دوهی شەمبیێ 5/1/2024، مەسرور بارزانی، جێگرێ سەرۆكێ پارتی دیموكراتی كوردستان ل گەل وەبەرئێنەر و خودانكارێن دهۆكێ راگەهاند: گەلەك بەرنامە و پیلان هاتبوونە دانان بۆ وێ چەندێ قەوارەیێ هەرێما كوردستانێ بهێتە لاوازكرن، بەلێ شكەستن ئینا.
مەسرور بارزانی گۆت ژی» خوەشحالم كو د خزمەتا هەوەداینە ل گەل بەربژارێن لیستا 190 یا پارتی دیموكراتی كوردستان بۆ هەلبژارتنێن پەرلەمانێ كوردستانێ، خوەشحالم كو دبینین هەموو بەرهەڤن بۆ هەلبژارتنێن چەند رۆژێن بهێن یێن پەرلەمانێ كوردستانێ، ب پشتەڤانییا خودایێ مەزن ب دەنگێ هەوە دێ چارەنڤیسێ خوە دیار كەن و دنگێ خوە دەنە پارتی دیموكراتی كوردستان».
مەسرور بارزانی گۆت» هەلبژارتن هەموو دەمان د چارەنڤیسسازن بۆ وەلاتێ مە، بۆ هەر جڤاك و نەتەوەكی ژی، بەلێ د هەلبژارتنێن ڤێجارێ دەمێ هەلبژارتنان بۆمە گەلەك گرنگە، ئەنجامێن هەلبژارتنان ژی بۆ پاشەڕۆژا وەلاتێ مە گەلەك یا گرنگە، دزانین دەڤەر یا د رەوشەكا ئالۆزدا دەرباز دبیت، پێشتر ژی گەلەك بزاڤ و بەرنامە و پیلان بۆ لاوازكرنا قەوارەیێ هەرێما كوردستانێ هەبوون، بەلێ ب پشتەڤانییا خودای و هۆڕاگری و پشتەڤانییا خەلكێ كوردستانێ مە ئەو قەیران دەربازكر، بەلێ بۆ پاشەڕۆژێ مە پێدڤی ب بڕیارا خەلكێ كوردستانێیە، ب دەنگێ خەلكێ كوردستانێیە بۆ وێ چەندێ بزانین پاشەڕۆژا وەلاتێ مە دێ یا چاوان بیت و بەر ب كیرێ چیت».
جێگرێ سەرۆكێ پارتی رۆهنكر ژی» ژبەر وێ چەندێ گەلەك یا گرنگە هەر كەسەك بڕیارا خوە د بەرژەوەندییا وەلاتێ خوە دا بدەت، بەرژەوەندییا نیشتمانی و نەتەوەیی، بۆ پاشەڕۆژا مللەتێ خوە، بۆ پاشەڕۆژا زارۆیێن خوە، پاشەڕۆژا وەلاتێ خوە، پێدڤییە هەر تاكەك كو مافێ دەنگدانێ هەبیت، یێ بەرهەڤ بیت بۆ دەنگدانێ و بچیت دەنگی بدەت، ئەو كەسێ دەنگی نەدەت، پشتڕاست بن خەلكەكێ دی ل شوونا وی دێ دەنگی دەت كو دبیت ئەنجامێ وێ ب دلێ هەوە نەبیت، ژ بەر وێ چەندێ هەكە هوون حەز بكەن ئەنجامێن هەلبژارتنێن داهاتی ب دلێ هەوە بیت، ب دلێ خزم و كەسوكارێن هەوە بیت، ب دلێ جیرانێن هەوە بیت، هەر كەسێ هەوە كاریگەری ل سەر هەبیت، هاندانا وان بكەن بچن دەنگێ خوە بدەن، بۆ وێ چەندێ پترییا رایا خەلكێ كوردستانێ چ بیت، ئەنجامێن هەلبژارتنان ب وی شێوەی بن».
خویاكر» ژبەركو پارتی یا بێ منەتە، چونكە وەكو حزبەكا رزگاریخوازا كورد و كوردستانی، هەر كەسەك و هەر تاكەك، هەر ئایین و هەر نەتەوەیەك بیت، جهێ وی دناڤ پارتیدا یێ هەی، ژ بەر وێ چەندێ هندی دەنگدەرێن ڤان هەلبژارتنان زێدەتر بن، باوەرییا مە ئەوە دەنگێن پارتی دێ زێدەتر بن، لەوما هیڤیدارم هوون هەموو هەرنە دەنگدانێ».
مەسرور بارزانی پتر گۆت» پارتی ژ دەستپێكا خەباتا خوە یا سیاسی هەتا نوكە، هەموو دەمان چەترەك بوو بۆ كۆمكرنا هەموو بیر و بۆچوونێن جودا جودا ل كوردستانێ، هەردەم حزبەكا نەتەوەیی و نیشتمانی بوو، هەموو بۆچوونێن جودا جهێ خوە د ناڤ پارتیدا یا كری، پارتی ل بن سەركردایەتیكرنا بارزانیێ نەمر هەتا ئەڤرۆ، رۆژەكێ موساوەمە ل سەر مافێن خەلكێ كوردستانێ نەكریە و ناكەت، هەڤدەم د دیرۆكا پارتیدا دەستكەفت پشتی دەستكەفتێ بۆ ڤی مللەتی یێن ب دەستڤەهاتین، نوكە ژی كەسەك یێن رێبەرییا ڤێ حزبێ دكەت كو ئەم هەموو شانازیێ پێ دكەین كو خودانێ چەندین دەستكەفتایە، ل بن سیبەرا سەرۆك بارزانی چاوان پارتی هەتا نوكە یا سەركەفتی بوو، بۆ پاشەڕۆژێ ژی دێ سەركەفتنێن مەزنتر ب دەستڤەئینیت».
پتر گۆت» ئەم ناخوازین تنێ باسێ دیرۆكێ بكەین، بەلێ دەمێ ئەم باسێ دیرۆكێ دكەین، بۆ وان گەنجایە كو دبیت پشكەكا وان دناڤ وێ دیرۆكێدا نە ژیابن، تاكو گەنجێن مە ژی بزانن كو ئەڤ كوردستانا ئەڤرۆ دبینین، بەرهەمێ خەباتا شەهید و پێشمەرگێن مە و خۆڕاگرییا خەلكێ كوردستانێیە كو پارتی سەركردایەتییا وێ دیرۆكا دوور و درێژ دكەت، ئەڤە ب ساناهی ب دەستڤەنەهاتییە و ئەم ژی قبوول ناكەین ب ساناهی ژ دەست بچیت، لەوما هەر كەسەكێ پێشبینییا ئەوێ چەندێ بكەت كو دێ شێت ڤێ رەوشێ ژناڤ بەت بۆ بەرژەوەندییا كەسی یان بۆ بەرژەوەندییا حزبا خوە، دڤێت بزانیت ڤی وەلاتی خودان یێ هەی ئەوژی خەلكێ كوردستانێیە و پارێزەرێن ڤی وەلاتی پێشمەرگەنە و بەری هەموو پێشمەرگەیان سەرۆك بارزانییە، لەوما هەر كەسەكێ هزر د تێكدانا ڤێ رەوشێدا بكەت، دڤێت بزانیت كو دێ روو ب روویێ مللەتەكی بیت و روو ب روویێ پێشمەرگەیەكی بیت جو هیچ جارەكێ خوە بۆ دوژمنان نە چەماندییە».
ئەوژی بەرچاڤكر» دەستكەفتێن مە د هەموو بوارەكیدا گەلەكن، نەكو تنێ د خۆڕاگریێ و بەرگریكرنێ ژ شەرەف و كەرامەتا مللەتێ مە و ئاخا مە، بەلكو د رێڤەبرنا وەلاتی ژی هەكە بنێرن، هەر جهەكێ پارتی لێ بیت، ئاڤەدانی یا لێ هەی، هەر جهەكێ كو پارتی سەركردایەتی لێ كربیت، دبینین كو تەناهی و ئاسایش و ئارامی ل وەلاتێ مە هەبوو، چونكە پارتی د دەمێ ئاشتیێدا پێش دكەڤیت».
مەسرور بارزانی گۆت ژی» خەلكێ نەحەز و خەلكێ دی گەلەك جاران بزاڤان دكەن رەوشێ تێك بدەن بۆ وێ چەندێ د رەوشەكا وەسا دا گەشە بكەن كو ئاژاوە و كێشە تێدا بیت، بەرۆڤاژی پارتی».
ئاماژە ب وێ چەندێ ژی كر» مە باس ل وێ چەندێ كر كو رەوشا ڤێ دەڤەرێ (رۆژهەلاتا ناڤین) د دەمەكێ دژواردا دەرباز دبیت، كەس نزانیت ئەڤ رەوشە دێ بەر ب كیڤە چیت، بەلێ ل بن سەركردایەتییا حەكیمانەیا بارزانی وپارتی، ئەم دێ هەموو بزاڤان كەین كو پارتی و خەلكێ كوردستانێ و قەوارەیێ هەرێما كوردستانێ تێكهەلی وان كێشەیان نەبیت، بەلێ هەكە رەوش وەلیهات ژبەر هەر ئەگەرەكی نەحەزان تەماحی ل رەوشا هەرێما كوردستانێ كر یان ژی خواست كەرب و كینا خوە ل سەر مللەتێ مە ب رێژن، هزر د وێ رۆژێدا بكەن كو د وێ رۆژێدا كی یێ بەرهەڤە گیانێ خوە بكەتە قوربانیێ ڤی قەوارەی و مللەتی؟ بێگومان بەری نوكە ژی، وەكو چاوان پارتی هەردەم د بەرگریكرنێ ژ ڤی مللەتی و ئاخێ دا بوو، هەر دەمەكێ پێدڤی بیت بۆ وێ چەندێ خوە بكەتە قوربانی، پارتی یا بەرهەڤە ب روح و گیان خوە بكەتە قوربانییا كەرامەت و دەستكەفتێن ڤی مللەتی».
راگەهاند ژی» گەلەك ئالیێن گەلەك سۆزا ددەن و گەلەك درووشمان بلند دكەن، بەلێ ل دەمێ بەرتەنگییان مە نەدیتن و ل هیچ جهەكی د دیار نەبوون، دەمێ داعش هاتی دیار نەوون، دەمێ هێرشی كوردستانێ كری، مە كەس ل گەل خوە نەدیت نە ل پردێ و نە ل سحێلا، تنێ مە ئەڤ قەوارە پاراست و هەكە خودا حەز بكەت، هەر دەمێ پێدڤی بیت، ئەم د بەرهەڤین بۆ پاراستنا ڤی قەوارەی».
مەسرور بارزانی گۆت ژی» هندەك جاران دەمێ سەح دكەین، بانگەشەیا وان باشترین خزمەتە بۆ پارتی، چونكە راستییا هەموو ئالییەكی دیار دبیت، شێوازێ ئاخڤتنا وان، چەند رەفتارێن وان بۆ خەلكی دیارببن، مە پێخوەشە، تاكو خەلك وان بنیاسیت و بزانیت هەر كەس بهایێ چەندێیە».

