ئه‌ڤرۆ نیوز:
ل دووڤ نڤیساره‌كا وه‌زاره‌تا كاروبارێن جڤاكى كو ئاراسته‌ى وه‌زاره‌تا دارایاى و رێڤه‌به‌ریا گشتى یا چاڤدێرى و گه‌شه‌پێدانا جڤاكى كریه، كه‌سێن خودان پێدڤیێن تایبه‌ت ل گور چه‌ند مه‌رج و رێنماییان دێ مووچه‌ى وه‌رگرن كو دڤێت رێژا كێم ئه‌ندامیا وان ب ڤى ره‌نگى بیت، نابینا و بیركول 65% ، نابیست ب رێژا 70%، مه‌نگول ب رێژا 80%، تالاسیمیا ب رێژا 60%، ئوتیزم 80%، میموفیلیا 60%، شیزوفرینیا دژوار، 60%، ئیفلیجا مێشكى 80%.
ئه‌ڤرۆ نيوز:
ئه‌ڤرۆ وه‌زاره‌تا خواندنا بلند رێنمايێن خواندنا ( ماسته‌ر و دكتورا ) په‌سه‌ندكرن كو چه‌ندين گوهۆرين تێدا هاتينه كرن وه‌كو ( خواندنا ماسته‌رێ ل شوونا تێكرا نمرا به‌كالوريوس 65% نووكه بريارداينه ببيته 60%، هه‌روه‌سا مه‌رجه‌كێ دى يێ قورس سه‌باره‌ت زمانى ئێنگليزيێ ئێخستيه ل هه‌مبه‌ر قوتابيان كو قوتابى مافێ هه‌ى پێشكێشكى ماسته‌رێ بكه‌ت، به‌لێ ئه‌گه‌ر ناڤێ وى ده‌رچوو، ماف نينه داخلى خواندنا ماسته‌رێ ببيت و ببيته قوتابيێ ماسته‌رێ هه‌تا كو ژ ئێك ژ تاقيكرنێن توفل و ئايسلت يان تاقيكرنا PEARSON ده‌رنه‌چيت.
ئه‌ڤرۆ نيوز:
وه‌زيرا به‌ره‌ڤانيا ئيتاليا ل باژارێ به‌غدا گه‌هشتنه هه‌رێما كوردستانێ و ژ ئاليێ وه‌زيرێ پێشمه‌رگه ب وه‌كاله‌ت و فه‌رمانگه‌ها په‌يوه‌نديێن ده‌رڤه يا هه‌رێمێ پێشوازى لێ هاته كرن.
بريارة رۆبێرتۆ پینۆتی، وه‌زيرا به‌ره‌ڤانيا ئيتاليا ل گه‌ل نێچيرڤان بارزانى سه‌رۆكێ حوكمه‌تا هه‌رێما كوردستانێ و پاشان ل گه‌ل سه‌رۆك بارزانى كوم ببيت.
سپێدەیا ئەڤرۆ وەزیرا بەرەڤانیا ئیتالیا گەهیشتە بەغدا و دگەل حەیدەر عەبادی سەرۆک وەزیرێ عێراقێ و چەند بەرپرسێن عیراقی کومبوو.
ئه‌ڤرۆ نيوز:
ب گۆره‌ى مالپه‌ره‌كێ ئێكه‌تى نشتيمانى كوردستانێ نوكه هه‌ر ئێك ژ بزاڤا گۆڕان و ئێكه‌تى نشتيمانى كوردستان ل سه‌ر وێ چه‌ندێ رێكه‌فتينه كو ببنه ئێك حزب.
مالپه‌رێ SNN يێ ئێكه‌تى نشتيمانى كوردستان ل سه‌ر زارێ ژێده‌ره‌كێ خوه راگه‌هانديه كو دانوستاندن ل سه‌ر رێكه‌فتناما ئێكه‌تى نشتيمانى كوردستان و بزاڤا گۆڕان دا ب دووماهى هاتيه و ئێك ژ پشكداربوويێن كۆمبوونێ دبێژيت: “ره‌شنڤيسێ رێكه‌فتنێ ته‌مام بوويه و ب تنێ ئيمزاكرن ل سه‌ر مايه”.
دايه زانين ژى كو هێشتا ژڤانێ ئێمزاكرنا رێكه‌فتنێ نه‌هاتيه دياركرن، به‌لێ چه‌ند هزره‌ك هه‌نه بۆ راگه‌هاندنا وێ رێكه‌فتنێ ب ره‌نگه‌كێ فه‌رمى.
