ئەڤرۆ نیوز:
رێڤەبەریا گشتیا کۆچ و کۆچبەران یا حوکمەتا ھەرێما کوردستانێ ئاشکراکر، کو ژمارەکا پەنابەران ل وەلاتێن بیانی ڤەگەڕیاینە و نێزیکی 350 ژ وانا ناڤێن خوە تۆمارکرینە بۆ ڤەگەڕیانێ و پشتی پێدانا پاسپۆرتێن دەمکی دێ پڕۆسا ڤەگەڕیانێ دەستپێکەت.
نەزھەت حوسێن، بەرپرسێ کۆچ و رەڤەندا کوردی ل حوکمەتا ھەرێما کوردستانێ بۆ رۆژناما ئەڤرۆ گۆت: “دانا پاسپۆرتێن دەمکی بۆ پەنابەرێن نەقانوونی یا بەردەوامە و ل وەلاتێ فیلەندا ژمارەکا پاسپۆرتێن دەمکی داینە پەنابەران و ڤەگەڕیانە بۆ عێراقێ، 157 پەنابەرێن بەری نوکە ب رێێن نەقانوونی چووینە دەرڤە ڤەگەڕیاینە ھەرێما کوردستانێ، ب شێوەیەکێ گشتی پتری پێنج ھزار پەنابەران ناڤێن خوە تۆمارکرینە بۆ ڤەگەڕیانێ و ھەموو ژی عیراقینە، گورەی زانیاریێن بۆمە ھاتی نێزیکی 350 ژوان پەنابەرا کوردن و خەلکێ ھەرێما کوردستانێ نە، ھەتا نوکە 134 تەرم ژی ژ لایێ حوکمەتا ھەرێما کوردستانێ ھاتینە ڤەگەڕاندن”.
ناڤبری گۆتژی: “خەلکەکێ زۆر سەرەدانا رێڤەبەریا کۆچ و کۆچبەران دکەن و داخوازا دیتنا کەس و کارێن خوە دکەن، یێن ب رێیا ئوڕۆپا بەرزەبووین، ھندەک ژوانا ب ئاڤێ دا چووینە و ھندەکێن دی ژی ب ئەگەرێن جودا جودا دیار نینن، ھەولێن حوکمەتا ھەرێمێ د بەردەوامن ل سەر دیتنا رێیە چارەکێ بو دیتنا وان پەنابەران، ب تایبەتی ئەڤ تەرمێن ھاتینە دیتن ل وەلاتێن ئوڕۆپی”.

ئەڤرۆ نيوز:
سەرکردەکێ حەشد شەعبی دداخۆیانیەکێ دا بۆ رۆژناما ئەڤرۆ، رەتکر کو راگەھاندنا حەشد شەعبی دەنگوباسەک ل دۆر ئازادکرنا 354 کچێن ئێزدی ل فەلوجە بەلاڤ کربیت، ددەمەکی دا رێڤەبەرێ کاروبارێن کوردێن ئێزدی ل پارێزگەھا دھۆکێ راگەھاندبوو کو حەشد شەعبی لیستێن ب ناڤێن کچێن ئێزدی ئەوێن ھاتینە ئازادکرن یێن بەلاڤکرین.
ھادی دوبانی رێڤەبەرێ کاروبارێن کوردێن ئێزدی ل دھۆکێ بۆ (شەفەق نیۆز) گوتبوو” راگەھاندنا حەشد شەعبی دەنگوباسەک ل دۆر ئازادکرنا 354 کچێن ئێزدی بەلاڤکریە ل گەل لیستێن ناڤێن وان کچان، بەلێ نوکە ئەو ناڤ یێن دبن کارێ ھووربینیێ دا و دیاربوویە کو ھندەک ژوان کچان یێن ل ئەلمانیا و ھندەک ژوان ژی یێن مرین”.
گوتبوو ژی” ھەتا نوکە ئازادکرنا وێ ھژمارا کچێن ئێزدی ل فەلوجە نەھاتیە پشت راستکرن”.
ژلایێ خوەڤە کەریم نوری ئێک ژ سەرکردێن حەشد شەعبی کو دھەمان دەم دا پەیڤدارێ حەشد شەعبی یە بۆ رۆژناما ئەڤرۆ گۆت” مە وەکو حەشد شەعبی چو دەنگوباس ل دۆر ئامارێن کچێن ئێزدی یێن ئازادکری ل فەلوجە بەلاڤ نەکریە و ھەر سایتەکی یان جھەکی ب ناڤێ حەشد شەعبی ئەو دەنگوباس و ئامار بەلاڤکربن، چو پەیوەندی ب حەشد شەعبی ڤە نینە و دبیت ئەو سایت ب ناڤێ حەشد شەعبی ھاتبنە دروستکرن و ئەم د بەرپرس نینین ژ وان دەنگوباسان”.
کەریم نوری زێدەتر گۆت” کچێن ئێزدی یێن ژلایێ داعشێ ڤە ھاتینە رەڤاندن، خوەشکێن مەنە و ھەکە ئەم ل شەرێ نوکە یێ فەلوجە وان ببینین، ئەم وێ چەندێ ناڤەشێرین و دێ ب فەرمی راگەھینین و ئەو چەندە دێ بیتە جھێ شانازیێ ل دەف مە، بەلێ ھەتا نوکە مە چو کچێن ئێزدی ل شەرێ ئازادکرنا فەلوجە دا نەدیتینە”.
ناڤبری حێبەتیا خوە دیارکر ژ بەلاڤکرنا دەنگوباسێ ئازادکرنا 354 کچێن ئێزدی ل فەلوجە کو ئەڤ دەنگوباسە ژلایێ راگەھاندنا حەشد شەعبی ڤە ھاتیە بەلاڤکرن و گۆت” مە ل حەشد شەعبی چو دەنگوباس ل دۆر ڤێ چەندێ بەلاڤک نەکرینە و ھەکە مە کچێن ئێزدی ژی د شەرێ فەلوجە دا دیتن دێ ئازادکەین و ب شانازی ڤە ژی دێ وی دەنگوباسی ب فەرمی بەلاڤکەین، بەلێ بۆ ھەوە پشت راست دکەین کو مە چو کچێن ئێزدی نەدیتینە و مە چو دەنگوباس ژی ل دۆر ئازادکرنا وان ل فەلوجە بەلاڤ نەکرینە”.
زێدەتر گۆت” دبیت ب دەھان سایت و پەیچێن ئەلکترۆنی ل سەر تۆرا ئەنترنێتێ ب ناڤێ حەشد شەعبی ھاتبنە دروستکرن، بەلێ ئەم دبێژین ئەو ھەموو د سەختەنە و چو پەیوەندی ب حەشد شەعبی ڤە نینە”.