مەسرور بارزانی، سەرۆكێ حوكمەتا هەرێما كوردستانێ راگەهاند: درووشمێ دوماهیێ دێ پێ ئینین درووشمەكێ گەلەك نە گونجایە، دێ دوماهیێ ب چ ئینن؟ ئەو ب خوە د هەڤپشك بوون د حوكمەتێدا و ئەو وەلاتیێن ڤی نیشتمانی نە، پێشتر ژی بزاڤكریە دوماهیێ ب قەوارەیێ هەرێما كوردستانێ و شكۆیێ پێشمەرگەی و ئابوورێ هەرێما كوردستانێ و ریفۆرم و چاكسازیێ و روو ب روو بوونا گەندەلیێ بینن، هەكە ئەڤە درووشمێ وانە، ئەم ژی دبێژین نەشێن.
گۆت ژی” هیچ جوداهییەك نینە د ناڤبەرا خەلكێ سلێمانیێ و باژێرێن دی و هەموو وەلاتیێن خوەشتڤیێن ڤێ كوردستانێ نە، ، ئەو ئەجندایێن ل دەڤەرێن دی یێن كوردستانێ هاتینە بجهئینان، دەستهەلاتا حزبی كو ل سلێمانیێ بالادەست بوو، نەهێلایە ئەو ئەجندایە بهێنە بجهئینان. دەستهەلاتا حوكمەتێ ل سلێمانیێ ژی یا بالادەست بیت، سەرانە ستاندن نابیت و نەشێن رێگریێ ل پێشڤەبرنێ بكەن. پێدڤییە خەلك بزانیت كو رێگری هەبوو و خوەسەپاندنا دەستهەلاتا حزبی ل سەر دامودەزگەهێن حوكمەتێ هەبوو”.
مەسرور بارزانی د چاڤپێكەفتنەكێدا ل گەل كەنالێ (ئاڤا) بەرچاڤكر” مە چەندین داهات یێن هەین، داهاتێ گشتی كو ژ فرۆتنا پەترۆلێ بوو، ئەوژی ب بزاڤێن چەند ئالییان بوو كو ل ناڤخوە ژی هەوون، رێگری كر و نوكە ئەو داهاتە وەكو خوە نەمایە، ئەڤجا داهاتێن دی ژی یێن هەین وەكو رسۆمات و باج دڤێت هەموو ئەو داهاتە بزڤرن. ئەو داهاتنێن هەرێما كوردستانێ هەین هەموو د دیارن. هندەك داهات هەبوون كو ژ گۆمركان دهاتنە وەرگرتن، ئەو داهاتە ب تایبەت ل سنوورێ سلێمانیێ بۆ گەنجینەیا حوكمەتێ نەدهاتن، پێدڤی بوو ئەو داهاتێ ل سلێمانیێ دهاتە كۆمكرن بكەڤیتە د خزمەتا خەلكێ وێ پارێزگەهێدا، بەلێ زێدەتر بۆ خزمەتا حزبی بوو. ئەڤ هەلویستە نوكە هەی زێدەتر بۆ ڤەشارتنا ڤی كاری بوو و بزاڤ هاتییە كرن خولیێ بكەنە د چاڤێ خەلكیدا و راستییان ب شێوینن”.
سەبارەت پڕۆسەیا چاكسازیێ گۆت” نزانم ئەز گەلەك یێ توند بووم یان نە؟ دبیت خەلكی بۆچوونێن جودا هەبن، بەلێ چاكسازی پڕۆسەیەكا دوور و درێژە، تنێ ئەو نینە سەحكەیە بۆری و ئەو شاشیێن ل دەمێن بۆری هاتینە كرن، روو ب روویێ قانوونێ بكەی، چاكسازی ئەوە كو نەهێلی ئێدی گەندەلی بەردەوام بیت. چاكسازی هەموو د رۆهن و ئاشكرا بوون و مە شیایە رێگریێ ل وێ چەندێ بكەین كو هیچ كەس وێرەكیێ نەكەت جارەكادی هزر د گەندەلیێدا بكەت، روو ب رووبوون و راوەتساندنا گەندەلیێ باشترین چاكسازییە، هێشتا پڕۆسە یا مای ژی و نەراوەستییایە”.
گۆت ژی” رەوشا پەیوەندیێن هەولێرێ و بەغدا یا باشە و دخوازین باشتر بیت، د ڤێ كابینەیێدا پترین شاندان سەرەدانا بەغدا كریە و پترترین شاندێن بەغدا مە پێشوازی لێكریە، كە دانوستاندن ل گەل پترییا كێشەیان یا كری و قۆناغێن گەلەك باش مە یێن بڕین. بەری دەمەكی ژی شاندێ جڤاتا ئابووریێ بلند ل ئیراقێ ل ڤێرێ بوو، دو رۆژان مە گەلەك دانوستاندن كرن ل سەر هەموو گرفتێن ئابووری یێن د ناڤبەرا مە دا، مە ژی بزاڤكر شاندان بهنێرین و دانوستاندن بەردەوام بن. بەری چەند رۆژان شاندەكێ لژنەیا ئابووری ل جڤاتا نوونەرێن ئیراقێ ژی هاتبوو ل گەل وی مە دانوستاندن كرن، هەرێما كوردستانێ بەرهەڤی بۆ چارەسەركرنا هەموو وان كێشەیان ب تایبەتی كێشەیا مووچەی دیاركریە”.
هەروەسا دیاركر” ل گەل بەغدا د دانوستاندنان داینە بۆ چارەسەركرنا دوماهیێ یا كێشەیا مووچەیان، پشكەك پەیوەندی ب وێ چەندێ ڤە هەبوو كو ب دیتنا وان پێرابوونێن دی بهێنە وەرگرتن بۆ چارەسەركرنا كێشەیا مووچەیان. د دستووریدا مافێن هەرێما كوردستانێ یێن هاتینە دیاركرن و دڤێت بۆدجەیا هەرێما كوردستانێ ب دامودەزگەهێن هەرێما كوردستانێ بهێتە دان و دامودەزگەهێن هەرێما كوردستانێ چاڤدێرییا بابەتێ مووچەی و دارایی بكەن. بزاڤێن ناڤخوەیی و ئالیێن دی هەبوون بۆ وێ چەندێ دەستێ بەغدا راكێشنە ناڤ هووردەكاریێن بابەتێ مووچەیان و جۆرەها گرفت دروستكرن تاكو حوكمەتا فیدرالی هنارتنا مووچەیان رابگریت. ئەم شیاین دستووری بكەینە بنەما بۆ چارەسەركرنا كێشەیا مووچەیان. كێشەیا مە تنێ مووچە نینە، بابەتێ دەڤەرێن كوردستانێ و بابەتێ پێشمەرگەی و قەرەبووكرنا كەسوكارێن ئەنفالبوویان و هەموو خالێن دییە كو د دستووریدا هەین، هەموو ئەو بابەتە نەهاتینە چارەسەركرن، بابەتێ ئاخێ و پێناسێ هێشتا یێ مای. مە داخوازكرییە بابەتێ مووچەیان بكەڤیتە بەراهییا كێشەیێن دی و چارەسەر ببیت ژبەركو ئەو كێشەیا سەرەكییا خەلكییە”.
