ئه‌ڤرۆنیۆز، ئه‌یاد به‌رواری
نه‌ته‌وێن ئێكگرتی راگه‌هاند ئه‌و یا به‌رهه‌ڤه‌ بۆ ئاواره‌بوونه‌كا ب كۆم ژ باژێرێ مووسلێ به‌رێ پرۆسا ئازادكرنا وێ ژ ده‌ستێن رێكخستیا ده‌وله‌تا ئیسلامی (داعش) یا تیرۆرستی.
نوونه‌رێ كۆمسیۆنا نه‌ته‌وێن ئێكگرتی بۆ كاروبارێن ئاواران (برونۆ جیدۆ) بۆ ئاژانسا (رویته‌رز) گوت” كۆمسیۆنا مه‌ یا به‌رهه‌ڤیان دكه‌ت بۆ پێشكه‌شكرنا هاریكاریان بۆ وان كه‌سێن ژ باژێرێ مووسلێ دره‌ڤن و هنده‌ك جه یێن هاتینه‌ پێشنیاركرن بۆ دروستكرنا كه‌مپێن نوو” لێ ئاشكرا ژی كر ” سه‌ره‌رای ڤێ چه‌ندێ ژی، جه بۆ هه‌موویان نابیت”.
برونۆ زێده‌تر گوت” ڤێ جارێ چو به‌هانه‌ بۆ جڤاكێ مرۆڤایه‌تیێ نابن كو بێژن ئه‌ڤه‌ ژ نشكه‌كێ ڤه‌ په‌یدابوو و ب چو شێوه‌كی ئه‌م د به‌رهه‌ڤ نه‌بووین، ژ به‌ر كو د ئه‌نجامێ وێ پرۆسێ دا، دێ هژماره‌كا مه‌زن یا وه‌لاتیێن سڤیل ئاواره‌ بن”.
ب دیتنا وی به‌رپرسێ نه‌ته‌وێن ئێكگرتی” له‌زكرن د ڤه‌گه‌راندنا ئاواران دا بۆ ده‌ڤه‌رێن وان یێن هاتینه‌ ئازادكرن، دبیت ئه‌نجامێن به‌رۆڤاژی بۆ هه‌بن”.
خویاكر ژی” كارێ سه‌ره‌كی دێ به‌رهه‌ڤی بن بۆ وه‌رزێ زڤستانێ، به‌لێ د هه‌مان ده‌م دا فشار یێن ل سه‌ر پرۆسێن هاوارهاتنا مرۆڤایه‌تی یێن هه‌ین ژ ئه‌گه‌رێ كێمیا دراڤی”.
ب ئاواره‌بوونه‌كا ب كۆم یا وه‌لاتیێن ئاكنجی ل باژێرێ مووسلێ، دێ گرفتێن ئاواران و پرسا ئاواره‌بوونێ مه‌زنتر لێهن، ژ به‌ر كو هژمارا ئاوارێن ناڤخوه‌یی یێن گه‌هشتینه‌ سێ ملیۆن و 200 هزار كه‌سان، ئانكو رێژه‌یا 10% ژ وه‌لاتیێن عیراقێ یێن ئاواره‌ بووین.

