ئه‌ڤرۆ نيوز:

ديداره‌كێ دا بۆ رۆژناما ئه‌ڤرۆ كو ئه‌ياد به‌روارى به‌رهه‌ڤكريه‌، پەرلەمانتارەکێ کورد ل بەغدا گەشبینیا خوە ب پێنگاڤێن حەیدەر عەبادی سەرۆکێ وەزیرێن عیراقێ د ھاڤێژیت د پرسا ئاریشێن ھەلاویستی دا ل گەل کوردستانێ و چاکسازیێ ل عیراقێ و دبێژیت دێ ش مالکی باشتر بیت، لێ ھەتا نوکە مالکی یێ ئاریشان بۆ دروست دکەت.
دکتۆر عەرەفات کەرەم پەرلەمانتارێ پارتی د جڤاتا نوونەرێن عیراقێ دا بۆ ئەڤرۆ دبێژیت ” عەبادی باش یێ تێگەھشتی کو بێی ھەرێما کوردستانێ نەشێت چار سالێن خوە د دەستھەلاتێ دا ب دووماھی بینیت، ھەرچەندە ھەتا نوکە ژی مالکی ئاریشێن بەردەوام بۆ دروست دکەت و عەبادی گازندە ژ ڤان رەفتارێن مالکی ھەنە و گازندێن خوە ل دۆر ڤێ چەندێ یێن گەھاندینە ئەمریکا ژی”.
ل دۆر پێرابوونێن عەبادی یێن د بیاڤێ چاکسازیێ دا کو چەندین ئەفسەرێن پلە بلند یێن نێزیکی مالکی ل ھەردو وەزارەتێن بەرگریێ و ناڤخوەیی دوورئێخستین و خانەنشینکرین و ھەبوونا ٥٠ ھزار ناڤێن ئاشوپی دناڤ لەشکرێ عیراقێ دا و سۆزا وی بۆ بەردەوامیێ د بەرھنگاریا گەندەلیێ دا، ئایا عەبادی یێ رژدە د پێرابوونێن خوەدا یان تنێ پرۆپاکندەکی بۆ خوە دکەت؟ د. عەرەفات کەرەم دبێژیت” ئەز تاکە پەرلەمانتارێن پارتی بووم کو ھەموو جاران دبێژم ئەز یێ گەشبینم ب عەبادی، ژ بەر ژ ئەز یێ ب عەبادی گەشبینم؟ ب دیتنا من عەبادی کەسەکێ رۆھن و ئاشکرایە و وەکو مالکی نینە کو یێ بنڤەیی بیت، ھەرچەندە عەبادی ژی ژ حزبا دەعوەیە وەکو مالکی، لێ وەکو مالکی یێ ئایدلۆژی نینە و یا ل دەرڤەی عیراقێ خواندی و دشێم بێژم ژی ھەتا رادەکی رەوشەنبیریا ئورۆپی کاریگەری یا ل سەر وی ھەی، دیسا پێدڤیە عەبادی ب خوە وانەکێ ژ مالکی وەربگریت، چونکی مالکی خوەدانێ ٧٠٠ ھزار دەنگان بوو د ھەلبژارتنێن ڤێ دووماھیێ یێن جڤاتا نوونەران بوو و ب وان دەنگان نەشیا ببیتە سەرۆکێ وەزیران، لێ عەبادی ب دەنگێن کێم یێ بوویە ئەندامێ جڤاتا نوونەران و پاشی یێ بوویە جێگرێ ئێکێ یێ سەرۆکێ جڤاتا نوونەران و پاشی یێ بوویە سەرۆکێ وەزیران، ئەڤە ژی وانەکە بوو وی و بوو ھەموویان کو د عیراقێ دا کەس ب دەنگان نابیتە خوەدان دەستھەلات، بەلکو ھەموو تەوافقاتێن سیاسی نە”.
