ئه‌ڤرۆ نيوز:
چه‌ند ده‌سته‌يه‌كێن يه‌كينێن پاراستنا گه‌ل YPG چوونا ناڤ گرێ سپى و دهێته چاڤه‌رێكرن د ماوه‌كێ كێم دا باژێر بهێته كونترۆلكرن.
سپێده‌هيا ئه‌ڤرۆ رۆژا ئێكشه‌مبى رێكه‌فتى 14ى خزيرانا 2015ێ YPG چوو ناڤ باژێرێ گرێ سپى يێ د ناڤبه‌ر هه‌ردو كانتۆنێن جزيرێ و كۆبانێ دا ل رۆژئاڤايێ كوردستانێ و دهێته چاڤه‌رێكرن د 24 ده‌مژمێرێن داهاتى دا، هێزێن YPG و بۆركانا فورات، ژ لايێ دى يێ كۆبانێ ل گه‌ل هێزێن دى يێن YPG ل لايێ جزيرێ و سه‌نته‌رێ گرێ سپى ئێك بگرن.
ئەڤرۆ نیوز:
سەروکێ لژنا دارایی و ئابووری ل پەرلەمانێ کوردستانێ تایبەت بۆ ئەڤرۆ دیارکر،ھەرێما کوردستانێ ل ھەردو ھەیڤێن چار و پێنج نەفت زێدەتر ھنارتییە ب رێیا کۆمپانیا سۆمۆ، لێ ھەر بەغدا پێگیری ب رێکەفتنێ نەکریە و نیڤا وی پارەی بۆ ھەرێما کوردستانێ رەوانەکریە، لەورا دڤێت ھەرێما کوردستانێ پلانا خوە یا دویێ ھەبیت و چونکی ئێدی نە حوکمەت و نە خەلک نەشێن چاڤەرێی بەغدا بن،ژبەر گیروکرنا پارەی و نەدانا بۆدجێ.
د.عزەت سابر سەرۆکێ لژنا دارایی و ئابووری ل پەرلەمانێ کوردستانێ ئەو چەندە ژی خویاکر ئەڤێ چەندێ کارتێکرنەکا نەرێنی کریە سەر سەدان پرۆژێن حوکمەتا ھەرێمێ و راوەستیاینە و خەلک ژی بێزاربوویە ژێ، ئەگەر ھەیڤا شەش ژی حوکمەتا عێراقێ وەکی ھەیڤێن چار و پێنج بکەت، وی دەمی وەکو پەرلەمانێ کوردستانێ دێ داخوازێ ژ حوکمەتا ھەرێمێ کەین کو سەربەخویا ئابووری رابگەھینیت و نەفتا خوە ئێدی ب رێیا حوکمەتا ھەرێمێ رەوانەی دەرڤە بکەت.
ناڤھاتی ئەو چەندە ژی گۆت:پلانا سەربەخۆیا ئابووری ئەوا ل ھەرێما کوردستانێ ھەیی بەس نینە،لەورا دڤێت بۆ سەربەخویا ئابووری بەرھەمێ نافخویی بھێتەزێدە کرن و ھەر چەندە گەنم ب رێژەیەکا باش ھەیە و ژ پێدڤیا خەلکێ پترە،لێ بەرھەمێن دی گەلەک دکێمن و تێرا خەلکێ ھەرێمێ ناکەن، ئاسایشا خوارنێ ب پارێزین و تێرا خوە خوارنێ ژ نافخویا خوە پەیدا بکەین، حوکمەتا ھەرێمێ گرنگیێ ب ئابوورێ نافخو بدەت و کەرتێ چاندنێ و پیشەسازی بێختە کار و ئابوورێ وەلاتی پێش بێخیت،داکو ئەم پێدڤی وەلاتێ تورکی و ئیرانێ نەبین و نەکەڤینە ژێر دەستێ وان،ھەر دەمێ ئەم شیاین ئابوورێ وەلاتێ خوە ژ نافخویا خوە دابین بکەین، ئەم دێ شێین سەربەخویا ئابووری راگەھینین و مەترسی ناکەڤنە سەر وەلاتێ مە.
