ئه‌ڤرۆ نيوز:
برياره رۆژا سێ شه‌مبى بزاڤا گۆران و ئێكه‌تيا نيشتمانيا كوردستان رێككه‌فتنا د ناڤبه‌را خوه د رێوره‌سمه‌كێ دا ل سلێمانيێ ئيمزا بكه‌ن.
ل دووڤ پێزانينێن knn نوونه‌رێ ولاتێن پارت و لايه‌نێن سياسيێن عيراقێ و هه‌رێما كوردستانێ و جڤاكێ مه‌ده‌نى دێ داخوازى رێوره‌سمێن ئيمزاكرنا وێ رێككه‌فتنێ بن.
ئه‌ڤرۆ نیوز:
سه‌رۆك بارزانى ئه‌ڤرۆ پێشوازیا ئایه‌تولا دكتور سه‌ید مه‌حمود عه‌له‌وى وه‌زیرێ ئیتلاعاتا كومارا ئیسلامیا ئیرانێ كر ، د دیداره‌كێ دا، دكتور سه‌ید مه‌حمود دیاركر كو ئیران د پشته‌ڤانیكرنا هه‌رێما كوردستانێ دا دێ به‌رده‌وام بیت و داخواز ژ سه‌رۆك بارزانى كر كو پێشبینى و بوچوونێن خوه سه‌باره‌ت روودان و پێشهاتێن ده‌ڤه‌رێ بۆ به‌رچاڤ بكه‌ت.
بارزانى ب كورتى به‌حسێ ره‌وشا مه‌یدانێن به‌رۆكێن شه‌رى ل گه‌ل تیرورستان كر و دیاركر كو شه‌رێ داعش پێدڤى ب هه‌ماهه‌نگى و هه‌ڤگاریا رژد یا جڤاكێ نێڤده‌وله‌تى یه.
ئه‌ڤرۆ نيوز:
وه‌زاره‌تا داراى و ئابوورى ل حوكمه‌تا هه‌رێما كوردستانێ، ئه‌و ده‌نگوباس ره‌تكرن يێن به‌حس ل وێ چه‌ندێ دكه‌ن ژ به‌ر ئه‌گه‌ره‌كێ سياسى، به‌لاڤكرنا مووچێ فه‌رمانبه‌ران هاتيه پاشخستن.
ئه‌ڤرۆ رۆژا ئێكشه‌مبى رێكه‌فتى 15ى گۆلانا 2016ێ رێڤه‌به‌ريا راگه‌هاندن و په‌يوه‌نديان ل وه‌زاره‌تا داراى و ئابوورى ل حوكمه‌تا هه‌رێما كوردستانێ د روونكرنه‌كێ دا ده‌رباره‌ى نووچێ مالپه‌ره‌كى كو به‌لاڤكريه و گۆتيه ب گۆره‌ى پێزانينێن ژێده‌ره‌كى ژ ناڤ نڤيسينگه‌ها بريكارێ وه‌زاره‌تا داراى و ئابوورى “پارتى ديموكراتى كوردستان رێگريێ ل به‌لاڤكرنا مووچه‌ى دكه‌ت، نه ژ به‌ر نه‌بوونا پارايه د به‌نكێن هه‌رێما كوردستانێ دا”، ره‌تكريه و ئاماژه ب وێ چه‌ندێ كره ئه‌و نووچه‌كێ دووره ژ راستيێ و كارێ رۆژنامه‌ڤانيێ و چو بابه‌تێن ژ ڤى ره‌نگى د رۆژه‌ڤێ دا نينن.
وه‌زارتا داراى ته‌كست ل سه‌ر وێ چه‌ندێ كريه كو ب چو ره‌نگه‌كى ئه‌ڤ نووچه ژ نڤيسينگه‌ها بريكارێ وه‌زاره‌تا داراى و ئابوورى ل حوكمه‌تا هه‌رێما كوردستانێ ده‌رنه‌كه‌فتيه و په‌يوه‌ندى ب وان ڤه نينه.
