ل ئێڤارییا رۆژا ئیكشەمبی 12-1-2025، نێچیرڤان بارزانی، سەرۆكێ هەرێما كوردستانێ گەهشتە بەغدایێ و پشتی گەشهتنا وی پشكداری د كۆمبوونا هەڤپەیمانییا ب رێڤەبرنا دەولەتێدا كر كو وێ هەڤپەیمانیێ حوكمەتا ئیراقێ ب سەرۆكایەتییا محەمەد شیاع سودانی پێكئینایە، هەروەسا سەرۆكێ هەرێما كوردستانێ ل گەل محەمەد شیاع سودانی، سەرۆك وەزیرێن ئیراقێ و مەحمود مەشهەدانی، سەرۆكێ جڤاتا نوونەرێن ئیراقێ كۆمبوو، هەروەسا چەندین دیدار ل گەل بەرپرسێن بلند یێن ئیراقی ئەنجامدان.
د كۆمبوونا هەڤپەیمانییا ب ڕێڤەبرنا دەولەتێ دوپاتی ل پێدڤییا پشتەڤانییا هەموو ئالییان بۆ ب جهئینانا بەرنامەیێ حوكمەتێ د هەموو واراندا هاتە كرن
نێچیرڤان بارزانی، سەرۆكێ هەرێما كوردستانێ پشكداری د كۆمبوونا هەڤپەیمانییا ب رێڤەبرنا دەولەتێدا كر كو ب بەرهەڤبوونا محەمەد شیاع سودانی، سەرۆك وەزیرێن ئیراقا فیدرال و د. مەحمود ئەلمەشهەدانی، سەرۆكێ جڤاتا نوونەرێن ئیراقێ ب رێڤەچوو.
سەرۆكایەتییا هەرێما كوردستانێ ل دۆر كۆمبوونا هەڤپەیمانییا ب رێڤەبرنا دەولەتێ ب پشكدارییا سەرۆكێ هەرێما كوردستانێ د بەیاننامەیەكێدا بەلاڤكر» نێچیرڤان بارزانی، سەرەرای دوپاتكرنێ ل ماف و شایستەیێن قانوونی و دستووری یێن هەرێما كوردستانێ، رۆلێ محەمەد شیاع سودانی، سەرۆك وەزیرێن ئیراقێ بلند هەلسەنگاند كو ل دەمێ سالا بۆری كاركریە بۆ تێكگەهشتنا هەولێرێ – بەغدایێ و هیڤی خواست هەموو پرس ب دانوستاندنێ بهێنە چارەسەركرن».
سەرۆكایەتییا هەرێمێ دیاركر ژی» د كۆمبوونێدا، دوپاتی ل پێدڤییا پشتەڤانییا هەموو ئالییان بۆ ب جهئینانا بەرنامەیێ حوكمەتێ د هەموو واراندا هاتە كرن، هەروەسا پشتەڤانی ل چاكسازیێن دارایی و ئابووری یێن حوكمەتێ هاتە كرن، دوپاتی ژی هاتە كرن كو هیچ هەلویستەكێ سیاسی د پرسا مووچەیێن فەرمانبەرێن هەرێما كوردستانێدا نینە، ژ بلی پرسێن تەكنیكی، كو د شیاندایە ب رێكا دانوستاندنێ و تێكگەهشتنێ، چارەسەری بۆ بهێتە دیتن».
ئاماژە كر ژی» كۆمبوونا هەڤپەیمانییا ب رێڤەبرنا دەولەتێ داخوازكر ئیراق ب جۆرەكی رەفتارێ ل گەل ئاستەنگ و روودانێن دەڤەرێ و نێڤدەولەتیدا بكەت كو بەرژەوەندییا ئیراقێ بپارێزیت و ژ ململانێ و قەیرانان بهێتە دوورئێخستن، هەروەسا باس ل رەوشا سووریێ هاتە كرن و بەرهەڤییا ئیراقێ بۆ پشتەڤانیێ ل گەلێ سووریێ هاتە دوپاتكرن» .
نێچیرڤان بارزانی و سودانی: پێگیریێن د ناڤبەرا هەردو حوكمەتاندا ب باشترین رێك بهێنە رێكخستن
هەر د چارچۆڤەێ سەرەدانا خوە دا بۆ بەغدایێ، نێچیرڤان بارزانی، سەرۆكێ هەرێما كوردستانێ ل گەل محەمەد شیاع سودانی، سەرۆك وەزیرێن ئیراقێ كۆمبوو، سەرۆكایەتییا هەرێما كوردستانێ ل دۆر وێ كۆمبوونێ بەلاڤكر» دانوستاندن ل سەر پێشهاتێن نوو ل سەر ئاستێ ئیراقێ و دەڤەرێ هاتە كرن، هەروەسا دوپاتی ل پێدڤییا پشتەڤانیكرنا حوكمەتا فیدرال و سەرئێخستنا ب جهئینانا بەرنامەیێ حكومی هاتە كرن، ب شێوەیەكێ كو خواستێن هەڤوەلاتییان ل سەرانسەری وەلاتی ب دەستڤەبینیت».