سەرۆکێ لیژنا دارایی و ئابووری ل پەرلەمانێ کوردستانێ ئەو چەند ژی گوت:ھەر دەمێ حوکمەتا ھەرێمێ سەربەخویا ئابووری راگەھاند، عێراق دێ گەلەک ئاریشەیان بۆ ھەرێمێ دروست کەت، ھەروەسا دێ رێکەفتنان دگەل ئیران و تورکیا ژپێخەمەت کو ھاریکاری نەکرنا کوردان و دێ ب ھەموو رێکان دژایەتیا کوردان کەن.
د.عزەت سابری گۆت:ھەر دەمێ حوکمەتا ھەرێمێ نەفتا خوە ب دەستێ خوە فرۆت دێ ل دەستپێکێ بارێ دارایی یێ ھەرێمێ لاواز بیت و لێ دڤێت خەلک دگەل حوکمەتێ ھاریکار بن،چونکی حوکمەت بەرامبەر فروتنا نەفتێ دێ دۆلاری وەرگریت و نەشێت ب ڤێ رێکێ دیناران وەربگریت، ئەڤە دێ کێشە بۆ حوکمەتا ھەرێمێ دروست کەت، دێ بەغدا پێکۆلێ لسەر نەھاتنا پارێ عێراقی بۆ ھەرێمێ کەت،ھەروەسا سیستەمێ باجێ یێ سەرکەفتی نینە و ئەم نەشێن برێیا باجێ دینارێ عێراقێ کومڤە بکەین، ئەڤ گرفتە بەردەم حوکمەتا ھەرێمێ یە ھەر دەمێ سەربەخویا ئابووری رابگەھینیت.
د.عزەت سابر سەرۆکێ لژنا دارای و ئابووری ل پەرلەمانی دیارکر بۆ فروتنا نەفتێ حوکمەتا ھەرێمێ دوو گرەنتی ھەنە،ئێک دڤێت حوکمەتا تورکیا ب وێ گرێبەستێ پا بەند بیت یاکو حوکمەتا ھەرێمێ بۆ ماوێ ٥٠ سالان دگەل ئیمزاکری،یا دویێ دڤێت حکومەتا ھەرێمێ کومپانیێن مەزن ھانبدەت کو ب بھایێ ملیار دۆلاران نەفتێ ژ ھەرێمێ بکرن،بتنێ حوکمەتا ھەرێمێ ئەڤ ھەردوو گرەنتیە ھەنە و لێ دڤێت پتر کار بھێتە کرن.
ھەروەسا ناڤھاتی گوت:ئەگەر ئەم بشێین ھەیڤانە ملیونەکا بەرمیلان بفروشین ل وی دەمی ھەموو ئاریشێن حوکمەتێ چارە بن و شیێن گرفتان بدوماھی ئینین و لێ دماوێ ٢٤ سالێن بوری دا پلانا حوکمەتێ بۆ گەشەکرنا کەرتێ چاندنێ یا سەرکەفتی نەبوو،چونکە کەرتێ چاندنێ تاکە رێکە بۆ ھندێ کو پاراستنێ ل سەر سەربەخویا ئابوورێ کوردستانێ بکەت.
ئەڤرۆ نیوز:
ھەلبژارتنێن پەرلەمانێ تورکیا ھەفتێ حزیرانێ ھاتنە ئەنجامدان و چار پارتان شیان کورسیان ب دەست بخینن لێ ھیچ پارتەک نەشێت ب سەرێ خوە حوکمەتێ پێک بینیت و دو رێک ل بەردەم پارتێن سەرکەڤتی ھەنە، یا یەکێ پێک ئینانا حوکمەتەکا پر ئالی ل سەر بنگەھێ ھەڤپەیمانیا بەرفرەھە و یا دویێ ژی ئەنجامدانا ھەلبژارتنەکا پێشوەختە و ھەتا نھا ژی دەستەیا بلندا ھەلبژارتنان ئەنجامێن فەرمی یێن ھەلبژارتنێ رانەگەھاندیە، روونشتنا یەکێ یا ڤێ خولا پەرلەمانی دەستپێنەکریە.
