وەزیرێ دەرڤە یێ ئیراقێ دبێژیت، حوكمەتا نوو یا ئیراقێ یا جودایە و بەرنامەیێ خۆ یێ هەی؛ ئاماژێ ب وێ چەندێ ژی دكەت كو «ب پشتەڤانییا خودێ، پەیوەندیێن د ناڤبەرا هەولێر و بەغدایێ دا د ڤێ حوكمەتێ دا دێ باش بن».
د. فوئاد حوسێن، وەزیرێ دەرڤە یێ ئیراقێ د رێورەسمێن دەستبكاربوونا خۆ دا وەك وەزیرێ دەرڤە د حوكمەتا نوو یا ئیراقێ دا، گۆت: «هەر حوكمەتەكێ كار و بەرنامەیێ خۆ یێ هەی. قۆناغ ژی یا جودایە. ب پشتەڤانییا خودێ، ئەم هەموو دێ كار كەین بۆ سەركەفتنا ڤێ حوكمەتێ دا كو د خزمەتا خەلكێ ئیراقێ دا بیت. ب حەزا خودێ، پەیوەندیێن هەرێما كوردستانێ و بەغدایێ دێ باش بن».
پشتی روونشتنا رۆژا پێنجشەمبییا دەربازبووی یا جڤاتا نوونەرێن ئیراقێ و دەنگنەدان ب پشكەك ژ بەربژاران، نوكە بزاڤەك بۆ دروستكرنا هەڤپەیمانییەكێ ب ناڤێ (هەڤپەیمانییا هێزان) یا هەی. ل سەر ڤێ چەندێ فوئاد حوسێن گۆت: «پارتێن سیاسی مژوەلن، روونشتنێن زۆر دهێنە ئەنجامدان، نزانم دێ ناڤێ وێ چ بیت، كۆمەكا هێزان مژوولی پێكئینانا هەڤپەیمانییەكێ یان تێكگەهشتنەكێ نە».
دەربارەی وێ چەندێ كا ئەرێ پارتی دیموكراتی كوردستان دێ چیتە د ناڤ وێ هەڤپەیمانیێ دا، فوئاد حوسێن كو د هەمان دەم دا ئەندامێ مەكتەبا سیاسی یا پارتی یە گۆت: «نزانم، نوكە ڤەخواندن ل سەر دهێتە كرن».
فوئاد حوسێن ل سەر رەوشا دەڤەرێ ژی ئاخڤت و گۆت: «د حەفتیێن دوماهیێ دا پەیوەندی ب تایبەتی پەیوەندیێن ل گەل وەلاتێن كەنداڤی بوونە قۆربانیێن شەڕێ دەڤەرێ. ب هێزكرنا وان پەیوەندییان كارێ ب لەز یێ وەزارەتێ یە، ئێكسەر دێ كار بۆ باشكرنا وان پەیوەندییان كەین. پەیوەندی نەهاتینە بڕین، بەلێ هندەك كێشە ل ڤان دوماهییان پەیدا بوون، بەری پێكئینانا ڤێ حوكمەتێ. ب پشتەڤانییا خودێ، ئەم د بەرهەڤییان دانە بۆ باشكرنا وان پەیوەندییان».
شەڕێ ئەمریكا و ئیسرائیل دگەل ئیرانێ ل 28ێ شوباتێ دەستپێكر و پشكەك ژ گروپێن چەكدارێن ئیراقێ ژی چوونە د ناڤ شەڕی دا.
ل دووڤ راپۆرتەكا رۆژنامەیا (وول ستریت جۆرنال) یا ئەمریكی كو رۆژا 21ێ نیسانا 2026ێ هاتییە بەلاڤكرن، نیڤا وان هزار هێرشێن درۆنی یێن د دەمێ شەڕی دا ئاراستەی سعۆدیێ هاتینە كرن، ژ ناڤ ئاخا ئیراقێ بوون.

دیدار/ دلۆڤان ئاكرەیی

ئەندامەكێ فراكسیۆنا پارتی دیموكراتی كوردستان ل جڤاتا نوونەرێن ئیراقێ دیار كر، پارتی دیموكراتی كوردستان دژی دەرنەچوونا بەربژارێ خۆ بۆ وەزارەتا ئاڤادانكرن و ئاكنجیبوونێ ل جڤاتا نوونەرێن ئیراقێ دێ هەلوەستەكێ وەرگریت و نەرازیبوونا خۆ ل هەمبەر سەرۆكێ جڤاتا نوونەران دیار دكەت، كو ژبەر مەرەم و ئەگەرێن سیاسی دەنگ ب بەربژارێ وان نەهاتییە دان.
