ئەڤرۆ:
جێگرێ سەرۆکێ پەرلەمانێ کوردستانێ راگەھاند، سەپاندنا ھەر بریارەکێ ل دەرڤەی سازانێ کو یا گرێدای پرس و رەھندێن نیشتمانی ڤەبیت، ب نەقانوونی و نە شەرعی دزانین و پێدڤیە سەرۆکایەتیا پەرلەمانی و پەرلەمانتار ژ وێ پێداگیریا نەئاسایی ب خوەدا بچن و پرنسیبێ سازانێ کو بەری نوکە مە کارپێکریە، ب بنەما بگرن.
جەعفەر ئیبراھیم جێگرێ سەرۆکێ پەرلەمانێ کوردستانێ و ئەندامێ مەکتەبا سیاسی یا پارتی دیموکراتی کوردستان پشتی پشکداری د کۆمبوونا دوھی یا پەرلەمانێ کوردستانێ دا کری، ل دۆر روونشتنا نەئاسایی یا پەرلەمانی یا گرێدای راستڤەکرنا قانوونا سەرۆکاتیا ھەرێما کوردستانێ، بۆ دەزگەھێن راگەھاندنێ گوت” لژنا بەرھەڤکرنا دستووری بۆ راپرسیێ کو لایەنێن سیاسی بریار ل سەر دابوو ب سازان بیت، ھەتا نوکە یا کارێ خوە ئەنجام ددەت، باشە چاوان دبیت پرسا سەرۆکاتیا ھەرێمێ ب سازان نەبیت و ب پرنسیبێ زۆرینە و کەمینە بھێتە ئێکلاکرن؟”.
جەعفەر ئیبراھیمی گوت ژی” ھەکە روونشتنا نەئاسایی یا پەرلەمانی بھێتە کرن ژی، ب دیتنا مە یا قانوونی نینە، چونکی ھەر بزاڤەک ژ پەرلەمانی ھەبیت، پێدڤیە بۆ بەرژەوەندیا گشتی بیت، پەرلەمان بەری نوکە ژی جھێ تەوافوقێ بوو و دخوازین نوکە ژی بۆ پرەنسیبێ تەوافوقێ بزڤرین”.
جێگرێ سەرۆکێ پەرلەمانێ کوردستانێ زێدەتر گوت” پرسا قانوونی و نەقانوونی ب نیسابێ ناھێتە دەربازکرن، چونکی ئەڤە پرسەکە و ئەم ھەموو دزانین ب سازان یا ھاتی، ل دەمێ ھەلبژارتنا سەرۆکێ پەرلەمانی ژی، مە ھەر ب سازانێ کارکر، لەوما ھەر بزاڤەکا ژ دەرڤەی سازانێ شەرعیەتێ وەرناگریت”.
ب دیتنا جەعفەر ئیبراھیمی بزاڤا ھندەک لایەنان بۆ نێزیککرنا بیر و بۆچوونێن جدا جودا کو ھێشتا د بەردەوامن د پێدڤی و جھێ پیتەپێدانێ نە و گوت” مە ئەزموون یا ھەی کو چو پرسەک بێ ساوان سەرناگریت، ب دیتنا مە پێدڤیە سەرۆکاتیا پەرلەمانی یا بێ لایەن بیت، باشە بۆچی د پرسا دستووری دا، ھەتا دووماھی رۆژ بزاڤا بێ لایەنیێ دکر و بریار ھاتە دان کو لژنا بەرھەڤکرنا دستووری بۆ راپرسیێ یا بێ لایەن بیت؟ وبۆچی پرسا سەرۆکاتیا ھەرێما کوردستانێ ژ دەرڤەی سازانێ بیت؟ لەوما باوەری و دیتنا مە ئەوە سەرۆکێ پەرلەمانی دڤێ پرسێ دا یێ سەرکەفتی نەبوو، دیسا یێ سەرکەفتی نەبوو د ڕەفتارکرنێ دا ل سەر ڤێ پرسێ”.
