NO IORG
نووترين نووچه
نوچێن گرنگ

ئه‌ڤرۆ:

لقێ 17 یێ پارتی دیموكراتی كوردستان ل شنگالێ ل دۆر ئالۆزیێن رۆژێن بۆری ل قه‌زا شنگالێ به‌یاننامه‌ك به‌لاڤكر وتێدا هاتیه‌ پشتی پیلانا 16 ئۆكتۆبه‌را 2017 پێشمه‌رگێن پارتی ل سه‌ر داخوازا خه‌لكێ شنگالێ و بۆ وێ چه‌ندێ شه‌ر نه‌كه‌ڤیته‌ دناڤ قه‌زا شنگالێ دا و گرفت دروست نه‌بن، پاشڤه‌چوون.

لقێ 17 یێ پارتی د به‌یانناما خوه‌ دا دبێژیت” ل دۆر ره‌وشا شنگالێ و ئه‌و نه‌هامه‌تیا ب سه‌ر خه‌لكێ خوه‌شتڤیێ شنگالێ دا هاتی، ژ ئالیێ هنده‌ك ئالیێن نه‌ به‌رپرس دیسان موزایه‌دات دژی پارتی دووپاره‌ دبن، ل ڤێرێ دئینینه‌ بیرا هه‌موو ئالیه‌كی كو خه‌لكێ شنگالێ ب خوه‌ دیده‌ڤانێن وێ چه‌ندێ نه‌ كێ بۆ شنگالێ قوربانی و خوین دایه‌. ل ده‌مێ هێرشا تیرۆرستێن داعشێ ل سه‌ر شنگالێ هه‌موو ئه‌و هێز و ئالیێن موزایه‌دا دكه‌ن ب ئێكه‌تی و PKK  و حوكمه‌تا ئیراقێ ڤه‌ ل شنگالێ بوون، كه‌س ژوان به‌رگری ژ شنگالێ نه‌كر و تنێ پارتی به‌رگری كر و خوین دا. د پرۆسا ئازادكرنا چیایێ شنگالێ و رێیێن شنگالێ ل هه‌یڤا كانوونا ئێكێ 2014 و ل ئۆپه‌راسیۆنا ئازادكرنا شنگالێ ل چریا دوویێ 2015 پارتی و پێشمه‌رگێن پارتی بوون ب تنێ و ب خوینا خوه‌ شنگال ئازادكر و تۆله‌ ژ تیرۆرستێن داعشێ ڤه‌كر”.

دیاركر ژی” پشتی پیلانا 16 ئۆكتۆبه‌را 2017 ژی پێشمه‌رگێن پارتی ل سه‌ر داخوازا خه‌لكێ شنگالێ و بۆ وێ چه‌ندێ شه‌ر نه‌كه‌ڤیته‌ د شنگالێ دا و د ناڤبه‌را شنگالیان دا گرفت دروست نه‌بن، ل شنگالێ پاشڤه‌چوون ب وی مه‌رجی كو خه‌لكێ شنگالێ ب خوه‌ كاروبارێن خوه‌ ب رێڤه‌ببه‌ن و ئارمانجا پارتی ژی ئه‌وبوو ده‌لیڤه‌ ب ئاكنجیێن شنگالێ بهێته‌ دان كو ب خوه‌ حوكمرانیا خوه‌ بكه‌ن، به‌لێ حوكمه‌تا ئیراقێ بوو سۆزێن خوه‌ پێشێلكرین و شنگال دایه‌ ده‌ستێ قه‌ده‌رێ و حوكمێ چه‌كدارێن PKK و میلیشیێن نه‌ قانوونی كو كارێ وان تنێ قه‌چاخ و مادێن بێهۆشكه‌ر و رێگرتن ل ڤه‌گه‌راندنا ئاواران و یاریكرن ب چاره‌نڤیسێ شنگالێ بوو”.

لقێ 17 یێ پارتی د به‌یانناما خوه‌ دا خویا دكه‌ت” هه‌موو ئالیه‌ك وێ راستیێ باش دزانن ژ ئه‌گه‌رێ داخوازی و حه‌زا خه‌لكێ شنگالێ، پارتی ژ شنگالێ پاشڤه‌چوو ئه‌گه‌ر نه‌ كا چاوان پارتی ل پردێ و سحێلا دفنا چه‌كدار و میلیشیان شكاند دا وه‌سا دفنا ده‌ست درێژكاران و چه‌كدار و قه‌چاخچیان ل شنگالێ شكێنیت”.

زێده‌تر تێدا هاتیه‌”ل ده‌ف پارتی چاره‌نڤیسێ خه‌لكێ شنگالێ و ڤه‌گه‌راندنا ئاواران و جهگیربوونا ژیان و سه‌قامگیریێ بۆ خه‌لكێ شنگالێ كارێ سه‌ره‌كیه‌، ئه‌و هه‌مان ئه‌و سیاسه‌تا دروسته‌ كو به‌رژه‌وه‌ندیا شنگالیان دخوازیت و خه‌لكێ خوه‌شتڤیێ شنگالێ ژی گه‌له‌ك ب باشی د وێ سیاسه‌تا پارتی دگه‌هن و پشته‌ڤانیێ لێ دكه‌ن و به‌لگه‌ ژی ل سه‌ر وێ چه‌ندێ هه‌لبژارتنێن ئۆكتۆبه‌را بۆری ل ئیراقێ كو خه‌لكێ شنگالێ تنێ ده‌نگ ب پارت یدا و پارتی بوو كورسیێن شنگالێ بده‌ستڤه‌ئیناین”.