ئاماژه ب وێ چه‌ندێ ژى كريه كو مه‌ره‌م ژ وێ رێكه‌فتنێ لێك نێزيكبوون و ئه‌نجامدانا كارێ هه‌ڤپشكه د ناڤبه‌را هه‌ردو حزبان دا ب تايبه‌ت ل په‌رله‌مانى و جڤاتان دا.
هه‌ر وه‌كو مالپه‌رێ ناڤبرى به‌لاڤكرى، ميكانيزما كارێ هه‌ڤپشك د په‌رله‌مانێ كوردستانێ و جڤاتا نوونه‌رێن عيراقێ و جڤاتێن پارێزگه‌هان دا هاتيه دياركرن، به‌لێ به‌حس چ ژ سه‌رۆكاتيێن هه‌رێمێ و حوكمه‌ت و په‌رله‌مانى نه‌كريه، ب تنێ ته‌كست ل سه‌ر وێ چه‌ندێ هاتيه كرن كو هاريكاريا هه‌ڤدو بكه‌ن.
ئه‌ڤرۆ نيوز:
ده‌سته‌يا سه‌رۆكاتيا جڤاتا نوونه‌رێن عيراقێ راگه‌هاند كو ئه‌و دخوازن رۆژا سێ شه‌مبى رێكه‌فتى 10ى گۆلانا 2016ێ لژنه‌يێن جڤاتا نوونه‌رێن عيراقێ ده‌ست ب كار ببن و دده‌ته زانين ژى كو هه‌ر ده‌مێ ئاڤاهيێ جڤاتا نوونه‌ران هاته نووژه‌نكرن، په‌رله‌مان ژى دێ ده‌ست ب كار بيت.
ئه‌ڤه د ده‌مه‌كى دايه كو نوونه‌رێن كورد ل جڤاتا نوونه‌رێن عيراقێ بايكوتا روونشتنێن جڤاتێ كريه و راگه‌هانديه كو هه‌تا ب بڕياره‌كا سه‌ركرداتيا كوردى نه‌بيت ئه‌و ڤه‌ناگه‌رنه به‌غدا، سه‌ره‌راى سه‌ره‌دانا سه‌رۆكێ جڤاتا نوونه‌رێن عيراقێ، سه‌ليم جبۆرى، بۆ هه‌رێمێ بۆ رازيكرنا وى.
ته‌ڤگه‌را سه‌در ژى راگه‌هانديه كو نوكه كوتله‌يا ئه‌حرار كو نوونه‌راتيا وان دكه‌ت بايكوتا كريارا سياسى ل عيراقێ كريه هه‌تا كو چاكسازى ل سه‌ر بنه‌مايێ ته‌كنوكرات نه‌هێنه كرن.
ئه‌ڤرۆ نيوز:
سەرۆکێ لیژنا سۆتەمەنیێ ل جڤاتا پارێزگەھا دھۆکێ راگەھاند، ل ھەیڤێن بۆری ژی نێزیکی 13 تانکەرێن پانزینا پیس ھاتبوونە گرتن و 24 وێستگەھێن پانزینێ یێن ھاتنە سزادان و11 وێستگەھێن پانزینێ بۆ ماوەیێن ژێک جۆدا ھاتنە دائێخستن و 13 وێستکەھێن پانزینێ ژی ب کۆژمێن پارەی ھاتنە سزادان. ژ ئالەکێ دی ڤە، سەرۆکێ لیژنا پیشەسازی و وزێ ل جڤاتا پارێزگەھا ھەولێرێ ئاشکرا کر، رەنگە جارەکا دی وەکو بەرێ پانزین بھێتە پۆلینکرن بۆ پانزینا نۆرمال، موحەسەن و سۆپەر، و گۆت ژی: ژ بەر نەبوونا پشتەڤانیا حوکمەتێ ل سەر پانزینێ و بلندبوونا بھایێ پترۆلێ د بازارێن جیھانێ دا، بۆھایێ پانزینێ ل رۆژێن بۆری د بازارێن کوردستانێ دا گرانتر لێ ھاتیە
سەرۆکێ لیژنا سۆتەمەنیێ ل جڤاتا پارێزگەھا دھۆکێ دیار کر، ملیون لترێن پانزینا پیس یێن ھاتینە گرتن و رێ پێ ناھێتە دان ببفروشن و ل ھەیڤێن بۆری ژی نێزیکی 13 تانکەرێن پانزینا پیس ھاتبوونە گرتن و 24 وێستگەھێن پانزینێ یێن ھاتنە سزادان.
