ئه‌ڤرۆ، عه‌لی حاجی:

هشیار زێباری، ئه‌ندامێ‌ مه‌كته‌با سیاسی یا پارتی دیموكراتی كوردستانێ‌ د كۆنگره‌یه‌كێ رۆژنامه‌ڤانی دا دیار كر، ل كوردستانێ هه‌وا هه‌لبژارتنان ب ره‌نگه‌كێ‌ گه‌له‌ك باش ب رێڤه‌ دچیت و د رۆژێن بهێن ژی دا هه‌وا هه‌لبژارتنان دێ‌ گه‌رمتر لێ‌ هێت و دبێژیت: مه‌ به‌رسڤا هه‌موو وان لایه‌نان هه‌یه‌؛ یێن ره‌خنێ ل مه‌ دگرن

هشیار زێباری گۆت: “پشكداریا وه‌لاتیان د ڤان هه‌لبژارتنان دا گه‌له‌كا گرنگه‌، داكو پێشكه‌ڤتنا نوكه‌ هه‌ی به‌رده‌وام بیت و هه‌كه‌ پارتی ژی نه‌بیت دێ ره‌وش خرابتر لێ‌ هێت، دیسا ئه‌ڤ رۆژێن ماین گه‌له‌ك دگرنگن بۆ مه‌ وه‌كو پارتی، له‌و پێدڤی یه‌ به‌ربژارێن مه‌ د ناڤ خه‌لكی دا بن و به‌ربژارێن مه‌ ژی هه‌موو جهێ باوه‌ریا حزبێ نه‌”.

ل دۆر چاوانیا هه‌لبژارتنێن ڤێ‌ جارێ‌ هشیار زێباری گۆت: “ئه‌ڤ هه‌لبژارتنه‌ ژ هه‌لبژارتنێن به‌ری نوكه‌ جوداترن، ژ به‌ر كو چاڤدێریه‌كا توند د ڤان هه‌لبژارتنان دا دێ‌ هه‌بیت، گه‌له‌ك لایه‌ن دێ‌ بزاڤێ‌ كه‌ن سكالا ل سه‌ر پارتی تۆمار بكه‌ن”.

گۆتژی: “دهۆك بنگه‌هێ پارتی یه‌، مه‌ باوه‌ری ب خه‌لكی و لایه‌نگرێن خوه‌ هه‌یه‌ كو بچنه‌ سه‌ر سندۆقێن ده‌نگدانێ، چونكو لایه‌نگر و وه‌لاتیین مه‌ گه‌له‌ك خودان خیره‌ت و وژدانن، هه‌موو كار ژ لایێ پارتی ڤه‌ بۆ سه‌ركه‌ڤتنێ هاتینه‌ كرن، هه‌ر پارتی یه‌ به‌ره‌ڤانیێ‌ ل ماف و ده‌ستكه‌فتێن هه‌رێما كوردستانێ‌ دكه‌ت و چجاران ژی پارتی ژ به‌رپرسیاره‌تیێ نه‌ره‌ڤیه‌”.

زێده‌تر گوت: “رێژه‌یا پشكداریێ د ڤان هه‌لبژارتنان دا گه‌له‌كا گرنگه‌، پارتی ب سه‌ربلندی ڤه‌گه‌ڕیایه‌ ده‌ڤه‌رێن ماددێ‌ 140 و مووسلێ‌ و دگه‌ل لایه‌نین نێڤده‌وله‌تی ژی ل سه‌ر هێلین، داكو چو كێشه‌ بۆ ده‌نگده‌رێن مه‌ نه‌هینه‌ دروست كرن، دیسا مه‌ باوه‌ریا هه‌ی ڤێ‌ جارێ‌ ژی دێ ده‌نگێن باش ب ده‌ستخوه‌ڤه‌ ئینین، ژ به‌ركو ئه‌م وه‌كو پارتی خودان مێژوو و سه‌روه‌رینه‌”.

ئه‌ڤرۆ:

سكرتێرێ مه‌كته‌با سیاسی یا پارتی دیمۆكراتی كوردستان راگه‌هاند، هنده‌ك لایه‌ن باسێ وێ‌ چه‌ندێ‌ دكه‌ن، د هه‌لبژارتنێن بوری دا پارتی سه‌خته‌كاری كرینه‌، لێ ئه‌و لایه‌ن پتر ژ پارتی مفادار بووینه‌ و پۆستێ سه‌رۆكا په‌رله‌مانی و جێگرێ سه‌رۆك وه‌زیران وه‌رگرتینه‌.

فازل میرانی، گۆت ژی، ئه‌وێن دبێژن ئالیێن دیتر سه‌خته‌كاریێ دكه‌ن د ناڤه‌رۆكێ دا وه‌سا نینه‌، به‌لكو ئه‌ڤه‌ كۆمبوونا پرانییا خه‌لكێ یه‌ ل ده‌وروبه‌رێن پارتی.

ئاشكرا ژی كر كو د هه‌لبژارتنه‌كێ دا ئێك ژ هه‌ڤپشكێن مه‌ كێمترین كورسی ئینابوون، مه‌ پۆستێ سه‌رۆك وه‌زیران دایێ، ئانكو ئه‌وا ئه‌و دبێژن سه‌خته‌كارییه‌، ئه‌م دبێژین نه‌خێر، به‌لكو پرانییا خه‌لكێ ل ده‌وروبه‌رێن پارتی كۆمبووینه‌ و ده‌نگی دده‌نه‌ پارتی.

ئه‌ڤرۆ:

سه‌رۆكێ حوكمه‌تا هه‌رێما كوردستانێ، ل ئێكه‌مین دیدارا (تاون هۆل) كو ل زانكۆیا ئه‌مریكی كوردستان ل دهۆكێ هاتیه‌ ئه‌نجامدان، به‌رسڤا پرسیارێن لاوێن پشكدارێن دیدارێ دان.

