ئه‌ڤرۆ نيوز:
نياز مه‌عمار ئۆغلۆ، بڕيارده‌رێ جڤاتا نوونه‌رێن عيراقێ ئاشكه‌را كر كو جڤاتێ بڕيار دايه به‌رى ب دووماهى هاتنا ڤێ خولا نوكه، هه‌موو ئه‌وان بڕياران ژ ناڤ ببه‌ت يێن سه‌رده‌مێ رژێما به‌عس ب ناڤێ “جڤاتا سه‌ركرداتيا شوره‌شێ” ده‌رچووين.
ئاماژ ب وێ چه‌ندێ ژى كر كو چه‌ندين بڕيار ژ وان هه‌تا نوكه ژى كار پێ دهێته كرن و ب قانوون نه‌هاتينه ژناڤبرن و “ئه‌ڤه ژى ل گه‌ل كاودانێن نوكه ناگۆنجيت و جهێ تێبينيێ نه”، ژ به‌ر هندێ “سه‌رۆكاتيا په‌رله‌مانى ژى يا رژده وان بڕياران ژناڤ ببه‌ت”.
ئه‌ڤرۆ نيوز:
توركيا د رێيا فرۆكێن خوه يێن شه‌ركه‌ر و تۆپێن دوورهاڤێژ ڤه گۆندێن سنورێ ناحيا دێره‌لۆك يا سه‌ر ب قه‌زا ئامێديێ ڤه بۆردۆمان كرن.
ب گۆره‌ى گۆتنێن شاهدحالان، دوهى رۆژا چارشه‌مبى 23ى ئادارا 2016ێ سۆپايێ توركيا ب رێيا فرۆكێن خوه يێن شه‌رى و تۆپێن دوورهاڤێژ بۆردۆمانا هه‌ر ئێك ژ ده‌ڤه‌رێن رێكان و نهێلێ يێن سه‌ر ب ناحيا دێره‌لۆك ڤه كريه.
دا زانين كو ئه‌ڤ تۆپبارانه شڤێدى ب شه‌ڤ هاتيه كرن و بۆ ماوێ زێده‌تر ژ دو ده‌مژمێران يا به‌رده‌وام بوو، هه‌ر وكو دايه زانين ژى كو “زيانێن گيانى ب به‌ر وه‌لاتيێن سڤيل نه‌كه‌فتينه”.
ئه‌ڤرۆ نيوز:
سۆپايێ عيراقێ ئه‌ڤرۆ رۆژا پێنجشه‌مبى رێكه‌فتى 24ى ئادارا 2016ێ ل مه‌خمۆر هێرش كره سه‌ر چه‌كدارێن داعش و گۆنده‌ك كۆنترۆلكر.
نه‌جان عه‌لى، سه‌رپه‌رشتيارێ هێزێن پێشمه‌رگه‌ى ل مه‌خمۆر راگه‌هاند: سۆپايێ عيراقێ ل ده‌مژمێر 6:00ى سپێدێ هێرش بۆ سه‌ر داعش ده‌سپێكريه و به‌ر ب باشوورێ رۆژهه‌لاتێ مووسل د پێشره‌ويێ دانه و فرۆكێن هه‌ڤپه‌يمانان ژى ب دژوارى يێ بۆردۆمانا داعش دكه‌ن.
گۆتژى: “هه‌تا نوكه گۆندێ كه‌رمردێ كۆنترۆلكريه و پێشمه‌رگه ژى د ئاماده‌باشيێ دايه، به‌لێ پشكدارى هێرشێ نه‌بوويه”.
ئاماژه ب وێ چه‌ندێ ژى كر كو ئه‌ڤ هێرشه ده‌سپێكا قووناغا كۆنترۆلكرنا مووسله و “مه‌ره‌م بێ گه‌هشتنه ب گه‌ياره و شه‌ر ژى يێ به‌رده‌وامه”.
ئه‌ڤرۆنیۆز، سالار دۆسكى:
لقێ دهۆك یێ سه‌ندیكا هونه‌رمه‌ندێن كوردستانێ د رۆنكرنه‌كێ دا، پشتى ده‌ربرینا هه‌ڤ خه‌میا خوه ل سه‌ر تیرۆركرنا هونه‌رمه‌ند (زاهد بریفكانى) دیاركرن كو ل سه‌ر خه‌تن بۆ دیاركرنا تاوانبارێن ڤى كارێ درندانه.