سەرۆكایەتییا هەرێما كوردستانێ دیاركر ژی» دانوستاندن ل سەر پرسێن خزمەتگوزاریێن پەیوەندیدار ب بەرژەوەندیێن هەڤوەلاتییان هاتە كرن و باشترین رێك بۆ رێكخستنا پێگیریێن د ناڤبەرا حوكمەتا فیدرال و حوكمەتا هەرێما كوردستانێ، ب گۆڕەی بنەمایێن دستووری و قانوونی، هاتنە گەنگەشەكرن».
ب گۆڕەی بەیاننامەیا سەرۆكایەتییا هەرێمێ» نێچیرڤان بارزانی و سودانی دوپاتی ل سەر گرنگییا هاریكاری و هەماهەنگییا هەڤپشك د ناڤبەرا هەموو هێز و ئالیێن سیاسی كر بۆ بەرهنگاربوونا ئاستەنگان ل وەلاتی، ب شێوەیەكی كو بەرژەوەندییا هەموو پێكهاتەیێن گەلێ ئیراقێ ب دەستڤەبینیت و چەسپاندنا ئاسایشێ و سەقامگیریێ و سەروەرییا نیشتمانی ب هێز بكەت».
نڤیسینگەها رۆژنامەڤانییا سەرۆك وەزیرێن ئیراقێ ل دۆر كۆمبوونا نێچیرڤان بارزانی و سودانی بەیاننامەیەك بەلاڤكر و تێدا دیاركر» د كۆمبوونێدا، سەرۆكێ هەرێما كوردستانێ باس ل باشترین رێك بۆ رێكخستنا پێگیریێن د ناڤبەرا هەردو حوكمەتێن فیدرالی و هەرێما كوردستانێ هاتە كرن كو ب گۆڕەی دستووری و ئەوا د قانوونا بۆدجەیا گشتیدا بڕیار ل سەر هاتییە دان».
نڤیسینگەها رۆژنامەڤانییا سودانی دیاركر ژی» د كۆمبوونێدا باس ل پێشهاتێن ناڤخوەیی و دەڤەرێ هاتە كرن و دوپاتی ل گرنگییا پشتەڤانییا حوكمەتا فیدرالی و سەرئێخستنا وی هاتە كرن د جهئینانا كارنامەیا حوكمەتێدا، ب شێوەیەكی كو خواستا هەڤوەلاتییان ل سەرانسەری وەلاتی ب جهبینیت».
نێچیرڤان بارزانی ل دۆر پرسا مووچەی بۆ مەحمود مەشهەدانی: رۆلێ خوە ببینن
نێچیرڤان بارزانی، سەرۆكێ هەرێما كوردستانێ دوهی دوشەمبی 13/1/2025 ل بەغدا ل گەل مەحمود مەشهەدانی، سەرۆكێ جڤاتا نوونەرێن ئیراقێ كۆمبوو و پەیوەندیێن هەولێرێ ل گەل دەستهەلاتێن فیدرالی هاتە گەنگەشەكرن و دوپاتی ل گرنگییا ب هێزكرنا هاریكاریێ بۆ چارەسەركرنا كێشەیێن هەلاویستی ب گۆڕەی دستوورێ ئیراقێ، هاتە كرن، هەردو ئالی ژی د هەڤڕابوون ل سەر پێدڤییا پێشڤەبرنا هاریكارییا هەڤپشك، ب شێوەیەكی كو هاریكارییا سەقامگیریێ و گەشەكرنێ ل وەلاتی بكەت.
نێچیرڤان بارزانی دوپاتی ل سەر گرنگییا رۆلێ جڤاتا نوونەران د ب هێزكرنا دیالۆگا نیشتمانی و دەستەبەركرنا دادپەروەریێ و ئێكسانیێ بۆ هەموو پێكهاتەیێن گەلێ ئیراقێ و چارەسەركرنا كێشەیێن وەلاتی، ب تایبەتی كێشەیێن هەولێرێ- بەغدایێ، كر. ل درۆر وێ چەندێ سەرۆكێ هەرێما كوردستانێ داخواز ژ سەرۆكێ جڤاتا نوونەرێن ئیراقێ كر» د راستڤەكرنا قانوونا بۆدجەیا فیدرال بۆ سالا 2025 رۆلێ خوە ببینن، ب جۆرەكی كو دادپەروەری د دەستەبەركرنا ماف و شایستەیێن دارایی یێن هەرێما كوردستانێ بكەت، ب تایبەتی پرسا دابینكرنا مووچەیێن مووچەخۆرێن هەرێما كوردستانێ، وەكو هەموو ئیراقێ».