سەلوان تاها ئاكرەیی، ئەندامێ فراكسیۆنا پارتی دیموكراتی كوردستان ل جڤاتا نوونەرێن ئیراقێ بۆ ڕۆژنامەیا (ئەڤرۆ) گۆت: «ئەم د ناڤ فراكسیۆنا پارتیدا مژوولی دانوستاندناینە ل دۆر وێ چەندا ل جڤاتا نوونەرێن ئیراقێ روودای و دەربازنەكرنا بەربژارێ مە؛ ئێك ژ بژاردەیێن مە ئەوە كو ئەم سكالایەكێ ل دادگەها بلندا فیدرالی دژی سەرۆكێ جڤاتا نوونەران تۆمار بكەین و تانەیێ ل بڕگەیا دەنگدانێ ب رێباز حەملان، بەربژارێ وەزارەتا ئاڤادانكرن و ئاكنجیبوونێ بدەین. پرۆسەیا خواندنا ناڤێ وی و دەنگدانێ تنێ حەفت چركە بوون و سەرۆكێ جڤاتا نوونەران زوو راگەهاند كو دەنگێن پێدڤی نەئیناینە. هەكە فراكسیۆنا پارتی بڕیارێ نەدەت پەنایێ ببەینە بەر دادگەها بلندا فیدرالی، وێ دەمی ئەم نەچارین ل گۆرەی یاسایێ رێباز حەملانی ژ بەربژاربوونێ ڤەكێشین و كەسایەتییەكێ دی بەربژار كەین».
ل دۆر هەلوەستێ ئالییێن دی یێن سیاسی، ئاكرەیی گۆت: «هەڤپەیمانییا دەولەتا یاسا ب سەرۆكاتییا نووری مالكی ژی ب نیازە ب هەمان شێوە سكالایێ ل دادگەها بلندا فیدرالی ل سەر بڕگەیێن دەرنەچوونا هەردوو بەربژارێن خۆ بۆ وەزارەتا ناڤخۆ و وەزارەتا خواندنا بلند تۆمار بكەت. جودا ژ پارتی و دەولەتا یاسایێ، هەڤپەیمانییا عەزم ژی ب سەرۆكاتییا موسەننا سامەڕایی دژی سەرۆكێ جڤاتا نوونەران دەست ب لڤینان كرییە و بڕیارە ل دادگەها فیدرالی سكالایێ دژی هەیبەت حەلبووسی، سەرۆكێ جڤاتا نوونەران ل دۆر بڕگەیا دەنگدانێ ب وەزیرێ وان تۆمار بكەن».
ل دوماهییێ، ئاكرەیی ئاماژە ب دەمێ روونشتنێن داهاتی كر و گۆت: «رەنگە دەنگدان ل سەر بەربژارێن وان نەهـ وەزارەتێن ماین بكەڤیتە مەها تەمووزێ ژبەر جەژنا قوربانێ و بێهنڤەدانا یاسادانانێ یا جڤاتا نوونەران».

ل ڕۆژا شەمبیێ 16 گولانا 2026ێ، سەرۆك مەسعود بارزانی پێشوازی ل مەتڕان میرۆسلاڤ ڤاچۆڤسكی بالیۆزێ نوو یێ ڤاتیكانێ ل ئیراقێ كر و د دیدارەكێ دا هەردو ئالییان باسێ پەیوەندیێن دۆستانە و بارودۆخێ پێكهاتەیان ل هەرێما كوردستانێ كر.
د ڤێ دیدارێ دا بالیۆزێ نوو یێ ڤاتیكانێ كەیفخۆشیا خۆ بۆ سەرەدانا هەرێما كوردستانێ دیار كر و سوپاسی و پێزانینێن قەداسەتا پاپای و ڤاتیكانێ گەهاندنە سەرۆك بارزانی و گەل و حوكمەتا هەرێمێ كو د دەمێن دژوار و تەنگاڤیێ دا دەرگەهێن خۆ بۆ خەلكێ لێقەومایی یێ دەڤەرێن دی یێن ئیراقێ ب گشتی و مەسیحییان ب تایبەتی ڤەكرینە و د هەوارا وان چووینە. هەروەسا ناڤبری دەستخۆشی ل فەرهەنگا جوان یا پێكڤەژیانێ و هەڤدووقەبوولكرنێ ل هەرێما كوردستانێ كر كو تێدا هەموو پێكهاتە هەست ب ئارامی و تەناهیێ دكەن، و سوپاسییا حوكمەتا هەرێمێ كر بۆ پشتەڤانیكرنا ئاڤاكرنا زانكۆیا كاتۆلیكی و نەخۆشخانەیا عەنكاوە و قوتابخانەیێن تایبەت ب مەسیحییان ڤە دا كو بشێن ب زمانێ دایكێ بخوینن. بالیۆزێ ڤاتیكانێ ئاماژە ب سەرەدانا دیرۆكی یا سەرۆك بارزانی بۆ ڤاتیكانێ و سەرەدانا (پاپا فرانسیس)ی بۆ هەرێما كوردستانێ ژی كر وەك نیشانەكا بهێز بۆ پەیوەندیێن ناڤبەرا هەردو ئالییان.
