبیت، نوکە کۆنفیدرالی یان پارچەکرنا عیراقێ، دبیت باشترین چارەسەر بیت بۆ وان کێشان، ئەڤە چارەسەریەکا نە دروستە بۆ رەوشا عیراقێ یا نە دروست”.
خدر بەحسێ سایکس – بیکۆ دکەت و دبێژیت” ژ کەڤن وەرە دەڤەرێن عیراقی ب زۆری ھاتینە لێکدان و نوکە ژی پێدڤیە ژێ بھێنە جوداکرن”. ناڤبری رەخنە ژی ل سیاسەتا ئەمریکا دگریت کو ھێشتا یا رژدە ل سەر پاراستنا ئێک پارچەییا عیراقێ و دبێژیت” دبیت ئەمریکا چاڤەڕێی مەعجیزەکێ بیت ل عیراقێ روو بدەت”.
شیرەتکارێ بەرێ یێ بالیۆزێ ئەمریکی ل عیراقێ، ئەو چەندە ژی ئاشکراکر کو نوکە بەرپرسێن رێکخراوا نەتەوێن ئێکگرتی ل بەغدا، ب ھێمنی بەحس ل پارچەکرنا عیراقێ دکەن.