ئه‌ڤرۆ نیوز، له‌زگین جۆقى:
به‌رپرسێ بنگه‌هێ لالش یێ ره‌وشه‌نبیرى و كۆمه‌لایه‌تى – تایێ شاریا دیار كر كو ئه‌ڤرۆ 8/3/2016 ئاوارێن شنگالێ ل كۆمه‌لگه‌ها شاریا و خه‌لكێ وێ خرڤه‌بوونه‌كا جه‌ماوه‌رى ئه‌نجام دان و تێدا داخوازا ئازادكرنا ره‌ڤاندیێن ئێزدى ژ ده‌ستێ داعشێ كرن و بیانامه‌ك ژى به‌لاڤكر.
جه‌لال له‌زگین، به‌رپرسێ بنگه‌هێ لالش یێ ره‌وشه‌نبیرى و كۆمه‌لایه‌تى – تایێ شاریا ئاشكرا كر، پشتى بۆرینا ساله‌ك و پێنج هه‌یڤان ل سه‌ر كاره‌ساتا شنگالێ و هه‌تا نوكه جڤاكێ نێڤده‌وله‌تى یێ بێده‌نگه به‌رامبه‌ر وێ كاره‌ساتا ب سه‌رێ كۆردێن ئێزدى هاتى و بۆ ئه‌ڤرۆ گۆت: “ئه‌م داخواز دكه‌ن ئێدى جڤاكێ نێڤده‌وله‌تى بێده‌نگ نه‌مینیت و كار بۆ رزگاركرنا ره‌ڤاندیان بكه‌ت و وێ كاره‌ساتێ ژى ب جینۆساید بده‌ته نیاسین”.
ناڤبرى ئه‌وژى خویا ژى كر، د وێ خرڤه‌بوونێ دا به‌یاننامه‌ك هاته خواندن و تێدا داخواز ژ حوكمه‌تا هه‌رێما كوردستانێ و حوكمه‌تا عیراقێ هاته‌كرن، كو د پلانێن خوه یێن له‌شكرى دا رزگاركرنا ره‌ڤاندیان ژى بدانن و باشتر كار بۆ ئازادكرنا یێن هه‌تا نوكه ماینه ده‌ستێن تیرۆرستان دا بهێته‌كرن.
جه‌لال له‌زگین دا زانین كو هه‌تا نوكه دۆرێن سێ هزار كه‌سان د ده‌ستێن تیرۆرستان دا ماینه و چاره‌نڤیسێ گه‌له‌ك ژ وان ژى یێ ئاشكرا نینه، له‌و پێدڤیه هه‌موو ریكخراو و لایه‌نێن سیاسى ل گه‌ل حوكمه‌تا هه‌رێما كوردستانێ هه‌ڤكار بن و كار بۆ ئازادكرنا ره‌ڤاندیان بكه‌ن.
ئاوارێن شنگالێ داخوازا ئازادكرنا ره‌ڤاندیان دكه‌ن
نيشاندان
