ئەڤرۆ:

ژ بەر پووتە نەدانا پێدڤی یا حکومەتا ھەرێما کوردستانێ ژ بوو ئاڤەدانکرنا گوندان ، ل ڤان سالێن داویێ گوندیان بەرێخوە دایە باژێران و پەیوەندیێن وان یێن جڤاکی بەر ب لاوازبوونێ ڤە چووینە و ئەڤ یەک ژی بوویە سەدەم کو داب و نەریتێن کوردیێن کەڤن بھێن ژ دەستان ، شارەزایەکێ جڤاکی دبێژیت لاوازیا پەیوەندیێن جڤاکیێن گوندان مەترسیەکا گشتی ھەیە .

جیھاد موستەفا گەنجەکە دیارکر کو پەیوەندیا گوندان دگەل ئێک ب ھێزترین خالە کو گوند ھەر بمینن ئاڤەدان و بەلێ نھا گەرماتیا پەیوەندیان دناڤ ئێک گوند ژی دا لاوازبوویە و گۆت : “ دکەڤن دا گوندێن جیرانێن مە دەمێ کارەکێ وەکو زووبارە یان سووتنا ئاقارەکێ ھەتا خوە داوات و بەھیان ژی ئەم ھەموو پێکڤە دچووینە ھاریکاریا وان و پێدڤیێن وان بو بجھدئینان و ئەو ژی د ھاتنە ھاریکاریا مە ، بەلێ نھا ئەڤ پەیوەندیە لاوزبووینە ھەتا وی رادەی رەنگە ھندەک بمرن چەند رۆژا ژ نوو ئەم بزانین ، ب ھزرا من ئەڤ یەک ژی د زڤریت بوو نەبوونا گیانێ پێکڤەژیانێ و ھەستا بەرپرسیارەتی و نەتەوەیی ل دەڤ جیلێ نوو ، بەلێ نھا ژیان بوویە بابەتەکێ ماددی و ھەر کەس ب کارێ خوڤە مژوولە و رۆژ بوو رۆژێ پەیوەندیێن گوندان بەرەڤ لاوازبوونێ ڤە دچن”

دانعەمرەک بناڤێ شێخزادە ھلوری دیاردکەت کو د کەڤندا ژیانا گوندان دگەل گوندێن دەوروبەر ئێک جورە پەیوەندی بوویە و گۆت : “ بەری نھا ھەموو کار و بزاڤ و چالاکی و ژیانا مە دگەل گوندێن جیران یا پێکڤە گرێدایی بوو ، د ھەموو کاران دا مە پشتەڤانیا ئێک دکر ، بەلێ نھا ئەم یێن پیروبووین و گەنجێن مەژی ب بھانەیێن جودا جودا خوە ژڤان جورە پەیوەندیا ددەنە پاش و ئەم گەلەک شەرم ژ خوە دکەین بەرامبەر وان رەفتارێن کون ھا ئەم ب چاڤ دبینین و ڤان لاوازیا پەیوەندیێن جڤاکی و بێ سەروبەریا ھەڤکاریکرنا ھەڤدوو ، ب ھزرا من ئەگەرا ڤێ یەکێ ژی د زڤریت بوو نەبوونا دلوڤانیێ و بێ منەتیێ و نە رەوشەنبیریا جڤاکی ، د رەسەندا دڤێت پەیوەندیێن گوندی دگەل گوندی د خوش بن بەروڤاژی چوو رامانێن گوندیاتیێ ژێ ناچن و رۆژ بو رۆژێ دێ کارتێکرنێن جودا جودا ل وان کەن ، و ئەگەر ھوسا یا بەردەوام بیت ئەز باوەرم دی َوەکو پەیوەندێن باژێران لێھێ تکو جیرانی ھای ژ جیرانی نینە”