ب دیتنا ڤی پەرلەمانتاری پارتی ھەر سەرۆک وەزیرەکێ ل عیراقێ ب ھێز دکەڤیت ل سەر کیستا کوردان ب ھێز دکەڤیت، لێ دڤێت بھێتە زانین کو د ڤێ قۆناغێ دا بەغدا یا پێدڤی ب ھەرێما کوردستانێ یە و ھەرێمێ پێدڤی ب بەغدا نینە ژ ھەموو لایەکی ڤە، راستە ھەرێم تووشی ھندەک ئاریشە و گیر و گرفتان بوویە، لێ ژ لایێ دیبلۆماسی و سیاسی و پەیوەندیێن خوەڤە گەلەک ژ بەغدا ب ھێزترە و گەلەک ژ سەرکردێن شیعان ب خوە ژی دبێژن ئەو ھاریکاریا رۆژئاڤا بۆ ھەرێما کوردستانێ دکەت بۆ عیراقێ ناکەت”.

کوردستان دێ غازێ فرۆشیتە ئورۆپا
جێگرێ سەرۆکێ لژنا سامانێن سروشتی ل پەرلەمانێ کوردستانێ راگەھاند، د سێ سالێن داھاتی دا، دێ کوردستان غازێ ھنێریتە ئورۆپا، لێ وەکو پێنگاڤا ئێکێ دێ کارەبا ناڤخوەیی بیتە غاز و پاشی دێ غاز ھێتە ھنارتن بۆ دەرڤە.
دلشاد شەعبان بۆ مالپەرێ پارتی دیموکراتی کوردستان گوت”ئورۆپا ناڤەشێریت کو چاڤێ وێ یێ ل غازا ھەرێما کوردستانێ و ل ڤێ دووماھیێ ژی کۆنسلێ فرەنسا ل ھەرێمێ بۆمە دیارکر کو ژ بۆ تژیکرنا پێدڤیان چاڤێ ئورۆپا یێ ل غازا کوردستانێ”.
دلشادی گوت ژی” ل دووڤ وان پێزانینێن ژ وەزارەتا سامانێن سروشتی ب دەست من کەفتین، د سێ سالێن داھاتی دا و ب رێیا تورکیا، دێ غازا ھەرێمێ ھێتە ھنارتن بۆ ئورۆپا، لێ ل دەستپێکێ دێ ویستگەھێن کارەبا ناڤخوەیی بنە غاز و پاشی دێ غاز ھێتە ھنارتن بۆ دەرڤە”.دیار کر ژی “ھەرێما کوردستانێ شیانێن ھەین کو ل پاشەرۆژێ ٣٠% ژ پێدڤیێن ئورۆپا بۆ غازێ دابین بکەت”.

ئەڤرۆ نیوز:
د دیدارەکێ دا کو سەرجان مەحمود بۆ رۆژناما ئەڤرۆ ئەنجامدایە، ئدریس بالوکەن جێگرێ ھەڤسەرۆکێن پارتا دیمۆکراسیا گەلان HDP ل سەر رەوشا تورکیا و باکورێ کوردستانێ و گرتنا لاوێن کورد و چاوانیا برێڤە چوونا قۆناغا ئاشتیێ راگەھاند د دەمەکی دا کو شاندێ مە ل گەل حوکمەتا تورکیا بۆ سەرخستنا قۆناغا ئاشتیێ و چارەکرنا پرسا کورد د دانوستاندنان دایە، گرتن، کوشتن و زۆرداریا ل سەر گەلێ کورد ناھێتە قەبوولکرن و گۆت: (دڤێت حوکمەت بریارا خوە بدەت و مە د ھەڤدیتنا ل گەل یالچن ئاکدۆگان جێگرێ سەرۆک وەزیرێن تورکیا دا دوپات کر کو ئەم گرتن و کوشتنا لاوێن کورد ب چو رەنگەکی قەبوول ناکەین و سیاسەتا حوکمەتێ ل ھەمبەر گەلێ مە ئالۆزیا دروست دکەت و قۆناغا ئاشتیێ د مەترسیێ دایە و ھەکە حوکمەت کریارێن خوە یێ شاش بەردەوام بکەت دێ رەوش ئالۆز بیت و کەس نەشێت ئێدی گەل راوەستینیت).