مه‌سرور بارزانی، سه‌رۆكێ حوكمه‌تا هه‌رێما كوردستانێ، د چارچۆڤێ پشكداریكرنێ د دیدارا (تاون هۆل) دا، راسته‌وخوه‌ به‌رسڤا پرسیارێن هه‌ژماره‌كا گه‌نج و قوتابیێن زانكۆیێن كوردستانێ دان، داخواز ژ گه‌نجان كر ژ پێخه‌مه‌ت پاشه‌رۆژه‌كا باشتر دا، حه‌ز ژ وه‌لاتێ خوه‌ بكه‌ن.

سه‌رۆكێ حوكمه‌تا هه‌رێمێ د به‌رسڤا وان گه‌نجان دا كو بێ جوداهیا جهێ جوگرافی و ئایدیۆلۆژیا سیاسی پشكدار بوون، گۆت” وه‌سا نه‌سه‌حكه‌نێ كو كه‌سه‌كێ دی خودانێ ڤی وه‌لاتیه‌، ژبلی هه‌وه‌ كه‌س خودانێ ڤی وه‌لاتی نینه‌، تاك ب تاكێ وه‌لاتیان خودانێن ڤی وه‌لاتی نه‌”.

سه‌باره‌ت مووچه‌ و چاكسازیێ ژی، سه‌رۆكێ حوكمه‌تێ گۆت” ئه‌ز ژ به‌رپرسیاره‌تیێ ناترسم، ب تنێ ژی بم دێ به‌رپرسیاره‌تیا خوه‌ هه‌لگرم، هه‌موو بزاڤێن مه‌ بۆ وێ چه‌ندێ نه‌ زۆرترین داهاتی ڤه‌گه‌رینین بۆ وه‌لاتیان، هه‌روه‌سا پتریا وان هێرشێن ل سه‌ر ڤێ حوكمه‌تێ دهێنه‌ كرن، سیاسی نه‌”.

د پشكه‌كا دی یا دیدارا خوه‌ دا، مه‌سرور بارزانی ل دۆر پرۆسا هه‌وا هه‌لبژارتنێن جڤاتا نوونه‌رێن ئیراقێ ژی راگه‌هاند” ئه‌و سیاسیێن كو دهێن ل سه‌ر بنه‌مایێ دروستكرنا كه‌رب و كینێ و خرابكرنا لایه‌نه‌كێ دی، خوه‌ نمایش دكه‌ن، بزانن كو ئه‌وان چ ڤێ نینه‌”.

سه‌رۆكێ حوكمه‌تا هه‌رێما كوردستانێ رۆهنكر ژی” ئه‌و كه‌سێن دژی لایه‌نێن دی د ئاخڤن و دبێژن فلان كه‌س شاشی كریه‌، وه‌رن ده‌نگی ب من بده‌ن، پرسیار ئه‌وه‌ باشه‌ دێ بۆچی ده‌نگ ب ته‌ ده‌م؟ به‌لكو تو ژ وی خرابتر بی، فه‌رمو بێژه‌ من چ تشتێ باش ته‌ هه‌یه‌؟ “.

مه‌سرور بارزانی ب پێدڤی زانی هه‌ڤركی ل سه‌ر وێ ئێكێ بهێته‌ كرن كێ زێده‌تر پێ چێدبیت، پتر دشیانێن كێ دایه‌ و دیارك ركو ئه‌ڤ چه‌نده‌ ژی ب ئاخڤتنێ ناهێته‌ كرن، له‌وما هنده‌ك خوه‌ ل ڤی بابه‌تی خوه‌ دده‌نه‌ لایه‌كی، چونكه‌ ده‌مێ دهێته‌ سه‌ر كریارێ، هیچ ل ده‌ف نینه‌ به‌رچاڤ بكه‌ن.

هه‌ر د وێ دیدارێ دا دانوستاندن ل دۆر چه‌ندین پرس و بابه‌تێن جودا هاته‌ كرن، ئه‌و دیدار ژی ل ده‌مژمێر 9 شه‌ڤ ل پێنجشه‌مبیا داهاتی ب رێیا سۆشیال میدیا دێ هێته‌ به‌لاڤكرن.

ئه‌ڤرۆ:

د ئاهه‌نگا هه‌وا هه‌لبژارتنێن پارتی دیموكراتی كوردستان دا ل شه‌قلاوه‌، سیداد بارزانی ئه‌ندامێ سه‌ركردایه‌تیا پارتی گۆتاره‌ك پێشكێكر وتێدا ئامه‌ژه‌كر، پارتی خودان سۆزا خوه‌یه‌ و ئه‌وا پێ چێبووی یا بجهئینای، هه‌روه‌سا گۆت ژی، ده‌نگدان ب پارتی، ده‌نگدانه‌ ب سه‌رۆك بارزانی.

سیداد بارزانی، ئه‌ندامێ سه‌ركردایه‌تیا پارتی گۆت ژی” پارتی به‌رده‌وام باوه‌ری ب هه‌لبژارتنان و پرۆسا دیموكراسیێ هه‌بوو، ئێكه‌م هه‌لبژارتن ژی ل سه‌ر پێشنیازا سه‌رۆك بارزانی بوو د گۆتاره‌كا وی دا ل باژێرێ كۆیه‌ كو پرۆژێ ئه‌نجامدانا هه‌لبژارتنان پێشنیازكر و پاشی هه‌لبژارتن هاتنه‌ ئه‌نجدامدان، هه‌تا ل هه‌لبژارتنان ژی پارتی یا به‌رهه‌ڤ بوو ل مافێ خوه‌ خوه‌ش ببیت و سیسته‌مێ پێنجی ب پێنجی قه‌بوول كر، بۆ وێ ئێكێ ره‌وشا كوردستانێ تێك نه‌چیت”.