بەرچاڤكر” هەرێما كوردستانێ مولكێ تاكە كەسی نینە، هیچ كەس و ئالییەكێ سیاسی نەشێت هەرێما كوردستانێ پارچە بكەت، نە خەلك و ئەم ژی وێ چەندێ قبوول ناكەین، كوردستانێ یا بێ خودان نینە، ب خوین و قوربانیدانا پێشمەرگەی یا دروست بووی، چاوان كەسەك دشێت بهێت و بێژیت دێ هەرێما كوردستانێ پارچە بكەم. د دستووریدا هەرێما كوردستانێ وەكو قەوارەیەكێ ئێكگرتیێ دیارە، ئانكو كەسەك نەشێت بهێت و بەرۆڤاژی دستووری بڕیارەكا دی بدەت. حوكمەتا فیدرال نەشێت ژ دستووری دەربكەڤیت، ئەو بزاڤ ژ ئالیێ هندەك ئالییانڤە هاتینە كرن بۆ بەرژەوەندییا خوە و بۆ دەمەكی خەلكێ كوردستانێ پێڤە مژوولكر ژ پێخەمەت بەرژەوەندییا خوە”.
مەسرور بارزانی باس ل وێ چەندێ ژی كر كو بابەتێ ئاڤێ و كارەبێ ئێك ژ وان كێشەیانە كو دڤیا گەلەك زووتر بهێنە چارەسەركرن، بەلێ گەلەك ئەگەر ژی هەبوون كو وەكرییە د شیاندا نەبیت بهێنە چارەسەركرن. د بوارێ كارەبێدا مە گەلەك بزاڤ یێن كرین كو ژێدەرێ دروستكرنا وزێ بهێتە زێدەكرن، وەكو ئاڤ و هەوا و سۆلەر ئینەرجی، دروستكرنا وزەیا زێدەتر یا دهێتە كرن و ئەڤە ژی پشكەكە ژ بەرنامەیێن حوكمەتێ كو كار كار ل سەر دهێتە كرن و دەم بۆ دڤێت. بابەتەكێ دی رێكخستنا كەرتێ كارەبێیە ژ روویێ وان كەرەستێن ب كاردئینن یان چاوانیا دابینكرنا كارەبێ ب هەماهەنگی ل گەل وەلاتییان، ئەڤ ئەزموونە ل هەولێرێ یا هاتییە دەستپێكرن ودو تاخان كارەبا 24 ساتی یا هەی و ب خەرجییا كێمتر و بێی دەنگێ موەلیدەیان كارەب یا هەی. حوكمەت بزاڤێ دكەت د دەمەكێ نێزیكدا كێشەیا كارەبێ ل هەولێرێ چارەسەر بكەت و بۆ هەموو كوردستانێ ژی ئینشائەللا د دەمێ سالاندا كارەبا 24 ساتی دێ هێتە دابینكرن. ل گەلەك بواران ژی گوهۆڕین هاتینە كرن و ب هەدەردانا كارەبێ یا هاتییە كێمكرن”.
پتر گۆت” بابەتێ ئاڤێ ژی ب هەمان شێوە، ئاو ژی ئێك ژ پێدڤییانە كو ژیان یا پێڤە گرێدایە و دڤێت ئاڤێ دابین بكەین بەری هەموو تشتەكی بۆ خوارنێ، ل هەولێرێ و گەلەك باژێرێن دی مە ئەڤ پڕۆسە یا دەستپێكری، ل ڤێ دوماهیێ ل هەولێرێ مە دەست ب پڕۆژەیێ هاوارهاتنا ب لەز یا دابینكرنا ئاڤێ یا كری كو هەتا 30 سالێن دی كێشەیا ئاڤێ ل هەولێرێ نامینیت ب رێكا دو پڕۆژەیان. ل باژێرێن دی ژی هاتییە كرن وەكو ئاكرێ و چەمچەمال و جهێن دی. ژ بلی وێ چەندێ بابەتێ دروستكرنا بەنداڤان بۆ چاندنێ و گەشتوگوزارێ و وزێ و زێدەكرنا ئاڤا ژێرعەرد و بۆ روو ب رووبوونا قەیرانا هشكەسالیێ و گوهۆڕینا سەقی بهێنە بكارئینان، هەموو ئەو یێن د بەرنامەیدا و پێنگاڤێن باش ژی یێن هاتینە هاڤێتن و هیڤییا من ئەوە كو د دەمەكێ گەلەك نێزیكدا ئەنجام بۆ وەلاتییان دیار ببن”.
ئاماژەكر” ب دیجیتالكرنا سیستەمێ بانكی و خومەتگوزارییان، هەموو بۆ وێ چەندێیە وەلاتی رازی ببیت و ژیانەكا ب ساناهیتر و بەختەوەرتر هەبیت، مە وەلاتیێ خوە یێ كریە ئارمانجا سەرەكی كو چاوان خزمەتا وەلاتییان بكەین و ژ ژیانا خوە د رازی بن و خزمەتگوزاری بهێنە ب ساناهیتركرن، (هەژمارا) من پڕۆسەیەكە بۆ وێ چەندێ وەلاتی زێدەتر مفای ژێ وەربگرن، بۆ وێ چەندێیە هیچ كەسەك مووچەیێن وەلاتییان نەكەتە بارمتە و بێژیت ل گەل من بە هەكە مووچەی نادەمە تە، وەلاتی یێ نەچار نینە ژ بەر بەرژەوەندییا خوە بڕیارا سیاسی وەربگریت. پشكەكا دی یا مفایێن پڕۆژەی ئەوە كو خزمەتگوزاریێن بانكی دێ زێدەتر بن، ب كاش خزمەتگوزاری د سنووردارن، بەلێ هەكە سیستەمێ بانكیێ پێشكەفتی تە هەبیت، وەلاتی دشێن قەران وەربگرن و ل گەل جیهانێ تێكهەل ببن”.
راگەهاند ژی” خالەكا دی ئەوە كو رێكێ ل گەندەلیێ دگریت و كەس نەشێت پارەی سپی بكەت و یاریێ ب مووچەیێن وەلاتییان بكەت. هەموو پڕۆسە دێ د بەرژەوەندییا وەلاتییاندا بیت. ژ روویێ خزمەتگوزاریڤە (هەژمارا من) خزمەتگوزاریێن وی زێدەترن ژ تەوتینا ئیراقێ”.
گۆت ژی” ئەم نابێژین دێ تێك دەین، نابێژین بەسە، دبێژین دێ ئاڤەدانتر كەین و بەر ب پێشتر بەین” سەبارەت گەنجان ژی گۆت” گەنجان ب خوە د تێگەهشتینە، بلا ب درووشمان سەردا نەچن، هەكە بڤێت پاشەڕۆژەكا باشتر هەبیت و بشێن كەسایەتییا خوە وەكو پێدڤی ببینن، دڤێت ل گەل مە بن تاكو بشێین پێكڤە ل گەل وان وەلاتەكێ خوەشتر و سەقامگیرتر دروست بكەین”.