د دووماهیا به‌یاننامێ دا هاتیه‌” ب دیتنا پارتی دیموكراتی كوردستان پێدڤیه‌ ره‌وشا شنگالێ بهێته‌ ئاسییكرن و هێزێن نه‌ قانوونی و قه‌چاخچی و میلیشیا ژ شنگالێ ده‌ركه‌ڤن و پێدڤیه‌ بله‌ز ده‌لیڤه‌ بۆ ڤه‌گه‌راندنا ئاوارن بهێته‌ دان و شنگال بۆ خه‌لكێ ره‌سه‌نێ شنگالێ ڤه‌گه‌ریت و پارتی نه‌شێت ئێدی چاڤه‌رێی وێ ئێكێ بیت خه‌لكێ شنگالێ دبن گه‌ف و ئاواره‌یێ دا بژیت و یاری ب چاره‌نڤیسێ وی خه‌لكی بهێته‌ كرن”.

سه‌رۆكێ هه‌رێما كوردستانێ، نێچیرڤان بارزانی، د په‌یوه‌ندیه‌كا ته‌له‌فۆنی دا ل گه‌ل هادی ئه‌لعامری، ئه‌میندارێ گشتیێ رێكخراوا به‌در، ب هه‌لكه‌فتا وه‌غه‌ركرنا جێگرێ وی عه‌بدولكه‌ریم یونس ئه‌لئه‌نساری، سه‌ره‌خوه‌شی ل وی و مالبات و كه‌سوكارێن ئه‌لئه‌نساری كر كو د روودانه‌كا هاتنوچوونێ دا ل رۆژا ئه‌ینی یا بۆری 6 گۆلانێ گیانێ خوه‌ ژ ده‌ست دابوو.

سه‌رۆكێ هه‌رێما كوردستانێ سه‌ره‌رای ده‌ربرینا هه‌ڤخه‌میا خوه‌، هیڤی خواستن خودێ مه‌زن گیانێ ره‌حمه‌تی ب دلوڤانیا خوه‌ شاد بكه‌ت و ئارامیێ ب مالباتا وی ببه‌خشیت.

ژ ئالیێ خوه‌ڤه‌ هادی ئه‌لعامری، سوپاسی و پێزانینێن خوه‌ و مالباتا ئه‌لئه‌نساری بۆ په‌یوه‌ندی و هه‌ڤسۆزیا سه‌رۆكێ هه‌رێما كوردستانێ د گه‌لدا ده‌ربری.

جێگرێ سه‌رۆكێ هه‌رێما كوردستانێ رادگه‌هینیت، بزاڤێن جدی یێن هه‌ین بۆ ئه‌نجامدانا كۆمبوونه‌كێ د ناڤبه‌را هه‌ردو مه‌كته‌بێن سیاسی یێن پارتی دیموكراتی كوردستان و ئێكه‌تی نیشتمانی كوردستان. هه‌روه‌سا ئاماژه‌كر كو شه‌رێ راگه‌هاندنێ و دوبه‌ره‌كیێ خه‌لك یێ بێزاركری و نوكه‌ گه‌لێ كوردستانێ پێدڤی ب ئێكرێزیێ و ئێكده‌نگیێ به‌رامبه‌ر دۆست دوژمنان یا هه‌ی و بزاڤێن جدی یێن هه‌ین بۆ وێ چه‌ندێ هه‌ردو مه‌كته‌بێن سیاسی یێن پارتی و ئێكه‌تیێ كۆمببن، راسته‌ هه‌تا نوكه‌ ئه‌و كۆمبوون نه‌هاتیه‌ كرن، به‌لێ چ ئه‌ڤرۆ بیت یان سوباهی پێدڤیه‌ هه‌ر كۆمببن.

ل دۆر پێكدادانێن د ناڤبه‌را له‌شكرێ ئیراقێ و چه‌كدارێن PKK ل شنگالێ  Un دووپات دكه‌ت كو جهێ تێكده‌رێن ناڤخوه‌یی و ده‌ره‌كی ل شنگالێ نابیت.

نوونه‌راتیا  Un ل ئیراقێ د په‌یامه‌كێ ل دۆر ره‌وشا شنگالێ و ئالۆزیێن د ناڤبه‌را له‌شكرێ ئیراقێ و چه‌كدارێن PKK به‌لاڤكر، گه‌له‌ك د نیگه‌رانین ل هه‌مبه‌ر پێكدادانێن شنگالێ و ئه‌نجامێن خراب ل سه‌ر وه‌لاتیێن سڤیل. و ئاماژه‌كر كو پێدڤیه‌ ئاسایش و سه‌قامگیریا شنگالێ ل سه‌ر هه‌موو تشته‌كی بیت ژبه‌ركو خه‌لكێ وێ ل بۆری گه‌له‌ك ئازار یێن دیتین و ئه‌و هه‌ژی ئاشتیێ نه‌ د بن سیبه‌را ده‌ستهه‌لاتا ده‌وله‌تێ دا، هه‌ر د وێ په‌یاما خوه‌ دا نوونه‌راتیا  Un ل ئیراقێ دووپاتكر كو جهێ تێكده‌رێن ناڤخوه‌یی و ده‌ره‌كی ل شنگالێ نابیت.