سیداد بارزانی دیاركر” ب هێزبوونا كوردستانێ، ژ هێزبوونا پارتی دایه‌، ژبه‌ر وێ چه‌ندێ دوژمن هێرشی پارتی دكه‌ن تاكو كوردستانێ لاواز بكه‌ن، ئه‌م دزانین خه‌لكه‌ك هێرشێ دكه‌ته‌ سه‌ر پارتی، به‌لێ پارتی كێم د ئاخڤیت و پتر خزمه‌تێ دكه‌ت، سه‌ربلندین ب دیرۆكا خوه‌ وه‌كو پارتی، خه‌لكه‌ك شه‌رم ژ بۆریێ خوه‌ دكه‌ت، به‌لێ پارتی شانازیێ ب بۆریێ خوه‌ دكه‌ت”.

سیداد بارزانی ئاماژه‌ ب وێ ئێكێ ژی كر” جهێ ده‌ستێ پارتی یێ دیاره‌ د به‌رگریێ و ئاڤه‌دانكرنا كوردستانێ دا، به‌ری چه‌ند رۆژان چار سال ب سه‌ر ریفراندۆما سه‌ربخوه‌یێ دا ده‌رباز بوون، هنده‌ك كه‌س ئه‌زمان درێژیێ دكه‌ن و دبێژن ژبه‌ر ڤێ چه‌ندێ ریفراندۆمێ سه‌رنه‌گرت، به‌لكو  ریفراندۆم تاكه‌ دیكیۆمێنته‌ د ده‌ستێ ملله‌تێ كورد دا، به‌لێ هه‌موو ده‌مان تشت ژ وێرێ تێك دچیت كو ل ناڤخوه‌یا ته‌ كارخراب ببیت، خیانه‌تا 16 ئۆكتۆبه‌رێ بوو ئه‌گه‌رێ وێ چه‌ندێ یا كو نه‌دهاته‌ چاڤه‌رێكرن، روودای”.

پتر رۆهنكر” نیه‌تا وان ئه‌وه‌ پارتی نه‌مینیت وناڤێ هه‌رێما كوردستانێ نه‌مینیت، به‌لێ قه‌هره‌مانا ل مه‌خموورێ و سحێلا، هه‌ڤكێش به‌رۆڤاژیكر، ده‌ربازكرنا ره‌وشێ رامان ژێ ئه‌وه‌ مه‌ كه‌سه‌ك یێ هه‌ی تنێ ئارمانجا وی بده‌ستڤه‌ئینانا مافێن خه‌لكێ كوردستانێ و پاراستنا كوردستانێ یه‌، جوداهیا مه‌ ل گه‌ل لایه‌نێن دی ئێكجار زۆره‌، پارتی سه‌رۆكه‌ك یێ هه‌ی كو باوه‌ری یا هه‌ی ژ لایێ دۆست و دوژمنان ڤه‌، ئه‌وا پێچیبووی یا بجهئینای”.

هه‌روه‌سا گۆت” ل چه‌ند رۆژێن داهاتی دێ چینه‌ سه‌ر سندوقێن ده‌نگدانێ، داخوازێ ژ دۆست و هه‌ڤالێن خوه‌ بكه‌ن كو بۆ وێ چه‌ندێ ویژدانا خوه‌ بكاربینن، پارتی خودانا سۆزا خوه‌ بوو، ل رۆژێن ته‌نگاڤیان دا یا به‌رهه‌ڤ بوو بۆ به‌رگریێ و ل رۆژێن دی ژی دا ده‌ست ب ئاڤه‌دانیێ كریه‌، ده‌نگدان ب پارتی، ده‌نگدانه‌ ب سه‌رۆك بارزانی و خوینا شه‌هیدان”.

دیدار، هۆشه‌نگ تاجر:

سیاسه‌تمه‌داره‌كێ ناڤدارێ باكورێ كوردستانێ دیار دكه‌ت كو پارتی دیموكراتی كوردستان د قۆناغێن هه‌ری دژوار دا به‌رگیری ژ مافێن گه‌لێ كوردستانێ كریه‌ و نها مه‌ترسی ل سه‌ر سیسته‌مێ فیدرالی هه‌یه‌ و ژ بۆ پاراستنا هه‌رێما كوردستانێ و سیسته‌مێ فیدرالی دڤێت پارتی ل به‌غدا بهێز بیت.

ئیبراهیم گوچلوو سیاسه‌تمه‌دارێ ناڤدارێ باكورێ كوردستانێ بۆ رۆژناما ئه‌ڤرۆ دیار كر كو سیسته‌مێ ئیراقێ فیدرالی یه‌ و كورد ژی د چارچۆڤێ سیسته‌مێ فیدرالی دا رازی بوون كو ل گه‌ل ئیراقێ بمینن، لێ نها مه‌ترسی ل سه‌ر سیسته‌مێ فیدرالی هه‌یه‌ و ره‌نگه‌ پشتی هه‌لبژارتنان ژی هێزێن شیعه‌ كار بۆ هندێ بكه‌ن كو سیسته‌مێ فیدرالی نه‌مینیت، وی ده‌می دێ مه‌ترسی ل سه‌ر هه‌رێما كوردستانێ هه‌بیت و گۆت: (ئه‌ز پرانیا پارتێن سیاسی یێن هه‌رێما كوردستانێ دنیاسم و دزانم كا د ده‌مێن بۆری دا وان چ بۆ كوردان كرینه‌، سه‌رۆك مه‌سعود بارزانی ب رێیا ریفراندۆما هه‌رێما كوردستانێ كار بۆ هندێ كر كو كورد د پاراستی بن، نها ژی هه‌كه‌ هێزێن شیعه‌ كار بۆ ژناڤبرنا سیسته‌مێ فیدرالی و لاوازكرنا هه‌رێما كوردستانێ بكه‌ن دڤێت وی ده‌می كورد كارتا ریفراندۆمێ بكار بینن، ژ به‌ر هندێ ژی پێدڤیه‌ پارتی هه‌ری زێده‌ نوونه‌ران ره‌وانه‌ی په‌رله‌مانێ ئیراقێ بكه‌ت دا نوونه‌رێن پارتی و خه‌لكێ كوردستانێ بشێن به‌ره‌ڤانیێ ژ مافێن خه‌لكێ كوردستانێ بكه‌ن).