د ڤێ دەربارێ دا موراد یێتکین رۆژنامەڤان و نڤیسەرێ ناڤدار یێ تورکیا د داخۆیانیەکی دا بۆ رۆژناما ئەڤرۆ راگەھاند کو پشتی ١٣ سالان جارەکا دی تورکیا ڤەگەریا سەردەما پێک ئینانا حوکمەتێن ھەڤپەیمان و گۆت: (گەلێ تورکیا د ھەلبژارتنێ دا دەنگ دا ھەر چار پارتیان و ژ وان خواست کو حوکمەتەکا ھەڤپشک ئانکۆ ھەڤپەیمان پێک بھینن و ل دووڤ ھزرا من دێ حوکمەت د ناڤبەرا پارتا یەکەم (AKP) و پارتا دویەم (CHP) دا ھێتە دروست کرن و ھەکە وەسا بیت دێ ھژمارا کورسیێن ھەردو پارتان بگەھیتە ٣٩٠ کورسیان و ب ئاسانی دشێن حوکمەتێ دروست بکەن و باوەریێ ژ پەرلەمانی وەربگرن و بۆ پێشەرۆژا تورکیا ژی پێکینانا حوکمەتەکا وەسا ب ھێز گەلەک باشە و دێ ئەنجامێن باش بۆ جڤاکێ ھەبن).
مورادی ھەروەسا دیار ژی کر کو سێ ئەلترناتیفێن دی ژی بۆ پێکینانا حوکمەتێ ھەیە و یا یەکێ ھەڤپەیمانیا (AKP و MHP) کو ھژمارا ھەر دویان دکەت ٣٣٨ کورسی و بۆ دروستکرنا حوکمەتێ ھژمارا وان بەسە. یا دویێ دروستکرنا حوکمەتێ ژ ئالیێ (AKP و HDP) دایە و ھژمارا وان ژی دیسان دبیتە ٣٣٨ ئەندام و یا سییێ ژی دروستکرنا حوکمەتێ ژ ئالیێ (CHP، HDP و MHP) دایە و ھژمارا وان ژی دگەھیتە ٢٩٢ کورسی دشێن حوکمەتا ھەڤپەیمان ئاڤا بکەن و گۆت: (دەمێ ئەم ل ھەر چار رێکان دنێرین یا ھەری گونجای دروست کرنا حوکمەتێ ژ ئالیێ (AKP و CHP) دایە، ژ بەر کو ھەم بۆ چارەکرنا پرسگرێکا کوردی و بەردەوامی دانا قۆناغا ئاشتیێ و ھەم ژی بۆ ب ھێز کرنا ئابووریێ و سەرەراستکرنا پەیوەندیێن ل گەل وەلاتێن جیران و ئورۆپا و ئیسرائیلێ حوکمەتەکا وەسا دشێت پێنگاڤێن مەزن ب ھاڤێژیت. لێ ژ نھا ڤە (CHP) داخوازا دادگەھکرنا چار وەزیرێن بەرێ یێ کابینا بۆری دکەت و (AKP) ژی ڤێ داخوازیێ ب دژواری رەد دکەت و (CHP) دخوازیت دو سال سەرۆک وەزیران ژ بۆ وێ و دو سال ژی ژ بۆ (AKP) بیت و ئەڤ داخوازیا (CHP) ژی ژ ئالیێ (AKP) ڤە دھێتە رەدکرن).
ل سەر پرسیارا بۆ چی (HDP) ۆ (AKP) حوکمەتێ دروست ناکەن گەلۆ حوکمەتەکا وەسا بۆ چارەکرنا پرسگرێکا کوردی و سەرخستنا قۆناغا ئاشتیێ باشتر نینە؟ موراد یێتکین راگەھاند کو (HDP) مەرجێ بەردەوامی دانا قۆناغا ئاشتیێ و ئاڤێتنا پێنگاڤان بۆ چارەکرنا پرسگرێکا کوردی وەک مەرجێ ئەساسی ددەتە بەر (AKP) و رایەدارێن (AKP) ژی دەستپێکرنا قۆناغا ئاشتیێ وەک سەدەمێ بنکەڤتن و بێ ھێزکەڤتنا خوە د ھەلبژارتنان دا نیشا ددەن و ناخوازن ب چو رەنگەکی ل گەل (HDP) حوکمەتێ دروست بکەن).
