ئەڤرۆ نیوز، نەوزاد زادە:
دادوەرەکێ دادگەھا کەتنا دھوکێ دیارکر کو 300 وەلاتیان سکالا دژی خودانێ کومپانیا ” عادل موتەحیدە ” تومارکرینە ، و خودانێ کومپانیێ ژی ب غیابی بەرامبەر ھەر سکالایەکێ شەش ھەیڤان سزایێ زیندانی بو ھاتیەدان.
بەھزاد ئەتروشی دادوەرێ دادگەھا کەتنا دھوکێ بو رۆژناما رووداو دیارکر کو 300 وەلاتیان سکالا دژی ” د.روشدی سەعید ” خودانێ کومپانیا ” عادل موتەحیدە ” تومارکرینە کو پرانیا وان عەرەبن و دوسیێن وان ژی ل دادگەھێ ھاتینە ئێکلایکرن و گوت ژی : ( ئەوان وەلاتیان ل گورەی ماددەیا 456 ژ قانوونا سزایا عیراقێ کو یا تایبەتە ب ملبرین ” قولبرین ” ێ ڤە سکالا تومارکرینە ، و خودانێ کومپانیێ ژی بەرامبەر ھەر سکالایەکێ ب غیابی ب شەش ھەیڤان سزایێ زیندانی ب سەر ھاتیە سەپاندن ، و ل گورەی ڤێ یەکێ دڤێت خودانێ کومپانیێ 180 سالان د زیندانێ ڤە بمینیت )
ژلایی َخوڤە بەختیار ئەمین رێڤەبەرێ گشتیێ وەبەرھێنانێ ل پارێزگەھا دھوکێ دیارکر کو ژبلی وان 300 سکالایان نێزیکێ 1000 ھاولاتیێن دن لدەڤ مە سکالا تومارکرینە و ژ وان ژی 500 گرێبەستێن پەسەندکری ھەنە و مافێت وان بەرزەنابیت.
پشتی راگەیاندن و دەسبکاربوون لسەر درستکرنا پرۆژەیەکێ مەزنێ ئاکنجیکرنێ بناڤێ پرۆژێ ” دەشتی بحەشت ” ل باژێرێ ھەولێرێ ژلایێ کومپانیا عادل موتەحیدە کومپانیا ناڤبری ل سالا 2013 پرۆژەیەکێ ئاکنجیبوونێ ل دھوکێ ژی بناڤێ ” ستارز ” راگەیاند ، بەلێ پرۆژە ب نیڤەرویی مایەڤە.

ئەڤرۆ نیوز:
ئەندامەکێ پەرلەمانێ کوردستانێ ژ فراکسیۆنا پارتی دیمۆکراتی کوردستان بۆ ئەڤرۆ دیار کر کو ھەموو کارێن پێدڤی ھاتینە کرن کو ل گۆر دەستبکاربوونا پەرلەمانی دانوستاندنان بکەن و گۆت “یوسف محەمەد دشێت وەکو ئەندام پەرلەمان بھێتە د ناڤ پەرلەمانی”.
محەمەد عەلی یاسین پەیڤدارێ فراکسیۆنا پارتی دیمۆکراتی کوردستان دیار کر کو بۆ سالا بھێت 2016 دێ ئیک ژ ئەولیاتێن کارێ وان چاکسازی بیت و بریار ئەوە چاکسازی د بیاڤێن جودا جودا یا بەردەوام بیت و پلان ئەوە دەسپێکا سالا بھێت زووترین وەخت پرۆژی چاکسازی بکەڤتە کاری و گۆت “ئەم دشێین وەکو قووناغەکا دەستپێکێ تشتەکێ باش بکەین و ھیڤدارین خەلک و ھەموو دامودەزگەھێن حوکمەتێ پشتگیریێ ل پرۆژێ چاکسازیێ بکەن”.
ناڤبری ئەو ژی دیار کر کو چاکسازی دێ ھێتە کرن داکو رێکوپێکی بکەڤیتە شێوازێ کارکرنێ و سیستەمی و تێکەست کر کو بابەت نەئەوە چەند داھاتی دێ بۆ حوکمەتێ زڤریت، بەلکو خالێن سەرەکی ئەوە چاکسازی ل دامودەزگەھێن حوکمەتێ بھێتە کرن ل سەر ئاستێ کێمکرنا مەزاختیان و زێدەکرنا خزمەتان کار بھێتە کرن و پێداچوون ل سەر شێوازێ مەزاختیان ئەڤە د قووناغا ئێکێ یا چەاکسازی دایە و ل قووناغا دویی کار دێ ل سەر دامودەزگەھێن حوکمەتێ ھێتە کرن.