ناڤهاتی ل دۆر هه‌لبژارتنێن نها یێن په‌رله‌مانێ ئیراقێ ژی دیار كر كر كو دڤێت وه‌لاتیێن كورد ل هه‌رێما كوردستانێ ب رێژه‌كا مه‌زن بچنه‌ سه‌ر سندۆقێن ده‌نگدانێ و ژ بۆ پاراستنا مافێن خوه‌ ده‌نگێ خوه‌ بده‌نه‌ پارتی دیموكراتی كوردستان، چونكو بهێزبوونا پارتی دیموكراتی كوردستان ل به‌غدا دهێته‌ رامانا پاراستنا قه‌وارێ سیاسی یێ هه‌رێما كوردستانێ، پارتی ژ بۆ بده‌ستڤه‌ئینانا مافێن نه‌ته‌وی یێ خه‌لكێ كوردستانێ كار كریه‌ و گۆت: (سیسته‌مێ فیدرالی نه‌ تنێ بۆ كوردان به‌لكو بۆ سوننه‌ و پێكهاتێن دی ژی گه‌له‌ك باشه‌، د راستی دا بهێزبوونا پارتی ل به‌غدا بۆ عه‌ره‌بان ژی گرنگه‌، چونكو هه‌كه‌ سیسته‌مێ ئیراقێ ببیته‌ سیسته‌مێ مه‌ركه‌زی دێ زۆرداری ل پێكهاتێن دی یێن ئیراقێ ژی هێته‌ كرن، ژ به‌ر هندێ ژی ئه‌ز دبێژم كو دڤێت عه‌ره‌ب ژی ده‌نگێ خوه‌ بده‌نه‌ پارتی دیموكراتی كوردستان دا كو سیسته‌مێ فیدرالی ل ئیراقێ یێ پاراستی بیت).

سیاسه‌تمه‌دارێ ناڤدارێ باكورێ كوردستانێ ئه‌و یه‌ك ژی دیار كر كو دڤێت هه‌رده‌م ل گه‌ل ئالایێ ئیراقێ ئالایێ كوردستانێ ژی ل په‌رله‌مانێ ئیراقێ بهێته‌ بلندكرن، چونكو ئه‌و یه‌ك مافێ دستووری یێ خه‌لكێ كوردستانێ یه‌، دڤێت د خۆلا نوو یا په‌رله‌مانی دا نوونه‌رێن كوردان پتر كار بۆ بده‌ستڤه‌ئینانا مافێن دستووری یێ خه‌لكێ كوردستانێ بكه‌ن، چونكو هێزێن شیعه‌ د ده‌مێن بۆری دا گه‌له‌ك مافێن دستووری یێن خه‌لكێ كوردستانێ بنپێكرینه‌ و دڤێت هه‌موو فراكسیۆنێن كوردستانی د خۆلا نوو یا په‌رله‌مانێ ئیراقێ دا پێكڤه‌ كار بكه‌ن و به‌رگیریێ ژ مافێن ره‌وا و دستووری یێ خه‌لكێ كوردستانێ بكه‌ن و گۆت: (دڤێت پارتی دیموكراتی كوردستان ل به‌غدا بهێز بیت، ژ به‌ر هندێ ژی ئه‌ز هێڤیدارم كو وه‌لاتیێن كورد ل هه‌رێما كوردستانێ ده‌نگێ خوه‌ بده‌نه‌ به‌ربژارێن پارتی دیموكراتی كوردستان، چونكو ده‌مێ پارتی ل به‌غدا بهێز بیت دێ هه‌موو مافێن دستووری یێن خه‌لكێ هه‌رێما كوردستانێ ژی بده‌ستڤه‌ هێن و دێ پێگه‌هێ هه‌رێما كوردستانێ ژی بهێز بیت، ژ به‌ر هندێ ژی بهێزبوونا پارتی گه‌له‌ك گرنگه‌).

ئه‌ڤرۆ:

سه‌رۆك مه‌سعود بارزانی دوهی ل سه‌لاحه‌دین پێشوازی ل ئێریك شۆڤالیێ‌ بالیۆزێ فره‌نسا ل ئیراقێ‌ كر.

د دیداره‌كێ‌ دا، سه‌رۆك بارزانی هیڤیا سه‌ركه‌فتنێ‌ بۆ بالیۆزێ‌ نوو یێ‌ فره‌نسا ل ئیراقێ‌ خواست و سه‌ره‌رای ئاماژه‌دانێ‌ ب سه‌ره‌دانا سه‌رۆك ماكرۆنی بۆ هه‌رێما كوردستانێ‌،  دوپاتی ل په‌یوه‌ندیێن دیرۆكی و دۆستایه‌تییا د ناڤبه‌را گه‌لێ‌ فره‌نسا و گه‌لێ‌ كوردستانێ‌ دا كر.

ژ ئالیێ‌ خوه‌ ڤه‌، بالیۆزێ فره‌نسا دوپتا كر، كو دۆستایه‌تیا د ناڤبه‌را گه‌لێ فره‌نسا و گه‌لێ كوردستانێ‌ دا بابه‌ته‌كێ نه‌گۆڕ و به‌رده‌وامه‌.

هه‌روه‌سا رۆناهی به‌ردا سه‌ر هه‌لبژارتنێن بهێت و هه‌ردو ئالیان هیڤی خواست ئه‌نجامێن هه‌لبژارتنێن ئیراقێ‌ ببنه‌ ئه‌گه‌رێ‌ بده‌ستڤه‌ئینانا سه‌قامگیری و گوهۆڕینێن ئه‌رێنی كو د به‌رژه‌وه‌ندیا وه‌لاتیێن ئیراقێ‌ دا بن.