ئه‌ڤرۆ نيوز:
سه‌ركرداتيا گشتى يا هێزێن چه‌كدارێن ئيماراتى ئه‌ڤرۆ رۆژا ئێكشه‌مبى 15ى گۆلانا 2016ێ راگه‌هاند كو ئێك ژ فرۆكێن وێ ل ده‌مێ راهێنان كه‌فت.
ب گۆره‌ى ئاژانسا ده‌نگوباسێن فه‌رمى يا ئيماراتى “وام” ئه‌ڤ روودانه بۆ ئه‌گه‌رێ گيان ژ ده‌ست دانا ئه‌و گرۆپێ د ناڤا فرۆكێ دا يێ پێكهاتى ژ فرۆگه‌ڤان و راهێنه‌رى و نوكه لايه‌نێن په‌يوه‌نديدار يێ ڤه‌كۆلينێ ل سه‌ر ئه‌گه‌رێن كه‌فتنا ڤێ فرۆكێ دكه‌ن.
ئه‌ڤرۆ نيوز:
مه‌سعود بارزانى سه‌رۆكێ هه‌رێما كوردستانێ ب فه‌رمى ژ لايێ ئيرانێ ڤه هاته داخوازكرن كو سه‌ره‌دانا ته‌هرانێ بكه‌ت، د ده‌مه‌كى دا كو ئه‌ڤه ماوێ چه‌ند ساله بارزانى سه‌ره‌دانا وى وه‌لاتى نه‌كريه.
رۆژا شه‌مبى 14ى گۆلانا 2015ێ د. مه‌حمود عه‌له‌وى وه‌زيرێ ئتيلاعاتا كۆمارا ئيسلامى يا ئيرانى و شانده‌كێ هه‌ڤال ل باشوورێ كوردستانێ بوون و سه‌ره‌دانا نێچيرڤان بارزانى سه‌رۆك وه‌زيرێن هه‌رێما كوردستانێ كريه و ب گۆره‌ى پێزانينان د هه‌مان رۆژدا ئه‌و داخۆازنامه پێشكێش كريه.
ئه‌ڤرۆ نيوز:
رۆژنامه‌كا بريتانى ئاشكه‌را كر كو داعش ئاماده‌كاريان بۆ شه‌رێ مووسل دكه‌ت و مه‌ترسيا وێ چه‌ندێ ژى هه‌يه ل ده‌مێ ئۆپه‌راسيۆنێن رزگاركرنا وى باژێرى دا چه‌كێ كيمياوى ل دژى هێزێن عيراقى ب كار بينيت.
ب گۆره‌ى راپۆرته‌كا رۆژناما ده‌يلى ته‌لگراف، تيرۆرستێن داعش ل ناڤ مووسل ده‌ست ب بزاڤێن خوه كرينه و خوه بۆ روو ب رووبوونا هێزێن عيراقى ئاماده دكه‌ن.
رۆژناما بريتانى ژ زارێ فه‌رمانده‌كێ هه‌ڤپه‌يمانيا نێڤده‌وله‌تى ڤه به‌لاڤكريه كو رێكخراوا تيرۆرستى يا داعش چه‌ند جاران چه‌كێ كيمياوى و غازا خه‌رده‌ل ل دژى هێزێن پێشمه‌رگه‌ى و هێزێن عيراقى ب كار ئينايه و ب تايبه‌ت د ڤى ماوێ دووماهيێ دا.
گۆتيه ژى: “پێشبينى دهێته كرن كو ل شه‌رێ رزگاركرنا باژێرێ مووسل ژى تيرۆرستێن داعش بۆ رێگرتن ل پێشره‌ويێن هێزێن پێشمه‌رگه‌ى و عيراقى چه‌كێ كيمياوى ب كار بينيت”.