ئدریسی ھەروەسا دیار کر ئەو دێ ئەنجامێن ھەڤدیتنا ل گەل حوکمەتێ ب سەرکردایەتیا کۆما جڤاکێن کوردستانێ را گەنگەشە بکەن و ئەنجامێن گەنگەشێ ژ بەرێز ئۆجەلان و بەرپرسێن حوکمەتێ را راگەھینن و پاشی ئەم دشێین بەحسێ خالێن لھەڤکرنێ بکەین و گۆت: (ھەتا نھا ھندەک ئاستەنگی ھەنە لێ ھەڤدیتنێن مە یێن ل گەل حوکمەتێ ب رەنگەکی ئەرەنی برێڤە دچن و ھژمارا ئەندامێن شاندێ مە یێ دانوستاندنێ بوویە پێنج کەس و ھەکە پێدڤی کر دێ ھێشتا بھێتە زێدەکرن و د ناڤا چەند رۆژان دا دێ چاوانیا برێڤەچوونا قۆناغا ئاشتیێ و خالێن کو مە لھەڤکرینە، یەک ئالی بیت).
ئەندامێ شاندێ دانوستاندنێن ل گەل حوکمەتێ د پشکەکا دی یا ئاخڤتنا خوە دا ژی راگەھاند کو سیاسەتا ئێمناھیا تورکیا ل باکورێ کوردستانێ سەدەمێ سەرەکی یێ ئالۆزیانە و رۆژانە گرتنا لاوێن کورد و ھەری داوی کوشتنا لاوەکی کورد رەوشا باکورێ کوردستانێ ئالۆز کریە و بەرپرسێ ئالۆزیان حوکمەتا تورکیایە.
ل ئالیێ دی جەمیل بایک بەرپرسێ دەستەیا سەرۆکاتیا KCK ژی د داخۆیانیەکی دا راگەھاند کو حوکمەتا تورکیا قۆناغا ئاشتیێ دکەتە مەترسیێ و کریارێن حوکمەتێ نە ل دووڤ قۆناغا ئاشتیێ نە و گۆت: (مە بەری نھا ژی راگەھاند و ئەم جارەکا دی ژی دبێژین ب چو رەنگەکی گرتن و کوشتن و زۆرداریا ل سەر گەلێ خوە دا قەبوول ناکەین و دڤێت ھەموو گەلێ مە ل دژی سیاسەتا گرتن و کوشتنا لاوێن کورد ھشیار بن و ئەم نەچارین کو بەرسڤا کریارێن حوکمەتێ بدەین).
بەرپرسێ دەستەیا سەرۆکاتیا KCK ھەروەسا راگەھاند ل ئالیەکی دێ بەحسێ قۆناغا ئاشتیێ ھێتە کرن و ل ئالیەکی ژی لاوێن کورد بھێنە کوشتن و گرتن، ئەم ڤێ سیاسەتا حوکمەتێ رەت دکەین و دوپات دکەین کو مە ئەو ھێز ھەیە خەلکێ خوە ب پارێزین و بەرپرسیارێ ھەر ئەنجامەکی نەخواستی حوکمەتا تورکیا ب خوەیە، ئەز جارەکا دی ژ رایا گشتی یا کوردستانێ و تورکیا را دبێژم کو حوکمەت د چارەکرنا پرسا کوردی دا جدی نینە و بزاڤێ دکەت کەسایەتی، سیاسەتمەدار و لاوێن کورد ب گرتن و کوشتنان ژناڤ ببەت و بزاڤا گەلێ کورد لاواز بکەت، ژ بەر ڤێ چەندێ ژی ئەم نەچارین کو بەرسڤا حوکمەتێ بدەین).