ل ئالیێ دی سەلاحەدین دەمیرتاش ھەڤسەرۆکێ (HDP) پێشنیازەک بۆ دروستکرنا حوکمەتا نوو پێشکێشێ ھەمو ئالیان دکەت و داخواز دکەت کو یان (CHP و (AKP) یان ژی (CHP و MHP) حوکمەتێ دروست بکەن و گۆت: (چ حوکمەت بھێتە دروستکرن ھەکە بەردەوامیێ بدەتە قۆناغا ئاشتیێ و پێنگاڤان بۆ چارەکرنا پرسگرێکا کوردی ب ئاڤێژن ئەم دێ ژ دەرڤەی کابینێ پشتەڤانیێ ل وان بکەین).
لێ ئەڤ پێشنیازا دەمیرتاشی ژ ئالیێ (MHP) ڤە ھاتە رەدکرن و (AKP) ژی گەلەک سار نێزیکی پێشنیازا دەمیرتاشی دبیت.
ئەڤرۆ نيوز:
شاندەکێ PKK سەرەدانا مەکتەبا سیاسی یا پارتی دیموکراتی کوردستان- ئیران کر و ل گەل شاندەکێ وێ پارتیێ کۆمبوون و د کۆمبوونێ دا پارتی دیموکراتی کوردستان – ئیران دیار کر کو دڤێتPKK ب چو رەنگەکێ رێگریێ ژ ھاتن و چوونا پێشمەرگێن مە بۆ رۆژھەلاتێ کوردستانێ نەگریت و شاندێ PKK ژی دیار کریە دێ داخوازیێن وان گەھیننە قەندیلێ.
دارا ناتق ئەندامێ سەرکردایەتیا پارتی دیموکراتی کوردستان- ئیران بۆ رۆژناما ئەڤرۆ دیار کر کو دوھی بەری نیڤرۆ شاندەکێ PKK ب سەرۆکاتیا محەمەد ئەمین پێنجوینی و دەمھات عەگید بەرپرسێ پەیوەندیێن دەرڤە یێ وێ پارتیێ سەرەدانا مەکتەبا سیاسی یا پارتیا مە کرن و گۆت: (داخوازا ھەڤدیتنێ ژ ئالیێ PKK ڤە ھاتبوو کرن و مە بەری وێ بۆ وان دیار کربوو کو بلا ئالیێ سیێ کو ئەو ژی حوکمەتا ھەرێما کوردستانێ یە تێدا پشکدار بیت، بەس وان ئەو یەک قەبوول نەکر و خواستن کو ھەڤدیتن د ناڤبەرا ھەر دو پارتیان دا برێڤە بچیت و ژ بەر ھندێ ژی وان سەرەدانا مەلتەبا سیاسی یا پارتیا مە ل کویێ کر).
ناڤھاتی د بەردەوامیا ئاخڤتنا خوە دا ئەو یەک ژی دیار کر کو د ھەڤدیتنێ دا ئەندامێن شاندێ پارتیا مە بۆ شاندێ PKK دیار کرینە کو سنۆرێ نھا د دەستێ PKK دایە نابیت ب چو رەنگەکێ وەک مولکێ وان بھێتە دیتن، چونکو ئەو سەرەدەریا وان ب چو رەنگەکێ ناھێتە قەبوول کرن و پێشمەرگێن مە دێ ھەردەم بۆ کار و خەباتا خوە دەربازی رۆژھەلاتێ کوردستانێ ببن و نابیت گەریلایێن PKK ئاستەنگیان بۆ پێشمەرگەھێن مە دروست بکەن و ئەم بارەگایێن خوە یێن ل کێلەشین و دەڤەرێن دیتر ژی چۆل ناکەین و نابیت PKK ب چو رەنگەکێ ھێرشی ھەڤالێن مە بکەت و گۆت: ( شاندێ PKK یێ کو سەرەدانا مەکتەبا سیاسی یا پارتیا مە کربوون خوەدان بریار نەبوون، ژ بەر ھندێ ژی وان دیار کر کو ئەو دێ ھەموو داخوازیێن مە بگەھیننە بەرپرسێن PKK ل قەندیلێ و پاشی دێ بەرسڤا مە بدەن و ژ بەر ھندێ ھەتا دەمەکێ دی مرۆڤ نەشێت بێژیت کا براستی ژی سەرەدانا وان دێ ئالۆزیان چارە بکەت یان نە).
