ئه‌ڤرۆ نيوز:
وه‌زاره‌تا دارايى و ئابوورى ل حوكمه‌تا هه‌رێما كوردستانێ خشتێ به‌لاڤكرنا مووچێ هه‌يڤا كانوونا دويێ يا سالا 2016ێ راگه‌هاند.
ب گۆره‌ى وێ راگه‌هاندنا وه‌زاره‌تا دارايى، بڕياره ئه‌ڤرۆ رۆژا سێشه‌مبى رێكه‌فتى 16ى شوباتا 2016ێ دێ مووچێ هه‌يڤا كانوونا دويێ يا سالا 2016ێ يێ وه‌زاره‌تا كاره‌بێ، وه‌زاره‌تا باژێرڤانى و گه‌شتوگۆزارێ، وه‌زاره‌تا ڤه‌گوهاستن و گه‌هاندنێ، ده‌زگه‌هێ مين، ديوانا چاڤدێريا دارايى و ده‌زگه‌هێ ده‌ستپاكيێ هێته به‌لاڤكرن.
ئه‌ڤرۆ نيوز:
حه‌يده‌ر عه‌بادى سه‌رۆك وه‌زيرێن عيراقێ د ديداره‌كێ دا ل گه‌ل كه‌نالێ عيراقيه، مه‌رجه‌كێ ددانيت بۆ هنارتنا مووچێ فه‌رمانبه‌رێن هه‌رێما كوردستانێ و راگه‌هاند: ئه‌گه‌ر حكومه‌تا هه‌رێما كوردستانێ هه‌موو نه‌فتا خوه راده‌ستى حكومه‌تا ناڤه‌ند بكه‌ت، ئه‌م دێ مووچێ فه‌رمانبه‌رێن هه‌رێما كوردستانێ دابين كه‌ين.
حه‌يده‌ر عه‌بادى سه‌رۆك وه‌زيرێن عيراقێ حێبه‌تيا خوه سه‌باره‌ت دابين نه‌كرنا مووچێ فه‌رمانبه‌رێن هه‌رێمێ دياركر و راگه‌هاند” ئه‌م رۆژانه ئاگه‌هدارى داهاتێ عيراق و هه‌رێما كوردستانێ ينه، ژبه‌ر كو ئامارێن نه‌فتا هنارتى دگه‌هنه مه، نوكه هه‌رێم نێزيكى 16% نه‌فتا عيراقێ دهنێريت، به‌لێ نه‌شێت موچێ فه‌رمانبه‌رێن خوه دابين بكه‌ت.
ئه‌ڤرۆ نيوز:
ل دووڤ ئاماره‌كا وه‌زاره‌تا ڤه‌گوهاستن و گه‌هاندنا حكومه‌تا هه‌رێما كوردستانێ، داهاتێ سالا بوورى يا وه‌زاره‌تا وان زێده‌تر ژ شه‌شه مليار ديناران بوويه و خه‌رجيێن وان ژى زێده‌تر ژ 77 مليار دينار بوويه.
مەولود باوە موراد وه‌زيرێ ڤه‌گوهاستن و گه‌هاندنا حكومه‌تا هه‌رێما كوردستانێ ئه‌ڤرۆ د يه‌يجێ خوه دا ل فێسبوكێ ئامارا داهات و خه‌رجيێن وه‌زاره‌تا خوه به‌لاڤكريه و تێدا داهات و خه‌رجيێ فرۆكه‌خانه و پوسته و گه‌هاندنێ يێن باژێرێن هه‌رێمێ بۆ سالا 2015 دياركرينه.
ل دووڤ ئاماران داهاتێ فرۆكخانێن هه‌ولێر و سلێمانيێ ل سالا بوورى زێده‌تر ژ 26 مليون دولاران بوويه.
ئه‌ڤرۆ نيوز:
رێكخراوا قه‌ده‌غه‌كرنا چه‌كێ كيماوى ئاشكراكر كو داعش غازا خه‌رده‌ل ل دژى پێشمه‌رگه‌ى يا بكارئيناى، رۆژا دوشه‌مبى رێكخراوا قه‌ده‌غه‌كرنا چه‌كێ كيماوى دياركر كو ل دووڤ ڤه‌كولينه‌كا رێكخراوا وان ل سالى بوورى داعش غازا خه‌رده‌ل دژى پێشمه‌رگه‌ى بكارئينايه كو ئه‌ڤه دبيته ئێكه‌م جار پشتى ژ ناڤچوونا رژێما سه‌دام حسێن ئه‌و غازه دهێته بكارئينان.