رەمەزان زەكەریا:

مێڤان محەمەد سەعید، بەربژارێ ژمارە 41 ل سەر لیستا ژمارە 190یا پارتی دیموكراتی كوردستان بۆ خولا شەشێ یا پەرلەمانێ كوردستانێ ل بازنەیێ دهۆك بەرنامەیێ كارێ خوە ئاشكرا كر و گۆت : دێ كاركەین كو ب قانوون مافێ كرێكاران ل كەرتێ تایبەت یێ پاراستی بیت.
مێڤان محەمەد سەعید، د دیدارەكێ دا بۆ رۆژناما ئەڤرۆ گۆت: زڤڕاندنا باوەریێ د ناڤبەرا دەنگدەر و بەربژاری دا دێ بنەمایێ كاركرنا من بیت، ئەو ژی ب رێكا خزمەتكرنا هەموو تەخ و چینان و خۆ جودا نەكرن دگەل وان.
ناڤبری گۆت ژی: دێ كار ل سەر هاندانا گەنجا و پشتەڤانیا وان كەم كو ببنە گەنجێن داهێنەر و خودان كار كو ئەڤە ببیتە ئەگەرەك گەنجێن مە قەستا دەرڤە و وەلاتێن بیانی نەكەن.
ناڤهاتی خویا كر : دێ بزاڤان كەت یاسایەكێ دەربێخن كو مافێ كرێكار و كارمەندێن ل كەرتی تایبەت كار دكەن یێ پاراستی بیت، ل چار سالێن پەرلەمانی دێ هەول دەم دەنگێ راستەقینەیێ پێشمەرگە و گەنج و لاو و هەژار و كێمدەرامەتا و جۆتیار و مامۆستا و فەرمانبەر و هەمی تەخ و چینەكێ بم.
ئاماژە ژی كر كو ب روحەكا گەنجانە كار ل سەر بجهئینانا ئارمانجێن گەنجان دێ‌ كەت، هەورەسا دێ كار ل سەر هندێ كەم كو گرنگیەكا پتر ب كەرتێ چاندنێ بهێتە دان و كەرتی چاندنێ ل دەڤەرێ بەر ب قۆناغەكا نوو بچیت.
مێڤان محەمەد سەعید زێباری ئاشكرا كر كو كارێ هەرە گرنگ و ل پێش بۆ وی ئەوە كو ب هەموو هێز و شیانێن خۆ ل سەر خەون و ئارمانجا چەند سالان یا هەمی خەلكێ ئاكرێ و بەردەرەش بكەت، ئەو ژی ئیدارا سەربخۆیە بۆ دەڤەرا ئاكرێ و بەردەڕەش.

دیدار: هۆشەنگ تاجر:

ئەندامەکێ مەکتەبا سیاسی یا پارتی دیموکراتی کوردستان/ سووریا دیار دکەت، سەرکەفتنا لیستا پارتی د ڤان هەلبژارتنان دا بۆ هەموو کوردان یا گرنگە، چونکی پارتی بەرگریێ ژ مافێن کوردان ل هەموو جیهانێ دکەت و هەر کەس دزانیت دەمێ پارتی بهێز بیت کوردستان ژی یا بهێزە.

سەعید عومەر ئەندامێ مەکتەبا سیاسی یا پارتی دیموکراتی کوردستان/ سووریا د دیدارەکا تایبەت دا بۆ رۆژناما ئەڤرۆ دیار کر، ئەڤ هەلبژارتنە گەلەک گرنگن، چونکی نها زۆرداریەکا گەلەک مەزن ل سەر کوردان هەیە و ل بەغدا ژی ب رێیا دادگەها فیدرالی گەلەک زۆلم ل گەلێ کوردستانێ هاتە کرن، پارتی بەرەڤانیێ ژ گەلێ کوردستانێ و هەموو نەتەوە و پێکهاتەیێن دی دکەت یێن ل کوردستانێ دژین، ژ بەر ڤێ یەکێ ژی سەرکەفتنا لیستا ١٩٠ یا پارتی دیموکراتی کوردستان دهێتە رامانا سەرکەفتنا ئیرادا گەلێ کوردستانێ و گۆت: (پارتی دیموکراتی کوردستان هەردەم داکۆکی ل مافێن کوردان ل هەموو پارچێن دی یێن کوردستانێ کریە، د مەرجێن گەلەک زەحمەت دا مە دیت کا چاوا جەنابێ سەرۆکی و پارتی دیموکراتی کوردستان پشتەڤانی ل کوردێن پارچێن دی یێن کوردستانێ کرینە، ژ بەر ڤێ یەکێ ژی ئەڤرۆکە مە پێ باشە لیستا ١٩٠ د ڤان هەلبژارتنان دا سەرکەفتنەکا گەلەک مەزن بدەستڤە بینیت دا چو مەترسی ل سەر مافێن رەوا یێن گەلێ کورد دروست نەبن).
ناڤهاتی د پشکەکا دی یا ئاخڤتنا خوە دا ئەو یەک ژی دیار کر، دڤێت پارتی سەرکەفتنا مەزن بدەستڤە بینیت دا ل خۆلا نوو یا پەرلەمانی دا بهێز بیت، چونکی گەلەک یاسا هەنە دڤێت بهێنە دەرخستن و هندەک ژی بهێنە سەرەراست کرن، ژ بەر ڤێ یەکێ ژی بهێبزبوونا پارتی ل خۆلا نوو یا پەرلەمانێ کوردستانێ دێ بیتە ئەگەر گەلەک مەترسیێن هەی ل سەر کوردستانێ نەمینن و گۆت: (پارتی دیموکراتی کوردستان ب کریاری سەلماندیە کو بۆ خزمەتا گەلێ کوردستانێ هاتیە ئاڤا کرن، لیستا ١٩٠ یا پارتی دیموکراتی کوردستان، لیستا خزمەتکرنا خەلکێ کوردستانێ یە، لیستا ئاڤەدانی و ئارامیێ یە، لیستا بەرەڤانیکرن ژ کوردستانێ یە، ژ بەر ڤێ یەکێ ژی ئەز باوەرم دێ رێژەیەکا گەلەک مەزن ژ وەلاتیێن کوردستانێ دەنگێ خوە دەنە لیستا ١٩٠ یا پارتی دیموکراتی کوردستان، چونکی د رەوشا نها یا ئالۆز دا کو گەلەک مەترسی ل سەر کوردستانێ هەنە، بهێزبوونا پارتی دێ گەلەک مەترسیێن هەی نەهێلیت و هەر کەس ژی دزانیت دەمێ پارتی بهێز بیت دێ کوردستان ژی یا بهێز بیت).
ئەندامێ مەکتەبا سیاسی یا پارتی د دووماهیا ئاخڤتنا خوە دا ئاماژە ب ڤێ یەکێ ژی کر کو، پارتی د قۆناغێن گەلەک سەخت و دژوار دا ل گەل خەلکێ خوە مایە، ژ بۆ ئازادیا کوردستانێ گەلەک شەهید داینە و ئەڤرۆکە ژی پارتی ب کریاری سەلماندیە دێ شێت کوردستانێ پارێزیت و بەردەوامیێ دەتە کاروانێ ئاڤەدانی و ئارامیێ، ژ بەر ڤێ یەکێ ژی ئەز هێڤیدارم پارتی د ڤان هەلبژارتنان دا سەرکەفتنەکا مەزن بدەستڤە بینیت، ب سەرکەفتنا پارتی دێ پێگەهێ هەرێما کوردستانێ ژی گەلەک بهێزتر لێ هێت.

