ئەڤرۆ نیوز، لەزگین جۆقی:
رێڤەبەریا ساخلەمیا دھۆکێ و پۆلیسێن پارێزگەھا دھۆکێ و رێڤەبەریا بەرەڤانیا باژێری و رێڤەبەریا پۆلیسین ھاتنوچوونێ ل دھۆکێ پلانێن خوە بۆ رۆژانێن جەژنێ راگەھاندن.
حەمزە رەزیکی بەرپرسێ راگەھاندنێ ل رێڤەبەریا گشتیا ساخلەمیا پارێزگەھا دھۆکێ دیارکر کو رێڤەبەریا گشتیا ساخلەمیێ ل پارێزگەھا دھۆکێ وەکو ھەموو جەژن و ھەلکەفتێن دی بۆ جەژنا قوربانیێ ژی پلانا خوە دانایە بۆ پاراستنا ساخلەمیا وەلاتیان د رۆژانێن جەژنێ دا.
رەزیکی گۆت: “پلانا ساخلەمیێ د گەلەک واران دا یا ھەیی، ئەو ژی وارێ ئێکێ بواری چارەسەرێ دا ٣٤ تیمێن گەرۆک ھاتینە پێک ئینان ژ وانا ژی ١٨ تیم دێ ل بەرۆکێن شەری بن دژێ رێکخراوا تیرورستی یا داعش و ١٦ تیمێن گەرۆک یێن ساخلەمیێ دێ ل سەرانسەری پارێزگەھا دھۆکێ د کاری دا بن و د ناڤ کەمپێن ئاواران دا ژی بنگەھێن ساخلەمیێ دێ بەردەوام د ڤەکری بن ئەو کەمپێن بنگەھێن ساخلەمیێ لێ نەبن یان ل ژێر دروستکرنێ بن ل ناڤ وان دا دێ رۆژانە تیمێن گەرۆک یێن ساخلەمیێ ھەبن و بنگەھێن ساخلەمیێ یێن نۆبەدار ئەوێن بەری نوکە دەواما وان ژ ٢ی پشتی نیڤرۆ ھەتا ١٢ شەڤ دەست پێ دکر دێ د رۆژانێن جەژنێ دا ئەو بنگەە ھەموو د ڤەکری بن ھەر ژ دەمژمێر ھەشتی سپێدی ھەتا ١٢ شەڤێ دێ خزمەتا وەلاتیان کەن د گەل ڤێ چەندێ ژی پشکێن تەنگاڤیا ل ھەموو نەخۆشخانێن گشتی ھەر ژ زاخۆ ھەتا ئاکرێ دێ ٢٤ دەمژمێران د خزمەتا وەلاتیان دا بن.
ناڤبری ئەو ژی دیارکر کو د بوارێ خوەپاراستنێ دا ژی ژ بەر بەلاڤبوونا نەخۆشیا کۆلێرێ ل ھندەک پارێزگەھێن عیراقێ ساخلەمیا دھۆکێ ب فەر دیت ل ڤێ چەژنێ تیمێن زێرەڤانیا ساخلەمیێ بھێنە زێدەکرن ژ وانا ژی رۆژانە چوار تیمێن ساخلەمیێ دێ ل سەنتەرێ دھۆکێ دا بن دێ ھەموو مارکێت و جھێن بازرگانیێ و خوارنگەھان گەرن، ھەر تشتەکێ گۆمان ل سەر ھەبیت بزانن دێ کارتێکرنێ ل ساخلەمیا وەلاتیان کەت، ئەو تشت دێ ھێتە دەستەسەرکرن دیسا ل ھەموو قەزایێن پارێزگەھێ ژی دێ تیمێن زێرەڤانیا ساخلەمیێ ھەبن، رۆژانە ل ھەر قەزایەکێ دو تیم دێ د کاری دا بن دا کو خزمەتا وەلاتیان بھێتە کرن.
حەمزە رەزیکی گۆتژی: “خزمەتێن ١٢٢ ژی دێ بەردەوام د خزمەتا وەلاتیان دا بن وەلاتێ دشێن پەیوەندیێ ب ١٢٢ بکەن”، ھیڤی ژی ژ وەلاتیان خواست کو ل ڤێ جەژنێ زێدەتر ھشیاری ساخلەمیا خوە بن ژ بەر مەترسیا کولێرایێ یا ل سەر ھەرێما کوردستانێ ھەیی.
دەربارەی بەرھەڤیێن رێڤەبەریا ھاتنوچوونێ ژی، رائیدێ مافپەروەر ئازاد تەھا بەرپرسێ راگەھاندنا پۆلیسێن ھاتنوچوونێ ل پارێزگەھا دھۆکێ دیارکر کو وەکو ھەموو جەژن و ھەلکەفتین دی پلانەکا باش ھاتیە دانان ل ھەموو ترافیکلایتا دێ پۆلیس ھەبن و نابیت ترۆمبێلێن حوکمەتی تایبەتی ژی ھەکەر زارۆ تێدا بن ھاتنوچوونی بکەن و کامیرێن چاڤدێریێ دێ زێدەتر ژ جاران ل جەژنێ ھێنە دانان و ھێلا ١٨٨ دێ د خزمەتێ دا بیت، وەلاتی دشێن بۆ ھەر حالەتەکی پەیوەندیێ پێ بکەن ھەر ترۆمبیلەکا سەرپێچیێ بکەت و رێنمایێن ھاتنوچوونی بجە نەئینیت بھێتە دەستەسەرکرن، ناھێتە بەردان ھەتا پشتی جەژنێ و ئامیرێن پشکنینا مە ب تایبەت ل دەرنگی شەڤ دێ ل گەل مەفرەزان ھێنە دانان و یێ بێی مۆلەت ترۆمبێلی ب ھاژوت بھێتە گرتن دێ ھێتە رەوانەکرن بۆ دادگەھێ و داخوازێ ژ ھەموو دایک و بابێن ھێژا دکەین سویچێن ترۆمبێلان ل بەر دەستێن زارۆیان نەھێلن دا کو گیانێ ھەموو وەلاتیان پاراستی بیت ب خوشیی ھەموو جەژنا خوە بکەن.
