ئەڤرۆ نيوز:
دونالد ترامپ ئێک ژ بەربژێرێن سەرۆکاتیا ئەمریکا ژ پارتا کۆماری د داخۆیانیەکێ دا راگەھاند کو ھەکە ئەو ببیتە سەرۆکێ ئەمریکا دێ گوھۆرینێن مەزن د سیاسەتا دەرڤە یا وی وەلاتی دا کەت و گۆت: (داعش بوویە بەلایەک مەزن بۆ ھەموو جیھانێ و ھەتا نھا ژی وەک پێدڤی شەرێ وێ رێکخراوا تیرۆرستی نەھاتیە کرن و ھەکە ئەز ببمە سەرۆکێ ئەمریکا دێ نەفتا سعوودیێ بدەمە راگرتن و ناھێلم بچیتە ناڤ بازارێن جیھانی، ھەتا کو سعوودیێ ب رەنگەکێ ئاشکرا شەرێ داعشێ نەکەت و ھێزێن خوە رەوانەی عیراقێ بکەت دا شەرێ داعشێ بکەن).
ترامپ بێی کو ئاماژە ب ناڤێ سعوودیێ و چو وەلاتەکێ بکەت ئەو یەک ژی راگەھاند کو ھندەک وەلات بۆ بەرژەندیێن خوە ب رەنگەکێ نە راستەوخوە پشتەڤانیێ ل تیرۆرێ دکەن و ژ بەر ھندێ ژی رێکخراوێن تیرۆرستی یێن وەک داعشێ ب ھێز دبن و ژناڤ ناچن و ژ بەر ھندێ ژی ھەکە ببمە سەرۆکێ ئەمریکا دێ ستراتیژیا شەرێ ل دژی داعشێ بدەمە گوھۆرین و ھەر وەلاتەک ب رەنگەکێ جدی شەرێ داعشێ نەکەت دێ وان ژی ب توندی سزا دەم.
بەربژارێ سەرۆکاتیا ئەمریکا ھەروەسا دژبەریا خوە ل ھەمبەر رێککەڤتنا ئەتۆمی یا د ناڤبەرا ئیران و ئەمریکا ژی نیشا دا و راگەھاند کو ئۆباما بوویە ئەگەر نھا ئیران ب ملیارد دۆلاران پارێن خوە ژ بەنکێن جیھانی وەربگریت و ئەو وەلاتە ب ھێز دکەڤیت و ئەو یەک دێ مەترسیەکا گەلەکا مەزن بیت بۆ پاشەرۆژا ئەمریکا.

ئەڤرۆ نیوز:
ئاکپارتی ل سەر داخوازا سەرۆک کۆمارێ تورکیا خوە بۆ ھەلبژاتنەکا پێشوەخت ئامادە دکەت و ئارمانجا سەرۆک کۆماری ئەوە کو ژ چار پشکان سێ پشک کورسیێن پەرلەمانێ بێخیتە دەستێ خوە و ب ڤی رەنگی دستوورەکی نوو بدەتە دروستکرن و سیستەمێ تورکیا ژ پەرلەمانی ب گوھۆریت بۆ سیستەمێ سەرۆکایەتیی و پەرلەمان، وەزارەتان و دادگەھێ کۆنترۆل بکەت.
ئەندامەکی بەرێ یێ پەرلەمانێ تورکیا ژ ئاکپارتی کو نەخواست ناڤێ وی بھێتە ئاشکرا کرن بۆ رۆژناما ئەڤرۆ راگەھاند کو ل تورکیا بەرھەڤی بۆ ھەلبژاتنەکا پێشوەخت دھێتە کرن و پشکەک ژ حوکمەتێ و ئەندامێن ئاکپارتیێ ل دژی ھەلبژارتنا پێشوەختن و ناخوازن د ڤێ قۆناغێ دا ھەلبژارتن بھێتە کرن لێ ژ بەر ب ھێزبوونا سەرۆک کۆمار ئەردۆگان د ناڤ دەزگەھێن ئاکپارتی دا کەسێن دژبەر نەشێن ب ئاشکرایی ل دژی ھەلبژارتنێ دەرکەڤن.