جێگرێ سەرۆكێ پارتی دیموكراتی كوردستان راگەهاند، د هەلبژارتنێن پەرلەمانێ كوردستانێدا دێ مەزنترین سەركەفتنێ ب دەستڤەئینین.
دوهی چارشەمبی 2/10/2024، مەسرور بارزانی، جێگرێ سەرۆكێ پارتی دیموكراتی كوردستان ل دچارچۆڤەیێ كۆمبوونێ ل گەل قوتابی و لاو و ئافرەتان ل باژێرێ هەولێرێ، د پەیڤەكێدا راگەهاند» ب دەنگێن هەوە، خودێ هاریكار بیت، د ڤان هەلبژارتناندا دێ سەركەفتنێ ب دەستڤەئینین».
جێگرێ سەرۆكێ پارتی گۆت ژی» هندەك ئالیێن سیاسی بەردەوام بزاڤكریە لاوێن هەرێما كوردستانێ بێ ئومێد بكەن، پارتی یا هاتی بۆ وێ چەندێ جارەكادی هیڤیێ بۆ لاوێن هەموو باژێر و باژێركێن هەرێما كوردستانێ بزڤرینیت».
مەسرور بارزانی هەلبژارتنێن ڤێجارێ یێن پەرلەمانێ كوردستانێ ب چارەنڤیسساز هەژمارتن و داخوازكر، بانگەشەیا هەلبژارتنان یا ئالیێن سیاسی ل هەرێما كوردستانێ ب شێوەیەكێ مەدەنییانە و دیموكراسییانە بڕێڤەبچیت.
جێگرێ سەرۆكێ پارتی ئاماژەكر ژی» ئەنجامێن هەلبژارتنان دێ دیاركەن كا وەلاتیێن هەرێما كوردستانێ ل گەل كیش حزبەكێ و بڕیارەكێ نە».
باس ل وێ چەندێ ژی كر» ئەگەرێ وێ چەندێ پارتی ل هەموو هەلبژارتنان یا ئێكێ بوو، ئەوە كو پارتی ئەڤ ئەزموونە یا دروستكری و پارتی ژی دێ ڤێ ئەزموونێ پارێزیت».
مەسرور بارزانی رۆهنكر ژی» پارتی ب تنێ گەلەك دەستكەفت هەبوون، بەلێ هیچ ئالییەكێ دی بێی پارتی نەشیایە دەستكەفت هەبن».
جێگرێ سەرۆكێ پارتی گۆت ژی» مە نەخواستییە خەلك ژ مە بتریت، مە نە خواستییە ب چاڤسووركرنێ خەلكی ل دوروبەرێن خوە كۆمبكەین، دخوازین ب خوەشتڤی و ڤیان، خەلكخەز ژ پارتی بكەت».
دوپاتكر ژی» ئەم چو جاران شەڕخواز نەبووین و هەردەم مە داخوازا ئاشتیێ كریە و مە خواستییە ب ئاشتی و پێكڤەكاركرنێ كوردستانێ بەر ب پێشڤە ببەین».
مەسرور بارزانی ب ئالیێن سیاسی یێن هەرێما كوردستانێ گۆت» بۆ بانگەشێ بیت یان بۆ هەر مەبەستەكێ بیت، دەمێ هێرشێ ل سەر پارتی دكەن، هندەك هێل یێن هەین دەرباز نەكەن، چونكە سوباهی دێ هێنە دەف مە، هندەك بهێلن كو ل هەوە ببۆرین».
گۆت ژی» ئەم باسێ خۆڕاگریێ دكەین، پارتی خۆڕاگر بوو بەرامبەر هەموو هێرشان، پارتی هەموو ئەو داستان تۆماركرینە و دوژمن شكاندینە و هەرێما كوردستانێ و كەرامەتا خەلكێ كوردستانێ یا پاراستی، پارتی شانازیێ دكەت كو ب راكرنا درووشمێ خۆڕاگری، ل بەرامبەر هەموو تەحەدی و مەترسی و هێرشان دێ خۆڕاگر بیت، بەلێ ئەو ئالیێن دبێژن ب راوەستن، بلا بێژمە هەوە پارتی ب راوەستیت دێ هەوە داگیر كەن، بێی پارتی نەشێن».
خویاكر» درووشمێن وەسا یێن هەلگرتین دبێژنە مە دێ دووماهیێ پێ ئینین، ئایا دێ دووماهیێ ب چ ئینن؟ ب قەوارەیێ هەرێما كوردستانێ؟ ب ئاڤەدانیێ؟ ب شكۆیا پێشمەرگەی؟ ب هەوە؟ دێ دووماهیێ ب چ ئینن؟ بەرسڤا مە ئێك پەیڤە، هین نەشێن».
رۆهنكر ژی» پێشتر ژی بزاڤ كربوو، ئەڤە یا نوكە نینە، پێشتر ژی بزاڤ كربوو ڤی قەوارەی نەهێلن، پێشتر ژی پشكداربوون د پیلاناندا بۆ وێ چەندێ ڤی قەوارەی لاواز بكەن، د بەرهەڤبوون خوەژی ژناڤ ببەن بۆ وێ چەندێ ل بن سەركردایەتییا پارتی ئەڤ حوكمڕانییە تووسی شكەستنێ بهێت. بزاڤین وان د بەردەوام بوون، بەلێ نەشیاینە، چونكە ڤی وەلاتی خودان یێ هەی، ڤی وەلاتی پارێزەر یێ هەی، هوون خودانێن ڤی وەلاتی نە و پارێزەرێن ڤی وەلاتی ژی پێشمەرگەیە. هیچ ئالییەك، هیچ تاكە كەسەك، نەشێت كاروانێ پارتی ب راوەستینیت، نەشێت ڤی قەوارەی تێك بدەت، چونكە تنێ كەسەك كو بڕیارێ ل چارەنڤیسێ ڤی وەلاتی بدەت، دەنگێ هەوەیە و دەنگێ هەوە ل 20/10 دێ دیار كەت كا كی دێ بەردەوام بیت و كی دێ حوكمڕان بیت».
دوپاتكر ژی» بۆ وێ چەندێ مەترسی نەكەڤیتە سەر قەوارەیێ هەرێمێ، بۆ وێ چەندێ بێریزی بەرامبەر خوینا شەهیدان نەهێتە كرن، بۆ وێ چەندێ بێوەفایی بەرامبەر خەباتكەران بەردەوام نەبیت، بۆ وێ چەندێ مادەیێن بێهۆشكەر نەهێنە كوردستانێ، ترس و توقاندن نەمینیت، بۆ وێ چەندێ سەرانە ستاندن نەمینیت، بۆ وێ چەندێ رادەستكرنا ئاخا كوردستانێ ئێدی نەهێتە قبوولكرن، بۆ وێ چەندێ سڤكاتی قبوولكرن ئێدی بەردەوام نەبیت، بۆ سەربلندییا مالێن شەهیدان، بۆ ئاڤەدانیێ، بۆ پێشكەفتنێ، بۆ زانستێ، بۆ هێڤییان، بۆ پاشەڕۆژێ، دەنگی ب پارتی دیموكراتی كوردستان بدەن».