د تەوەرەكێ دی یێ كۆمبوونێدا، هەردو ئالییان رەوشا دەڤەرێ و گوهۆڕینێن سووریێ گەنگەشەكرن و دوپاتی ل سەر گرنگییا هەماهەنگیێ د ناڤبەرا هەموو ئالییان بۆ بەرهنگاربوونا ئاستەنگان كر.
سەرۆكێ هەرێمێ و سەرۆككۆمارێ ئیراقێ دوپاتیێ ل دابینكرنا مووچەیێن فەرمانبەرێن هەرێمێ دكەن
هەر دوهی دوشەمبی 13/1/2025 سەرۆكێ هەرێما كوردستانێ ل بەغدا ل گەل د. عەبدولەتیف رەشید، سەرۆككۆمارێ ئیراقا فیدرال كۆمبوو و هەردو ئالییان رەوشا سیاسی، ئەمنی و ئابوورییا وەلاتی، پەیوەندیێن د ناڤبەرا دەستهەلاتێن فیدرالی و هەرێما كوردستانێ و دووماهی پێشهاتەیێن دەڤەرێ گەنگەشەكرن.
هەردو ئالییان دوپاتی ل گرنگییا بەردەوامییا دانوستاندنا ئالیێن پەیوەندیدارێن هەرێما كوردستانێ و دەستهەلاتێن فیدرالی، دەربازكرنا خالێن ناكۆكی ل سەر ب گۆڕەی قانوونێ و دستووری و دابینكرنا شایستە و مووچەیێن فەرمانبەران و خانەنشینێن هەرێما كوردستانێ كر. سەبارەت ڤێ چەندێ هەردو ئالی د هەڤڕا بوون ل سەر گرنگییا سەرەدانێن د ناڤبەرا ئالیێن بەرپرس یێن حوكمەتا فیدرال و حوكمەتا هەرێما كوردستانێ بۆ تێكگەهشتنا هەڤپشك و ب هێزكرنا بنەمایێن دیالۆگا ئاڤاكەر و كارا بۆ چارەسەركرنا كێشەیان و دەربازكرنا بەربەستان.
نێچیرڤان بارزانی داكۆكی ل پێدڤییا دابینكرنا شایستەیێن دارایی یێن هەرێما كوردستانێ ژ ئالیێ حوكمەتا فیدرالی كر، دوپاتكر ژی كو تێكگەهشتن و چارەسەركرنا كێشەیان، هاریكارییا ب هێزكرنا پەیوەندیێن هەردو ئالییان دكەت، هەروەسا سوپاسییا بزاڤێن سەرۆككۆماری كر بۆ دووڤچوونا پرسێن هەولێرێ- بەغدایێ.
نێچیرڤان بارزانی و سەرۆكێ دادگەها فیدرال: ناكۆكی ل سەر بنەمایێ دستووری بهێنە چارەسەركرن
نێچیرڤان بارزانی، سەرۆكێ هەرێما كوردستانێ ل بارەگەهێ دادگەها فیدرالی ل گەل جاسم محەمەد عەبود، سەرۆكێ دادگەها فیدرالییا ئیراقی كۆمبوو. سەرۆكایەتییا هەرێمێ بەلاڤكر» نێچیرڤان بارزانی سوپاسی و پێزانین بۆ رۆلێ گرنگ یێ دادگەها فیدرالی د ئەنجامدان و سەرئێخستنا هەلبژارتنێن پەرلەمانێ كوردستانێ و هاریكاری د چارەسەركرنا پرسێن دناڤبەرا هەولێرێ و بەغدایێ دا ب تایبەتی ژی د پرسێن مووچەی و شایستەیێن دارایی دوپاتكر، هەروەسا رۆلێ دادگەهێ ل پاراستنا پڕۆسەیا دیموكراسی ل وەلاتی، بلند هەلسەنگاند».
بەلاڤكر ژی» هەردو ئالییان دوپاتی ل سەر پێدڤییا هاریكارییا د ناڤبەرا دەستهەلاتێن دادوەری و دەزگەهێن فیدرالی و هەرێمیدا كر بۆ چارەسەركرنا ناكۆكییان ل سەر بنەمایێ قانوونی و دستووری ب جۆرەكی كو ب هێزكرنا سەقامگیرییا نیشتمانی و پاراستنا سەروەرییا قانوونێ، دەستەبەر بكەت».
