ئەڤرۆ، ڤەگێر سەعدولا:

سکرتێرێ پارتی دیموکراتی کوردستان-سووریا PDK-S د ھەڤپەیڤینەکێ دا بۆ رۆژناما ئەڤرۆ دیار کر کو بارودوخێ سووریێ یێ خرابە و گەلەک ئاستەنگ یێن ھاتینە پێشیا گەلێ کورد و گۆت: (ل ڤێ دووماھیێ رژێمێ دەستێ خوە دا دەستێ رێکخراوێن ئیسلامی یێن توندرەو و ب رێکا وان شەرێ شورەشا سووریێ کرن و ئەو بھێز ئێخستن و دەولەتا ئیسلامی دامەزراند و ل سەر ڤی بنیاتی دەڤەرا کوردی ژی کەفتە بەر گەلەک ئاستەنگیان و ژ ئەنجامێ رەفتارێن شاش یێن ھندەک ئالیان، کوردان باجەک مەزن دا).

سعود مەلا سکرتێرێ پارتی دیموکراتی کوردستان-سووریا دیار کر کو نوکە شەر یێ ل گەلەک دەڤەرێن کوردی ھەی، لێ شەرێ مەزن یێ ل کوبانێ و نھا  یا ھاتیە دۆرپێچکرن و د بن مەترسیەکا مەزن دایە و گۆت: (ژ بەر رەوشا تایبەت یا کوبانێ، ژ مە ھەموو کوردان دھێتە خواستن کو ئەم ئێکرێز بین ھەتا کو بشێین ل بەر سینگێ ڤێ مەترسیا مەزن راوەستین، لێ مخابن ھەتا نوکە PYD کار ژ بۆ ئێکرێزیێ ناکەت و ئەڤە شاشیەکا مەزنە، ژ بەر کو مەترسی یا ل سەر ھەموو مللەتێ کورد ھەی نە بتنێ ل سەر PYD).

سعود مەلای ئاشکرا کر کو ئەو وەکو ئەنجومەنێ نیشتیمانی یێ کوردی د بەرھەڤن مل ب ملێ پارتیێن دی یێن کوردان شەری ل دژی گرۆپێن تیرورستی بکەن و وەلاتێ خوە و مللەتێ خوە ب پارێزن و گۆت: (خورتێن کورد یێن ژ بەر گەفێن رژێما ئەسەد رۆژئاڤایێ کوردستانێ بجە ھێلای، ل ھەرێما کوردستانێ راھێنانێن لەشکری پێ ھاتینە کرن، ئەو د بەرھەڤن بچن ل کوبانێ شەری بکەن، لێ PYD رێ نادەت. پێشمەرگێن رۆژئاڤا ھەر دەم دبێژن مە نەڤێت ئەم بچینە رۆژئاڤا شەرێ براکۆژیێ روو بدەت، لەوما فەرە ئالیێ دی تێ بگەھیت کو ئەڤە نە ژ ترسێ یە، بەلکو مە نەڤێت ئەو کارێ خراب د ناڤ مللەتێ مە دا ل رۆژئاڤا روو بدەت ھەکە ئەو د ئامادەنە ل رۆژئاڤا و باشور ژی شەری بکەن و بەرەڤانیێ ژ کوردان بکەن).

د بەردەوامیا ئاخڤتنێن خوە دا سعود مەلا گۆت: (ل کوبانێ نە تنێ PYD یان YPG شەری دکەن، بەلکو ھەر کوردەکێ ل کوبانێ نوکە بەرەڤانیێ ژ نامیس و کەرامەتا خوە دکەت و نوکە ئەندام و لایەنگرێن مە ژی ب ناڤێ جڤاتا نیشتیمانیێ کوردی ENKS د ناڤ کوبانێ دا چەکدارن و بەرەڤانیێ دکەن).

سعود مەلای ئەو یەک ژی دیار کر کو ھەڤالێن پارتیا وان ل سەر ئاستێ وەلاتێن ئەورۆپی و ئەمریکا و نەتەوێن ھەڤگرتی کارەکێ خورتێ دبلوماسی دکەن ژ بۆ پشتەڤانیا کوبانێ و گەلێ کورد و گۆت: (ئەڤرۆ ل سەر ئاستێ جیھانێ کێشا کوردی جھێ خوە گرتیە و دانوستاندن ل گەل دھێنە کرن، بەری رۆژەکێ وەزیرێ بەرەڤانیا ئەمریکا دیار کر کو ئەو د ئامادەنە ھاریکاریێ و چەکی بدەنە گەلێ کورد ل سووریێ و ئەڤە پێشکەفتنەکا مەزنە).