ب گۆتنا فه‌رماندێن ئه‌منى، داعش ل ده‌مێ شكه‌ستنێ ل به‌ره‌يێن شه‌رى، رێ دبه‌ته به‌ر ب كارئنيانا چه‌كێ كيمياوى و هێرشێن خوه‌كوژى، ژ به‌ر هندێ ژى پێدڤيه هێزێن عيراقى و پێشمه‌رگه و هه‌ڤپه‌يمان ل ده‌مێ ئۆپه‌راسيۆنێن رزگاركرنا مووسل، ئاماده‌كاريێن ته‌مام بكه‌ن بۆ ژناڤبرنا پلانێن داعش.
ئه‌ڤرۆ نيوز:
مووشه‌كه‌ك ل قامشلۆ يا رۆژئاڤايێ كوردستانێ كه‌فته وار و د ئه‌نجام دا سێ كه‌س شه‌هيد بوون.
هه‌ر ل دووڤ وان پێزانينان، مووشه‌ك ل تاخێ كورنيش يێ قامشلۆ كه‌فتيه خوار و ب ماله‌كێ كه‌فتيه و سێ كه‌س ژ وێ خێزانێ شه‌هيد بووينه.
دوهى ژ ئه‌گه‌رێ په‌قينا بۆمبه‌كا چاندى بۆ ترۆمبێله‌كا ئاسايشا “په‌يه‌دێ” ل باژێركێ گرێ سپى دو كارمه‌ندێن ئاسايشێ شه‌هيد بوون و دويێن دژى هاتنه كوشتن.
په‌قينا دوهى يا گرێ سپى په‌قينا دويێ يه كو ل رۆژئاڤايێ كوردستانێ روو بده‌ت و به‌رى وێ ژى ته‌قينه‌ك ل قامشلۆ روودابوو و د ئه‌نجام دا كه‌سه‌ك شه‌هيد ببوو و دو وه‌لاتيێن دژى بريندار ببوون.
ئه‌ڤ ته‌قينه د ده‌مه‌كى دا نه كو بڕيار بوو ئه‌ڤرۆ ل هه‌موو باژێر و باژێركێن رۆژئاڤايێ كوردستانێ خۆنيشاندان بۆ ئيدانه‌كرنا 100 ساليا سايكس پيكۆ بهێنه ئه‌نجام دان.
ئه‌ڤرۆ نيوز:
سه‌عد مه‌عن، ئاخفتنكه‌رێ ب ناڤێ فه‌رمانده‌يا ئۆپه‌راسيۆنێن به‌غدا د به‌ياننامه‌كێ دا راگه‌هاند: “سپێده‌هيا ئه‌ڤرۆ رۆژا ئێكشه‌مبى 15ى گۆلانا 2016ێ هێزێن ئه‌منى يێن عيراقێ هێرشه‌كا چه‌كدارێن داعش بۆ سه‌ر كارگه‌ها گازا تاجى ل باكورێ باژێرێ به‌غدا تێكشاند.
مه‌عن گۆتژى: “ده‌سپێكێ هێرشكه‌ران ب ترۆمبێله‌كا مينرێژكرى ل به‌ر ده‌رگه‌هێ كارگه‌هێ په‌قاند، پاشان شه‌ش خۆكوژان ب پشتينێن مينرێژكرى چوونه ناڤ كارگه‌هێ، به‌لێ ژ لايێ هێزێن ئه‌منى ڤه هاتنه كوشتن و د ئه‌نجام دا سێ عه‌مارێن غازێ هاتنه سۆتن”.
ئاخفتنكه‌رێ ب ناڤێ فه‌رمانده‌يا ئۆپه‌راسيۆنێن به‌غدا ته‌كست ل سه‌ر وێ چه‌ندێ ژى كر كو نوكه كاودان يێ ل بن ده‌ستێ هێزێن ئه‌منى و گۆت: “تيمێن به‌ره‌ڤانيا باژێرى مژوولى ڤه‌مراندنا ئاگرى نه”.
نيشاندان