نێچیرڤان بارزانی و مالكی: پێدڤییە تێكگەهشتن و دیالۆگا سیاسی د ناڤبەرا ئالیێن ئیراقیدا هەبیت
هەر د چارچۆڤەیێ كۆمبوونێن خوە دا ل بەغدا، دوهی دوشەمبی 13/1/2025، نێچیرڤان بارزانی، سەرۆكێ هەرێما كوردستانێ ل گەل نوری مالكی، سەرۆكێ هەڤپەیمانییا دەولەتا قانوونێ كۆمبوو.
سەرۆكایەتییا هەرێمێ بەلاڤكر» د كۆمبوونێدا ب هێزكرنا هەڤپشكییا نیشتمانی و چارەسەركرنا پرسێن هەلاویستی د ناڤبەرا هەولێرێ و بەغدایێ ب گۆڕەی دستوورێ ئیراقێ هاتە گەنگەشەكرن، هەردو ئالی د هەڤڕابوون ل سەر گۆنگییا پێگیریبوونێ ب دستووری بۆ بدەستڤەئینانا مافێن هەموو پێكهاتەیێن ئیراقێ».
دیاركر ژی» نێچیرڤان بارزانی و نوری مالكی د هەڤڕابوون ل سەر پێدڤییا تێكگەهشتنێ و ب هێزكرنا دیالۆگا سیاسی د ناڤبەرا هێز و ئالیێن ئیراقی و ئێكستنا بزاڤان بۆ بەرهنگاربوونا ئاستەنگێن ل پێشبەری وەلاتی».
د تەوەرەكێ دی یێ كۆمبوونێدا باس ل پێشهاتێن دەڤەرێ، ب تایبەتی رەوشا سووریێ هاتە كرن، هەروەسا رۆناهی ئێخستە سەر ئەگەر و كارتێكرنێن رەوشا رۆژهەلاتا ناڤین ل سەر ئیراقێ و دەڤەرێ و ل دۆر ڤێ چەندێ داكۆكی ل سەر گرنگییا كارێ هەڤپشك بۆ پاراستنا ئارامی و سەقامگیرییا وەلاتی هاتە كرن.
نێچیرڤان بارزانی و عەبادی داكۆكیێ ل پێدڤییا كارێ هەڤپشك بۆ چارەسەركرنا پرسێن نیشتمانی دكەن
هەر ل بەغدا نێچیرڤان بارزانی، سەرۆكێ هەرێما كوردستانێ ل گەل د. حەیدەر عەبادی ، سەرۆكێ هەڤپەیمانییا نەسر كۆمبوو. د دیدارەكێدا باس ل ب هێزكرنا هاریكاریێ د ناڤبەرا هەولێرێ و بەغدایێ هاتە كرن، هەروەسا داكۆكی ل پێدڤییا كارێ هەڤپشك هاتە كرن بۆ چارەسەركرنا پرسێن نیشتمانی، ب شێوەیەكی كو سەقامگیرییا وەلاتی و مافێ هەموو پێكهاتەیێن دابین بكەت.
ل دووماهی تەوەرێ كۆمبوونێ هەردو ئالییان دووماهی پێشهاتێن دەڤەرێ و چەند پرسێن دی گەنگەشەكرن.
نێچیرڤان بارزانی و موسەنا سامەرائی راستڤەكرنا قانوونا بودجەی گەنگەشە دكەن
ل درێژییا كۆمبوونێن وی ل بەغدا، نێچیرڤان بارزانی، سەرۆكێ هەرێما كوردستانێ ل گەل موسەننا سامەرائی، سەرۆكێ هەڤپەیمانییا عەزم یا سوننی كۆمبوو، د دیدارەكێدا هەردو ئالییان باس ل رەوشا سیاسیی وەلاتی و چاوانییا ب هێزكرنا پەیوەندیێن حوكمەتا ئیراقا فیدرال و حوكمەتا هەرێما كوردستانێ كر ب شێوەیەكی هاریكارییا سەقامگیرییا ئیراقێ بكەت و كارێ هەڤپشك بۆ چارەسەركرنا كێشەیان پێشڤەببەت.
هەردو ئالییان رۆناهی ئێخستە سەر پرسا راستڤەكرنا قانوونا بۆدجەی و دوپاتی ل سەر پێدڤییا پاراستنا مافێن هەموو پێكهاتەیێن ئیراقێ و دەستەبەركرنا ئێكسانیێ د ناڤبەرا واندا كر، ب شێوەیەكی كو پێكڤەژیانا ئاشتییانە ب هێزبكەت و گیانێ دادپەروەریێ وەكو د دستوورێ ئیراقێدا هاتی، بەرجەستە بكەت.

