ئه‌ڤرۆ نیوز:
مه‌لا به‌ختیار به‌رپرسێ ده‌سته‌یا كارگێرى یێ مه‌كته‌با سیاسى یێ ئێكه‌تیا نیشتمانیا كوردستانێ ل ئه‌لمانیا ل گه‌ل ره‌ڤه‌ندا كوردى و نوونه‌رێن حزب و لایه‌نێن كوردستانى كومبوو و د كۆره‌كێ دا گوت” په‌یوه‌ندیێن خوه ل گه‌ل گۆران دێ پێشڤه به‌ین و دێ گه‌هینه رێككه‌فتنه‌كا سیاسى، به‌لێ رێككه‌فتنا مه ل سه‌ر حسابا چ لایه‌نه‌كى نابیت و ب راشكاوانه مه ئه‌ڤ چه‌نده گوتیه”.
مه‌لا به‌ختیار ئاماژه ب وێ چه‌ندێ ژى كر كو ئه‌و ل هه‌مبه‌ر كێشێن هه‌رێمێ پشكه‌كن ژ چاره‌سه‌ریێ.
ئه‌ڤرۆ نیوز:
سەعد حەدیسی په‌یڤدارێ نڤیسینگه‌ها راگه‌هاندنا سه‌رۆك وه‌زیرێن عیراقێ ئاشكرا كو جاره‌كادى دێ سیسته‌مێ نوو یێ مووچێن فه‌رمانبه‌ران و ب تایبه‌ت ده‌رمالێن ماموستایێن زانكۆیێ هێته راستڤه‌كرن و پێداچون تێدا هێته كرن و گۆت” لژنه‌كا تایبه‌ت ژ ئه‌نجومه‌نێ وه‌زیران هاتیه پێكئینان و دێ پێداچوونێ ب سیسته‌مێ نوو یێ مووچێن فه‌رمانبه‌ران كه‌ت ب تایبه‌ت یێن ماموستایێن زانكۆیێ”.
ئه‌ڤرۆ نیۆز، سالار دۆسكى:
ئه‌ندامه‌كا لژنا دارایى ل په‌رله‌مانێ كوردستانێ، ل سه‌ر هنارتنا دو مووچان بۆ پێشمه‌رگێ كوردستانێ ژلایێ به‌غدا ڤه دهێته ده‌نگ و ڤى چه‌ندێ ب دوورى دبینت.
د.شرین حوسنى ئه‌نداما لژنا دارایى ل په‌رله‌مانێ كوردستانێ ژ فراكسیۆنا زه‌ر بۆ ئه‌ڤرۆ نیۆز گۆت: هه‌ر چه‌نده ل سه‌ر داخازا وه‌زیرێ دارایى یا عیراقێ هشیار زێبارى كو داخاز ژ سه‌رۆك وه‌زیرێن عیراقێ حه‌یده‌ر عه‌بادى كر بوو كو دو مووچان بۆ پێشمه‌ركێ كوردستانێ ره‌وانه بكه‌ت و راسته سه‌رۆك وه‌زیرێن عیراقێ رازیبوون دیاركریه لێ هه‌تا نوكه بریارا دووماهیێ نه‌دایه و هه‌تا نوكه چ دیار نه‌بوویه.
د. شرین حوسنى گۆت ژى: مه باوه‌رى ب سوزێن سه‌رۆك وه‌زیرێن عیراقێ حه‌یده‌ر عه‌بادى نینه چونكه پێشتر ژى گه‌له‌ك سوز دابووینه و پێشتر ژى گۆت بوو دێ به‌رامبه‌ر هه‌رێمێ یێ دروست بیت و دێ بۆدجا هه‌رێمێ دابین كه‌ت ، لێ چ نه‌كریه و هه‌تا نه‌هێته بجهئینان باوه‌رناكه‌ین و من باوه‌رى پێ نینه.
ئه‌ڤرۆ نیوز:
ئه‌ڤرۆ مه‌كته‌با سیاسى یا پارتى دیموكراتى كوردستان راگه‌هاندنه‌ك به‌لاڤكر و تێدا ئاماژه ب وێ یه‌كێ كریه: دڤێت سنوره‌ك بۆ بزاڤا گۆڕان بهێته دانان هه‌تا كو چ جارێن دى سیارى هنده‌ك شه‌پولێن نه‌رازییێ و مانگرتنا هنده‌ك چینان نه‌بیت و سه‌ردا ببه‌ت”.
مه‌كته‌با سیاسى یا پارتى دیموكراتى كوردستان ره‌تكر كو وان داخواز ژ چ لایه‌نه‌ك و كه‌سه‌كى كربیت كو ناڤبه‌ریێ د ناڤبه‌را وان و گۆڕان دا بكه‌ن.