ئه‌ڤرۆنیۆز، ئه‌یاد به‌رواری
سیاسه‌تمه‌دارێ عیراقی عه‌دنان باچه‌چی ئه‌ڤرۆ ل دوبه‌ی د ژیێ 92 سالیێ دا وه‌غه‌ركر.
ژێده‌ره‌كی نێزیك ژ خێزانا باچه‌چی بۆ ده‌زگه‌هێن راگه‌هاندنێ وه‌غه‌ركرنا باچه‌چی راگه‌هاند، عه‌دنان باچه‌چی ل 1923 ژ دایكبوویه‌ و ل سه‌رده‌مێ عه‌بدولكه‌ریم قاسمی نوونه‌رێ عیراقێ بوو ل نه‌ته‌وێن ئێكگرتی و ل سه‌رده‌مێ عه‌بدولسه‌لام عارفی وه‌زیرێ ده‌رڤه‌یێ عیراقێ بوو، به‌ری ئه‌نجامدانا كوده‌تایا حزبا به‌عس ل سالا 1968 ، باچه‌چی ل ده‌رڤه‌ی عیراقێ بوو و قه‌بوول نه‌كر بزڤریت و چو ئیماراتێ و به‌رهه‌ڤ بوو ل كۆمبوونا دامه‌زراندنا وه‌لاتێ ئیماراتێ ل ده‌ستپێكا سالێن حه‌فتیان و بوو شیره‌تكارێ سه‌رۆكێ ئیماراتێ بۆ كاروبارێن ده‌رڤه‌، پشتى ژناڤبرنا رژێما به‌عس ل 2003 ێ، عه‌دنان پاچه‌چی ڤه‌گه‌ریا عیراقێ و ئێك بوو ژ ئه‌ندامێن جڤاتا حوكمڕانیێ ل عیراقێ و پاشی دوباره‌ ڤه‌گه‌ریا بوو وه‌لاتێ ئیماراتێ كو هه‌لگرێ ره‌گه‌زناما ئیماراتی بوو.

ئه‌ڤرۆ نیوز:

سه‌فین دزه‌یى ره‌خنێن دژوار ئاراسته‌ى عه‌لى حه‌مه‌ سالح په‌رله‌مانتارێ فراكسیونا گۆڕان كرن سه‌باره‌ت وان ئامار و داتایێن وى سه‌باره‌ت پرسا نه‌فتا هه‌رێما كوردستانێ به‌لاڤكرین و ب نه‌راست دا زانین، دزه‌یى گۆت” عه‌لى حه‌مه‌ سالح دیاركریه‌ كو هه‌رێم رۆژانه‌ 450 هزار به‌رمیلێن نه‌فتا كه‌ركووكێ دفروشیت، وه‌ دیاره‌ پاتریێن حاسیبا وى یێن لاواز بووى، چونكو ل دووڤ رێككه‌فتنا هه‌رێم و به‌غدا، رۆژانه‌ 300 هزار به‌رمیلێن نه‌فتا كه‌ركووكێ دهێنه‌ هنارتن و به‌رپرسێن كه‌رتێ نه‌فتێ ل وى باژێرى راگه‌هاندینه‌ كو ئه‌و زێده‌تر ژ وێ رێژێ نه‌شێن نه‌فتێ به‌رهه‌م بینن.

ئه‌ڤرۆنیۆز، ئه‌یاد به‌رواری
ئاژانسا وزا نێڤده‌وله‌تی پێشبینیا وێ چه‌ندێ دكه‌ت كو بازارێ په‌ترۆلێ دێ دوباره‌ هێدی لڤیت و ل سالا 2020 دێ بهایێ به‌رمیله‌كا په‌ترۆلێ گه‌هیته‌ 80 دۆلاران و پاشی دێ بها به‌رده‌وام به‌ر ب بلندبوونێ ڤه‌ چیت.
ئاژانسا ناڤبری، ل دووڤ سایتێ (الخلیج ئونلاین) ئاشكراكریه‌ ژی كو سیناریویا نزمبوونا بهایێن په‌ترۆلێ دێ ده‌مه‌كی ڤه‌كێشیت و هه‌تا سالا 2020 ێ بهایێ ئێك به‌رمیلا په‌ترۆلێ دێ ل دۆرێن 50 دۆلاران بیت و ل سالا 2020 دێ گه‌هیته‌ 80 دۆلاران و پاشی دێ به‌ر ب بلندبوونێ ڤه‌ چیت هه‌تا ل سالا 2040 دگه‌هیته‌ 85 دۆلاران .
بهایێن په‌ترۆلێ هه‌ر ژ ناڤه‌راستا سالا 2014 ێ به‌ر ب نزمبوونێ چوون و گه‌هشتنه‌ نیڤا بهایێن خوه‌ و نوكه‌ بهایێ ئێك به‌رمیلا په‌ترۆلێ خام دبن 50 دۆلاران دایه‌