ژ ئالیێ خۆ ڤە سەرۆك مەسعود بارزانی پیرۆزباهییا دەستبكاربوونا بالیۆزێ نوو یێ ڤاتیكانێ كر و پشتەڤانییا خۆ بۆ سەرئێخستنا ئەركێ وی دوپات كر، و ئاماژە ب وێ چئەندێ دا كو پێكڤەژیان ل هەرێما كوردستانێ بوویە كولتوورەك كو كوردستانی شانازیێ پێ دكەن و دێ هەموو بزاڤان كەن ئەڤ فەرهەنگە بەردەوام بیت و بهێتە پێشئێخستن. هەروەسا سەرۆك بارزانی رۆناهی ئێخستە سەر قوربانیدانێن هێزێن پێشمەرگەی د شەڕێ دژی تیرۆرستێن داعشێ دا كو ب بێ جوداهی هەمووپێكهاتێن ئایینی و نەتەوەیی پاراستینە و د ڤێ رێكێ دا هەژمارەكا زۆرا پێشمەرگەیان گیانێ خۆ فیدا كریە.
د دووماهیا دیدارێ دا سەرۆك بارزانی سوپاسییا قەداسەتا پاپای و حوكمەتا ڤاتیكانێ كر بۆ پشتەڤانییا وان یا بەردەوام بۆ هەرێما كوردستانێ و هیڤی خواست قەداسەتا پاپای ل داهاتی دا سەرەدانا ئیراقێ و هەرێما كوردستانێ بكەت.

پشتی وەرگرتنا باوەریێ ژ ئالیێ جڤاتا نوونەرێن ئیراقێ ڤە، سەركردایەتییا سیاسی یا هەرێما كوردستانێ ب گەرمی پیرۆزباهی ل عەلی فالح ئەلزەیدی كر ب هەلكەفتا دەستبەكاربوونا وی وەك سەرۆك وەزیرێن فیدرال.
د ڤێ چارچۆڤەیێ دا، سەرۆك مەسعود بارزانی د پەیوەندییەكا تەلەفۆنی دا، پیرۆزباهی ل عەلی فالح ئەلزەیدی كر و هیڤییا سەركەفتنێ د ئەركێ وی یێ نوو دا بۆ خواست. سەرۆك بارزانی د پەیوەندییا خۆ دا پشتەڤانییا خۆ بۆ سەرئێخستنا كارێ كابینەیا نوو دیار كر.
ژ ئالییەكێ دی ڤە، نێچیرڤان بارزانی، سەرۆكێ هەرێما كوردستانێ، كو بخۆ بەرهەڤی روونشتنا جڤاتا نوونەران ببوو بۆ باوەریدان ب حوكمەتا نوو، د پەیامەكێ دا ل سەر تۆڕا جڤاكی یا (X) خۆشحالییا خۆ ب پێكئینانا كابینەیا نوو دیار كر و راگەهاند: «هیڤیخوازم ئەڤ حوكمەتە ب رەنگەكێ كار بكەت كو خزمەتا هەموو پێكهاتەیێن گەلێ ئیراقێ بكەت و خواستێن وان بۆ ئاسایش، ئارامی و ئاڤەدانیێ بجهـ بینیت».
هەروەسا، مەسرور بارزانی، سەرۆكێ حوكمەتا هەرێما كوردستانێ، د پەیامەكێ دا پیرۆزباهی ل عەلی فالح ئەلزەیدی كر و هیڤیخواست ئەڤ قۆناغە ببیتە دەسپێكەكا نوو بۆ بنەجهكرنا ئاشتیێ ل ئیراقێ.
سەرۆكێ حوكمەتا هەرێمێ دوپاتی ل سەر گرنگییا چارەسەركرنا هەموو كێشەیێن هەلاویستی د ناڤبەرا هەولێر و بەغدایێ دا كر، ل سەر بنەمایێ بجهئینانا دەستووری و ب هێزكرنا پەیوەندیێن دووقۆلی.
ئەڤ پیرۆزباهییە د دەمەكێ دانە كول رۆژا پێنجشەمبییا بۆری جڤاتا نوونەرێن ئیراقێ ب زۆرینەیا دەنگان باوەری دا كارنامە و پێكهاتەیا حوكمەتا عەلی فالح ئەلزەیدی، كو تێدا 14 وەزیران باوەری وەرگرت.

ب هەلكەفتا سالڤەگەڕا 64 یا دامەزراندنا ئێكەتییا مامۆستایێن كوردستانێ، نێچیرڤان بارزانی، سەرۆكێ هەرێما كوردستانێ، پەیامەكا پیرۆزباهیێ ئاراستەی تەڤایا مامۆستایان كر و تێدا رۆلێ وان یێ دیرۆكی و نیشتمانی د پاراستنا جڤاكی دا بلند هەلسەنگاند.