ئه‌ڤرۆ:

به‌رپرسه‌كێ وه‌زاره‌تا ده‌رڤه‌ یا ئه‌لمانیا راگه‌هاند كو چه‌ند مه‌هێن رێژه‌یه‌كا زۆر ژ كوردان ل توركیا و هه‌رێما كوردستانێ داخوازا مافێ په‌نابه‌ریێ ل ئه‌لمانیا كرینه‌، لێ به‌رپرسێن ئه‌لمانیا ب ره‌نگه‌كێ ئاشكرا دیار كرینه‌ كو ره‌وشا كوردان هه‌م ل توركیا و هه‌م ژی ل هه‌رێما كوردستانێ باشه‌ و ژ به‌ر هندێ ژی پڕانیا وان كه‌سێن كو داخوازا په‌نابه‌ریێ كربوون داخوازا وان هاتیه‌ ره‌تكرن.

وه‌لاتیێن كورد یێن كو داخوازا په‌نابه‌ریێ كرینه‌ ژی دیار دكه‌ن كو هه‌لوه‌ستێ نوو یێ حوكمه‌تا ئه‌لمانیا جهێ دلگرانیێ یه‌، چونكو هێشتا ژی ل توركیا گه‌ف ل سه‌ر كوردان هه‌نه‌ و ژ به‌ر شه‌ری و ئالۆزیان هنده‌ك كه‌س نه‌چارن كو به‌رێ خوه‌ بده‌نه‌ وه‌لاتێن ئۆرۆپا ب تایبه‌تی ژی ئه‌لمانیا و داخواز دكه‌ن كو حوكمه‌تا ئه‌لمانیا پێداچوونێ د هه‌لوه‌ستێ خوه‌ دا بكه‌ت.

چاڤدێرێن سیاسی ژی دیار دكه‌ن كو ئێدی وه‌لاتێن ئێكه‌تیا ئۆرۆپا به‌رهه‌ڤ نینن وه‌كو به‌رێ په‌نابه‌ران وه‌ربگرن، چونكو نها پرانیا خه‌لكێن ئۆرۆپی ل دژی هاتنا په‌نابه‌رانن بۆ وه‌لاتێن وان.

ئه‌ڤرۆ:

بڕیاره‌ ئه‌ڤرۆ ئه‌زموونێن دووماهیا وه‌رزێ‌ دویێ‌ خولا ئێكێ‌ یێ‌ خواندنێ‌ ل سه‌رانسه‌ری هه‌رێما كوردستانێ‌ بهێنه‌ ئه‌نجامدان.

دكتور ئالان حه‌مه‌ سه‌عید، وه‌زیرێ په‌روه‌ردێ یێ‌ حكومه‌تا هه‌رێما كوردستانێ راگه‌هاند، ئه‌ڤرۆ 8/5/2022 ژ بلی پۆلێن ئێكێ‌ و دویێ‌ و سێیێ‌ سه‌ره‌تایی، ئه‌زموونێن دووماهیا وه‌رزێ دویێ، خۆلا ئێكێ بۆ هه‌موو قووناغێن نه‌دووماهی یێن خواندنێ دێ‌ هێنه‌ ئه‌نجامدان و گۆت: “هه‌موو به‌رهه‌ڤی بۆ ئه‌نجامدانا ئه‌زموونان هاتینه‌ كرن”.

دیسا وه‌زاره‌تا په‌روه‌ردێ‌ بڕیار دایه‌ هه‌موو قوتابیێن شنگالێ‌ ئه‌وێن ژ ئه‌گه‌رێ‌ تیكچوونا ره‌وشا شنگالێ‌ ئاواره‌بووین، ئه‌زموونێن خوه‌ ل هه‌رێما كوردستانێ‌ ل گه‌ل قوتابیێن د ناڤ كه‌مپان و ژ ده‌رڤه‌ی كه‌مپان دا ئه‌نجام ده‌ن.

ئامێدیێ، مه‌حمود نهێلی

ژ ئه‌گه‌رێ ده‌سپێكرنا ئوپه‌راسیونا ڤێ داویێ  و بوردومانا ڤان چه‌ند رۆژێن بوری یا فرۆكێن له‌شكه‌رێ توركیا بۆ سه‌ر زنجیرا چیایێ مه‌تینا، ب تایبه‌ت كوره‌ژار ل سنورێ ناوچه‌داریا شێلادزێ و چیایێ لینك و گه‌لیێ ره‌شاڤه‌ ل ناوچه‌داریا دێره‌لۆكێ، زێده‌باری ترس و دودلیێ‌، زیانێن مادی یێن زۆر گه‌هاندینه‌ خه‌لكێ ده‌ڤه‌رێ.