ل هه‌يڤا 3 يا سالا بوورى، نێزيكى 35 پێشمه‌رگه دشه‌ره‌كێ دژى داعش دا، پێستى وان ب ره‌نگه‌كێ سه‌ير سوور ببوو و دياربوو كو داعش جوره‌كێ غازێ يا بكارئيناى و پشتى رێكخراوا قه‌ده‌غه‌كرنا چه‌كێ كيماوى ژى ده‌ست ب ڤه‌كولينێ كرهى دياربوو كو جورێ ڤێ غازێ، يا خه‌رده‌له.
ئه‌ڤرۆ نیۆز، قائید میرۆ
ئه‌ڤرۆ ل سالڤه‌گه‌ڕا ده‌سته‌سه‌ركرنا عه‌بدولا ئوجه‌لا رێبه‌رێ پارتا كرێكارێن كوردستانێ په‌كه‌كێ خۆنیشاندانه‌كا به‌رفره‌ه بۆ هه‌مبه‌ر قونسولخانا توركیا ل هه‌ولێرێ ده‌ستپێكر.
رێباز یوسف، چالاكڤانێ مه‌ده‌نی و پشكدارێ خۆنیشاندانێ بو ئه‌ڤرۆ نیۆز راگه‌هاند” ئه‌ڤرۆ ب سه‌دان وه‌لاتی و لایه‌نگرێن په‌كه‌كێ بۆ ئازادكرنا عه‌بدولا ئوجه‌لان رێبه‌رێ په‌كه‌كێ ئه‌م هاتینه هه‌مبه‌ر قونسۆلخانا وه‌لاتێ توركیا ل باژێڕێ هه‌ولێرێ و داخوازا ئازادكرنا ئوجه‌لانی دكه‌ین.
رێبازی گۆتژی” خۆنیشانده‌ران دروشمێن جۆدا هه‌لگرتینه و ب گۆتنا سرودا ئه‌ی ره‌قیب گازی توركیا دكه‌ین بۆ ئازادكرنا ئوجه‌لان و راگرتنا شه‌ڕی ل باكورێ كوردستانێ.
ئەڤرۆ نیوز:
بەرپرسێ لقێ 3 یێ پارتی دیموکراتی کوردستان ل کەرکووکێ داخوازا پێکئینانا لژنەکێ ژ ھەموو پارتێن کوردستانی و ئیدارە و جڤاتا پارێزگەھا کەرکووکێ کر بۆ ئەنجامدانا ڤەکۆلینێ ل دۆر پرسا پەترۆلا کەرکووکێ.
بەری دەمەکی ب بریارا کوسرەت رەسول جێگرێ ئێکێ یێ سکرتێرێ گشتیێ ئێکەتی نیشتمانی کوردستان، لژنەک ل سەر پرسا پەترۆلا کەرکووکێ ھاتبوو پێکئینان، پارتی ژی دخوازیت ڤەکۆلین دپرسا پەترۆلا کەرکووکێ بھێتە ئەنجامدان.
محەمەد کەمال بەرپرسێ لقێ 3 یێ پارتی ل کەرکووکێ بۆ رووداوێ گوت ” دخوازین لژنەک بھێتە پێکئینان دا بزانین پەترۆلا کەرکووکێ ب چ ڕێککەفتنەکێ و ب چ گرێبەستەکێ و ب شێوەکی ڕەفتار ل گەل دھێتە کرن”.
گوت ژی” دەمێ سەرۆکێ پەرلەمانێ عیراقێ سەرەدانا کەرکووکێ کری، ئەز کەسێ ئێکێ بووم من داخواز ژێ کری پشکا پارێزگەھێ ژ پەترۆلا وێ بھێتە دابینکرن، چ پەترۆلا وێ ژلایێ بەغدا، یان ھەرێمێ ڤە بھێتە فرۆتن”.
بەری دەمەکی و ل سەر بریارا کوسرەت رەسول جێگرێ سکرتێرێ گشتیێ ئێکەتیێ، لژنەک ل سەر پەترۆلا کەرکووکێ ھاتبوو پێکئینان، ھرەچەندە ھەتا نوکە ژی ئەو لژنە دەست ب کار نەبوویە، بەلێ ئێکەتیێ دڤێت ب ڕێیا وێ لژنی بگەھیتە ڕاستیا ھندەک ئامار و داتایان ل سەر ھنارتنا پەترۆلا کەرکووکێ و داھاتیێ وێ.