سەرۆكێ هەرێما كوردستانێ د پەیاما خۆ دا ئاماژە ب وێ چەندێ كر كو مامۆستایێن كوردستانێ هەردەم سەلماندییە كو تنێ فێركار نینن، بەلكو پەروەردەكارێن خەمخۆرن. نێچیرڤان بارزانی راگەهاند ژی: «مامۆستا د سەردەمێ شۆڕش و خەباتێ دا سەنگەرێ هشیاریێ بوون و د رۆژێن دژوارێن پشتی ئازادیێ ژی دا، ب دلسۆزی و خۆڕاگری، نەهێلان پرۆسەیا پەروەردەیێ و فێربوونێ ل كوردستانێ ب راوەستیت».
د پشكەكا دی یا پەیامێ دا، سەرۆكێ هەرێمێ دوپاتی ل سەر وێ چەندێ كر كو مامۆستا ستوونەكا سەرەكی یا هەر پێشكەفتنەكا جڤاكی نە. وی دیار كر كو پێشڤەبرن ب شیانێن مامۆستایان، وەبەرهێنانەكا راستەقینەیە د پاشەڕۆژا نەڤیێن مە دا. هەروەسا دوپاتی ل سەر پشتەڤانییا خۆ بۆ داخوازیێن رەوا یێن مامۆستایان كر بۆ دابینكرنا ژیان و ژیارەكا هەژی كو ل گەل پێگەهـ و وەستیانا وان بگونجیت.
نێچیرڤان بارزانی دەستخۆشی ل ئێكەتییا مامۆستایێن كوردستانێ كر كو د دیرۆكا خۆ دا هەردەم وەك چەترەك بوویە بۆ بەرگریكرنێ ژ مافێن مامۆستایان.
ل دوماهییا پەیاما خۆ دا، سەرۆكێ هەرێمێ سلاڤ بۆ گیانێ پاقژ یێ وان مامۆستایان هنارتن یێن كو ژیێ خۆ د پێخەمەت پەروەردە و ئازادییا كوردستانێ دا بەخشی.

ئاهەنگا خۆلا پێگەهاندنا ئەفسەران ل كۆلێژا سەربازی یا زاخۆ بڕێڤە چوو. نێچیرڤان بارزانی، سەرۆكێ هەرێما كوردستانێ د ئاهەنگێ دا پەیڤەك پێشكێش كر و پیرۆزباهی ل دەرچوویان كر.
سەرۆكێ هەرێما كوردستانێ ئاماژە ب مەزناهییا پێشمەرگایەتیێ دا و گۆت: «پێشمەرگایەتی و پێشمەرگە بوون ئەركەكێ پیرۆزە و هەتا كورد بمینیت، پێشمەرگە دێ مینیتە سیمبولێ بەرگریكرنێ».
دەربارەی پێكئینانا حوكمەتا نوو یا ئیراقێ و كابینەیا عەلی ئەلزەیدی، سەرۆك وەزیرێن راسپارتی، نێچیرڤان بارزانی دیار كر: «ئەم پشتەڤانیێ ل كابینەیا عەلی ئەلزەیدی دكەین».
هەروەسا گۆت: «دڤێت كێشە ل سەر بنەمایێ دەستووری بهێنە چارەسەركرن».
نێچیرڤان بارزانی ئاماژە ب وێ چەندێ ژی كر: «دڤێت د حوكمەتا بهێت یا ئیراقێ دا، هەموو مافێن هەرێما كوردستانێ بهێنە دابینكرن».
سەرۆكێ هەرێما كوردستانێ ل دۆر ئێكگرتنا هێزێن پێشمەرگەی ژی گۆت»ئێگكرتنا هێزێن پێشمەرگەی وەكو پێدڤی بڕێڤە ناچیت».
نێچیرڤان بارزانی راگەهاند ژی «ئێكگرتنا هێزێن پێشمەرگەی پێدڤییەكا چارەنڤیسسازە و دڤێت سەركەفتنێ بینیت».
سەرۆكێ هەرێمێ دەربارەی ئەركێن ل سەر ملێن ئیراقێ بەرامبەر پێشمەرگەی گۆت: «پێشمەرگە پشكەكە ژ سیستەمێ بەرگەرییا ئیراقێ و دڤێت ئیراق هەموو ئەركێن خۆ یێن یاسایی و دەستووری بەرامبەر پێشمەرگەی بجهـ بینیت و چەك و تەقەمەنییان بۆ دابین بكەت».
نێچیرڤان بارزانی زێدەتر گۆت: «پێشمەرگە نە مەترسییە، بەلكو پارێزەرێ وەلاتی یە، و د شەڕێ داعشێ دا ب زەلالی ئەڤ چەندا سەلماند كو ئەو پارێزەرێ وەلاتی یە».