عەبدولسەمەد کۆچەر، سەرۆکێ لیژنا سوتەمەنیێ ل جڤاتا پارێزگەھا دھۆکێ بۆ ئەڤرۆ دیار کر، نھا 11 وێستگەھێن پانزینێ بۆ ماوەیێن ژێک جۆدا ھاتنە دائێخستن و 13 وێستکەھێن پانزینێ ژی ب کۆژمێن پارەی ھاتنە سزادان، ئەڤ ھەر 24 وێستگەھێن پانزینێ سەرا نەپێگیری ب رێنمایان و پانزینا پیس یێن ھاتنیە سزادان و گۆت: حەفت جۆرێن پشکنینی بۆ پانزینێ دھێنە کرن، ھەکە جۆرەک دەرنەچیت، ئەو وێستگەە دێ ھێتە سزادان، نوکە دشێم بێژم ل بەرامبەر پارێزگەھێن دێ ھەرێما کوردستانێ، ب رێژەکا گەلەک باش کونترۆل ل سەر کوالێتیا پانزینێ ل دھۆکێ یا ھاتیە کرن.
ناڤبری ئەو ژی دیار کر، ل دھۆکێ ژمارێن تەلەفونێن لیژنا پشکنینا پانزینێ ل وێستگەھان یێن ھاتینە ھەلاویستن، بۆ وێ چەندێ ھەر شوفێرەکێ گازندەک ھەبیت، ئێکسەر پەیوەندیێ ب لیژنا پشکنینا پانزینێ بکەت و رێک نەھێتە دان چو وێستگەە پانزینا پیس بفروشنە وەلاتیان و گۆت ژی: ل پارێزگەھا دھۆکێ 157 وێستگەھێن پانزینێ ھەنە.
عبدولسەمەد ئەو ژی دیار کر، بەردەوام ئەم ھەولددەین گەلەک بازرگان پانزینێ بینن، دا کو ھەڤرکی دروست ببیت و نەھێلین پانزین گران ببیت ل دھۆکێ، چونکو ھەتا رادەیەکێ باش کۆنترول ل سەر ھاتیە کرن.
نافیز ناوپردانی، سەرۆکێ لیژنا پیشەسازی و وزێ ل جڤاتا پارێزگەھا ھەولێرێ بۆ ئەڤرۆ دیار کر، ل گەل دەستپێکرنا بلندبوونا بھایێ پانزینێ د رۆژێن بۆری دا، وان دەست ب ڤەکۆلینێ کریە، چونکو ئەڤە ھەیامەکە پانزین و ئینان و فرۆتنا وان کەفتیە د دەستێ بازرگان و کەرتێ تایبەت دا و حوکمەتا ھەرێمێ چو دەست و پالپشتی تێدا نینە و گۆت: حوکمەتێ چو دەست د بوھایێ وێ دا نینە.
ناڤبری ئاشکرا کر، رەنگە جارەکا دی وەکو بەرێ پانزین بھێتە پۆلینکرن بۆ پانزینا نۆرمال، موحەسەن و سۆپەر، چونکو بەری نھا پانزینخانان ب کەیفا خۆ پانزین پۆلین دکر، لێ ژ نھا وێڤە دێ حوکمەت پۆلین کەت و بۆھایێ بۆ دانیت و ناھێلیت ھەر بازرگانەک ب کەیفا خوە پانزینێ پۆلین بکەت و گۆت ژی: ئەوێن بەری نھا پانزینا نۆرمال ب ناڤێ پانزینا موحەسەن دفرۆتن دێ ھێنە سزادان و چاڤدێریەکا توندتر دێ ل سەر ھێتە دانان.
سەرۆکێ لیژنا پیشەسازی و وزێ ل جڤاتا پارێزگەھا ھەولێرێ ئاشکرا ژی کر، ژ بەر نەبوونا پشتەڤانیا حوکمەتێ ل سەر پانزینێ و بلندبوونا بھایێ پترۆلێ د بازارێن جیھانێ دا، بۆھایێ پانزینێ ل رۆژێن بۆری د بازارێن کوردستانێ دا گرانتر لێ ھاتیە و گۆت ژی: نھا ژ بەر بلندبوونا بۆھایێ دولاری، ئەو پانزینا ژ دەرڤەی وەلاتی دھات، بۆھایێ وێ گرانتر لێ ھات.