دارایی ئەو یەک ژی دیار کر کو ئەم ب چو رەنگەکێ دەستان ژ داخوازیێن خوە بەرنادەین، چونکو ئەو سنۆر بەرێ جھێ پێشمەرگێن مە بووینە و نابیت پارتەکا دی یا کو دبێژیت ئەز بۆ کوردستانێ خەباتێ دکەم نھا زێرەڤانێ سنۆرێ دەولەتەکا داگیرکەر یا کوردستانێ بیت و ھەکەر ئەو بخوازن کو ھەڤدیتن بەردەوام بن و پرس ب رێیا دانوستاندنان چارە بن ئەم ژی بەرھەڤین و ھەکە وەک بەرێ داخوازا چۆلکرنا بارەگایێن مە بکەن ئەوە ژ ئالیێ مە ڤە ناھێتە قەبوول کرن و گۆت: (نھا خەلکێ کوردستانێ ب گشتی داخواز ژ مە دکەت کو ئەم ناکۆکیێن خوە ل گەل PKK دوور ژ شەری چارە بکەین، مە ژی ب جاران گۆتیە کو مە نەڤێت شەرێ چ ئالیەکێ کوردستانێ بکەین، چونکو PKK و چ پارتەکا دی یا کوردستانێ دۆژمنێ مە نینن، دەولەتێن داگیرکەرێن کوردستانێ دۆژمنێ مە نە و ئەم ھیڤیدارن کو PKK ب رەنگەکێ راست سەرەدەریێ ل گەل روودانێن نھا بکەت).
ئەڤرۆ نیوز:
وەزارەتا دارایی و ئابووری یا حوکمەتا ھەرێمێ راگەھاند کو ئەڤرۆ دێ دەست ب بەلاڤکرنا مووچێ ھەیڤا چار کەن و دێ مووچێ وەزارەتا پێشمەرگەی بەلاڤ کەن.
ئەحمەد عەبدولرەحمان پەیڤدارێ وەزارەتا دارایی ئاشکرا ژی کر کو مووچە ل دووڤ خشتێ وەزارەتێ دێ ھێنە بەلاڤکرن و گۆت: “دێ ھەموو بزاڤان کەین بەری رەمەزانێ مووچێ ھەموو وەزارەتان بدەین”.
ئه‌ڤرۆ نيوز:
ئه‌ندامه‌كا جڤاتا نوونه‌رێن عيراقێ راگه‌هاند كو كه‌ركووك ژ لايێ هێزێن پێشمه‌رگێ كوردستانێ ڤه دهێته پاراستن و چو هێزێن دى ماف نينه ژ ده‌رڤه‌يى ڤێ هێزێ ده‌سته‌لاتێن خوه د وى باژێرى دا ب كار بينيت.
ئه‌ميرا عه‌بدولكه‌ريم ئه‌نداما جڤاتا نوونه‌رێن عيراقێ ل سه‌ر پشكا كه‌ركووك بۆ مالپه‌رێ فه‌رميێ پارتى ديموكراتى كوردستان گۆت: “ماوه‌كه به‌حس ل هندێ دهێته كرن كو له‌شكر و هێزێن تايبه‌ت بۆ پێكهاتان ل كه‌ركووك دروست بكه‌ن ژ ده‌رڤه‌يى وه‌زاره‌تا پێشمه‌رگه‌يى”.