مەسرور بارزانی، سەرۆكێ حوكمەتا هەرێما كوردستانێ، پرەكا بلند و جاددەیەكا 60 مەتری ل سۆران ڤەكرن ، پاشی پەیڤەك پێشكێشكر ئەڤە دەقێ وێ یە:
دلخوەشم دیسان ل گەل هەوە مە و سەرەدانا سۆران دكەین بۆ ڤەكرنا پرۆژەیەكێ دی كو ئەڤە بلندترین پرە ل سەر ئاستێ هەموو ئیراقێ و نوكە ل باژێڕێ سۆران هاتییە ئاڤاكرن، دەمەكە پلان بۆ هاتییە دانان و كار تێدا دهێتە كرن و سوپاس بۆ خودێ نوكە ب ئەنجام گەهشت و ئەڤرۆ ب فەرمی ئەڤی پرۆژەی ڤەدكەین و دێ ئێخینە د خزمەتا هەموو وەلاتیێن كوردستانێ دا، ب تایبەتی ئاكنجیێن باژێڕێ سۆران و دەوروبەران.
د وی دەمی بۆری دا مە دیت كو بارودۆخەكێ گەلەك نەباش ل كوردستانێ و ئیراقێ هەبوو، خەلك گەلەك یێ دلتەنگ بوو كا دێ چ روو دەت؟ بەلێ ئەڤان هەمییان نەهێلا كو ئەم ژ ئەنجامدانا پرۆژەیێن خوە ب راوەستین، ژیان د هەموو دەمان دا دێ یا بەردەوام بیت. بیرا من دهێت دەمێ شەڕێ داعشێ ژی، دیسان پرۆژە هەر د بەردەوام بوون. د خوەشی و نەخوەشییان دا ئەم ژ خزمەتكرنێ راناوستین و هیڤیدارین بەردەوام بین كو بشێین باشترین خزمەتگوزاری پێشكێشی هەموو خەلكێ كوردستانێ بكەین د هەموو بواران دا.
ئەز پیرۆزباهیێ ل خەلكێ كوردستانێ و باژێڕێ سۆران و دەوروبەران دكەم بۆ ڤی پرۆژەیێ گرنگ، كو ئەڤە قۆناغەكە و قۆناغێن دی ژی دێ د دووڤ دا هێن بۆ تەمامكرنا ڤی پرۆژەی كو دووسایدكرن و پێكڤەگرێدانا رێیانە. پرۆژەیێن مەزنتر ژی ل بەر دەستێ مەنە دا كو پێشكێشی خەلكێ ڤێ دەڤەرێ بكەین.
دەستخۆشیێ ل (كاڤین گرۆپ) دكەم بۆ بجهئینانا ڤی پرۆژەی كو ب شێوەیەكێ گەلەك جوان و رێكوپێك ئاڤا كرینە. وەك هەر جار دیسان دوپات دكەمەڤە كو ئەوا ئەز پتر دلخوەش كریم ئەوە كو شیانێن ناڤخۆیی وەكریە ئەم بشێین پرۆژەیێن وەسا جوان و رێكوپێك ل سەر ئاستێ كوردستانێ ل هەموو دەڤەران بجهـ بینین.
جارەكا دی دەستخۆشیێ ل بجهئینەرێن ڤی پرۆژەی دكەم، دەستخۆشیێ ل رێڤەبەر و بەرپرسێن دەڤەرێ دكەم، و دەستخۆشیێ ل خەلكێ كوردستانێ دكەم بۆ پشتەڤانییا وان، بۆ باوەری بەخشینا وان ب مە دا كو بشێین پتر د خزمەتا وان دا بین.
بابەتەكێ دی هەبوو حەز دكەم بۆ هەوە بەرچاڤ بكەم، مخابن د ڤی دەمێ بۆری دا مە دیت كو هندەك روودانێن نەخوەش پەیدا بوون، ب تایبەتی ئەڤێن دووماهیێ كو ترۆمبێلەك ب سێ نەفەران ڤە (گەنج و زارۆك) كەفتنە د ناڤ رووباری دا و خەندقین. ئەڤە چەند حالەتەكن ل ڤێ دەڤەرێ روو ددەن و ئەڤ چەندە جهێ دلتەنگیێ یە. ب راستی دلێ مە دئێشیت دەمێ دبینین كەسانەك عەزیزێن خوە ژ دەست ددەن. دەستخۆشیێ ل هێزێن بەرەڤانییا شارستانی دكەم بۆ وەستیانا وان بۆ دووڤچوون و گەڕیانێ بۆ دیتنا تەرمان كو ب راستی گەلەك خوە وەستاند، سوپاسییا وان دكەم و دەستخۆشیێ لێ دكەم، سەرەخوەشیێ ل كەسوكارێن قوربانییان دكەم.