رەوەند مەلا مەحمود جێگرێ بەرپرسێ مەلبەندێ 2 یێ ئێکەتیێ ل کەرکووکێ بۆ رووداوێ گوت” پێکئینانا وێ لژنێ بۆ وێ چەندێ بزانین چەند ژ پەترۆلا کەرکووکێ بۆ ھەرێما کوردستانێ دچیت و ڕێککەفتنا ھەرێما کوردستانێ و بەغدا ل سەر پەترۆلا کەرکووکێ یا چاوانە و چەند ژ بودجا بۆ کەرکووکێ ژ پەترۆدۆلاری ھاتیە دیارکرن، گەھشتیە و پێدڤیە ڤەکۆلینێ ل سەر ڤان بابەتان بکەین و دخوازین دەستکەفتێن کەرکووکێ بۆ خەلکێ وێ بزڤرینین”.
ئەڤرۆ نیوز:
رێڤەبەرا گەشەپێدانا پیشەسازی ل دھۆکێ بۆ ئەڤرۆ دیار کر کو نوکە رێژەکا زۆرا کارگەھێن کواشێ کار ناکەن پیشبینی دھێتە کرن ھەتا سالە بھێت رێژا 90% کارگەھێن کواشی کارنەکەن بھێنە راوەستاندن ئەڤە ژێ دی زۆر زیانان گەھینتە کریکارێن ل وان کارگەە کاردکەن وگۆت ژێ سالە بۆری ھەتا 70 کارگەە سەرا سەرپیچیان ھاتبوونە ھایدارکرن ژوانا ژێ مۆلەتێن کارکرنی یێن ھەتا 30 کارگەە ھاتنە ھەلوەشاندن.
نازدار عەبدالقادر حسێن رێڤەبەرا گەشەپێدانا پیشەسازی ل دھۆکێ ئەو ژی دیار کر کو مۆلەتێن پارزینگەھێن نەفتی ھاتنە ھەلوەشاندن و نوکە وان پارزینگەھان چ پەیوەندی ب وان ڤە نینە و ھەر کارگەھەکەکا پێگیریێ ب مۆلەتا گەشەپێدانا پیشەسازی نەکەت دێ ھێتە ھایدارکرن و ھەکە کێماسیا خوە چارە نەکەت دێ مۆلەتا وێ ھێتە راوەستاندن و نابیت کار بکەت و گۆت “ب راستی ژی زۆر زیان گەھشتینە کارگەھێن کواشێ ژبەر قەیرانا دارایی و نەبوونا دەلیڤێن کاری”.
رێڤەبەرا گەشەپێدانا پیشەسازی ل دھۆکێ گۆت ژی “قانوونا گەشەپێدانا پیشەسازی نوکە ئاستەنگ بۆ زێدەکرنا بەرھەمێ پیشەسازی دروست کرینە و پێدڤیە پێداچوون د قانوونا گەشەپێدانا پیشەسازی دا بھێتە کرن بۆ ھندێ کەرتێ پیشەسازی پێشڤە بچیت و قانوونا گەشەپێدانا پیشەسازی رێک ناھێتە دان ژبلی وەلاتیێن عیراقی چ وەلاتیێن بیانی کارگەھێن پیشەسازی ل ھەرێمێ دامەزرینن، چونکی ئەڤە ئیکە ژ ئاریشێن پێشڤەنەچوونا پیشەسازی و ھەکە ریک بھێتە دان دێ وەلاتیێن بیانی ھێن دووڤ رێنمایان کارگەھێن پیشەسازی دانن و ئەڤە دێ بیتە ئەگەر بەرھەمێ زۆر زێدە ببیت”.
ئەڤرۆ نیوز:
کار ل سەر ناحیەکرنا کۆمەلگەھا خانکێ دھێتە کرن و ھەمی مەرجێن قانوونی یێن ناحیان تێدا ھەنە، بگرە ژ ئالیێ ئاکنجیان ڤە و ژمارا خێزانان و نھا چەندین فەرمانگەھێن رەسمی لێ ھەنە، مینا باژێرڤانیێ و بنگەھێ پۆلیسان و بنگەھێ ساخلەمیێ و ژمارەکا قوتابخانان، چەندین سالە ب ئاوایەکێ رەسمی داخواز دھێتەکرن کو ببیتە ناحیە.