ئه‌ڤرۆنیۆز، سالار دۆسكى:
جێگرا فراكسیۆنا پارتى دیموكراتى كوردستان، ئاشكراكر كو وه‌ك فراكسیوونا زه‌ر نها به‌ر ب چه‌په‌رێن پێشمه‌رگه‌ى چووینه‌ و سه‌رده‌دانێن وان به‌رده‌وامن، زێده‌بارى دانا راپورته‌كێ بۆ قونسلخانێن وه‌لاتێن بیانى ل هرێما كوردستانێ.
ئامینا زكرى، جێگرا سه‌رۆكا فراكسیۆنا پارتى دیموكراتى كوردستان بۆ ئه‌ڤرۆ نیۆز گۆت: پشتى مه‌ سه‌ره‌دانا باره‌گایێن پارتى كر ل ده‌ڤه‌رێن سلێمانیێ و راپه‌رین و هه‌له‌پجه‌ و ڤه‌كولین ل چاوانیا سوتاندن و تالانكرنا باره‌گایێن پارتى كرین و كومه‌كا داتا وازانیاریان به‌ر ده‌ستێن مه‌ كه‌فتین.
ئامینا زكرى گۆت: نوكه‌ یێ كار دكه‌ین داكو راپورته‌كا گشتى بۆ رایا گشتى و قونسولخانێن وه‌لاتێن بیانى ل ناف هه‌رێما كوردستانێ به‌رهه‌ڤ بكه‌ین و پێشكێشى وان بهێته‌ كرن.

ئه‌ڤرۆ نیوز: كاروان باعه‌درى :
شانده‌كێ ئێزدیان یێ كو به‌ره‌ڤ وه‌لاتێ رووسیا برێكه‌ڤتین و پێكهاتیه‌ ژ جڤاتا روحانیا ئێزدیان و وه‌كیلێ میرێ ئێزدیان و چه‌ندین كه‌سایه‌تێن سیاسى یێن ئیزدى ئه‌ڤرۆ ل گه‌ل به‌رپرسێن حكومه‌تا رووسیا ل مۆسكۆیا پایته‌ختێ وى وه‌لاتى كۆمبوون و ددیدارا ل گه‌ل میخائیل بوگدانۆڤ جێگرێ وه‌زیرێ ده‌رڤه‌یێ رووسیا و نوێنه‌رێ سه‌روكێ رووسیا بۆ كاروبارێن رۆژهه‌لاتا ناڤین ئه‌ڤ داخوازى پێشكیشى وان كرن .
1_ هاریكاریا 400000 ئاواره‌یین هه‌رێمێ بهێته‌ كرن ئه‌وێن د 21 كه‌مپێن هه‌ریمێ دا ژلایێ ته‌ندرووستى و فێركرن و خوارن و هه‌موو لایێن دى ڤه‌ .
2_ هه‌روه‌هان 5838 ئێزدیێن دده‌ستێ داعشێ دا بهێنه‌ ئازادكرن .
3_ كاره‌ساتا ئێزدیان ب جینوساید بده‌نه‌ ناسكرن ژبه‌ركو عیراق نه‌ ئه‌ندامه‌ د دادگه‌ها تاوانێن نیڤده‌وله‌تى دا پێتڤیه‌ هاریكارى بهێته‌ كرن داكو ببیته‌ جینۆساید .
4_ پاراستنا نێڤده‌وله‌تى بهێته‌ دابین كرن .
5_ پێدڤیه‌ حكومه‌تا رووسیا د هه‌موو بواراندا هاریكاریا حكومه‌تا هه‌ریما كوردستانێ بكه‌ت ژبه‌ركو بارگرانیه‌كا مه‌زنا ل سه‌ر حكومه‌تا هه‌ریمێ هه‌ی.