ئەڤرۆ نیوز،زنار تۆڤی:
بەرپرسێ بوردێ کاروبارێن مرۆڤایەتی ل دھوکێ سالم سەعیدی دیارکر کو ئەڤرۆ رۆژا دوشەمبی دێ کەمپا دەرکارێ ل زاخۆ ھێتە ڤەکرن بۆ وان ئاوارەیێن د کاڤل و ئاڤاھیێن نە چێکری دا یێن کو ل زاخۆ و دھوکێ دژیان ئەڤرۆ ئەو مالباتە ھەمی دێ ھێنە ڤەگۆھاستن بۆ وێ کەمپا دەرکارێ کو سەرجەمێ وان 650 مالباتن دێ تێدا ھێنە خۆجھکرن و کو بۆ وان مالباتان ئاڤاھیێن پلاستیکی ھاتینە چێکرن و دیارکر ژی،کو بنگەھێ ساخلەمیێ و قوتابخانە ژی دناڤ وێ کەمپێ دا ھاتینە چێکرن.
ئەڤرۆ نیوز:
ئێک ژ دامەزرێنەر و ئەندامەکێ بەرێ یێ مەکتەبا سیاسی یا ئێکگرتوویا ئیسلامی یا کوردستانی دیارکر کو د کۆنگرێ بھێت یێ ئێکگرتووی دا، ھەتا پێنج کەسان دێ خوە بۆ پۆستێ ئەمیندارێ گشتیێ ئێکگرتووی بەربژارکەن و ل دووڤ پەیرەوێ ناڤخوەیێ وێ حزبێ، ئەمیندارێ گشتیێ بەرێ سەلاحەدین بەھائەدین مافێ خوە بەربژارکرنێ یێ ھەی چونکێ ئەندامەکێ ئێکگرتوویە.
دیندار نەجمان دۆسکی، چاڤدێرێ سیاسی ئێک ژ دامەزرێنەر و ئەندامێ بەرێ یێ مەکتەبا سیاسی یا ئێکگرتوو یا ئیسلامی یا کوردستانێ بۆ رۆژناما ئەڤرۆ گۆت” ب دیتنا من سەلاحەدین بەھائەدینی حەز یا ھەی کو بزڤریتەڤە و ئەو چار سال بوون خوە بەرھەڤ دکر بۆ ڤەگەریانێ وەکو ئەمیندارێ گشتیێ ئێکگرتووی ئیسلامی کوردستان و وی تێبینیێن خوە یێن ھەین ل سەر سیاسەتا حزبێ ددەمێ چار سالێن بۆری دا و ب دیتنا وی، ئێکگرتووی بێ لایەنیا خوە نە پاراستیە و دبینم دێ سەلاحەدین بەھائەدین پتر دەلیڤا دەرکەفتنێ ھەبیت، دچار سالێن بۆری دا ئەندامێن ئێکگرتووی ئاخڤتن ل سەر رێڤەبرنا وی ژبیرکرینە و نوکە ئاخڤتن ل سەر محەمەد فەرەجی یە، دبیت دڤی کۆنگرەی دا ھندەک ئەندامێن ئێکگرتوو جوداببن یان بێھنا خوە ڤەدەن، بەلێ چوونا چەقا دبیت، بەلێ دبینم ب ساناھی نینە”.
ل دۆر رۆلێ محەمەد فەرەج ئەمیندارێ نوکە یێ ئێکگرتوو ئیسلامی کوردستان، ناڤبری گۆت” ب گشتی نەشێین حوکمی ل سەر رێڤەبەریا محەمەد فەرەجی بدەم، بڕیار و سیاسەتێن باش ھەبوون و سیاسەتێن شاش ژی ھەبوون، بەلێ ب تنێ محەمەد فەرەج بەرپرس نەبوویە، بەلکو مەکتەبا سیاسی و سەرکردایەتی ژی دپشکداربوون د دەرکرنا بڕیاران دا و دانانا سیاسەتا تا حزبێ دڤان چار سالێن بۆری دا و رەوشا سیاسی ل ھەرێمێ و عیراقێ و رۆژھەلاتا ناڤەڕاست وەکو دروستبوونا داعشێ و بھارا عەرەبی و ئەنجامێن وێ کار ل سەر سیاسەتا ئێکگرتووی ھەبیت”.
