ئەڤرۆ نیوز ، نەوزاد زادە ھلۆری:
د دەمەکێ دا کو قەیرانەکا گرانا دارایی لسەر ھەرێما کوردستانێ دا ھاتیە و پرانیا پرۆژەیان ژ کارکەفتینە ، بەلێ ھەیڤانە ملیونان دینار بو مینحەیێن وەزیران دھێنە دان کو کێمترین مینحە ژی یا ھەر وەزیرەکێ 5 ملیون دینارن و یا ژ ھەمووان ژی پترە ژ 16 ملیون دیناران.
یوسف عوسمان سەروکێ ئێکەتیا فەرمانبەرێن کوردستانێ بو ” باس ” دیارکر کو د دەمەکێ دا 70% ژ پێشینەیا ھەیڤانەیا دام و دەزگەھان ھاتینە کێمکرن و بتنێ 30% دھێنە مەزاختن ، بەلێ مێنحەیا تایبەتی یا وەزیران سەرەرای ھەبوونا قەیرانا دارایی چوو دەستکاری تێدا نەھاتیەکرن و ھەروەکو خوە دھێتە مەزاختن.
یوسف عوسمان ھورکاریێن زێدەتر د ئێخیتە بەرچاڤ و دبێژیت : ( مینحەیا وەزیران جودایە کو ژ وان ھەنە 7 ملیون و 500 ھزار دینارە ، و یێن ھەیی ژی 5 ملیون ھەر بوو نموونە سەروکێ دەستەیان 5 ملیون ھەنە ، و ھندەک وەزیران ژی 16 ملیون دینار وەردەگگرن ، و ئەو پارە دھێتە خەرجکرن و یا بەردەوامە ژی.
سەروکێ ئێکەتیا فەرمانبەرێن کوردستانێ ئەو یەک ژی بەرچاڤکر کو د دەمەکێ دا حکومەتێ بریارا پاشەکەوتکردنا موچەیان دایە و پێشینەیا ب رێڤەبرنا کارێن فەرمانبەران ژی راگرتینە داکو دادپەروەری ھەبیت ، و یا درۆست ئەوە کو مینحەیێن وەزیران ژی بھێنە کێمکرن ژبەرکو ژلایێ دەرونی ڤە فەرمانبەر دێ ئارام بن ئەگەر ئەڤ یەک بھێتەکرن.
یوسف عوسمان تەکەست لسەر وێ یەکێ ژی کر کو برینا مینحەیا وەزیران چوو کارتێکرنێ لسەر کاروبارێن فەرمانگەھان ناکەت بەلکو ئەوێ یەکێ کارتێکرنا ھەیی ئەگەر پێشینەیا فەرمانبەران بھێتە کێمکرن و گوت ژی : ( ئەو مینحەیا بو وەزیران دھێتە مەزاختن زێدەتر بو پاداشت و وان مەزاختنانە یێن کو ل دەرڤەیێ فەرمانگەھان دھێتە مەزاختن ، و ل دەما مەزاختنێ ژی دەستێ وان یێ ڤەکریە و پرانیا وەزیران ژی ئەوی پارەی بو بەرژەوەندیا فەرمانبەران نامەزێحن ، بەلکو زێدەتر بو کاروبارێن خویێن تایبەتیێن دەرڤەیێ فەرمانگەھان د مەزێخن).
چێنەر خەفاف رێڤەبەرا گشتی یا کارگێری و دارایی یا سەروکاتیا ئەنجومەنا وەزیران یا ھەرێما کوردستانێ تایبەت بو ” باس ” دیارکر کو ئەو پارەیێ بو وەزیران دھێتە مەزاختن مینحە نیە و گۆت : ( ئەو پارە ھەیڤانە دگەھیتە دەستێ وەزیران لگورەی رێنمایان دھێتە مەزاختن).
چینەر خەفاف گوت ژی : ( بو نموونە ئەگەر پارە بھێتەدان بو پاداشتان یان ئەگەر بەنزین پێ بھێتەکرن یان ئەگەر ترۆمبێل پێ بھێتە چێکرن و ئەڤە ھەموو دڤێت ب واسل بھێنە مەزاختن و بھێتە پاکتاوکرن و بدەنە وەزارەتا دارایی).
ئەوێ بەرپرسا ئەنجومەنا وەزیران ئەو یەک ژی ئێخستە بەرچاڤ کو ئەو پارە بو ب رێڤەبرنا کاروبارێن وەزیران گرنگن ژبەرڤێ نەھاتینە برین و کێمکرن و گۆت ژی : ( وەزیر سەرەدانان دکەن باژێرەکێ بو باژێرەکێ دن داکو کاروبارێن حکومەتێ ب رێڤەببەن و ئەڤێ یەکێ ژی پارە پێدڤێت بو ب رێڤەبرنا ئەوان کاران یان بو ھەڤکاریکرنا فەرمانبەران یان تشتەکێ بکرن ، و پرانیا جاران وەزیر ب شەڤێ ژی کاردکەن ژبەرڤێ ئەو پارە لگورەی رێنمایان دھێنە مەزاختن).
پێشتر لسەر مەزاختنێن حکومەتێ وەزیر و پلەیێن تایبەت پارەیێ کریا کارەبێ و مالیدەیان و خزمەتگوزاریێن جھێ ئاکجیبوونا خوە دمەزاخت بەلێ ب بریارەکێ کو ل 1/1/2016 دەرچوویە ئەو مەزاختی ھاتنە راگرتن.