دوهی ئێكشەمبی 12/1/2025، مەسرور بارزانی، سەرۆكێ حوكمەتا هەرێما كوردستانێ سەرپەرشتییا كۆمبوونەكا تایبەت كر بۆ ڤەكۆلینێ و دووڤچوونا كێشەیا پیسبوونا سەقایێ هەردو باژێرێن هەولێرێ و دهۆكێ
سەرۆكێ حوكمەتا هەرێما كوردستانێ ئاماژەكر» پرسا ژینگەهپارێزیێ پشكەكا گرنگ یا كارنامەیا حوكمەتا هەرێما كوردستانێیە و پێدڤییە ئەرك و خەما مە هەموویان بیت و دڤێت ژینگەه و سروشتێ جوان یێ كوردستانێ ب پاقژی رابگرین و پاراستن و پاقژراگرتنا ژینگەهێ، ئەركێ هەموو ئالیەكییە».
سەرۆكێ حوكمەتا هەرێمێ دوپاتكر ژی» پاراستنا ساخلەمییا هەڤوەلاتییان و ژینگەها هەرێما كوردستانێ و چارەسەركرنا كێشەیا پیسبوونا سەقای، ل دەف گەلەك یا گرنگە و ئەركێ بەراهیێ یێ حوكمەتێیە و سەبارەت ڤێ چەندێ مە ئالیێن پەیوەندیدار راسپاردن، پێرابوونێن پێدڤی بۆ رێگریێ ل وان هۆكارێن دبنە ئەگەرێ پیسبوونا هەوای و ژینگەهێ و سازادانا سەرپێچكاران، وەربگرن» .
سەبارەت ڤێ چەندێ بڕیار هاتە دان:
ئێك: ژ ئەڤرۆ و وێڤە هەر پارزینگەهەك، یان هەر كارگەهەكا ژ دەرڤەی مەرج و رێنمایان كار بكەت و ببیتە ئەگەرێ پیسبوونا ژینگەهێ، پێرابوونێن قانوونی دێ ل بەرامبەر هێنە وەرگرتن.
دو: رێك ل هەر پارزینگەهەكێ یان هەر كەس و ئالییەكی دێ هێتە گرتن كو سوتەمەنییا پیس یا ترۆمبێلان بەرهەم دئینیت یان ب قەچاخ دئینیت و زیان ل سەر ساخلەمیێ هەی. هەروەسا دڤێت سنوورەك بۆ سوتنا غازا د گەل (الغاز المصاحب) ل زەڤیێن پەترۆلی بهێتە دانان.
سێ: دڤێت خودانێن موەلیدەیێن كارەبێ، پێگیری رێنمایێن حوكمەتێ بن و فیلتەر بۆ دەنگی و پیسیێ هەبیت و هەر كەسەكێ سەرپێچیێ بكەت دێ پێرابوونێن قانوونێ ل بەرامبەر هێنە وەرگرتن.
چار: رێگری ل ب كارئینانا ئاڤا پیس و ئاڤرۆیان بهێتە كرن كو بۆ ئاڤدانا كەسكاتیێ و ئاڤدێریێ دهێتە بكارئینان.

سەرۆكا فراكسیۆنا پارتی دیموكراتی كوردستان ل جڤاتا نوونەرێن ئیراقێ راگەهاند: چەندین سالە حوكمەتا فیدرال رەفتارەكا دروست ل گەل هەرێما كوردستانێ و خەلكێ وێ ناكەت، رەفتارا نە وەكو هەرێمەكا فیدرال، بەلكو وەكو پارێزگەهەك ژی ل گەل هەرێما كوردستانێ ناكەت.
د. ڤیان سەبری، سەرۆكا فراكسیۆنا پارتی دیموكراتی كوردستان ل جڤاتا نوونەرێن ئیراقێ ئاماژەكر كۆمبوونا رۆژا شەمبیێ یا جڤاتا وەزیرێن هەرێما كوردستانێ ب سەرۆكایەتییا مەسرور بارزانی، سەرۆكێ حوكمەتا هەرێمێ، كۆمبوونەكا دیرۆكی بوو د دەمەكێ هەستییاردا و گۆت» چەندین سالە حوكمەتا فیدرال رەفتارەكا دروست ل گەل حوكمەتا هەرێما كوردستانێ و خەلكێ وێ ناكەت، رەفتارا بەغدا ل گەل هەولێرێ شێوازێ فیدرالی نینە، گەلەك جاران كێمتر ژ پارێزگەهەكێیە، هەموو جاران مووچە و شایستەیێن خەلكێ كوردستانێ ب كێمی و گیرۆبوون و كێشەیێن دی دهنێریت».
ڤیان سەبری ئاماژە ب وێ چەندێ كر» ئیراق رۆژانە فەرمانبەرێن خوە زێدە دكەت و د دامەزرینیت، سەرمووچە یێ هەی و هەژمارا حەشدا شەعبی زێدە دكەت، ب شێوەیەكی وەلێكریە حەشدا شەعبی ببیتە رێكخراوەكا گەلەك مەزن، بەلێ رێكێ نادەن دو كەس ل هەرێما كوردستانێ بهێنە دامەزراندن و گرێبەست د گەلدا بهێتە كرن».