دوهی چارشەمبی 2/10/2024، مەسرور بارزانی سەرۆكێ حوكمەتا هەرێما كوردستانێ، د دو رێوڕەسمێن جودا دا كۆمپانییا سفر و كێبلێ هەولێرێ و كارگەهەكا بەرهەمئینانا سەرنجان ڤەكرن.
سەرۆكێ حوكمەتا هەرێما كوردستانێ د رێورەسمێن ڤەكرنا كۆمپانییا سفر و كێبلی دا د پەیڤەكێدا خوەشحالییا خوە دیاركر بۆ ڤەكرنا وێ كۆمپانیێ و گۆت» ئەڤ كارگەهە پشكەكە ژ پڕۆژەیێ دروستكرنا ژێرخانەیەكا ئابوورییا ب هێز ل كوردستانێ.
گۆت ژی» ئەوا من ئەڤرۆ دیتی كۆمەكا كارگەهانە كو هەموو تمامكەرێن هەڤدونە بۆ وێ چەندێ ئەو كێبل و وایرێن پێدڤی دروست بكەت و بكەڤنە د بازاریدا بۆ مفا وەرگرتنێ».
دیاركر ژی» د سەرەدانا خوە دا بۆ كارگەهان من پرسیارا وێ چەندێ كر كو ب چ جۆرەكی ئەو كێبل دهێنە دروستكرن و مادەیێن دەستپێكی ژ كیڤە دهێن، دیارە پترییا مادەیێن دەستپێكی ژ وان سیكرابان دهێنە كۆمكرن، كو پێشتر دهاتنە هنارتن بۆ دەرڤە، بەلێ نوكە ل ڤان كارگەهان مفا ژێ دهێتە وەرگرتن و وەكو كێبلەكێ ئاست بلند دكەڤیتە د ناڤ بازاریدا و ب ستانداردێن جیهانی دهێنە بەرهەڤكرن».
سەرۆكێ حوكمەتا هەرێمێ رۆهنكر ژی» هیڤیدارم رۆژەكێ كوردستانێ وەلێ بهێت ژ ژێدەرێن سروشتی و كانزایێن بەردەست مادەیێن دەستپێكی بۆ دروستكرنا ڤان جۆرە بەرهەمان بهێنە بكارئینان».
هەروەسا خوەشحالییا دیاركر و گۆت» گەلەك پێخوەشحالبووم كو من گوهلێبووی دەلیڤەیێن كاری ب رێكا ڤان كارگەهان یێن هاتینە پەیداكرن و چەندین خێزان دشێن ل ڤان كارگەهان كار بكەن، ئەڤە ژی پشكەكە ژ دروستكرنا ژێرخانەیا ئابوورییا ب هێز ل هەرێما كوردستانێ، كو پێشڤەبرنا كەرتێ پیشەسازی ئێك ژ وان بەرنامەیێن د چارچۆڤەیێ سیاسەتا حوكمەتا هەرێما كوردستانێدا مە گرنگی پێدای».
سەرۆكێ حوكمەتا هەرێما كوردستانێ هیڤی خواست ل حوكمەتێ بشێن زێدەتر هاریكارییا كەرتێ پیشەسازی بكەن و هاریكار بن د وێ چەندێ دا بەرهەمێن ناڤخوەیی د پاراستی بن.
هەروەسا راگەهاند» خوەشحالم كو من گوهلێبووی یێن شیاین بەرهەمێن خوە بۆ چەندین وەلاتان بهنێرن، ئەڤە ژی كارەكێ گەلەك باشە و دیدەڤانییا وێ چەندێ ددەت كو بەرهەمێن ناڤخوەیی ژ روویێ كوالێتیێ ڤە د ئاستەكێ گەلەك بلند دانە. هیڤیدارم ئەڤ كارگەهێن نوكە مە سەرەدانا وان كری و چ كارگەهێن دی ژی بلندییا كوالێتییا بەرهەمێن ناڤخوەیی ل بەرچاڤ وەربگرن».
ژ ئالییەكێ دیڤە سەرۆكێ حوكمەتا هەرێمێ د پەیڤەكێدا د رێوڕەسمێ ڤەكرنا كارگەها (SmC) بۆ بەرهەمئینانا سەرنجان گۆت» خوەشحالم ئەڤرۆ ئەڤە دوەمین كارگەها پیشەسازییە كو سەرەدانا وێ بكەم، كو بۆ درستكرنا سەرنجایە كو ئەڤە تشتەكێ گرنگە ژ روویێ ساخلەمی ڤە بۆ هاریكارییا كەرتێ پیشەسازی ب تایبەتی كەرتێ ساخلەمی كو ئەڤە كارەكێ هەڤپشكە و هاریكارییا وێ چەندێ دكەت كو كوردستان كێمتر پێدڤی ب ئینانا مادەیان بیت ژ دەرڤە، دێ بزاڤان كەین پترییا وان كەرەستێن ژ نوكە و وێڤە هەر ل كوردستانێ بهێنە دروستكرن بۆ بەر ب پێشڤەبرنا كەرتێ پیشەسازی و باشتركرنا كەرتێ ساخلەمی و دێ بیتە ئەگەرێ زێدەبوونا دەلیڤەیێن كاری و د ئەنجامدا ژی باشتركرنا ژیان و خوەشگوەزەرانییا خەلكێ كوردستانێ و پیشئێخستنا كەرتێ ئابووری ل هەرێما كوردستانێ.
گۆت ژی» تاكو خەلكێ مە بشێت كاری ل ڤان جۆرە كارگەهان بكەت، هەم داهات و دەرامەتێ وان دێ باشتر بیت و هەم دشێن مفای ژ ئەزموون و بسپۆرییان ب تایبەتی ژ ڤان جۆرە كاران وەربگرن و شیانێن خوە یێن زانستی ل جهێن جودا جودا بەرفرەه بكەن».
دیاركر ژی» هیڤیدارم هەر وەبەرئێنەرەك، هەر كەسەك كو شیانێن وێ چەندێ هەین بشێت ل كوردستانێ وەبەرئێنانێ بكەت بۆ پێشئێخستنا كەرتێ پیشەسازی، پشتڕاست بن كو حوكمەت دێ هاریكار و پشتەڤانا وان بیت، چ ژ ئاسانكاریێ بۆ دامەزراندنا وەبەرئێنانا وان، دامەزراندنا وان كارگەهێن دخوازن كاری تێدا بكەن، چ ژ پاراستنا بەرهەمێن وان و هەم دیتنا رێكێ ژی هنارتنا بەرهەمێن وان، تاكو ئەم بشێین بالانسەكێ باشتر ژ روویێ بازرگانیڤە د ناڤبەرا هەرێما كوردستانێ و وەلاتێن دیتر دروست بكەین».