سەبارەت ئەگەرێ ئەنجامدانا روونشتنا نەئاسایی یا پەرلەمانێ کوردستانێ کو چەند لایەنەک ب بێ بەرھەڤبوون و نەرازیبوونا فراکسیۆنا پارتی دیموکراتی کوردستان، جێگرێ سەرۆکێ پەرلەمانێ کوردستانێ دبێژیت” راستڤەکرنا قانوونا سەرۆکاتیا ھەرێما کوردستانێ بھێتە پەسەندکرن، یان نە، ئومێدا مە ئەوە پەرلەمانتار بۆچوونا خوە ل سەر ھەڤپشکەکێ بنەرەتی دا نەسەپینن، چونکی ژ دەرڤەی سازانێ یە و شەرعیەت نابیت و ئەم دانپێدانێ پێ ناکەین، لەوما پێدڤیە ھزر د وێ چەندێ دا بکەن کا دێ چاوا شێن سەقامگیریێ چەسپینن و ئاشتیا جڤاکی پەیداکەن، ھەر قانوونەکا دەربکەڤیت ژی، کو یا گرێدای ھەر پرسەکا رەھندا نیشتمانی ھەبیت و بێ سازان بریار ل سەر بھێتە دان، ل دەف مە دێ چیتە د خانا نەشەرعیەتێ دا”.
جەعفەر ئیبراھیم دووپاتی ل سەر وێ چەندێ کر کو “بزاڤێن مە د سیاسی نە و د چارچۆڤێ قانوونێ دانە، لەوما بلا کەس بۆ وێ چەندێ نەچێت کو پارتی دیموکراتی کوردستان بەرۆڤاژی قانوونێ سیاسەتێ دکەت”.

ئه‌ڤرۆ نیوز:
ئه‌ڤرۆ ل باژێرێ دهۆكێ پێكهاتێن جودا جودا د یاداشته‌كێ دا داخوازا سازا لایه‌نێن سیاسى یێن هه‌رێما كوردستانێ كرن ل دۆر پرسا سه‌رۆكایه‌تیا هه‌رێما كوردستانێ.
مه‌ریوان كو ئێك ژ رزگاربوویێن ئه‌نفالێ یه‌ و خه‌لكێ گه‌رمیانه‌ پاداشت خواند و ئاماژه‌ ب گرنگیا پاراستنا ئه‌زموونا هه‌رێما كوردستانێ كر و گۆت” داخوازێ ژ لایه‌نێن سیاسیى دكه‌ین به‌رژه‌وه‌ندیا گشتى بئێخنه‌ ل سه‌ر به‌رژه‌وه‌ندیێن حزبى و كه‌سوكى و ڤه‌گه‌رنه‌ سه‌ر مێزا دانوستاندنان و ل سازانێ ل سه‌ر پرسا سه‌رۆكایه‌تیا هه‌رێمێ بكه‌ن”.
سه‌رۆكێ لقێ دهۆك یێ ئێكه‌تیا زانایێن كوردستانێ مه‌لا ئێحسان رێكانى د په‌یڤه‌كێ دا ل پێش ماموستایێن ئاینى ( موسلمان و مه‌سیحى و ئێزدیان) گوتى” ئه‌گه‌ر ئێك ده‌مژمێر پێشمه‌رگه‌ به‌رۆكێن شه‌رى بجهـ بهێلێت دێ چاره‌نڤیسێ هه‌رێما كوردستانێ یێ نه‌دیار بیت، له‌وا دڤێ قوناغێ دا مانا سه‌رۆك بارزانى د پۆستێ سه‌رۆكایه‌تیا هه‌رێمێ دا ب گرنگ دبینین و بلا كێشێن هه‌رێمێ ب سازان بهێنه‌ چاره‌كرن”.