سەرۆكا فراكسیۆنا پارتی ل جڤاتا نوونەرێن ئیراقێ رۆهنكر ژی» بەغدا ل سالا 2024 زێدەتر ژ 22 ترلیۆن دینار ل سەر بۆدجەیا وەبەرئێنانێ یێن خەرج كرین، هەر د وێ سالێدا ئێك دینار بۆ هەرێما كوردستانێ بۆ پڕۆژەیێن وەبەرئێنانێ نەهنارتییە».
گۆت ژی» پێدڤییە مووچە و شایستەیێن خەلكێ كوردستانێ بۆ سالا 2025 ل بەغدا د گرەنتیكری بن، راستڤەكرنا بڕگە و خشتە و خەرجیێن هەرێما كوردستانێ ب گۆڕەی وێ خەرجییا راستەقینە بیت كو ل هەرێما كوردستانێ هەی، نەكو ب كەیفا وان بیت» هەروەسا دیاركر ژی كو بابەتەكێ دی ئەوە، بۆ سالا 2026 بشێین رێژەیا هەرێما كوردستانێ نەبیتە پشك پشك.
ڤیان سەبری راگەهاند ژی» د بۆدجەیدا، 5% بۆ خەرجیێن سیادی دچیت كو گەلەك بابەت یێن تێدا بۆ كوردستانێ نینە، هەروەسا ژ وی قەرێ ئیراق ژ وەلاتان وەردگریت تنێ 2،3% ژێ ب هەرێما كوردستانێ هاتییە دان، د دەمەكیدا پێدڤییە پشكا هەرێما كوردستانێ كێمتر نەبیت ژ 12،67% ژ وان قەران».
ئاشكراكر ژی» كۆمبوونا رۆژا شەمبیێ یا جڤاتا وەزیرێن هەرێما كوردستانێ بۆ وێ چەندێ بوو، وەزیرێن كورد ل حوكمەتا فیدرال ل دەستپێكێ بچنە دەف سەرۆك وەزیرێن فیدرال و پەیاما حوكمەتا هەرێما كوردستانێ بگەهیننێ كو ئەم د رازی نینین ب وێ رەفتارا چەندین سالە بەغدا ل گەل هەرێما كوردستانێ دكەت».
خویاكر ژی» بەغدا ل سالا 2024، زێدەتر ژ 122 ترلیۆن دینار یێن خەرج كرین، تنێ 10 ترلیۆن و 26 ملیار دینار بۆ هەرێما كوردستانێ ژ وی پارەی یێن خەرج كرین، ناهێتە زانین پارەیێ دی چ لێهاتییە و بۆ كێ چوویە، د دەمەكیدا پارە بۆ پارێزگەهێن دی یێن ئیراقێ ژی ناچیت».
ل گەل وێ چەندێ ژی ڤیان سەبری باسێ مادەیێ 123 ژ دستوورێ بەردەوامێ ئیراقێ كر كو ئاماژێ ب قەرەبوویا قوربانیێن ئەنفالێ دكەت و هەتا نوكە بەغدا هیچ قوربانییەكێ ئەنفالێ قەرەبوو نەكریە، د دەمەكیدا قەرەبوویا هەموو زیندانیێن سیاسی و شەهیدێن خوە یا كری».
پتر گۆت» بەغدا هیچ هاریكارییەكا ئاوارەیان و كەمپان نەكریە، هەموو ئەرك ل سەر حوكمەتا هەرێما كوردستانێ بوو».
سەبارەت پرسا هنارتنا پەترۆلا هەرێما كوردستانێ، گۆت» بەغدا پرسا هنارتنا پەترۆلێ ژی یا كریە بابەتەكێ سیاسی».
دیاركر ژی» ژ بۆدجەیا هاوارهاتنێ، حوكمەتا فیدرال ل لەهی و سوتنا بازارێ بالا و بازارێن هەولێرێ هیچ پارەیەم نە هنارت كو پێدڤی بوو ب هنێریت».
ب دیتنا سەرۆكا فراكسیۆنا پارتی ل جڤاتا نوونەرێن ئیراقێ» ئێكهەلوەستییا كوردان ل بەغدا دێ كاریگەرییا خوە هەبیت، دڤێت هەموو ئالی پشكداریێ بكەن بۆ وێ چەندێ ئاگەهداری پرس و بابەتان بن، هەر پێشنیاز و گازندەیەكا هەبیت، ڤیابا ل وێرێ بەرچاڤ بكەن».