ئەندامێ بەرێ یێ پەرلەمانێ تورکیا ھەروەسا راگەھاند ژی کو ل رۆژئاڤا و ناڤەراست و باکورێ تورکیا نەتەوەپەرست و کەسێن میانرەو زێدەتر بەرێ خوە ددەنە ئاکپارتی و سەرۆک کۆمار ئەردۆگان ژی وەسا باوەر دکەت کو ب سایا دەنگێ نەتەوەپەرست و یێن دی دشێت ژ چار پشکێن کورسیێن ل پەرلەمانی سێ پشکان ب دەست بخینیت و ب ڤی رەنگی ھەموو بەرنامێ خوە یا بۆ بجە کرنا سیستەمێ سەرۆکاتیێ پێک بینیت و گۆت: (ئەردۆگان وەسا باوەر دکەت کو چەند تەرمێن شەھیدان بھێنە باژێرێن تورکیا ئەو ھندە دێ دەنگێن وی زێدە ببن لێ ل دووڤ ھزرا من ئەڤ شەرێ نھا کو ب کوردان را دھێتە کرن و سیاسەتا دەرڤە یا تورکیا دەنگێن ئەردۆگانی کێمتر کریە و ھەتا د ناڤ ئاکپارتی ژی رۆژ ب رۆژێ دەنگێن نەرازیبوونێ ل دژی ئەردۆگانی زێدە دبن).
ئەندامێ بەرێ یێ ئاکپارتی د پشکەکی دی یا ئاخڤتنا خوە دا ژی ل سەر رەوشا باژێرێن باکورێ کوردستانێ راوەستیا و راگەھاند کو ل باژێرێن باشور و رۆژھەلاتێ تورکیا ھزرا جودابوونا ژ تورکیا د ناڤا رێژەکا مەزن ژ وەلاتیێن کورد دا دروست بوویە و گۆت: (گەلەک ھەڤال و دۆستێن من ل باژێرێن باشور و رۆژھەلاتێ تورکیا ھەنە و گەلەک جاران ئەم دھێنە گەل ھەڤدو و رەوشا وەلات گەنگەشە دکەین، د ڤان رۆژان دا تشتێ ھەری سەرەنج راکێش بۆ من ئەو بوو کو پرانیا ھەڤال و دۆستێن من یێن کورد ب ئاشکرایی دبێژن کو ئەو خوە وەک پشکەک ژ وەلاتیێن تورکیا نابینن و گۆتن کو ب سایا ئەردۆگانی PKK ژ ھەر دەمی زێدەتر ب ھێز بوویە و ھەکە حوکمەت ھەموو مافێن کوردان ب فەرمی قەبوول نەکەت ئێدی چو ھێز نەشێت تورکیا یەکگرتی بھێلیت. ئەڤ ھەڤالێن من د درێژیا کارێن خوە یێن سیاسەتێ دا ل دژی PKK و پارتێن سیاسی یێن سەر ب وێ بووینە لێ نھا خوە ژ دەولەتێ زێدەتر نێزیکی PKK و HDP دبینن و د ناڤا وان دا ئەندامێن پەرلەمانێ یێن سەر ب ئاکپارتی ڤە ژی ھەنە).
د دووماھیا ئاخڤتنا خوە دا ژی راگەھاند کو ب پشتەڤانیا ئەمریکا و ئورۆپا ھژمارەک زێدە ئەندامێن پەرلەمانێ تورکیا یێن سەر ب ئاکپارتی و ئەندامێن بەرێ یێن پەرلەمانی و ھژمارەک کەسێن د ناڤ پارتێن دی دا دخوازن پارتەکا نوو یا دیمۆکراتیک ئاڤا بکەن و ب ڤی رەنگی رێ ل بەر دەستھەلاتا تاکەکەسی یا ئەردۆگانی بگرن.