نازی عه‌لی ئاكنجیێ سه‌نته‌رێ ناحیا دێره‌لۆك بو رۆژناما ئه‌ڤرۆ دیار كر، بوردمانا ڤان رۆژان گه‌له‌ك یا نێزیك و ب هێز بوویه‌ و گۆت : گه‌له‌ك جاران كێمتر ژ ئێك كێلومه‌تر دوری جهێ ئاكنجی بوونێ هاتیه‌ بوردومانكرن.

ناڤهاتی ئاشكرا كر، زێده‌باری ترسێ ل ده‌ڤ زارۆیان ڤێ بودومانێ كارتێكرن ل خانیێن وانا كریه‌ و خانیێن گه‌له‌ك وه‌لاتیان ل سنورێ ناحیا دێره‌لۆك و شێلادزێ ده‌رزینه‌ و  شكه‌ستینه‌ و گۆت: خانیێ من ب خوه‌ ژی ئێك ژوان خانیان بوویه‌ زیان گه‌هشتینێ‌ و به‌شه‌ك ژێ ده‌رزیه‌ و د گه‌له‌ك جهان را شكه‌ستینه‌. دیار كر، نوكه‌ بهاره‌ و وه‌رزێ گلوگیایه‌ و ژیانا گه‌له‌ك ژ خه‌لكێ ده‌ڤه‌رێ ل سه‌ر ده‌رامه‌تیێ چیایه‌، لێ ئه‌ڤ ساله‌ ژ ترسا بوردومانێ ده‌ستێ خه‌لكێ ده‌ڤه‌رێ ناگه‌هیته‌ ڤی به‌رهه‌می و ده‌رامه‌تێ وانا.

ناڤهاتی داخاز ژی كر، راده‌یه‌ك بۆ ڤان بوردومانان بهێته‌ دانان بۆ وێ یه‌كێ وه‌لاتی جاره‌كا دی ژیانه‌كا ئاسایی ببورینن.

ژلایێ خوه‌ڤه‌ وه‌زاره‌تا به‌ره‌ڤانیا توركیا ده‌سپێكرنا ئوپه‌راسیونه‌كا له‌شكه‌ری ب زه‌مینی و ئه‌سمانی ل ده‌ڤه‌را زاپێ و ئاڤا شین راگه‌ندیه‌ و دیار كریه‌ شیانه‌ بگه‌هنه‌ ئارمانجێن خویێن قوناغا ده‌سپێكی.

ده‌رباره‌ی ڤێ ئوپه‌رسیونێ، بالێ سه‌ربازی یێن په‌كه‌كێ راگه‌هاند ، پشتی له‌شكه‌رێ توركیا هێرش كریه‌ سه‌ر ده‌ڤه‌رێن وان و بزاڤ كرین ب كوپتران بهێنه‌ خارێ وان رێگری لێ كریه‌ و نه‌هێلایه‌ بگه‌هنه‌ سه‌ر ئه‌ردی و ئه‌و شیانه‌ هه‌ژماره‌كا زۆرا سه‌بازێن توركیا بكوژن ل ده‌ڤه‌رێن ئاڤا شین و زاپێ و شكه‌فتا برینداران كو هند ژ وانا پله‌ دار بووینه‌. هه‌ر ل سه‌ر زیانێن ئه‌نجامێ وی ئوپه‌راسیونێ گه‌هشتیه‌ خه‌لكێ ده‌ڤه‌رێ هاولاتیه‌كی دی یێ ناحیا شێلادزێ  بۆ رۆژناما ئه‌ڤرۆ دیاركر، ئوپه‌راسیونا سه‌ر  گوندێن وان  گه‌له‌ك كارتێكرن ل خه‌لكێ ده‌ڤه‌رێ كریه‌ چ ژلایێ ئابوری  ڤه‌ چ ژی ژلایێ ده‌روونی ڤه‌ و گۆت: (به‌ری نوكه‌ ئه‌م دشیاین بچینه‌ سه‌ر گوندێن خوه‌ هه‌رچه‌نده‌ ترس ژ بوردومانێ هه‌بوویه‌، لێ پشتی ڤێ ئوپه‌رسیونێ و ئه‌ڤ ساله‌ ئێدی ب چ رێكان ئه‌و نه‌شێن قه‌ستا گوندێن خوه‌ و چیایێ ده‌ڤه‌رێ بكه‌ن بو ئینانا به‌رهه‌مێن خوه‌ یێن چاندنێ).