زێدەتر گۆت» كۆمبوونا ڤێ دووماهیێ یا جڤاتا وەزیرێن هەرێمێ بۆ گرەنتیكرنا مووچە و شایستەیێن سالا 2025 یێن خەلكێ كوردستانێ بوو، هەڤدەم گەهاندنا پەیامەكێ بوو بۆ سەرۆك وەزیرێن فیدرال كو ئەڤرۆ سەقامگیرییا هەرێما كوردستانێ بۆ ئیراقێ یا گرنگە» هەروەسا گۆت ژی» نوكە ئیراق یا ل سەر سێ پێیان، پێیەكی كورد و ئێك سوننە و ئێك ژی شیعە، یێن گەهشتینە قۆناغەكێ كو بێژینە بەغدا ل ڤێرێ دڤێت كێشە ب گۆڕەی دستووری و رێككەفتنا سیاسی بهێنە چارەسەركرن، پێدڤییە پێگیر بن ب ماف و شایستەیێن هەرێما كوردستانێ، ئەركێ مەیە وەكو نوونەرێن كوردان ل بەغدا ماف و شایستەیێن دارایی یێن كوردستانێ دابین بكەین».

ئەندامەكا جڤاتا نوونەرێن ئیراقێ ژ فراكسیۆنا پارتی دیموكراتی كوردستان راگەهاند: وەزارەتا داراییا فیدرال تنێ 400 ملیار دینار بۆ مووچەیێن مەها 12 یێن فەرمانبەرێن هەرێما كوردستانێ بۆ هەرێمێ یێن هنارتین، ئەڤە ژی كورتئینان ب گۆژمەیێ زێدەتر ژ 500 ملیار دیناران یا دروستكری.
ئیخلاس دلێمی، ئەنداما جڤاتا نوونەرێن ئیراقێ ژ فراكسیۆنا پارتی دیموكراتی كوردستان و جێگرا سەرۆكێ لژنەیا دارایی ل جڤاتا نوونەران گۆت» ب دیتنا من میكانیزمەك د ناڤبەرا حوكمەتا فیدرال و هەرێما كوردستانێ دا بۆ خەرجكرنا مووچەیێ مەها 12 دێ هەبیت، هەكە سالا دارایی ژی ب دوماهی هاتبیت، پێدڤییە مووچە بهێتە خەرجكرن».
جێگرا سەرۆكێ لژنەیا دارایی ل جڤاتا نوونەرێن ئیراقێ گۆت ژی» وەزارەتا داراییا فیدرال، تنێ 400 ملیار دینار بۆ مووچەیێن مەها 12 بۆ هەرێما كوردستانێ یێن هنارتین، ئەڤێ چەندێ ژی كورتئینان ب گۆژمەیێ زێدەتر ژ 500 ملیار دیناران یا دروستكری».
ئیخلاس دلێمی، دوپاتی ل وێ چەندێ ژی كر» بڕیارا دادگەها فیدرالی یا رۆهنە، پێدڤییە مووچە بهێتە گرەنتیكرن، دادگەهێ باس وێ چەندێ نەكریە گرەنتیكرنا مووچەی د چارچۆڤەیێ بڕگەیا قەرەبووكرنا فەرمانبەراندا بیت. بەلكو د چارچۆڤەیێ 20 ترلیۆن دینارێن پشكا هەرێما كوردستانێ د بۆدجەی دا بیت».

ئەندامەكا بەرێ یا جڤاتا نوونەرێن ئیراقێ ژ فراكسیۆنا پارتی دیموكراتی كوردستان راگەهاند، 10 سالە، بەغدا بۆدجەیا هەرێما كوردستانێ ب تمامی نە هنارتییە.
نەجیبە نەجیب، ئەندامێ بەرێ یا جڤاتا نوونەرێن ئیراقێ ژ فراكسیۆنا پارتی دیموكراتی كوردستان و ئەنداما بەرێ یا لژنەیا دارایی ل جڤاتا نوونەران گۆت» بەغدا، 10 سالە بۆدجەیا هەرێما كوردستانێ ب تمامی نەهنارتییە، ئێكەمین و گرنگترین كار، كو پێدڤییە بهێتە كرن، پاراستنا ئێكڕێزییا ناڤمالا كوردییە، بەرهەڤنەبوونا هندەك ئالییان ل كۆمبوونا دوهی یا جڤاتا وەزیرێن هەرێما كوردستانێ و نوونەرێن كورد ل حوكمەتا فیدرال و فراكسیۆنێن كوردستانێ ل جڤاتا نوونەرێن ئیراقێ، رامانا لادانا وانە ژ ئێكڕێزییا ناڤمالا كوردی».
نەجیبە نەجیب گۆت ژی» پێدڤییە ئالیێن كوردی، بەرانبەر حوكمەتا ئیراقێ، د ئێكڕێز بن و ب هێز بچنە د ناڤ كۆمبووناندا و خودان ئێك بڕیار و ئێك هەلوەست بن».

