ئه‌ڤرۆ نيوز، ناجی به‌ده‌ل:

مامۆستايه‌كا زانكۆيا دهۆك يا بسپۆر د وارێ ئاڤێ دا دياركر كو گه‌فێن نه‌بوونا ئاڤێ يێن ل سه‌ر پاشه‌رۆژا هه‌رێمێ هه‌ين ژ ئه‌گه‌رێ چێكرنا سكران ل سه‌ر رووباران دا و پێدڤيه‌ هه‌ر ژ نووكه‌ كار ژ بوو وێ يه‌كێ بهێته‌ كرن.

شه‌یما محه‌مه‌د ره‌جه‌ب، ماموستایا كولیژا چاندنێ ل فاكولتيا چاندنێ و پسپۆر د بیاڤێ ئاڤێ دا، بۆ ئه‌ڤرۆ نیوز راگه‌هاند كو د پاشه‌رۆژێ دا گه‌فا ئاڤێ چاڤه‌رێ هه‌رێمێ دكه‌ت، دڤێت كار بۆ ئه‌وێ چه‌ندێ بهێته‌ كرن و بشیێن خوراگرين ژ مه‌ترسیێن بی ئاڤیێ.

ناڤبریێ دیار كر نها ئاڤا كانیا و سه‌ر ئه‌رد و بن ئه‌رد و بارانان يا باشه‌، لێ یا هه‌ره‌ زۆر رووبارێن مه‌زنن كو ژ ده‌رڤه‌ی هه‌رێمێ دهێنه‌ ناڤ هه‌رێمێ ئه‌و بووینه‌ جهێ مه‌ترسیێ و ل ئه‌وان ده‌وله‌تان سكرێن مه‌زن ل سه‌ر دهێنه‌ دروستكرن و ئه‌ڤه‌ ژى مه‌ترسيه‌ ل سه‌ر پاشه‌رۆژا ئاڤێ ل هه‌رێمێ.

شه‌یمایێ گۆتژی: “دڤێت كا چاوا به‌رهه‌نگاریا مه‌ترسیێن نها دبين، وه‌سان هشيارى ڤێ مه‌ترسێ ژى بين، دڤیت پرۆژه‌یه‌كی مه‌زن هه‌بیت ژ بوو پاشه‌رۆژی و دێ بیته‌ كارته‌كا فشارێ ژی و خوه‌ ده‌رخستن ژ ئه‌وێ گه‌فێ و كاریگه‌ریێن كێمبوونا ژێده‌رێن ئاڤا رووباران، دڤێت مه‌ ژی پرۆژێن مه‌زن هه‌بن وه‌ك سكرێن مه‌زن و هه‌لگرتنا وێ بۆ ده‌مێ پێدڤی”.

ئه‌و ئێكه‌ ژی دا زانین كو نها ل هه‌رێمێ كار ل سه‌ر هندێ دهێته‌كرن لی ژ به‌ر ئه‌و ره‌وشا ئابووری دروست بووی د ناڤبه‌را هه‌رێمێ و عیراقێ و گرتنا چه‌ندین باژێرێن عیراقێ ژ لایێ داعش ڤه‌، سستیه‌ك خستیه‌ دڤی بیاڤی دا، له‌ورا ل ده‌مێ ئاسای بوونێ دڤێت كار ل سه‌ر بهێته‌كرن ژ بوو نه‌هێلانا مه‌ترسیا گه‌فا ئاڤێ ل پاشه‌رۆژێ .

ئه‌ڤرۆ نيوز:

عادل عه‌بدولمه‌هدى وه‌زيرێ په‌ترۆلا عيراقێ، د راگه‌هاندنه‌كێ دا ئاشكه‌را كر كو رێكه‌فتن ل گه‌ل حوكمه‌تا هه‌رێمێ دێ رێژا هنارتنا په‌ترۆلێ د رۆژێ دا ب ئێك مليۆن به‌رميل زێده‌كه‌ت ب رێيا هێلا كوردستان كه‌ركووك و هێلێن باكوورى ب گشتى.

ئاشكه‌را ژى دكه‌ت كو ئه‌ڤه‌ ژى دێ ب ده‌هان مليۆن دولاران بۆ گه‌نجينا عيراقێ ڤه‌گه‌رينيت، ئه‌و رێژا په‌ترۆلێ يا ل سالا 2014 ژ ده‌ستێن عيراقێ چوويى ب بهايێ30 مليار دولارايه‌.

هه‌ر د ڤێ راگه‌هاندنێ دا دبێژيت ژى: “پێشتر حوكمه‌تا به‌اغدا و هه‌رێمێ رێكه‌فتنێن دى ژى ئيمزا كربوون، به‌لێ بجهنه‌ئينان، يان بۆ ماه‌كێ به‌روه‌خت هاتينه‌ بجهئينان و پاش هاتينه‌ راگرتن ژ وان ژى رێكه‌فتنا 20\4\2014 كو ب گۆره‌ى وێ رێكه‌فتنێ پێدڤى بوو هه‌رێمێ رۆژانه‌ 50 هزار بۆشكه‌يێن په‌ترۆلي د رێيا بۆريێن عيراق- توركيا و 50 هزار ژى د رێيا ده‌ڤه‌را زاب را هنارت بان، به‌لێ ژ ئه‌گه‌رێ سياسه‌تێن تاكره‌وى هاتنه‌ راگرتن. ئه‌ڤه‌ ژى بوو ئه‌گه‌رێ هندێ ب ده‌هان مليار ديناران زيان بگه‌هيته‌ مه‌ د ده‌مه‌كى دا كو مه‌ گه‌له‌ك پێدڤى يا پێ هه‌يى و هێشتا بهايێ په‌ترۆلێ يێ دهێته‌ خوار كو پێشبينى دهێته‌ كرن هێشتا بهێته‌ خار ب تايبه‌ت ل سالا 2015ێ”.

د پشكه‌كا دى يا ڤێ راگه‌هاندنێ دا، عادل عه‌بدولمه‌هدى، وه‌زيرێ په‌ترۆلا عيراقێ گۆت: “به‌رى نوكه‌ رێگرى د چاوان بن، نوكه‌ ئه‌م يێن ل به‌ر دو حاله‌تان، يان رێكنه‌كه‌ڤين و هه‌ردو لا زيانێ بكه‌ن، يان رێكه‌ڤين و هه‌ردو لا مفادار بن. دڤێت د ئاستێ به‌رپرساتيێ دابين، سياسه‌تا ئێكێ يا وێرانكارى يه‌، سياسه‌تا به‌رى نوكه‌ به‌لگه‌كێ رۆهنه‌ ل سه‌ر ڤێ چه‌ندێ، به‌لێ مفايێ ب هه‌ڤپشكى، دبيته‌ ئه‌گه‌ر مفايێ نه‌يێ راسته‌وخوه‌ و نه‌ديتى بهێته‌ سه‌ر مفا و سه‌ركه‌فتنێن مه‌ و ئه‌ڤه‌ ژى نيشان دده‌ت كو ئێك ميلۆن به‌رميلێن په‌ترۆلێ ب تنێ هژماره‌ نه‌بن، به‌لێ دێ بنه‌ سيسته‌مه‌ هژماره‌ك كو ده‌سكه‌فت و مفايێ هه‌ڤپشك و نه‌يێ ئێكسه‌ر بده‌ته‌ هه‌ردو لايان و ئه‌ڤه‌ ژى د به‌رژه‌وه‌ندا هه‌موو خه‌لكێ عيراقێ دايه‌”.