ئوپه‌راسیونا له‌شكه‌ری یا توركیا بۆ سه‌ر ده‌ڤه‌را نێروه‌ و رێكان و زنجیرا چیایێ مه‌تینا ل سنورێ ناحیێن دێره‌لۆك و شێلادزێ  به‌ری چه‌ند رۆژان ده‌سپێكریه‌ و د ڤێ ئوپه‌راسیونێ دا فرۆكێن شه‌ركه‌ر و هه‌روه‌سا فرۆكێن كوپته‌ر و درۆن و توپ و چه‌كێ بچیك هاتیه‌ بكارئینان و ل دووڤ ڤێ ئوپه‌راسیونێ له‌شكه‌رێ توركیا ب فرۆكێن شه‌ر كه‌ر بۆ ماوێ ئێك حه‌فتی ب دژواری چیایێ كوره‌ژار و مام ره‌شان و چیایێ لینك و سه‌رێ ده‌ره‌جێ و هه‌روه‌سا ده‌ریێ سیڤا بوردومانكرن و پاشان ب كوپته‌رێن شه‌ری پتر خوه‌ نێزیكێ ده‌ڤه‌رێ كر و ل سه‌رێ چایێ مه‌تینا ل سه‌رێ ده‌ره‌جێ و لینك ب فرۆكان له‌شكه‌ر دابه‌زاندیه‌ خارێ كو دورێن 30 كیلومه‌تران دوری سنورێ توركیایه‌ د ئه‌نجام دا  شه‌ر دناڤبه‌را گه‌ریلایێن په‌كه‌كێ و سه‌ربازێن تورك دادروست بوویه‌ و ژ هه‌ر دوولایان ل دووڤ داخویانیا راگه‌هاندنا وان كوشتی و بریندار هه‌نه‌.

دهێته‌ زانین چیایێ لینك كێمتر ژ چار كیلومه‌تران دوری سه‌نته‌رێ ناحیا دێره‌لۆكێ و هه‌روه‌سا چیایی مام ره‌شان و كوره‌ژاری دكه‌ڤیته‌ هنداڤا كومه‌لگه‌ها سیریێ و سه‌نته‌رێ ناحیا شێلادزێ ب دوراتیا 2 كیلومه‌تران و هه‌روه‌سا ده‌ریێ سیڤا دكه‌ڤیته‌ ده‌ڤه‌را نهێلێ ل هنداڤا گوندێ گوهه‌رز كو جهێن گرنگێن شه‌رو پێكدانا بوویه‌ ب تایبه‌تی بووینه‌ ئارمانجا بوردومانا فرۆكێن له‌شكه‌ری.

هه‌ولێر، قائید میرۆ

په‌رله‌مانتاره‌كێ پارتی ل جڤاتا نوونه‌رێن ئیراقێ ئاماژه‌كر، په‌یاما سه‌رۆك بارزانی نامه‌یه‌كا رۆهنه‌ بۆ وێ چه‌ندێ هه‌موو ئالیێن سیاسی ل ئیراقێ ب ئیراده‌یا خوه‌ بڕیارێ ناده‌ن و ب مه‌ره‌ما گه‌هشتن ب رێككه‌فتن و چاره‌سه‌ریا ره‌وشا نوكه‌ یا ئیراقێ پێدڤیه‌ ئالیێن سیاسی ڤێ په‌یاما سه‌رۆك بارزانی به‌رچاف بگرن و كار بۆ پێكئینانا حوكمه‌تا نوو یا ئیراقێ بكه‌ن.

سه‌باح سوبحی، ئه‌ندامێ جڤاتا نوونه‌رێن ئیراقێ ژ فراكسیۆنا پارتی، بۆ رۆژناما (ئه‌ڤرۆ) گۆت” چه‌ندین هه‌یڤ ده‌ربازبوون لسه‌ر ئه‌نجامدانا هه‌لبژارتنێن ئیراقێ و هێشتا ئالیێن ئیراقی  نه‌شیاینه‌ بگه‌هنه‌ رێككه‌فتنێ بۆ پێكئینانا حوكمه‌تێ، هه‌تا بڤی شێوه‌یێ نوكه‌ژی دانوستاندن بهێنه‌كرن ب زه‌حمه‌ته‌ رێككه‌فتن بهێته‌كرن، چونكه‌ ئاسته‌نگ بۆ هه‌ڤپه‌یمانیا رزگاریا نیشتمانی هاتنه‌ چێكرن د پرۆسا هه‌لبژارتنا سه‌رۆك كۆمارێ دا و ئه‌نجام ژی گه‌هشته‌ وی راده‌ی موقته‌دا سه‌در بڕیاردا ٤٠ رۆژان ده‌لیڤێ بده‌ته‌ ئالیێن به‌رامبه‌ر یێن د ناڤا چوارچۆڤێ هه‌ماهه‌نگیێ دا بۆ پێكئینانا حوكمه‌تێ، به‌لێ وه‌كو دیار هێشتا بزاڤ سه‌رنه‌گرتیه‌ و وه‌كو پێدڤی ژی كار ناكه‌ن، چونكه‌ وان شیانێن پێكئینانا حوكمه‌تێ نینم و دڤێت ڤه‌گه‌ڕن بۆ لێك تێگه‌هشتن و رێككه‌فتنێ، ئه‌ز باوه‌رم دێ ٤٠ رۆژێن وان ب دوماهی بهێن و حوكمه‌ت ناهێته‌ پێكئینان، ئه‌ڤه‌ژی نیشانا وێ چه‌ندێ یه‌ دێ جاره‌كادی ده‌لیڤه‌ بۆ ئالیێن دی هه‌بیت بگه‌هنه‌ ئه‌نجامه‌كی بۆ پێكئینانا حوكمه‌تا نوو یا ئیراقێ و هه‌لبژارتنا سه‌رۆك كۆماری”.