ره‌وشا شنگالێ ته‌وه‌ره‌كێ‌ دی یێ‌ دیدارێ‌ بوو و دوپاتی ل سه‌ر پێدڤیا ئاسایبوونا ره‌وشا شنگالێ‌ و ڤه‌گه‌ریانا وه‌لاتیێن وێ‌ بۆ ده‌ڤه‌رێن وان كر.

ئه‌ڤرۆ:

نێچیرڤان بارزانی سه‌رۆكێ هه‌رێما كوردستانێ دوهی پێشوازی ل محه‌مه‌د مووش وه‌زیرێ بازرگانییا توركیا كر و په‌یوه‌ندیێن بازرگانی و ئابووری یێن هه‌رێما كوردستانێ و ئیراقێ ل گه‌ل توركیا گه‌نگه‌شه‌ كرن.

سه‌رۆكێ هه‌رێما كوردستانێ په‌یوه‌ندیێن ئابووری و بازرگانی یێن هه‌رێما كوردستانێ و توركیا ب گرنگ و ستراتیژی ل قه‌له‌مدان و پشته‌ڤانییا خوه‌ بۆ وه‌به‌رهێنان و بازرگانیا بیانی نیشاندا و ئاماده‌ییا هه‌رێما كوردستانێ بۆ پێشكێشكرنا هه‌موو ئاسانكاریێن پێدڤی بۆ بازرگانیا توركیا د گه‌ل هه‌رێما كوردستانێ و ئیراقێ نیشان دا.

وه‌زیرێ بازرگانیا توركیا خواستا وه‌لاتێ خوه‌ بۆ پێشڤه‌برنا په‌یوه‌ندیێن بازرگانی و به‌رفره‌هكرنا چالاكیێن ئابووری ل هه‌رێما كوردستانێ دوپاتكر و ئاماژه‌ ب چه‌ند نموونه‌یێن سه‌ركه‌فتی یێن وه‌به‌رهێنانا توركیا ل ده‌ڤه‌رێ‌ كر كو ب هه‌مان شێوه‌ ل هه‌رێما كوردستانێ ژی بهێنه‌ دوباره‌ كرن و ژ وێرێ‌ ژی بۆ هه‌موو ئیراقێ‌ بهێنه‌ به‌رفره‌هكرن.

هه‌ر دوهی وه‌زیرێ‌ بازرگانیا توركیا ژ ئالیێ‌ مه‌سرور بارزانی سه‌رۆكێ‌ حوكمه‌تا هه‌رێما كوردستانێ‌ ڤه‌ پێشوازی لێ‌ هاته‌ كرن و سه‌رۆكێ‌ حوكمه‌تێ‌ ئاماژه‌ ب گرنگیا پێشڤه‌برنا په‌یوه‌ندیان و هه‌ماهه‌نگیێ‌ ل گه‌ل توركیا كر و سه‌رۆكێ‌ حوكمه‌تێ‌ دوپات كر كو هه‌رێما كوردستانێ‌ هه‌رده‌م دخوازیت په‌یوه‌ندیێن باش ل گه‌ل توركیا ل سه‌ر بنه‌مایێ‌ رێز و به‌رژه‌وه‌ندییێن هه‌ڤپشك و هه‌ڤسوییه‌كا باش هه‌بن.

ئه‌ڤرۆ، سالار دۆسكی:

پشته‌ڤانی ل به‌ربژارێن پارتی دیموكراتی كوردستان ل سنورێ‌ لقێ ئێك یێ پارتی، ب به‌رهه‌ڤبوونا (سه‌ربه‌ست تروانشی) ئه‌ندامێ‌ جڤاتا سه‌ركردایه‌تیا پارتی دیموكراتی كوردستان و به‌رپرسێ‌ لقێ ئێك، دوهی ل هۆلا كونفرانسان كۆمبوونه‌كا به‌رفره‌ه ل گه‌ل هه‌ژماره‌كا مه‌زن یا مامۆستایێن دهۆكێ و به‌رپرسێن په‌روه‌ردێ‌ هاته‌ سازكرن.

سه‌ربه‌ست تروانشی، په‌یڤه‌ك پێشكێشكر و گۆت” مامۆستا فه‌رماندێن مه‌زن و هێزا ده‌ست وه‌شینا هه‌لبژارتنانن كو جۆره‌كێ دی یێ شه‌ری یه‌، ل ڤی شه‌ری له‌شكر و تۆپ و فرۆكه‌ ناهێنه‌ بكارئینان و نه‌ نڤستن و نه‌خوارن و نه‌ وه‌ستیان ژی نینه‌، هه‌لبژارتنان وه‌فاداری و ئه‌مانه‌ت و ئیراده‌ دڤێت و ئه‌و كه‌سێن دلێ وان سۆتی ب پاراستنا شه‌ره‌ف و كه‌رامه‌تا وان دێ‌ كاركه‌ن بۆ پاراستنا ڤان ده‌ستكه‌فتان”.

به‌رپرسێ لقێ سوپاسیا مامۆستایان كر كو د ده‌مێن سه‌خت و دژۆار دا وه‌ نه‌كریه‌ ده‌رگه‌هێن قوتابخانان بهێنه‌گرتن و خواندن و زانین ل ڤی باژێری بهێته‌ راوه‌ستیان كو ئه‌ڤ چه‌نده‌ نیشانێن دلسۆزی و وه‌فاداریا وانه‌ بۆ ئاخ و نشتیمانێ خوه‌، ئه‌ڤرۆ ژی بهێز و دیتن و زانینا وان دێ به‌ر ب هه‌ڵبژارتنێن چاره‌نڤیسساز چین.