دیدار: هۆشەنگ تاجر:

مامۆستایەکێ زانکۆیێ دیار دکەت، نها رۆژهەلاتا ناڤین د رەوشەکا گەلەک تایبەت و هەستیار دایە، د ئاستێ دەڤەرێ، ئیراقێ و هەرێما کوردستانێ دا پیلان ل دژی پارتی دهێنە گێران و سەرکەفتنا پارتی د ڤان هەرلبژارتنان دا گەلەک گرنگە، چونکی بێی پارتی تشتەک ب ناڤێ هەرێما کوردستانێ نامینیت.

د. رێبین سەلام مامۆستایێ زانکۆیێ د دیدارەکا تایبەت دا ل دۆر هەلبژارتنێن پەرلەمانێ کوردستانێ دیار کر، بێگومان ئەڤ هەلبژارتنە پێدڤی بوو بەری دو سالان بهێنە کرن، لێ ئێکەتی رازی نەبوو و پاشی ژی وان پیلانەک ل دژی پارتی دروست کربوون، وان وەسا دڤیا بەری هەلبژارتنان هەموو تشت ب دلێ وان بیت و پارتی لاواز بکەن، بێگومان پارتی هەر زوو هەست ب وێ پیلانێ کر و هەلوەستێ خوە یێ دیرۆکی دیار کر، هەلوەستێ پارتی ژی بۆ ئەگەرێ ژناڤبرنا وێ پیلانێ و گۆت: (نها گەلەک گرنگە کو هەلبژارتن ل هەرێما کوردستانێ بهێنە کرن، بۆ رەواتیا سازی و دەزگەهێن نها یێن ل هەرێما کوردستانێ دڤێت هەلبژارتن بهێنە کرن، بێگومان مە دڤێت د ڤان هەلبژارتنان دا پارتی سەرکەفتنەکا گەلەک مەزن بدەستڤە بینیت، چونکی ئەو یەک ژ بۆ هەرێما کوردستانێ گەلەک یا گرنگە).
مامۆستایێ زانکۆیێ د پشکەکا دی یا ئاخڤتنا خوە دا ئەو یەک ژی دیار کر، هەکە مرۆڤ بەرێ خوە بدەتە درووشمێن هێزێن سیاسی دێ دیار بیت کا وان چ دڤێت، ژ بلی پارتی هەموو هێزێن دی یێ کار بۆ ژناڤبرنا هەرێما کوردستانێ دکەن، دبێژن دێ خراب کەم، دێ ژناڤ بەم، ئەرێ هوون دێ چ خراب کەن؟ هوون دێ چ ژناڤ بەن، ئارمانجا وان خرابکرن و ژناڤبرنا هەرێما کوردستانێ یە و گۆت: (ژ بەر ڤێ یەکێ ژی دڤێت ئەم هەموو دەنگێ خوە بدەینە لیستا ١٩٠ یا پارتی دیموکراتی کوردستان، چونکی بێی پارتی تشتەک ب ناڤێ هەرێما کوردستانێ نامینیت، چونکی ئەوێن دبێژنە خوە ئۆپۆزسیۆن ژ سیاسەتا وان و درووشمێ وان دیارە ئارمانجا وان خرابکرنە، نیەتا وان وەرگرتنا دەستهەلاتێ نینە، هێزەکا سیاسی هەکە بڤێت دەستهەلاتێ وەربگریت دڤێت پتر ژ دەستهەلاتێ بەرنامە بۆ خزمەتا وەلاتیان هەبیت، لێ یێن ل هەرێما کوردستانێ دبێژنە خوە ئۆپۆزسیۆن یێ کار دکەن دا ئەوا هەی ژی ژناڤ ببەن).
د. رێبین سەلام ئەو یەک ژی دیار کر، هەکە ئەم بەرێ خوە بدەینە رەوشا سلێمانیێ دێ بۆ مە ئاشکرا بیت کا یا ئەوان دڤێت چیە، چونکی ئارمانجا وان ئەو نینە دا خزمەتا خەلکێ کوردستانێ بکەن، د بنیات دا وان چو بەرنامە ژی بۆ خزمەتکرنێ نینن، بەرێ خوە بدەیە درووشمێ وان دیارە، نابێژن دێ گوهۆڕینان کەین یان ژی کارێن باشتر کەین، بەلکو دبێژن دێ ژناڤ بەین، ئانکۆ وەکو دوژمنێن گەلێ کوردستانێ سەرەدەریێ ل گەل دەستکەفتیێن هەی دکەن و ئەو یەک ژی بێگومان مەترسیەکا گەلەک مەزنە ل سەر پاشەرۆژا هەرێما کوردستانێ، د ڤێ خالێ دا گەلەک یا گرنگە خەلک راستیێن هەی ببینیت و بزانیت کا کیژ هێزە دێ هەرێما کوردستانێ پێش ئێخینیت و پتر خزمەتا وان کەت، هەر کەس ژی دزانیت تنێ پارتی بەرنامە بۆ پاشەرۆژا کوردستانێ هەنە، ڤێجا گرنگ ئەم هەموو دەنگێ خوە بدەینە لیستا ١٩٠ یا پارتی دیموکراتی کوردستان.
مامۆستایێ زانکۆیێ ئەو یەک ژی دیار کر، هێزێن دی تنێ شریکێ دەستکەفتانن، د خوەشیان دا هەنە لێ دەمێ دبیتە تەنگاڤی خوە بەرزە دکەن و تنێ پارتی دمینیت، ژ بەر ڤێ یەکێ ژی ئەز داخواز ژ هەموو خەلکێ کوردستانێ دکەم وەکو ئێکەم هەلبژارتنێن ل کوردستانێ یێن پشتی سەرهلدانێ وەسا بچنە سەر سندوقێن دەنگدانێ و ب دەنگێ خوە پاشەرۆژا خوە دیار بکەن، بێگومان ب دەنگدان ب لیستا پارتی دێ هەم هەرێما کوردستانێ بهێز کەڤیت و هەم دێ پاشەرۆژا مە یا گەش بیت، سەرکەفتنا لیستا پارتی سەرکەفتنا مە هەموویانە.