سه‌باح سوبحی ئاماژه‌كر” په‌یاما حه‌فتیا بۆری یا سه‌رۆك بارزانی ل دۆر ره‌وشا سیاسی ل ئیراقێ نامه‌یه‌كه‌ ژبۆی وان ئالیێن ب ئیراده‌یا خوه‌ بڕیارێ ناده‌ن، به‌رۆڤاژی چاڤه‌ڕێی ئیراده‌یێن دی دكه‌ن، دڤێت ڤه‌گه‌ڕن بۆ به‌ره‌یێ ل ده‌ستپێكا كۆمبوونا جڤاتا نوونه‌ران هاتیه‌ پێكئینان، چونكه‌ به‌ره‌یه‌ك بوو سه‌ربخوه‌ بڕیار ددان، په‌یاما سه‌رۆك بارزانی نامه‌یه‌كا زۆر رۆهنه‌ بۆ وان ئالیێن نه‌شیاین حوكمه‌تێ پێكبینن پشتی وی ده‌مێ بۆ هاتیه‌ دیاركرن، وه‌ك پارتی به‌رده‌وام مه‌ بزاف كرینه‌ ده‌لیڤێ بده‌ینه‌ ئالیێن به‌رده‌وامبه‌ر هه‌تا پێداچوونێ د بڕیارێن خوه‌ یێن سیاسی دا بكه‌ن و په‌شێمان ببن، چونكه‌ یا خویایه‌ نه‌شیان ب ده‌ركرنا بڕیارێن خوه‌ گۆهۆڕینان په‌یدا بكه‌ن دناڤا پرۆسا سیاسی دا ل ئیراقێ، له‌وڕا باشتره‌ بزاڤێن خۆ دگه‌ل ئالیێن دی بكار بینن بۆ پێكئینانا حوكمه‌تا نوو یا ئیراقێ و هه‌لبژارتنا سه‌رۆك كۆماری، ره‌وشا ئیراقێ یا به‌ر ب ئالۆزیان ڤه‌ دچیت و راگرتنا پرۆسا سیاسی كاریگه‌ری لسه‌ر جادا ئیراقی په‌یداكریه‌، چونكه‌ بۆرینا ده‌می د به‌رژه‌وه‌ندیا هیچ ئالیه‌كی دا نینه‌”.

دهێته‌ زانین سه‌رۆك بارزانی ل 20 نیسانێ په‌یامه‌ك بلاڤكربوو و تێدا راگه‌هاندبوو” هه‌رده‌مێ ئالیێن سیاسی خوه‌ ئێكلاكر كو ئیرادا وان د بریارێن نیشتمانی دا یا سه‌ربخوه‌یه‌، ل وی ده‌می گرژی نامینن و داخستنا سیاسی ب دووماهی دهێت”.

ئه‌ڤرۆ:

گاری كێنت، په‌رله‌مانتارێ بریتانی ل دۆر سه‌ره‌دانا مه‌سرور بارزانی، سه‌رۆكێ حوكمه‌تا هه‌رێما كوردستانێ بۆ بریتانیا دووپاتكر كو ئه‌و سه‌ره‌دانا سه‌رۆكێ حوكمه‌تا هه‌رێمێ گاڤه‌كا گرنگه‌ بۆ پێشڤه‌برنا په‌یوه‌ندیان دناڤبه‌را هه‌رێما كوردستانێ و بریتانیا.

وی په‌رله‌مانتارێ بریتانی گۆت ژی” د ده‌مێ 31 سالێن بۆری دا كورد بووینه‌ خودان پێگه‌هه‌كێ گه‌له‌ك گرنگ و دیار د سیاسه‌تا ده‌رڤه‌ و وه‌زاره‌تا ده‌رڤه‌ یا بریتانیا دا و د وی چارچۆڤه‌ی دا مه‌ ئاماده‌بوونه‌كا باش ل هه‌ولێرێ یا هه‌ی و هه‌رێما كوردستانێ هه‌ڤپه‌یمانه‌كا گرنگ یا مه‌یه‌”.

دووپاتكر ژی” سه‌ره‌دانا سه‌رۆكێ حوكمه‌تا هه‌رێما كوردستانێ بۆ بریتانیا و سه‌ره‌دانێن پێشتر، دێ بنه‌ هۆكار بۆ دیاربوونا هه‌رێما كوردستانێ ل سه‌ر نه‌خشێ جیهانێ و گاڤێن باش ب وی ئاراسته‌ی یێن هاتینه‌ هاڤێتن و هه‌رێما كوردستانێ جهه‌كه‌ كو پێكڤه‌ژیانا ئایینی یا تێدا هه‌ی و شه‌رێ تیرۆرێ دكه‌ت، هه‌تا نوكه‌ ژی قه‌ربانیدانا پێشمه‌رگێ كوردستانێ یا ل پێش چاڤ كا چاوان به‌رامبه‌ر تیرۆرستان كوردستان و ئه‌م و ده‌ڤه‌ر ژی پاراست”.

