ئەڤرۆ نیۆز، قائید میرۆ:
ئەڤرۆ قوتابیەکا کچ ناڤا زانکۆیا بەیان لباژێڕێ ھەولێرێ خوە بریندارکرو سەرۆکێ زانکۆیێ ژی دبێژیت، نوزانین چاوا چەک بریە زانکۆیێ دا.
دکتۆر سەعید رەسول، سەرۆکێ زانکۆیا بەیان یا ئەھلی ب ئەڤرۆ نیۆز راگەھاند” بەری نیڤرۆیا ئەڤرۆ ل کۆلیژا قانوون یا زانکۆیا بەیان قوتابیەکا کچ دناڤا ھۆلا خواندنێ ب چەکێ دەمانچێ بزاڤێن خوە کوشتنێ داینە و برینداربووینە.
رەسول گۆتژی” پشتی برینداربوونێ قوتابیا کچ ھاتیە ڤەگوھاستن بۆ نەخۆشخانا ھەوارھاتنێ و مە دوڤچوون بۆکریە، بەلێ چو ئاریشە نەبوویە، لێ یا سەیر بۆمە ئەڤە چاوا شیایە چەکی دگەل خوە ببەتە ناڤا زانکۆیێ و پۆلیس یێ ڤەکۆلینێ دکەن.

ئەڤرۆ نيوز:
رێڤەبەرێ شوونوارێن قەزا ئاکرێ ھیوا شەمال بۆ ڕۆژناما ئەڤرۆ دیار کر کو قەیرانا دارایی کارتێکرن ل سەر ھندێ کریە کو خەلکێ مە بزاڤێ بکەت کو دەست درێژیێ ل سەر جھێن شوونواری بکەت و خورستیا وان شوونواران تێک بدەت ب مەرەما دیتنا کەلوپەلێن شوونواری یێن بھا گران وەکو پارچێن زێری و کەڤنە گۆسک و چەندین پارچێن دی یێن شوونواری، ب مەرەما بدەستڤەئینانا پارەی.
ھیوای زێدەتر گۆت” قانوونا شوونواران ڕێ نادەت ب چو ڕەنگەکی دەست درێژی ل سەر شوونواران بھێتەکرن، داخوازێ ژ لایەنێن پەیوەندیدار و دەزگەھێن ئێمناھیێ دکەم دھەڤکاربن ل گەل رێڤەبەریا شوونواران ل قەزا ئاکرێ و بەردەرەش داکو ئەڤ دەست درێژیە ل سەر جھێن شوونواری نەھێتەکرن، چونکی یا پێدڤیە وەک ئەرکەکێ نیشتیمانی ل سەر ھەر تاکە کەسەکی ئەوێ ل سەر ڤێ ئاخێ دژیت شوونواران ب پارێزیت نە تێک بدەت”.
ھیوای ئاشکراکر”چەندین پارچێن شوونواری یێن ھاتینە دەستەسەرکرن و دیتن ل سەر وان جھێن شوونواری کو ژبەر ترس و لەزێ نەگەھشتینە ببەن و ھەر ل وی جھی دا یێن ھێلاین، بەلێ ھەتا نوکە کەس نەھاتیە دەستەسەرکرن و دووڤچوون یا بەردەوامە، داکو ئەو کەسێن دەست درێژی کریە ل سەر وان جھان بھێنە دەستەسەرکرن و سزادان ل دووڤ قانوونێ”.
ناڤبری دیارکر ژی کو زێرەڤان بۆ ھەموو جھێن شوونواری یێن ھاتینە دابینکرن، بەلێ ھەر دکێمن، ل دووڤ ھژمارا شوونوارێن ل ئاکرێ ھەین، ھێشتا مە پێدڤی ب زێرەڤانان ھەیە، چونکو پێدڤیە ئەو زێرەڤان د دەمێ 24 دەمژمێران دا و ب شەڤ و ڕۆژ چاڤدێریا وی جھی بکەت و پێدڤیە ھەر جھەکێ شوونواری زێرەڤانەک بۆ ھەبیت، لەوما دڤێت ژبلی دەزگەھێن ئێمناھیێ، جڤاتێن گوندان و مختار ژی ل گەل مە دھاریکاربن داکو ئەڤ دیاردە نەمینیت” گۆت ژی ” نڤیسارێن فەرمی بۆ جھێن شولەژێ یێن ھنارتین کو ئەم پێدڤی ب زێرەڤاناینە کەن ژبۆ نەھێلانا ڤان دیاردان و پاراستنا جھێن شوونواری”.
700 جھێن شوونواری ل قەزا ئاکرێ یێن ھەین، ژ وان (کەلھا ئاکرێ و کەلھا شوش و کەلھا کەلاتێ و کەلھا کەلەدێرێ و شکەفتا گوندێ دێر و شکەفتا دێرا مارقریا قوسی و دێرا مار عودیشۆ و مزگەفتا ئەسحابان و مەزارێ شێخ عبدالعزیز گیلانی و خانیێن کەڤنار).