زێدەتر گۆت”ل دەڤەرا سلێمانیێ نەرازیبوون ل سەر ھەلویستێن محەمەد فەرەجی ب تایبەتی نێزیکبوون ژ پارتی دیموکراتی کوردستان ھەبوون”.
ل دۆر سەرەدانا سەلاحەدین بەھائەدینی بۆ پارێزگەھا دھۆکێ، دینداری گۆت” ھاتنا وی ھەوەکا کۆمکرنا دەنگان بوو، دیسا بۆ شرۆڤەکرنا ئەگەرێن ڤەگەریانا خوە و نەخاسمە ئێکگرتوویێ گەلەک پرۆپاگندە ددەمێ خوە دا ل سەر دھاتنە کرن کو ئێکەم حزبە ئالوگوریکرنا سەرۆکێ حزبێ کریە، ڤەگەریانا وی دێ بیتە جھێ پرسیاران ل دەڤ گەلەکان، ھەتا ل دەڤ ئەندامێن ئێکگرتوو ئیسلامی ژی”.
دیارکر ژی” سەلاحەدین بەھائەدین سەرەدانا من ژی کر، بەلێ داخوازا زڤرینا من نەکریە بۆ ناڤ ئێکگرتوو ئیسلامی کوردستان، بەلکو بەحسێ کۆنگرێ ئێکگرتووی و بەربژارکرنا خوە بۆ پۆستێ ئەمیندارێ گشتی کر”.
ل دۆر سەنگا دەنگێن ئێکگرتوو ژی، دیندار دۆسکی گۆت” ئەنجامێن ھەلبژارتنێن بۆری، وێ چەندێ رادگەھینیت کو ئێکگرتوو یا پاشڤە چووی و ب تایبەتی ل سلێمانیێ و ھەولێرێ و ب دیتنا من و گەلەک ئەندامێن دی یێن ئێکگرتووی، بەلاڤبوونا ھزرا یەکگرتوو و حزبێن ئیسلامی ل ھەرێما کوردستانێ یا لاواز بووی و ئەڤ چەندە ژی پێدڤی ب ڤەکۆلینانە کو ل سەر بھێنەکرن ژلایێ سەرکرداتیا ئێکگرتوو ڤە”.
ئەڤرۆ نیوز:
سەرۆکێ لیستا برایەتیێ و پێکڤەژیانێ یا کوردستانی ل جڤاتا پارێزگەھا نەینەوا دیارکرکو بەغدا ل سەر داخوازیا پارێزگاری نەینەوا یا رازی بووی بۆ پێکئینانا حەشدا جەماوەری بۆ پشکداریکرنێ د شەڕێ ئازادکرنا مووسلێ دا وھەتا پێنج ھزار کەس دی ھێنە وەرگرتن ومەشقدان، نوکە تورکیا وئیران وسووریا ژێ یێن بزاڤێن پشکداریێ د شەڕێ مووسلێ دا دکەن.
سەیدۆ چەتۆ حەسۆ سەرۆکێ لیستا برایەتیێ وپێکڤە ژیانێ ل جڤاتا پارێزگەھا نەینەوا بۆ رۆژناما ئەڤرۆ دیارکرکو ل نێزیک دێ پاریزگارێ نەینەوا پێکئینانا حەشدا جەماوەری راگەھینیت و دێ دەست ب ناڤ نڤیسینێ ھێتە کرن وحەشدا جەماوەری دێ پێکھاتی بیت ژ ھەموو پێکھاتێن مووسلێ بێی جۆداھی، بەلێ دروستکرنا حەشدا جەماوەری د دەمەکێ گەلەک گیرۆ دایە و پێدڤی بوو گەلەک زووتر حەشدا جەماوەری ژ ھەموو پێکھاتین مووسلێ ھاتبا دروستکرن”.
سەیدۆی گۆت ژی”پاریزگارێ نەینەوا و حوکمەتا عیراقێ ب ھەڤکاری ل گەل وەزارەتا پێشمەرگەی ل ھەرێما کوردستانێ دێ پشتەڤانیا حەشدا جەماوەری کەن و دێ حەشدا جەماوەری ھێتە پێکئینان پشتی دھێتە مەشقدان وپڕچەککرن ودێ پشکدار بیت د شەڕێ مووسلێ دا و ل پاشەرۆژی ژی دێ ئەرکێ پاراستنا مووسلێ پتر دستوویێ وێ ھێزێ دابیت، نوکە ژی بەرھەڤیێن شەڕی ئازادکرنا مووسلێ یێن دھێنە کرن، بەلی بەغدا نە یا رژدە وگیرو دکەت”.