گاری گێنت زێده‌تر گۆت” ئه‌وا پێدڤی ل سه‌ر هه‌رێما كوردستانێ د ڤێ ره‌وشێ دا ئه‌وه‌ كو دڤێت پشته‌ڤانیێ ژ دۆست و هه‌ڤپه‌یمانان وه‌ربگریت، ب تایبه‌تی ژ بریتانیا و شیانێن خوه‌ بلند بكه‌ت و ببیته‌ هه‌ڤپه‌یمانه‌كا گه‌له‌ك باش و پێدڤی یا رۆژئاڤای”.

خویاكر” كورد د شه‌رێ دژی تیرۆرێ دا ژ پێخه‌مه‌ت پاراستنا مه‌ قوربانیێن مه‌زن دان، نوكه‌ ژی ده‌مێ وێ چه‌ندێ یه‌ كو بریتانیا وه‌كو دۆسته‌كێ باوه‌رپێكریا كوردان خوه‌ دیاربكه‌ت و هاریكاریا كوردان بكه‌ت و پێدڤیه‌ ئیراق ژی هاریكاریا كوردان بكه‌ت و پێدڤیه‌ كێشا ده‌ڤه‌رێن كوردستانی یێن ده‌رڤه‌ی ئیدارا هه‌رێما كوردستانێ بهێته‌ چاره‌سه‌ركرن و بریتانیا دشێت هاریكار بیت بۆ چاره‌سه‌ركرنا هه‌موو ئه‌و كێشێن ژ سالا 2005 ب هه‌لاویستی ماین د ناڤبه‌را هه‌رێما كوردستانێ و ئیراقێ”.

هه‌روه‌سا دیاركر” هه‌موو په‌یوه‌ندیێن مه‌ د بوارێن جودا دا ئابووری، بازرگانی، سیاسی و دبلۆماسی ل گه‌ل هه‌رێما كوردستانێ، هۆكارێن گرنگن بۆ ب هێزبوونا پێگه‌هێ هه‌رێما كوردستانێ و پێدڤیه‌ هه‌رێم كاری ل سه‌ر كه‌رتێن پیشه‌سازی و چاندنێ و هه‌موو وان كه‌رتان بكه‌ ت یێن دبنه‌ هۆكارێن ب هێزكرنا ژێرخانا وێ یا ئابووری”.

دووپاتكر ژی” من پێشنیاز كریه‌ كو هه‌له‌بجه‌ ببیته‌ كه‌سكترین پارێزگه‌ه ل سه‌ر ئاستێ ئیراقێ و هه‌رێما كوردستانێ، بۆ وێ مه‌به‌ستێ ژی پێدڤیه‌ هاریكاریێ ژ بریتانیا وه‌ربگرن”.

ئه‌ڤرۆ:

كابینا نوو یا حوكمه‌تا هه‌رێما كوردستانێ ل ده‌ستپێكا ده‌ستبكاربوونا خوه‌ كۆمه‌كا پره‌نسیبان ل به‌رچاڤ وه‌رگرتینه‌ بۆ وێ چه‌ندێ ل پاشه‌رۆژێ كار ل سه‌ر بكه‌ت، ژوان قانوونا چاكسازیێ و دروستكرن و پێشخستنا ژێرخانا ئابووری یا هه‌رێما كوردستانێ، ژبلی وێ چه‌ندێ كو خاله‌كا گه‌له‌ك گرنگه‌، ئه‌وژی پرسێن نێڤده‌وله‌تی و دبلۆماسیێن مه‌سرور بارزانی، سه‌رۆكێ حوكمه‌تا هه‌رێما كوردستانێ ل گه‌ل وه‌لاتێن ده‌وروبه‌ر و ده‌ڤه‌رێ و جیهانێ، ل دۆر ڤێ چه‌ندێ به‌رپرسێ فه‌رمانگه‌ها په‌یوه‌ندیێن ده‌رڤه‌ یێن حوكمه‌تا هه‌رێما كوردستانێ، سه‌فین دزه‌یی، رادگه‌هینیت، سه‌ره‌دانا سه‌رۆكێ حوكمه‌تا هه‌رێما كوردستانێ بۆ بریتانیا بۆ هه‌موو كوردان ده‌ستكه‌فته‌ نه‌كو بۆ حزبه‌كێ ب تنێ.

سه‌فین دزه‌یی زێده‌تر دبێژیت” د سالێن هه‌شتیاندا به‌رپرسه‌كێ كورد دشیا تنێ كه‌سایه‌تیه‌كێ سیاسی ببینیت، به‌لێ خوه‌شبه‌ختانه‌ د دستوورێ ئیراقێ دا هاتیه‌ كو هه‌رێما كوردستانێ دشێت په‌یوه‌ندیێن خوه‌ یێن نێڤده‌وله‌تی پێشڤه‌ ببه‌ت”.