یاسین محەمەد وەکو ڤەکولەرەکێ جڤاکی دیارکر کو ئێک ژ کارێن سەرەکیێن ژیانا گونداتیێ ھەبوونا پەیوەندیەکا ب ھێزا پێکە ژیان و کارکرن و مان و نەمانێ یە و گۆت : “ ل ڤان سالێن داویێ ژ ئەگەرا ھاتنا تەکنەلوژیا ژ نیشکەکی َڤە و بابەتێن باش بوونا بارێ ئابووری و کار و بزاڤێن زێدە بوو ژیانێ و و فەرمانبەری و خواندن و فلان و بێڤانان جیلێ نوو ژ ھەموو جورە پەیوەندیێن گونداتیێ دویرکرینە کو د رەسەن دا دڤیابا ئەڤان ئەگەرا پتر ئەو ژێک نێزیک کربانە و ببایە خالەک کو پتر ھەڤکاریا ھەڤ کربایە “

ڤەکولەرێ جڤاکی ھێشتا گۆت : “ دڤێت ل گوندان ژی سالوخەتێن باژێرا یێن وەکو کارەبا ٢٤ دەمژمێری و قوتابخانە و فەرمانگەھێن حکومی و جاددە و کولانێن خوەش و یاریگەھێن وەرزشی و گەلەک خزمەتکاریێن دن بخوڤە بگرن ، و ژلایێ یە دن ڤە گوندیش ھەڤکاریا گوندیان بکەت د وارێ چاندن و خودانکرنا تەرش و تەوالی ژ بەرکو دویرکەفتن ژ ئەڤان سالووخەتان بوویە سەدەم کو جورە تەمبەلی و بێزاریەک بو گەنجان یان بێژین جیلێ نوو پەیدا ببیت و کارتێکرن ل پەیوەندیێن وان یێن جڤاکی کریە چونکی ھەکە ل گوندان ئەڤ یەک نەبیت چوو رامانێن گوندان بخوڤە ناگریت و ل وی دەمی دێ کارتێکرنێ ل وان کەن و بەرێوان ژی کەڤیتە باژێران ، دیسان ئەڤان ئەگەرێن مە گوتی ئەگەرەکا دن پەیداکریە کو ئەو ژی لاوازبونا ھەستا نەتەوەیی و پێکڤەژیانێ یە ، بەلێ ئەگەر حکومەت پتر پووتەدانێ ب ژیانا گوندان بدەتن و خزمەتگوزاریێن زێدەتر بوو گوندیان درۆست بکەت دێ جارەکا دن پەیوەندیێن وان نوو بنەڤە ژ بەرکو تێکچوونا پەیوەندیێن جڤاکیێن گوندیان مەترسی بوو سەر گشت جڤاکی ب باژێرڤە ھەیە “

ل دوماھیێ یاسین محەمەدی گۆت : “ ل گوندان پووتە ب رەوشەنبیریا جڤاکی و گەنجان ناھێتەدان و ھەر گەنجەک پشت بەستنێ ب پەروەردەکرنا خوە دکەت و پەروەردەکرنا بڤی رەنگی کارتێکرنێن جودا جودا پشت خوە دھێلیت ، ژ بەرڤێ پێدڤی یە کو جھێن شولەژێ ھەر وەکو باژێرا گوندان ژی گرنگ وەربگریت چونکی نە رەوشەنبیریا جڤاکی و پوتەنەدان ب بھانەیێن مروڤایەتی و ئاڤەدان نەکرنا گوندان وەکو خانوو یان سەنتەرێن رەوشەنبیری و نەبوونا ھێلێن ئنترنێتێ بوویە سەدەم کو گوندی ھزر د ڤەگوھاستنا مالێن خوە بو باژێران بکەن . ب ھزرا من ئەگەر ھوسا بچیت دێ گوندی بەر بنەمانێ چن و ھەموو قەستا باژێرا کەن “

ل گور راپرسییەکا سەنتەرێ رەوشەنبیری نزار کو تێدا ٤٧٠ گەنجێن دەڤەرا بارزان تێدا بەشدار بووینە و بەری نھا ھاتیە ئەنجامدان تایبەتی ب رەوشا گوندێن دەەرێ ڤەیە کا ئەرێ گەلو پەیوەندیێن گوند بو گوندی ھەتا چوو ئاستە تێدا دیاربوویە کو کو رێژا ٣٤،٠٤% پەیوەندیا تاکێن گوندێن بارزان دگەل ھەڤ زور یا باشە و ٥٠،٨٥% باشە و ١٥،١٠ باش نینە .