محەمەد عەلی یاسین ئەو ژی دیار کر کو د پرۆژێ چاکسازیێ دا دەرمالێن پەرلەمانتاران ھاتنە کێمکرن و ئەم دێ کار بۆ وێ چەندی کەن پرۆژە بکەڤیتە د وارێ بجھئینانێ دا و گۆت “ب ھەموو شیانێن خوە دێ پشتگیریا پرۆژێ چاکسازیێ کەین”.

ئەڤرۆ نیوز:
جارەکادێ پرسا ئەنجامدانا ڕیفڕامدۆمێ بۆ دیاریکرنا چارەنڤیسێ ھەرێما کوردستانێ دھێتە بەحسکرن و سەرۆکێ کۆمسیۆنا راپرسی و ھەلبژارتنێن ھەرێما کوردستانێ ژی دوپاتکر، ھەکە داخوازا ئەنجامدانا پڕۆسا ڕیفڕامدۆمێ ژ کۆمسیۆنێ بھێتەکرن، دێ کێمتر ژ شەش ھەیڤان ھێتە ئەنجامدان، ھەروەسا دبێژیت، دو رێکخراوێن بیانی و کۆمسیۆنا بەغدا دھەڤکارن بۆ رێڤەبرنا کاروبارێن کۆمسیۆنا ھەرێما کوردستانێ.
ھندرێن مەحەمەد سالح، سەرۆکێ کۆمسیۆنا سەربخوەیا ھەلبژارتن و ڕاپرسیا ھەرێما کوردستانێ بۆ رۆژناما ئەڤرۆ گوت”پڕۆسا ڕیفڕامدۆمێ ئێکە ژ پڕۆسێن گرنگ بۆ چارەنڤیسێ خەلکێ ھەرێما کوردستانێ و ھەردەمێ داخوازەکا ب ڤی ڕەنگی ب شێوەیەکێ فەرمی بگەھیتە کۆمسیۆنێ، دێ شەڤ و رۆژا کەینە ئێک بۆ ئەنجامدانا وێ پرۆسێ، راستە د پەیڕەوێ ناڤخوەیێ کۆمسیۆنا سەربخوەیا ھەلبژارتن و راپرسیاندا ھاتیە، بۆ ھەر ھەلبژارتنەکێ یان راپرسیەکێ، پێدڤی ب 180 رۆژان ئانکو شەش ھەیڤان ھەیە، ھەتا کۆمسیۆن کاروبارێن خوە دکەت، ئەڤ رێکارێن پێدڤینە، بۆ رێڤەبرنا ڕیفڕامدۆمێ دەمەکێ کێمتر پێدڤیە و دێ ھەموو بزاڤێن خوە کەین کو دەمەکی زووتر خوە بەرھەڤ بکەین، ھەکە بھێت و داخواز ژ مە بھێتەکرن، نوکە دو ریکخراوێن بیانی ھەڤکاریا کۆمسیۆنێ دکەن بۆ رێڤەبرنا کاروبارێن مە و ئەنجامدانا تەندەرێن ل دەرڤە دھێتەکرن.
ھندرێنی گوت ژی” ددەمێ گەھشتنا داخوازا ئەنجامدانا ڕیفڕامدۆمێ، دێ کۆمبوونەکا فەرمی ئەنجامدەین، چونکی تۆمارا دەنگدەران ھەتا نوکە ل کۆمسیۆنا بەغدایە، مە ڕێککەفتنەکا ھەڤکاریێ ل گەل کۆمسیۆنا بلندا ھەلبژارتنان ل بەغدا یا ھەی، ھەردو لایەنێن کۆمسیۆنا ھەرێمێ و بەغدا ڕێککەفتن ئمیزاکریە و ھەرێما کوردستانێ کار ب تۆمارا دەنگدەران یا بەغدا دکەت، پڕۆسا ڕیفڕامدۆمێ یا ب ساناھی ترە ژ پرۆسا ھەلبژارتنان، چونکی تۆمارا بەربژار و تۆمارا قەوارێن سیاسی و گەلەک پێرابوونێن دی بۆ ھەلبژارتنان یێن ھەین، بەلێ بۆ ڕیفڕامدۆمێ پێدڤی نینە، دەربارەی دەڤەرێن کوردستانی یێن ل دەرڤەی ئیدارا حوکمەتا ھەرێما کوردستانێ، ئەو دەڤەر کوردستانینە، لێ ژبۆی پشکداریا وان د پڕۆسا ڕیفڕامدۆمێ دا، دێ مینیت ل سەر بڕیاردانێ ل دۆر پشکداریا وان دەڤەران، ھەکە بڕیارە ئەوژی پشکداربن، دێ ڕیفڕامدۆم وان دەڤەران ژی ڤەگریت”.