ئه‌ڤرۆ نیوز:
ل گۆر ده‌نگوباسه‌كێ وه‌زاره‌تا خواندنا بلند، د كومبوونا ئه‌ڤرۆ یا وه‌زاره‌تێ دا بریار هاته دان كو سالا خواندنێ (٢٠١٤-٢٠١٥) ب سالا نه‌كه‌فتنێ (عدم رسوب) بهێته هژمارتن.
هه‌ر د كومبوونێ دا رژدى ل سه‌ر وێ یه‌كێ هاته كرن كو ئه‌ڤ بریارا عبورێ وان قوتابیان ڤه‌ناگریت یێن ژ ئه‌گه‌رێ غشێ یان ژ ئالیێ لژنا (ئینزیبات) بریارا كه‌فتنێ بۆ ده‌رچووى.
ئه‌ڤرۆ نیۆز، قائید میرۆ
فه‌رمانده‌كێ پێشمه‌رگه‌ی ل شنگالێ ئاشكراكر، ئه‌ڤرۆ هه‌ڤپه‌یمانان حه‌فت باره‌گایێن داعش ل رۆژئاڤایێ شنگالێ وێرانكرینه.
عه‌مید عزه‌دین سه‌عدۆ، فه‌رماندێ پێشمه‌رگه‌ی ل میحوه‌رێ شنگالێ ب ئه‌ڤرۆ نیۆز راگه‌هاند” ده‌مژمێر 10ی به‌ری نیڤرۆیا ئه‌ڤرۆ هێزێن هه‌ڤپه‌یمانان حه‌فت باره‌گایێن تیرۆرستێن داعش ل رۆژئاڤایێ شنگالێ كرینه ئارمانج، كو باره‌گا دكه‌ڤنه سه‌ر رێیا عێراق و سووریا و رێیا گشتیا هاتن وچوونا داعشه.
عه‌مید عزه‌دینی گۆتژی” ئه‌ڤێ بۆردومان ب چه‌كێ هه‌ره پێشكه‌فتی هاتیه‌كرن و زیانێن زۆر گه‌هاندینه تیرۆرستێن داعش، به‌لێ قه‌بارێ زیانێن گیانی نه‌هاتیه زانین تنێ مه زانیه ترۆمبێله‌ك ژی هاتیه ژناڤبرن و زیان هه‌بووینه.
ئه‌ڤرۆ نیۆز، قائید میرۆ
سه‌رۆكێ فڕاكسیۆنا پارتی ل جڤاتا پارێزگه‌ها هه‌ولێرێ ئاشكراكر، ژبه‌ر ڤێ ره‌وشێ هه‌موو دانوستاندنه‌ك لدۆر پشكداریا لایه‌نێن دی د حوكمه‌تا نافخۆیا هه‌ولێرێ دا هاتینه راگرتن.
كه‌نعان خه‌یلانی، سه‌رۆكێ فڕاكسیۆنا پارتی ل جڤاتا پارێزگه‌ها هه‌ولێرێ ب ئه‌ڤرۆ نیۆز راگه‌هاند” بۆ پێك ئینانا حوكمه‌تا خوه جها هه‌ولێرێ ئه‌م وه‌كی پارتی دگه‌ل بزاڤا گۆڕان رێكه‌فتبووین و مه چه‌ند پۆستێن گرنگ ژ رێڤه‌به‌رایه‌تیا ب گۆڕان دابوون، به‌لێ پشتی هنگی بۆمه ده‌ركه‌فت گۆڕان ئه‌ڤا ل په‌رله‌مانی كری ڤه‌گوهێزیت بۆ جڤاتا پارێزگه‌هێ و حوكمه‌تێن نافخۆیی.
خه‌یلانی گۆتژی” دده‌مێ نوكه هه‌موو جۆره دانوستانه‌ك لدۆر حوكمه‌تا نافخۆیا هه‌ولێرێ هاتیه راگرتن و ژبه‌ر ڤێ ره‌وشێ پڕۆسه‌یا دانوستانان بڕێڤه ناچیت، له‌وڕا دگه‌ل لایه‌نێ ئێكه‌تیێ و ئێكگرتووژی نه‌گه‌هشتین چو ئه‌نجامان.
ئه‌ڤرۆ نیوز:
سه‌را چوونا بن ئه‌رد چوونا 30 سه‌نتیمێن پرا خانى لژنه‌یه‌ك ژ باژێرڤانى و قائیمقامى و پارێزگارێ دهۆكێ هاتیه پێكئینان بۆ دووڤچوونا ئه‌نجامێن دووماهیێ. باژێرڤانیا زاخۆ ژى دبێژیت: هه‌كه لیژنه‌یا زانستى ره‌زامه‌ندى ل سه‌ر دانانا پرێ نه‌دان، دێ ل سه‌ر كیستێ كۆمپانیا دیزاینه‌رى جاره‌كا دى سه‌ر ژ نوو هێته درۆستكرن.