بێریڤان سەلیم شەمو جێگرا سەرۆکێ ئەنجومەنێ پارێزگەھا دھۆکێ بۆ رۆژناما ئەڤرۆ دیار کر کو جڤاتا باژێرڤانیا خانکێ ب رەسمی داخواز ژ ئەنجومەنێ پارێزگەھێ کریە کو خانکێ ببیتە ناحیە و گۆت “من ل سالا بۆری (2015) داخوازیەک پێشکێشی سەرۆکێ ئەنجومەنی کر کو لیژنەکێ بۆ دووڤچوونا کۆمەلگەھا خانکێ پێک بینیت ژ بۆ بریاردانا ناحیەکرنا خانکێ، سەرۆکێ ئەنجومەنی ژی ژ ئالیێ خوە ڤە رازی بوو کو لیژنا خزمەتگوزاریان ب وی ئەرکی رابیت”.
کۆمەلگەھا خانکێ 21 گوندان ب خوەڤە دگریت و ژمارا ئاکنجیێن وێ 24 ھزار کەسن و 5% موسلمانن و رێژا دی ئێزدینە و رۆبەرێ وێ 33 ھزار 600 دونەمێن عەردینە، 11 کم دوورە ژ قەزا سێمێلێ دکەڤیتە باشوورێ سێمێلێ.
بێریڤان شەمو خویا ژی کر پشتی دووڤچوون ھاتیە کرن وەسا دیار بوویە کو ھەر ژ سالا 2006 وەرە داخوازی دھێتە کرن کو کۆمەلگەھا خانکێ ببیتە ناحیە، ب ئاوایەکی ل 29/5/2006 قائیمقامیا سێمێلێ نڤیسارا ژمارە 939 ئاراستەی کارگێریا پارێزگەھا دھۆکێ کریە و گۆت “کارگێریا پارێزگەھا دھۆکێ پەسەند کریە و وەزارەتا ناڤخۆ ژی مانع نینە کو خانکێ ببیتە ناحیە”.
ژ ئالیێ خوەڤە ئەکرەم فەتاح ئەندامێ ئەنجومەنێ پارێزگەھا دھۆکێژ فراکسیۆنا پارتی دیمۆکراتی کوردستان بۆ رۆژناما ئەڤرۆ دیار کر کو ل دووڤ مەرجێن قانوونی کۆمەلگەھا خانکێ ماف یێ ھەی ببیتە ناحیە، چونکی نھا سەرۆکاتیا باژێرڤانیا پلە دو، بنگەھێ ساخلەمیێ، بنگەھێ پۆلیسان، بنگەھێ پۆلیسێن دەریا، ئاسایش، پۆستە و گەھاندن لێ ھەنە و گۆت “ل سالا 2006، 2009، 2011، 2013 و 2015 ب فەرمی داخواز ھاتیە کرن و بۆ ب نڤیسار بۆ ئالیێن پەیوەندیدار ھاتینە شاندن”.
ئەکرەم فەتاح دیار ژی کر کو پرۆژێ ئاڤا چەمبەرەکاتی ژ رووبارێ دیجلە بۆ کۆمەلگەھا خانکێ دھێت، ھەروەسا سێ ھۆلێن بیرەوەریان و سەنتەرێ رەوشەنبیری و تایەکێ بنگەھێ لالش و 11 قوتابخانە لێ ھەنە کو 16 دەوام لێ دھێنەکرن و 30% جادێن وێ سەبکرینە و شەس ھزار پارچێن عەردی ھاتینە بەلاڤکرن کو 5200 ھاتینە ئاڤاکرن و دگەل ناحیا باتێلێ دێ بیتە ناحیا دویێ سەر ب سێمێلێ ڤە و گۆت “جڤاتا باژێرڤانیێ ژی ھەیە کو ژ نەە ئەندامان پێک دھێت”.
ئەڤرۆ نیوز:
حەفتینامەکا ئەلمانی ئاشکرا کر کو ل دووڤ چەندین راپۆرتێن رۆژنامەڤانی نێزیکی دو ھزار کەسان د سالا بۆری دا ل دووڤ حەزا خوە وەلاتێ ئەلمانیا بجە ھێلایە و ڤەگەریاینە عیراقێ.