سه‌ربه‌ست تروانشی، ب ناڤێ‌ جڤاتا سه‌ركردایه‌تیا پارتی و لقێ ئێك سوپاسیا مامۆستایان كر و گۆت” هوون ئه‌و بووینه‌ یێن چو جارا ملێ‌ خوه‌ نه‌چه‌ماندی ل به‌ر پیرۆزترین ئه‌رك د ڤێ‌ قه‌یرانێ‌ دا، په‌هله‌وان ل مه‌یدانا شه‌ری دا دیاردبن، هه‌كه‌ هه‌ر ئێك ژ مه‌ مافێ‌ به‌رپرسایه‌تیا خوه‌ دایێ‌ و ملله‌ت ژ خوه‌ رازیكر وی ده‌می دێ‌ بێژین ئه‌ڤه‌ په‌هله‌وانێ‌ مه‌یدانا ڤی شه‌ری یه‌، ئه‌و كه‌سێ خوه‌ ل ڤان هه‌لبژارتنان زه‌حمه‌ت دده‌ن و ب رۆلێ‌ پێشمه‌رگه‌ی رادببن و كێمتر نینه‌ چونكو ئه‌و ده‌سكه‌فتێن نوكه‌ ب ده‌ست ڤه‌ دهێن ره‌نگه‌ ب تفه‌نگێ‌ ب ده‌ست ڤه‌ نه‌هێن”.

هه‌روه‌سا گۆت” ب ده‌نگێن هه‌وه‌ دێ ده‌ستكه‌فتیا پارێزین و نه‌خشێ پاشه‌ ڕۆژێ بۆ نڤشێ داهاتی دانینن كو ئه‌ڤه‌ ژی ب تنێ د هێزا پارتی دیموكراتی كوردستان دهێته‌ دیتن، له‌وما ده‌نگدانا هه‌وه‌ بۆ به‌ربژاێن پارتی مسوگه‌ركرنا پاشه‌ ڕۆژێ یه‌”.

به‌رپرسێ‌ لقێ ئێك گۆت ژی” ملله‌تێ‌ مه‌ د قۆناغه‌كا هه‌ستیار ڕا یێ‌ ده‌رباز دبیت، دڤێت ئه‌م هه‌ست ب وان مه‌ترسیان بكه‌ین ئه‌وێن ب سه‌ر هه‌رێما كوردستانێ‌ دا دهێن، ب ده‌ستڤه‌ئینانا ده‌سكه‌فتان گه‌له‌ك یا ب زه‌حمه‌ت بوو و ئه‌ركه‌كێ‌ گه‌له‌ك پیرۆز بوو و گه‌له‌كا سه‌رێ‌ خوه‌ دانا بۆ ئازادیا ئه‌ڤرۆ ئه‌م تێدا دژین، لێ‌ ئه‌ركێ‌ ئه‌ڤرۆ یێ ب زحمه‌تتره‌، بارزانیێ‌ نه‌مر خه‌بات دكر به‌رانبه‌ر له‌شكر و تۆپ و فرۆوكان، ئه‌رێ‌ ئه‌و هێزا پێشمه‌رگه‌ی چ بوو به‌رانبه‌ر ڤێ‌ هێزا له‌شكری یا مه‌زن راوه‌ستیای؟، ئه‌و هێز ئیراده‌ و باوه‌ریا خه‌لكێ‌ كوردستانێ‌ بوو، ئانكو سه‌ركه‌فتنا مه‌ گرێدای هێز و هه‌ژمارا دوژمنان نینه‌ كا چه‌ندن، به‌لكو گرێدایه‌ ب بیر و باوه‌رێن مه‌ ڤه‌، بریارا سه‌ركه‌فتن و دوباره‌ نه‌بوونا هه‌موو كاره‌ساتێن دیرۆكی یا د ده‌ستێ‌ مه‌ دا، هه‌كه‌ مه‌ باوه‌ری هه‌بیت ئه‌م دێ‌ سه‌ركه‌ڤین و ناهێلین كاره‌سات دوباره‌ ببن”.

سه‌ربه‌ست تروانشی د په‌یڤا خوه‌ دا گۆت ژی” ده‌مه‌كه‌ ده‌ڤه‌را به‌هدینان كه‌فتیه‌ به‌ر هێرشێن دوژمنان كو كاری ل سه‌ر لاوازكرنا به‌هدینان دكه‌ن، ئه‌م قه‌ردارێن خوینا شه‌هیدانه‌، ئه‌م قه‌ردارێن سه‌رۆك بارزانی نه‌ و قه‌ردارێن خوراگریا پێشمه‌رگێ‌ كوردستانێ‌ نه‌، هه‌موو زه‌حمه‌تا مه‌ به‌رانبه‌ر دلۆپه‌كا خوینا شه‌هیدانه‌، دڤێت خوینا شه‌هیدان بكه‌ینه‌ نه‌خشه‌رێیا خوه‌ بۆ بده‌ستڤه‌ئینانا چه‌ندین ئارمانجان، شه‌ره‌فه‌ ب قه‌ناعه‌ت و باوه‌ری بریارێ‌ بده‌م شه‌هید ببم و باوه‌ریێ‌ ب شه‌هید بوونێ‌ بكه‌م وی ده‌می هه‌كه‌ مه‌ كار كر دێ‌ به‌هدینان پارێزین، ده‌ڤه‌را به‌هدینان هێزێ‌ ده‌ته‌ ملله‌تێ‌ كورد هه‌موویێ‌ ل هه‌ر چار پارچێن كوردستانێ‌، مه‌ ئه‌زموونێن درێژ ل شه‌رێ‌ پاراستن و به‌رگێریا ده‌سكه‌فتان دا یێن هه‌ین و گه‌له‌ك جاران هه‌كه‌ خه‌لكێ به‌هدینان نه‌بان، دا كاره‌ساتێن مه‌زن رووده‌ن، له‌وما هه‌موو كوردستانێ‌ چاڤ ل سه‌رۆك بارزانی و به‌هدینانه‌… دوژمنێن پارتی ب هه‌می رێیان ده‌ستێن خوه‌ كرینه‌ تێكدا ب وێ‌ مه‌ره‌مێ‌ خه‌لكێ‌ به‌هدینان ب خاپینن و ده‌نگان بده‌نه‌ وان و بچنه‌ به‌غدا بێژن ئه‌م نوونه‌رێن كورداینه‌، به‌لێ ئه‌و ژ هه‌ژی نینن نوونه‌رێن تاخه‌كێ‌ كوردستانێ‌ یان گونده‌كی كوردستانێ‌ بن و دڤێت ب وێ‌ باوه‌ریێ‌ كار بكه‌ین”.