د رونكرنه‌كێ دا سه‌ندیكا هونه‌رمه‌ندێن كوردستانێ لقێ دهۆك دیاركریه كو ئه‌و هه‌تا نوكه ل گه‌ل نڤسینگه‌ها پارێزگه‌رێ دهۆكێ و هێزێن ئه‌منى دبه‌رده‌وامن بۆ ئاشكراكرنا تاوانباران و ره‌وانه‌كرنا وان بۆ دادگه‌هێ.
ئه‌ڤرۆنیۆز، سالار دۆسكى:
ب مه‌ره‌ما هاریكاریكرنا وه‌لاتیان ل ده‌مێ سه‌یرانان ل جهێن جودا جودا، نه‌خوشخانێن گه‌روك هاتینه دانان و كه‌ڤتینه د خزمه‌تا وه‌لاتیان دا.
هێرش ره‌شید چالاكڤانێ جڤاكێ مه‌ده‌نى و به‌رپرسێ رێكخراوا مه‌ند بۆ یه‌كسانیێ بۆ ئه‌ڤرۆ نیۆز ئاشكراكر كو رێكخراوا مه‌ند بۆ يه‌كسانیێ ب هه‌فلكارى ل گه‌ل كومه‌لا هه‌یڤا سورا عیراقى و رێڤه‌به‌ریا گشتى یا سه‌خله‌میا دهۆكێ رابوویه ب دانانا چه‌ند نه‌خوشخانێن گه‌روك دناڤا سه‌یرانیان دا.
ئه‌ڤرۆنیوز، كاروان باعه‌درى:
ژێده‌ره‌كى ژ چیایێ شنگالێ بۆ ئه‌ڤرۆ نیوز دیاركر ، ل شه‌ڤا 22/3/2016 ێ 52 كه‌سێن كوردێن ئیزدى هاتنه رزگاركرن ژ ده‌ستێ رێكخراوا تیرۆرى یا داعشێ
وێ ژێده‌رى زێده‌تر ئاشكه‌را كر ، ژمارا وان رزگاربوویان 52 كه‌سن ژوان ژی 42 زارۆكن و 10 ژنن كو به‌رى نها ل باژێرێ ره‌قه یێ سووریا بوون و نها ل سه‌رێ چیایێ شنگالێ نه.
ئه‌ڤرۆ نيوز:
رائيد هێمن ئه‌ترووشى به‌رپرسێ راگه‌هاندنا پوليسێن دهۆكێ دياركر كو ئه‌ڤرۆ ئه‌و هاتينه ئاگه‌هداركرن كو كه‌سه‌ك ل تاخێ kro ل دهۆكێ هاتيه كوشتن، پشتى پوليس چووينه جهێ روودانێ دياربوو كو ئه‌و كه‌س هونه‌رمه‌ند زاهد بريفكانى يه، به‌لێ هه‌تا نوكه نه‌هاتيه زانين كانێ وى خوه كوشتيه يان ئێكێ ئه‌و كوشتى يه، دووڤچوون ل روودانێ يا به‌رده‌وامه.
ئه‌ڤرۆ نيوز:
به‌نكا نێڤده‌وله‌تى رازيبوونا خوه دياركريه ب مه‌ره‌ما هاريكاريكرنا هه‌رێما كوردستانێ د پرۆسا چاكسازيێ و ده‌ربازبوونا هه‌رێمێ ژ قه‌يرانا دارايى، 14 راوێژكارێن خوه بهنێريته هه‌رێما كوردستانێ.
د.عزه‌ت سابر سه‌رۆكىێ لژنا دارايى ل په‌رله‌مانێ كوردستانێ ديار دكه‌ت كو هاتنا به‌نكا نێڤده‌وله‌تى ئه‌گه‌ره‌كه بۆ چاره‌كرنا پرسا دارايى يا هه‌رێما كوردستانێ، ژبه‌ر كو ڤێ به‌نكێ ئاريشا ئابوورى يا گه‌له‌ك ولاتان چاره كريه.
نيشاندان