ل دۆر وێ یەکێ کا دێ وی چەکی دەنە کیژ ئالیێ کوردی سعود مەلای گۆت: (یا گرنگ ئەوە دێ دەنە کوردان، یا دی ھێشتا نەھاتیە ئێکلاکرن و دێ ل سەر دانوستاندنان و ھەڤپەیمانیان مینیت، ژ بەر کو ھەتا نوکە ئەمریکا یا ئامادە نینە سەرەدەریێ ل گەل YPG بکەت و دبێژن ئەو یێ ل گەل رژێمێ).

ئەندامێن پارتی داخوازێ ژ سەرکردایەتیا خوە دکەن رۆلێ خوە ئەکتیف تر بکەن بۆ کوبانێ، ل دور وێ یەکێ کا پلانێن پارتیا وان بۆ ڤێ چەندێ چنە، سکرتێرێ پارتی گۆت: (نوکە ئەم کارەکێ رژد دکەین کو رێکێن چارەسەریێ بۆ وان ئاستەنگان ب بینین یێن ھاتینە پێشیا مە و جھێ خوە د ناڤ مللەتێ مە دا موکمتر لێ بکەین، لێ ڤێ چەندێ وەخت بۆ دڤێت و مە بریار یا دا ب رژدی ل سەر کار بکەین).

ل دووڤ گۆتنێن سعود مەلای، ھەتا بەری کارەساتا کوبانێ وان چو بریار نەبوون کو د ناڤ رۆژئاڤایێ کوردستانێ دا کارێن لەشکری بکەن، لێ ژ نوکە وێ ڤە جڤاتا نیشتیمانیێ کوردی ل کوبانێ بریار دایە کو کارێن لەشکری بکەت و گۆت: (ژ ئەڤرۆ وێ ڤە، مە پێدڤی یا ب ھێزەکا لەشکری ھەی).

ل دۆر وێ یەکێ کا بۆچی نوکە وان پێدڤی ب ھێزەکا لەشکری ھەیە، بۆچی بەری دو سالان پێدڤی پێ نەبوون، سعود مەلا گۆت: (ل دەستپێکێ مە کارێن ئاشتیانە و دیموکراسی دکرن ژ بۆ کو رژێمێ بگوھۆرین، لێ رژێمێ شورەشا دیموکراسی ڤەگوھاست بۆ شورەشا لەشکری، وی دەمی ژی مە دخواست دەڤەرا کوردی نەبیتە دەڤەرەکا لەشکری و شەر لێ روو نەدەت، لێ مخابن ئەڤە نێزیکی سالەکێ یە دەڤەرا کوردی ژی بوویە جھێ شەری و گەلەک ئاریشە بۆ کوردان دروست دبن، لەوما ئەم دخوازین بەرەڤانیێ بکەین ژ بۆ کو زێدەتر خراب نەبیت).

ئه‌ڤرۆ، لەزگین جۆقی:

ژنەکا ئاوارەبوویا شنگالێ چیرۆکا گرێدانا زارۆیێ خوە بۆ ئەڤرۆ ڤەدگێرت و دبێژیت: من نەشیا ھەر سێ زارۆیێن خوە ژ دەستێن چەکدارێن داعش قورتال بکەم، دو زارۆیێن خوە من ل مال ل ناحیا سنوونی بجە ھێلان ئەز و ھەڤژینێ خوە و زارۆیێن خوە یێن دی رەڤین و نەە رۆژان ماینە ئاسێکری ل چیایێ شنگالێ.

نەسرین سلێمان ژنەکا ئاوارەیا شنگالێ ل قوتابخانا نەوروز ل دھۆکێ ئاکنجیی بوویە دبێژیت: ئەڤە پتر ژ ھەیڤەکێ یە، ئەم د گۆرەپانا قوتابخانێ دا و رۆژ ل دووڤ رۆژێ سەقا بەرەڤ سەرمایێ دچیت و زارۆیێن من دێ ژ دەستێ من دەرکەڤن و ب چاڤێن تژی رۆندک ڤە گۆت: سێ زارۆیێن من نە د دروستن ژلایێ عەقلی ڤە، ئێک ژ وانا ھەکە گرێ نەدەم دێ زیانێ گەھینیتە خەلکی، ژ نەچاری من زارۆیەکێ خوە  یێ نە دروست ب زنجیری ڤە گرێدایە ل ناڤ قوتابخانێ دا ھەتا چوو ئاریشەیا دروست نەکەت و ھەتا بۆ مە جھەکێ ڤەحەواندنێ دھێتە دابینکرن ژ گۆرەپانا قوتابخانێ دەرکەڤین.