داخوازێ ژ هەموو خەلكێ كوردستانێ دكەم كو رێنمایان بجهـ بینن، چ رێنمایێن هاتنچوونێ بن یان ئەو رێنمایێن دهێنە پێشكێشكرن كو خوە ژ وان دەڤەران دوور بگرن یێن بۆ سەیرانێ نە گونجای یان دچنە سەر لێڤێن رووباران كو جهێن مەترسیێ نە. ئەڤە هەموو بۆ سلامەتی و ساخلەمییا هەوەیە، داخوازكارم پێگیری رێنمایێن حوكمەتێ بن و پشتڕاست بن حوكمەت دێ هەموو ساناهیكرنان كەت دا كو هوون د خوەشی و بەختەوەریێ دا بن.
ئەڤرۆ پێنگاڤا ئێكێ یا پێكئینانا حوكمەتا فیدرالی ل بەغدا ژی دەست پێ دكەت، ئەم هیڤییا سەركەفتنێ بۆ عەلی ئەلزەیدی دخوازین، هیڤیدارین سەركەفتی بیت د پێكئینانا حوكمەتا خوە دا و ئەم ژی دێ پشتەڤان بین دا كو حوكمەتەكا فیدرال بهێتە ئاڤاكرن و مافێن دەستووری یێن هەرێما كوردستانێ ژی بهێنە بجهئینان. پشكدارییا مە د حوكمەت وجڤاتا نوونەران دا بۆ وێ چەندێ یە كو بەرەڤانیێ ژ هەموو مافێن خەلكێ كوردستانێ و مافێن خەلكێ ئیراقێ بكەین و دەستوور وەك خوە بهێتە بجهئینان.
پشكدارییا مە دێ پشكدارییەكا كارا بیت و دێ هەول دەین پەیوەندیێن مە د باشترین ئاست دا بن. هیڤیدارم ئەڤە ببیتە ئەگەر كو ئەم بشێین ل هەرێما كوردستانێ ژی پەرلەمانی كارا بكەینەڤە و پاشێ پێنگاڤێن دی ژی دەست پێ بكەین بۆ پێكئینانا حوكمەتێ و جارەكا دی بكەڤینە د خزمەتا خەلكێ كوردستانێ دا.

قونسلێ گشتی یێ توركیا ل هەرێما كوردستانێ، باسێ گرنگیسا سەرەدانا مەسرور بارزانی، سەرۆكێ حوكمەتا هەرێما كوردستانێ بۆ توركیا دكەت و دبێژیت، ئەڤ سەرەدانە د دەمەكێ «هەستیار و گرنگ» دا هاتە ئەنجامدان.
ئێرمان تۆپچو، قونسلێ گشتی یێ توركیا ل هەرێما كوردستانێ، د داخۆیانیەكا رۆژنامەڤانیدا راگەهاند: سەرەدانا مەسرور بارزانی، سەرۆكێ حوكمەتا هەرێما كوردستانێ بۆ توركیا ژ روویێ دەم و پێنگاڤان ڤە گەلەك گرنگ و هەستیار بوو، ژ ئالیێ سەرۆككۆماری ڤە پێشوازی لێ هاتە كرن و مەسرور بارزانی ل توركیا سیاسەتمەدارەكێ قەدرگرتییە.
ئێرمان تۆپچو گۆت ژی: هەژمارەكا هەڤدیتنان ل گەل وەزیرێن دەرڤە، بەرگری، وزە و سامانێن سروشتی هاتنە ئەنجامدان. د وێ سەرەدانێ دا ب شێوەكێ گشتی بوار بۆ وێ چەندێ پەیدابوو كو رەوشا دەڤەرێ، سیاسەتا ناڤخۆیا ئیراقێ و پێشهاتێن دەڤەرێ بهێنە هەلسەنگاندن. پەیوەندیێن هەردو ئالییان د سیاسەتا دەرڤەیا توركیا دا رەهەندەكا تایبەت هەیە و پەیوەندی د ئاستەكێ گەلەك بلند و باش دانە. سەرەدان ل سەر ئاستێ سەركردایەتیێ زوو زوو دهێنە كرن و هەماهەنگییەكا گەلەك باش یا هەی.
قونسلێ گشتی یێ توركیا دوپاتی ل وێ چەندێ كر كو ئەم ب هەموو پێكهاتەیان ڤە ل ڤێ ئاخێ برایێن ئێكین و پەیوەندیێن مە ژی فرەرەهەندن. لەوما ئەڤ جۆرە سەرەدانە نیشا مە ددەن كا پەیوەندیێن مە چەوانن و دڤێت ئەم چ بكەین و پتر كار ل سەر چ بواران بكەین، لەوما سەرەدانا سەرۆكێ حوكمەتا هەرێما كوردستانێ ل سەر ئاستێ فرەیی و ئاستێ بلند بوو.