زێده‌تر گۆت: “به‌رى نوكه مه ئه‌ڤ ئه‌زمونه هه‌بوويه و هه‌ر ئێزه‌كا ژ ده‌رڤه هێزا پێشمه‌رگه‌يى كارێ خوه كربيت كێشه يێن دروست كرين ب تايبه‌ت ل كه‌ركووك”، دا زانين ژى كو ژ به‌ر وان ئه‌گه‌ران دروستكرنا هێزێ ژ ده‌رڤه‌يى وه‌زاره‌تا پێشمه‌رگه‌يى هێلا سۆره.
دا زانين ژى كو ئه‌وان كێشه ل سه‌ر حه‌شه‌د شه‌عبى نينه ل هنده‌ك ده‌ڤه‌ران بن كو پێشمه‌رگه‌يى بۆ ده‌ستنيشان كرينه و د دوورى باژێرى نه و گۆتژى: “هه‌كه پێكهاتان ژى هێزێن خوه بڤێت دروسته، به‌لێ دڤێت د رێيا وه‌زاره‌تا پێشمه‌رگه‌يى دا و لژێر چارچۆڤێ وێ بيت”.
ئه‌ڤرۆ نيوز، نيوار محه‌مه‌د سه‌ليم:
ب گۆره‌يى ئه‌و پێزانينێن ل به‌ر ده‌ستێ ئه‌ڤرۆ نيوز هه‌ين، نوكه كێشا پانزينێ ل هه‌ردو پارێزگه‌هێن دهۆك و سلێمانيێ هه‌يه و ل هه‌ولێر ژى يا سرۆشتى يه و ئه‌ندامه‌كێ په‌رله‌مانى ژى دبێژيت: “دوشه‌مبيێ لژنا پێشه‌سازى و وزه و ژێده‌رێن سرۆشتى دێ دانوستاندنێ ل سه‌ر ڤى بابه‌تى كه‌ت”.
ب گۆره‌يى وان نوچه‌يێن ميديا سلێمانيێ به‌لاڤكرن ته‌كستێ ل سه‌ر وێ چه‌ندێ دكه‌ن كو نوكه كێشا پانزينێ ل سلێمانيێ ژى سه‌رهلدايه و رۆژنامه‌ڤانه‌ك ژى ديار دكه‌ت كو چه‌ند رۆژه‌كه ل سلێمانيێ ژى ره‌نگه كێشه‌يه‌ك هه‌يه، سه‌ره‌رايى وێ چه‌ندێ كو ب ره‌نگه‌كێ رۆژانه دهێته به‌لاڤكرن، به‌لێ به‌هرا وه‌لاتيان ناكه‌ت.
هه‌رژين عوسمان، رۆژنامه‌ڤانێ پارێزگه‌ها سلێمانيێ گۆتژى: “نوكه كو مه‌غره‌به پانزين ل پانزيخانان نينه و وه‌لاتى چاڤه‌رێ نه ب گه‌هيت، به‌لێ رێڤه‌به‌ريا به‌لاڤكرنا به‌رهه‌مێن سۆته‌مه‌نيێ ژى ئاماژه ب وێ چه‌ندێ كريه كو پانزينا پێدڤى گه‌هشتيه و كێشه نامينيت”.
دا زانين ژى كو هنده‌ك جاران خه‌لك ژى دبيته ئه‌گه‌رێ ڤێ چه‌ندێ و سرايان دگرن و ل مال ژى هه‌لدگرن ژ ترسا وێ چه‌ندێ كو نه‌مينيت.
ئه‌ڤى رۆژنامه‌ڤانى نه‌ڤه‌شارت ژى كو ل سلێمانيێ پانزين ب هزار ديناران دهێته فرۆتن كو سوپه‌ر و ده‌ما په‌نزين هه‌يى ژى هه‌ر ب وى بهايى د فرۆت و هه‌نه ژى پشتى ڤێ كێشا په‌يدا بوويى كريه 950 دينار و گۆت: “دولكێن 20 ليترى يێن پانزينا ئيرانى ژى هه‌نه و ب نێزيكى 25 ديناران دهێته فرۆتن”.