حەفتیناما (فیلیت ئێم زورنتارگ) یا ئەلمانی دیار کر کو بەھرا پتریا کۆچبەران گازندە ژ خرابیا جھێ ئاکنجیبوونێ و نەبوونا دەلیڤێن کاری ھەبوو ژبەر ڤێ چەندێ نێزیکی دو ھزار وەلاتیێن عیراقی ل دووڤ حەزا خوە وەلاتێ ئەلمانیا ب جە ھێلا و ڤەگەڕیانە وەلاتێ خوە.
ھەژی گۆتنێ یە کو ل دووڤ ئەو ئامارێن ھاتینە ئەنجامدان ل سالا بۆری 121 ھزار وەلاتیێن عیراقی گەھشتینە وەلاتێ ئەلمانیا.
ئەڤرۆ نیوز:
ئەندامەکا لژنا دارایی ل پەرلەمانێ کوردستانێ دیار کر کو ئەو داخوازا ھەلوەشاندنا خانەنشینیا ھژمارەکا شیرەتکارێن پەرلەمانی دکەت و دبێژیت: ھندەک ژ وان شیرەتکاران ب رەنگەکێ نەقانوونی ژ لایێ ھەموو فراکسیۆنان ڤە ھاتینە خانەنشینکرن، دیسا کەس ھەبوویە ھەیڤەکێ دەواما کری و چوویە دەرڤەی وەلاتی و ھاتیە خانەنشینکرن.
مەدینا شەرنەخی، ئەنداما لژنا دارایی ل پەرلەمانێ کوردستانێ ئاشکرا کر، د دەمێ بۆری دا 30 کەس وەکو شیرەتکار ل پەرلەمانی ھاتینە خانەنشینکرن و 22 ژ وان ب رەنگەکێ نەقانوونی و ب ناڤونیشانێن شیرەتکار ژ لایێ ھەموو فراکسیۆنان ھاتینە خانەنشینکرن و بۆ باسنیوز گۆت: “ھندەک ژ وان شیرەتکاران ھەیڤەکێ یان دو ھەیڤان یان چار بۆ شەش ھەیڤان خزمەتکریە و ھاتینە خانەنشینکرن، ب تنێ کەسەکی 10 سال خزمەت ھەنە و ھاتیە خانەنشینکرن”.
گۆتژی: “ب رەنگەکێ قانوونی، دڤێت ئەو کەسێ وەکو شیرەتکار بھێتە خانەنشینکرن 10 سال خزمەت ھەبن، لێ خانەنشینکرنا وان یێن ھەیڤەکێ یان دویان خزمەت ھەی، کارەکێ نەقانوونی یە”.
خویا ژی کر، وان ل سالا 2014 نڤیسارەک ئاراستەی سەرۆکاتیا پەرلەمانێ کوردستانێ کریە و تێدا داخواز ھەلوەشاندنا وان خانەنشینان کریە، لێ بەرسڤا نڤیسارا وان نەھاتیە دن.
وێ پەرلەمانتارێ دا زانین کو ھەبوویە ب تنێ ھەیڤەکێ مایە و پاشی چوویە ئورۆپا و ھاتیە خانەنشینکرن، ھەروەسا دناڤ وان خانەنشینکرن ھەیە ژ دایکبوویێ سالا 1982 یە، ئەڤ ژییە ژی بۆ شیرەتکارایا پەرلەمانی ناچێبیت و گۆت: “دڤێت ئەو کەسێ دبیتە شیرەتکار ب کێمی 25 ھەتا 30 سالان خزمەت ھەبیت، دا کو ببیتە شیرەتکار”.
مەدینا خانێ ئاماژە ب وێ چەندێ ژی کر، ئێک ژ وان خانەنشینکریان رۆژەکێ ھاتیە دامەزراندن و بوویە شیرەتکار و پاشی ھاتیە خانەنشینکرن، پاشی یێ چووی و نوکە ل ئورۆپا دژیت و مووچێ وی ژی یێ بەردەوامە.
ل دووڤ پێزانینان مووچێ ھەیڤانە یێ ھەر ئێک ژ وان خانەنشینان پتری دو ملیۆن دینارایە، پتریا وان ترۆمبێلا پەرلەمانی ژی ل نکە و ھێشتا نەڤەگەراندینە.
نيشاندان