مامۆستایێن ئاماده‌بووی سوپاسیا به‌رپرسێ لقێ كر و دا دیاركرن مه‌ ژمێژه‌یه‌ سۆز د گه‌ل ئاخ و رێباز و پارتا خوه‌ داینه‌ كو كه‌سانێن وه‌فادارین بۆ ڤێ رێ و د ڤان هه‌لبژارتنان دا وه‌كو هه‌لبژارتێن بۆری دێ سه‌ركه‌فتنێ تۆمار كه‌ین.

ئه‌ڤرۆ:

كۆمبوونا جڤاتا سه‌ركردایه‌تیا پارتی دیموكراتی كوردستان دوهی سێشه‌مبی 21/9/2021 هاته‌ ئه‌نجامدان، په‌یڤدار و ئه‌ندامێ مه‌كته‌با سیاسی یا پارتی، راگه‌هاند” د كۆمبوونێ دا، سه‌رۆك مه‌سعود بارزانی داخواز ژ مه‌ كر ل ده‌مێ هه‌وا هه‌لبژارتنان دا د نه‌رم و ئارام بین هه‌روه‌سا ئاماژه‌ كر كو نابیت هه‌لبژارتن ب شێوازه‌كێ ئیستیفزازی و گرژی بیت”. په‌یڤدارێ پارتی ئاماژه‌ كر ژی كو ترسا ئه‌ره‌ب و توركمانان ژ زڤرینا پارتی بۆ كه‌ركووكێ، ڤه‌ژاندنا كوردایه‌تیێ یه‌ ل وی باژێری.

پشتی ب دووماهی هاتنا كۆمبوونا جڤاتا سه‌ركردایه‌تیا پارتی، مه‌حموود محه‌مه‌د په‌یڤدار و ئه‌ندامێ مه‌كته‌با سیاسی یا پارتی د كۆنفرانسه‌كێ رۆژنامه‌ڤانی دا گۆت” كۆمبوونه‌كا ئاسایی یا جڤاتا سه‌ركردایه‌تیا پارتی بوو، سه‌باره‌ت ره‌وشا سیاسی و هه‌لبژارتنان دانوستاندن هاتنه‌ كرن”.

ل دۆر وێ چه‌ندێ ئایا سه‌رۆك بارزانی د كۆمبوونا جڤاتا سه‌ركردایه‌تیا پارتی دا چ په‌یامه‌ك هه‌بوو، مه‌حموود محه‌مه‌د گۆت” بزاڤكرن بۆ وێ ئێكێ هه‌وا هه‌لبژارتنان ب شێوازه‌كێ ئیستیفزازی و گرژی نه‌بیت و د نه‌رم و ئارام بین، به‌لێ كارێ خوه‌ ئه‌نجام بده‌ین ل هه‌موو جهه‌كی كو پێدڤی دكه‌ت”.

سه‌باره‌ت به‌رهه‌ڤیێن پارتی بۆ پشتی ئه‌نجامدانا هه‌لبژارتنان، مه‌حموود محه‌مه‌د گۆت” مه‌ به‌رهه‌ڤیێن خوه‌ د كارنامه‌كێ دای ێن به‌لاڤكرین كو دخوازین پشتی هه‌لبژارتنان چاوان حوكمرانیا ڤی وه‌لاتی بهێته‌ كرن، ژ روویێ سیاسی و جڤاكی و ئابووری و نیشتمانی و نه‌ته‌وی كو هه‌موو هاتیه‌ دیاركرن، ئه‌وژی دزڤریت سه‌ر وێ چه‌ندێ كیش لایه‌ن نێزیكی بۆچوونێن مه‌یه‌ كو دشیاندایه‌ لێكتێگه‌هشتن بهێته‌ كرن كو حوكمه‌ته‌ك بیت ل ئاستێ قۆناغا نوكه‌ دا بیت، چونكه‌ ب راستی پێدڤی ب رێكخستنه‌كا ئێكجار زۆر هه‌یه‌ ل ئاستێ هه‌موو داموده‌زگه‌هێن حوكمرانیا ئیراقێ ب تایبه‌تی د بابه‌تێ هه‌ڤپشكی و هه‌ڤسه‌نگی و لهه‌ڤهاتنێ كو ئه‌ڤ بابه‌ته‌ یێن هاتینه‌ پێشێلكرن و پێدڤیه‌ دووباره‌ بهێته‌ دارێژتن كو ب شێوازه‌كی بیت هه‌موو پێكهات ژ روویێ نیشتمانی و ئایینی پشكدار بنن د حوكمرانیا ڤی وه‌لاتی دا”.

ل دۆر پێشبینیا پارتی بۆ هه‌لبژارتنێن ڤێ جارێ چیه‌ سه‌باره‌ت هه‌ژمارا كورسیێن دێ بده‌ستڤه‌ئینیت، گۆت” ل ڤێرێ مه‌به‌ست كورسی و هژمارا كورسیان نینه‌، پێشبینیا وێ ئێكێ دكه‌ین كو دێ پێگه‌هێ خوه‌ پارێزین و به‌ر ب زێده‌تر دێ چین، گاڤێن مه‌ ژی بۆ وێ چه‌ندێ نه‌ هه‌م پێگه‌هێ خوه‌ بپارێزین و هه‌م به‌ر ب زێده‌تر ژی بچین”.