قائيدى ميرۆ، په‌يامنێرێ ئه‌ڤرۆ نيوز ژى ل هه‌ولێر گۆت: “چو كێشێن پانزينێ ل هه‌ولێر نه‌ماينه و نوكه پانزينخانێن وێرێ هه‌موو د به‌تالن و وه‌لاتى بێ سرا پانزينێ دادگرن”.
حسێن عه‌لى وه‌لاتيه‌كێ هه‌ولێرێ يه بۆ ئه‌ڤرۆ نيوز ته‌كست ل سه‌ر گۆتنێن وى كر و گۆت: “نوكه ل هه‌موو پانزينخانێن پارێزگه‌ها هه‌ولێرێ پانزين دهێته فرۆتن و د ڤالا نه و كه‌س ناچيت پانزينێ وه‌ربگريت و چو پانزينخانان ژى بهايێ پانزينێ گران نه‌كرينه”.
ل پارێزگه‌ها دهۆكێ ژى نوكه ب گۆره‌يى داخۆيانيا رێڤه‌به‌ريا به‌رهه‌مێن سۆته‌مه‌نيێ ل دهۆكێ پانزينخانێن دهۆكێ ل سه‌ر دو پشكان هاتينه دابه‌شكرن و هه‌ر رۆژێ گه‌ره‌ك وه‌ردگريت و ئه‌ڤێ چه‌ندێ ژى كێشه ل دهۆكێ په‌يدا كريه و وه‌لاتيان ژى په‌نا بريه به‌ر پانزينا ئه‌هلى كو ب 950 ديناران دهێته فرۆتن.
به‌يار تاهر دۆسكى ئه‌ندامێ لژنا سۆته‌مه‌نى و وه‌زێ و ژێده‌رێن سرۆشتى ل په‌رله‌مانێ كوردستانێ بۆ ئه‌ڤرۆ نيوز گۆت: “ل وێ هيڤيێ بووين كو ل رۆژا پێنجشه‌مبى ئه‌ڤ كێشه نه‌مينيت، به‌لێ وه‌سان دياره يا به‌رده‌وامه”.
زێده‌تر گۆت: “هه‌موو دوشه‌مبيان لژنا سۆته‌مه‌نى و وه‌زێ و ژێده‌رێن سرۆشتى ل په‌رله‌مانێ كوردستانێ د روونيت و ڤێ حه‌فتيێ ژى دێ روونين و ڤێ كێشێ ژى گه‌نگه‌شه كه‌ين”.
ئه‌ڤرۆ نيوز:
به‌رى نيڤرۆيا ئه‌ڤرۆ رۆژا شه‌مبى 13ى خزيرانا 2015ێ، مه‌سعود بارزانى سه‌رۆكێ هه‌رێما كوردستانێ ب هه‌ڤالينيا شانده‌كى گه‌هشته وه‌لاتێ كوێت و ژ لايێ شێخ سه‌باح خالد ئه‌حمه‌د ئه‌لسه‌باح، جێگرێ ئێكێ يێ سه‌رۆك وه‌زيران و وه‌زيرێ ژ ده‌رڤه يێ وى وه‌لاتى هاته پێشوازيكرن.
بڕياره ته‌وه‌رێ سه‌ره‌كيێ ديدار و چاڤپێكه‌فتنێن سه‌رۆكێ هه‌رێمێ ل گه‌ل به‌رپرسێن كوێت و ئيمارات كو دێ چه‌ند رۆژان ڤه‌كێشيت، به‌رسينگگرتنا شه‌رێ تيرۆرستنێ داعش و په‌يوه‌نديێن سياسى و ئابوورى يێن هه‌رێما كوردستانێ و ئه‌وان دو وه‌لاتان بن و دانوستاندن ل سه‌ر كێشه و پێدڤيێن ئاواره و په‌نابه‌ر و هاريكاريا وان بن.