ئەندامەكێ جڤاتا نوونەرێن ئیراقێ ژ فراكسیۆنا پارتی دیموكراتی كوردستان دبێژیت: هەرێما كوردستانێ هەموو پێگیریێن خوە یێن ب جهئیناین، بەلێ هەتا نوكە حوكمەتا ئیراقێ ێگیریێن خوە بەرانبەر رێككەفتنان ل گەل هەرێما كوردستانێ ب جه نەئیناینە.
مەحما خەلیل، ئەندامێ جڤاتا نوونەرێن ئیراقێ ژ فراكسیۆنا پارتی دیموكراتی كوردستان ل دۆر كۆمبوونا رۆژا شەمبییا بۆری یا جڤاتا وەزیرێن هەرێما كوردستانێ، گۆت» پێدڤییە ئەڤ جۆرە كۆمبوونە بۆ گرەنتیكرنا مافێ هەڤوەلاتیێن هەرێما كوردستانێ د بەردەوام بن، هەروەسا وەزیرا داراییا ئیراقێ جوداهی د ناڤبەرا مووچەیێن فەرمانبەرێن باژێرێن دی یێن ئیراقێ و كوردستانێ دا دكەت».
مەحما خەلیل رۆهنكر ژی» پێدڤییە نوونەرێن ئالیێن كوردستانی ئێك دەنگ بن ل بەغدا و پێكڤە بڕیارێ بدەن خوە ژ جڤاتا نوونەرێن ئیراقێ ڤەكێشن، هەتاكو ماف و شایستەیێن دارایی بۆ موچەخۆرێن هەرێما كوردستانێ دهێنە دابینكرن».
ناڤبری باس ل وێ چەندێ ژی كر» هەرێما كوردستانێ هەموو پێگیریێن خوە یێن ب جهئیناین، بەلێ هەتا نوكە حوكمەتا ئیراقێ پێگیریێن خوە بەرانبەر رێككەفتنێن ل گەل هەرێما كوردستانێ ب جه نەئیناینە».
مەحما خەلیل دوپاتی ل وێ چەندێ ژی كر» سەرۆك وەزیرێن ئیراقێ ب ئاراستەیا چارەسەركرنا كێشەیان ل گەل هەرێما كوردستانێ پێنگاڤ یێن هاڤێتین، بەلێ هەردەم هندەك كەس و ئالی دبنە ئاستەنگ ل پێشبەری بڕیار و پێنگاڤێن وی بەرانبەر هەرێما كوردستانێ».
سەرنج بۆ وێ چەندێ راكێشا» ئەو كاربەدەستێن كو ل بەغدا دژی دانا ماف و شایستەیێن هەرێما كوردستانێ نە و بڕیارا دادگەها فیرالی پێشێل دكەن، پێدڤییە باوەری ژێ بهێتە وەرگرتن».

سەرۆك مەسعود بارزانی پێشوازی ل فەرامەرز ئەسەدی، قۆنسلێ نوو یێ كۆمارا ئیسلامییا ئیرانێ ل هەولێرێ كر.
د دیدارەكێدا سەرۆك بارزانی پیرۆزباهییا دەستبكاربوونێ ل قۆنسلێ نوو یێ كۆمارا ئیسلامییا ئیرانێ ل هەولێرێ كر و هیڤییا سەركەفتنێ بۆ خواست د ئەركێ وی یێ نوو دا.
هەر د وێ دیدارێدا دوپاتی ل گرنگییا پەیوەندیێن د ناڤبەرا كۆمارا ئیسلامییا ئیرانێ و هەرێما كوردستانێ هاتە كرن.
رەوش و گوهۆڕینێن رۆژهەلاتا ناڤین و دەڤەرێ ب گشتی تەوەرەكێ دی یێ وێ دیدارێ بوو.

سەرۆك مەسعود بارزانی پێشوازی ل نەزمی حزوری، قۆنسلێ گشتیێ فلستینێ ل هەولێرێ كر.
د دیدارەكێدا قۆنسلێ گشتیێ فلستینێ كو ب هەلكەفتا ب دووماهی هاتنا ئەركێن وی ل هەرێما كوردستانێ سەرەدانا سەرۆك بارزانی كربوو، سوپاسییا پشتەڤانییا سەرۆك بارزانی ل دەمێ ئەركێ وی ل هەرێما كوردستانێ، ژ ئالیێ خوەڤە سەرۆك بارزانی سوپاسییا قۆنسلێ گشتیێ فلستینێ كر و هیڤییا سەركەفتنێ بۆ خواست د ئەركێ وی یێ نوو دا. دووماهی پێشهات و گوهۆڕینێن دەڤەرێ تەوەرێ دی یێ وێ دیدارێ بوون.