رائیدێ مافپەروەر ھێمن سلێمان محەمەد ژی رێڤەبەرێ پەیوەندی و راگەھاندنا پۆلیسێن پارێزگەھا دھۆکێ دیارکر کو پۆلیسێن نەھێلانا گونەھباریان دێ جلکێن مەدەنێ د ناڤ گەرەکێن دھۆکێ دا بن و پۆلێسن ھەوار ھاتنێ ژێ ٢٥ خال دێ ھەبن زێدەباری مەفرەزکا گەرۆک و پۆلیسێن چالاکیێن مەدەنی ژی دێ ل چەندین خالێن تایبەت ھەبن د گەل ھەبوونا مەفرەزکا تایبەت بۆ ھەر روودانەکا نەچاڤەرێکری و ئەفسەر و پۆلیسێن نوبەدار دێ ل ھەموو بنگەھێن پۆلیسان ھەبن بۆ خزمەتکرنا وەلاتیان ھەر دوو ھێلێن گەرم ٠٦٢١٠٤ و ٠٦٢١٤٠ دێ ٢٤ دەمژمێران د خزمەتێ دا بن.
دا زانین ژی کو ئەڤ پلانا پۆلیسێن پارێزگەھا دھۆکێ دێ ل سەرانسەری قەزا و ناحیێن دھۆک ھێتە بجە ئینان.
رائیدێ مافپەروەر بێوار عەبدولعەزیز بەرپرسێ راگەھاندنا بەرەڤانیا باژێرێ دھۆکێ ژی دیارکر کو ھەموو بنگەھێن بەرەڤانیا باژێری دێ ٢٤ دەمژمێرا د حالەتێ ئامادەباشیێ دا بن بۆ ھەر روودانەکا نەچاڤەرێکری تیمێن قورتالکرنی کو پێک ھاتینە ژ نقومڤان و کارمەندێن ئامادە ل رۆژانێن جەژنێ دێ د ئامادەباشیێ دا بن و ئەفسەرێن نوبەردار رۆژانە دێ د ئامادەباشیێ دا بن و ھێلەکا گەرم ژی ھاتیە دانان بۆ خزمەتکرنا وەلاتیان ئەو ژی وەلاتی دشێن پەیوەندیێ ب ژمارا ٠٦٢١١٥ بکەن بۆ ھەر روودانەکا نەچاڤرێکری.

ئەڤرۆ نيوز:
بەرپرسەکێ پارتی ل پارێزگەھا ھەلەبجە دبێژیت، لایەنێن سیاسی دشێن پۆستان بۆ خوە بەلاڤ بکەن، بەلێ بێ ئیمزا پارتی نەشێن کورسیێن جڤاتا پارێزگەھا ھەلەبجە بەلاڤ بکەن، چونکی ھەلبژاتن بۆ نەھاتینە کرن، لەوما پێدڤیە ب رێککەفتنا سیاسی بیت.
بەختیار سدیق کارگێرێ لقێ ھەلەبجە یێ پارتی دیموکراتی کوردستان بۆ مالپەرێ فەرمیێ پارتی گوت” ئێکەتی نیشتمانی کوردستان و بزاڤا گۆڕان سەرەدانا لایەنان کریە ل دۆر بەلاڤکرنا پۆستان، بەلی دەمێ سەرەدانان دکەن پێدڤیە بەرسڤێ ژی بدەن، لەوما سەرەدانا مە ژی کریە و ھەتا نوکە بەرسڤا مە نەدایە”.
بەختیاری گوت ژی” نە بەرسڤا داخوازیێن مە ھاتیە دان و نە ھاتینە داخوازکرن ژی بۆ کۆمبوونا دوھی، بەلێ ئەو وەسا ھزر دکەن کو دشێن پارتی پشت گوە بکەن و بێگومان نەشێن ڤێ چەندێ بکەن، چونکی بێ ئیمزا پارتی، کورسیێن جڤاتا پارێزگەھا ھەلەبجە ناھێنە بەلاڤکرن، ژ بەر کو ھەلژارتن نەھاتینە کرن ھەتاکو ل دووڤ ئەنجامان کورسی بھێنە بەلاڤکرن”.
ئاماژە دا وێ چەندێ ژی ” سەبارەت بەلاڤکرنا کورسیێن جڤاتا پارێزگەھێ، پێدڤیە ھەموو لایەنبگەھنە رێککەفتنێ و پاشی یاداشتەکێ کو ئیمزا ھەموو لایەنان ل سەر بیت بۆ وەزارەتا ناڤخوەیی لژنا قانوونی ل پەرلەمانێ کوردستانێ بھێتە بلندکرن، چونکی بریار یا ژلایێ پەرلەمانێ کوردستانێ ڤە ھاتیە دان و ل بەر وێ چەندێ ژی کو ئەو کەسانە دێ ھێنە دامەزراندن، نەشێن جڤاتێ دیار بکەن، بەلێ دشێن پۆستێن دی بەلاڤ بکەن”.