دلڤین رەشید:

بەربژارێ‌ ژمارە ئێك یێ‌ لیستا 190 یا پارتی دیموركراتی كوردستان، دكتور ئیبراهیم محەمەد سالح شەرەفانی، كو سەرۆكێ‌ لیستا پارتی دیمۆكراتی كوردستانە ل بازنەیێ‌ دهۆكێ‌ بۆ رۆژناما ئەڤرۆ دیار كر، ل باژێرێ‌ دهۆكێ‌ ژ دایك بوویە و بابێ‌ وی پێشمەرگەیێ‌ شۆڕەشا ئیلۆنێ‌ بوو و دەمێ‌ دەه سالانە مامۆستایێ‌ زانكۆیێ‌ بوو، ل دووڤ دا بوویە سەرۆكێ‌ پشكا زانستێن سیاسی ل زانكۆیا دهۆكێ‌ و نوكە ژی ل سەرۆكاتیا جفاتا وەزیران شیرەتكارە.
شەرەڤانی دیار كر: پەیرەوكرنا بەرنامێ‌ پارتی دیموكراتی كوردستان كو بەرنامەكێ‌ گشتگیرە گرێدایی هەموو سێكتەرێ‌ن ژیانێ‌ یە، بۆ ب هێزكرنا دەولەتداریێ‌ و سەروەریا یاسایی، دێ‌ كاركەین ژپێخەمەت خورتكرن و كاراكرنا یەكسانیێ‌ د گەشەپێدانا هەموو ناوچە و پارێزگەه و دەڤەرێن هەرێما كوردستانێ‌ دا كەین.
دكتۆر ئیبراهیم شەرەفانی ئاماژە كر كو پارتی رەنگڤەدان و دەربڕینا سیاسی و ئابووری و جڤاكی یا گەلێ‌ كوردستانێ‌ یە، لەورا پارتی چەند یا ب هێز بیت دێ‌ ئارامی و ئاڤەدانی و پێكڤەژیان ل هەرێما كوردستانێ‌ بەرقراربیت.
بەربژارێ‌ ژمارە ئێك یێ‌ لیستا 190 یا پارتی گۆت ژی:( داخوازێ‌ ژ جەماوەرێ‌ كوردستانێ‌ ب گشتی و جەماوەرێ‌ خۆڕاگرێ‌ پارێزگەها دهۆكێ‌ و ئیدارەیا سەربخۆ یا زاخۆ دكەم، بانگەشەكا ئارام و پشكداریەكا كارا د پرۆسەیا هەلبژارتنێن خۆلا شەشێ‌ یا پەرلەمانێ‌ كوردستانێ‌ دا بكەن و دەنگێ‌ خۆ بدەنە لیستا 190 یا پارتیا مە پارتی دیموكراتی كوردستان).

رەمەزان زەكەریا:

ئەیوب وەیسی سالح سوورچی بەربژارێ ژمارە 3 ل سەر لیستا 190 یا پارتی دیموكراتی كوردستان بۆ خولا شەشێ یا پەرلەمانێ كوردستانێ بازنەیێ دهۆكێ‌، بەرنامەیێ خۆ یێ كاری ئاشكرا كر.
ئەیوب وەیسی سالح سوورچی، بەربژارێ ژمارە 3 ل سەر لیستا 190 یا پارتی دیموكراتی كوردستان بۆ رۆژنامەیا ئەڤرۆ گۆت: د ژیانا خۆ دا د گەلەك واران دا خزمەت كریە ل قوناغا پێشمەرگایەتیێ و جەندین بەرپرسیارەتی هەبووینە گەلەك كار بۆ خەلكی كریە ب تایبەت كاروبارێن جڤاكی و هاریكاریا هەژارا و كارێن خێرخوازی و نووژەنكرنا قوتابخانان و پشكدار بوون د ئاڤاكرنا چەندین مزگەفتان دا و هاندان و هاریكاریا گەنجان.
ناڤبری گۆتژی : بەرپرسێ لاوان بووم و ئەڤە ئێكەم كارێ من بوویە د ناڤ رێزێن پارتی دا ل سالا ١٩٩١ دا و بەردەوام پشتەڤان و هاریكار بوویمە كو دەرفەت بۆ گەنج و لاوان بهێتە دان و پتر گەنج رۆلێ خو بگێڕن و پشكداربن د كاروبارێن حزبی و حكومی دا، ژبەركو لاو پاشەرۆژا وەلاتێ مەنە و دینەمۆیا هەمی شۆڕەش و بەرخودانان بووینە و گەنجێن مە ژ هەژی هەر خزمەتەكێ نە و بەردەوام پشتەڤان و هاریكارێ گەنج و لاوێن دەڤەرێ مە، هەر ژبەر هندێ ل دەڤەرێ ب گشتی ب دۆستێ گەنجا دهێمە ناسین.
ناڤهاتی خویا كر: من دیتنەكا جودا بۆ پێشئێخستنا دەڤەرێ یا هەی د وارێن چاندنێ‌، تەرشوكەوالی، گەشتوگوزارێ و وەرزشێ ژی دا، چونكو بخۆ كەسەكێ‌ وەرزشڤانم و د وارێ گەشتوگوزارێ ژی دا من خزمەتەكا باش یا كری و ئێك ژ هاڤینگەهێن بجیل كو ب ناڤێ (سیپێ بجیل)ێ ژهزرو بیرێن من بوویە و ئێك ژ دامەزرێنەرێن ڤی پرۆژێ مەزنێ گەشتیاری بووم و نوكە ژی بوویە ناڤەدانەكا گەشتیاری ل هەموو باژارێن ئیراق و كوردستانێ سەردانێ بۆ دكەن خەلكێ بجیل ژی هەتا رادەیەكێ باش مفا ژێ دیتە.

سالار محەمەد دۆسكی:

ڤەژین عەبدالرحمان محەمەد ئەمین بەرواری، كچا شەهید عەبدالرحمان سیاری بەربژارا هەژمارە (38) لیستا (109) یا پارتی دیموكراتی كوردستان بۆ خولا شەشێ‌ یا پەرلەمانێ‌ كوردستانێ‌ بۆ ئەڤرۆ گۆت: هەمی سیاسەت و سیستەمێن دیموكراسی پێدڤی یە خەلك بزانیت كو پێنوسێ‌ چارەنڤێسێ د دەستێ‌ وان دایە، ئانكو دەستهەلات خەلكە و هەكە خەلك كێمخەمیێ‌ بكەن دێ‌ كێمخەمیێ‌ د دینەموویا خزمەت و دەستهەلاتێ‌ دا دەركەڤیت، لەوما پێدڤی یە خەلكێ‌ مە بچنە سەر سندۆقێن دەنگدانێ‌ و ئەڤە ئەركەكێ‌ پێدڤی و سەرەكی یە و دەنگدان بۆ لیستا قوربانیدان و پێشڤەچوون لیستا سەرۆك بارزانی لیستا 190 باشترین ئەركە ئەم بجهبینین.
ڤەژین عەبدالرحمان گۆتژی: دیرۆك شاهدە ل سەر دەسكەفتێن پارتی دیموكراتی كوردستان كو ئەو پێگەه و بناغێ‌ پارتی دانایی ب ساناهی ب كەسێ‌ و چو لایەنێن دی ناهێتەكرن.
هەمان بەربژارا پەرلەمانێ‌ ئەو ژی گۆت: هەكە خودێ‌ حەز كر ئەم چووینە پەرلەمانێ‌ كوردستانێ‌ دێ‌ هەمی بزاڤێن مە ئەوبن پرۆگرامێ‌ لیستا پارتی جێبەجێ بكەین كو پرۆگرامەكێ‌ تژی خزمەت و بەرخودانە ژ ئەڤان دەسكەفتان و هەمی بیاڤێن خزمەتكرنێ‌ چ ژ كەرتێن ساخلەمی و پەروەردێ‌ و خزمەتگوزاریێ‌ بخوە ڤە دگریت و دێ‌ كار ل سەر وێ‌ چەندێ‌ كەین كو ژین و ژیارا خەلكێ‌ مە باشتر لێ‌ بهێت.
ئاشكرا ژی كر كو پلان و بەرنامەكێ‌ رێكخستی دارێتی یە كو هەمی سێكتەرێن ژیانێ‌ بخوە ڤە دگرن، و گۆت: هەكە خودێ‌ دەلیڤە دا مە و خەلكی باوەری دا مە، دێ‌ كار ل سەر بیاڤێن گەنجان، مالێن كیم داهات، خواندن و رەوشەنبیری و رێك و پران، …هتد كەین، پلانێن هەرە دەستپێكی كاری ل سەر بكەم و خۆشحال دبینم كو من ئەو دەلیڤە هەبیت خزمەتا گەل و وەلاتێ‌ خوە بكەم.