هەروەسا ئاماژە ب وێ چەندێ دا كو هەر سەرەدان و هەڤدیتنەك، خوونەكا نوو و بزاڤەكا نوو ددەتە پەیوەندیان.
گۆت ژی: بەری دەمەكی، د مەها نیسانێ دا نێچیرڤان بارزانی، سەرۆكێ هەرێما كوردستانێ پشكداری د كۆربەندا دیپلۆماسی یا ئەنتالیا دا كر و ل وێ دەرێ دەلیڤە هەبوو ل گەل سەرۆككۆمارێ توركیا كۆمببیت.
ئاماژەكر: «ئەز هەردەم دبێژم ئەم براینە، كورد، توركمان و كریستیان ل ڤێ دەڤەرێ دژین، ل سەر هەمان ئاخێ نە. ژ روویێ مرۆڤی، بازرگانی و پەیوەندیەكا بهێز یا د ناڤبەرا مە دا هەی، ژ بازرگانیێ بگرە هەتا دگەهیتە سیاسەتێ، كەلتووری، پەروەردەیێ و ئێمناهیێ و هەموو ئالیێن دی یێن پەیوەندیان».

سەرۆكێ حوكمەتا هەرێما كوردستانێ، پێشوازی ل قونسلێ گشتی یێ كۆریا باشوور كر ب هەلكەفتا ب دووماهی هاتنا ئەركێ وی.
مەسرور بارزانی، سەرۆكێ حوكمەتا هەرێما كوردستانێ، پێشوازی ل «سینگچۆل لیم»، قونسلێ گشتی یێ كۆمارا كووریا باشوور ل هەرێما كوردستانێ كر، ب هەلكەفتا ب دووماهی هاتنا ئەركێ وی.
سەرۆكێ حوكمەتێ، سوپاسییا قونسلێ گشتی یێ كووریا باشوور كر بۆ وێ دەمێ كار كری بۆ ب هێزكرنا پەیوەندیێن دۆستانە د ناڤبەرا هەرێما كوردستانێ و كۆریا باشوور دا، سەرۆكێ حوكمەتێ هەروەسا دەستخۆشی و پێزانینێن خۆ بۆ پشتەڤانی و هاریكارییا حوكمەت و گەلێ كووریا باشوور دیار كرن.
قونسلێ گشتی یێ كووریا باشوور، كاروانێ پێشكەفتن و ئاڤادانی و چاكسازیێن حوكمەتا هەرێما كوردستانێ د بوارێن جودا جودا دا بلند هەلسەنگاند و ئاماژە ب وێ چەندێ كر: «كوردستان دێ هەموو دەمان د دلێ من دا بیت».

بەرپرسێ فەرمانگەها پەیوەندیێن دەرڤە یێ حوكمەتا هەرێما كوردستانێ راگەهاند، ل سەر راسپاردەیا مەسرور بارزانی، سەرۆكێ حوكمەتا هەرێما كوردستانێ شاندەكێ بلندێ هەرێمێ زنجیرەیەكا دیدارێن دیپلۆماسی ل وەلاتێن ئورۆپا ئەنجامدان ب مەبەستا رێگریكردنێ ل دەستدرێژییان بۆ سەر كوردستانێ و چارەسەركرنا كێشەیێن هەلاویستی ل گەل حوكمەتا فیدرالی.
سەفین دزەیی، بەرپرسێ پەیوەندیێن دەرڤە یێ حوكمەتا هەرێما كوردستانێ د د داخۆیانییەكا رۆژنامەڤانی دا ئاماژە ب وێ چەندێ كر، كو سەرەرای ئالۆزیێن دەڤەرێ و ئەو دەستدرێژیێن دهێنە كرن سەر كوردستانێ، هەرێم نەبوویە پشكەك ژ چو شەڕان. سەبارەت ب ڤێ چەندێ ژی، ب رێنماییا مەسروور بارزانی، سەرۆكێ حوكمەتا هەرێما كوردستانێ ب پێتڤی هاتە زانین كو سەرەدانا چەند وەلاتێن ئورۆپا بكەین بۆ گەنگەشەیا راستەوخۆ ل گەل ناڤەندێن بڕیارێ.
دزەیی گۆت، ل فەرەنسا ل كۆچكا ئیلیزێ شیرەتكارێ سەرۆككۆمارێ فەرەنسا، و ل ئاڤاهیێ جڤاتا پیران یێ فەرەنسا سیناتۆر و سەرۆكێ گرۆپا پەیوەندیێن فەرەنسا – ئیراق مە دیتن.
هەروەسا ل بەلجیكا رێڤەبەرێ گشتی یێ كاروبارێن رۆژهەلاتا ناڤین و باكوورێ ئەفریقیا، و بەرپرسێ دۆسێیا ئیراق و ئیرانێ مە دیتن، هەڤدەم مە سەرەدانا كۆمسیۆنا ئێكەتیا ئورۆپا و وەزارەتا دەرڤە یا بەلجیكا و ئۆفیسا سیاسەتا دەرڤە یا ئێكەتییا ئورۆپا و پەرلەمانێ ئورۆپا كر و ل گەل هەژمارەكا ئەندامێن پەرلەمانێ ئورۆپا كۆمبووین.