ئه‌ندازیار بژار مۆنیب بو رۆژنامه‌یا ئه‌ڤرۆ دیار كر، پرا خانى خه‌له‌تیه‌ك پشتى سه‌بكڕنێ تێدا هاتیه كرن، ئانكۆ پێشنیاز ئه‌و بوو 20 سم بۆ بن ئه‌رد پرۆژه بهێته خوار، لێ نۆكه گه‌هشتیه زێده‌ترى 30 سم، ئه‌م ل گه‌ل سه‌رپه‌رشتێن پرۆژه‌ى و كۆمپانیایێ جڤیاین و گۆت: ل دۆر ڤێ مه‌ره‌مێ لیژنه‌یه‌ك ژ باژێرڤانیا نوونه‌رێ قائیمقامى و پارێزگه‌هێ تێدا پشكدارن، مه خالێن خوه نڤێسین و پێشكێشى پارێزگه‌هێ كرینه، بۆ هندێ بریارا ئێكلاكه‌ر د ڤێ ده‌ربارێ دا بده‌ن.
محه‌مه‌د حه‌سه‌ن شۆفێرێ ته‌كسیێ بوو د ناڤخۆیا زاخۆ دا كار دكه‌ت بۆ رۆژنامه‌یا ئه‌ڤرۆ دیار كر، هندى ئه‌م چاڤه‌رێ دكه‌ین هه‌ردو پرێن خانى و ئۆڤه‌رپاسا سه‌رێ گۆندى درۆست بن، لێ هه‌ر جاره‌كێ بهانه‌یه‌كێ كارى گیرۆ دكه‌ن و كه‌س نینه لێپیچینه‌یان ژ كۆمپانیان وه‌ربگرن، ژ به‌ر هه‌موو هه‌ڤپشكێن ئێكن و گۆت: ژ قه‌ره‌بالغیێ كار تێدا بێ تام بوویه، رێیا سه‌ره‌كى د ناڤ بازارى دا و ل پشت بازارى دا ده‌رباز دبیت، ئه‌ڤه ژى شۆفێرێن ته‌كسیان ژ هه‌موویان زێده‌تر زیانێ ژ گیروكرنا ڤان پرۆژه‌یان دبینن.
كۆمپانیا زانین ژى ئاشكرا كر، گرانیا قه‌بارێ پرا خانى سێ هزار ته‌نن، ژ به‌ر گڤاشتنا كێبلێن ده‌وروبه‌رێن پرێ بۆ راگرتنا به‌لانسا پرێ ژ هه‌ردوولایان ڤه هاتینه دانان، نێزیكى 10 سم پر هاتیه خوار، ئه‌ڤه ژى تسته‌كێ نۆرماله ب ناڤێ كۆمپانیێ دبێژن: درێژاهیا پرا خانى 65 مه‌ترن و پشتى مه راوێژ ژى ل گه‌ل دیزاینه‌رێ پرێ كرى ل گۆره‌ى پێشبینیان هه‌تا نهۆ چو كارتێكرنێن خوه نه‌كرینه، چاره‌سه‌ریێن پێدڤى ژى بۆ دهێنه كرن.
بژار مۆنیب ته‌كه‌ستكر، ئه‌ندازیارێن وان پله‌یا زانستى یا پرۆفیسۆر نینن بكارن وێ وه‌كو لێپیچینه‌وه وێ بریارێ بده‌ن كا خه‌مسارى هاتیه كرن یان ژى كێشه نینن و گۆت: نه‌خشه‌سازێ پرێ پله‌یا وى یا زانستى پرۆفیسۆره، دێ مینیت راوێژ ب هنده‌ك پرۆفیسۆران بهێته كرن، دووڤچوونا وى بابه‌تى دهێته كرن، لیژنه‌یا زانستى بریار ل سه‌ر دانانا پرێ نه‌دان، جاره‌كا دى سه‌ر ژنوو دێ پر ل سه‌ر كیستێ كۆمپانیا دیزاینه‌رى هێته درۆستكرن.
ئه‌ڤرۆ:
قاسم سمێر فه‌رماندێ پێشمه‌رگه‌ى ل میحوه‌رێ شنگال دیار كر كو وان گه‌له‌ك پێخوه‌شه تله‌عفه‌ر به‌رى شنگالێ بهێته رزگاركرن، چونكو تیرورسَتێن داعش یێن ئه‌فغانى و پاكستانى و وه‌لاتێن دى یێن بیانى د شنگالێ دا نه‌ماینه ئه‌و تیرۆرستێن د ناڤ شنگال دا نوكه شه‌ڕى دكه‌ن هه‌موو عه‌ره‌بێن ده‌وروبه‌رێن شنگالێ و تله‌عفه‌رێنه و بۆ ئه‌ڤرۆ گۆت:(رزگاركرنا شنگال 12 ده‌مژمیران ڤه‌ناكێشیت).
نيشاندان