ئەڤرۆ نیوز:

ئەندامەکێ پەرلەمانێ کوردستانێ ژ فڕاکسیۆنا پارتی دیارکر کو پرۆسا چاکسازیێ پرۆسەکا بەردەوامە و مە ل ھەرێما کوردستانێ پێدڤی ب کەسانێن بسپۆر ھەیە کو بزانن کارێ وان یێ سەرەکی دڤێ پرۆسا دا چیە. ل دۆر سزاداناکەسانێن گەندەل دناڤ دەزگەھێن حوکمەتێ دا دبێژیت، گەندەلکارێن دناڤ دامودەزگایێن حکومی و گشتی دا بابەتەکێ تمام جودایە ژ چاکسازیێن ئیداری و دارایی و پێدڤی لژنان ناکەت، بەلکو دەستھەلاتا دادوەری و دەستەیا دەستپاکیێ و دیوانا چاڤدێریا دارایی یا ھەی.

دلشاد شەعبان ئەندامێ لژنا دارایی ل پەرلەمانێ کوردستانێ ژ فڕاکسیۆنا پارتی د پەیچێ خوە فیسبووکی دا دبێژیت” چاکسازیا ئیداری و دارایی ئانکو ھژمارەکا پێرابوونێن پێدڤی نە بۆ چارەسەرکرنا کێشەکێ، یان کۆمەکا کێشان دناڤ سیستەمێ ئیداری و دارایی یی سازیێن دەولەتێ دا کو ئەڤ کێشە دبنە ڕێگر بەردەم بجھئینانا ئارمانجێن ڤان سازیێن دەولەتێ و ئەڤ کێشە یان ناڤخوەیی نە، یان ژی دەرەکی، ژ ئەگەرێ کارتێکرنا سازیێن سیاسی و ئابووری ژ دەرڤەی جیھازێ حکومی، پرۆسا چاکسازیا ئیداری و دارایی پرۆسەکا بەردەوامە و بۆ دەمەکی و جھەکی و ئاریشەکێ ب تنێ نینە، ئانکو چاکسازی پرۆسەکە دێ بەردەوامی ھەبیت ل گۆرەی گوھۆڕینێن سیاسی و جڤاکی و قانونی و تکنولوژی و ئابووری ..ھتد”.