هەر ل بەلجیكا ل گەل وەزیرا بەرگرییا بەلجیكا و جێگرێ سەرۆك وەزیران و وەزیرێ دارایی یێ بەلجیكا و رێكخەرێ دژە تیرۆرا ئێكەتییا ئورۆپا و تیما د گەلدا كۆمبووین.
ل هۆلەندا، مە سەرەدانا وەزارەتا دەرڤە یا هۆلەندا كر و چەند دیدارەك ئەنجامدان، پاشی ل گەل هنارتییا تایبەت یا وەزارەتا دەرڤە یا هۆلەندا بۆ كاروبارێن كۆچ و كۆچبەران و جێگرێ وەزیرێ دەرڤە یێ وەلاتێ هۆلەندا كۆمبووین.
ل لەندەن ل ئاڤاهیێ وەزارەتا دەرڤە و گەشەپێدانا بریتانیا مە وەزیرێ دەولەتێ بۆ كاروبارێن رۆژهەلاتا ناڤین و باكوورێ ئەفریقیا دیت، د چارچۆڤەیا كۆمبوونا مە دا ل لەندەن ژ ئالیێ گرۆپا هەموو پارتێن پەرلەمانێ بەریتانیا بۆ دۆستایەتییا ل گەل هەرێما كوردستانێ پێشوازی ل مە هاتە كرن، پاشان مە سەردانا وەزارەتا بەرگری یا بەریتانیا كر.
بەرپرسێ پەیوەندیێن دەرڤە یێ حوكمەتا هەرێما كوردستانێ هەروەسا گۆت، ل چاتام هاوس (Chatham House) ب بەرهەڤبوونا شارەزایێن سیاسی، قوتابیێن پەیوەندیێن نێڤدەولەتی، بەرپرسێن حكومی، رۆژنامەڤانان، و بالیۆزێن پێشتر، د مێزگردەكێ دا، مە رۆناهی ئێخستە سەر رەوشا نوكە یا رۆژهەلاتا ناڤین و پرسێن نوكە یێن هەرێما كوردستانێ و ئیراقێ و پەیوەندیێن هەولێر و بەغدایێ و پرسا پێكئینانا حوكمەتا نوو و هەلوەستێ هەرێما كوردستانێ ل دۆر وان پرسان.
سەفین دزەیی باسێ وێ چەندێ ژی دكەت، تەوەرێن سەرەكی یێن ڤان دیدارێن دیپلۆماسی چڕ ببوون ل سەر رێگریكردنێ ل دەستدرێژیێن ل سەر ئاخا هەرێما كوردستانێ و داخواز ژ وەلاتێن دۆست هاتییە كرن كو كارتێكرنا خۆ بكاربینن دا كو حوكمەتا فیدرالی رێگریێ ل وان هێرشان بكەت.
هەڤدەم د كۆمبوونان دا باسی پێكئینانا حوكمەتا نوو یا ئیراقێ و هەرێما كوردستانێ، دۆسێیا پەترۆل وغازێ و بودجەی هاتە كرن. بەرپرسێن بلند یێن وەلاتان سۆز و پشتەڤانییا خۆ بۆ گەل و حوكمەتا هەرێمێ دوپات كر، و رێزەكا مەزن بۆ قوربانیدانا پێشمەرگەی د شەڕێ داعشێ دا هەبوو. دەولەتان دلگرانییا خۆ ل سەر شەهیدبوونا وەلاتیێن سڤیل دیار كر و دوپاتی ل سەر وێ چەندێ كر كو پێدڤییە دانوستاندنەكا جدی هەبیت بۆ دوماهیئینان ب ڤان دەستدرێژییان، هەروەسا سۆز دا كو پەیوەندیێن خۆ یێن دیپلۆماسی ل گەل بەغدا بۆ چارەسەركرنا كێشەیان بكاربینن.
سەفین دزەیی ئاماژە ب وێ چەندێ ژی كر، كو نوكە پشتەڤانییەكا نێڤدەولەتی بۆ مانا كوردستانێ وەك دەڤەرەكا ئارام، هەروەكی سالا 1991 ێ یا هەی، چونكی كوردستان بوویە پەناگەهێ سەدان هزار مرۆڤان و پێدڤییە ژ هەموو ئالییەكی ڤە گەشە پێ بهێتە دان. ژ ئالییەكێ دی ڤە، مە رۆهنكرنا پێتڤی دایە وەلاتێن دۆست ل سەر ئەگەرێن گیرۆبوونا پێكئینانا حوكمەتا هەرێما كوردستانێ.