ئه‌وژی به‌حسكر، كو به‌ربژارێن پارتی دیموكراتی كوردستان ل ده‌ڤه‌رێن كوردستانی یێن ده‌رڤه‌ی ئیدارا هه‌رێما كوردستانێ، تووشی كێشان بووینه‌ ژلایێ كه‌سێن نه‌به‌رپرس به‌رامبه‌ر ره‌وشێ، وه‌كو دراندنا پۆسته‌رێن وان و هنده‌ك جاران ژی رێگرتن ل به‌ربژارێن مه‌، پێدڤیه‌ ژی ئه‌ڤ چه‌نده‌ بهێته‌ چاره‌كرن كو هنده‌ك ژوان چاره‌سه‌ری بۆ هاتیه‌ كرن.

په‌یڤدارێ پارتی، ترسا ئه‌ره‌ب و توركمانێن كه‌ركووكێ ژ زڤرینا پارتی بۆ وی باژێرێ، بۆ وێ چه‌ندێ ڤه‌گه‌راند، ده‌مێ ریه و ریشالێن كوردایه‌تیێ ل وی باژێری نه‌هێلاین، ب زڤرینا پارتی، دێ زیندی بن وهێنه‌ ڤه‌ژاندن، له‌وما ژی ئه‌و دژی زڤرینا پارتی نه‌ بۆ وان ده‌ڤه‌ران، هه‌ڤده‌م ترسا وان ژ وێ چه‌ندێ یه‌ ژی كو پێگه‌هێ وان د حوكمه‌تێ دا لاواز ببیت.

دووپاتكر ژی” كه‌ركووك چ ب سه‌ر هه‌رێما كوردستانێ ڤه‌ بیت، یان نه‌، باژێره‌كێ كوردستانی یه‌ و بلا مادێ 140 یێ دستووری ی هه‌موو برگێن خوه‌ڤه‌ بهێته‌ بجهئینان، پارتی دێ رێزێ ل ئیرادا خه‌لكێ باژێرێ كه‌ركووكێ گریت كو چ و چاوان بریارێ بده‌ن”.

ئه‌ڤرۆ:

جێگرێ سه‌رۆكێ پارتی دیموكراتی كوردستان، نێچیرڤان بارزانی د داخۆیانیه‌كا رۆژنامه‌ڤانی دا، به‌حسێ هه‌لبژارتنێن جڤاتا نوونه‌رێن ئیراقێ و پێدڤیا پشكداریا ده‌نگده‌ران تێدا ب مه‌به‌ستا پاراستن و گره‌نتیكرنا مافێ هه‌رێما كوردستانێ ل به‌غدا دكه‌ت.

نێچیرڤان بارزانی، جێگرێ سه‌رۆكێ پارتی دیموكراتی كوردستان، گۆت” هه‌لبژارتنێن داهاتی گه‌له‌ك د گرنگن بۆ هه‌موو كوردستانێ و ب تایبه‌تی بۆ گره‌نتیكرنا ئه‌و ده‌ستكه‌فتێن كو هه‌رێما كوردستانێ و كوردان ل به‌غدا هه‌ین، ژ ڤێ روانگه‌هێ پارتی ب هه‌موو شێوه‌كی خوه‌ بۆ ڤان هه‌لبژارتنان به‌رهه‌ڤ كریه‌، چونكه‌ مه‌به‌ست ژ ڤان هه‌لبژارتنان و پشكداریا كارا بۆ پاراستنا ده‌ستكه‌فتێن هه‌رێما كوردستانێ یه‌ كو بۆ وان ده‌ستكه‌فتان پارتی رۆله‌كێ سه‌ره‌كی د ڤێ پرسێ دا یێ هه‌ی و پێدڤیه‌ هه‌موو ئه‌ندام و لایه‌نگرێن پارتی ب شێوه‌كێ جدی پشكداریێ دڤان هه‌لبژارتنان دا بكه‌ن و پشكداریا هه‌ر ده‌نگه‌كی گره‌نتیكرنا وان ده‌ستكه‌فتانه‌ و به‌ر ب پێشڤه‌برنا وانه‌ د ئیراقێ دا”.

سه‌باره‌ت زڤرینا پارتی بۆ كه‌ركووكێ و میكانیزما زڤرینا پارتی، گۆت” باره‌گایێن پارتی ل كه‌كووكێ دێ هێنه‌ ڤه‌كرن، به‌لێ پرسا كه‌ركووكێ گه‌له‌ك ژ ڤه‌كرنا باره‌گایه‌كی مه‌زنتره‌ و پێدڤی ب چاره‌سه‌ریه‌كێ یا هه‌ی كو د چارچۆڤێ ئیراقێ دا بۆ بهێته‌ دیتن ژوان ژی پێدڤیه‌ مادا 140 بهێته‌ بجهئینان”.

سه‌باره‌ت په‌یوه‌ندیێن د ناڤبه‌را هه‌ولێرێ و به‌غدا، نێچیرڤان بارزانی گۆت” په‌یوه‌ندیێن هه‌ولێرێ و به‌غدا دباشن، به‌لێ هه‌كه‌ مه‌به‌ست ئه‌وه‌ كو ئایا هیچ كێشه‌ك یان ئه‌و كێشێن هه‌تا نوكه‌ هه‌ین هاتینه‌ چاره‌سه‌ركرن؟ نه‌خێر، هه‌تا نوكه‌ نه‌هاتینه‌ چاره‌سه‌ركرن، ب وێ هیڤیێ نه‌ كو پشتی هه‌لبژارتنان ئه‌و كێشێن هه‌تا نوكه‌ ماین چاره‌سه‌ری بۆ بهێته‌ دیتن”.