ب دیتنا دلشادی، بۆ ئە نجامدانا چاکسازیێن ئیداری و دارایی وەکو پرۆسەکا بەردەوام، مە ل ھەرێما کوردستانێ پێدڤی ب کەسانێن شارەزا و بسپۆر ھەیە کو ب ڕاستی ژی بزانن کاری وان یێ سەرەکی د ڤی پرۆسێ دا چیە بۆ ھندێ کو سازیێن دەولەتێ ب بەردەوامی بشێن ڕەفتارێ ل گەل دەوروبەرێن خوە بکەن کو پێک دھێت ژ گوھۆڕینێن سیاسی و قانونی و ئابووری و جڤاکی و تەکنولوژی بۆ ب دەستڤەئینانا ئارمانجێن سازیێن دەولەتێ ب شیوەکێ ساخلەم کو دخزمەتا وەلاتیان دابیت ، ھیڤیدارم حوکمەتا ھەرێمێ بیر د پێکئینانا بوردەکێ بسپۆر دڤێ چەندێ دا بکەت ھەکە ب ڕاستی نیەتەک بۆ چاکسازیێ ھەیە.
دیسا دبێژیت” سزادانا گەندەلکارێن دناڤ دامودەزگایێن حکومی و گشتی دا کو بابەتەکێ تمام جودایە ژ چاکسازیێن ئیداری و دارایی، ل ھەرێما کوردستانێ چو پێدڤی ب دانانا لژنان ناکەت بۆ ڤی چە ندێ، چونکی مە ل کوردستانێ باشترین قانوونێن ھەین بۆ بەرھنگاربوونا گەندەلیێ و مە کۆمەکا دادوە ر و دادگەە و داواکارێن گشتی یێن ھەین کو پێک دھێت ژ دەستھەلاتا دادوەری و ھەروەسا دەستەیا دەستپاکیێ و دیوانا چاڤدێریا دارایی و پەرلەمان، ھەروەسا میدیا و رایا گشتی ، ب تنێ یا پێدڤی کاراکرنا ڤان دامودەزگەھانە و پالپشتی و پشتەڤانیکرن و سەربخویی کرنا کاری وانە ژلایێ حزبێن سیاسی و ھەروەسا پاراستنا وان ژ گەف و ترساندنێ ژلایێ گە ندەلکاران ڤە ، ھەکە ئەڤە بھێتە کرن، دێ ب ساناھی ڕێ ل گەندەلیێ و گەندەلکاران ھێتە گرتن و ب ڕاستی ژی پێکئینانا ھەر لژنەکێ بۆ مەرەمەکا ھوسا دناڤ حوکمەتێ دا، ئەز ب لاوازکرنا ڕۆلی وان دامودەزگەھان دبینم ئەوێن من ئاماژە پێکری ( دادگە ە و دە ستەیێن دە ستپاکیێ و دیوانا چاڤدێریا دارایی و ھەر سازیەکا دی دڤی بواری دا ) ئانکو ھەبوون و نەبوونا ڤان دامودەزگەھان وەکو ئێکە و ئەڤە ئاماژەکە بۆ ھندێ کو ئەم نەشیاینە خوە ژ شەرعیەتا شورەشگێری بەر ب شەرعیەتا ب دامودەزگایی کرنا وەلاتی پێنگاڤان ب ھاڤێژین و مەرەما من ھەموو حزبێن کوردستانی نە ، نەکو ب تنێ حزبەک و دو حزب”.

ئەڤرۆ نیوز:
رێڤەبەرێ گشتی ل وەزارەتا شەھید و ئەنفالکریان یا حوکمەتا ھەرێما کوردستانێ دیار دکەت کو 10 ھزار فۆرمێن کەسوکارێن شەھیدان دبەرھەڤن بۆ ھندێ پارچێن ئەردی بۆ بھێنە دان.
بەختیار حەمە سۆر، رێڤەبەرێ گشتی ل وەزارەتا شەھید و ئەنفالکریان ڕاگەھاند، ل سەرانسەری ھەرێما کوردستانێ پارچێن ئەردی ل سەر کەسوکارێن شەھیدان دێ ھێنە بەلاڤکرن و بۆ SNN گۆت: “نوکە 10 ھزار فۆرمێن کەسوکارێن شەھیدان ھاتینە بەرھەڤکرن، دا کو پارچێن ئەردی ل سەر بھێنە بەلاڤکرن”.
خویا ژی کر، بەری نوکە ژی 40 ھزار ژ کەسوکارێن شەھیدان ژ وەرگرتنا ئەردی و دروستکرنا خانیان مفادار بووینە و گۆت: “نوکە مە لیستەکا 10 ھزار کەسی بەرھەڤکریە، دا کو وەزارەتا باژێرڤانیان ئەردی بدەتێ”.

