ئەڤرۆ نیوز:
عەرەبێن سونە ل عیراقێ پشکداریا حەشد شەعبی د ئۆپەراسیۆنا ئازادکرنا باژێرێ مووسلێ رەت دکەن، ھەرچەندە سەرکردێن حەشد شەعبی و سەرۆک وەزیرێن عیراقێ چەندین جاران دووپات کریە کو حەشد شەعبی دێ پشکدار بیت.
ھەڤپەیمانیا ھێزێن عیراقی یا سونی د بەیاننامەکێ دا راگەھاند” ب پشکداریا لەشکرێ عیراقێ و ھێزێن پێشمەرگەی و ھەڤپەیمانیا نێڤدەولەتی د ئۆپەراسیۆنا ئازادکرنا باژێرێ مووسلێ ژ دەستێ داعشێ، پێدڤیە خەلکێ وی باژێرێ بەرپرسیارەتیێ بگرنە ستوویێ خوە، بێ پشکداریا ھێزێن حەشد شەعبی”.
ھەڤپەیمانیا ھێزێن عیراقی یا سونی پشتی ئەنجامدانا کۆمبوونەکێ ب سەرۆکاتیا ئوسامە نوجێفی و ب بەرھەڤبوونا وەزیرێن سونی د حوکمەتا عیراقێ دا و ھژمارەکا ئەندامێن سونی د جڤاتا نوونەران دا، بەیانناما ھەڤپەیمانیێ دیارکریە کو” ب تێکرایا دەنگان، بریارا پشکداریا ھێزێن پێشمەرگەی ھاتە دان مل ب ملێ لەشکرێ عیراقێ و ھەڤپەیمانیا نێڤدەولەتی بۆ ئازادکرنا باژێرێ مووسلێ”.
ل دووڤ وێ بەیانناما ھەڤپەیمانیا سونی” بۆ ئازادکرنا مووسلێ، دێ ھاریکاریا وەلاتیێن وی باژێری ھێتە کرن ژ ڕوویێ لەشکری و پرچەککرنا وان و ب چو شێوەکی ڕێ ناھێتە دان کو حەشد شەعبی یا شیعی پشکداریێ د د شەڕێ ئازادکرنا مووسلێ دا بکەت”.
لایەنێن سونی ل عیراقێ دبێژن ژی” ھەر بریارەک بۆ پشکداریا حەشد شەعبی د شەڕێ ئازادکرنا مووسلێ دا، دێ بیتە ئەگەرێ ھاریکاریکرنا تیرۆرستێن داعشێ و ھەلبوونا شەڕێ تائیفی”.
ل دووڤ ویچ بەیانناما سونەیان” حەشد وەتەنی کو ژ ھەموو پێکھاتێن نەتەوی و ئاینی یێن خەلکێ پارێزگەھا نەینەوا پێک دھێت، دشێت ڕەفتارێ ل گەل وەلاتیێن پارێزگەھا نەینەوا بکەن و ئەرکێن خوە ئەنجام بدەن”.
حەیدەر عەبادی سەرۆک وەزیرێن عیراقێ و فەرماندێ گشتیێ ھێزێن چەکدار ل عیراقێ ل رۆژا شەمبیا بۆری 20 شوباتا 2016 ێ ل ڕوونشتنەکا جڤاتا نوونەرێن عیراقێ گوتبوو” بۆ ئازادکرنا باژێرێ مووسلێ، مە ھەماھەنگیەکا تمام یا ل گەل ھێزێن پێشمەرگەی کری”.
سەرۆک وەزیرێن عیراقێ گوتبوو ژ”ھەموو دیدارێن من ل گەل مەسعود بارزانی سەرۆکێ ھەرێما کوردستانێ ل دۆر ھەماھەنگیا لەشکری بوو د ناڤبەرا ھێزێن پێشمەرگەی و ھێزێن لەشکرێ عیراقێ”. دیسا گوتبوو” دێ ھەموو ھێز پشکداریێ د ئۆپەراسیۆنا ئازادکرنا مووسلێ دا کەن و ھەماھەنگیا لەشکری د ناڤبەرا بەغدا و ھەولێرێ دا یا بەردەوامە و پێشمەرگە ژی پشکەکە ژ سیستەمێ بەرگریێ عیراقێ”.

ئەڤرۆ نیوز:
وەزیرێ دارایێ عیراقێ ھوشداری ژ ھەبوونا ڕەوشەکا دارایی یا گەلەک ب زەحمەتتر ژ ھەر ڕەوشەکا ھەڤشێوێ وێ یا بەری نوکە و دیارکر کو دێ ھندەک پێرابوونێن نوو ھێنە وەرگرتن، ئاشکراکر ژی کو حوکمەتا عیراقێ 500 ھەتا 600 ملیۆن دۆلاران ھەیڤانە ددەتە سەربازێن چو ھەبوونا خوە نەی.
ھوشیار زێباری وەزیرێ دارایێ عیراقێ بۆ رۆژناما (گاردیان) یا بریتانی گۆت” عیراق یا گەھشتیە ڕێژا ڕێ پێدای یا قەرێ ناڤخوەیی، ئەم دخوازین ئێدی پشت بەستنێ ب پەترۆلێ ب تنێ نەکەین، بزاڤێ ژی دکەین خەلکی بۆ گۆھۆڕینێ بەرھەڤ بکەین و ھندەک پێرابوونان وەرگرین”.
ل دووڤ شەفەق نیۆز، ڕیژا فەرمانبەرێن عیراقێ ل گەل ھژمارا ئاکنجیان دھێتە ھژمارتن مەزنترین ڕیژە (ھەفت ملیۆن فەرمانبەر بۆ 21 ملیۆنان)، بدیتنا ھوشیار زێباری، پتریا گەندەلیا ڕێکخستی دڤێ چەندێ دایە و ئاریشا ھەرە مەزن یا مە د سەربازێن وەھمی دایە کو ھەیڤانە 500 ھەتا 600 ملیۆن دۆلار دھێنە خەرجکرن بۆ سەربازێن چو ھەبوونا خوە نەی.