به‌رپرسێ فه‌رمانگه‌ها په‌یوه‌ندیێن ده‌رڤه‌ یێن حوكمه‌تا هه‌رێمێ ئه‌وژی به‌رچاڤكر” ل ده‌مێن بۆری مه‌ ددیت كو سه‌رۆك، سه‌رۆك وه‌زیرێن وه‌لاتان و وه‌زیرێن ده‌رڤه‌ چاوان سه‌ره‌دانا هه‌رێما كوردستانێ دكر، ب هه‌مان شێوه‌ سه‌رۆكێ هه‌رێمێ و سه‌رۆك وه‌زیران و وه‌زیر و په‌رله‌مانتار ژی بۆ كۆر و كۆربه‌ندان دهێنه‌ داخوازكرن”.

زێده‌تر گۆت” ئه‌و دیدارا دو قۆلی د ناڤبه‌را بۆریس جۆنس، سه‌رۆك وه‌زیرێن بریتانیا و مه‌سرور بارزانی، سه‌رۆك وه‌زیرێن هه‌رێما كوردستانێ هاتیه‌ ئه‌نجامدان پێدڤیه‌ ببیته‌ جهێ دلخوه‌شیا خه‌لكێ كوردستانێ و هه‌موو ئالیێن سیاسی، چونكه‌ ئه‌ڤ ده‌ستكه‌فته‌ هه‌ژی خه‌باتا گه‌لێ كوردستانێ یه‌”.

گۆت ژی” بریتانیا به‌رده‌وام پێگه‌هێ تایبه‌ت دناڤ جڤاكێ ئیراقی دا هه‌بوو، ژبلی وێ چه‌ندێ ل كۆچبه‌ریا ملیۆنی یا خه‌لكێ كوردستانێ ل 1991، جۆن مێجه‌ر، سه‌رۆك وه‌زیرێن بریتانیا یێ وی ده‌می ب هه‌ڤپشكی ل گه‌ل فه‌ره‌نسا ئالیێ سه‌ره‌كی یێ پێشكێشكرنا هزرا ده‌ڤه‌را ئارام بوون بۆ جڤاتا ئاسایشا نێڤده‌وله‌تی كو بوویه‌ ئه‌گه‌رێ ده‌ركرنا بریارا 688 ژ جڤاتا ئاسایشا نێڤده‌وله‌تی”.

خویاكر” هه‌ر ژ پشتی سه‌رهلدانا 1991 په‌یوه‌ندیا سیاسی یا  راسته‌وخوه‌ د ناڤبه‌را هه‌رێما كوردستانێ و بریتانیا دا هه‌بوو، ب تایبه‌تی پشتی سالا 2003 بزاڤ به‌رده‌وام بوون، ده‌مێ سیسته‌مێ سیاسی ل ئیراقێ ل سه‌ر بنه‌مایێ فیدرالی هاتیه‌ چه‌سپاندن، وه‌لاتان راسته‌وخوه‌ مامه‌له‌ ل گه‌ل هه‌رێما كوردستانێ كر”. هه‌روه‌سا دیاركر” كونسولخانێن هه‌ر پێنج وه‌لاتێن ئه‌ندامێن به‌رده‌وام ل جڤاتا ئاسایشا نێڤده‌وله‌تی ل هه‌ولێرێ راسته‌وخوه‌ ل گه‌ل حوكمه‌تا هه‌رێما كوردستانێ كار دكه‌ن”.

سه‌فین دزه‌یی ئاماژه‌كر” بریتانیا به‌رده‌وام پشته‌ڤانیا حوكمه‌ته‌كا ب هێز یا هه‌رێما كوردستانێ یه‌، بابه‌تێ وزێ ته‌وه‌ره‌كێ سه‌ره‌كیه‌ ژ ئالیێ جڤاكێ نێڤده‌وله‌تی بۆ ئیراقێ بۆ وێ چه‌ندێ مفای ژێ وه‌ربگریت”.

دووپاتكر ژی” هه‌رێما كوردستانێ پشتی ڤه‌دیتنا په‌ترۆلێ و وزێ، بوویه‌ پشكه‌ك ژ هه‌ڤكێشێن نێڤده‌وله‌تی، نابیت بهێته‌ گۆتن هه‌رێما كوردستانێ به‌دیلێ وه‌لاتێن دی یه‌ بۆ وزێ، ده‌مێ دهێته‌ دیتن كێشا كێمیا غازا سروشتی ل جیهانی هه‌یه‌، ل بۆری ژی دا بریتانیا بزاڤكریه‌ كۆمپانیێن خوه‌ ل هه‌رێما كوردستانێ ئه‌كتیڤ بكه‌ن، ئه‌ڤه‌ هه‌موو بۆ وێ چه‌ندێ یه‌ كو مفا بۆ هه‌رێما كوردستانێ هه‌بیت”.

دزه‌یی دبێژیت” ل ئیراقێ ب ده‌هان مادێن دستووری یێن هه‌ین هه‌تاكو قانوون بۆ نه‌هاتیه‌ دارێژتن، ئانكو گه‌له‌ك پێشێلكاری د دستوورێ ئیراقێ دا یێن هاتینه‌ كرن”.

website security
WP Facebook Auto Publish Powered By : XYZScripts.com