ئەڤرۆ نیوز:
پشتی بۆرینا چەندین ھەیڤان ل سەر ڕەوشا ناڤخوەیا ھەرێما کوردستانێ، نوکە دانوستاندن ل دۆر پێکئینانا حوکمەتەکا زۆرینە دھێتەکرن، کادرەکێ پێشکەفتیێ پارتی ژی دبێژیت، ھەرێما کوردستانێ دڤێ قۆناغێ دا پێدڤی ب حوکمەتەکا کارا ھەیە و حوکمەتا بنکە فراوان شکەستن ئینا، چونکی لایەنێن سیاسی ل ڕۆژێ ل گەل حوکمەتێ بوون و ب شەڤێ دژی حوکمەتێ بوون.
حەیدەر شێخ کەمال، کادرێ پێشکەفتیێ پارتی دیموکراتی کوردستان و چاڤدێرێ سیاسی بۆ ڕۆژناما ئەڤرۆ گۆت” من پێزانینێن ھوور ل دۆر کۆمبوونا د ناڤبەرا پارتی و ئێکەتیێ دا نینن، بەلێ یا خویایە حوکمەتا بنکە فراوان حوکمەتەکا سەرکەفتی نەبوو، ژ بەر کو لایەنێن سیاسی یێن پشکداری د کابینا ھەشتێ داکرین، ملێ خوە نەدا بەر قەیران و ئاریشێن ھاتینە پێش و ھەرسێ لایەنێن بەرێ ئۆپۆزسیۆن و ھاتینە د حوکمەتێ دا، ب ڕۆژێ دناڤ حوکمەتێ دا بوون و ب شەڤ ھەر ئۆپۆزسیۆنێن حوکمەتێ بوون، مخابن کابینا ھەشتێ یا سەرکەفتی نەبوو، چونکی پەرلەمانی گەلەک ئاریشە بۆ حوکمەتێ دروستکرن، ب تایبەتی بزاڤا گۆڕان پشکداریەکا تمام نەکر د حوکمەتێ دا و کارێن وێ حوکمەت توشی ئیفلجبوونێ کر، نەشیا کارێ خوە ب ڕێڤە ببەت”.
حەیدەری گۆت ژی” دڤێ قۆناغێ دا، ھەرێما کوردستانێ پێدڤی ب حوکمەتەکا کارا ھەیە و لایەنێن سیاسی ب شێوەکێ کارا و دروست پشکداریێ د حوکمەتێ دا بکەن، نابیت لایەن ھەبن ب ڕۆژ ل گەل حوکمەتێ بن و ب شەڤ دژی حوکمەتێ بن، ملێ خوە بدەنە ڤی بارێ گران یێن ل سەر حوکمەتێ دا ھاتی، واتە بڕیارێ بدەن یان ل گەل حوکمەتێ بن ب دروستی، یان ژی نە، ژبلی ھەرسێ لایەنێن بەرێ ئۆپۆزسیۆن، پشکەک ژ ئێکەتیێ ژی ب ھەمان شێوێ ئۆپۆزسیۆن کاردکەت، ئەف تیما ئێکەتیێ یا د حوکمەتێ دا یا رازی یە و ملێ خوە یێ دایە بەر ڤێ ڕەوشێ، بەلێ مخابن ژ دەرڤەی ڤێ تیمێ پشکەک ژ کادر و بەرپرسێن ئێکەتیێ کەفتینە بن کاریگەریا بزاڤا گۆڕان، لێ ئەڤە ڕامان نینە ئێکەتیێ ل گەل ڤان کادرێن خوە ھەمان بۆچوون ھەبیت”.