سەرۆکێ لیستا برایەتیێ وپێکڤەژیانی ل جڤاتا پارێزگەھا نەینەوا خویاکر ژی” دەستێن وەلاتێن تورکیا و ئیرانێ و سووریێ ژی یێ دناڤ مووسلێ دا وھەر وەلاتەکی ژ وان دڤێت پشکداریێ دشەڕێ ئازادکرنا مووسلێ دا بکەن و ئەم دبینین دێ شەڕێ مووسلێ یێ خویناوی بیت، چونکی بنگەھێ سەرەکیێ تیرۆرستێن داعشێ یە ل عیراقێ و باژێڕێ مەزنێ دویێ یە ل عیراقێ وھەر دەمی مووسل ئازاد ببیت، دێ بیتە ئەگەر تیرۆرست ژ ناڤ بچن و ژ ناڤچوونا تیرۆرستێن داعشێ ژی ب تنێ دێ ل سەر دەستێن پێشمەرگێ کوردستانێ بیت چونکی ھەتا نوکە تاکە ھێزا تیرۆرست شکاندین پێشمەرگە بوو”.
سەیدۆ چەتۆ خویاکر” پێشمەرگێ کوردستانی و حەشدا جەماوەری ل گەل حەشد شەعبی و ھێزین ھەڤپەیمانان دێ شەڕێ ئازادکرنا مووسلێ کەن، بەلێ ئەم وەسا دبینین گەلەک باشترە ھەرێما کوردستانی ب مەرج پشکداریێ بکەت ئەوژی مافێن کوردان دپاراستی بن دھەموو بوارەکی دا ل مووسلێ پشتی ئازاد دبیت وئێدی غەدر ل کوردان نەھێتە کرن د پۆستێن ئیداری و لەشکری دا ل مووسلێ”.
ناڤبری ئاشکرا کرکو لەشکرێ عیراقێ یی لاوازە ودەمێ شەڕی دکەت نەشێت کونترۆلێ ل سەر دەڤەران بکەت و ئەو ھەموو دەڤەرێن ھاتینە ئازادکرن ژی ھەموو ب پشتەڤانیا پێشمەرگەی بوو، ل دەڤەرا مەخمورێ پێشمەرگەی چەندین گۆند ودەڤەر ئازادکرن و ھندەک گۆند خستنە دبن کونترۆلا لەشکرێ عیراقێ وحەشد شەعبی دا، بەلێ مخابن لەشکرێ عیراقێ و حەشد شەعبی نەشیا وان دەڤەران بپارێزن” .
ئه‌ڤرۆ نیوز:
ل گۆر پێشبینیێن فه‌له‌كناسان، سوبه دێ هه‌سارا عه‌تارد ل هه‌مبه‌ر رۆژێ زڤریت و ئه‌ڤ دیارده ل پڕانیا وه‌لاتان دێ هێته دیتن.
ناسا به‌لاڤكریه كو هه‌سارا عه‌تارد دێ د ناڤبه‌را هه‌سارا ئه‌ردى و رۆژێ را چیت و دیمه‌نێ ده‌ربازبوونا وێ پتر ژ 7 ده‌مژمێران ل پڕانیا ده‌وله‌تان دێ یا به‌رده‌وام بیت.
ئه‌ڤ دیارده ئه‌ڤرۆ ل ده‌مژمێر 2 و 10 ده‌قیقه ب ده‌مێ كوردستانێ دێ ده‌ست پێ كه‌ت، عه‌تارد ژ ئالیێ چه‌پێ یێ رۆژێ دێ به‌ره‌ڤ لایێ راستێ ده‌رباز بیت، د قورنه‌كێ دا ئه‌ڤ دیمه‌نه 12 بۆ 13 جاران دروست دبیت و دیتنا ڤى دیمه‌نى پێدڤى ب پێدڤیێن فه‌له‌كناسى یێن تایبه‌ت هه‌یه، چونكو به‌رێخوه‌دانا ئێكسه‌را رۆژێ دێ زیانان گه‌هینیته چاڤان و هوون دشێن ب رێیا ڤى لینكى بینه‌رێن ده‌ربازبوونا عه‌تاردێ بن.
نيشاندان