ئه‌ڤرۆ نيوز:

رێڤەبەرێ ساخلەمیا قەزا زاخۆ بۆ ئەڤرۆ دیار کر کو ب ئامادەبوونا بەرپرسێ لقێ ھەشت یێ پارتی دیموکراتی کوردستان ل زاخۆ و رێڤەبەرێ گشتیێ ساخلەمیا دھۆکێ و قایمقامێ قەزا زاخۆ دوھی ١٦-٨-٢٠١٥ بۆ جارا ئێکێ سەنتەرێ قەستەرا دلی ل نەخۆشخانا ٢٠٠ تەختی یا گشتیا زاخۆ ھاتە ڤەکرن، وەکو دەستپێک حەفتیێ دو ھەتا سێ نەخۆشان دێ لێ ھێنە چارەکرن.
د. نزار عسمت تەیب، رێڤەبەرێ گشتیێ ساخلەمیا پارێزگەھا دھۆکێ د رێورەسمێن ڤەکرنا وێ دا ئاشکرا کر، پلان بوو نەخۆشخانا ٢٠٠ تەختی یا بێدارێ د ئاستەکێ گەلەک بلند دا دەست پێ بکەت و کۆمپانیەکا بیانی ب رێڤەببەت، لێ ژ ئەگەرێ قەیرانا دارایی یا ھەرێمێ ئەڤ چەندە بجە نەھات، ژ بەر ھندێ ژی کار ل ھەموو پشکێن وێ ھەتا ڕادەکی پاشڤەچوو، و گۆت: “ھێدی ھێدی ئەم یێ بزاڤان دکەین کو ھەموو پشکێن وێ کاربکەن، حوکمەتا ھەرێمێ سالا بۆری ٤٠٠ پلێن دامەزراندنێ دابوونە ساخلەمیا دھۆکێ و ١٠٠ ژ وانا بۆ زاخۆ بوون”.
رێڤەبەرێ گشتیێ ساخلەمیا دھۆکێ گۆتژی: “مە ل بەرە ١٠٠ پلێن دیژی یێن دامەزراندنێ بدەینە زاخۆ، دا کو ب ڤێ رێیێ بشێین ئەو پشکێن ماین ژی بێخینە د کاری دا و ئەو نەخۆشخانە ھەموو خزمەتێن ساخلەمیێ پێشکێشی خەلکێ قەزا زاخۆ بکەت، کو خەلکێ وێ ئێدی پێدڤی چو پارێزگەھێن دی نەبیت و ل زاخۆ ب خوە ھەموو خزمەتێن ساخلەمیێ ھەبن”.
د. عسمەت خویا ژی کر، کۆمەلگەھا خێلەخێ یا سەر ب قەزا زاخۆ ڤە بنگەھەکێ ساخلەمیێ و دێ خزمەتێن پێشکەفتی پێشکێشی چەندین کۆمەلگەھێن ل وێ دەڤەرێ کەت.
د. قەرەنی سەعید، رێڤەبەرێ ساخلەمیا قەزا زاخۆ بۆ ئەڤرۆ ئاشکرا کر، ھەر دوھی بنگەھێ ئەحمەدێ خانی یێ ساخلەمیێ ژ جۆری A ل کۆمەلگەھا خێلەخێ ھاتە ڤەکرن و گۆت: “ئو بنگەھە ب کۆژمێ ملیارەک و ٨٩ ملیۆن و ٩٤٠ ھزار دیناران ل سەر گەشەپێدانا ھەرێمان یا سالا ٢٠١٣ ھاتیە ئاڤاکرن”.
قەرەنی دا زانین ژی کو بەری نوکە سێ کارمەند بۆ سەنتەرێ دلی ھاتبوونە مەشقدان و د گەل نۆشدارێن دھۆکێ دێ نشتەگەریێن دلی ل زاخۆ بۆ نەخۆشان ئەنجام دەن و گۆت: “ل حەفتیا بۆری بۆ جارا ئێکێ نشتەگەریا قەستەرا دلی بۆ دو نەخۆشان ل زاخۆ ھاتینە کرن، وەکو دەسپێک ژی ھەر حەفتیەکێ دو ھەتا سێ نەخۆشان دێ ل سەنتەرێ قەستەرا دلی ل زاخۆ ھێنە چارەکرن”.