د ڤێ سه‌ره‌دانێ دا، مه‌سرۆر بارزانى شيره‌تكارێ جڤاتا ئاسايشێ و فوئاد حسێن سه‌رۆكێ ديوانا سه‌رۆكاتيا هه‌رێم و عه‌لى سندى وه‌زيرێ پلاندانانێ و سه‌لاحه‌دين بابه‌كر وه‌زيرێ كاره‌بێ و ژماره‌كا شيره‌تكاران هه‌ڤالێن شاندێ بارزانى نه.
ئه‌ڤرۆ نيوز، ئه‌ياد به‌روارى:
سه‌رۆكێ ديوانا سه‌رۆكاتيا هه‌رێما كوردستانێ راگه‌هاند سه‌رۆكێ هه‌رێما كوردستانێ بڕيار دايه هه‌لبژارتنێن گشتى بۆ سه‌رۆكاتيا هه‌رێما كوردستانێ بهێنه ئه‌نجام دان كو 20ى ته‌باخا 2015ێ هاتيه هه‌لبژارتن و ئاماژه ب وێ چه‌ندێ كريه كو سه‌رۆكێ هه‌رێما كوردستانێ ئه‌ڤ بابه‌ته ل گه‌ل هه‌موو لايه‌نان به‌حس كريه و رێ و كارێن پێدڤى ژى هاتينه وه‌رگرتن ب مه‌ره‌ما ب رێڤه‌چوونا ڤان هه‌لبژارتنان.
فوئاد حسێن سەرۆکێ دیوانا سەرۆکاتیا ھەرێما کوردستانێ د داخۆیانیەکێ دا راگەھاند” بەرێز مەسعود بارزانی سەرۆکێ ھەرێما کوردستانێ ل دووڤ قانوونا سەرۆکاتیا ھەرێما کوردستانێ ھژمار (1) یا سالا 2005ێ یا راستڤەکری ب فەرمانا ھەرێمی ھژمار (91) یا سالا 2015ێ، بریار دا ھەلبژارتنێن گشتی بۆ سەرۆکاتیا ھەرێما کوردستانێ ل رۆژا 20ى خزيرانا 2015 بھێنە ئەنجامدان.
فوئاد حسێنی گوت ژی” سەرۆک بارزانی د فەرمانا خوەدا ھەموو لایەنێن پەیوەندیدار راسپاردن بۆ وەرگرتنا بەرھەڤیێن پێدڤی بۆ ب رێڤەبرنا پرۆسا ھەلبژارتنان ب شێوەکێ دیموکراتی و ئازاد و ل بەرچاڤ وەرگرتنا ھەموو قانوونێن پەیوەندیدار و پەیرەوکرنا گشت ستاندەرێن جیھانی یێن گرێدای وێ چەندێ”.
ئه‌ڤرۆ نيوز، قائيد ميرۆ:
ئەندامەکێ پەرلەمانێ کوردستانێ ئاماژە ب وێ چەندێ دکەت، د ناڤبەرا ھەردو وەزارەتێن دارایی و ناڤخۆ دا 30 ملیار دینارێن ئاوارەیێن ژ ئیرانێ ڤەگەڕیای ھاتینە خوارن.
سۆران عومەر، ئەندامێ پەرلەمانێ کوردستانێ بۆ ئەڤرۆ نیۆز راگەھاند: “من دووڤچوونا وان 50 ملیار دیناران کریە، کو پێدڤی بوو ل سالا 2013ێ وەکو قەرەبوو حوکمەت بدەتە ئاوارەیێن ژ ئیرانێ ڤەگەڕیاين، بەلێ دەرکەفتیە د ناڤبەرا ھەردو وەزارەتێن نافخۆ و دارایی دا 10 ملیار دینار دیار نینن”.
سۆرانی دیارکر ژى كو وەزارەتا دارایی دبێژیت مە 30 ملیار بۆ قەرەبوویا ئاوارەیان داینە نافخۆ، بەلێ وەزارەتا نافخۆ دبێژیت 20 ملیارن، ژبلی 20 ملیارێن دی پێدڤی بوو بدەنە ئاوارەیان 20 ملیارێن دیژی ھاتینە خوارن.
نيشاندان