نەسرین خانێ ئەوژی خویا کر کو دەمێ ئەو ژ سنوونێ رەڤین ژبەر تیرورستێن داعش وان نەشیا زارۆیێن خوە و ھەڤژینێ خوە قورتال بکەت، چونکو ھەڤژینێ وێ ژی تووشی نەخۆشیا جەلتێ ببوو و گۆت: ئەز کەتمە ناڤ دەستێن خوە دا، ئەز نەچاربووم دوو زارۆیێن خوە یێن نەساخ ل سنوونێ بجە بھێلم و ھەتا بشێم ھەڤژینێ خوە و زارۆیێن خوە یێن ساخ قورتال بکەم، بەلێ خێرخوازان ل دەڤەرا سنوونێ زانی کو من دوو زارۆیێن خوە د ناڤ مالدا بجە ھێلان، ئەز رەڤیم و وان خێرخوازان خوە گەھاندە مالا من و ل سنوونی ھەر دوو زارۆیێن من یێن نەساخ ل گەل خوە برن و نەە رۆژان ل چیایێ  شنگال ھێلان و پاشی برنە سووریا ل دھۆکێ و جارەکا دی، ھەر دوو زارۆیێن من یێن نەساخ گەھشتنە باوەشا من ڤە “.

 نەسرین خانێ گۆت: زۆر یا بزەحمەتە مروڤ بشێت جگەرا خوە بھێلێت لێ تیرورستان دونیا ل بەرچاڤێن مە تاری کرن و ھەتا وەل مە بھێت زارۆیێن خوە ل مال دا بھێلین و برەڤین.

نەسرین سلێمان دیسا دبێژیت: ئەز ب کرینا دەرمانێن ھەڤژینێ خوە را ناگەھم د سەر ھندی را ژی سێ زارۆیێن من نەساخن، ئیکی ژ وانا ئەز گرێددەم ھەردو زارۆیێن دی ژی ئەز ب جل و بەرگێن وان را ناگەھم، چونکو جلکێن خوە ددرینن و داخوازێ دکەم جل وبەرگ بۆ زارۆیێن من بھێنە دابینکرن ژلایی خێرخواز و رێکخراوان ڤە.

ناڤبریێ زێدەتر گۆت: گەلەک ھاریکاریا مە ھاتە کرن لێ بۆ زارۆیێن وەکو یێن من ھەر جل وبەرگ دڤێن چونکو زارۆیێن من ژلایێ عەقلی ڤە نەددروستن و گەلەک جلکێن خوە درینن و ئەم دەست کورت و بەلەنگازین نەشێن خوە پارچەکا جل وبەرگا بو زارۆیێن خوە بکرین، ئەڤە زڤستان ژی ھات ھەکە د ڤی دەستوداری دا بین دێ ژ سەرما دا زارۆیێ من ھەموو ژ دەستێ من دەرکەڤن، چونکو ب شەڤ زور سەرمایە ئەم ل گورەپانێ دنڤین و داخوازێ دکەین ژوورەک یان خیڤەتەک ل جھەکێ بۆ من و زارۆیێن من بھێتە دابینکرن ھەتا ژبەر سەرمایی و رۆژێ قورتال بین.

 نەسرینێ دیارکر گەلەک یا بزەحمەتە ژنەک بشێت چوار نەساخان د مالێ دا خودان بکەت، ھەکە ھاریکاریا من نەھێتە کرن ل زڤستانێ دێ زارۆیێن من ژ دەستێ من دەرکەڤن، مۆچە ژی ھاتیە دابینکرن ژلایێ گەشەپیدانا جڤاکێ ڤە ل دھۆکێ لێ یێ کێمە و تێرا کرینا دەرمانێن ھەڤژینێ من ناکەت و بتنێ ئەز داخوازێ دکەم بەری بەفر و باران بھێن ژوورەک یان خیڤەتەک بۆ من و زارۆیێن من بھێتە دابینکرن.